Naxçıvan Muxtar Respublikası
Mədəniyyət Nazirliyi













XƏBƏRLƏR
      Ordubad rayonunun Gənzə kəndində yerləşən və XV yüzilliyə aid olan Gənzə hamamı Naxçıvanın ən qədim abidələrindən hesab olunur. Hamam Hacı Hüseynqulu məscidinin şimal-şərq tərəfində yerləşir. Şimal-şərqdən girişi olan hamamın uzunluğu 22,6, eni 9,4, hündürlüyü isə 5,6 metrdir. Ümumi sahəsi 213 kvadratmetr olan hamamın əsas və köməkçi otaqları iki günbəzlə örtülüb. Otaqlar bir-biri ilə kiçik tamburlar vasitəsilə birləşir. İsti su hovuzu əsas otağa bitişik inşa olunub. Keçmişdə hovuza su dağlardan çəkilmiş saxsı su boruları ilə gətirilib. Su xəzinənin arxasında inşa olunmuş su anbarına toplanaraq oradan hamama və hovuza verilirdi. İnsanlar isti suyu yuyunma otağına açılan hovuzdan, soyuq suyu isə digər borular vasitəsi ilə xəzinənin yanında yerləşdirilən otaqdan götürərdilər. Otaqların altında isti hava verən kanallar keçir. Hamamın üç bacası var. Hamamı digər orta əsr hamamlarından fərqləndirən cəhəti onun divarlarının, günbəz və tağ-tavanlarının dağ daşı ilə inşa olunmasıdır. Hamamın içərisi günbəz və tağ tavanının mərkəzində qoyulan baca vasitəsilə işıqlandırılır. Döşəmənin altından hovuzdakı suyu qızdırmaq üçün istifadə olunan borular keçir.


Naxçıvan Muxtar Respublikası
Mədəniyyət Nazirliyinin Mətbuat Xidməti
18.08.2019



      Bu gün muxtar respublikamızda professional teatrların formalaşmasında baza rolu oynayan xalq teatrlarının inkişafı üçün hərtərəfli şərait yaradılıb. Belə teatrlar həm istedadlı gənclərin üzə çıxarılması, həm də hazırladıqları müxtəlifməzmunlu tamaşalarla tamaşaçıların estetik zövqünün formalaşmasında əhəmiyyətli rol oynayırlar.

Bu il 10 yaşını qeyd edən və Naxçıvandakı belə teatrlar sırasında öz yeri olan Babək Rayon Xalq Teatrı ötən müddət ərzində hazırladığı səhnə əsərləri ilə tamaşaçı rəğbəti qazanıb. Biz də bu teatrın fəaliyyətini ətraflı öyrənmək üçün Babək Rayon Mədəniyyət Sarayına üz tutduq. Teatrın fəaliyyəti ilə bağlı bizi sarayın direktoru Faiq Heydərov məlumatlandırdı.

O bildirdi ki, 2006-cı ildə Cəlil Məmmədquluzadənin “Kamança” pyesini səhnələşdirən Babək Rayon Mədəniyyət Sarayının dram dərnəyinin üzvləri bunun ardınca 2008-ci ildə Ənvər Məmmədxanlının “Xürrəmilərin ağ şahini” əsərindən bir hissəni tamaşaçılara təqdim ediblər. 2009-cu ildə Q.Fiqereydonun “Ezop” əsərini peşəkarsəviyyədə hazırlayıb. Elə həmin il dram dərnəyinə Naxçıvan Muxtar Respublikası Nazirlər Kabinetinin qərarı ilə “Xalq teatrı” statusu verilib. Kollektivin üzvləri rayonda fəaliyyət göstərən mədəniyyət evlərinin işçiləridir. Hazırda teatrın 8 daimi üzvü vardır.

Faiq Heydərov onu da qeyd etdi ki, xalq teatrı gənc nəslin milli dəyərlər ruhunda tərbiyəsində mühüm rol oynayacaq tamaşalar hazırlamağa çalışır və müəyyən mənada buna nail olub. Belə ki, teatr 2015-ci ildə keçirilən xalq teatrlarının muxtar respublika festivalında birinci yerə layiq görülərək diplomla təltif olunub. 2017-ci ildə keçirilən festivalda Hüseynbala Mirələmovun “Xəcalət” povesti əsasında hazırlanmış tamaşa ilə çıxış edən teatr “Ən aktual mövzulu tamaşa” nominasiyasında birinci dərəcəli diploma layiq görülüb.

Teatrın aktyoru,Azərbaycan Respublikasının Əməkdar artisti Vidadi Rəcəbli söhbətə qoşularaq bildirdi ki, Babək Rayon Xalq Teatrı öz repertuarına bu günə qədər 14 tamaşa daxil edib. “Ezop”, “Solğun çiçəklər”, “Ana”, “Bəxtsiz cavan”, “Beş manatlıq gəlin” və digər tamaşaları ilə Culfa, Ordubad, Kəngərli, Şərur, Sədərək və Naxçıvan şəhərlərində də uğurla çıxış edib.

Vidadi Rəcəblinin sözlərinə görə, muxtar respublikamızın bölgələrində müstəqil teatrların yaradılması və onun inkişafına dəstək göstərilməsi bu sahəyə olan diqqət və qayğının bariz nümunəsidir. Bunun nəticəsidir ki, rayonlarda fəaliyyət göstərən xalq teatrları bu gün peşəkar kadr hazırlığında baza rolunu oynayır. Babək Rayon Xalq Teatrında fəaliyyət göstərən üzvlərdən bir neçəsi artıq peşəkar səviyyədə püxtələşərək bu gün Cəlil Məmmədquluzadə adına Naxçıvan Dövlət Musiqili Dram Teatrında öz fəaliyyətlərini davam etdirirlər. Bu isə teatrımızın uğurudur.

Vidadi Rəcəbli qeyd etdi ki, onlar yazıçı Əfqan Əsgərovun “Qız atası” komediyasını uğurla səhnələşdiriblər. Rejissorluğunu etdiyi səhnə əsərinin quruluşçu rejissoru Yusif Əliyev, musiqi tərtibatçısı Cabir Məmmədovdur. Rollarda Rasim Qasımov, Ələkbər İsmayılov, Elsevər Məmmədov, Nuray Mehdiyeva çıxış edirlər. Teatr kollektivi həmin tamaşa ilə bu il keçirilən xalq teatrlarının muxtar respublika festivalında uğurla çıxış edib.

Qeyd edək ki, iyulun 23-də Babək Rayon Xalq Teatrının yaradılmasının 10 illik yubileyinə həsr olunmuş tədbir keçirilib. Teatr 10 illik fəaliyyəti dövründə hazırladığı tamaşalardan parçaları uğurla təqdim edib.


Naxçıvan Muxtar Respublikası
Mədəniyyət Nazirliyinin Mətbuat Xidməti
17.08.2019



      Avqustun 15-də Naxçıvan Muxtar Respublikası Mədəniyyət Nazirliyinin təşkilatçılığı ilə Şərur rayonundakı “Bahar” kinoteatrında “Şərqin qapısı Naxçıvan” mövzusunda maarifləndirici tədbir keçirilib.

Tədbiri giriş sözü ilə açan Naxçıvan Muxtar Respublikasının Mədəniyyət Nazirliyinin əməkdaşı İlkin Cabbarov bildirib ki, Naxçıvan Muxtar Respublikası Ali Məclisinin Sədri Vasif Talıbovun 2019-cu il 21 yanvar tarixli Sərəncamı ilə “Naxçıvan Muxtar Respublikasının 95 illik yubileyinə həsr olunmuş Tədbirlər Planı” təsdiq edilib. Tədbirlər Planının icrası ilə əlaqədar Naxçıvan Muxtar Respublikasının Mədəniyyət Nazirliyi tərəfindən bir sıra tədbirlər keçirilmişdir, bu gün Şərur rayonunda keçirilən bu tədbir də görülən işlərin davamıdır.

Qeyd olunub ki, Naxçıvan Muxtar Respublikasının yerləşdiyi region tarix boyu özünün daha çox strateji və siyasi əhəmiyyəti ilə diqqəti cəlb edib. Təsadüfi deyil ki, hələ qədim dövrdən bəri bu diyarı “Şərqin qapısı” adlandırırlar. Naxçıvan bu gün də Şərqin Qapısıdır. Ötən əsrin 20-ci illərində gedən proseslər qədim diyarımızın muxtariyyət statusu qazanaraq əbədi olaraq Azərbaycanın tərkibində qalması ilə nəticələnib. Bu, mənada ulu öndər Heydər Əliyevin Naxçıvan Muxtar Respublikasının yaradılmasını Azərbaycan xalqının olduqca mürəkkəb bir siyasi şəraitdə əldə etdiyi böyük tarixi nailiyyət adlandırması təsadüfi deyildir.

Ulu öndərimiz çıxışlarında dəfələrlə Naxçıvanın muxtariyyət statusunun qorunub saxlanılmasının vacibliyini xüsusi olaraq vurğulayıb. Bu mənada, muxtariyyət həm də Heydər Əliyev əmanətidir. Onun 95 illik yubileyinin muxtar respublikada dövlət səviyyəsində qeyd olunması, eyni zamanda, Heydər Əliyev siyasi xəttinə dönməz sədaqətin bariz nümunəsidir.

Vurğulanıb ki, Bu gün Naxçıvan Muxtar Respublikası uğurla inkişaf edir, yeni-yeni nailiyyətlər qazanır. Naxçıvanın Muxtariyyətini möhkəmləndirən mühüm amillərdən biri də, şübhəsiz, ötən 95 il ərzində buradakı sosial-iqtisadi inkişafdır. Ancaq bu da reallıqdır ki, Naxçıvanda son 24 ildə gedən inkişaf prosesləri , quruculuq-abadlıq işləri nəinki muxtariyyətin geridə qalan 71 ilində, hətta Naxçıvanın mövcudluğunun 5 minillik tarixində də nəzərə çarpmayıb. Yüksək iqtisadi potensiala malik olan muxtar respublikada bu gün bütün dövlət proqramlarının, infrastruktur layihələrinin böyük uğurla həyata keçirilməsi sayəsində Naxçıvan artıq bir sıra mühüm göstəricilər üzrə yüksək nailiyyətlər əldə edib, mühüm beynəlxalq tədbirlərin keçirildiyi məkana çevrilib. Ötən il İslam Mədəniyyətinin Paytaxtı və ölkəmizin Gənclər Paytaxtı olan qədim diyarımız Azərbaycan Respublikası Prezidentinin Sədri olduğu “CASPİAN EUROPEN CLUB”un 2017-2018-ci illər üçün ölkənin iqtisadi regionları üzrə hazırladığı investisiya reytinqində ən yüksək ümumi bal toplayaraq birinci olub. Şübhəsiz bütün bunlar muxtariyyətin bəhrələri olmaqla yanaşı, həm də Azərbaycan Respublikasının Prezidenti İlham Əliyevin muxtar respublikaya göstərdiyi yüksək diqqət və qayğının, apardığı məqsədyönlü siyasətin məntiqi nəticəsidir.

Sonra Məmməd Səid Ordubadi adına Naxçıvan Muxtar Respublika Kitabxanasının elmi katibi Günay Kəngərli çıxış edərək qeyd edib ki, xalqımıza məxsus milli dəyərlər bizim ən qiymətli xəzinəmizdir və bu xəzinəyə sahib çıxaraq gələcək nəslə ötürmək gənclərin əsas vəzifələrindən biridir.

Tədbirin sonunda Cəlil Məmmədquluzadənin həyatı və yaradıcılığı ilə bağlı sənədli filmi nümayiş olunub.


Naxçıvan Muxtar Respublikası
Mədəniyyət Nazirliyinin Mətbuat Xidməti
15.08.2019



      Naxçıvan Muxtar Respublikası Ali Məclisi Sədrinin diqqət və qayğısının nəticəsində bu gün doğma diyarımızda alim və tədqiqatçılar, eləcə də yaradıcı insanlar üçün hərtərəfli şərait yaradılıb, müasir avadanlıqlarla təchiz olunan nəşriyyat və mətbəələr istifadəyə verilib. Həmçinin diyarımızın qədim tarixi, zəngin mədəni irsi, görkəmli şəxsiyyətləri və müasir sosial-iqtisadi inkişafı barədə yeni kitabların nəşri diqqətdə saxlanılır, hər il üçün nəşr planı tərtib olunur.

Bildiyiniz kimi, Yaxın Şərqin mühüm mədəniyyət mərkəzlərindən biri olan Naxçıvan şəhəri İslam Əməkdaşlıq Təşkilatına üzv dövlətlərin Mədəniyyət nazirlərinin VI konfransında 2018-ci il üçün İslam Mədəniyyətinin Paytaxtı elan olunmuşdu. Ötən il bununla bağlı bir çox tədbirlər həyata keçirilib, türk-islam mədəniyyəti abidələri bərpa edilib, “İslam Mədəniyyətinin Paytaxtı Naxçıvan – 2018” loqotipi və suvenirlər hazırlanıb, üzərində loqotip əks olunmuş döş nişanları, zərflər, poçt markaları buraxılıb. Eyni zamanda albom-kataloqlar, jurnallar, İslam dini və onun dəyərləri ilə bağlı kitablar nəşr olunub.

Belə nəşrlərdən biri də “Naxçıvan İslam Mədəniyyətinin Paytaxtı (7-8 sentyabr 2018-ci ildə keçirilmiş beynəlxalq konfransın materialları)” kitabıdır. AMEA-nın həqiqi və müxbir üzvləri tərəfindən hazırlanmış kitabın ilk səhifələrində “Naxçıvan şəhərinin 2018-ci il üçün İslam Mədəniyyətinin Paytaxtı elan edilməsi ilə əlaqədar Təşkilat Komitəsinin yaradılması haqqında” Azərbaycan Respublikası Prezidentinin Sərəncamı və Naxçıvan şəhərinin 2018-ci il üçün İslam Mədəniyyətinin Paytaxtı elan olunması ilə bağlı Tədbirlər Planı öz əksini tapıb.

Yeni nəşrdə diqqətçəkən nüanslardan biri də Naxçıvan Muxtar Respublikası Ali Məclisinin Sədri cənab Vasif Talıbovun Naxçıvan şəhərinin 2018-ci il üçün İslam Mədəniyyətinin Paytaxtı elan edilməsi ilə əlaqədar yaradılmış Təşkilat Komitəsinin ilk iclasındakı çıxışı zamanı söylədiyi dəyərli fikirlərdir: “... İSESKO-nun qərarı ilə 2007-ci ilin no­yabrında keçirilmiş beşinci konfransda Azərbaycanın paytaxtı Bakı şəhəri 2009-cu il üçün İslam Mədəniyyətinin Paytaxtı elan olunmuşdur. 2009-cu ilin oktyabrında İslam Əməkdaşlıq Təşkilatına üzv dövlətlərin mədəniyyət nazirlərinin Bakı şəhərində keçirilən altıncı konfransında isə Naxçıvan şəhərinin 2018-ci il üçün İslam Mədəniyyətinin Paytaxtı elan olunmasına dair qərar qəbul edilmişdir. Bu qərar əsaslıdır. Ona görə ki, Azərbaycanın 5 minillik tarixə malik qədim şəhəri olan Naxçıvan İslam mədəniyyəti nümunələri ilə zəngindir və bəşər sivilizasiyasına dəyərli töhfələr vermişdir. Qeyd olunanlar, eləcə də 2009-cu ildə Bakı şəhərinin İslam Mədəniyyəti Paytaxtı elan olunması ilə bağlı qazanılan təcrübə 2018-ci ildə Naxçıvan şəhərində tədbirlərin yüksək səviyyədə keçiriləcəyinə əminlik yaradır”.

Konfrans materiallarında öz əksini tapan AMEA Naxçıvan Bölməsinin sədri, akademik İsmayıl Hacıyevin “Naxçıvan: İslamın ən güclü dayaqlarından biri” adlı məqaləsi maraqlı faktları ilə diqqəti cəlb edir. O yazır ki, Naxçıvan şəhəri qədim və zəngin tarixə malikdir. Həmin zənginliyi yaradan buranın qədim sakinləri və Naxçıvanın Böyük İpək Yolu üzərində yerləşməsidir. Şəhərin Yaxın və Orta Şərqin şəhərləri, eləcə də digər ölkələrlə çoxsahəli mədəni-iqtisadi əlaqələrinin artması onun inkişafına əsaslı təsir göstərmişdir. Böyük İpək Yolu ilə hərəkət edən ticarət karvanları, bölgəyə gələn tacirlər, səyyahlar, alimlər Naxçıvanın bu inkişafını görmüş, öz yol qeydlərində bu haqda bəhs etmişlər. Ona görə də orta əsr mənbələrində Naxçıvan ərazisi, xüsusilə Naxçıvan şəhəri haqqında çox dəyərli və maraqlı məlumatlar vermişlər.

Kitabda Milli Azərbaycan Tarixi Muzeyinin direktoru, akademik Nailə Vəlixanlının “Bölgədə İslam dininin və mədəniyyətinin təşəkkülündə Naxçıvanın yeri və rolu”, İstanbul Universitetinin professoru Oqtay Bəllinin “Naxçıvan ərazisində yerləşən türk-islam abidələrinin Türk dünyası üçün əhəmiyyəti”, həmçinin “Naxçıvan torpaqlarında bərpa edilən türk-islam abidələri”, Ərzurum Atatürk Universitetinin professoru Hüseyn Yurttaşın “İslam motivli qoşa minarəli baştağların quruluşunda Naxçıvanın əhəmiyyəti” və digər dəyərli elmi məqalələr diqqəti cəlb edir.

İnanırıq ki, yeni nəşr qədim diyarımız, burada minillərboyu mövcud olmuş və indi də qorunaraq təbliğ edilən islami dəyərlərin, Naxçıvanın çoxəsrlik qədim və zəngin tarixi ilə İslam mədəniyyətinin formalaşmasında və inkişafındakı özünəməxsus rolunun əsaslandırılmış elmi şəkildə təqdimatı baxımından geniş oxucu kütləsi üçün qiymətli mənbə olacaq. Yeni nəşr “Naxçıvan İslam Mədəniyyətinin Paytaxtı” beynəlxalq konfransının bu silsilədən olan çoxsaylı əhəmiyyətli tədbirlərdən biri kimi mühüm elmi dəyəri kəsb etdiyini də ortaya qoyur.


Naxçıvan Muxtar Respublikası
Mədəniyyət Nazirliyinin Mətbuat Xidməti
15.08.2019



      Bayram günlərində muzeylərə gələnlərin sayında artım müşahidə olunub. “Xan Sarayı”-Dövlət Tarix-Memarlıq Muzeyi də bayram günlərində fəaliyyət göstərən mədəniyyət ocaqlarından biridir.

Muzeyə gələnlərin arasında tələbələr və məktəblilər, daha çox üstünlük təşkil edir. Əcnəbilərdən isə Rusiya, İran və Türkiyə vətəndaşları daha çoxdur. Qonaqlar bu diyarın qədim tarixi və müasir memarlıq nümunələri ilə yaxından tanış olur, çəkdikləri fotoşəkilləri sosial şəbəkə hesablarında paylaşaraq muxtar respublikanın turizm potensialının təbliği və tanıdılmasında fəallıq göstərirlər.


Naxçıvan Muxtar Respublikası
Mədəniyyət Nazirliyinin Mətbuat Xidməti
13.08.2019



      Muxtar Respublikada fəaliyyət göstərən mərkəzi icra hakimiyyəti orqanlarının, eləcə də digər təşkilat və qurumların əməkdaşlarının Naxçıvan şəhərindəki muzeylərə ekskursiyaları olub.

Biznes Mərkəzində, Hüseyn Cavidin Ev Muzeyi, Xatirə Muzeyi, Bəhruz Kəngərli Muzeyi, Naxçıvan Dövlət Xalça Muzeyi, “Xan Sarayı” , Cəlil Məmmədquluzadənin Ev Muzeyini ziyarət edən kollektivlərə muzeylər haqqında ətraflı məlumat verilib.

Həmin gün Naxçıvan şəhərində fəaliyyət göstərən bir sıra idarə, müəssisələrin kollektivləri Naxçıvan Dövlət Tarix Muzeyini, Rəsm Qalareyasını, Dövlət Bayrağı Muzeyini və “Naxçıvanqala” Tarix Memarlıq Muzey Kompleksini də ziyarət ediblər.


Naxçıvan Muxtar Respublikası
Mədəniyyət Nazirliyinin Mətbuat Xidməti
12.08.2019



      Yay tətilində uşaqların asudə vaxtlarının səmərəli təşkili məqsədilə muzeylərə və tarixi abidələrə ekskursiyalar davam etdir. Bununla uşaqlar yay tətilində asudə vaxtlarını səmərəli keçirməklə bərabər həm də xalqımızın qədim tarixi, mədəniyyəti və adət-ənənələri ilə tanış olurlar. Bu sıradan olan növbəti ekskursiya Qazançı körpüsünə təşkil edilib. Burada uşaqlara körpünün tarixi haqqında məlumat verilib. Qeyd edək ki, Qazançı körpüsü XVII əsrə aid tarix-memarlıq abidəsidir və 2018-ci ildə bərpa edilib.


Naxçıvan Muxtar Respublikası
Mədəniyyət Nazirliyinin Mətbuat Xidməti
11.08.2019



      Naxçıvan Şəhər İcra Hakimiyyəti, “Nuh yurdu” qəzeti redaksiyası və sahə inzibati ərazi dairələri üzrə nümayəndəliklərin əməkdaşları “Muzey günləri” çərçivəsində bu dəfə Hüseyn Cavidin şəhərimizdəki ev-muzeyində olublar.

Hüseyn Cavidin ev-muzeyi və Xatirə Kompleksinin bələdçisə Fərqanə Babayeva qonaqlara ekspozisiya haqqında ətraflı məlumat verib.

Sonra qonaqlar muzeyin otaqları ilə tanış olublar. “Matəm otağı” adlanan otaq qonaqların daha çox marağına səbəb olub. Burada Hüseyn Cavidin Sibirdə olan məzarının axtarılıb tapılmasını əks etdirilən fotolar və divardakı taxçada şairin Sibirdəki qəbrindən götürülmüş torpaq nümayiş olunur. Bildirilib ki, otağın çıxışında sərgilənən və 1936-cı ildə çəkilmiş ailəvi fotoşəkil Cavidlər ailəsinin axırıncı xatirə şəklidir.

Qonaqlar “Xatirə otağı” ilə də tanış olublar.


Naxçıvan Muxtar Respublikası
Mədəniyyət Nazirliyinin Mətbuat Xidməti
11.08.2019



      Avqustun 9-da “Xan Sarayı” Dövlət Tarix-Memarlıq, Möminə Xatın və Açıq Səma Altında Muzey Kompleksində general-mayor Cəmşid Naxçıvanskinin anadan olmasının 124-cü ildönümünə həsr olunmuş tədbir keçirilib.

Naxçıvan Muxtar Respublikasının Mədəniyyət Nazirliyinin və Nazirliyin tabeliyində olan mədəni-maarif müəssisələri əməkdaşlarının iştirak etdiyi tədbiri giriş sözü ilə “Xan Sarayı” Dövlət Tarix-Memarlıq, Möminə Xatın və Açıq Səma Altında Muzey Kompleksinin direktoru, Azərbaycan Respublikasının Əməkdar mədəniyyət işçisi Nəzakət Əsədova açıb.

Daha sonra “Azərbaycanın görkəmli sərkərdəsi Cəmşid xan Naxçıvanski” mövzusu ilə çıxış edən Cəmşid Naxçıvanskinin Ev Muzeyinin direktoru Abasət Nuriyev qeyd edib ki, yurdumuzun şanlı tarixinə adını qızıl hərflərlə yazmış elə nəsillər, elə sərkərdələr olub ki, onlar öz mərdliyi, igidliyi ilə vətənimizin azadlığına, müstəqilliyinə mühüm töhfələr veriblər. Azərbaycanın hərb tarixində görkəmli rol oynamış belə sərkərdələrdən biri də milli hərb tariximizə 6 general bəxş etmiş Kəngərlilər nəslinin sonuncu generalı Cəmşid xan Naxçıvanskidir. Cəmşid Naxçıvanskinin həyatından geniş formada bəhs edən Abasət Nuriyev vurğulayıb ki, 1981-ci ilin avqustunda ümummilli lider Heydər Əliyev Cəmşid Naxçıvanskinin 85 illik yubileyi ilə əlaqədar keçirilən tədbirdə generalın Vətənində-Naxçıvan şəhərində onun ev muzeyinin yaradılması haqqında qərar qəbul edir. Ümummilli liderin siyasi məktəbinin davamçıları bu gün onun yolunu uğurla davam etdirirlər. Azərbaycan Respublikasının Prezidenti cənab İlham Əliyevin imzaladığı “Cəmşid Naxçıvanskinin 120 illik yubileyinin keçirilməsi haqqında” 2 aprel 2015-ci il tarixli Sərəncamı, Naxçıvan Muxtar Respublikası Ali Məclisinin Sədri cənab Vasif Talıbovun imzaladığı “Cəmşid Naxçıvanskinin 120 illik yubileyinin Naxçıvan Muxtar Respublikasında keçirilməsi ilə əlaqədar “Tədbirlər Planı”nın təsdiq edilməsi haqqında” 09 aprel 2015-ci il tarixli Sərancamı Naxçıvanskilərə olan dövlət qayğısının bariz nümunəsidir. Bu gün Naxçıvan Muxtar Respublikası Ali Məclisi Sədrinin xüsusi diqqət və qayğısı sayəsində Cəmşid Naxçıvanskinin Ev Muzeyi kimi fəaliyyət göstərən ata evində son əsaslı təmir və bərpa işləri aparılır.

Tədbirin davamında Cəmşid Naxçıvanskinin Ev Muzeyinin baş fond mühafizi-elmi işçisi, Naxçıvan Muxtar Respublikasının Əməkdar mədəniyyət işçisi Gülnaz Hüseynovanın “Azərbaycanın ilk Milli Diviziyası-Xəzər dənizindən Baltik dənizinədək şərəfli döyüş yolu” və “Xan Sarayı” Dövlət Tarix-Memarlıq, Möminə Xatın və Açıq Səma Altında Muzey Kompleksinin baş fond mühafizi-elmi işçisi Zülfiyyə Əliyevanın “Azərbaycan hərb tarixində Naxçıvanskilərin rolu” mövzularında çıxışları dinlənilib.

Sonra muzeyin ekspozisiyasına baxış olub.


Naxçıvan Muxtar Respublikası
Mədəniyyət Nazirliyinin Mətbuat Xidməti
09.08.2019



      Ordubad Rayon Mərkəzləşmiş Kitabxana Sisteminin təşəbbüsü ilə Ordubad şəhərində açıq səma altında kitab sərgisi keçirilib.

Sərgidə Naxçıvan Muxtar Respublikası Ali Məclisi Sədrinin 2017-ci il 28 avqust tarixli Sərəncamı ilə təsdiq olunmuş “Oxunması zəruri olan kitabların Siyahısı”ndakı nümunələr, Azərbaycan Respublikasının Prezidenti cənab İlham Əliyevin sərəncamları ilə bu il yubileyləri keçirilən yazıçı və şairlərin əsərləri, ordubadlı qələm sahiblərinin kitabları nümayiş etdirilib. Rayon sakinləri sərgiyə böyük maraq göstəriblər.




Naxçıvan Muxtar Respublikası
Mədəniyyət Nazirliyinin Mətbuat Xidməti
09.08.2019



      Ağbulaq istirahət mərkəzində "Yay məktəbi" davam edir. Mərkəzin budəfəki qonaqları Naxçıvan Dövlət Musiqi Kollecinin tələbələri olub.

Tələbələr Ağbulaq İstirahət Mərkəzini gəzərək yaradılan şəraitlə tanış olublar. Günün ikinci yarısında isə gənclər arasında stolüstü idman oyunları keçirilib. İstirahət “Xəmsə” intellektual oyunu ilə davam edib. Axşam isə aprel döyüşlərində şəhid olan hərbiçilərin həyatından bəhs edən filmə baxıblar.

“Yay məktəbi”nin ikinci günü gənclər Ağbulaq kəndini gəzib, ərazidəki şəfa bulağına ekskursiya ediblər.

Hərtərəfli şəraitdən səmərəli yararlanan tələbələr istirahətlərini daha mənalı keçirmək üçün asudə vaxtlarda futbol oynayıb, müxətlif yarışlarda iştirak ediblər.


Naxçıvan Muxtar Respublikası
Mədəniyyət Nazirliyinin Mətbuat Xidməti
08.08.2019



      Naxçıvan Muxtar Respublikası Mədəniyyət Nazirliyi tərəfindən iyul ayında əlamətdar və tarixi günlərlə bağlı tədbirlərin təşkili diqqətdə saxlanılmışdır. Belə ki, Naxçıvan Muxtar Respublikasının yaradılmasının 95, İmadəddin Nəsiminin 650, Ərtoğrol Cavidin və Hüseyn İbrahimovun 100 illik yubileyləri, eləcə də Babək Rayon Xalq Teatrının fəaliyyətə başlamasının 10 illiyi münasibətilə tədbirlər keçirilmişdir.

Muzey işinin günün tələbləri səviyyəsində qurulması məqsədilə tədbirlər davam etdirilmiş, Ordubad Rayon Tarix-Diyarşünaslıq Muzeyində “Gənc nəslin maariflənməsində muzeylərin rolu” mövzusunda dəyirmi masa keçirilmişdir. Muzey fondlarının daha da zənginləşdirilməsi işinə töhfə olaraq ötən ay muzeylərə 354 yeni eksponat daxil olmuşdur. Muzeyləri 51 min 752 tamaşaçı ziyarət etmişdir ki, onlardan 18 min 392 nəfəri əcnəbi vətəndaşlardır.

Naxçıvan Muxtar Respublikasının Mədəniyyət Nazirliyinə tabe müəssisələrdə çalışan gənclərdən ibarət komandalar arasında “Yaşa və öyrən” intellektual bilik yarışının final turu keçirilmiş, qaliblər diplom və hədiyyələrlə təltif edilmişlər.

Ötən ay kitabxanaların da fəaliyyəti diqqətdə saxlanılmış, muxtar respublika kitabxanalarında tarixi və əlamətdar günlər, görkəmli mədəniyyət və incəsənət xadimlərinin yubileyləri ilə əlaqədar tədbirlər, uşaq bağçalarında nağıl günləri keçirilmiş, oxunması zəruri olan kitabların müzakirəsi təşkil olunmuşdur. Kitabxanalarda yeni oxucu sayı 283, oxucu gəlişi 8 min 217 nəfər, kitab verilişi 49 min 247 nüsxə olmuşdur. Elektron kataloqa 729 adda kitab işlənmiş və ümumilikdə, elektron kataloqda kitabların sayı 12 min 658-ə çatdırılmışdır. Elektron kitabxanadan 115 oxucu istifadə etmişdir.

Culfa və Şərur rayonlarında “Xalq yaradıcılığı günü” keçirilmiş, muxtar respublikanın mədəniyyət evləri və klub müəssisələrində əlamətdar və tarixi günlərlə bağlı mədəni-kütləvi tədbirlərin, baxış-müsabiqələrin təşkili davam etdirilmişdir.


Naxçıvan Muxtar Respublikası
Mədəniyyət Nazirliyinin Mətbuat Xidməti
08.08.2019



      Avqustun 8-də Hüseyn Cavidin Ev Muzeyində “Ərtoğrol Cavid irsinin qorunmasında və təbliğ olunmasında Hüseyn Cavidin Ev Muzeyinin rolu ” adlı seminar-treninq keçirilmişdir.

Nazirliyin sisteminə daxil olan muzeylərin əməkdaşlarının iştirak etdiyi tədbiri giriş sözü ilə açan Naxçıvan Muxtar Respublikasının Mədəniyyət Nazirliyinin Mədəniyyət və mədəni irs şöbəsinin müdiri Gülbuta Babayeva seminarın məqsəd və əhəmiyyətindən danışmışdır.

Qeyd olunmuşdur ki, Ərtoğrol Cavid 22 oktyabr 1919-cu ildə Bakı şəhərində dünyaya göz açmışdır. O, 1936–1940-cı illərdə Azərbaycan Dövlət Pedoqoji İnstitutunun dil-ədəbiyyat fakültəsində təhsil almış, institutu fərqlənmə diplomu ilə bitirdikdən sonra musiqiyə olan sonsuz məhəbbəti onu 1941-il Bakı Konservatoriyasının bəstəkarlıq fakültəsinə daxil olmağa yönləndirmişdir.

Ərtoğrol Cavid avropa və rus bəstəkarlarını ayrıca notlar şəkilində çap olunmuş romans və mahnılarını Azərbaycan dilinə tərcümə etmiş, 200-dən çox el havasını nota köçürmüş, dastan və nağılların mətnlərini yazıya almışdır. Qələmini dramaturgiya və poeziya sahəsində də sınamış Ərtoğrol bəy uğurlu əsərlər yaratmışdır.

1942-ci ildə “xalq düşməni”nin oğlu olaraq damğalanan Ərtoğrol Cavid Gürcüstandakı fəhlə batalyonunda ağır, dözülməz işlərə cəlb olunmuş və 1943-cü il noyabrın 14-də, doğma diyarı Naxçıvanda dünyasını dəyişmişdir.

Vurğulanmışdır ki, Ərtoğrol Cavid irsinin öyrənilməsi dövlətimiz tərəfindən daim diqqət mərkəzində saxlanılmış, onun məzarı ailəsi ilə birlikdə Hüseyn Cavid Məqbərəsinə köçürülmüş, Ərtoğrol Cavid irsi geniş formada tədqiq olunmuşdur. Naxçıvan Muxtar Respublikası Ali Məclisi Sədrinin “Ərtoğrol Cavidin 100 illik yubileyinin keçirilməsi haqqında” 18 aprel 2019-cu il tarixli Sərəncamı göstərilən dövlət qayğısının bariz təzahürüdür. Bildirilib ki, həmin Sərəncamın icrası ilə bağlı Nazirliyin “Tədbirlər Planı” təsdiq olunmuş və bu plan əsasında bir sıra tədbirlər həyata keçirilmişdir.

Seminar-treninqin davamında Hüseyn Cavidin Ev Muzeyi və Xatirə Kompleksinin direktoru, Naxçıvan Muxtar Respublikasının Əməkdar mədəniyyət işçisi Bəhruz Axundov “Ərtoğrol Cavid irsinin qorunmasında və təbliğ olunmasında Hüseyn Cavidin Ev Muzeyinin rolu” mövzusunda çıxış edərək qeyd etmişdir ki, Naxçıvan şəhərlərində yaradılmış Hüseyn Cavidin Ev Muzeyinin ekspozisiyalarında Ərtoğrol Cavidə həsr edilmiş guşələr yaradılmışdır. Bu guşələrdə ona məxsus olan əşyalar, sənədlər, əlyazmalar, fotoşəkillər, musiqi əsərlərinin not yazıları nümayiş olunur. Hüseyn Cavidin Ev Muzeyi yarandığı gündən bugünədək şair-dramaturqa və onun ailə üzvlərinə aid muzey fondunda 9500-ə yaxın eksponat toplanaraq mühafizə olunur ki, bunlardan 227-si ədibin dünyadan vaxtsız köçmüş istedadlı oğlu Ərtoğrol Cavidlə bağlıdır.

Sonra mövzu ilə bağlı müzakirə aparılmış, tədbir iştirakçılarını maraqlandıran suallar cavablandırılmışdır.

Tədbirin sonunda muzeyin ekspozisiyasına baxış keçirilmişdir.


Naxçıvan Muxtar Respublikası
Mədəniyyət Nazirliyinin Mətbuat Xidməti
08.08.2019



      Diyarımızın qədim tarixinin, zəngin mədəniyyətinin sübutlarının qorunub saxlandığı Naxçıvan Dövlət Tarix Muzeyinin yaradılmasından 95 il ötür. 1924-cü il oktyabrın 30-da Naxçıvan şəhərində qurulan ilk Tarix-Etnoqrafiya Muzeyinin maddi-mədəniyyət nümunələrinin qorunması və gələcək nəsillərə çatdırılmasında böyük əhəmiyyəti olub. Bu gün 49 mindən çox eksponatın mühafizə olunduğu muzey həm ölkə vətəndaşlarının, həm də xarici qonaqların ən çox ziyarət etdiyi mədəniyyət ocaqlarındandır.

Muzey fəaliyyətinin ilk illərində tarixi əhəmiyyətə malik eksponatların toplanması və mühafizəsi işini təşkil edərək muxtar respublikada muzeyşünaslığın əsasını qoyub. Tarix-Etnoqrafiya Muzeyinin təşəkkülündə 1925-ci ildə Naxçıvanda yaradılan Naxçıvan Tədqiq və Tətəbbö Cəmiyyətinin və ziyalıların xüsusi əməyi olub. Bu mədəniyyət ocağı sonrakı illərdə Naxçıvan Tarix-Ölkəşünaslıq Muzeyinə çevrilib və muzeyə Azərbaycanın ilk realist rəssamı Bəhruz Kəngərlinin adı verilib. Muzey 1968-ci ildən Dövlət Tarix Muzeyi kimi fəaliyyət göstərir. On şöbəni əhatə edən Naxçıvanın qədim və zəngin tarixi ilə bağlı müxtəlif dövrlərə aid eksponatların qorunub saxlanıldığı mədəniyyət ocağının yardılmasının 95 ili tamam olur. Naxçıvan Muxtar Respublikası Ali Məclisin Sədri Naxçıvan Dövlət Tarix Muzeyinin 95 illik yubileyinin keçirilməsi haqqında Sərəncam imzalayıb. Mədəniyyət ocağının yubileyinin keçirilməsi ilə əlaqədar “Tədbirlər Planı” da təsdiq edilib.

Qeyd edək ki, cari ilin 7 ayı ərzində Naxçıvan Dövlət Tarix Muzeyini 22 mindən çox qonaq ziyarət edib ki, bunların da 5 mindən çoxunu əcnəbi turist təşkil edib.


Naxçıvan Muxtar Respublikası
Mədəniyyət Nazirliyinin Mətbuat Xidməti
07.08.2019



      Avqustun 7-də Naxçıvan Muxtar Respublikası Mədəniyyət Nazirliyi Mədəniyyət üzrə Elmi-Metodik Mərkəzin və Kəngərli Rayon Mədəniyyət Şöbəsinin birgə təşkilatçılığı ilə Kəngərli Rayonundakı Şahtaxtı Kənd Mədəniyyət Evində "Xalqımızın ən qədim ənənəvi rəqsləri" mövzusunda seminar-müşavirə keçirilmişdir.

Kəngərli rayonunda fəaliyyət göstərən klub müəssisələri əməkdaşlarının iştirak etdiyi tədbiri giriş sözü ilə açan Kəngərli Rayon Mədəniyyət Sarayının direktoru Tofiq Rüstəmov seminar-müşavirənin əhəmiyyətindən danışmışdır. Qeyd olunmuşdur ki, bu gün muxtar respublikamızda 40-dan çox yallı oynanılır. “Xələfi”, “Tənzərə”, “Köçəri”, “Höynəri”, “Qaleyi”, “Qazı-qazı”, “Sareyi”, “Şahgəldi”, “Tello”, “Söylə”, “Nazilə”, “Qızılbaş”, “Çökəli”, “Çaleyi”, “Göyçəməni”, “Hərilli”, “Xəlili”, “Əfsəri”, “Bəndi”, “Sındırma”, “Şərili”, “Tirməşal”, “Urfanı”, “Gilanı”, “Kərimbəy”, “Nuraşan”, “Baharı” və başqa yallılarımız bir elin həm tarixini, həm də əcdadlarımızın həyat ritmini, sevincini, hər kəsi Vətən uğrunda birliyə, döyüşə çağıran ruhunu özündə yaşadır. Kəngərli rayonunda da özünəməxsus yallı növləri mövcuddur ki, bu yallıların əksəriyyəti rayonda fəaliyyət göstərən klub müəssisələrinin yallı dərnək və kollektivlərində üzvlərə öyrədilməkdədir. Kəngərli rayonunda yaradılmış yallı kollektiv və qrupları muxtar respublikada keçirilən müsabiqə və festivallarda iştirak etməklə yallı ifaçılığı sənətinin yaşadılmasına töhfələr verməyə çalışırlar.

Tədbirdə Mədəniyyət üzrə Elmi-Metodik Mərkəzin direktoru Səyyar Məmmədov "Yallı mədəniyyətimizin əbədilik simvoludur" mövzusunda çıxış edərək milli dəyərlərimizin, adət-ənənələrimizin yaşadılmasında yallı rəqs sənətinin təbliğinin vacib olduğunu vurğulamışdır. Bildirilmişdir ki, Naxçıvan Muxtar Respublikası Ali Məclisi Sədrinin "Şərur yallıları haqqında" 2018-ci il 24 dekabr tarixli Sərəncamı muxtar diyarımızda yallı sənətinin tədqiqi, təbliği və qorunması istiqamətində müvafiq tədbirlərin həyata keçirilməsinə rəvac vermişdir. Bu sərəncamla müvafiq Tədbirlər Planı təsdiq edilmiş, mədəniyyət müəssisələri qarşısında konkret vəzifələr qoyulmuşdur. Yerlərdə fəaliyyət göstərən klub müəssisələri də bu sərəncamdan irəli gələn vəzifələrin icrasında fəal iştirak etməli, yallılarımızın təbliği və yaşadılması işinə töhfələr verməyə çalışmalıdırlar.

"Yallılarımızın simvolikası haqqında" danışan Mədəniyyət üzrə Elmi-Metodik Mərkəzin şöbə müdiri Nizami Əzizəliyev qeyd etmişdir ki, Azərbaycan xalqının qədim mədəniyyətinin bir hissəsi olan Şərur yallıları xoreo­qrafiya, instrumental və vokal musiqini özündə birləşdirən nadir yaradıcılıq nümunəsi, əcdadlarımızın dünyagörüşünün, bədii­-estetik təfəkkürünün təzahürüdür. Yallıların Gəmiqaya təsvirlərində öz əksini tapması Naxçıvanda yallı sənətinin çox qədim tarixə malik olduğunu göstərir. Əshabi-Kəhf və Gəmiqaya kimi, Şərur yallıları da Naxçıvanın incisi, xalqımızın tarixi yaddaşının və milli dəyərlər sisteminin ayrılmaz tərkib hissəsidir. Bu amil əsas götürülərək Naxçıvanda yallı sənətinin inkişafı sahəsində kompleks tədbirlər görülmüş, yallılar nota köçürülmüş, “Naxçıvan-Şərur el yallıları” kitabı nəşr olunmuşdur. Vurğulanmışdır ki, qədim Naxçıvan diyarı üçün spesifik hesab olunan yallı növləri regionun adət-ənənələrini, ümumən, bu ərazidə yaşayan insanların həyat tərzini özündə ehtiva edən sənət inciləridir. Bu baxımdan yallılarımızı Naxçıvanın xüsusilə Şərur və Kəngərli bölgələrinin simvolikası da adlandıra bilərik.

Mədəniyyət üzrə Elmi-Metodik Mərkəzin şöbə müdiri Şərəf Quliyeva "Yallı-baxış müsabiqələrinin keçirilməsi haqqında" mövzusunda çıxış edərək yallı kollektivlərinin fəaliyyətinin artırılması və kollektivlərin repertuarlarının zənginləşdirilməsində baxış-müsabiqələrin əhəmiyyətindən danışmışdır. Qeyd edilmişdir ki, Kəngərli rayonu ərazisində vaxtilə yaşadılmış, bu gün isə unudulmuş sujetli və oyunlu mərasim rəqslərinin, eləcə də yallı növlərinin aşkar edilərək yallı kollektivlərinin repertuarına salınması yallı sənətinin təbliğinə və yaşadılmasına əsaslı töhfə ola bilər. Baxış-müsabiqələrin keçirilməsi zamanı münsiflər heyətinin ifaları qiymətləndirmə meyarından da bəhs edən Şərəf Quliyeva əlavə etmişdir ki, geyim və səhnə mədəniyyətinin, eləcə də ifaçılıq qabiliyyətinin diqqətdə saxlanılması baxış-müsabiqələrin uğurlu keçirilməsinə təsir edə biləcək amillərdəndir.

Sonra seminar-müşavirə iştirakçılarının sualları cavablandırılmış, mövzu ilə bağlı fikir mübadiləsi aparılmışdır.


Naxçıvan Muxtar Respublikası
Mədəniyyət Nazirliyinin Mətbuat Xidməti
07.08.2019



      Azərbaycana ilk dəfə gələn Duri Roner və Lie Roner gözəl Vətənimizin bir çox rayon və kəndlərini gəziblər. Onlar iki gündür ki, yollarını Azərbaycanın ən qədim diyarı olan Naxçıvana salıblar. “Qafqaz Turizm” Məhdud Məsuliyyətli Cəmiyyətinin təşkilatçılığı ilə yurdumuza gələn qonaqların üzlərindəki ifadədən burada olmaqlarından məmnunluq duyduqları görünürdü. Bu da bizə qürur hissi yaşadır. Dünyada gözəlliklər və brendlər ölkəsi kimi tanınan İsveçrə vətəndaşlarının qədim yurdumuzu, Qafqazın bu kiçik məmləkətini öz yaşadıqları yerə bənzətmələri isə daha da qürurvericidir. Duri Roner özəl şirkət sahibidir və o, həyat yoldaşı ilə bərabər bir çox ölkələrdə olub. Onunla söhbətimizin maraqlı məqamlarını oxucularımıza təqdim edirik.

– Bəzən xəritədə dünya dövlətlərinə baxır, onlar haqqında məlumatlar toplayır, sonra həmin ölkələrə səfər edirəm. Burada olduğum üçün çox məmnunam. Dünya tufanında Naxçıvan dağlarının Nuhun gəmisini tutub saxladığı haqqında əfsanəni, Əlincə qalasında dünyanı fəth edən bir sərkərdənin saysız-hesabsız ordusuna 14 il döyüşüb təslim olmayan bir xalq haqqında tarixi həqiqətləri dinlədikcə insan özünü sehirli bir dünyaya səyahətdə kimi hiss edir. Ecazkar təbiəti, əzəmətli dağları, yamyaşıl zəmiləri, bağçalı-bağlı həyətləri, bumbuz çeşmələri, möhtəşəm abidələri olan Naxçıvan kəşf edilməmiş cənnətdir, – deyərdim.

0 Səhərlər əzəmətli Haçadağın başı üzərindən nur saçan, axşamlar zirvəsi qarlı dağların ətəyində qürub edən Günəşi seyr etdikcə insanın qəlbində bu diyara qarşı sönməz bir sevgi oyanır. Təmizlik, sabitlik isə dünyanın bir çox dövlətlərinə nümunə ola bilər. Elə ilk baxışda hiss olunur ki, insanlarınızın qəlbində Vətən, təbiət, torpaq, yurd sevgisi var. Muxtar respublikanızın rayonlarından Ordubadı, Culfanı da gəzmək imkanımız oldu. Əlincə qalası – bu abidə bir xalqın qəhrəmanlığını, vətən sevərliyini əks etdirən bir yerdir. Tarixboyu hər bir xalq öz keçmişi ilə öyünüb və gələcək nəsillərə örnək olub. Dünyada elə xalqlar var ki, onların belə tarixi keçmişi yoxdur. Amma siz azərbaycanlıların necə qəhrəman bir xalq olması tarixi həqiqətdir. Buna şahidlik edən Əlincə kimi bir qəhrəmanlıq dastanı yazılan tarixi qalanı bu cür qoruyub bərpa etməniz də həmin ənənənin davamçıları olduğunuza əyani sübutdur. Əlincə qalası özündə bir tarix yaşadır, elə bir tarix ki, siz naxçıvanlılar yüz illər sonra da bu adı çəkəndə qürur hissi keçirəcəksiniz. Bu, hər bir xalqa mənsub olmayan xoşbəxtlikdir.

Culfada olarkən Darıdağı da görmək imkanımız oldu. Dünyanın bir çox yerində – Polşada Kudova, Almaniyada Dürkgeym, Rusiyada Sineqorsk kimi müalicə yerləri var. Lakin bu suyun tərkibindəki mineral duzların miqdarını öyrənəndə gördüm ki, Darıdağ suyu onlardan daha üstündür. İnsan orqanizmində elə bir toxuma, üzv və sistem yoxdur ki, bu su ona müalicəvi təsir göstərməklə onun fəaliyyətinin bərpasına səbəb olmasın.

Ordubad qədim, gözəl, zəngin şəhərdir. Elə də böyük deyil, amma o qədər xoş təsir bağışlayır ki, insan günlərlə bu şəhərdə qalmaq istəyir. Tarixilik, qonaqpərvərlik, zəngin mətbəx, nə desən, var burada. Qədim məhəllələri gəzib, Qeysəriyyə ilə tanış olduq. Muzey bələdçisi bizə məlumatı ingilis dilində verdi. Bu hala az-az rast gəlirik. Bəzən muzeylər nə qədər zəngin olsa da, bələdçilərin dil bilməmələri bu zənginliyi sönükləşdirir.

Duzdağ Fizioterapiya Mərkəzinə ilk ayaq basdığım andan ciyərlərimdə açılma, nəfəsimdə rahatlıq hiss etdim. Bu, məni inanılmaz dərəcədə çox sevindirdi. Burada ağır xəstəlikdən əziyyət çəkən bir çox insan şəfa tapır. Tanrı sizin torpağınıza lütf edib.

Lie Roner söhbətimizə qoşulur:

– Naxçıvan şəhərinin bir çox görməli yerlərini də gəzmək fürsətimiz oldu. Qədim torpağın hansı səmtinə yolumuz düşdüsə, orada tarixi-mədəni abidələrlə, füsunkar təbiət mənzərələri ilə qarşılaşdıq. Ulu Tanrı səxavətini bu torpaqdan əsirgəməyib, buranı cənnətməkana çevirib. Naxçıvanın təbiəti insanı xəyallar aləminə qərq edir, füsunkar gözəlliklərə heyran qalmaya bilmirsən. Xalqın keçmişinə işıq salan tarixi abidələr, mənəvi irsinizin qorunduğu mədəniyyət ocaqları, insana daxili rahatlıq bəxş edən təbiət guşələri, milli memarlıq elementlərinin bərq vurduğu müasir binalar, səliqə-sahmanı ilə gözoxşayan abad, geniş küçələr məni valeh etdi. İnanmazdım ki, uzun illər blokadada olan kiçik bir diyar bu qədər inkişaf etmiş olsun. Buraya yola düşəndə çox adam getməyin, oranın iqlimi çox sərtdir. Yay fəslində isti olur, temperatur 40 dərəcəni keçir, – dedilər. Amma gəlib insanlarınızla tanış olanda yəqin etdim ki, Günəşin yox, naxçıvanlıların ürəyinin hərarətidir havanı belə isidən. Bu cür səmimi insanlara çox yerdə rast gəlmək mümkün deyil. Sizə adi bir misal çəkim. Dünyanın bir çox dövlətlərinə səyahət etmişəm, amma heç bir yerdə bu cür qonaqpərvərlik görməmişəm. Həmin ölkələrdə turistlər xoş, səmimi qarşılanır, sözsüz ki, bu, maddi qarşılıq üçün edilir. Burada isə yediyimiz yeməyin pulunu ödəmək istəyəndə qonağımız olun, – deyirlər. Fərqiniz bax, budur. Sizdə turistlərə qazanc mənbəyi kimi yox, evin əziz qonağı kimi baxırlar. Bu da öz yaşadığı yeri ürəkdən sevən insanlara xas olan xüsusiyyətdir. Bu arada, mətbəxiniz çox zəngindir. Səhər yeməyi, nahar, şam yeməyi – hər üçü də ləzizdir. Pendirinizin dadına söz ola bilməz. Bakıda olanda Naxçıvanda mütləq pendirin dadına baxın, – demişdilər. Dadı damağımda qaldı pendirinizin. Kabablarınız da çox ləzzətlidir. Restoran sahibi deyir ki, Naxçıvan torpağının tərkibində minerallar çox olduğu üçün buranın heyvanlarının əti də, südü, qaymağı, pendiri də dadlı olur. Xidmət də mükəmməldir. Çox məmnun oldum. Burada olmaq, belə gözəl, səmimi insanların məmləkətini görmək mənim üçün çox xoş oldu. Naxçıvana yenə səfər etməyi düşünürəm. Çünki insanın ruhunu dincəldir.

Yaşadığı torpağın hər qarışına, elinə-obasına tərif deyilməsi, yurdunun bu qədər inkişaf etməsi, gözəlliklər məkanına çevrilməsi hər bir naxçıvanlı üçün ən böyük xoşbəxtlikdir. Bu gün biz bu xoşbəxtliyi yaşayanlardanıq. Bu gözəl sözləri dünyanın tanınmış ölkəsinin vətəndaşlarının dilindən eşitmək isə daha da gözəldir.


Naxçıvan Muxtar Respublikası
Mədəniyyət Nazirliyinin Mətbuat Xidməti
06.08.2019



      Beş min illik tarixə malik qədim mədəniyyət mərkəzi Naxçıvanın milli-mədəni və tarixi irsinin daşıyıcısı olan Naxçıvan Dövlət Tarix Muzeyinin yaradılmasının 95 ili tamam olur.

1924-cü il oktyabrın 30-da Naxçıvan şəhərində qurulan ilk Tarix-Etnoqrafiya Muzeyinin maddi-mədəniyyət nümunələrinin qorunması və gələcək nəsillərə çatdırılmasında böyük əhəmiyyəti olmuşdur. Muzey fəaliyyətinin ilk illərində tarixi əhəmiyyətə malik eksponatların toplanması və mühafizəsi işini təşkil edərək muxtar respublikada muzeyşünaslığın əsasını qoymuşdur. Tarix-Etnoqrafiya Muzeyinin təşəkkülündə 1925-ci ildə Naxçıvanda yaradılan Naxçıvan Tədqiq və Tətəbbö Cəmiyyətinin və ziyalıların xüsusi əməyi olmuşdur. Bu cəmiyyətin arxeoloqlarla birgə muxtar respublika ərazisində apardığı arxeoloji qazıntılar nəticəsində əldə etdiyi maddi-mədəniyyət nümunələri muzeyin ekspozisiyasını zənginləşdirmişdir. Bu mədəniyyət ocağı sonrakı illərdə Naxçıvan Tarix-Ölkəşünaslıq Muzeyinə çevrilmiş və muzeyə Azərbaycanın ilk realist rəssamı Bəhruz Kəngərlinin adı verilmişdir. Muzey 1968-ci ildən Dövlət Tarix Muzeyi kimi fəaliyyət göstərir.

Bu gün Naxçıvan Dövlət Tarix Muzeyində on şöbəni əhatə edən Naxçıvanın qədim və zəngin tarixi ilə bağlı 49 mindən çox eksponat qorunub saxlanılır.

Naxçıvan Dövlət Tarix Muzeyinin xalqımızın tarixi-mədəni irsinin toplanması, qorunması, tədqiqi və təbliğindəki əhəmiyyətini nəzərə alaraq, Naxçıvan Muxtar Respublikası Konstitusiyasının 5-ci maddəsinin II hissəsinin 22-ci bəndini rəhbər tutaraq qərara alıram:

1. Naxçıvan Dövlət Tarix Muzeyinin 95 illik yubileyi geniş qeyd edilsin.

2. “Naxçıvan Dövlət Tarix Muzeyinin 95 illik yubileyinin keçirilməsi ilə əlaqədar Tədbirlər Planı” təsdiq edilsin.


Vasif TALIBOV
Naxçıvan Muxtar Respublikası Ali Məclisinin Sədri

Naxçıvan şəhəri, 2 avqust 2019-cu il



      Hər il avqustun 2-si ölkəmizdə milli kinonun yaranma günü kimi qeyd edilir. Bu münasibətlə avqustun 2-də Naxçıvan Dövlət Film Fondunda tədbir keçirilmişdir. Əvvəlcə Azərbaycan bədii filmlərinin afişalarından ibarət sərgiyə baxış olmuşdur.

Tədbirdə Naxçıvan Muxtar Respublikasının Mədəniyyət naziri Natəvan Qədimova çıxış edərək bildirmişdir ki, bir əsrdən çox çətin, mürəkkəb və şərəfli bir yol keçən Azərbaycan kinosu xalqımızın tarixini, milli-mənəvi dəyərlərini, insan və onun cəmiyyətdəki mövqeyini ekrana gətirməklə bərabər, həm də gələcək nəsillər üçün yaşatmışdır. Kino xalqımızın maariflənməsində, estetik zövqün formalaşmasında və milli özünüdərk hissinin gücləndirilməsində müstəsna rol oynamış incəsənət növüdür.

Xalqımızın ümummilli lideri Heydər Əliyevin milli kino sənətimizə həmişə yüksək qiymət verdiyini deyən nazir Ulu Öndərin “Azərbaycan xalqının bir çox nəsilləri kino sənəti ilə tərbiyələnib, kinonun təsiri altında formalaşıb, inkişaf edib və mədəniyyətə qovuşubdur... Xalqımızın inkişaf yolunda Azərbaycan kinosunun xidmətləri əvəzsizdir” fikrini xatırladaraq əlavə etmişdir ki, dahi rəhbər milli kinonun inkişafına daim qayğı ilə yanaşmış, ssenarist, rejissor, operator, rəssam kadrların yetişməsinə və milli özünəməxsusluğu ilə seçilən koloritli, parlaq ekran əsərlərinin yaradılmasına diqqət yetirmişdir. 1998-ci il 19 avqust tarixdə “Kinematoqrafiya haqqında” Qanunun qəbul edilməsi və bununla da, dövlət kinematoqrafiyasının hüquqi bazasının yaradılması Azərbaycanda kino sənətinin inkişafına möhkəm zəmin yaratmışdır. 1996-cı ildə isə Azərbaycan Dövlət Film Fondu yaradılmış, kino tariximizi əks etdirən filmlərin qorunması təmin edilmişdir.

Vurğulanmışdır ki, bu gün ölkə Prezidenti cənab İlham Əliyev tərəfindən milli kino sənətinin inkişafı üçün mühüm işlər həyata keçirilir. Ölkə başçısı 2008-ci il 4 avqust tarixli Sərəncamla “Azərbaycan kinosunun 2008-2018-ci illər üçün inkişafına dair Dövlət Proqramı”nı təsdiq etmişdir. Proqramda kinofilmlərin istehsalının artırılması, eləcə də müasir kino avadanlıqları və texnikası ilə təchizat, xarici ölkələrlə birgə film istehsalının genişləndirilməsi, kinoteatrların yenidən qurulması nəzərdə tutulmuşdur. Ölkə Prezidenti cənab İlham Əliyevin ötən il Azərbaycan kinosunun 120 illiyinin qeyd edilməsi ilə bağlı sərəncamı bu istiqamətdə aparılan işlərin məntiqi davamıdır.

“1970-1980-ci illərin birinci yarısından etibarən Azərbaycan kinosunda intibah dövrü başlanmışdır. Kinematoqrafçıların yaratdıqları filmlər milli-mənəvi dəyərlərin təbliğində, milli şüurun formalaşmasında və gənc nəslin tərbiyəsində mühüm rol oynamışdır”, - deyən nazir qeyd etmişdir ki, bu illər ərzində kino salnaməmizin unudulmaz səhifələrini təşkil edən, aktual mövzulu və sənətkarlıq baxımından diqqətəlayiq, mədəniyyətimizin qızıl fonduna daxil olan filmlər yaradılmış, ümumilikdə, 110 bədii, 500 sənədli və elmi-kütləvi, eləcə də 44 cizgi filmi istehsal olunmuşdur. Məzmun və janr baxımından sənətə yenilik gətirən bu filmlər kinonu xalqa daha da yaxınlaşdırmışdır. Azərbaycan kinosunda müxtəlif peşə və sənət sahiblərinin həyatından bəhs edən, tarixi yaddaşı özünə qaytaran filmlərin çox olması ekran sənətimizin mövzu əlvanlığının göstəricisidir.

Naxçıvan Dövlət Film fondunun fəaliyyətindən də bəhs edən Natəvan Qədimova bildirmişdir ki, muxtar respublikamızda Dövlət Film Fondunun fəaliyyət göstərməsi, film fondunun fəaliyyətinin daha da gücləndirilməsinə dövlət qayğısının artırılması məqsədilə Naxçıvan Muxtar Respublikası Ali Məclisi Sədrinin “Yaradıcılıq ittifaqları və birliklərinin fəaliyyəti ilə bağlı əlavə tədbirlər haqqında” 2019-cu il 20 may tarixli Sərəncamına əsasən, Naxçıvan Dövlət Film Fonduna 15 min manat məbləğində vəsaitin ayrılması muxtar respublikada bu sahənin daim diqqət mərkəzində saxlanıldığının bariz göstəricisidir. Bu gün Naxçıvan Dövlət Film Fondunda 5000-ə yaxın film saxlanılır. Azərbaycan filmləri ilə yanaşı, burada müxtəlif ölkələrdə istehsal olunmuş bədii və sənədli filmlər, cizgi filmləri, qısametrajlı, elmi-kütləvi, Azərbaycan dilinə dublyaj edilmiş filmlər də mühafizə olunur.

Sonra 1923-cü ildə ekranlaşdırılmış tammetrajlı “Qız qalası əfsanəsi” səssiz bədii filmi nümayiş olunmuşdur. Film Bakıda - Xəzər dənizinin sahilində ucalan XII əsrin tarixi memarlıq abidəsi Qız qalası ilə bağlı Azərbaycan xalq əfsanəsinin motivləri əsasında çəkilmişdir. Filmin səssiz olmasına baxmayaraq, hadisələrin gedişi aydın və anlaşıqlıdır. Film 2011-ci ildə Azərbaycan Kinorejissorlar Gildiyasında bərpa olunmuşdur.


Naxçıvan Muxtar Respublikası
Mədəniyyət Nazirliyinin Mətbuat Xidməti
02.08.2019



      Bu gün Azərbaycan Kinosu Günüdür. Ümummilli lider Heydər Əliyevin 2000-ci il 18 dekabr tarixli Sərəncamı ilə avqustun 2-si kino işçilərinin peşə bayramı - Azərbaycan Kinosu Günü kimi qeyd olunur.

Fransada keçirilmiş ilk kinoseansdan iki il sonra – 1898-ci il avqustun 2-də Bakı elmi-foto dərnəyinin katibi, naşir və fotoqraf Aleksandr Mişon özünün lentə aldığı “Bibiheybətdə neft fontanı yanğını”, “Əlahəzrət Buxara əmirinin yolasalma mərasimi”, “Qafqaz rəqsi” xronikal sənədli və “İlişdin” adlı bədii süjetlərini nümayiş etdirmişdi. Həmin gün milli kinonun yaranma günü sayılır.

Ötən əsrin əvvəllərində “Pate”, “Pirone”, “Filma” kimi xarici kino şirkətləri Bakıda filiallarını açaraq film istehsalı ilə məşğul olublar. 1916-cı ildə yazıçı İbrahim bəy Musabəyovun eyniadlı povesti əsasında “Neft və milyonlar səltənətində”, 1917-ci ildə isə Üzeyir Hacıbəylinin eyniadlı operettası əsasında “Arşın mal alan” qısametrajlı bədii filmləri çəkilib.

Azərbaycan Xalq Cümhuriyyəti dövründə hökumət bir çox mədəni-siyasi islahatlar keçirib. Xarici aləmlə diplomatik, mədəni–iqtisadi əlaqələr dünya kinosunun ilk nümunələrinin Bakıya gətirilməsinə və ictimai baxışlara təkan verib. Bunun nəticəsində Bakıda kinematoqrafiya həvəskarlarının sayı artmağa başlayıb. 1918-ci ildə onlar “Kinematoqrafiya və teatr qulluqçuları şurası”nda birləşiblər.

Azərbaycanda sovet hakimiyyəti qurulduqdan sonra 1923-cü ildə Azərbaycan Foto-Kino İdarəsi (AFKİ) yaradılıb və həmin il aprelin 28-də Birinci Dövlət Kinofabriki açılıb. Burada çəkilən ilk film xalq əfsanəsinin motivləri əsasında yaradılmış “Qız qalası” bədii filmi olub.

1923-1926-cı illərdə kinostudiya Birinci Dövlət Kinofabriki, sonradan AFKİ Kinofabrik ilə birləşdirilərək “Azdövlətkino”, “Azərkino”, “Azərfilm”, “Azdövlətkinosənaye”, “Bakı kinostudiyası”, “Azərbaycanfilm” adlandırılıb. 1960-cı ildən Cəfər Cabbarlının adını daşıyır.

“Azərbaycanfilm”də indiyədək iki mindən çox müxtəlif növ və janrda film istehsal olunub. Onların bir hissəsi, o cümlədən “Arşın mal alan”, “Şərikli çörək”, “Ad günü”, “Sevinc buxtası”, “İstintaq”, “Yaramaz” və başqaları Dövlət mükafatlarına, bir çox filmlər, o cümlədən “Ögey ana”, “Uzaq sahillərdə”, “Arşın mal alan”, “Bizim Cəbiş müəllim”, “Axırıncı aşırım”, “Nəsimi”, “Özgə vaxt”, “Sarı gəlin”, “Ovsunçu”, “Buta”, “Çölçü”, “Nabat”, “Axınla aşağı” və digərləri beynəlxalq və digər kinofestivalların mükafatlarına layiq görülüb.

Ümummilli lider Heydər Əliyevin mədəniyyət və incəsənət xadimlərinə, kino sahəsində çalışanlara göstərdiyi diqqət və qayğı hazırda Prezident İlham Əliyev tərəfindən uğurla davam etdirilir. Prezident İlham Əliyevin “Azərbaycanda kino sənətinin inkişaf etdirilməsi haqqında” 2007-ci il 23 fevral tarixli Sərəncamı milli kinomuzun maddi-texniki bazasının möhkəmləndirilməsinə yeni təkan verib. Dövlətimizin başçısının müvafiq Sərəncamı ilə təsdiq olunmuş “Azərbaycan kinosunun 2008-2018-ci illər üzrə inkişafına dair Dövlət Proqramı”nın icrasını təmin etmək məqsədilə bir çox mühüm işlər görülüb.

NUHÇIXAN xəbər verir ki, bu gün Azərbaycan kinosu yaranmasının 121-ci ildönümünü qeyd edir.

Qeyd edək ki, 2018-ci ildə Azərbaycan kinosunun 120 illiyinin qeyd olunması haqqında Prezident İlham Əliyevin imzaladığı Sərəncama əsasən ölkəmizin hər yerində silsilə tədbirlər keçirilib. Bu il 121-ci ildönümünü qeyd etdiyimiz Azərbaycan kino sənəti ötən müddətdə əlamətdar hadisələrlə zəngin özünəməxsus inkişaf yolu keçərək, xalqımızın mədəni-mənəvi həyatında mühüm rol oynayıb.

Azərbaycan kinosu böyük tarixə malikdir. Bu illər ərzində ölkəmizin, xalqımızın həyatının müxtəlif sahələrinə aid filmlər çəkilib. Təxminən son on ildə dövlət büdcəsindən ayrılmış vəsait hesabına 46 tammetrajlı bədii, 50 qısametrajlı bədii, 212 sənədli, habelə 23 cizgi filmi çəkilib. Bu gün gənclərimiz Türkiyə, Kanada, Rusiya kimi ölkələrin təhsil müəssisələrində bu sahədə təhsil alırlar. Eyni zamanda, ölkəmiz dünyanın müxtəlif ölkələrində keçirilən film festivallarında iştirak edir. 2014-2017-ci illər ərzində 26 filmimiz 48 ölkədə keçirilən 128 festivalda 219 dəfə iştirak edərək 49 mükafat qazanıb.

Bu günlər kino xadimləri üçün əlamətdar hadisələrlə yadda qalıb. Belə ki, ölkə başçısı avqustun 1-də Azərbaycan kinematoqrafiyasının inkişafında xidmətlərinə görə bir qrup kino xadiminə fəxri adların verilməsi haqqında sərəncamlar imzalayıb.

Bu gün Nizami Kino Mərkəzində Azərbaycan kinosunun 121 illiyinə həsr olunmuş tədbir keçiriləcək.

Tədbir çərçivəsində bir sıra mədəniyyət və incəsənət xadimləri, o cümlədən kino xadimlərinin mükafatlandırılması nəzərdə tutulub.


Naxçıvan Muxtar Respublikası
Mədəniyyət Nazirliyinin Mətbuat Xidməti
02.08.2019



      Avqustun 1-də Məmməd Səid Ordubadi adına Naxçıvan Muxtar Respublika Kitabxanasında Azərbaycan Əlifbası və Azərbaycan Dili Günü münasibətilə tədbir keçirilib. Tədbiri giriş sözü ilə Naxçıvan Muxtar Respublikası Mədəniyyət Nazirliyinin aparat rəhbəri Piri Nağıyev açıb.

Bildirilib ki, ölkəmizdə ümummilli lider Heydər Əliyevin imzaladığı 2001-ci il 9 avqust tarixli Fərman ilə hər il avqustun 1-i Azərbaycan Əlifbası və Azərbaycan Dili Günü kimi qeyd edilir.

Ölkəmizdə dil siyasətinin formalaşdırılması, Azərbaycan dilinin dövlət dili kimi tətbiqi işinin təkmilləşdirilməsi və dünya azərbaycanlılarının ünsiyyət vasitəsinə çevrilərək milli həmrəyliyin göstəricisi kimi beynəlxalq aləmdə rolu və nüfuzunun yüksəldilməsi ümummilli lider Heydər Əliyevin adı ilə bağlıdır.

AMEA Naxçıvan Bölməsinin İncəsənət, Dil və Ədəbiyyat İnstitutunun direktoru,Azərbaycan Milli ElmlərAkademiyasının müxbir üzvü Əbülfəz Quliyev “Heydər Əliyev irsi və müstəqillik dövründə ədəbi dilimizin inkişafı məsələləri” mövzusunda çıxışında bildirib ki, “Hər bir xalqın milliliyini, mənəvi dəyərlərini yaşadan, inkişaf etdirən onun dilidir”, – deyən ulu öndər Heydər Əliyevin apardığı gərgin işin nəticəsi olaraq 1978-ci ildə Azərbaycan SSR Konstitusiyasının 73-cü maddəsi ilə Azərbaycan dili dövlət dili kimi təsbit edildi. Həmin dövrdən etibarənAzərbaycan dilinin elmi şəkildə öyrənilməsinə başlanıldı, dilçi- alimlərin fəaliyyəti üçün geniş imkanlar açıldı, elmi-tədqiqat materialları və kitablar nəşr olundu.

Naxçıvan Muxtar Respublikası Yazıçılar Birliyinin sədri, Azərbaycan Respublikasının Əməkdar mədəniyyət işçisi Asim Əliyev “Milli varlığımız – ana dilimiz” mövzusundakı çıxışında ədəbi dilimizin zənginliyindən, poetik ifadəliyindən və insanlar arasında mükəmməl nitq vasitəsi olmasından bəhs edib.

“Dil mənəvi dəyərləri yaşadan amildir” mövzusunda çıxış edən Məmməd Səid Ordubadi adına Naxçıvan Muxtar Respublika Kitabxanasının direktoru Tamella Əsgərova vurğulayıb ki, dil millətin varlığını təsdiq edən mənəvisərvətdir. Dövlət müstəqilliyimizin atributlarından biri hesab edilən ana dilimizi qorumaq, inkişaf etdirmək və yaşatmaq hər bir azərbaycanlının vətəndaşlıq borcudur.

Sonra kitab sərgisinə baxış olub.


Naxçıvan Muxtar Respublikası
Mədəniyyət Nazirliyinin Mətbuat Xidməti
01.08.2019



      24-26 iyul tarixlərində İspaniya vətəndaşı, arxeoloq Rodriguez Oscar Naxçıvan Muxtar Respublikasında səfərdə olmuşdur. Ölkəsinə qayıtdıqdan sonra o, “Tripadvisor” sosial şəbəkəsində Naxçıvan Muxtar Respublikası barədə aşağıdakı məlumatı paylaşmışdır.

Naxçıvan Qafqazın gözəl, gizli bir guşəsidir. Bura səfər etsəniz, türk və islam mədəniyyətlərini özündə birləşdirən abidələr, zəngin mətbəx, qonaqpərvər insanlar və əsrarəngiz təbiət mənzərələri ilə rastlaşa bilərsiniz. Kaşı və kərpiclə bəzədilmiş türk-islam mədəniyyəti abidələri ilə tanışlığımız inanılmaz dərəcədə gözəl keçdi. Bir arxeoloq və tarixçi olaraq deyə bilərəm ki, I-IV əsrə aid olan məşhur Əlincəqalaya səfərim çox yaddaqalan oldu. Ərazidəki dağların, təpələrin, qaya birləşmələrinin və Araz çayının yaşıl vadisinin inanılmaz mənzərəsi insanı valeh edir. Azərbaycana səfər edərkən iki və ya üç gün Naxçıvanda qalmağınızı tövsiyə edirəm. Xatırladım ki, Bakı ilə yanaşı, İstanbul və Moskvadan da Naxçıvana səfər etmək mümkündür.


Naxçıvan Muxtar Respublikası
Mədəniyyət Nazirliyinin Mətbuat Xidməti
01.08.2019



      İyulun 30-da Culfa rayonunun Milax Kənd Mədəniyyət Evində Azərbaycan Əlifbası və Azərbaycan Dili Günü münasibətilə tədbir keçirilib.

Tədbiri giriş sözü ilə açan Culfa Rayon Mədəniyyət Şöbəsinin müdiri Pərvin Həsənov bu əlamətdar günün mahiyyətindən danışıb. Qeyd edilib ki, Azərbaycanda dil siyasətinin formalaşdırılması, Azərbaycan dilinin dövlət dili kimi tətbiqi işinin təkmilləşdirilməsi və dünya azərbaycanlılarının ünsiyyət vasitəsinə çevrilərək milli həmrəyliyin göstəricisi kimi beynəlxalq aləmdə rolu və nüfuzunun yüksəlməsi ümummilli lider Heydər Əliyevin adı ilə bağlıdır. Müstəqil Azərbaycanın 1995-ci ildə ümumxalq səsverməsi yolu ilə qəbul olunmuş Konstitusiyasında Azərbaycan dilinin Azərbaycan Respublikasının dövlət dili kimi təsbiti, onun rəsmi dövlət dili statusuna yüksəlməsi milli dövlətçilik tariximizin ən mühüm hadisələrindən biridir.

Sonra Mədəniyyət üzrə Elmi-Metodik Mərkəzin direktoru Səyyar Məmmədovun, Milax kənd tam orta məktəbin tarix müəllimi Bəhman Əliyevin, Milax Kənd Mədəniyyət Evinin direktoru Elman Hacıyevin müvafiq olaraq, "Ana dili ən ali milli sərvətimizdir", "Anaq dilim", "Ana dilimizin inkişaf yolu" mövzularında çıxışları olub. Çıxışlarda bildirilib ki, hər bir xalqı, milləti başqalarından fərqləndirən mühüm amillərdən biri və ən başlıcası onun dilidir. Azərbaycan dili də özünəməxsus zənginliyi ilə başqa dillərdən seçilir.

Qeyd olunub ki, dil xalqın tarixini özündə yaşadan bir vasitədir. Azərbaycan xalqının müxtəlif dövrlərdə öz müstəqilliyi uğrunda apardığı mübarizə dil siyasətində də öz əksini tapmışdır. Məlumdur ki, bugünkü müstəqil Azərbaycan Respublikası Azərbaycan Xalq Cümhuriyyətinin siyasi varisidir. Xalqımızın qədim dövlətçilik ənənələrini yaşadan Azərbaycan Xalq Cümhuriyyəti 1918-ci ildə qurulandan sonra dil məsələsi gündəmə gəlmiş və hökumətin imzaladığı ilk sənədlə Azərbaycan dili dövlət dili elan olunmuşdur.

1978-ci ildə Azərbaycan SSR Konstitusiyasının 73-cü maddəsi ilə Azərbaycan dili dövlət dili kimi təsbit edildi. Həmin dövrdən etibarən Azərbaycan dilinin elmi şəkildə öyrənilməsinə başlanmış, dilçi alimlərin fəaliyyəti üçün geniş imkanlar açılmış, elmi-tədqiqat materialları və kitablar nəşr olunmuşdur.

Dahi rəhbərin siyasi hakimiyyətə ikinci qayıdışından sonra da milli dəyərlərimizin ən qiymətlisi və bir millət kimi milli varlığımızın rəmzi olan Azərbaycan dilinin saflaşdırılması və inkişafı istiqamətində mühüm addımlar atılmışdır. Azərbaycan Respublikası Konstitusiyasının 21-ci maddəsində Azərbaycan dili dövlət dili kimi öz təsbitini tapmışdır. Ulu öndərin qəbul etdiyi “Dövlət dilinin tətbiqi işinin təkmilləşdirilməsi haqqında” 2001-ci il 18 iyun tarixli Fərman və “Azərbaycan Respublikasında Dövlət dili haqqında” Azərbaycan Respublikasının Qanunu mühüm dövlət sənədləridir. Ulu öndərin “Dövlət dilinin tətbiqi işinin təkmilləşdirilməsi haqqında” Fərmanı ilə ölkəmizdə latın qrafikası tətbiq olunmuşdur.

Bu gün Azərbaycan Respublikasının Prezidenti cənab İlham Əliyev doğma dilimizə, milli adət-ənənələrimizə, qədim mədəniyyətimizə böyük həssaslıqla yanaşır. Ölkə başçısının “Azərbaycan dilində latın qrafikası ilə kütləvi nəşrlərin həyata keçirilməsi haqqında” 2004-cü il 12 yanvar tarixli Sərəncamı ana dilimizə dərin ehtiramın ifadəsidir.

Vurğulanıb ki, bu gün Naxçıvan Muxtar Respublikasında da dövlət dil siyasəti uğurla həyata keçirilir. Naxçıvan şəhərində “Ana dili” abidəsi ucaldılmışdır. Son illər muxtar respublikada dərc olunmuş “Naxçıvan Ensiklopediyası”, “Naxçıvan Abidələri Ensiklopediyası”, 3 cilddə “Naxçıvan folkloru antologiyası”, 3 cildlik “Naxçıvan tarixi” kitabı, xeyli sayda digər nəşrlər tariximiz və mədəniyyətimizlə yanaşı, dilimizin də inkişafına mühüm töhfədir. Naxçıvan Muxtar Respublikası Ali Məclisi Sədrinin “Oxunması zəruri olan kitablar haqqında” 2017-ci il 28 avqust tarixli Sərəncamı gənclərdə mütaliə mədəniyyətini formalaşdırmaqla yanaşı, onlarda ana dilinə sevgi və hörmət hisslərini də artırır.

Sonda Milax Kənd Mədəniyyət Evinin bədii qiraət dərnəyinin üzvləri ana dilimizə həsr olunmuş şeirləri bədii qiraət ediblər.


Naxçıvan Muxtar Respublikası
Mədəniyyət Nazirliyinin Mətbuat Xidməti
31.07.2019



      Xalqın tarixi, elmi və mədəni abidələrinin, maddi və mənəvi dəyərlərinin qorunması, saxlanılması, təbliğ edilməsi və gələcək nəsillərə ötürülməsində qiymətli sərvətlər qalereyası hesab olunan muzeylərin müstəsna əhəmiyyəti vardır. Muxtar respublikanın nazirlik, komitə və baş idarələrinin kollektivlərinin “Muzey günləri” çərçivəsində cari ildə həmin mədəniyyət müəssisələrimizi ziyarətləri də milli-mədəni irsimizin öyrənilməsi və təbliğinə xidmət edir.

İyulun 27-də Naxçıvan Muxtar Respublikası Ali Məclisi Aparatının, Naxçıvan Muxtar Respublikası Ali Məclisinin Naxçıvanşünaslıq Mərkəzinin və Naxçıvan Muxtar Respublikasının Gənclər Fondunun kollektivləri Naxçıvan şəhərində fəaliyyət göstərən Xatirə Muzeyində olublar.

Muzeyin baş fond mühafizi Leyla Məmmədova bildirib ki, bu mədəniyyət müəssisəsi Naxçıvan Muxtar Respublikası Ali Məclisi Sədrinin Sərəncamı ilə 1997-ci ildə yaradılıb, 2000-ci ilədək Şəhidlər Muzeyi, həmin ilin 8 avqust tarixindən Xatirə Muzeyi kimi fəaliyyət göstərir. Ermənilər tərəfindən törədilən soyqırımı qurbanlarının, Azərbaycanın suverenliyi və ərazi bütövlüyü uğrunda döyüşlərdə həlak olmuş naxçıvanlıların xatirəsinin əbədiləşdirildiyi muzey 2014-cü ildən Şəhidlər xiyabanı yaxınlığında yerləşən yeni binada fəaliyyət göstərir.

Qeyd edilib ki, ötən əsrin əvvəllərindən başlayaraq təcavüzkar erməni daşnaklarının azərbaycanlılara qarşı törətdikləri dəhşətli cinayətlərin izləri buradakı eksponatlarda öz əksini tapıb. Muzeydə, ümumilikdə, 2 minədək eksponat var ki, bunlardan 400-ə yaxını ekspozisiya zalında nümayiş olunur. Bu eksponatlar içərisində Azərbaycanın Milli qəhrəmanlarının, ölkəmizin suverenliyi və ərazi bütövlüyü uğrunda döyüşlərdə həlak olanların fotoşəkilləri və şəxsi əşyaları, həmçinin qəhrəmanlıq tariximizin müxtəlif dövrlərinə aid kitablar da nümayiş etdirilir.

Vurğulanıb ki, Azərbaycanda baş verən soyqırımlara ilk siyasi-hüquqi qiyməti ümummilli lider Heydər Əliyev verib. Bir-birinin davamı olan 1918-ci il 31 mart, 1990-cı il 20 Yanvar, 1992-ci il 26 fevral faciələri ilə bağlı ulu öndər Heydər Əliyevin imzaladığı sərəncamların surətləri qiymətli sənədlər kimi muzeydə saxlanılır. Bu sənədlər görkəmli dövlət xadiminin xalqımızın şərəfli tarixinə böyük ehtiramının ifadəsi kimi diqqəti çəkir.

Qeyd edək ki, həmin gün Naxçıvan Muxtar Respublikası Nazirlər Kabinetinin kollektivi Qarabağlar Türbə Kompleksində, Ali Məhkəmənin kollektivi isə Cəmşid Naxçıvanskinin ev-muzeyində olublar.

Naxçıvan Muxtar Respublikası Daxili İşlər Nazirliyinin əməkdaşları “Naxçıvanqala” Tarix-Memarlıq Muzey Kompleksini, Dövlət Təhlükəsizliyi Xidmətinin əməkdaşları Naxçıvan Dövlət Xalça Muzeyini, Naxçıvan Muxtar Respublikası Prokurorluğunun əməkdaşları “Əlincə­qala” Tarix-Mədəniyyət Muzey Kompleksi və Gülüstan türbəsini, Ədliyyə Nazirliyinin əməkdaşları “Xan Sarayı” Dövlət Tarix-Memarlıq, Möminə Xatın və Açıq Səma Altında Muzey Kompleksini, Fövqəladə Hallar Nazirliyinin əməkdaşları Ədəbiyyat Muzeyini, Dövlət Gömrük Komitəsinin əməkdaşları Naxçıvan Dövlət Tarix Muzeyini, İnsan Hüquqları üzrə Müvəkkil (Ombudsman) Aparatının əməkdaşları Dövlət Bayrağı Muzeyini, Maliyyə Nazirliyinin kollektivi Heydər Əliyev Muzeyini, Vergilər Nazirliyində fəaliyyət göstərənlər Bəhruz Kəngərli Muzeyini, İqtisadiyyat Nazirliyinin əməkdaşları Nəbatat bağını, Nəqliyyat Nazirliyinin kollektivi Naxçıvan Dövlət Rəsm Qalereyasını, Əmək və Əhalinin Sosial Müdafiəsi Nazirliyinin əməkdaşları Cəlil Məmmədquluzadənin ev-muzeyini, Kənd Təsərrüfatı Nazirliyinin kollektivi Hüseyn Cavidin ev-muzeyi və xatirə kompleksini, Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyanın əməkdaşları Naxçıvan Duz Muzeyini, Dövlət Miqrasiya Xidməti, Səfərbərlik və Hərbi Xidmətə Çağırış üzrə Dövlət Xidməti və Dövlət Baytarlıq Xidmətinin kollektivləri isə Naxçıvan Biznes Mərkəzini ziyarət ediblər.


Naxçıvan Muxtar Respublikası
Mədəniyyət Nazirliyinin Mətbuat Xidməti
30.07.2019



      Bakı şəhərində nəşr olunan “Musiqi dünyası” jurnalının növbəti sayında görkəmli bəstəkar, şair, dramaturq və rəssam Ərtoğrol Cavidlə bağlı “Hüseyn Cavid ömrünün yarımçıq əsərlərindən biri- Ərtoğrol Cavid-100” adlı məqalə yer alıb.

Müəllifləri xalq artisti Tofiq Bakıxanov və professor Nazim Paşa Quliyev olan məqalədə görkəmli bəstəkarın həyat və yaradıcılığına nəzər salınıb, şeirlərindən parçalar yer alıb. Qeyd olunub ki, nota köçürdüyü 200-dən çox el havaları, mətnləri, yazıya aldığı çoxsaylı dastan və nağıllar, fortepiano üçün “9 variasiya”, “Sonatina”, prelüdlər, miniatürlər, pyeslər, musiqi lövhələri, skripka və fortepiano üçün “Poema”, “Cəbhədən məktub” simfonik balladası, nəfəsli orkestr üçün marşlar, klassiklərimizin sözlərinə mahnı və romanslar, instrumental və kamera əsərləri, tamamlanmamış “Şeyx Sənan”, “Məhsəti” operaları istedadlı bəstəkar Ərtoğrol Cavidin kiçik yaradıcı ömrünün həm məzmun, həm də forma baxımından böyük dəyərli əsərləridir.

Nüfuzlu “Musiqi dünyası” jurnalının bu sayı 30 min nüsxə olmaqla çap olunub, virtual oxucularının sayı isə 240 min olub.

Qeyd edək ki, Naxçıvan Muxtar Respublikası Ali Məclisinin Sədri 18 aprel 2019-cu il tarixində “Ərtoğrol Cavidin 100 illik yubileyinin keçirilməsi haqqında” Sərəncam imzalayıb. Sərəncam çərçivəsində muxtar respublikada silsilə tədbirlər keçirilir.


Naxçıvan Muxtar Respublikası
Mədəniyyət Nazirliyinin Mətbuat Xidməti
27.07.2019



      İyulun 25-də Naxçıvan Muxtar Respublikası Mədəniyyət Nazirliyinin təşkilatçılığı ilə Nazirliyin strukturuna daxil olan mədəni-maarif müəssisələrinin gənc əməkdaşları üçün Naxçıvantəpə arxeoloji abidəsinə ekskursiya təşkil olunub.

Ekskursiya başlamazdan əvvəl Naxçıvan Muxtar Respublikasının Mədəniyyət Nazirliyinin əməkdaşı İlkin Cabbarov çıxış edərək vurğulayıb ki, Naxçıvan Muxtar Respublikasının Mədəniyyət Nazirliyinin təşkilatçılığı ilə keçirilən belə ekskursiyaların əsas məqsədi gənclərin asudə vaxtının səmərəli keçirilməsi, Naxçıvan mədəniyyətinin təbliği, qədim dövr Naxçıvan mədəniyyəti haqqında gənclərin ətraflı məlumatlandırılması və gənc nəslə qədim tarixi abidələrimizin tanıdılmasından ibarətdir.

Ekskursiya zamanı AMEA-nın Naxçıvan Bölməsinin Tarix, Etnoqrafiya və Arxeologiya İnstitutunun Qədim dövr arxeologiyası şöbəsinin müdiri, Naxçıvan arxeoloji ekspedisiyasının rəhbəri və AMEA-nın müxbir üzvü Vəli Baxşəliyev gənclərə arxeoloji ekspedisiyalarla bağlı məlumat verərək bildirilib ki, son illərdə Naxçıvan ərazisində aparılan arxeoloji qazıntılar nəticəsində əldə edilmiş maddi-mədəniyyət nümunələrini araşdıran arxeoloqlar təsdiq edirlər ki, 300-500 min il bundan əvvəl bu ərazilərdə ən qədim insanlar məskən salıblar. Bu yaşayış məskənləri, əsasən, Naxçıvanın təbii zənginliklərə malik çay vadilərində, dağ yamaclarında, eyni zamanda, yaşı minilliklərlə ölçülən mağaralarda olub. Arxeoloji qazıntılar zamanı qədim yaşayış yerlərindən aşkar olunan əmək alətləri, maddi nümunələr bu ərazinin nəinki Azərbaycanın, hətta dünyanın ən qədim yaşayış yerlərindən biri olduğunu göstərir. Naxçıvançayın sağ sahilində, dəniz səviyyəsindən 853 m yüksəklikdə yerləşən Naxçıvantəpə arxeoloji abidəsi də Naxçıvanın qədim tarixini özündə əks etdirən yaşayış yerlərindən biridir.

Qeyd edilib ki, iyul ayının 1-dən qədim yaşayış məskənində arxeoloji qazıntılar aparılmağa başlanılıb. Burada tədqiqatların aparılması Cənubi Qafqaz mədəniyyətləri ilə Yaxın Şərq mədəniyyətləri arasındakı əlaqələrin aşkara çıxarılmasında və Naxçıvan tarixinin öyrənilməsində böyük rol oynayır.

Tədqiqatlar zamanı torpaq laylarının altından yaşayış evlərinin qalıqları, obsidian parçaları, ocaq yerləri, boyalı basma naxışlı keramika nümunələri və müxtəlif əmək alətləri aşkar olunub. Keramika məmulatları Dalma təpə tipli boyalı və basma naxışlı olmasına görə xüsusilə fərqlənir. Tədqiqatçılar burda aşkar olunan maddi-mədəniyyət nümunələrinə əsaslanaraq bu qədim yaşayış yerini Eneolit dövrünün erkən mərhələsinə aid edirlər.

Vurğulanıb ki, Naxçıvantəpə qədim yaşayış yerinin tədqiqi yalnız Azərbaycanın deyil, bütövlükdə Cənubi Qafqazın Eneolit mədəniyyətinin ardıcıl mərhələlərini öyrənməyə imkan verir.

Ekskursiya zamanı gəncləri maraqlandıran suallar ətraflı şəkildə cavablandırılıb.


Naxçıvan Muxtar Respublikası
Mədəniyyət Nazirliyinin Mətbuat Xidməti
25.07.2019



      AMEA Naxçıvan Bölməsinin İnformasiya şöbəsindən verilən məlumata görə, Naxçıvan Bölməsinin Tarix, Etnoqrafiya və Arxeologiya İnstitutunun direktoru, AMEA-nın müxbir üzvü Fəxrəddin Səfərli və “Xalçaşünaslıq” elmi-tədqiqat qrupunun rəhbəri, tarix üzrə fəlsəfə doktoru, dosent Sara Hacıyevanın həmmüəllifi olduğu “Naxçıvanda xalçaçılıq: tarixdə və günümüzdə” adlı monoqrafiya çap edilib.

Nəşrdə xalqımızın qiymətli bədii sənət əsərlərindən biri olan xalçaçılıq sənətinin Naxçıvanda yaranması, inkişaf yolu və bugünkü vəziyyətindən söz açılır, xalçalar üzərində toxunan naxışlar, ornamentlər haqqında məlumat verilir. Bundan əlavə, qədim el sənətlərindən və xalçaçılığın ilk nümunələrindən sayılan keçəçilik, toxuculuq sənəti, xalçaçılığın inkişafında mühüm rol oynayan boyaçılıq və digərləri ilə bağlı müəlliflərin apardığı araşdırmalar yer alıb.

Qeyd edək ki, 9 aprel 2018-ci il tarixində Naxçıvan Muxtar Respublikası Ali Məclisinin Sədri Vasif Talıbov “Naxçıvan Muxtar Respublikasında Xalça sənətinin qorunması və inkişaf etdirilməsinə dair 2018-2022-ci illər üçün Dövlət Proqramı”nın təsdiq edilməsi haqqında” Sərəncam imzalayıb və Tədbirlər Planı təsdiq edilib. Həmçinin Muxtar Respublikanın Nazirlər Kabinetinin 25 iyul 2018-ci il tarixli qərarı ilə AMEA-nın Naxçıvan Bölməsinin Tarix, Etnoqrafiya və Arxeologiya İnstitutunun tərkibində “Xalçaşünaslıq” elmi-tədqiqat qrupu yaradılıb.


Naxçıvan Muxtar Respublikası
Mədəniyyət Nazirliyinin Mətbuat Xidməti
25.07.2019



      “Muzey günləri” çərçivəsində Şərur rayonunun idarə, müəssisə və təşkilatlarının kollektivləri qədim tarixi abidələrdən biri olan Yengicə kəndindəki Şərq hamamını ziyarət ediblər.

Kollektivlərə on səkkizinci əsrdə tikilən hamam barədə ətraflı məlumat verilərkən bildirilib ki, Şərq hamamı iyirminci əsrin 80-ci illərinə qədər fəaliyyət göstərib. Baxımsızlıq səbəbindən dağılmaq vəziyyətində olan bu tarixi abidədə 2017-ci ilin mart ayından etibarən Naxçıvan Muxtar Respublikası Ali Məclisi Sədrinin himayəsi ilə bərpa işlərinə başlanılıb və bu iş 2018-ci ilin sentybarında müvəfəqiyyətlə başa çatdırılıb.

Bildirilib ki, tarixi binada 7 sahə üzrə xidmət təşkil edilib. Burada 2 dərzi, qadın və kişi bərbəri, fotoqraf, papaqçı, çəkməçi və musiqi alətləri ustası olmaqla, 8 nəfər işlə təmin olunub. Qədim tarixə malik olan bu abidə həm yerli, həm də xarici ölkə vətəndaşları tərəfindən maraqla ziyarət olunur.


Naxçıvan Muxtar Respublikası
Mədəniyyət Nazirliyinin Mətbuat Xidməti
25.07.2019



      İyulun 23-də Babək Rayon Mədəniyyət Sarayında Babək Rayon Xalq Teatrının yaradılmasının 10 illik yubileyinə həsr olunmuş tədbir keçirilmişdir.

Tədbirdə Naxçıvan Muxtar Respublikasının Mədəniyyət naziri Natəvan Qədimova çıxış etmişdir. Bildirilmişdir ki, Azərbaycanda, eləcə də Naxçıvan diyarında teatr sənətinin kökləri xalqın fəaliyyəti, məişəti, şənlik və toy ənənələri, həmçinin dünyagörüşü ilə bağlıdır. Qədim tarixə malik “Sayaçı”, “Novruz”, “Gəvsəç” kimi xalq mərasimlərinin xor, rəqs və dialoqlarla yanaşı, dramatik süjetə, hərəkətə, bəzən isə bədii surətlərə, dinamik obrazlara malik olması xalqımızın ən qədim zamanlardan oyun və tamaşaların səhnələşdirilməsi sənətinə marağını göstərməkdədir. “Novruz” mərasiminin mühüm bir epizodunu təşkil edən “Kosa-kosa” oyunu əsl teatr örnəyidir. Buradakı ardıcıl süjetin, dramatik hərəkətin, həmçinin xüsusi paltar geyinərək qrimlənən obrazların olması professional teatr sənətinin ilkin rüşeymləri kimi diqqəti cəlb edir. Ümumxalq adətinə görə, bir neçə gün davam edən toy mərasimlərində ifa olunan xalq oyunları, yallı və rəqslər tamaşa ünsürlərini özündə yaşadan adət-ənənələrimizdəndir. Yaxud ozan-aşıq məclislərində, “Zorxana” səhnələrində, kəndirbazların çıxışlarında, habelə qədimdə el arasında geniş yayılan “Yuğ” mərasimində də meydan teatrı ünsürlərinin güclü olması xalq teatrlarının yaranması ilə nəticələnmişdir. Qeyd olunan mərasim, ayin və oyunlardakı tamaşa elementlərinin kollektiv və süjetli şəkildə təqdim edilməsi müstəqil xalq teatrlarının yaranmasında mühüm rol oynamışdır. Tarix boyu xalq arasında geniş yayılmış və meydan teatrı formalarından olan “Kosa-kosa”, “Qaravəlli”, eləcə də kukla tamaşaları formasındakı “Kilimarası”, “Şah Səlim” oyun və mərasimləri ölkəmizdə xalq teatrlarının müstəqil tarixə malik olduğunu göstərir. Bu tamaşa biçimlərindən bir qismi xırda məzhəkələrdən ibarət repertuara malik olub, xalq teatrlarının daha yetkin mərhələsini təşkil edir. Belə ki, əvvəllər insanlar öz fərdi bacarıq və bilikləri ilə meydan və mərasim tamaşaları göstərməyə çalışırdılarsa, xalq teatrlarında isə artıq bu fəaliyyət peşəkar yönümlü fəaliyyətə istiqamətləndirilirmişdir. Nəticədə, xalq teatrları formalaşaraq insanların mədəni təlabatının ödənilməsində böyük pay sahibi olmuşdur.

Daim hərtərəfli qayğı ilə əhatə olunmuş muxtar respublikanın xalq teatrları realist xarakter daşımışdır. İlk yarandığı zamanlarda xalq teatrlarının repertuarını müəyyən etik məzmunlu kiçik tamaşalar təşkil etmişdir. Lakin son illər muxtar respublikada mövcud olan xalq tamaşaları istər yerli, istərsə də dünya klassiklərinin yaradıcılığına müraciət edərək, böyük məzmunlu tamaşalar hazırlayırlar. Belə xalq teatrlarından biri də bu gün yaranmasının 10 illiyini qeyd etdiyimiz Babək Rayon Xalq Teatrıdır.

Babək Rayon Xalq Teatrının yaranma tarixindən və fəaliyyətindən danışan nazir qeyd etmişdir ki, ilk dəfə 2006-cı ildə Cəlil Məmmədquluzadənin “Kamança” pyesi ilə səhnəyə çıxan Babək Rayon Mədəniyyət Evinin dram dərnəyinin üzvləri 2008-ci ildə Ənvər Məmmədxanlının “Xürrəmilərin ağ şahini” əsərindən bir hissəni tamaşaçılara təqdim etmişlər. Öz üzərlərində daim çalışan dərnək üzvləri 2009-cu ildə Q.Fiqereydonun “Ezop” əsəri əsasında daha təkmil və peşəkar səviyyədə tamaşa hazırlanmasına nail olmuşlar. Elə həmin il Naxçıvan Muxtar Respublikası Nazirlər Kabinetinin qərarı ilə dram dərnəyinə “Xalq teatrı” adı verilmişdir. On illik fəaliyyəti dövründə Babək Rayon Xalq Teatrı teatrsevərlərə 15 tamaşa təqdim etmiş, teatra istedadlı aktyorlar cəlb edilmişdir. “Ezop”, “Yollara iz düşür”, “Şeyx Rəhmətullah”, “Solğun çiçəklər”, “İkinci səs”, “Ana”, “Məhəbbət nişanəsi”, “Durna”, “Yağışdan çıxdıq, yağmura düşdük”, “Xəcalət”, “Unuda bilmirəm”, “Bəxtsiz cavan”, “Subaylarınızdan görəsiniz”, “Beş manatlıq gəlin” və "Qız atası" tamaşalarını uğurla səhnəyə qoyan xalq teatrı Culfa, Ordubad, Kəngərli, Şərur, Sədərək və Naxçıvan şəhərlərində qastrol səfərlərində geniş çıxış etmişlər.
Vurğulanmışdır ki, Babək Rayon Xalq Teatrı 2015-ci ildə keçirilən “Xalq teatrlarının muxtar respublika festivalı”nda birinci yerə layiq görülərək, diplomla təltif olunmuşdur. 2017-ci ildə keçirilən növbəti festivalda isə Hüseynbala Mirələmovun “Xəcalət” povesti əsasında hazırlanmış tamaşa ilə çıxış edən Babək Rayon Xalq Teatrı “Ən aktual mövzulu tamaşa” nominasiyasında birinci dərəcəli diploma layiq görülmüşdür. Repertuara salınmış əsərlərin uğurlu tamaşa həllinə nail olan kollektivin uğurları təkcə səhnə əsəri hazırlamaqla məhdudlaşmamış, eyni zamanda, xalq teatrı istedadlı gənc aktyorların üzə çıxarılmasında və onların püxtələşərək peşəkarlıq qazanmalarında müstəsna rol oynamışdır.

“Məlumdur ki, professional teatrın təşəkkülündə xalq teatrı həmişə əhəmiyyətli rol oynamışdır. Daha dəqiq desək, peşəkar teatrlar öz mənbəyini xalq teatrlarından götürmüşdür. Bu baxımdan professional səhnə üçün xalq teatrlarının fəaliyyəti vacibdir” – deyən nazir əlavə etmişdir ki, muxtar respublikadakı xalq teatrları fəaliyyətlərini bu istiqamətdə qurmalı, bu məqsəd üçün çalışmalıdırlar.

Nazir Babək Rayon Xalq Teatrının yaradılmasının 10 illik yubileyi münasibətilə teatrın kollektivini təbrik edərək, xalq teatrının bundan sonrakı fəaliyyətində yeni-yeni yaradıcılıq uğurları arzulamış, xalq teatrlarının, ümumən, Naxçıvan teatrının fəaliyyətinə göstərdiyi yüsək diqqət və qayğıya görə Naxçıvan Muxtar Respublikası Ali Məclisinin Sədrinə mədəniyyət işçiləri adından minnətdarlığını bildirmişdir. Tədbirdə Babək Rayon İcra Hakimiyyətinin başçısı Rasim Hüseynov çıxış edərək Babək Rayon Xalq Teatrının rayon sakinlərinin mədəni tələbatının ödənilməsindəki fəaliyyətindən bəhs etmiş, xalq teatrının kollektivinin Babək rayonunda keçirilən mədəni-kütləvi tədbirlərdə fəal iştirakından danışmışdır. Bildirilmişdir ki, Babək Rayon Xalq Teatrı 10 illik fəaliyyəti dövründə hazırladığı müxtəlif məzmunlu tamaşalarla rayon sakinlərinin estetik zövqünün formalaşmasında, gənc nəslin milli dəyərlər ruhunda tərbiyəsində, insanların asudə vaxtının səmərəli təşkilində əhəmiyyətli rol oynamışdır. Qeyd olunmuşdur ki, Babək rayonunda bütün sahələr kimi, mədəniyyətin inkişafına, təbliğinə də yüksək diqqət və qayğı göstərilir. Babək rayonundakı qəsəbə və kəndlərdə çalışan mədəniyyət işçiləri, eləcə də Babək Rayon Xalq Teatrının fəaliyyəti üçün lazımi iş şəraiti yaradılmışdır.

Vurğulanmışdır ki, bu gün istər xalq teatrının fəaliyyətində, istərsə də mədəniyyət və incəsənətin digər sahələrində əldə olunan nailiyyətlər Naxçıvan Muxtar Respublikası Ali Məclisi Sədrinin bu sahəyə gödtərdiyi davamlı qayğısının əməli nəticələridir.

Sonra Babək Rayon Xalq Teatrının fəaliyyətini əks etdirən videoçarx nümayiş olunmuşdur.

Tədbirin bədii hissəsində Babək Rayon Xalq Teatrının “Yollara iz düşür” (B.Vahabzadə), “5 manatlıq gəlin” (M.S.Ordubadi), “Xəcalət” (H.Mirələmov), “Qız atası” (Ə.Əsgərov) tamaşalarından hazırladığı parçalar teatrsevərlərə təqdim edilmişdir.

Tədbirin aparıcıları Babək Rayon Xalq Teatrının fəaliyyətindən geniş məlumat verərək, kollektiv tərəfindən hazırlanmış tamaşların uğurlu səhnə həllindən danışmışlar. Vurğulanmışdır ki, Babək Rayon Xalq Teatrı professional teatr səhnəsi üçün gərəkli olan püxtələşmiş istedadlı aktyor nəslinin formalaşması işinə də töhfələr verməkdədir.

Babək Rayon Mədəniyyət Sarayının foyesində xalq teatrının hazırladığı tamaşalardan çəkilmiş şəkillərdən ibarət sərgiyə baxış olmuşdur.

Naxçıvan Muxtar Respublikasının Mədəniyyət naziri Natəvan Qədimova və Babək Rayon İcra Hakimiyyətinin başçısı Rasim Hüseynov Babək Rayon Xalq Teatrının üzvləri ilə görüşərək 10 illik fəaliyyəti dövründə hazırladıqları bir neçə tamaşalardan parçaların uğurlu təqdimatına görə kollektivə təşəkkürlərini bildirmiş, bir daha yaradıcılıq uğurları arzulamışlar.


Naxçıvan Muxtar Respublikası
Mədəniyyət Nazirliyinin Mətbuat Xidməti
23.07.2019



İyulun 17-də Ordubad Rayon Tarix-Diyarşünaslıq Muzeyində “Gənc nəslin maariflənməsində muzeylərin rolu” mövzusunda dəyirmi masa keçirilib.

Dəyirmi masanı Naxçıvan Muxtar Respublikasının Mədəniyyət Nazirliyinin Mədəniyyət və mədəni irs şöbəsinin müdiri Gülbuta Babayeva açaraq bildirib ki, qədim diyarımızda muzeylərin fəaliyyətinin canlandırılması, yeni muzeylərin yaradılması sahəsində mühüm işlər görülür, bu mədəniyyət ocaqları muzeyşünaslığın yeni nailiyyətlərinə əsaslanaraq qurulur, Azərbaycan tarixinin yeni uğurlu səhifələri muzey ekspozisiyalarında əksini tapır. Naxçıvan Muxtar Respublikası Ali Məclisi Sədrinin diqqət və qayğısı sayəsində muxtar respublikada tarix-mədəniyyət abidələrinin qorunması, onların bərpası və konservasiyası son illər ərzində geniş vüsət almış, tariximizin və mədəniyyətimizin saxlanc yeri olan yeni-yeni muzeylər istifadəyə verilmiş, onların maddi-texniki bazası möhkəmləndirilmişdir.

Vurğulanıb ki, bu gün Naxçıvan Muxtar Respublikası Mədəniyyət Nazirliyinin tabeliyində 30 muzey və muzeytipli müəssisə fəaliyyət göstərir. Muxtar respublikanın muzeylərində xalqımızın tarixini, həyat tərzini, adət-ənənələrini özündə əks etdirən 140 mindən çox maddi-mədəniyyət nümunələri mühafizə olunaraq qorunub saxlanılır. Ötən il Naxçıvan Duz Muzeyi, Qarabağlar Türbə Kompleksi, Şərur Rayon Tarix-Diyarşünaslıq Muzeyi öz qapılarını ziyarətçilərinin üzünə açmışdır.

Naxçıvan Muxtar Respublikasında muzey işinin səmərəli təşkili və muzey işi ilə bağlı uğurlu kadr seçimi nəticəsində son illər muzeyləri ziyarət edənlərin sayı əhəmiyyətli dərəcədə artmış, buna görə muzey işçilərinin öhdəsinə daha böyük vəzifələr düşmüşdür. Naxçıvan Muxtar Respublikası Ali Məclisi Sədrinin 2014-cü il 19 dekabr tarixli “Muzeylərlə əlaqələrin daha da gücləndirilməsi haqqında” Sərəncamı isə muxtar respublikada dövlət orqanları işçilərinin muzeylərə kollektiv gedişinin təmin olunması ilə yanaşı, həm də qədim Oğuz yurdunun tarixi keçmişinin, mədəniyyətinin öyrənilməsində əhəmiyyətli rol oynayır.

Diqqətə çatdırılmışdır ki, 2019-cu ilin ilk 6 ayı ərzində muxtar respublikanın muzeylərini 287 min 166 nəfər tamaşaçı ziyarət etmişdir ki, onlardan 81 min 863 nəfəri əcnəbi vətəndaşdır.

Bu ilin yanvar-iyun ayları ərzində muzeylərdə 195 açıq və 12 distant dərs keçilmişdir.

Qeyd edilmişdir ki, gənc nəslin muzeylərlə tanışlığı onların keçmişimiz və bu günümüz barədə dərin biliklərə, geniş dünyagörüşünə malik olmasına və milli dəyərlərimizə sədaqət ruhunda böyüməsinə xidmət edir. Buna görə də muxtar respublikanın təhsil müəssisələrinin muzeylərlə əlaqəli işinə xüsusi diqqət yetirilir. Naxçıvan Muxtar Respublikası Ali Məclisi Sədrinin “Naxçıvan Muxtar Respublikasının təhsil müəssisələrində elektron təhsilin təşkili ilə bağlı əlavə tədbirlər haqqında” 2014-cü il 20 iyun tarixli Sərəncamı bu baxımdan mühüm əhəmiyyət kəsb edir. Sərəncama əsasən, muxtar respublikada məktəb-muzey şəbəkələri yaradılmış, Azərbaycanın, Naxçıvanın tarixi və mədəniyyəti, görkəmli şəxsiyyətlərimiz ilə bağlı distant dərslərin keçirilməsinə başlanılmışdır.

Dəyirmi masada iştirak edən Naxçıvan Muxtar Respublikası Mədəniyyət Nazirliyinin mədəni irs və muzey işi üzrə baş məsləhətçisi Qumral Əsədova, Ordubad Rayon Mədəniyyət Şöbəsinin müdiri Azər Məmmədov, Naxçıvan Dövlət Tarix Muzeyinin direktoru, Naxçıvan Muxtar Respublikasının Əməkdar mədəniyyət işçisi Nizami Rəhimov, “Xan Sarayı” Dövlət-Tarix Memarlıq, Möminə Xatın və Açıq Səma Altında Muzey Kompleksinin direktoru, Azərbaycan Respublikasının Əməkdar mədəniyyət işçisi Nəzakət Əsədova, Ordubad Rayon Tarix-Diyarşünaslıq Muzeyinin direktoru, Naxçıvan Muxtar Respublikasının Əməkdar mədəniyyət işçisi Vilayət Bağırov, C.Məmmədquluzadə adına Naxçıvan Muxtar Respublika Ədəbiyyat Muzeyinin direktoru Aləmzər İbrahimova, Bəhruz Kəngərli Muzeyinin direktoru Səbinə Əlincəli, “Naxçıvanqala” Tarix-Memarlıq Muzey Kompleksinin direktoru Rəhim Rəhimov mövzu ilə bağlı fikirlərini bildirmişlər. Tədbirin davamında muzey işçilərinin sualları dəyirmi masa iştirakçıları tərəfindən cavablandırılmışdır.


Naxçıvan Muxtar Respublikası
Mədəniyyət Nazirliyinin Mətbuat Xidməti
17.07.2019



İyulun 13-də ümummilli lider Heydər Əliyevin Azərbaycanda rəhbərliyə gəlməsinin 50 illiyi münasibətilə tədbir keçirilmişdir.

Naxçıvan Muxtar Respublikası Ali Məclisinin Sədri Vasif Talıbov tədbirdə çıxış edərək demişdir: 14 iyul 2019-cu ildə Azərbaycan xalqının dünyaya bəxş etdiyi qüdrətli şəxsiyyət, böyük dövlət xadimi, xilaskar və qurucu lider Heydər Əliyevin hakimiyyətə gəlməsinin 50 illiyi tamam olur. “Mənim həyatımın məqsədi Azərbaycandır, Azərbaycan xalqıdır, Azərbaycan Respublikasıdır”, – deyən ümummilli lider Heydər Əliyevin ən böyük xoşbəxtliyi onun adının müstəqil Azərbaycan dövləti ilə birgə çəkilməsi, qüdrətli şəxsiyyət kimi Azərbaycan xalqının taleyinə qurtuluş tarixini yazmasıdır. Ulu öndərin azərbaycanlı olmağı ilə fəxr edərək sonsuz iftixar və qürur hissi ilə səsləndirdiyi “Azərbaycan mənim qibləgahımdır!” fikrini dahi ömrünün manifesti hesab etmək olar. O manifestin hansı səhifəsini çevirsək, orada Azərbaycan naminə sonsuz fədakarlıqlar göstərən, həyatını Azərbaycana həsr edən, müstəqil Azərbaycan uğrunda öz canından keçməyə hazır olan dahi bir şəxsiyyət, görkəmli dövlət xadiminin tale yolunu görərik.

Ali Məclisin Sədri demişdir: 1969-cu il iyulun 14-də hakimiyyətə gələn 46 yaşlı dövlət təhlükəsizlik orqanı generalı və güclü siyasi iradə sahibi olan möhtərəm Heydər Əliyev Azərbaycanı böyük bir imperiyanın tərkibində milli varlığını itirməkdən qorumalı, heç bir əsas olmadan tarixi torpaqlarımızın Ermənistana güzəştə gedilməsinin qarşısını almalı, iqtisadiyyatı dirçəltməli, sosial ədalətsizliyi aradan qaldırmalı, bir sözlə, xalqı yaşatmalı idi. Bununla yanaşı, təhsil, mədəniyyət və sosial sahədə də öz həllini gözləyən ciddi problemlər yığılıb qalmışdı. Ulu öndərimizin Azərbaycan naminə fəaliyyətinin bu mərhələsi qeyd olunan problemlərin qısa müddətdə aradan qaldırılmasına, dərin köklərə və qədim mədəniyyətə malik olan xalqın tarixi yaddaşının, torpağa sahiblik hissinin bərpasına, bununla birlikdə Azərbaycanın özünə qayıdışına hesablanmışdı. 50 il bundan əvvəl ümummilli lider Heydər Əliyev tərəfindən elan olunmuş siyasi-iqtisadi müstəqillik kursu, inkişafın milli intibaha yönəldilmiş modeli Azərbaycana yeni həyat bəxş etdi. Azərbaycan ittifaq iqtisadiyyatının xammal və aqrar əlavəsindən müxtəlif sahələrdə hərtərəfli inkişafa qovuşan nəhəng infrastruktur ölkəsinə çevrildi. Bu dövrdə Azərbaycanın gələcək müstəqilliyi üçün atılan addımlar, həyata keçirilən məhsuldar fəaliyyət Heydər Əliyev quruculuq xəttinin siyasi əsasını təşkil edirdi. Ümummilli lider o illəri xatırlayarkən deyirdi: “1970-ci illərdə görülən işlər, yaradılan bu böyük iqtisadiyyat, sənaye potensialı və neft sənayesi sahəsində görülən işlər, yaranmış potensial Azərbaycan Respublikasının dövlət müstəqilliyinin əsasıdır. Bu gün bəyan etmək istəyirəm ki, o illərdə bu işləri görərkən mən məhz Azərbaycanın gələcəyini, bugünkü müstəqilliyini düşünürdüm. O işləri görərkən mən əmin idim ki, onlar Azərbaycanın sərbəst, müstəqil yaşaması üçün əsas yaradır”.

Alman filosofu Hegelin belə bir məşhur kəlamı var: “Sürətlə iflasa yaxınlaşan xalqların taleyi yalnız dahilər tərəfindən xilas oluna bilər”. Dahi şəxsiyyət Heydər Əliyevin Azərbaycan naminə fəaliyyətinin 1990-cı ildən sonrakı mərhələsi şərəfli xilaskarlıq və quruculuq missiyası ilə zəngindir. Bu missiyanın öz başlanğıcını götürdüyü yer isə Azərbaycanın Naxçıvan Muxtar Respublikası idi. Bu gün ölkəmizin və muxtar respublikamızın sosial-iqtisadi, elmi və mədəni həyatında gedən proseslərin kökündə fəal yaradıcı gücə malik olan Heydər Əliyev milli dövlətçilik konsepsiyası, inkişafın Heydər Əliyev modeli dayanır. Xalqımızın müdrik rəhbəri bu dövlətçilik konsepsiyasını belə dəyərləndirirdi: “Mənim əsərlərim şeir deyil, roman deyil, elmi kitab deyil, musiqi əsəri deyildir. Mənim əsərim xalqım üçün qurduğum, yaratdığım binalar, saraylar, universitet və məktəb binalarıdır, yollardır, körpülərdir, su hövzələri, su kəmərləridir”.

Ali Məclisin Sədri demişdir: Ulu öndərimiz güclü, müstəqil Azərbaycan dövləti yaratmaqla yanaşı, onu özündən sonra inamla idarə edə biləcək lideri, rəhbəri də yetişdirmişdir. 2003-cü ilin oktyabrında ümummilli liderimizin “Mən ona özüm qədər inanıram və gələcəyinə böyük ümidlər bəsləyirəm”,– deyə özünün layiqli davamçısı kimi təqdim etdiyi hörmətli İlham Əliyev ulu öndərin strategiyasını uğurla davam etdirir, bu strategiyanı yeni dövrün ruhuna uyğun olaraq zənginləşdirir. 50 il bundan əvvəl ümummilli liderimizin keçmiş Sovetlər Birliyinin geridə qalmış aqrar ölkəsindən ittifaq dövlətinin inkişaf etmiş respublikaları sırasına çıxartdığı Azərbaycan, bu gün regionun lider dövlətidir. Beləliklə, siyasi və makroiqtisadi baxımdan sabit, davamlı və dayanıqlı iqtisadi inkişafa malik ölkə, Avropanın enerji təhlükəsizliyinin təmin olunmasında etibarlı tərəfdaş, qlobal enerji və nəqliyyat layihələrinin fəal iştirakçısı, beynəlxalq tədbirlər məkanı kimi tanınan Azərbaycanın bugünkü uğurları Heydər Əliyev siyasətinin məntiqi nəticəsidir.

“Dahi öndər Heydər Əliyev Yeni Azərbaycanın bugünkü simasını və gələcək inkişaf perspektivlərini müəyyənləşdirib. Onun Azərbaycan naminə gördüyü işlər bu gün ölkəmizin milli sərhədlərini aşaraq bütövlükdə regionun və dünya sivilizasiyasının da tərəqqisinə xidmət edir. Xalqımızın böyük oğlu dünyanın ən nüfuzlu mükafatlarına, fəxri ad və titullarına layiq görülüb, lakin onun öz sağlığında layiq görüldüyü ən yüksək mükafat isə Azərbaycan xalqının ümummilli lideri adını qazanmasıdır. Bu da onu deməyə əsas verir ki, Azərbaycanda Heydər Əliyev siyasətinin alternativi yoxdur. Bu siyasət yaşayacaq, özü ilə birlikdə Azərbaycan xalqını da yaşadacaqdır!”, – deyən Ali Məclisin Sədri çıxışını Azərbaycan Respublikasının Prezidenti cənab İlham Əliyevin fikirləri ilə tamamlamışdır: “Heydər Əliyev bütün zamanlarda, bütün dövrlərdə Azərbaycan xalqına ləyaqətlə xidmət etmişdir. Azərbaycanın müstəqilliyinin əbədi, dönməz olmasında, iqtisadi potensialının möhkəmlənməsində, bölgədə və dünyada nüfuzunun artmasında onun müstəsna xidmətləri vardır. Hazırda bu siyasət davam etdirilir. Bu gün Heydər Əliyev bizimlə deyil, ancaq onun siyasəti yaşayır, onun qurduğu müstəqil Azərbaycan yaşayacaqdır! Sonra Naxçıvan Dövlət Televiziyasının hazırladığı “Müstəqil və qüdrətli Azərbaycan naminə – 50 il” filmi nümayiş olunmuşdur.

Tədbirdə “Azərbaycan Xalq Cümhuriyyətinin 100 illiyi (1918-2018)” yubiley medalının, eləcə də Azərbaycan Respublikasının fəxri adlarının və medallarının, Naxçıvan Muxtar Respublikası Ali Məclisi Sədrinin gənc istedadlara xüsusi aylıq təqaüdünün təqdimatı olmuşdur.

Ali Məclisin Sədri “Azərbaycan Xalq Cümhuriyyətinin 100 illiyi (1918-2018)” yubiley medalını, Azərbaycan Respublikasının “Əməkdar mədəniyyət işçisi”, “Əməkdar artisti”, “Əməkdar həkimi” və “Əməkdar tibb işçisi” fəxri adlarının döş nişanlarını və vəsiqələrini, eləcə də “Tərəqqi”, “Dövlət qulluğunda fərqlənməyə görə”, “Vətən uğrunda”, “İgidliyə görə” və “Hərbi xidmətlərə görə” medallarını, gənc istedadlara xüsusi aylıq təqaüdü təqdim etmiş, təltif olunanlarla və gənclərlə xatirə şəkli çəkdirmişdir.

Azərbaycan Respublikasının “Əməkdar mədəniyyət işçisi” fəxri adı və “Azərbaycan Xalq Cümhuriyyətinin 100 illiyi (1918-2018)” yubiley medalı ilə təltif olunmuş Asim Əliyev minnətdarlıq edərək demişdir: Bu, bir həqiqətdir ki, təkcə iqtisadiyyatın inkişafı ilə dövlət idarə olunmur. Dövlətin idarə olunmasında güclü hakimiyyət və qətiyyətli lider amili əsas şərtdir. 50 il bundan əvvəl Azərbaycana rəhbər seçilən ulu öndərimiz Heydər Əliyev güclü dövlət yaratmışdır. Bu gün fəxr edirik ki, müstəqil və qüdrətli Azərbaycan dünya dövlətləri içərisində öz layiqli yerini tutub. Mən həm Azərbaycan Respublikasının “Əməkdar mədəniyyət işçisi”, həm də yubiley medalı ilə təltif olunduğum üçün ölkə Prezidentinə dərin minnətdarlıq edirəm. Şair, ictimai xadim, ziyalı kimi həyatda qazandığım bütün uğurların təməlində ulu öndər Heydər Əliyevin imzası dayanır. Heydər Əliyev yolu Azərbaycanı, doğma Naxçıvanı böyük inkişafa qovuşdurub. Bu gün muxtar respublikada digər sahələr kimi, yaradıcı təşkilatlara da qayğı göstərilir, onların maddi-texniki bazaları gücləndirilir. Ali Məclis Sədrinin 2019-cu il 20 may tarixli Sərəncamı ilə muxtar respublikanın yaradıcılıq təşkilatlarına, o cümlədən Yazıçılar Birliyinə maddi vəsaitin ayrılması bunu bir daha təsdiq edir. Təbii ki, yaradılan şərait, göstərilən qayğının bir səbəbi vardır: o da Azərbaycanda və onun Naxçıvan Muxtar Respublikasında uğurla davam etdirilən Heydər Əliyev siyasi xəttidir.

Azərbaycan Xalq Cümhuriyyətinin 100 illik yubiley medalı ilə təltif olunanlardan Əlövsət Baxşıyev, Kərəm Mustafayev, Ülkər Bayramova, İsmayıl Hacıyev, Sahil Tahirli, Ramilə Seyidova, Bəxtiyar Əsgərov, Əli Quliyev, Saleh Məhərrəmov, Elbrus İsayev, Aidə Allahverdiyeva, Hüseyn Niftəliyev, Yaşar Xəlilov, Firudin Süleymanov, Tofiq Abutalıbov, Vəli Baxşəliyev və Şirzad Abutalıbov da göstərilən yüksək etimada görə minnətdarlıq etmişlər.

Şirzad Abutalıbov demişdir: Naxçıvanda yaşamaq da, işləmək də çox rahatdır. Mən 16 yaşımdan etibarən Naxçıvan teatrında fəaliyyət göstərirəm. Bu gün Naxçıvan teatrı inkişaf edir. Yaradıcılıq imkanlarının genişləndirilməsi, sənət adamlarının hərtərəfli diqqət və qayğı ilə əhatə olunmasını hər zaman hiss edirik. Dövlət qayğısı, yaradılan şərait daha da səmərəli işləməyə imkan verir. Fəxr edirik ki, əsası ulu öndərimiz Heydər Əliyev tərəfindən qoyulan siyasi xətt bu gün ölkəmizi, doğma Naxçıvanımızı daha böyük zirvələrə aparır.

Azərbaycan Respublikasının medalları ilə təltif olunanlardan Fikrət Əhmədov, Rauf Cəfərov, Fəxrəddin Məmmədov, Məcid Seyidov, Ülvi Hüseynli və Mehman Gülməmmədov da minnətdarlıqlarını bildirmiş, bundan sonra daha səylə çalışacaqlarına və göstərilən etimadı doğruldacaqlarına söz vermişlər.

Naxçıvan Muxtar Respublikası Ali Məclisi Sədrinin 2019-cu il 24 iyun tarixli Sərəncamı ilə idman sahəsi üzrə Naxçıvan şəhər 15 nömrəli tam orta məktəbin şagirdi Rafiq Hüseynlinin, təhsil sahəsi üzrə Naxçıvan şəhər 8 nömrəli tam orta məktəbin şagirdi Siyavuş Bağırovun və incəsənət sahəsi üzrə Culfa şəhər 2 nömrəli tam orta məktəbin şagirdi Duyqu Əliyevanın adı Naxçıvan Muxtar Respublikası Gənc İstedadlarının “Qızıl ­kitabı”na yazılmış və onlar Naxçıvan Muxtar Respublikası Ali Məclisi Sədrinin xüsusi aylıq təqaüdünə layiq görülmüşlər.

Ali Məclisin Sədri təqaüd kartlarını gənc istedadlara təqdim etmişdir.

Təqaüdçü gənc Siyavuş Bağırov minnətdarlıq edərək demişdir: “Ali Məclis Sədrinin Sərəncamı ilə muxtar respublikada xüsusi istedada malik 3 gəncin adının Naxçıvan Muxtar Respublikası Gənc İstedadlarının “Qızıl kitabı”na salınması və onların aylıq təqaüdə layiq görülməsi muxtar respublikada təhsilə göstərilən diqqətin bariz nümunəsidir. Əgər 1970-1980-ci illərdə Azərbaycan keçmiş SSRİ tərkibində təhsil sahəsi üzrə ön sıralarda idisə, hazırda Naxçıvan Muxtar Respublikası da təhsilin inkişafı sahəsində Qafqazda ilk yerlərdədir. Ulu öndər Heydər Əliyevin əsasını qoyduğu təhsil strategiyası muxtar respublikada uğurla davam etdirilir. Söz verirəm ki, üzərimə düşən məsuliyyəti dərindən dərk edəcək, yaradılan şəraitdən istifadə edərək yüksək nəticə ilə ali məktəbə qəbul olacağam”. Siyavuş Bağırov muxtar respublika gəncləri adından Ali Məclisin Sədrinə minnətdarlığını bildirmişdir.



Naxçıvan Muxtar Respublikası
Mədəniyyət Nazirliyinin Mətbuat Xidməti
13.07.2019



İyulun 12-də Şərur rayonunda Kosacan Kənd Mərkəzində Naxçıvan Dövlət Film Fondu kənd ictimaiyyətinə Azərbaycan kinosu günü çərçivəsində “Ad günü” filmini göstərmişdir.

Filmin nümayişindən əvvəl Azərbaycan kinosunun inkişaf tarixindən danışan Naxçıvan Dövlət Film Fondunun direktoru Mirakif Seyidov bildirmişdir ki, Azərbaycan kinosu tarixin sınaqlarından həmişə şərəflə çıxmışdır. Kino tariximizdə çətin illər də olmuş, lakin buna baxmayaraq kinomuz mədəni hadisələr yaşamış, həmişə xalqımızın tarixini, milli adət-ənənələrini, milli dəyərlərini yaşatmış, həyatımızın bütün sahələrinə nüfuz edərək sevilən bir sənətə çevrilmişdir.

Qeyd edilib ki, Azərbaycan kino tarixinin əsl inkişaf dövrü sayılan 1970-1980-ci illərdə kino salnaməmizin unudulmaz səhifələrini təşkil edən, mədəniyyətimizin qızıl fonduna daxil olan tarixi filmlər yaradılmış, digər görkəmli əsərlər ekranlaşdırılmış, müasir mövzulu və sənətkarlıq baxımından diqqətəlayiq filmlər çəkilmişdir. Azərbaycan kinosunun bir sıra filmləri bu illərdə yüksək dövlət mükafatlarına layiq görülmüş, beynəlxalq kino festivallarında və müsabiqələrində mükafatlar almışdır.

Bu gün ümummilli liderimizin kinonun inkişafı üçün gördüyü işlər ölkə Prezidenti cənab İlham Əliyev tərəfindən uğurla davam etdirilir. Ölkə başçısı 2008-ci il 4 avqust tarixli Sərəncamla “Azərbaycan kinosunun 2008-2018-ci illər üçün inkişafına dair Dövlət Proqramı”nı təsdiq etmişdir.

Sonra 1977-ci ildə Azərbaycan film kinostudiyasında lentə alınmış “Ad günü” filmi nümayiş etdirilmişdir.

Lirik-psixoloji film həqiqi dostluq haqqındadır. Filmi "Dost haqqında söhbət" də adlandırmaq olar. Kinolentin qəhrəmanları bizim müasirlərimizdir: müxtəlif xarakterli, müxtəlif dünyagörüşlü insanlardır. Burada əxlaqi-etik məsələlərə toxunulur, müasirlərimizin mənəvi aləminin zənginliyi tədqiq edilir. Bu filmdə insan tədqiq və təsvir olunur, onun məişəti və yaşayışı, gündəlik həyatı ekranda canlandırılır.

Filmin rejissoru Rasim Ocaqovdur. Filmdə əsas rolları Hacı İsmayılov, Şəfiqə Məmmədova, Fuad Poladov, Şükufə Yusupova, David Uplisaşvili və başqaları canlandırıblar.

Film kənd ictimaiyyəti tərəfindən böyük maraqla qarşılanmışdır.



Naxçıvan Muxtar Respublikası
Mədəniyyət Nazirliyinin Mətbuat Xidməti
12.07.2019



İyulun 12-də Naxçıvan Muxtar Respublikası Mədəniyyət Nazirliyinin təşkilatçılığı ilə Şahbuz şəhərindəki “Araz” kinoteatrında “Milli-mənəvi dəyərlərimiz və gənclər” mövzusunda maarifləndirici tədbir keçirilib.

Tədbiri giriş sözü ilə açan Mədəniyyət üzrə Elmi-Metodiki Mərkəzin direktoru Səyyar Məmmədov bildirilib ki, qədim və köklü milli-mənəvi dəyərlər sisteminə malik olan Azərbaycan xalqı bu dəyərləri sədaqətlə qorumuş, əsrlərlə yaşatmış və inkişaf etdirmişdir. Milli-mənəvi dəyərlərimizin qorunması və gələcək nəsillərə çatdırılması keçmişdə olduğu kimi bu gün də öz aktuallığını qoruyub saxlayır. Çünki milli-mənəvi dəyərlərimizin Azərbaycan xalqının formalaşmasına təsiri ilə yanaşı, milli dövlətçiliyimizin möhkəmləndirilməsində də xüsusi rolu vardır. Milli-mənəvi, o cümlədən dini dəyərlərimizin, adət-ənənələrimizin dərindən öyrənilməsi və araşdırılması müasir cəmiyyətimizin prioritet istiqamətlərindən biridir. Tarixi təcrübə göstərir ki, öz soykökündən, tarixindən, milli-mənəvi dəyərlərindən uzaq düşən millətlər və dövlətlər müəyyən zaman kəsiyində yox olmaq, tarix səhnəsindən birdəfəlik silinmək təhlükəsi ilə üz-üzə qalmışlar.

Qeyd olunub ki, müasir Azərbaycan tarixinə nəzər saldıqda milli-mənəvi dəyərlərimizin qorunması və inkişafı prinsiplərinin banisi kimi ulu öndər Heydər Əliyevi görürük. Müstəqillik dövrünün təməl daşları üzərində tarixi imzası olan ulu öndər Azərbaycançılıq ideologiyasının əsasını qoyaraq milli-mənəvi dəyərlər sistemimizi daha da gücləndirmiş, aşınmadan xilas etmişdir. Milli-mənəvi dəyərlərimizə qayıdışın və milli oyanışın xalqımız üçün gərəkliliyini nəzərə alan, hər zaman bu məsələni diqqət mərkəzində saxlayan ümummilli liderimiz Heydər Əliyev bu sahədə inqilabi addımların atılmasına zəmin yaratmışdır. Ulu öndər milli-mənəvi dəyərlərimizi təkcə milli varlığımızın yox, həm də siyasi varlığımızın – dövlət quruculuğu prosesinin mühüm atributu hesab edirdi. Mənsub olduğu xalqın tarixi keçmişinə, mənəvi irsinə və milli dəyərlər sisteminə sönməz məhəbbət duyğularıyla yanaşan Ulu öndər deyirdi: “Hər xalqın özünə, öz tarixi köklərinə, əcdadları tərəfindən yaradılmış milli-mənəvi dəyərlərinə bağlılığı böyük amildir. Biz də indi dünyanın mütərəqqi mənəvi dəyərlərindən istifadə edərək, xalqımızın mədəni səviyyəsini daha da inkişaf etdirərək, gənc nəsli daha da sağlam əhval-ruhiyyədə, saf əxlaqi əhval-ruhiyyədə tərbiyələndirməliyik”.

Vurğulanıb ki, bu gün Naxçıvanda milli dəyərlərə münasibət strateji məsələ kimi qarşıya qoyulub və gələcək nəslin təlim-tərbiyəsi də bu konsepsiyanın əsas hədəfini təşkil edir. Buna görə də Naxçıvanda xalqımıza məxsus dəyərlərin milli kulturoloji baza üzərində inkişafı gələcəkdə onun dünya mədəni irsinə əvəzsiz töhfə verəcəyinə əminlik yaradır.

Sonra Məmməd Səid Ordubadi adına Naxçıvan Muxtar Respublika Kitabxanasının sistem inzibatçısı Nuray Qasımova çıxış edərək qeyd edib ki, xalqımıza məxsus milli dəyərlər bizim ən qiymətli xəzinəmizdir və bu xəzinəyə sahib çıxaraq gələcək nəslə ötürmək gənclərin əsas vəzifələrindən biridir.

Maarifləndirici tədbirin sonunda “Azərbaycan motivləri” filmi nümayiş etdirilib.



Naxçıvan Muxtar Respublikası
Mədəniyyət Nazirliyinin Mətbuat Xidməti
12.07.2019



AMEA Naxçıvan Bölməsinin Arxeoloji Ekspedisiyası Naxçıvantəpə qədim yaşayış yerində arxeoloji tədqiqatlara başlayıb.

Naxçıvançayın sağ sahilində, dəniz səviyyəsindən 853 metr yüksəklikdə yerləşən yaşayış yerində aparılan arxeoloji qazıntıya iyulun 1-dən başlanılıb. 2 hektardan artıq əraziyə malik olan yaşayış yerinin əsasən 300 kvadratmetr sahəsində tədqiqatlar davam etdirilir. Qazıntının aparılmasında məqsəd Cənubi Qafqaz mədəniyyətləri ilə Yaxın Şərq mədəniyyətləri arasındakı əlaqələrin, eyni zamanda Naxçıvan şəhərinin məskunlaşma tarixinin öyrənilməsidir. Tədqiqatlar zamanı torpaq laylarının altından yaşayış evlərinin qalıqları, ocaq yerləri, obsidian parçaları, boyalı basma naxışlı keramika nümunələri və müxtəlif əmək alətləri aşkar olunub. Tapıntılar içərisində dən daşları tək-tək nümunələrlə təmsil olunur. Keramika məmulatı başlıca olaraq e.ə. V minilliyin birinci yarısı üçün xarakterikdir. Keramika məmulatının əsas xüsusiyyəti Dalma təpə tipli boyalı və basma naxışlı keramikanın olmasıdır. Ərazidən aşkar olunan maddi nümunələrə əsaslanan tədqiqatçılar qədim yaşayış yerini Eneolit dövrünün erkən mərhələsinə aid edirlər.

Qeyd edək ki, qədim yaşayış yerində arxeoloji tədqiqatlar iyulun sonunadək davam edəcək.



Naxçıvan Muxtar Respublikası
Mədəniyyət Nazirliyinin Mətbuat Xidməti
12.07.2019



İyulun 11-də Heydər Əliyev Muzeyində “Muzeylərdə açıq dərslərin keçirilməsinin gənclərin təlim-tərbiyəsində rolu” mövzusunda seminar-treninq keçirilmişdir.

Nazirliyin sisteminə daxil olan muzeylərin əməkdaşlarının iştirak etdiyi tədbirin məqsəd və əhəmiyyətindən danışan mədəni irs və muzey işi üzrə baş məsləhətçi Qumral Əsədovagiriş sözü ilə çıxış edərək bildirmişdir ki, muxtar respublikada müxtəlif profilli muzeylər fəaliyyət göstərir. Muzeylərə bu gün xüsusi diqqət göstərilir, onların maddi-texniki bazası gücləndirilir, əməkdaşların peşəkarlıq səviyyəsi yüksəldilir. Naxçıvan Muxtar Respublikası Ali Məclisi Sədrinin “Muzeylərlə əlaqələrin daha da gücləndirilməsi haqqında” 2014-cü il 19 dekabr tarixli Sərəncamından sonra muzeylərin ziyarətçilərinin sayında əhəmiyyətli dərəcədə artım müşahidə olunur.

Qeyd olunmuşdur ki, bu gün keçirilən seminar-treninq il ərzində təşkil olunmuş yeddinci seminar-treninqdir. Keçirilən seminar-treninqlərdə muzey əməkdaşları vəzifə funksiyalarını dərindən öyrənməyə səy göstərməklə yanaşı, muzey işi haqqında ətraflı məlumat əldə etmiş olurlar. Eyni zamanda, seminar-treninqlər muzey işçilərinin muxtar diyarımızın bütün bölgələrində yerləşən muzeylərlə tanış olmalarına şərait yaratmaq baxımından da əhəmiyyətlidir. Belə tədbirlərdə muzey əməkdaşlarına bu sahədə həyata keçirilən yeniliklərdən söhbət açılır, onların sualları cavablandırılır.

Vurğulanmışdır ki, cari ilin birinci yarımilində muzeylərdə ümumilikdə 195 açıq dərs keçirilmişdir. Bu açıq dərslər orta və orta ixtisas məktəblərində təhsil alan şagirdlərin muzeyləri, bilavasitə tariximizi, mədəniyyətimizi, incəsənətimizi, qədim adət-ənənələrimizi, eyni zamanda görkəmli şəxsiyyətləri daha yaxından tanıtmaq və qeyd olunanlar haqqında geniş məlumatlar vermək məqsədi daşıyır.

TədbirdəHeydər Əliyev Muzeyinin direktoru, Azərbaycan Respublikasının Əməkdar mədəniyyət işçisi Ramil Orucəliyev“Açıq dərslərin keçirilməsində Heydər Əliyev Muzeyinin təcrübəsi” mövzusunda çıxış edərək bildirmişdir ki,açıq dərslər bu gün muxtar respublikada fəaliyyət göstərən bütün muzeylərin həyata keçirdiyi əsas mədəni-kütləvi tədbirlərdən biridir. Açıq dərslər vasitəsilə şagirdlər muzeyləri gəzmək, orada qorunub-yaşadılan, təbliğ edilən milli dəyərlərimizi daha da yaxından tanımaq imkanı əldə edir. Dərs prosesində öyrənilən milli dəyərləri, maddi-mədəni nümunələri yaxından görmək, onlarla birbaşa tanış olmaq həmin dərsin mənimsənilməsinə böyük köməklik göstərir. Bu baxımdan Heydər Əliyev Muzeyində tədris ili ərzində açıq dərslərin keçirilməsi məqsədəuyğundur. Açıq dərslərin keçirilməsi eyni zamanda muzey əməkdaşlarının üzərinə də ciddi vəzifələr qoyur. Belə ki, müxtəlif yaş qruplarından olan şagirdlərə mühazirələr hazırlamaq, əvvəlcədən müəyyən olunmuş mövzu üzrə hazırlaşmaq əməkdaşların da peşə biliklərinin möhkəmləndirilməsinə köməklik göstərir.

Sonra mövzu ilə bağlı müzakirə aparılmış, tədbir iştirakçılarını maraqlandıran suallar cavablandırılmışdır.

Tədbirin sonunda muzeyin ekspozisiyasına baxış keçirilmişdir.



Naxçıvan Muxtar Respublikası
Mədəniyyət Nazirliyinin Mətbuat Xidməti
11.07.2019



"Milli adət və ənənələrin öyrənilməsi, təbliği və onların milli dəyərlər sistemindəki rolunun tədqiqi hər zaman aktual olub. Çünki milli adət və ənənələr tarixin bütün mərhələlərində ictimai-mədəni tərəqqinin əsas göstəricisi kimi nəzərə çarpır. Cəmiyyət inkişaf etdikcə adət və ənənələr də təkmilləşmiş, millətin, xalqın yaradıcılıq nümunələrini yaşatmış, nəsildən nəsilə ötürülmüşdür. Yeni yaranan hər bir milli dəyər isə tarixi ənənələrimizin varisi kimi təşəkkül tapmışdır. Bu səbəbdən də bütün dövrlərin adət və ənənələrində baş verən yeniliklərin, istiqamətlərin öyrənilməsinə və cəmiyyətdə təbliğinə böyük ehtiyac vardır. Naxçıvan Muxtar Respublikası Ali Məclisi Sədrinin “Naxçıvan Muxtar Respublikasında Xalq yaradıcılığı günlərinin keçirilməsi haqqında” 2009-cu il 7 fevral tarixli Sərəncamı muxtar duyarımızda xalq yaradıcılığı nümunələrinin, milli dəyərlərimizin aşkarlanması, təbliği və tətbiqinə yönəlmiş fəaliyyət istiqamətlərinin müəyyənləşməsində böyük əhəmiyyət kəsb etməkdədir".

Bu fikirlər iyulun 10-da Şərur rayonunun Axura kəndində keçirilən ənənəvi "Xalq yaradıcılığı günü"ndə səsləndirilib. Şərur Rayon Mədəniyyət Şöbəsinin təşkilatçılığı ilə keçirilən tədbirdə çıxış edən Şərur Rayon Mədəniyyət Şöbəsinin müdiri Həsən Seyidov və Mədəniyyət üzrə Elmi-Metodik Mərkəzin direktoru Səyyar Məmmədov bildiriblər ki, muxtar respublikada milli-mənəvi dəyərlərimizin qorunması, təbliği və gələcək nəsillərə ötürülməsi istiqamətində həyata keçirilən tədbirlər davamlı xarakter alıb. Belə tədbirlər unudulmaqda olan milli dəyərlərimizin yenidən xalqımıza qaytarılmasında mühüm rol oynayır.

Qeyd olunub ki, xalq yaradıcılığının, əsrlərboyu yaranan mənəvi və maddi-mədəniyyət nümunələrinin öyrənilməsi, ənənəvi sənət sahələrinin dirçəldilməsi, onların geniş şəkildə tətbiq və təbliğ olunması mühüm əhəmiyyət kəsb edir. Ötən müddət ərzində muxtar respublikamızda xalq yaradıcılığının inkişafı və qorunub saxlanması istiqamətində bir sıra işlər görülüb, folklor kollektivlərinin və xalq teatrlarının fəaliyyəti gücləndirilib. Bütün bunların nəticəsidir ki, mədəniyyət evlərində yaradılmış dərnək, folklor, yallı və rəqs qrupları muxtar respublika, eləcə də ölkə əhəmiyyətli müsabiqələrdə uğurla çıxış edir, müxtəlif nominasiyalar üzrə qalib adını qazanırlar.

Vurğulanıb ki, bu gün keçirilən xalq ya­radıcılığı günü mədəniyyətimizin təbliği baxımından əhəmiyyət kəsb etməklə yanaşı, həm də Şərur rayonunun bu sahədə imkanlarının nümayiş etdirilməsinə şərait yaradır.

"Xalq yaradıcılığı günü" tədbirində Şərur Rayon Mədəniyyət Şöbəsinin tabeliyindəki uşaq musiqi məktəblərinin ansambllarının, mədəniyyət evləri və klubların dərnək üzvlərinin, rəqs və yallı qruplarının, eləcə də folklor kollektivlərinin ifasında "Tirməşal", "Gopu" və "Xələfi" yallıları, "Gül açdı, bahar oldu", "Bir dənəsən, bir dənə" və "Bəh-bəh" xalq mahnıları, "Gözəlləmə", "Baş sarıtel" və "Misri" aşıq havaları, "Şəki" və "İnnabı" rəqsləri, "Fincan-fincan" xalq oyunu, "Azərbaycan ritmləri" və digər xalq yaradıcılığı nümunələri təqdim edilib. Kollektivlərin ifaları alqışlarla qarşılanıb.



Naxçıvan Muxtar Respublikası
Mədəniyyət Nazirliyinin Mətbuat Xidməti
10.07.2019



İyulun 10-da Naxçıvan şəhərindəki Qaraçuq Kənd Mədəniyyət Evində "Milli dəyərlərimizi öyrənək və yaşadaq" mövzusunda tədbir keçirilib.

Tədbiri kənd mədəniyyət evinin direktoru Abbas İsmayılov açaraq xalqımızın minilliklər boyu yaradıb yaşatdığı milli dəyərlərimizin özünəməxsus xüsusiyyətlərindən bəhs edib. Bildirilib ki, qədim dövlətçilik tarixinə malik olan Azərbaycan xalqı hər zaman milli dəyərlərinə sadiq qalaraq bu dəyərləri əsrlərlə yaşatmış və inkişaf etdirmişdir. Milli dəyərlərimizin qorunması və gələcək nəsillərə çatdırılması bu gün də öz aktuallığını qoruyub saxlayır. Çünki milli dəyərlərimizin Azərbaycan xalqının formalaşmasına təsiri böyük olduğu kimi, milli dövlətçiliyimizin möhkəmləndirilməsində də xüsusi rolu vardır.

Vurğulanıb ki, ölkəmizdə milli dəyərlərimizin qorunması və inkişafı ulu öndərimiz Heydər Əliyevin adı ilə bağlıdır. Milli dəyərlərimizə, soykökümüzə qayıdışın, milli hisslərimizin oyanışının xalqımız üçün gərəkliliyini nəzərə alan, hər zaman bu sahəni diqqət mərkəzində saxlayan ümummilliliderimiz Heydər Əliyevin Azərbaycana rəhbərliyinin birinci dövründə xalqımızın milli oyanışının əsası qoyulmuşdur.

Sonra Qaraçuq Kənd mədəniyyət Evinin bədii rəhbəri Yasəmən Əliyeva "Milli dəyərlərimiz xalqımızın mədəniyyətini özündə yaşadan milli kimliyimizdir" mövzusunda çıxış edib. Bildirilib ki, xalqımızın yaratdığı milli dəyərlər bizim ən qiymətli sərvətimizdir. Bu dəyərlər xalqımızın tarixini, dilini, adət-ənənələrini, ədəbiyyat və incəsənətini yaşadaraq bu günümüzə gətirib çıxarmışdır. Muxtar respublikada xalq yaradıcılığı nümunələrinin, eləcə də yallı sənətinin elmi əsaslarla tədqiqi və təbliği istiqamətində görülən işlər ictimaiyyət tərəfindən rəğbətlə qarşılanmaqdadır. Bu tədbirlər sayəsində muxtar respublika sakinləri unudulmaqda olan adət-ənənələrimizin bilavasitə daşıyıcılarına çevrilirlər. Bu isə o deməkdir ki, milli dəyərlərimiz nəsildən nəslə ötürülməklə yaşadılmaqdadır.

Vurğulanıb ki, milli dəyərlərimiz xalqımızın simasında zaman-zaman yaşayıb və bizi başqa millətlərdən fərqləndirib. Bu səbəbdəndir ki, milli dəyərlərimizə dərindən bələd olan xalqımızın ümummilli lideri Heydər Əliyev ölkəmizə rəhbərliyinin hər iki dövründə xalqımıza xas olan adət-ənənələrimizin, ümumən, milli dəyərlər sistemimizin yaşadılması istiqamətində məqsədyönlü tədbirlərin bilavasitə təşəbbüskarı olub.

Tədbirin bədii hissəsində Qaraçuq Kənd Mədəniyyət Evinin bədii qiraət dərnəyinin üzvləri adət-ənənələrimizə, milli musiqi sənətimizə, Naxçıvana həsr olunmuş şeirləri və xalqımızın həyət tərzini özündə yaşadan bayıtılarımızı bədii qiraət ediblər.

Sonda kənd mədəniyyət evinin metodisti Zemfira Əliyevanın əl işlərindən ibarət sərgiyə baxış olub. Milli dəyərlərimizin tədqiqinə və təbliğinə həsr olunmuş nəşrlərin də sərgisi tədbir iştirakçılarında maraq doğurub.



Naxçıvan Muxtar Respublikası
Mədəniyyət Nazirliyinin Mətbuat Xidməti
10.07.2019



İyulun 10-da Naxçıvan Muxtar Respublikasının Mədəniyyət Nazirliyi, Naxçıvan Muxtar Respublikasının Əmək və Əhalinin Sosial Müdafiəsi Nazirliyi və Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin təşkilatçılığı ilə Naxçıvan Dövlət Film Fondunda sağlamlıq imkanları məhdud uşaqlar üçün“Dərs” filmi nümayiş olunub.

Qeyd edək ki, Naxçıvan Muxtar Respublikası Ali Məclisi Sədrinin 2016-cı il 11 yanvar tarixli Sərəncamı ilə təsdiq edilmiş “2016-2020-ci illərdə Naxçıvan Muxtar Respublikasında sağlamlıq imkanları məhdud uşaqların təhsili və reabilitasiyası üzrə Dövlət Proqramı”nda muxtar respublikanın bir sıra nazirlikləri, komitələri, idarələri qarşısında mühüm vəzifələr qoyulmuş, sağlamlıq imkanları məhdud uşaqların asudə vaxtlarının səmərəli və mənalı təşkili nəzərdə tutulmuşdur. Muxtar respublikamızda bu kateqoriyadan olan uşaqların təhsili, təlim-tərbiyəsinin yüksək səviyyədə təşkili, distant dərslərin keçirilməsi, onların idman məktəblərinə və məktəbdənkənar müəssisələrə cəlbi, istedadlarının üzə çıxarılması üçün bir sıra işlər görülür. Muxtar respublikamızda bu qəbildən olan uşaqların tarix-memarlıq abidələri və muzeylərlə tanışlığı, onlara tətil günlərində kino, konsert və teatr tamaşalarının göstərilməsi də diqqət mərkəzində saxlanılır.

Təşkil olunan bu tədbirdə sağlamlıq imkanları məhdud, aztəminatlı, qaçqın və məcburi köçkün, hər iki valideynini itirmiş və valideyn himayəsindən məhrum olmuş uşaqlara rejissoru Rafiq Əliyev və Cavid Təvəkkül olan “Dərs” filmi nümayiş etdirilmişdir. Film Xalid adlı uşağın məktəb və şəxsi həyatından bəhs edir.

Xalid – öz sinfində heç nəyi ilə fərqlənməyən bir oğlandır. Uşaqlar ona Begemot adı veriblər, çünki o, gonbul və bacarıqsızdır. Amma onun nə qədər itiağıllı və xeyirxah ürəyə malik olduğunu, demək olar, heç kəs görmür. Xalid əsl dost tapmaq arzusundadır, lakin uşaqlar onu ələ salmaqla cavab verirlər. Qarşılaşdığı bütün çətinliklərə baxmayaraq, gün gəlir gənc filosof öz yaşıdlarına, hətta böyüklərə də dərs verir.

Qeyd edək ki, “Dərs” tammetrajlı bədii filminin senari müəllifləri Elza Ağayeva və Anastasiya Volkova, quruluşçu operatoru Rauf Qurbanəliyev, bəstəkarı Tünzalə Ağayeva, quruluşçu rəssamı Fikrət Ələkbərovdur.

Ekran əsərində rolları Tamerlan Ağayev, Aliyə Əliyeva, Rəşid Əliyev, Ayna Zərbəliyeva, Nazim İbrahimov, Mənsurə Əhmədova və digərləri canlandırıblar.

Film balaca tamaşaçılar tərəfindən maraqla izlənilib.



Naxçıvan Muxtar Respublikası
Mədəniyyət Nazirliyinin Mətbuat Xidməti
10.07.2019



AMEA-nın nəzdində Hüseyn Cavidin ev-muzeyi tərəfindən "Məmməd Cəfər. Hüseyn Cavid" monoqrafiyası nəşr olunub.

Vəsait ölkə başçısının "Akademik Məmməd Cəfər Cəfərovun 110 illiyinin qeyd edilməsi haqqında" 2019-cu il 15 aprel tarixli Sərəncamı əsasında AMEA Rəyasət Heyətinin qərarı ilə təsdiq edilmiş tədbirlər planı çərçivəsində çap olunub.

Akademiyadan NUHÇIXAN-a bildirilib ki, nəşrin tərtibçisi və "Ön söz"ün müəllifi muzeyin direktoru, filologiya üzrə elmlər doktoru Gülbəniz Babaxanlı, elmi redaktorları - AMEA-nın vitse-prezidenti, akademik İsa Həbibbəyli və Humanitar Elmlər Bölməsinin akademik-katibi, akademik Teymur Kərimlidir.

Kitab Hüseyn Cavid yaradıcılığının ilk monoqrafik tədqiqatçısı, akademik Məmməd Cəfərin 1960-cı ildə çap olunmuş eyniadlı monoqrafiyasının yeni tərtibatda təkrar nəşridir. Cavidşünaslığın bir elm kimi formalaşmasında mühüm rol oynayan monoqrafiya Hüseyn Cavid yaradıcılığına müraciət edən bir çox tədqiqatçı üçün dəyərli mənbədir.



Naxçıvan Muxtar Respublikası
Mədəniyyət Nazirliyinin Mətbuat Xidməti
10.07.2019



Yay aylarında daha çox turistin istirahət üçün üz tutduğu Naxçıvan onlar üçün maraqlı tarixi və abidələri olan bir əsrarəngiz məkan kimi yadda qalır. Maraqlı burasıdır ki, bu insanlar Naxçıvanla bağlı öz təəssüratlarını sosial şəbəkələrdə məmnuniyyətlə bölüşürlər.

Naxçıvana səyahət edən howimettravel adlı instagram istifadəçisi Naxçıvanla bağlı maraqlı paylaşımlar edib. Xanım istifadəçi Əlincəqalası, Culfa rayonundakı kanyon, Xaraba Gilan yaxınlığında çəkilən fotolara öz şərhlərini də əlavə edib. Öz dostlarına müraciət edərək, siz nə vaxtsa öz instagram səhifənizdə, facebookda, ya da hansısa yol göstəricisində belə bir yeri görmüsünüzmü? Amma bilin ki 3457280 addım atandan sonra mən Naxçıvandakı yüksək dağ zirvəsində yerləşən Əlincəqlaya qalxmaq həzzini yaşadım. Bu cür yerləri ziyarət etməklə xoşbəxtlik haqqındakı təəssüratlar gerçək olur. Bunu yaşamaq lazımdır-deyə müraciət edir. Culfa rayonundakı torpaq kanyonun fonunda şəkil çəkdirən xanım burda buludların əl çatan olduğunu və Naxçıvanı Azərbaycanda tamam başqa bir mənzərəyə sahib yer kimi təqdim edir. Geniş prospektlər, nadir dini memarlıq, təbii landşaft özündə Mərkəzi Asiyanı əhatə edən Qafqaz ənənəsini yaşadır. Müəllif Naxçıvanı “keşməkeşli keçmişi, gözəlliyi və mütləq xoşbəxt gələcəyi olan nadir yer” adlandırır.

Təbii ki, istifadəçinin fotolarına rəy bildirənlər bu cür yeri ilk dəfə gördüklərini və mütləq ora səfər edəcəklərini vurğulayırlar.



Naxçıvan Muxtar Respublikası
Mədəniyyət Nazirliyinin Mətbuat Xidməti
10.07.2019



“Heydər Əliyev siyasi məktəbini öyrənirik” Gənc Liderlər Proqramı üzvləri Naxçıvana səfər edəcəklər. İyul ayının 10-da baş tutacaq səfər çərçivəsində gənclər Ümummilli liderin Naxçıvan şəhərindəki abidəsini ziyarət edəcək, Heydər Əliyev Muzeyi ilə tanış olacaqlar.

Tədbir iştirakçıları Naxçıvan Muxtar Respublikası Ali Məclisinin Sədri ilə görüşəcəklər.

Bundan başqa gənclər Duzdağ Fizioterapiya Mərkəzi, Naxçıvanın ali təhsil ocaqları, Naxçıvan Biznes Mərkəzi və tarixi abidələrini də gəzəcəklər.



Naxçıvan Muxtar Respublikası
Mədəniyyət Nazirliyinin Mətbuat Xidməti
10.07.2019



İyulun 9-da Naxçıvan Dövlət Tarix Muzeyində yeni eksponatların təqdimatı ilə bağlı keçirilən tədbiri muzeyin direktoru, Naxçıvan Muxtar Respublikasının Əməkdar mədəniyyət işçisi Nizami Rəhimov açaraq qeyd etmişdir ki, son illər mədəni irsimizin qorunması və təbliği istiqamətində həm ölkə, həm də muxtar respublikada geniş miqyaslı tədbirlər işlənib həyata keçirilmişdir. Həyata keçirilən tədbirlər çərçivəsində mədəni irsimizin əsl saxlanc yeri olan muzeylərə diqqət və qayğı xüsusi yer tutur.

Vurğulanmışdır ki, digər muzeylər kimi Naxçıvan Dövlət Tarix Muzeyinin də fondu ildən-ilə zənginləşir. Bunun nəticəsidir ki, 2018-ci ildə muzeyə 346 ədəd eksponat daxil olmuşdursa, cari ilin I yarısında muzey fonduna daxil olan eksponatların sayı 529 ədəd olmuşdur. Ümumiyyətlə, muzey fondunun zənginləşdirilməsi istiqamətində işlər bu gün də uğurla davam etdirilir.

Qeyd olunmuşdur ki, bu gün keçirilən tədbirdə muzeyə Böyük Vətən Müharibəsi veteranlarından Adil Cəfərova və Yunis Qasımova aid eksponatlar təqdim olunur. Təqdim olunan 340 ədəd eksponatın içərisində hər iki veteranın təltif olunduğu orden və medallar, onların vəsiqələri, tarixi sənədlər, fotoşəkillər, xəritə-sxemlər və digər şəxsi əşyaları əsas yer tutur.

Tədbirdə çıxış edən Naxçıvan Muxtar Respublikası Müharibə, Əmək, Silahlı Qüvvələr və Hüquq Mühafizə Orqanları Veteranları Şurasının sədri Firudin Süleymanov, müharibə veteranı, mərhum Adil Cəfərovun oğlu Fəxrəddin Cəfərov və müharibə veteranı, mərhum Yunis Qasımovun nəvəsi Anar Xudiyev, eyni zamanda Naxçıvan şəhər sakini Xoşqədəm Bağırova mərasimdə təqdim olunan eksponatların gənc nəslin vətənpərvərlik tərbiyəsindəki əhəmiyyətindən söhbət açmışlar.

Sonda tədbir iştirakçıları təqdim olunan yeni eksponatlarla yaxından tanış olmuşlar.


Naxçıvan Muxtar Respublikası
Mədəniyyət Nazirliyinin Mətbuat Xidməti
09.07.2019



İyulun 9-da Naxçıvan Muxtar Respublikası Mədəniyyət, Əmək və Əhalinin Sosial Müdafiəsi nazirliklərinin və Ailə, Qadın və Uşaq Problemləri üzrə Dövlət Komitəsinin birgə təşkilatçılığı ilə M.T.Sidqi adına Naxçıvan Dövlət Kukla Teatrında sağlamlıq imkanları məhdud uşaqlar üçün “Ağca və Bozca” tamaşası göstərilib.

Qeyd edək ki, Naxçıvan Muxtar Respublikası Ali Məclisi Sədrinin 2016-cı il 11 yanvar tarixli Sərəncamı ilə təsdiq edilmiş “2016-2020-ci illərdə Naxçıvan Muxtar Respublikasında sağlamlıq imkanları məhdud uşaqların təhsili və reabilitasiyası üzrə Dövlət Proqramı”nda muxtar respublikanın bir sıra nazirlikləri, komitələri, idarələri qarşısında mühüm vəzifələr qoyulmuş, sağlamlıq imkanları məhdud uşaqların asudə vaxtlarının səmərəli və mənalı təşkili nəzərdə tutulmuşdur. Muxtar respublikamızda bu kateqoriyadan olan uşaqların təhsili, təlim-tərbiyəsinin yüksək səviyyədə təşkili, distant dərslərin keçirilməsi, onların idman məktəblərinə və məktəbdənkənar müəssisələrə cəlbi, istedadlarının üzə çıxarılması üçün bir sıra işlər görülür. Muxtar respublikamızda bu qəbildən olan uşaqların tarix-memarlıq abidələri və muzeylərlə tanışlığı, onlara tətil günlərində kino, konsert və teatr tamaşalarının göstərilməsi də diqqət mərkəzindədir.

Dramaturq Nağı İsmayılzadənin yazdığı “Ağca və Bozca” tamaşasının əsas qəhrəmanları Ana dovşan, Ağca və Bozcadır ki, bunlar tamaşada ana xəttin qəhrəmanlarıdır. Əsərdə dramaturqun və quruluşçu rejissorun əsas məqsədləri övladın anaya qarşı olan məhəbbətinin tamaşaçılara aşılanmasıdır. Tamaşanın sonluğu tülkünün dovşanlara məğlub olması ilə başa çatır. Tamaşada hadisələr Dovşanların başına gələn sərgüzəştlər üzərində qurulmuşdur.

Bu maraqlı tamaşada teatrın aktyorları Ləman Əhmədova, İlham Babayev, Ulduz Süleymanova, Vəsmə Quliyeva, İlqar Babayev, Süleyman Süleymanov, Arzu Səfərov, Əfqanə Ələsgərova obrazları təbii və xarakterik canlandırırlar.

Tamaşanın quruluşçu rejissoru Azərbaycan Respublikasının Xalq artisti Yasəmən Ramazanova, quruluşçu rəssamı Rafael Qədimov, bəstəkar Əli Məmmədovdur.

“Ağca və Bozca” tamaşası uşaqlara xoş əhval-ruhiyyə bəxş edib.


Naxçıvan Muxtar Respublikası
Mədəniyyət Nazirliyinin Mətbuat Xidməti
09.07.2019



Naxçıvanda keçirilən “Görkəmli Azərbaycan mütəfəkkiri: Nemətullah Naxçıvani” mövzusunda beynəlxalq konfransın iştirakçıları tədbir çərçivəsində əvvəlcə ümummilli liderimiz Heydər Əliyevin Naxçıvan şəhərinin baş meydanında əzəmətlə ucalan abidəsi önünə gül dəstəsi qoyub, ulu öndərin xatirəsini dərin ehtiramla yad ediblər. Sonra qonaqlar Heydər Əliyev Muzeyini ziyarət edərək ümummilli liderimizin həyatını və çoxşaxəli dövlətçilik fəaliyyətini əks etdirən eksponatlara baxıblar.

Konfrans iştirakçıları qədim diyarın bir sıra tarixi-mədəni abidələrini, mədəniyyət və səhiyyə ocaqlarını ziyarət ediblər. Qarabağlar Türbə Kompleksi, Duzdağ Fizioterapiya Mərkəzi, Naxçıvan Duz Muzeyi ilə yaxından tanış olan qonaqlar “Xan Sarayı” Dövlət Tarix-Memarlıq, Möminə Xatın və Açıq Səma Altında Muzey Kompleksi, “Naxçıvanqala” Tarix-Memarlıq Muzey Kompleksi və Nuh Peyğəmbərin məzarüstü türbəsini də ziyarət ediblər.

Beynəlxalq konfransın iştirakçıları “Şərq qapısı” qəzetinə müsahibələrində konfransın əhəmiyyətindən danışıb, Naxçıvanla bağlı təəssüratlarını bölüşüblər.

Yaşar Kurt – Türkiyə Respublikasının Samsun 19 May Universitetinin professoru: – Nemətullah Naxçıvaninin həyat və yaradıcılığı barədə ilk doktorluq işi yazan biri kimi konfransda iştirak etmək mənim üçün çox önəmli hadisə idi. Bu torpağın yetirməsi olan görkəmli alimin təfsiri ilkləri özündə ehtiva edən, “Qurani-Kərim”in bütövlükdə əhatə olunduğu bir təfsirdir. Təxminən, 500 il öncə yazılan təfsirlər içində tam və əhatəliliyinə görə seçilən bu təfsir Naxçıvaninin dövrünün alimləri arasında elm, bilik cəhətdən üstün mövqedə dayandığını deməyə əsas verir. Araşdırmalar nəticəsində görkəmli alimin Türkiyənin birsıra kitabxanalarında saxlanılan əlyazmalarının tapılması Anadolu coğrafiyasında da həmin əsərlərin geniş kütlə tərəfindən sevilərək oxunmasına sübutdur.

Onu da deyim ki, “Naxçıvandan Konyaya bir körpü: Nemətullah Naxçıvani” layihəsi çərçivəsində azərbaycanlı alimlərin Türkiyədəki Ağşəhərə səfərinin təşkil edilməsi, səfər çərçivəsində Türkiyənin Konya vilayətində müştərək beynəlxalq konfrans keçirilməsi görkəmli alimin irsinin dərindən araşdırılaraq öyrənilməsi üçün olduqca əhəmiyyətlidir. Təşkil olunan budəfəki konfrans da ortaq dəyərlərə sahib iki qardaş ölkənin daha da yaxınlaşması, alimlərimizin bir araya gələrək fikirlərini qarşılıqlı surətdə bölüşmələrinə imkan verdi.

Sevinirəm ki, konfrans çərçivəsində qədim türk torpağı olan Naxçıvanla da yaxından tanış ola bildim. Bu, mənim qədim diyara ilk gəlişimdir. Səmimi olaraq etiraf edim ki, gözlədiyimdən də daha böyük inkişafla, gözəlliklə qarşılaşdım. Hər tərəfdə əmin-amanlıq gördük. Naxçıvan şəhərinin küçələri, xiyabanları özünəməxsus gözəlliyi ilə könül oxşayır. Xüsusilə tarixi məkanlarda insanların ziyarət etmələri üçün yaradılan şərait, abidələrin ətrafının abadlaşdırılması, yaşıllıqların salınması çox təqdirəlayiq haldır. Səfər zamanı Əshabi-Kəhfi də ziyarət etmək imkanı qazandım və həqiqətən də, belə qeyri-adi quruluşa malik ziyarətgahın hər bir guşəsinədək rahat yolların salınması məni heyran etdi. İndiyədək dünyanın bir sıra ölkələrində belə ziyarət yerlərində, abidələrdə çox olsam da, ancaq etiraf edim ki, Naxçıvandakı qədər təmiz, səliqəli məkanlar rastıma çıxmayıb. Bu qədim türk torpağına gələcəkdə də tez-tez gəlməyi düşünürəm.

Alparslan Kartal – Qars Qafqaz Universitetinin İlahiyyat fakültəsinin hədis bölümünün rəhbəri, doktor: – Öncə bu beynəlxalq konfransda əməyi keçənlərə, bizim üçün yaradılan şəraitə görə öz minnətdarlığımı bildirmək istəyirəm. Konfrans çox yüksək səviyyədə keçdi, qarşılıqlı müzakirələrdə müəyyən nəticələr əldə etdik. Bu torpaqda yetişən görkəmli bir alimin Türkiyənin Konya və Ağşəhər bölgələrində yaşayıb-yaratması, elmi fəaliyyət göstərməsi bizim üçün böyük şansdır. İndi ayaq basdığımız bu diyar bizim ata torpağımızdır, buranın Anadolu ilə əlaqələrinin davamlı olmasını ürəkdən istəyirik. Məhz bu mənada, konfransın əhəmiyyəti olduqca böyükdür. İnanıram ki, konfransın davamı olacaq və görkəmli alimin irsi dərindən öyrənilərək yaşadılacaqdır.

Onu da deyim ki, bu, mənim Naxçıvanla ilk tanışlığımdır. Görməli yerləri gəzdikcə türk torpağının necə qədim köklərə malik sivilizasiya məkanı olduğunu gördük. Bənzərsiz memarlıq üslubunda inşa olunan türbələr, tikililər diqqətimizi çəkdi, hər addımda qarşılaşdığımız mehriban münasibət, qonaqpərvər davranış bizi olduqca məmnun etdi, mədəni dəyərlərimizin birgəliyinə bir daha əmin oldum.

Gülər Qafqazlı – Akademik Ziya Bünyadov adına Şərqşünaslıq İnstitutunun Beynəlxalq əlaqələr şöbəsinin müdiri, tarix üzrə fəlsəfə doktoru: – Konfrans çox uğurlu keçdi. Türkiyədən gələn alim və tədqiqatçılarla birgə Nemətullah Naxçıvaninin elmi fəaliyyətini daha dərindən araşdırıb öyrənmək məqsədilə fikir mübadiləsi apardıq. Çıxışlarda da qeyd olunduğu kimi, indiyədək görkəmli alimin bir sıra əsərləri hələ də ətraflı tədqiq edilməyib, təbii ki, Naxçıvanın millimənəvi dəyərləri sayılan bu əsərləri öyrənmək, qoruyub yaşatmaq biz alimlərin üzərinə düşən mənəvi borcdur. Bölmə iclaslarında Nemətullah Naxçıvaninin irsi, onun irfani fikirləri təhlil olundu. Yeri gəlmişkən onu da deyim ki, mənim iclasın gedişində görkəmli alimin “Qurani-Kərim”dən təfsir etdiyi bir surəni həmin dövrdə yaşayan misirli alim Cəlaləddin əs-Suyutinin təfsiri ilə müqayisəm maraq doğurdu. Hər iki alimin yanaşma tərzlərini müqayisə etdikdə, həqiqətən də, Nemətullah Naxçıvani elminin böyüklüyü bir daha təsdiq olunur. Çünki Naxçıvani “Qurani-Kərim”i təfsir edərkən bütün incəliklərə fikir verib və surələri, ayələri əhatəli şəkildə, aydınlığı ilə elm aləminə təqdim etməyi bacarıb. Ancaq Cəlaləddin əs-Suyutinin təfsirində əhatəlilik, dərinlik nəzərə çarpmır. Bu da qədim Naxçıvan torpağının yetirməsi olan görkəmli alimin üstünlüyünü, elm xəzinəsinə bəxş etdiyi incilərin son dərəcə önəmli, vacib olduğunu göstərir. Nemətullah Naxçıvaninin əsərlərində yer alan incə məqamlara diqqət yetirəndə görürük ki, o müsəlman bir alim kimi təkcə İslama deyil, digər elmlərə də dərindən bələd imiş. Təbii ki, belə dahilər yetişdirən torpaqda olmağımız böyük fəxrdir. Konfransda həmçinin görkəmli alimin bir sıra əsərlərinin də dərindən tədqiq olunması tövsiyə edildi. Biz də çalışacağıq ki, gələcəkdə Nemətullah Naxçıvani irsini öyrənək və ən yüksək şəkildə təbliğ edək.

Bu arada qeyd edim ki, mən Naxçıvana bir neçə dəfə gəlmişəm və hər səfərimdə burada böyük dəyişikliklərin, inkişafın, yeniləşmənin şahidi olmuşam. Blokada şəraitində olmasına baxmayaraq, Naxçıvanda belə yüksək səviyyədə quruculuq, abadlıq işlərinin aparılması çox təqdirəlayiq haldır. Tarixi məkanları seyr etdikcə gözoxşayan füsunkarlıq insanı valeh edir, abidələrin ətrafındakı səliqə-sahman, təmizlik həmin yerlərin qorunmasına, yaşadılaraq gələcək nəsillərə ötürülməsinə hesablanmış məqsədyönlü addımın nəticələridir.


Naxçıvan Muxtar Respublikası
Mədəniyyət Nazirliyinin Mətbuat Xidməti
09.07.2019



Naxçıvanda keçirilən “Görkəmli Azərbaycan mütəfəkkiri: Nemətullah Naxçıvani” Beynəlxalq Konfransının iştirakçıları muxtar respublikamızın tarixi abidələri və muzeyləri ilə tanış olublar.

Qonaqlar Qarabağlar Türbə Kompleksi, “Xan sarayı” Dövlət Tarix-Memarlıq, Möminə Xatın, Açıq Səma Altında Muzey Kompleksini, “Naxçıvanqala” Tarix-Memarlıq Muzeyini və Nuh Peyğəmbərin Məzarüstü Türbəsini ziyarət ediblər. Qonaqlar həmçinin Duzdağ Fizioterapiya Mərkəzi ilə tanış olub, müalicə otaqlarına baxıblar.



Naxçıvan Muxtar Respublikası
Mədəniyyət Nazirliyinin Mətbuat Xidməti
09.07.2019



İyulun 8-də Cəlil Məmmədquluzadə adına Naxçıvan Dövlət Musiqili Dram Teatrında Azərbaycan Respublikasının Xalq artisti Şirzad Abutalıbovun 60 illik yubileyi münasibətilə tədbir keçirilib.

Tədbiri giriş sözü ilə açan Naxçıvan Muxtar Respublikasının Mədəniyyət naziri Natəvan Qədimova bildirib ki, muxtar respublikamızda tanınmış sənət adamlarına yüksək diqqət və qayğı göstərilir. Naxçıvan Muxtar Respublikası Ali Məclisinin Sədri cənab Vasif Talıbovun sənət adamlarına, aktyorlara, rəssamlara, musiqiçilərə göstərdiyi diqqət və qayğı bunun bariz nümunəsidir. Məhz biz burada dəfələrlə Ali Məclis Sədrinin göstərişinə əsasan bir çox sənət adamlarının yubileylərini yüksək səviyyədə qeyd etmişik. Bu gün keçirilən yubiley də bu ənənələrin davam etdirilməsinin nümunəsidir. Son illər Naxçıvanda belə yubileylərin keçirilməsi də mədəniyyətə, ədəbiyyata, sənətə göstərilən qayğının ən gözəl ifadəsidir. Belə sənət adamlarından biri də hamımızın sevdiyi, sənətinə ehtiram görtərdiyimiz, tanınmış sənət adamı Şirzad Abutalıbovdur. Aktyorun yaratdığı rəngarəng obraz və personajlar onu teatrsevərlərə çoxdan sevdirib.

Nazir Xalq artisti Şirzad Abutalıbovun keçdiyi həyat yolundan və səhnə fəaliyyətindən söhbət açaraq bildirib ki, Şirzad Abutalıbov 1959-cu il iyul ayının 8-də Naxçıvan şəhərində anadan olub və ilk təhsilini Naxçıvan şəhər 9 nömrəli orta məktəbdə alıb. Şirzad Abutalıbovun aktyor sənətini seçməsində atası Əsəd müəllimin də təsiri olub. Əsəd müəllim Naxçıvan Mərkəzi Kitabxanasında müdir işləsə də, 20 il Naxçıvan Dövlət Musiqili Dram Teatrında aktyor kimi fəaliyyət göstərib. Onu da qeyd edək ki, Əsəd müəllim 1964-cü ildə Naxçıvan Muxtar Respublikasının Əməkdar kitabxanaçısı fəxri adına layiq görülüb.

Qeyd edilib ki, məktəb illərindən teatr sənətinə vurğunluğu onu 1973-cü ildə Naxçıvan şəhərində fəaliyyət göstərən “Gənclik” Xalq Teatrına gətirib. Xalq Teatrının səhnəsində Şirzad Abutalıbov müxtəlif xarakterli obrazlar yaradıb. 1977-ci ildə Naxçıvan Dövlət Musiqili Dram Teatrında keçirilən müsabiqədə Cəfər Cabbarlının “Solğun çiçəklər” pyesindəki Qurban obrazını məharətlə yaratdığına görə onu teatra dəvət ediblər.

1978-1980-ci illərdə Sovet ordusu sıralarınada xidmət edən Şirzad Abutalıbov doğma Naxçıvana qayıtdıqdan sonra yenidən həyatını teatra bağlamışdır.

Vurğulanıb ki, Naxçıvan teatrının səhnəsində Şirzad Abutalıbov Şeyx Nəim, Təlxək, Kosa (“Şeyx Sənan”, “Topal Teymur”, “Səyavuş”, Hüseyn Cavid), Hambal, Vəli, (“O olmasın, bu olsun”, “Arşın mal alan” Üzeyir Hacıbəyov), Mürsəl Qulu (“Hələlik” Rüfət Əhmədzadə və Emin Sabitoğlu), Əbuşər, (“Atabəylər” Nəriman Həsənzadə), “Nankoryan” (“Koroğlunun Çənlibelə qayıdışı” Adil Babayev), Cinni Mustafa (“Dəli yığıncağı” Cəlil Məmmədquluzadə) və s. 100-dək müxtəlif xarakterli, müxtəlif taleli obraz və personajlar yaratmışdır. Aktyor həm komik, həm də ciddi obrazların mahir ifaçısıdır.

Diqqətə çatdırılıb ki, Şirzad Abutalıbovun əməyi dövlətimiz tərəfindən yüksək qiymətləndirilmişdir. O, 1999-cu ildə Azərbaycan Respublikasının Əməkdar artisti, 2008-ci ildə isə Azərbaycan Respublikasının Xalq artisti fəxri adına layiq görülmüşdür. Şirzad Abutalıbov 2005 və 2008-ci illərdə Prezident mükafatçısı olmuşdur. 2016-cı ildən Şirzad Abutalıbov M.T.Sidqi adına Naxçıvan Dövlət Kukla Teatrının direktoru vəzifəsində çalışır. Bu teatrın səhnəsində onun hazırladığı “Ələddinin sehrli çırağı”, “Qoğalın sərgüzəşti” və başqa tamaşalar uşaq və məktəblilər tərəfindən maraqla qarşılanıb.

Nazir çıxışının sonunda xalq artistinə bundan sonrakı həyatında cansağlığı, bol-bol sevinc və yaradıcılıq uğurları arzulayıb.

Tədbirdə Xalq artistinin sənət dostları Cəlil Məmmədquluzadə adına Naxçıvan Dövlət Musiqili Dram Teatrının direktoru, Xalq artisti Rza Xudiyev, Xalq artistləri Kamran Quliyev, Həsən Ağasoy, Azərbaycan Respublikasının əməkdar artistləri Behruz Haxverdiyev, Nurbəniz Niftəliyeva, Məhəmməd Tağı Sidqi adına Naxçıvan Dövlət Kukla Teatrının quruluşçu rejissoru, Naxçıvan Muxtar Respublikasının Əməkdar mədəniyyət işçisi Nadir Hüseynov, Məhəmməd Tağı Sidqi adına Naxçıvan Dövlət Kukla Teatrının aktrisası, Prezident mükafatçısı Ulduz Süleymanova və Naxçıvan Musiqi Kollecinin direktoru, Naxçıvan Muxtar Respublikasının Əməkdar mədəniyyət işçisi Günay Əliyeva çıxış edərək yubilyara ürək sözlərini bildiriblər.

Sonda Xalq artisti Şirzad Abutalıbov çıxış edərək yaradıcılığına yüksək qiymət verildiyi üçün Naxçıvan Muxtar Respublikasının Ali Məclisi Sədrinə minnətdarlığını ifadə edib, səhnə sənətimizin inkişafı üçün bundan sonra da fədakarlıqla çalışacağını deyib.


Naxçıvan Muxtar Respublikası
Mədəniyyət Nazirliyinin Mətbuat Xidməti
08.07.2019



Prezident İlham Əliyev Xan Sarayı ilə birgə Şəkinin tarixi mərkəzinin UNESKO-nun Ümumdünya İrs Siyahısına daxil edilməsi münasibətilə Azərbaycan xalqını təbrik edib.

Təbrikdə deyilir:

"Hörmətli həmvətənlər!

Bu gün Bakıda UNESKO-nun Ümumdünya İrs Komitəsinin 43-cü sessiyasında Azərbaycanın "Xan Sarayı ilə birgə Şəkinin tarixi mərkəzi" UNESKO-nun Ümumdünya İrs Siyahısına daxil edilmişdir.

Azərbaycanın ən qədim şəhərlərindən olan Şəkinin tarixi hissəsi yüzillər boyu ölkəmizin mədəniyyət mərkəzlərindən biri kimi tanınmışdır. Unikal abidələrlə zəngin Şəki şəhərinin tarixi hissəsinin mühafizəsi və inkişafı daim dövlətin diqqətində saxlanılmışdır.

Son illər Azərbaycanın mədəni irsinin dünya səviyyəsində tanıdılması və qorunması istiqamətində çoxsaylı layihələr həyata keçirilmişdir. Qeyd edilməlidir ki, bu fəaliyyətlər beynəlxalq təşkilatlarla, xüsusən dünya mədəniyyəti, təhsili və elminə məsul olan UNESKO ilə sıx əməkdaşlıq şəraitində gerçəkləşdirilir. Təsadüfi deyil ki, "İçərişəhər, Qız Qalası və Şirvanşahlar Saray Kompleksi", "Qobustan Qaya Sənəti Mədəni Landşaftı" UNESKO-nun Ümumdünya İrs Siyahısında, həmçinin xalqımızın qeyri-maddi mədəni irsinin 13 nümunəsi UNESKO-nun qeyri-maddi mədəni irs siyahısında yer alır. Bu hadisələr Azərbaycan xalqının ümumbəşər mədəniyyətinə verdiyi töhfənin beynəlxalq miqyasda bir daha etirafıdır.

Əziz həmvətənlər,

Şəkinin tarixi mərkəzində keçmişimizi özündə təcəssüm etdirən Şəki Xan Sarayı, karvansaraylar, məscid və minarələr, qədim körpülər, sənətkarlıq emalatxanaları və yaşayış evləri bu gündən etibarən təkcə xalqımızın deyil, bəşəriyyətin mədəni irsi hesab olunur.

UNESKO tərəfindən "Xan Sarayı ilə birgə Şəkinin tarixi mərkəzi"nin Ümumdünya İrsi elan edilməsi münasibətilə bütün Azərbaycan xalqını təbrik edirəm".


Naxçıvan Muxtar Respublikası
Mədəniyyət Nazirliyinin Mətbuat Xidməti
08.07.2019



İyulun 7-də Bakı Konqres Mərkəzində keçirilən UNESKO-nun Ümumdünya İrs Komitəsinin 43-cü sessiyasının növbəti iclasında Azərbaycanın “Xan Sarayı ilə birgə Şəkinin tarixi mərkəzi” adlı nominasiyası UNESKO-nun Ümumdünya İrs Siyahısına daxil edilib.

Əvvəlcə Tarixi Yerlər və Abidələrin Mühafizəsi Şurasının (ICOMOS) hesabatı dinlənilib. Bildirilib ki, Şəki şəhəri respublikanın şimal-qərbində, Kiş çayının sol sahilində, dəniz səviyyəsindən 700 metr yüksəklikdə, paytaxt Bakı şəhərindən 370 kilometr məsafədə, Böyük Qafqaz sıra dağlarının cənub ətəklərində, mərkəzi regionlardan uzaqda – təcrid olunmuş bir məkanda yerləşir.

Qeyd edilib ki, Şəkidə yerləşən Xan Sarayı dünya əhəmiyyətli tarix və memarlıq abidəsidir. XVIII əsrdə inşa edilən saray binası şəhərin şimal-şərq hissəsində, qala divarları ilə əhatə olunmuş ərazidə yerləşir. Otuz metr uzunluğu olan ikimərtəbəli bina 300 kvadratmetr sahəni əhatə edir. Saray altı otaq, dörd dəhliz və iki güzgülü eyvandan ibarətdir. Özündə həm də xalq yaşayış binalarının xüsusiyyətlərini daşıyan saray binası, Qafqazda XVIII saray memarlığının ən gözəl nümunələrindən biri olmaqla, həm də İslam Şərqinin memarlıq incilərindəndir. Şəhərin tarixi mərkəzi ilə birlikdə saray 120 hektar ərazini əhatə edir.

Hesabatda Şəki ilə bağlı faylın 2017-ci ildə Polşanın Krakov şəhərində UNESCO-nun Ümumdünya İrs Komitəsinin 41-ci sessiyasında ölkəmiz tərəfindən təqdim edilən “Xan sarayı ilə birgə Şəkinin tarixi mərkəzi” adlı nominasiyanın müzakirə olunduğu diqqətə çatdırılıb.

Müzakirələr zamanı Küveyt, Anqola, Çin, Bəhreyn, Braziliya, İndoneziya, Tanzaniya, Tunis, Qırğızıstan, Bosniya və Herseqovina, Uqanda, Norveç, Zimbabve, Burkina-Faso, İspaniya, Qvatemala, Avstraliya bu nominasiyanın Dünya İrs Siyahısına salınmasının vacibliyini vurğulayıb. Bildirilib ki, 41-ci sessiyadan sonra Azərbaycan hökuməti bu tarixi məkanla bağlı ciddi işlər görüb. Bu səbəbdən də üzv dövlətin nümayəndələri faylın qəbulunu məqsədəuyğun hesab edirlər.

Azərbaycanın nümayəndəsi çıxış edərək bildirib ki, nominasiya altı ildir yerli və beynəlxalq ekspertlər tərəfindən dəyərləndirilib və əraziyə dəvət olunub. ICOMOS-un tövsiyələrindən irəli gələn məsələlərlə bağlı ciddi işlər görülüb. Yeni idarəetmə strukturu formalaşdırılıb və bir sıra qərarlar qəbul olunub.

Müzakirələrdən sonra “Xan sarayı ilə birgə Şəkinin tarixi mərkəzi” adlı nominasiya UNESKO-nun Ümumdünya İrs Siyahısına daxil edilib.

Sonda Mədəniyyət naziri Əbülfəs Qarayev çıxış edərək qərara görə komitə üzvlərinə təşəkkürünü bildirib.


Naxçıvan Muxtar Respublikası
Mədəniyyət Nazirliyinin Mətbuat Xidməti
08.07.2019



3-7 iyul tarixlərdə Naxçıvan Dövlət Filarmoniyasının üzvləri Türkiyə Respublikasında keçirilən “21-ci Sevgi, Sülh, Dostluq Beynəlxalq Sənət Festivalı”nda uğurla çıxış etmişdir.


Naxçıvan Muxtar Respublikası
Mədəniyyət Nazirliyinin Mətbuat Xidməti
05.07.2019



İyulun 5-də Sədərək Rayon Mədəniyyət Sarayında Naxçıvan Dövlət Film Fondu rayon ictimaiyyətinə Azərbaycan kinosu günü çərçivəsində “Yol əhvalatı” filmini göstərmişdir.

Filmin nümayişindən əvvəl Naxçıvan Dövlət Film Fondunun direktoru Mirakif Seyidov çıxış edərək bildirib ki, xalqımızın ümummilli lideri Heydər Əliyev milli kinomuzun inkişafına həmişə böyük diqqət və qayğı göstərmişdir. Kinomuzda baş verən inkişaf və yeniləşmə, tərəqqi, keyfiyyət dəyişiklikləri məhz bu dahi şəxsiyyətin müstəsna xidmətləri sayəsində mümkün olmuşdur.

Azərbaycan kinosu tarixin sınaqlarından həmişə şərəflə çıxmışdır. Kino tariximizdə çətin illər də olmuş, lakin buna baxmayaraq kinomuz mədəni hadisələr yaşamış, həmişə xalqımızın tarixini, milli adət-ənənələrini, milli dəyərlərini yaşatmış, həyatımızın bütün sahələrinə nüfuz edərək sevilən bir sənətə çevrilmişdir.

Qeyd edilib ki, Azərbaycan kino tarixinin əsl inkişaf dövrü sayılan 1970-1980-ci illərdə kino salnaməmizin unudulmaz səhifələrini təşkil edən, mədəniyyətimizin qızıl fonduna daxil olan tarixi filmlər yaradılmış, digər görkəmli əsərlər ekranlaşdırılmış, müasir mövzulu və sənətkarlıq baxımından diqqətəlayiq filmlər çəkilmişdir. Azərbaycan kinosunun bir sıra filmləri bu illərdə yüksək dövlət mükafatlarına layiq görülmüş, beynəlxalq kino festivallarında və müsabiqələrində mükafatlar almışdır.

Bu gün ümummilli liderimizin kinonun inkişafı üçün gördüyü işlər ölkə Prezidenti cənab İlham Əliyev tərəfindən uğurla davam etdirilir. Ölkə başçısı 2008-ci il 4 avqust tarixli Sərəncamla “Azərbaycan kinosunun 2008-2018-ci illər üçün inkişafına dair Dövlət Proqramı”nı təsdiq etmişdir.

Sonra 1980-ci ildə lentə alınan “Yol əhvalatı” filmi nümayiş etdirilmişdir. Quruluşçu rejissoru Teymur Bəkirzadə olan “Yol əhvalatı” filmində şən və xeyirxah sürücü, gənc Mustafa gözəl Zümrüdlə evlənmək arzusundadır. Ancaq oğlan qızın atasının, daha doğrusu, “işbaz”, alverçi Qurbanın heç ürəyincə deyil. Bu uğursuz nişanlının öz sevgilisinə qovuşması üçün çalışması onu çətin vəziyyətlərə salır, amma o, inadından dönmür, nəhayət qalib çıxır. Zümrüd məhz ona ərə gedir.

Film iki sevən gəncin məhəbbəti fonunda əli əyrilərin ifşası ilə sona yetir.

Filmin quruluşçu operatoru Şərif Şərifov, Ələsgər Ələkbərov, bəstəkarı Polad Bülbüloğludur. Rolları Səyavuş Aslan, Həmidə Ömərova, Yaşar Nuri, Hacı İsmayılov, Zərnigar Ağakişiyeva, Eldəniz Zeynalov və digərləri canlandırırlar.

“Yol əhvalatı” filmi tamaşaçılar tərəfindən maraqla qarşılanıb.


Naxçıvan Muxtar Respublikası
Mədəniyyət Nazirliyinin Mətbuat Xidməti
05.07.2019



İyulun 5-də Naxçıvan şəhərindəki “Gənclik” Mərkəzində Ordubad Şəhər Uşaq Musiqi Məktəbinin “Skripkaçalanlar” ansamblının Naxçıvan Muxtar Respublikasının 95 illik yubileyinə həsr olunmuş konserti olub.

Konsertdə ansamblın ifasında görkəmli Azərbaycan və xarici ölkə bəstəkarlarının əsərləri səsləndirilib. Üzeyir Hacıbəyovun “Leyli və Məcnun” operasından müqəddimə, Qara Qarayevin “İldırımlı yollarla” baletindən rəqs, Bondun “Victoriya”, Ennio Morricionenin “Chi mai”, Volfqanq Amadey Motsartın “Türk marşı”, John Williamsın “Şindlerin siyahısı”, Antoni Vivaldinin “Fırtına”, Gorge Bizenin “Karmen” operasından “Habanera”, Francis Lainin “Love story”, Frank Habetsin “Fueqo” və Dmitri Şostokoviçin “Vals” adlı əsərləri maraqla qarşılanıb.

Konsertdə məktəbin şagirdlərindən Tunc Elifnurun, Ruzigar Əliyevin, Etiram Ağazadənin ifaları dinləyicilərdə xoş ovqat yaradıb.

Konsert dinləyicilərdə xoş əhvali-ruhiyyə yaradıb.


Naxçıvan Muxtar Respublikası
Mədəniyyət Nazirliyinin Mətbuat Xidməti
05.07.2019



Göstərilən dövlət qayğısı muxtar respublika gənclərinin istedad və intellekt potensiallarının inkişafına xidmət edir.

Xalqımızın böyük oğlu Heydər Əliyev harada olmasından və yaşamasından asılı olmayaraq, gənclərimizin layiqli, bilikli, təhsilli vətəndaş kimi yetişmələrinin, daim əsl azərbaycanlı mövqeyində dayanmalarının vacibliyini dönə-dönə vurğulayaraq deyirdi: “Hər bir millətin, hər bir ölkənin gələcəyi gənclərdir. Biz gənclərimizi nə qədər yüksək təhsilli etsək, onların müəyyən ixtisaslara mükəmməl yiyələnməsinə şərait yarada bilsək, müstəqil Azərbaycanın gələcəyi və demək, müstəqil Azərbaycanın iqtisadiyyatının inkişafı, elminin inkişafı, təhsilinin inkişafı, insanların rifah halı o qədər də yaxşı olacaqdır…”

Muxtar respublikamızda da gənclərin yaradıcılıq axtarışlarının stimullaşdırılması, milli ruhda tərbiyəsi, onların sosial müdafiəsinin və məşğulluğunun təmin edilməsi daim diqqət mərkəzində saxlanılır. Naxçıvan Muxtar Respublikası Ali Məclisi Sədrinin “Naxçıvan Muxtar Respublikasında gənc istedadlara dövlət qayğısının artırılması haqqında” 2012-ci il 31 yanvar tarixli Fərmanına əsasən Naxçıvan Muxtar Respublikası Gənc İstedadlarının “Qızıl kitabı”nın təsis edilməsi gənclərə göstərilən diqqət və qayğının məntiqi davamıdır. Müxtəlif sahələrdə fərqlənən istedadlı gənclərin qabiliyyətlərinin qiymətləndirilməsi, onların fəxri adlarla, qiymətli hədiyyələrlə mükafatlandırılması muxtar respublika gənclərinin öz üzərlərində daha səylə çalışmalarına güclü təkan verir.

Belə gənclərimizdən biri də Naxçıvan Muxtar Respublikası Ali Məclisi Sədrinin 2019-cu il 24 iyun tarixli Sərəncamına əsasən adı Naxçıvan Muxtar Respublikası Gənc İstedadlarının “Qızıl kitabı”na təhsil sahəsi üzrə salınan Naxçıvan şəhər 8 nömrəli tam orta məktəbin onuncu sinif şagirdi Siyavuş Bağırovdur. Bu xəbər onun müəllim və valideynlərinin böyük sevincinə səbəb olub.

Tarix müəllimi Xülya Seyidzadənin şagirdi haqqında dedikləri:

– Muxtar respublikamızda istedadlı yeniyetmə və gənclərin aşkara çıxarılmasına diqqət yetirilir və bu istiqamətdə dövlət səviyyəsində tədbirlər həyata keçirilir. Məktəbimizdə də öz elmi, təhsili, təlim-tərbiyəsi ilə seçilən belə şagirdlərimiz çoxdur. Onlardan biri də Siyavuşdur. O, kiçik yaşlarından öz bilik və bacarığı ilə yaşıdlarından fərqlənirdi. IX sinfi fərqlənmə attestatı ilə bitirib. İndiyədək müxtəlif nailiyyətlər əldə edib. Belə ki, “İstedad – XXI əsr” hazırlıq kursları tərəfindən keçirilən sınaq imtahanlarında dəfələrlə 700 bal toplayıb. 2016-cı ildə həmin kurs tərəfindən keçirilən “10 qazanan” intellektual yarışın qalibi olub, Naxçıvan Muxtar Respublikası Təhsil Nazirliyinin təşkil etdiyi “Kitab bilik mənbəyidir” müsabiqəsində II yerə, 2017-ci ildə muxtar respublika fənn olimpiadalarında Riyaziyyat fənni üzrə I yerə layiq görülüb. Həmin il Naxçıvan Muxtar Respublikasının Gənclər Fondu tərəfindən keçirilən “Nuh yurdu” intellektual oyununda fərqlənmə diplomu ilə mükafatlandırılıb. 2018-ci ildə Naxçıvan şəhərinin ölkəmizin Gənclər Paytaxtı seçilməsi ilə əlaqədar “Nə? Harada? Nə zaman?” oyununda I yer tutub. 2018-2019-cu illərdə keçirilən “Xəmsə” intellektual oyunlarının hər ikisinin qalibi olub.

Siyavuşla həmsöhbət olduğumuzda o qeyd etdi ki, ailədə atam, anam, nənəm ziyalıdır. Ətrafımdakı insanların təhsilə olan sevgisi məni də məktəbə ilk qədəm qoyduğum gündən yaxşı oxumağa, biliklərə yiyələnməyə sövq edib. Çünki görmüşəm ki, təhsilli olmaq hər zaman, hər yerdə böyük nailiyyətlər əldə etməyə kömək edir. Bu gün yaşadığım sevinci sözlə ifadə etmək çox çətindir. Mənə və mənim kimi yüzlərlə şagirdə göstərilən qayğıya görə minnətdaram.

Bu günlərdə Ali Məclis Sədrinin Sərəncamı ilə adı Naxçıvan Muxtar Respublikası Gənc İstedadlarının “Qızıl kitabı”na yazılan və incəsənət sahəsi üzrə Naxçıvan Muxtar Respublikası Ali Məclisi Sədrinin xüsusi aylıq təqaüdünə layiq görülən Culfa şəhər 2 nömrəli tam orta məktəbin 8-ci sinif şagirdi Duyqu Əliyeva da gənc istedadlardan biridir. Onun teatra böyük sevgisi var. Özü də ən çətin spesifikası olan pantomimdən başlayıb və artıq 3 ilə yaxındır ki, “Haçadağ” dram kollektivinin tərkibində fəaliyyət göstərir. Duyqunun sözlərinə görə, dərnəkdə iştirak etməsi ona imkan verir ki, istedad və bacarığını göstərə bilsin: – Burada hazırlanan və oynadığım səhnəciklər mənə çox şey öyrədir. Qazandığımız uğurlar məni çox sevindirir. Naxçıvanda ilk dəfə keçirilən “Yaradıcı gənclər festivalı”nda “Teatr yaradıcılığı” nominasiyası üzrə birinci yerə layiq görüldük. Bu uğur məni daha da ­həvəsləndirdi.

Duyqu incəsənət sahəsində qazandığı nailiyyətlərə görə dəfələrlə diplom və fəxri fərmanlarla təltif edilib: – Ali Məclis Sədrinin Sərəncamını eşidəndə sevincimin həddi-hüdudu yox idi. Həmişə çalışacağam ki, mənə göstərilən etimadı doğruldum. İncəsənət sahəsi üzrə fəaliyyətimi gələcəkdə də uğurla davam etdirmək niyyətindəyəm.

Duyqunun dərnək müəllimi, pantomim dram dərnəyinin rəhbəri Aidə İbrahimova ilə söhbətimiz zamanı bildirdi ki, dərnəyimizin bir çox istedadlı yetirmələri vardır. Onlardan biri də Naxçıvan Muxtar Respublikası Ali Məclisi Sədrinin xüsusi aylıq təqaüdünə layiq görülən və adı Naxçıvan Muxtar Respublikası Gənc İstedadlarının “Qızıl kitabı”na yazılan Duyqu Əliyevadır. Duyqu dərnəyə üz tutduğu gündən istedadı ilə diqqəti öz üzərinə çəkə bilib. Verilən bütün tapşırıqları hər zaman layiqincə yerinə yetirib. O həm də rəqs dərnəyinin üzvüdür və Culfa Şəhər Uşaq Musiqi Məktəbinin Fortepiano ixtisasında təhsilini davam etdirir. Orta məktəbdə də yaxşı qiymətlərlə oxuyur.

Aidə xanım deyir ki, belə istedadlı gənclər bizim parlaq gələcəyimizdir. Biz əhatələndiyimiz dövlət qayğısı, istedad və bacarıqlı gənclərimizlə bundan sonra da öz işlərimizin öhdəsindən layiqincə gəlməyə çalışacağıq.

İnanırıq ki, yüksək istedada, bilik və qabiliyyətə, həmçinin əxlaqi dəyərlərə malik gənclərimiz hərtərəfli dövlət qayğısı qarşılığında gələcəkdə Vətənimizin çiçəklənməsi naminə öz bilik və bacarıqlarını əsirgəməyəcək, doğma diyarımızı hər yerdə ləyaqətlə təmsil edəcək, yeni-yeni uğurlar qazanacaqlar.


Naxçıvan Muxtar Respublikası
Mədəniyyət Nazirliyinin Mətbuat Xidməti
05.07.2019



Qarabağlar Türbə Kompleksinə Naxçıvan şəhər sakini Ziya Əliyev, Şahtaxtı kənd sakini Fatma Musayeva, Qarabağlar kənd sakinləri Aysel Şəfiyeva və Rahilə Şirəliyeva tərəfindən qədim tariximiz və mədəniyyətimizi əks etdirən 70-dən çox yeni eksponat hədiyyə olunub.

Bu münasibətlə iyulun 4-də keçirilən tədbirdə çıxış edən Naxçıvan Muxtar Respublikasının mədəniyyət naziri Natəvan Qədimova bildirib ki, xalqımızın ən qədim zamanlardan müasir dövrədək tarixini və mədəniyyətinin inkişaf yolunu əks etdirən muzeylər ölkəmizdə, eləcə də Naxçıvan Muxtar Respublikasında zəngin mədəni irsin qorunması və təbliğ olunması işində mühüm rol oynayır. Bu gün muxtar respublikada mövcud olan muzeylərimiz nadir sənət incilərinin və milli sərvətlərin nümayiş etdirildiyi geniş bir şəbəkəyə malikdir.
Ölkəmizdə muzey işi qədim dövrlərdən başlayaraq özünəməxsus yol keçmişdir. Azərbaycan hökmdarlarının saraylarında, məbədlərdə, həmçinin digər tikililərdə mədəniyyət tariximizin müxtəlif dövrlərinə aid qiymətli əşyalar və sənət nümunələri mühafizə edilmişdir. Tarixi və bədii əhəmiyyət daşıyan eksponatların mühüm bir qismi sonrakı dövrlərdə əsas etibarilə şəxsi kolleksiyalarda toplanmışdır. Eyni zamanda, tarixən regionda baş vermiş geosiyasi hadisələr nəticəsində Azərbaycan mədəniyyətinin, elminin, incəsənətinin unikal nümunələri yüksək estetik dəyərə malik əsl sənət möcüzələri kimi dünyanın ən məşhur muzeylərinin daimi eksponatları sırasında yer almışdır.

XIX əsrin ikinci yarısından etibarən Azərbaycanın ictimai-siyasi, mədəni fikir həyatında sürətlə cərəyan edən proseslər öz növbəsində muzey işinin təşkilinə təkan vermiş və ölkəmizdə müasir tipli muzeylərin yaradılmasına başlanmışdır. İlk belə muzeylərdən biri görkəmli maarifpərvər yazıçı Cəlil Məmmədquluzadənin təşəbbüsü və yaxından iştirakı ilə XIX əsrin sonlarında təşkil olunmuşdur.

Qədim diyarımızda muzeylərin fəaliyyətinin canlandırılması, yeni muzeylərin yaradılması sahəsində mühüm işlər görülür, bu mədəniyyət ocaqları muzeyşünaslığın yeni nailiyyətlərinə əsaslanaraq qurulur, Azərbaycan tarixinin yeni uğurlu səhifələri muzey ekspozisiyalarında əksini tapır – deyən Natəvan Qədimova bildirib ki, Naxçıvan Muxtar Respublikası Ali Məclisi Sədrinin diqqət və qayğısı sayəsində muxtar respublikada tarix-mədəniyyət abidələrinin qorunması, onların bərpası və konservasiyası son illər ərzində geniş vüsət almış, tariximizin və mədəniyyətimizin saxlanc yeri olan yeni-yeni muzeylər istifadəyə verilmiş, onların maddi-texniki bazası möhkəmləndirilmişdir.

Qeyd edilib ki, bu gün Naxçıvan Muxtar Respublikası Mədəniyyət Nazirliyinin tabeliyində 30 muzey və muzeytipli müəssisə fəaliyyət göstərir. Muxtar respublikanın muzeylərində xalqımızın tarixini, həyat tərzini, adət-ənənələrini özündə əks etdirən 140 mindən çox maddi-mədəniyyət nümunələri mühafizə olunaraq qorunub saxlanılır. Ötən il Naxçıvan Duz Muzeyi, Qarabağlar Türbə Kompleksi, Şərur Rayon Tarix-Diyarşünaslıq Muzeyi öz qapılarını ziyarətçilərinin üzünə açmışdır.

Naxçıvan Muxtar Respublikasında muzey işinin səmərəli təşkili və muzey işi ilə bağlı uğurlu kadr seçimi nəticəsində son illər muzeyləri ziyarət edənlərin sayı əhəmiyyətli dərəcədə artmış, buna görə muzey işçilərinin öhdəsinə daha böyük vəzifələr düşmüşdür. Naxçıvan Muxtar Respublikası Ali Məclisi Sədrinin 2014-cü il 19 dekabr tarixli “Muzeylərlə əlaqələrin daha da gücləndirilməsi haqqında” Sərəncamı isə muxtar respublikada dövlət orqanları işçilərinin muzeylərə kollektiv gedişinin təmin olunması ilə yanaşı, həm də qədim Oğuz yurdunun tarixi keçmişinin, mədəniyyətinin öyrənilməsində əhəmiyyətli rol oynayır. Naxçıvan Muxtar Respublikası Ali Məclisi Sədrinin “Naxçıvan Muxtar Respublikasının təhsil müəssisələrində elektron təhsilin təşkili ilə bağlı əlavə tədbirlər haqqında” 2014-cü il 20 iyun tarixli Sərəncamına əsasən, bu gün muxtar respublikamızda olan muzeylərlə ümumtəhsil məktəbləri arasında distant dərslər təşkil olunur, həmçinin yetişməkdə olan gənc nəsil üçün açıq dərslər keçilir. Bu ilin yanvar-iyun ayları ərzində muzeylərdə 195 açıq və 12 distant dərs keçilmişdir. Həmçinin muzey işçilərinin peşə biliklərinin artırılması məqsədilə 6 seminar-treninq təşkil edilmişdir. 2019-cu ilin ilk 6 ayı ərzində muxtar respublikanın muzeylərini 287 min 166 nəfər tamaşaçı ziyarət etmişdir ki, onlardan 81 min 863 nəfəri əcnəbi vətəndaşdır.

Nazir bildirib ki, muxtar respublikada muzey fondlarının zənginləşdirilməsi, onların yeni eksponatlarla təmin olunması daim diqqət mərkəzində saxlanılır. Bu prosesdə muzeylərin əməkdaşları və muxtar respublika vətəndaşları yaxından iştirak edirlər. Belə ki, son illər muzey əməkdaşları ilə yanaşı, sakinlər də muzey fonduna eksponat təqdim olunmasında maraqlıdırlar. Ötən il muxtar respublika muzeylərinə 1564 ədəd yeni eksponat daxil olmuşdur. Bu ilin 6 ayı ərzində isə muzeylərə 1267 ədəd yeni eksponat daxil olmuşdur. 2019-cu ilin iyun ayınadək, ümumilikdə, 8 eksponat təqdimatı keçirilmişdir ki, bu təqdimatlarda da xalqımızın tarixini özündə yaşadan maddi-mədəniyyət nümunələrini muzeylərə könüllü şəkildə təqdim edən vətəndaşlar yaxından iştirak etmişlər. Bu aksiyaya, sevindirici haldır ki, artıq yetişməkdə olan gənc nəsil – məktəblilər də qoşulmuşdur. Bu il muzeylərə hədiyyə edilmiş eksponatların təqdimatında ümumtəhsil məktəblərinin müəllim və şagirdlərinin yaxından iştirakı olmuşdur.

Diqqətə çatdırılıb ki, muxtar respublikada həyata keçirilən abadlıq və quruculuq işləri sırasında tariximizə, mədəniyyətimizə, tarix-mədəniyyət abidələrinə diqqət və qayğı ön plandadır. Zaman keçdikcə təbii qüvvələrin təsirindən böyük dağıntılara və aşınmalara məruz qalmış tarixi abidələr əsaslı şəkildə bərpa olunaraq xalqımıza qaytarılmışdır. Onlardan biri də Qarabağlar Türbə Kompleksidir. Əcəmi Naxçıvani memarlıq məktəbinin davamçısı görkəmli memar Əhməd Naxçıvani yaradıcılığının nümunəsi olan Qarabağlar Türbə Kompleksində keçirilən bugünkü tədbir də muzey fondlarının zənginləşdirilməsi istiqamətində həyata keçirilən məqsədyönlü tədbirlərin məntiqi nəticəsidir.

Vurğulanmışdır ki, Naxçıvan şəhər sakini Ziya Əliyev, Şahtaxtı kənd sakini Fatma Musayeva, Qarabağlar kənd sakinləri Aysel Şəfiyeva və Rahilə Şirəliyeva tərəfindən bu gün türbə kompleksinə təqdim olunan yeni eksponatlar türbə kompleksinin fondunun və ekspozisiyasının daha da zənginləşməsinə imkan verməklə yanaşı, Kəngərli rayonunda muzey işinin səmərəli təşkilinə də töhfə vermiş olacaqdır.

Natəvan Qədimova çıxışının sonunda mədəniyyətimizə, tariximizə göstərdiyi böyük diqqət və qayğıya görə Naxçıvan Muxtar Respublikasının Ali Məclisinin Sədrinə bu sahədə çalışan insanlar adından dərin minnətdarlıq edib və maddi mədəniyyət nümunələrini Qarabağlar Türbə Kompleksinə təqdim etdiklərinə görə Ziya Əliyev, Fatma Musayeva, Aysel Şəfiyeva və Rahilə Şirəliyevaya təşəkkür etmişdir.

Daha sonra eksponatları kompleksə təqdim edənlərdən Ziya Əliyev, Fatma Musayeva, Aysel Şəfiyeva və Rahilə Şirəliyevaya çıxış edərək bildiriblər ki, bu gün muxtar respublikada maddi-mədəni irsimizin qorunub yaşadılması və gələcək nəsillərə çatdırılması sahəsində davamlı tədbirlər həyata keçirilir. Hər bir vətəndaş mədəni irsimizin qorunub yaşadılması üçün müəyyən töhfələr verməyə çalışır. Vətəndaşlar tərəfindən qədim məişət əşyalarının muzeylərə təqdim edilməsi bu mənada əhəmiyyətə malikdir. Bu eksponatları muzeylərimizə verilməsi zəngin mədəni irsimizin qorunub yaşadılmasına və gələcək nəsillərə çatdırılmasına xidmət edir. Muxtar respublikada maddi-mədəniyyət nümunələrinin toplanmasında bundan sonra da vətəndaşlarımız fəal iştirak edəcəklər.

Sonda Qarabağlar Türbə Kompleksinin ekspozisiyasına baxış olmuşdur.


Naxçıvan Muxtar Respublikası
Mədəniyyət Nazirliyinin Mətbuat Xidməti
04.07.2019



Bakıda UNESKO-nun Ümumdünya İrs Komitəsinin 43-cü sessiyası iyulun 3-də milli mülkiyyətlərə aid məsələlərin müzakirəsi ilə işini davam etdirib. Sessiyanın növbəti günündə UNESKO-nun Ümumdünya İrs Siyahısına salınan mədəni mirasın qorunma vəziyyəti haqqında hesabat dinlənilib.

Tədbiri açan sessiyanın təşkilat komitəsinin sədri, Azərbaycanın Mədəniyyət naziri Əbülfəs Qarayev müzakirə olunacaq hesabatdan danışıb və hər kəsi müzakirələrdə fəal olmağa çağırıb.

Sessiyada iştirakçı ölkələrin nümayəndələri Asiya-Sakit okean regionunda yerləşən mədəni mirasın real vəziyyətindən söz açıblar.

Tədbirdə Norveç, Braziliya, Macarıstan, Tanzaniya, Küveyt, Qvatemala, Tunis, Avstraliya, Azərbaycan, Çin və digər ölkələrin təmsilçiləri təqdim olunan hesabatla bağlı fikirlərini bildiriblər.

Strateji ətraf mühitin qiymətləndirilməsinin vacibliyindən və bu istiqamətdə görülən işlərdən söz açılıb. Bildirilib ki, dialoqun qurulması üçün belə hesabatlar mühüm əhəmiyyət daşıyır. Bütün layihələr monitorinq qrupunun tövsiyəsi əsasında həyata keçirilməlidir. Elektrik stansiyaları bufer zonadan kənarda inşa edilməlidir. İqtisadi inkişaf və ətraf mühit arasındakı əlaqə ilə bağlı müxtəlif fikirlər mövcuddur. Bunlar qarşılıqlı şəkildə müzakirə olunmalıdır.

Azərbaycan Kuba və Çinin Asiya-Sakit okean regionunda yerləşən mədəni mirasın qorunması istiqamətindəki təkliflərini dəstəkləyib. Su və hava mənbələrinin çirklənməsinin qarşısının alınması üçün qoruyucu tədbirlər həyata keçirilməlidir.

Sessiya işini müzakirələrlə davam etdirir.


Naxçıvan Muxtar Respublikası
Mədəniyyət Nazirliyinin Mətbuat Xidməti
04.07.2019



Naxçıvan Muxtar Respublikası Mədəniyyət Nazirliyi 2019-cu ilin birinci yarımili ərzində öz fəaliyyətini illik iş planına uyğun qurmuş, Naxçıvan Muxtar Respublikası Ali Məclisi Sədrinin fərman və sərəncamlarından, qəbul edilmiş dövlət proqramlarından irəli gələn vəzifələr Nazirlik tərəfindən icra edilmişdir.

Xalqımızın milli dəyərlərinin yaşadılması, qorunması və təbliğ edilməsi sahəsində bir sıra işlər həyata keçirilmiş, Novruz bayramında Naxçıvan şəhərindəki “Naxçıvanqala” Tarix-Memarlıq Muzey Kompleksində keçirilən xalq yaradıcılığı günlərində muxtar respublikanın tanınmış musiqi və folklor kollektivlərinin çıxışları təşkil olunmuşdur. Bu dövrdə Nazirliyin Elmi-Metodik Mərkəzinin də dəstəyi ilə Şahbuz, Babək rayonlarının və Naxçıvan Şəhər Mədəniyyət şöbələrinin təşkilatçılığı ilə 3 “Xalq yaradıcılığı günləri” keçirilmişdir.

Naxçıvan Muxtar Respublikası Ali Məclisi Sədrinin 21 yanvar 2019-cu il tarixli Sərəncamı ilə təsdiq edilmiş “Naxçıvan Muxtar Respublikasının 95 illik yubileyinə həsr olunmuş Tədbirlər Planı”nın icrasını təmin etmək məqsədilə müvafiq tədbirlər planı təsdiq edilmiş, muxtar respublikanın yaradılmasının95 illik yubileyinə həsr olunmuş 2 distant dərs, 5 rəsm müsabiqəsi, 5 viktorina, konsertlər və s. olmaqla, 50-yə yaxın tədbir keçirilmişdir.

Mart ayında Naxçıvan Muxtar Respublikasının yaradılmasının 95-ci ildönümü münasibətilə Bakı Beynəlxalq Muğam Mərkəzində keçirilən Naxçıvan Dövlət və Uşaq filarmoniyaları kollektivlərinin konserti yaddaqalan olmuşdur.

Yola saldığımız birinci yarımil muxtar respublikanın paytaxtında keçirilən festivallarla da yadda qalmışdır. “Naxçıvanqala” Tarix-Memarlıq Muzey Kompleksində “Kətə”, “Yaradıcı gənclər” və “Göycə” festivalları muxtar respublika sakinləri və turistlərdə xoş təəssürat yaratmışdır. Bu festivalların bədii hissəsində Naxçıvan Dövlət Filarmoniyasının Mahnı və Rəqs Ansamblının, Naxçıvan Musiqi Kollecinin və Naxçıvan Şəhər Mədəniyyət Şöbəsinin yaradıcı kollektivlərinin ifasında musiqi və rəqs nömrələri təqdim edilmişdir. “Kətə” festivalında Naxçıvan Musiqi Kollecinin tələbələrinin iştirakı ilə “Flaşmob” nümayiş olunmuşdur.

Qədim diyarımızda görkəmli şəxsiyyətlərin yubileylərinin və əlamətdar günlərin qeyd olunması ənənəyə çevrilmişdir. İlin birinci yarısında Azərbaycan xalqının ümummilli lideri Heydər Əliyevin anadan olmasının 96 illiyi, Naxçıvan Muxtar Respublikasının yaradılmasının 95 illiyi, Milli Qurtuluş Günü, filosof-şair İmadəddin Nəsiminin 650, görkəmli ədib Cəlil Məmmədquluzadənin 150, görkəmli bəstəkar Ərtoğrol Cavidin 100 illik yubileyləri ilə bağlı mədəni-maarif ocaqları, mədəniyyət evi və klublarda çoxsaylı silsilə tədbirlər keçirilmiş, konsertlər, dəyirmi masalar, konfranslar təşkil edilmiş, filmlər göstərilmiş, sərgilər yaradılmışdır.

Naxçıvan Muxtar Respublikası Ali Məclisi Sədrinin “Cəlil Məmmədquluzadənin 150 illik yubileyinə həsr olunmuş Tədbirlər Planı”nın təsdiq edilməsi haqqında” 21 yanvar 2019-cu il tarixli Sərəncamı ilə əlaqədar Nazirlik tərəfindən müvafiq Tədbirlər Planı hazırlanmışdır. Tədbirlər planına əsasən, Cəlil Məmmədquluzadənin Ev Muzeyində, Nehrəm kəndindəki və Cəlilkənddəki Xatirə muzeylərində, Cəlil Məmmədquluzadə adına Naxçıvan Muxtar Respublika Ədəbiyyat Muzeyində görkəmli dramaturqun anadan olmasının 150 illik yubileyinə həsr olunmuş tədbirlər keçirilmişdir. Cəlil Məmmədquluzadə adına Naxçıvan Dövlət Musiqili Dram Teatrında ədibin əsərləri əsasında səhnələşdirilmiş “Ölülər və dəlilər” tamaşası hazırlanmış, may ayında Türkiyə Respublikasının Qars şəhərində, iyun ayında isə Naxçıvan şəhərində nümayiş etdirilmişdir.

Naxçıvan Muxtar Respublikası Ali Məclisi Sədrinin “Ərtoğrol Cavidin 100 illik yubileyinin keçirilməsi haqqında” 18 aprel 2019-cu il tarixli Sərəncamından irəli gələn vəzifələrin icrası ilə bağlı Nazirliyin Tədbirlər Planı təsdiq edilmiş, müxtəlif səpkili tədbirlər təşkil edilmişdir.

Hesabat dövründə Naxçıvan Muxtar Respublikası Ali Məclisi Sədrinin 2018-ci il 24 dekabr tarixli Sərəncamı ilə təsdiq edilmiş “Şərur yallılarının tədqiqi, təbliği və qorunması ilə əlaqədar Tədbirlər Planı”nın icrası ilə bağlı iş aparılmış, Şərur yallılarının reyestrə alınması işi davam etdirilmişdir. “Şərur” Xalq Yallı Ansamblının ifasında bir neçə yallının çəkilişi aparılmış və bir neçə yallı nota köçürülmüşdür. Yallı sənətinin təbliği ilə bağlı ötən yarımil ərzində “Müasir gənclik və mədəniyyətimiz” devizi ilə “Adət-ənənələrimizin simvolikası – yallı”, həmçinin "Yallı xalqımızın birlik rəmzidir" mövzularında olmaqla, ümumilikdə, 4 dəyirmi masa təşkil edilmiş, “Keçmişdən bu günə Naxçıvan yallıları” adlı yallı müsabiqəsi keçirilmişdir.

Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” 3 aprel 2019-cu il tarixli Sərəncamının, aprelin 15-də“Naxçıvan Muxtar Respublikasında ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinin vəziyyəti və innovasiyaların dəstəklənməsi barədə” keçirilmiş müşavirədə verilmiş tapşırıqların icrası ilə bağlı Naxçıvan Dövlət Universitetində Naxçıvan Dövlət Universitetinin, Naxçıvan Müəllimlər İnstitutunun və Naxçıvan Musiqi Kollecinin Nazirliyin hamiliyinə verilmiş ixtisaslar üzrə müəllim və tələbələri ilə görüş keçirilmişdir. Görüşdə müvafiq ixtisaslar üçün Nazirlik tərəfindən hazırlanmış təkliflər müzakirə edilmişdir.

Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” 2015-ci il 27 iyul tarixli Sərəncamının icrası ilə bağlı iş davam etdirilmişdir. Naxçıvan Muxtar Respublikasının Mədəniyyət Nazirliyinin müvafiq Tədbirlər Planına əsasən, hesabat dövründə 2 görüş təşkil edilmiş, muzey və kitabxana işinin təşkili üzrə 8 açıq dərs, Naxçıvan Musiqi Kollecinin müvafiq ixtisaslar üzrə təhsil alan tələbələrinə vokal, xoreoqrafiya, bədii yaradıcılıq, xanəndəlik üzrə, Naxçıvan Dövlət Universitetinin aktyor sənəti ixtisası üzrə tələbələrinə 11 ustad dərsi keçilmiş, Azərbaycan mədəniyyətinin və incəsənətinin təbliği ilə bağlı tələbələrə 2 mühazirə oxunmuş, film nümayiş etdirilmişdir. Naxçıvan Dövlət Universitetinin aktyor sənəti ixtisası üzrə tələbələri üçün yazıçı-dramaturq Xaqani Əliyevin və Xalq artisti Sərvər Əliyevin ustad dərsləri təşkil edilmişdir.

Ötən yarımilin əlamətdar hadisələrindən biri də may ayında “Şərur” Xalq Yallı Ansamblının Ukraynanın paytaxtı Kiyev şəhərində Azərbaycan Diplomatiyasının 100 illiyi, 28 May - Respublika Günü və Naxçıvan Muxtar Respublikasının yaradılmasının 95 illik yubileyi münasibətilə keçirilən tədbirdə konsert proqramı ilə çıxış etməsi olmuşdur. Naxçıvan yallılarını nümayiş etdirən ansambl iyun ayında həm də Milli Qurtuluş Günü, Naxçıvan Muxtar Respublikasının yaradılmasının 95-ci ildönümü, Respublika Günü və Azərbaycanın diplomatik xidmət orqanlarının 100 illik yubileyi münasibətilə Ərzurum şəhərində keçirilmiş təntənəli mərasimdə iştirak etmişdir.

Naxçıvan Muxtar Respublikası Ali Məclisi Sədrinin 2014-cü il 19 dekabr tarixli “Muzeylərlə əlaqələrin daha da gücləndirilməsi haqqında” Sərəncamına əsasən mühüm tədbirlər həyata keçirilmişdir. Muzey fondlarının yeni eksponatlarla zənginləşdirilməsi sahəsində muxtar respublika sakinləri də fəal iştirak etmiş, muzeylərimizə ilk altı ay ərzində 1267 ədəd yeni eksponat daxil olmuşdur. Muzeyləri, ümumilikdə, 287 min 166 nəfər tamaşaçı ziyarət etmişdir ki, onlardan 81 min 863 nəfəri əcnəbi vətəndaşlardır.

Muxtar respublikanın kitabxanalarında da ötən yarımildə oxucu-kitabxana əlaqələrinin düzgün qurulması diqqətdə saxlanılmış, keçirilən tədbirlərin səmərəliliyinə nəzarət artırılmışdır. Bu dövrdə kitabxanalarda 441 mədəni-kütləvi tədbir keçirilmiş, 318 sərgi təşkil olunmuşdur.

Naxçıvan Muxtar Respublikası Ali Məclisi Sədrinin 28 avqust 2017-ci il tarixli Sərəncamı ilə təsdiq edilmiş “Oxunması zəruri olan kitabların siyahısı”nda olan kitablarla bağlı 145 müzakirə keçirilmiş, sərgilər təşkil edilmişdir. 6 ay ərzində kitabxanalarda “Kitabxanaçı günü”, “Kitabxana günü”, “Nağıl günü” və “Mütaliə günü” ilə əlaqədar,ümumilikdə,120 tədbir keçirilmişdir.Yarımil ərzində muxtar respublika əhəmiyyətli kitabxanalarda yeni oxucu sayı 1855 nəfər, oxucu gəlişi 55 min 294 nəfər, kitab verilişi 302 min 506 nüsxə təşkil etmişdir. Həmçinin Məmməd Səid Ordubadi adına Naxçıvan Muxtar Respublika Kitabxanası və Adil Babayev adına Naxçıvan Muxtar Respublika Uşaq Kitabxanası, rayon (şəhər) MKS-ləri tərəfindən ahıl və sağlamlıq imkanları məhdud 159 nəfərə səyyar kitabxana xidməti göstərilmişdir. Bu ilin ilk altı ayında elektron kataloqa 2 min 021 adda kitab işlənmiş və elektron kataloqda olan kitabların ümumi sayı 11 min 929-açatdırılmışdır. Şəbəkəyə isə 1 min 798 kitab (PDF) işlənmişdir ki, elektron kitabların ümumi sayı 2 min 428 olmuşdur. Elektron kitabxanadan altı ay ərzində 1 min 649 oxucu istifadə etmişdir.

Ötən dövrdə klub müəssisələrinin də fəaliyyəti diqqət mərkəzində saxlanılmış, keçirilən tədbirlərin səmərəliliyinə nəzarət artırılmışdır. Naxçıvan Muxtar Respublikasının Mədəniyyət Nazirliyinin tabeliyində fəaliyyət göstərən mədəniyyət müəssisələrində çalışan gənc əməkdaşlar və klub müəssisələrində fəaliyyət göstərən bədii özfəaliyyət dərnəklərinin yeniyetmə və gənc üzvləri arasında bir sıra müsabiqələr və yarışlar keçirilmişdir. Yeniyetmə və gənclər arasında “Maddi mənəvi irsim Naxçıvan” adlı rəsm və “Keçmişdən bu günə Naxçıvan yallıları” adlı yallı müsabiqələri, eləcə də “Yaşa və öyrən” intellektual bilik yarışı iştirakçıların marağına səbəb olmuşdur. 15 Aprel - Beynəlxalq Mədəniyyət Günündə klub müəssisələrində fəaliyyət göstərən musiqi, dram, rəqs və yallı dərnəklərinin iştirakı maraqla qarşılanmışdır.

Culfa və Kəngərli rayonlarındakı mədəniyyət evlərinin dərnək üzvləri tərəfindən hazırlanmış, müvafiq olaraq, “O olmasın, bu olsun” və “Şahsənəm və Gülpəri” tamaşaları bu ilin birinci yarısında teatrsevərlərə təqdim edilmişdir.

Altı ay ərzində Naxçıvan Dövlət Film Fondu tərəfindən, ümumilikdə, “Azərbaycan Kinosu Günü” ilə bağlı 16, əlamətdar tarixi günlərlə bağlı 6, Azərbaycan kinofilmlərinin nümayişinin təşkili məqsədilə ümumtəhsil məktəblərində 4, digər tədbirlərlə əlaqədar 6 olmaqla, 32 film nümayiş olunmuşdur.

Muxtar respublikada mədəniyyətin inkişafına göstərilən qayğıdan bəhrələnən teatr kollektivləri də yeni tamaşalar hazırlamış, muxtar respublika sakinlərinin asudə vaxtlarının səmərəli keçməsinə çalışmışlar.Belə ki, yarımil ərzində Naxçıvan Dövlət Musiqili Dram Teatrında Xaqani Əliyevin eyniadlı tarixi dramı əsasında hazırlanmış "Ehsan xan Kəngərli" və “Ölülər və dəlilər” tamaşaları teatrsevərlərə təqdim edilmişdir. “Ölülər və dəlilər” tamaşası ilə yekun vurulan 136-cı teatr mövsümündə 6-sı xeyriyyə, 20-si bilet satışı ilə olmaqla, 26 dəfə tamaşa oynanılmışdır.

Hesabat dövründə Məhəmməd Tağı Sidqi adına Naxçıvan Dövlət Kukla Teatrı tərəfindən “Qoğalın sərgüzəşti” və “Qızıl xoruz” tamaşaları balaca teatrsevərlərə təqdim edilmişdir. Dövr ərzində Kukla Teatrı 10-u xeyriyyə, 41-i bilet satışı ilə olmaqla 51 tamaşa nümayiş etdirmişdir.

Naxçıvan Dövlət Uşaq Teatrı “Məlik Məmməd” və Arzu Soltanın “Adam-badam iysi gəlir” əsəri əsasında eyniadlı tamaşalar hazırlamışdır. Teatr ötən dövrdə 22 tamaşa oynamışdır.

Bu ilin ilk altı ayı konsert müəssisələri üçün də əlamətdar olmuşdur. Ötən dövrdə Naxçıvan Dövlət Filarmoniyasının yaradıcı kollektivləri 33-ü xeyriyyə, 9-u bilet satışı ilə olmaqla, 42 konsert proqramı ilə çıxış etmişdir. Naxçıvan Dövlət Uşaq Filarmoniyası hesabat dövründə Şahbuz, Culfa, Ordubad və Kəngərli Rayon Mədəniyyət Saraylarında konsert proqramları ilə çıxışlar etmişdir. Filarmoniyanın yaradıcı kollektivlərinə yeni istedadlı uşaqlar cəlb edilmişlər.

Nazirliyin tabeliyində olan təhsil müəssisələri yanvar-iyun ayları ərzində məhsuldar fəaliyyəti ilə seçilmişdir. Naxçıvan Musiqi Kollecinin bir qrup müəllim və tələbələri mart ayında Bakı şəhərində keçirilən “Testene ART Baku - 2019” III Beynəlxalq İncəsənət festival-müsabiqəsində instrumental ifaçılıq və xalq çalğı alətləri nominasiyaları üzrə iştirak etmişdir. Kollecin nağara ixtisası üzrə IV kurs tələbəsi müsabiqənin Qran-pri mükafatına layiq görülmüşdür. Həmçinin kollecin 1 nəfər müəllimi və 6 nəfər tələbəsi qeyd olunan festival-müsabiqənin qalibləri olmuş, müxtəlif ixtisaslar üzrə I, II, III yerlərə və diplomlara layiq görülmüşlər. Naxçıvan Musiqi Kollecinin tələbəsi, nağara ifaçısı Nəcəf Hacılı mayın 2-dən 5-dək Latviyanın paytaxtı Riqa və İsveçin paytaxtı Stokholmda keçirilən I Beynəlxalq İncəsənət Festival-Müsabiqəsində iştirak edərək birinci yerə layiq görülmüşdür.

İlk altı ay ərzində Nazirliyin sistemində olan və muxtar respublikanın müxtəlif bölgələrində fəaliyyət göstərən uşaq musiqi, incəsənət və bədii sənətkarlıq məktəblərinin konsertləri təşkil edilmiş, “Gənclik” Mərkəzində uşaq musiqi, incəsənət və bədii sənətkarlıq məktəblərinin şagirdlərinin rəsm sərgisi, solo və hesabat konsertləri keçirilmişdir.

Ərtoğrol Cavidin 100 illik yubileyi ilə əlaqədar Naxçıvan Şəhər Ərtoğrol Cavid adına Uşaq Musiqi və Bədii Sənətkarlıq Məktəbində sənətkarın yaradıcılıq irsinə həsr olunmuş ustad və açıq dərslər keçilmiş, bəstəkarın əsərlərindən ibarət konsert proqramı təqdim edilmişdir.

Naxçıvan Muxtar Respublikasının yaradılmasının 95 illik yubileyinə həsr olunmuş uşaq musiqi, incəsənət və bədii sənətkarlıq məktəblərinin şagirdləri arasında “Doğma yurdum Naxçıvan” adlı rəsm, xor kollektivləri və nağaraçalanlar ansamblları arasında muxtar respublika müsabiqələri, həmçinin rayon mədəniyyət şöbələrinin nəzdində fəaliyyət göstərən müəssisələrin gənc əməkdaşları arasında “Mədəni irs” intellektual oyunu keçirilmişdir.

Ötən altı ay ərzində Mədəniyyət Nazirliyinin sisteminə daxil olan müəssisələrdə çalışan işçilərin fəaliyyəti də dövlətimiz tərəfindən yüksək qiymətləndirilmiş, Azərbaycan mədəniyyətinin və incəsənətinin inkişafında xidmətlərinə görə 1 nəfər "Azərbaycan Respublikasının Əməkdar artisti", 1 nəfər "Naxçıvan Muxtar Respublikasının Əməkdar mədəniyyət işçisi" fəxri adlarına, 10 nəfər isə Prezident mükafatına layiq görülmüşdür. Həmçinin Naxçıvan Muxtar Respublikası Ali Məclisi Sədrinin müvafiq Sərəncamına əsasən, incəsənət sahəsi üzrə 1 nəfər istedadlı gəncin adı Naxçıvan Muxtar Respublikası Gənc İstedadların “Qızıl kitabı”na daxil edilmişdir.


Naxçıvan Muxtar Respublikası
Mədəniyyət Nazirliyinin Mətbuat Xidməti
04.07.2019



Beşinci çağırış Naxçıvan Muxtar Respublikası Ali Məclisinin onuncu sessiyasında qarşıya qoyulan vəzifələrin müzakirəsi ilə bağlı Naxçıvan Muxtar Respublikası Mədəniyyət Nazirliyində kollegiya iclası keçirilib. İclasda Mədəniyyət naziri Natəvan Qədimova çıxış edərək bildirib ki, ötən yarım il ərzində xalqımızın milli dəyərlərinin yaşadılması, qorunması və təbliğ edilməsi, görkəmli şəxsiyyətlərin yubileylərinin və əlamətdar günlərin qeyd olunması diqqətdə saxlanılıb. İlin birinci yarısında Azərbaycan xalqının ümummilli lideri Heydər Əliyevin anadan olmasının 96 illiyi, Naxçıvan Muxtar Respublikasının yaradılmasının 95 illiyi, Milli Qurtuluş Günü, filosof-şair İmadəddin Nəsiminin 650, görkəmli ədib Cəlil Məmmədquluzadənin 150, Azərbaycan mədəniyyətinin dəyərli simalarından olan Ərtoğrol Cavidin 100 illik yubileyləri ilə bağlı çoxsaylı silsilə tədbirlər keçirilib.

Diqqətə çatdırılıb ki, Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” 2019-cu il 3 aprel tarixli Sərəncamının, bununla əlaqədar keçirilmiş müşavirədə verilmiş tapşırıqların icrası ilə bağlı nazirlikdə iş aparılıb, ekspert qrupu yaradılıb. Aprelin 19-da nazirlik aparatının, nazirliyə tabe olan müəssisələrin rəhbərlərinin və ekspert qrupu üzvlərinin iştirakı ilə görüş keçirilib.

Vurğulanıb ki, Naxçıvan Muxtar Respublikası Ali Məclisi Sədrinin “Naxçıvan Muxtar Respublikasının təhsil müəssisələrində elektron təhsilin təşkili ilə bağlı əlavə tədbirlər haqqında” 2014-cü il 20 iyun tarixli Sərəncamına uyğun olaraq Naxçıvan Muxtar Respublikası Mədəniyyət, Təhsil, Rabitə və Yeni Texnologiyalar nazirlikləri tərəfindən təsdiq edilmiş qrafikə əsasən hesabat dövründə muxtar respublikanın müxtəlif muzeylərindən ümumtəhsil məktəblərinin şagirdləri və Naxçıvan Dövlət Universitetinin tələbələri üçün, ümumilikdə, 12 distant dərs keçilib.

Nazir deyib ki, Naxçıvan Muxtar Respublikası Ali Məclisi Sədrinin “Naxçıvan Muxtar Respublikasında Xalq yaradıcılığı günlərinin keçirilməsi haqqında” 2009-cu il 7 fevral tarixli Sərəncamının icrası ilə əlaqədar Şahbuz, Babək rayonlarında və Naxçıvan şəhərində olmaqla, 3 Xalq yaradıcılığı günü tədbiri keçirilib.

Naxçıvan Musiqi Kollecinin tələbəsi, nağara ifaçısı Nəcəf Hacılı mayın 2-dən 5-dək Latviyanın paytaxtı Riqa və İsveçin paytaxtı Stokholmda keçirilən I Beynəlxalq İncəsənət festival-müsabiqəsində iştirak edərək birinci yerə layiq görülüb, Stokholmda keçirilən möhtəşəm Qala konsertində uğurla çıxış edib.

Cari ildə də muxtar respublikada ənənəvi xalq teatrları festivalı keçirilib. Rza Təhmasib adına Şərur Rayon Xalq Teatrı Bakı şəhərində keçirilən III Respublika Xalq Teatrları Festivalında II yerə layiq görülüb.

Hesabat dövründə nazirliyin sisteminə daxil olan müəssisə və təşkilatlarda əmək və iş intizamı ilə bağlı yoxlamalar aparılıb, aşkar olunan nöqsanların aradan qaldırılması istiqamətində müvafiq tövsiyə və tapşırıqlar verilib. Dövr ərzində 4 kollegiya iclası keçirilib, 4 məsələ müzakirə olunub və müvafiq qərarlar qəbul edilib.

Məruzə ətrafında müzakirələr olub.


Naxçıvan Muxtar Respublikası
Mədəniyyət Nazirliyinin Mətbuat Xidməti
04.07.2019



Müsabiqədə iştirak etmək istəyən şəxslər 3 iyul-5 avqust 2019-cu il tarixlərdə Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyanın internet portalında (www.dqmk.nmr.az) “şəxsi kabinet” bölməsinə daxil olaraq elektron müraciət formasını doldurmaqla qeydiyyatdan keçməlidirlər.

Namizədlər test imtahanında iştirak üçün 70 manat məbləği “şəxsi kabinet” vasitəsilə bank kartları ilə ödəyə bilərlər.

Digər halda həmin məbləğ komissiyanın “Naxçıvanbank” ASC-dəki bank hesabına (AZ50NAXB36015000024840000AZN) ödənməli və ödənişə dair qəbz həftənin iş günləri saat 900-dan 1230-dək və 1400-dan 1730-dək komissiyaya təqdim edilməlidir.

Namizəd bir neçə vakant vəzifənin tutulması üçün müraciət edə bilər. Qeydiyyatdan keçməkdə çətinlik çəkən namizədlər komissiyaya gəlməklə müraciət edə bilərlər.

Maraqlananlar komissiyanın (036) 545-65-71 nömrəli əlaqə telefonu və ya dqmk@nakhchivan.az elektron poçt ünvanı vasitəsilə ətraflı məlumat əldə edə bilərlər.



Naxçıvan Muxtar Respublikası
Mədəniyyət Nazirliyinin Mətbuat Xidməti
03.07.2019



İyunun 29-da Heydər Əliyev Muzeyində Naxçıvan Muxtar Respublikası Ali Məclisinin keçmiş deputatı, 1989-1992-ci illərdə Naxçıvan Qarnizonunun rəisi olmuş generalmayor Rostislav Slaboşeviçin “Heydər Əliyevin vətəni haqqında hərbçi deputatın xatirələri” kitabının təqdimat mərasimi keçirilmişdir.

Təqdimat mərasimində Naxçıvan Muxtar Respublikası Ali Məclisi Aparatırəhbərinin müavini, Qanunçuluq və hüquq-mühafizə orqanları ilə iş şöbəsinin müdiri Cəlil Rüstə- mov çıxış edərək demişdir ki, bu gün təqdimat mərasimi keçirilən yeni nəşrin müəllifi Rostislav Slaboşeviç 1949-cu il iyunun 25-də Minsk şəhərində anadan olmuşdur. 1966-cı ildə Xarkov Ali Tank Komandirləri Məktəbinə daxil olmuş, oranı bitirdikdən sonra 1975-ci ilə qədər Belarusda müxtəlif hərbi və- zifələrdə xidmət etmişdir. 1979-cu ildə Frunze adına Hərbi Akademiyanı bitirdikdən sonra Zaqafqaziya Hərbi Dairəsinə alay komandirinin müavini təyin olunmuş və Gürcüstanın Duşeti şəhərində xidmət etmişdir. 1983-cü ilin avqustunda Naxçıvan Muxtar Sovet Sosialist Respublikasının Qıvraq kəndində yerləşən hərbi hissədə alay komandirinin birinci müavini təyin edilmiş, 1984-cü ildə isə Gəncə şəhərinə alay komandiri vəzifəsinə keçirilmiş, orada diviziya komandirinin müavini vəzifəsinədək yüksəlmişdir. 1989-cu ildə yenidən Naxçıvana qayıtmış, buradakı 75-ci Motoatıcı Diviziyaya komandir təyin edilmiş və 1992-ci ilə qədər bu vəzifədə çalışmışdır. Diqqətə çatdırılmışdır ki, Naxçıvanda olduğu illərdə o, alay komandiri, diviziya komandirinin müavini və diviziya komandiri vəzifə- lərində xidmət etmiş, əvvəlcə polkovnik-leytenant və polkovnik, daha sonra isə general-mayor rütbəsinə qədər yüksəlmişdir. Naxçıvan Muxtar Respublikasında xidmət etdiyi zaman Slaboşeviç ictimai-siyasi fəaliyyəti ilə də seçilmiş, yerli əhalinin milli adət-ənənələrinə olan münasibətinə görə ictimaiyyət arasında böyük hörmət qazanmışdır. Ümummilli lider Heydər Əliyevin Naxçıvan Muxtar Respublikasına rəhbərliyi dövründə diviziyanın silahlarının, hərbi sursatının qorunub saxlanılması və Azərbaycan Ordusuna təhvil verilməsi üçün böyük səy göstərmişdir. Eyni zamanda diviziyanın şəxsi heyəti ilə Naxçıvan əhalisi arasında mehriban münasibətlərin, dostluq əlaqələrinin yaranmasına nail olmuşdur. Naxçıvanın müdafiəsində və Sədərək istiqamətində asayişin bərpa olunmasında göstərdiyi xidmətlər Rostislav Slaboşeviçin əhali arasında nüfuzunu xeyli artırmışdır.

Cəlil Rüstəmov Azərbaycan və onun Naxçıvan Muxtar Respublikası qarşısındakı xidmətlərinə görə Rostislav Slaboşeviçə Naxçıvan Muxtar Respublikası Ali Məclisi adından təşəkkürünü bildirmiş, anadan olmasının 70 illiyi və müəllifi olduğu “Heydər Əliyevin vətəni haqqında hərbçi deputatın xatirələri” kitabının təqdimatı münasibətilə onu təbrik etmişdir.

Bildirilmişdir ki, “Əcəmi” Nəş- riyyat-Poliqrafiya Birliyində yüksək poliqrafik keyfiyyətdə nəşr olunmuş “Heydər Əliyevin vətəni haqqında hərbçi deputatın xatirələri” kitabı ötən əsrin 90-cı illərində Naxçıvanın ağırsosial-iqtisadi və siyasi vəziyyəti ilə bağlı proseslərə həmin dövrün mühüm vəzifəli şəxsinin gözü ilə baxmağa imkan verir. Kitabda müəllifin şəxsən iştirak etdiyi əhəmiyyətli ictimai və dövlət fəaliyyəti ilə bağlı faktlar toplanmışdır. Ümummilli lider Heydər Əliyevin Naxçıvan Muxtar Respublikasının müdafiəsi ilə bağlı gördüyü mühüm işlər generalın şahidi olduğu tarixi proseslər kimi oxucuya çatdırılır. Bununla yanaşı, ulu öndərin Naxçıvanda yerləşən sovet ordusunun şəxsi heyətinin yerli əhali ilə münasibətlə- rinin tənzimlənməsindəki xidmətləri, xüsusilə dağılmış sovet iqtisadiyyatı şəraitində qoşun hissələrinin təminatına xüsusi diqqət yetirdiyi önə çəkilir. Müəllif ümummilli liderin gərgin iş şəraitində olmasına baxmayaraq, həmin dövrdə Naxçıvanda rusdilli məktəbin fəaliyyətinin bərpa etməsini böyük minnətdarlıqla qeyd edir. Bu mənada, Rostislav Slabo- şeviçin kitabı 1989-1992-ci illərdə muxtar respublikada baş verən ictimai-siyasi hadisələrin öyrənilmə- sində yeni yanaşmanı ortaya qoyan mühüm tarixi sənəddir.

Vurğulanmışdır ki, kitabda Nax- çıvan mətbəxinin zənginliyinə, Nax- çıvan əhalisinin qonaqpərvərliyinə, Naxçıvanın təbiətinin gözəlliyinə həsr olunmuş ayrıca bölmələr də vardır. Müəllif kitabda həmin dövrlə bugünkü Naxçıvanı müqayisə edə- rək inkişafın heyrətamiz olduğunu, muxtar respublika rəhbərinin Nax- çıvanın müdafiəsi və qorunması üçün böyük işlər gördüyünü, müasir ordu yaradıldığını, əhalinin həyat səviyyəsinin yüksəldiyini böyük qürurla qeyd edir, kitabın nəşrini Naxçıvan və naxçıvanlılar qarşı- sında mənəvi borcun ifadəsi kimi dəyərləndirir.

1992-ci il avqustun 18-də 75-ci Motoatıcı Diviziyanın silah-sursatının Naxçıvana təhvil verilməsi mərasimində ümummilli lider Heydər Əliyev demişdir: “Biz belə hesab edirik ki, 75-ci Diviziyanın tərkibində xidmət etmiş hərbi qulluqçular öz vətənlərinə – Rusiyaya, Ukraynaya, Belarusiyaya qayıtdıqdan sonra belə Naxçıvanla öz əlaqələrini kəsməyəcək, Azərbaycanla həmin dövlətlər arasında əlaqələrin yaradılmasında öz səylərini əsirgəməyəcəklər”. Bu gün Rostislav Slaboşeviçin yenidən Nax- çıvanda olması, “Heydər Əliyevin vətəni haqqında hərbçi deputatın xatirələri” kitabını yazması onun ulu öndər Heydər Əliyevin tövsiyələrinə nə dərəcədə sadiq olduğunu bir daha təsdiq edir.

Tədbirdə AMEA Naxçıvan Bölməsinin sədri, akademik İsmayıl Hacıyev, Əlahiddə Ümumqoşun Ordunun komandiri, general-leytenant Kərəm Mustafayev, keçmiş hərbi qulluqçu Sahib Səfərov çıxış edərək bildirmişlər ki, ötən əsrin 90-cı illərində Naxçıvan Muxtar Respublikası ulu öndər Heydər Əliyevin rəhbərliyi ilə çətin sınaqlardan üzüağ çıxaraq bu gün özünün hərtərəfli inkişafını təmin etmişdir. Məhz ulu öndərin əvəzolunmaz xidmətlərisayəsində muxtar respublikada ilk milli ordu hissələri yaradılmış, Nax- çıvanın təhlükəsizliyi təmin edilmişdir. Görkəmli dövlət xadiminin uzaqgörən siyasəti nəticəsində Sovet İttifaqı, sonra isə Rusiya Federasiyasına məxsus silah-sursat, hərbi texnika, təsərrüfat əmlakı və texniki qurğularAzərbaycanın sərəncamına verilmiş, ölkəmizin digər bölgələ- rindən fərqli olaraq burada heç bir dağıntı və talana yol verilməmişdir. Naxçıvanda yerləşən 75-ci Motoatıcı Diviziyanın zabit və əsgər heyəti, onların ailə üzvləri, başda diviziya komandiri general Rostislav Slabo- şeviç olmaqla, 1992-ci ilin avqust ayının 18-də xüsusi təyyarə ilə yola salınmışlar. Bu gün Naxçıvan Muxtar Respublikası Ali Məclisi Sədrinin dəvəti ilə general Rostislav Vya- çeslavoviç Slaboşeviçin 70 illik yubileyində yenidən Naxçıvanda olması qədirbilən xalqımız üçün xüsusi xidmətləri olmuş insanların unudulmayacağının bariz nümunəsidir.

Çıxış edənlər general Slaboşeviçi 70 illik yubileyi və ərsəyə gətirdiyi “Heydər Əliyevin vətəni haqqında hərbçi deputatın xatirələri” kitabına görə təbrik etmişlər.

Naxçıvan Muxtar Respublikası Ali Məclisinin keçmiş deputatı, 1989-1992-ci illərdə Naxçıvan Qarnizonunun rəisi olmuş general-mayor Rostislav Slaboşeviç “Əcəmi” Nəş- riyyat-Poliqrafiya Birliyində “Heydər Əliyevin vətəni haqqında hərbçi deputatın xatirələri” kitabının yüksək poliqrafik keyfiyyətdə nəşrinə və yüksək səviyyəli təqdimatına görə Naxçıvan Muxtar Respublikası Ali Məclisinin Sədrinə minnətdarlığını bildirmiş və imzaladığı kitabın bir nüsxəsini Heydər Əliyev Muzeyinin kitabxanasına hədiyyə etmişdir.

Naxçıvan Muxtar Respublikası
Mədəniyyət Nazirliyinin Mətbuat Xidməti
02.07.2019



İyulun 2-də Naxçıvan Muxtar Respublikası Mədəniyyət Nazirliyinin təşkilatçılığı ilə Naxçıvan Şəhər Gənclər Mərkəzində “Yaşa və öyrən” intellektual oyununun final mərhələsi keçirilib.

Oyun başlamazdan əvvəl Naxçıvan Muxtar Respublikası Mədəniyyət Nazirliyinin aparıcı məsləhətçisi Elvin Əhmədov çıxış edərək bildirib ki, Mədəniyyət Nazirliyinin təşkilatçılığı ilə ilk dəfə keçirilən “Yaşa və öyrən” intellektual bilik yarışının məqsədi mədəniyyət müəssisələrində çalışan gənc əməkdaşların intellektual səviyyəsinin yüksəldilməsinə köməklik göstərməkdir. Bilik yarışı Naxçıvan, Azərbaycan və dünyanın mədəniyyət, incəsənət, folklor, ədəbiyyat, tarix, coğrafiya, musiqi, teatr, kino və başqa sahələri əhatə edən suallar əsasında keçirilir.

Nəzərə çatdırılıb ki, yarışın seçim turlarında rayon (şəhər) mədəniyyət şöbələrinin nəzdində fəaliyyət göstərən kitabxana, mədəniyyət evi, klub, muzey və başqa mədəniyyət müəssisələrinin əməkdaşlarından ibarət ümumilikdə 28 komanda iştirak edib. Maraqlı və gərgin keçən intellektual bilik yarışının seçim mərhələlərinin nəticələri əsasında “Nəqşi-cahan”, “Ümid”, “Gülüstan”, “Şahtaxtı”, “İdeal”, “Birlik”, “Sərşəhər” və “Haçadağ” komandaları final mərhələsində iştirak etmək hüququ qazanıblar.
Daha sonra yarışın şərtləri açıqlanıb və oyuna start verilib. Final mərhələsinin sonunda Culfa rayonunun “Gülüstan” komandası I yerin, Kəngərli rayonunun “Şahtaxtılılar” komandası II yerin, Adil Babayev adınaNaxçıvan Muxtar Respublika Uşaq Kitabxanasının “Nəqşi-cahan” komandası III yerin qalibi olubmuşdur.

Sonda II, III yerin qalibləri Nazirliyin diplomları ilə təltif olunublar. I yerin qaliblərinə isə diplom və hədiyyələr təqdim edilib.

Naxçıvan Muxtar Respublikası
Mədəniyyət Nazirliyinin Mətbuat Xidməti
02.07.2019



Son illə muxtar respubkikada ənənəvi olaraq keçirilən "Xalq yaradıcılığı günü" növbəti dəfə Culfa rayonunda keçirilib. "Gülüstan" Tarix-Mədəniyyət Qoruğunda keçirilən tədbirdə əvvəlcə Culfa Rayon Mədəniyyət Şöbəsinin müdiri Pərvin Həsənov və Mədəniyyət üzrə Elmi-Metodik Mərkəzin direktoru Səyyar Məmmədov çıxış edərək 2009-cu ildən etibarən muxtar respublikada ənənəvi şəkildə keçirilən "Xalq yaradıcılığı günü" tədbirlərinin əhəmiyyətindən danışıblar. Bildirilib ki, qədim Oğuz yurdu olan Naxçıvan diyarında xalqımızın əsrlər boyu yaradıb yaşatdığı milli dəyərlər sistemi bu gün əsaslı şəkildə tədqiq və təhlil edilir, zəngin mədəniyyət nümunələrimizin təbliği və yaşadılması istiqamətində məqsədyönlü tədbirlər keçirilir. Bugünkü "Xalq yaradıcılığı günü" tədbiri də həmin tədbirlərin tərkib hissəsidir.

Vurğulanıb ki, Naxçıvan Muxtar Respublikası Ali Məclisi Sədrinin 7 fevral 2009-cu il tarixli “Naxçıvan Muxtar Respublikasında Xalq yaradıcılığı günlərinin keçirilməsi haqqında” və 24 dekabr 2018-ci il tarixli "Şərur yallıları haqqında" sərəncamlarına əsasən, muxtar respublikada milli dəyərlərimizin qorunması, təbliği və gələcək nəsillərə ötürülməsi istiqamətində həyata keçirilən tədbirlər davamlı xarakter alıb. Belə tədbirlər unudulmaqda olan milli-mənəvi dəyərlərin yenidən xalqımıza qaytarılmasında mühüm rol oynayır. Bütün bu tədbirlərin nəticəsidir ki, 2018-ci ilin 26 noyabr-1 dekabr tarixlərində YUNESKO-nun Qeyri-maddi mədəni irsin qorunması üzrə Hökumətlərarası Komitəsinin növbəti sessiyasında qəbul edilən qərarla Naxçıvan yallıları olan "Köçəri" və "Tənzərə" yallıları"Naxçıvanın ənənəvi qrup rəqsləri" adı iləYUNESKO-nun Təcili Qorunma Siyahısına daxil edilib. Bununla da Şərur, ələlxüsus “Köçəri” yallısını öz adına çıxmağa çalışan Ermənistanın "Naxçıvanın ənənəvi qrup rəqsləri” nominasiyasına qarşı təxribat xarakterli cəhdlərinin qarşısı alınıb, növbəti dəfə bu ölkəyə layiqli cavab verilib.

Namizədlik sənədinin məhz Naxçıvan adı ilə təqdim edilməsində əsas məqsəd ölkəmizin qədim və tarixi ərazisi olan Naxçıvanda yaşayan əhalinin ənənəvi mədəniy­yətinə və xalq yaradıcılığına dünya miqyasında işıq salmaq və tanıtmaq, eyni zamanda bu ənənələri YUNESKO səviyyəsində qorumaqdan ibarətdir.
Tədbirin aparıcıları bildiriblər ki, hər bir xalqın milli dəyərləri onun özünütəsdiq imkanı və milli pasportudur. Dövlətlər rəsmi atributları – bayrağı, himni, gerbi və sərhədləri ilə tanındığı kimi, bu dövlətlərin ərazisindəki millət və ya xalqlar da özlərinin milli dəyərləri – folkloru, incəsənəti, mədəniyyəti, adət-ənənələri, milli geyim və mətbəxləri ilə tanınırlar. Azərbaycan xalqının milli dəyərləri uzun əsrlər boyu xalqımızın yaşadığı tarixi ərazidə formalaşmış çox mühüm tarixi nailiyyət və milli sərvətdir. Bizim malik olduğumuz milli dəyərlərimizin kökündə, ilk növbədə, Vətənə qırılmaz tellərlə bağlılıq, yüksək milli-mədəni irs və adət-ənənələr dayanır. Azərbaycan xalqı daim öz milli dəyərlərinə sadiq olmuşdur. Hətta tarixi proseslərin müəyyən dövrlərində, milli dövlətçiliyimizin mövcud olmadığı dövrlərdə belə, xalqımız milli dəyərlərini unutmamış, öz növbəsində, milli dəyərlərimiz də xalqımızın bütövlüyünü qoruyub saxlamışdır.

Vurğulanıb ki, "Biz öz milli-mənəvi dəyərlərimizlə fəxr etməliyik. Bizim milli-mənəvi dəyərlərimiz əsrlərboyu xalqımızın həyatında, yaşayışında formalaşıbdır, xalqımızın fəaliyyətində formalaşıbdır. Milli-mənəvi dəyərləri olmayan millət həqiqi millət, həqiqi xalq ola bilməz", - deyən xaslqımızın ümummilli lideri Heydər Əliyev ölkəmizə rəhbərlik etdiyi bütün dövrlərdə Azərbaycan xalqına məxsus dəyərlərin bərpası və yaşaması istiqamətində taleyüklü tədbirlər görmüş, xalqımızın milli dəyərlərini özünə qaytarmışdır.

"Xalq yaradıcılığı günü"ndə Culfa Rayon Mədəniyyət Şöbəsinin tabeliyində olan klub müəssisələrinin dərnək üzvlərinin, folklor qrup və kollektivlərinin ifasında "Çoban qara", "Bu qala daşlı qala" xalq mahnıları, "Baş sarıtel", "Ruhani" saz havaları, "Gülümey", "Gəlinbacı", "Aman nənə" xalq oyunları, "Tənzərə" yallısı, "Bayatı Şiraz təsnifi", "Şirvan", "Nəlbəki" rəqsləri və digər xalq yaradıcılığı nümunələri təqdim edilmişdir. Tədbir iştirakçılarının ifaları alqışlarlaqarşılanmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
02.07.2019



UNESKO-nun Ümumdünya İrs Komitəsinin 43-cü sessiyası çərçivəsində Bakı Bəyannaməsi qəbul olunub.

NUHÇIXAN xəbər verir ki, Mədəniyyət naziri Əbülfəs Qarayev bəyannamənin dünyada mədəni irsin qorunmasına xidmət etdiyini deyib.

Nazir bildirib ki, sənəd dünya ictimaiyyətinin diqqətini mədəni irsin qorunmasına yönəltmək məqsədi daşıyır.

Qeyd edək ki, UNESKO-nun Ümumdünya İrs Komitəsinin 43-cü sessiyasına xarici ölkələrin və beynəlxalq təşkilatların yüksək səviyyəli rəsmiləri, ümumilikdə 180-dək ölkədən 2500-dən çox iştirakçı qatılıb.


Naxçıvan Muxtar Respublikası
Mədəniyyət Nazirliyinin Mətbuat Xidməti
02.07.2019



Ötən şənbə Naxçıvan Muxtar Respublikası Mədəniyyət Nazirliyinin və Naxçıvan Muxtar Respublikası Gənclər Fondunun birgə təşkilatçılığı ilə Naxçıvan şəhərindəki “Saat meydanı” turistik istirahət mərkəzində konsert təşkil edilib.

Konsertin aparıcısı bildirib ki, isti yay günlərində əhalinin istirahətinin daha səmərəli təşkili məqsədilə ötən şənbədən başlayaraq hər həftənin şənbə günü şəhərimizin park və meydanlarında musiqi kollektivlərinin konsertləri təşkil edilir. Bugünkü konsertdə isə Naxçıvan Dövlət Filarmoniyasının Estrada Orkestri və Naxçıvan Musiqi Kollecinin “Naxçıvanqala” ritm qrupu, həmçinin gənclər öz rəngarəng repertuarını nümayiş etdirəcək.

Qeyd olunub ki, Estrada orkestrinin bədii rəhbəri və baş dirijoru Azərbaycan Respublikasının Əməkdar işçisi Nizami Məmmədovdur. Konsertdə şən rəqslər də ifa olunacaqdır. Baletmeyster Azərbaycan Respublikasının Əməkdar mədəniyyət işçisi Tamerlan Bağırovdur. “Naxçıvanqala” ritm qrupunu təqdim edən aparıcı bildirib ki, bu kollektivin bədii rəhbəri Naxçıvan Muxtar Respublikası Əməkdar artisti Mustafa Məmmədovdur.

Hər iki musiqi kollektivinin geniş konsert proqramı tədbir iştirakçılarına xoş ovqat bəxş edib. Konsert Naxçıvan Dövlət Filarmoniyasının rəqs qrupunun “Ana yurdum” yallısının ifası ilə başlayıb. Orkestrin solistləri Azərbaycan Respublikasının Əməkdar artistləri Gülyanaq Fərzəliyeva, Tural Nəcəfov, Mübariz Əsgərov, Naxçıvan Muxtar Respublikasının Əməkdar artistləri Azər Cəfərli, Elçin Nağıyev, İlkin Abdullayev, Rahim Əsgərov, Cahangir Qurbanov, Samir İsmayılov, Ruhiyyə Hüseynova və digərlərinin ifalarında Azərbaycan xalq mahnıları, bəstəkarlarımızdan Fikrət Əmirovun, Tofiq Quliyevin, Emin Sabitoğlunun, Rauf Hacıyevin, Ramiz Mirişlinin, Elza İbrahimovanın, Polad Bülbüloğlunun və başqalarının şən mahnıları səslənib. Orkestrin ifasında Avropa və dünya musiqisindən də mahnı və rəqslər səslənib. Solistlərin ifaları alqışlarla qarşılanıb.

Naxçıvan Musiqi Kollecinin “Naxçıvanqala” ritm qrupunun bu ilki şənbə konsertində ilk çıxışı tamaşaçılarda xoş ovqat yaradıb. “Naxçıvanqala” ritm qrupunun ifasında “Qaladan-qalaya”, “Xəzəri”, “Xurcunu” və başqa müasir rəqslər ifa edilib. Konsertdə rəqs qrupu müxtəlif kompozisiya və ritmik rəqslər də səsləndirib. Konsertdə həmçinin gənclərdən ibarət “Qrup Akustik”, “Əcəmi” İnstrumental Ansamblı, “Crazy youngs” qruplarının ifasında da musiqi nömrələri və rəqslər təqdim olunub.

İki saatdan artıq davam edən konsert Naxçıvan şəhər sakinlərinə və qonaqlara xoş ovqat bəxş etmişdir.

Naxçıvan Muxtar Respublikası
Mədəniyyət Nazirliyinin Mətbuat Xidməti
29.06.2019



İyunun 29-da Naxçıvan Dövlət Uşaq Teatrında Azərbaycan Respublikasının Əməkdar artisti Tofiq Seyidovun Azərbaycan xalq nağılı olan “Məlikməmməd” əsasında səhnələşdirdiyi eyniadlı tamaşaya ictimai baxış olub.

Quruluşçu rejissoru Səyyad Məmmədov olan tamaşa ilk dəfədir ki, teatrda səhnəyə qoyulur. Tamaşanın quruluşçu rəssamı Azərbaycan Respublikasının Əməkdar artisti Behruz Haxverdiyev, musiqi tərtibatçısı isə Həcərxanım Məmmədovadır.

Qeyd edək ki, ən məşhur sehrli nağıllardan olan “Məlikməmməd” nağılı əsasında hazırlanmış tamaşada Şah, Məlikməmməd, Şahməmməd, Xanməmməd, Vəzir, Div, İlan, Zümrüd quşu, Qız surətlərini teatrın istedadlı aktyorları Ələsgər Quliyev, Məmməd Mehdiyev, Məhərrəm Nadirov, Fərid Əkbərli, Uğur Nəsirli, Rasim Əkbərov, Heyran Abdullayeva, Səkinə Məmmədova, Nurgül Məmmədova böyük ustalıqla canlandırmışlar.

Tamaşaya ictimai baxışdan sonra Naxçıvan Muxtar Respublikasının Mədəniyyət naziri Natəvan Qədimova, Xalq artisti Kamran Quliyev, Azərbaycan Respublikasının Əməkdar artisti Tofiq Seyidov, Naxçıvan Muxtar Respublikasının Əməkdar rəssamı Səyyad Bayramov və başqaları çıxış edərək tamaşa haqqında fikir və rəylərini bildiriblər.

Naxçıvan Muxtar Respublikası
Mədəniyyət Nazirliyinin Mətbuat Xidməti
29.06.2019



İyunun 28-də C.Məmmədquluzadə adına Naxçıvan Dövlət Musiqili Dram Teatrında 136-cı teatr mövsümünün bağlanış mərasimi olmuşdur. Teatr mövsümü C.Məmmədquluzadənin əsərləri əsasında hazırlanmış “Ölülər və dəlilər” tamaşası ilə başa vurmuşdur.
Tamaşanın nümayişindən əvvəl Naxçıvan Muxtar Respublikasının Mədəniyyət naziri Natəvan Qədimova çıxış edərək bildirib ki, 1883-cü il mayın 11-də dövrünün maarifpərvər ziyalısı Hacı Nəcəf Zeynalovun Naxçıvanın seçilən “Zaviyə” məhəlləsindəki evində Mirzə Fətəli Axundzadənin “Müsyö Jordan və Dərviş Məstəli şah” komediyasının səhnələşdirilməsi ilə əsası qoyulan Naxçıvan teatrı şərəfli inkişaf yolu keçmişdir. Ölkəmizdə gedən teatr hərəkatının önündə gedən Naxçıvan teatrı zamanın sərt sınaqlarından çıxaraq xalqımızın mənəvi təkamülündə, estetik şüurunun formalaşmasında, tarixi mübarizələrin bədii təcəssümündə, çətin və mürəkkəb dövlətçilik yolunda, dünya mədəniyyəti nümunələrinin mənimsənilməsində, cəmiyyət və insan, zaman və şəxsiyyət problemlərinin müxtəlif istiqamətlərdə açıqlanmasında əhəmiyyətli rol oynamışdır.

Nazir qeyd etmişdir ki, ümummilli lider Heydər Əliyev Naxçıvan teatrı ilə həmişə maraqlanmış və onun fəaliyyətinə yüksək qiymət vermişdir.
Vurğulanıb ki, müstəqillik illərində Naxçıvan Dövlət Musiqili Dram Teatrının yaradıcılıq axtarışları, qastrol səfərləri genişlənmiş, kollektiv milli dəyərlərimizin daşıyıcısına çevrilmişdir. Teatrımızın müstəqillik illərində hazırladığı “Nadir şah”, “Atabəylər”, “Topal Teymur”, “Pompeyin Qafqaza yürüşü”, “Hökmdar və qızı”, “Atillanın atlıları”, “Məhsəti”, “Qönçəbəyimin nəğməsi”, “Mirzə Fətəli”, “Mirzə Cəlil taleyi”, “Əlincə qalası”, “Ağa Məhəmməd şah Qacar”, “Koroğlunun Çənlibelə qayıdışı”, “Qurtuluş dastanı”, “Araz sahilində doğan günəş”, “Qılınc və qələm”, “Əli və Nino”, “Xəyyam”, “Ehsan xan Kəngərli” və başqa tamaşalar teatrımızın yaradıcılıq axtarışlarının nəticəsi və tarixi mövzulara marağının göstəricisidir.

Teatr bu ilin 6 ayı ərzində Xaqani Əliyevin “Ehsan xan Kəngərli” əsəri əsasında və böyük yazıçımız, Naxçıvan teatrının qurucularından biri olan C.Məmmədquluzadənin 150 illik yubileyi münasibəti ilə ədibin əsərlərindən ibarət “Ölülər və dəlilər” tamaşasını hazırlamışdır.

Nazir demişdir ki, bu ilin payız mövsümündə də teatrımız maraqlı tamaşalarla tamaşaçılarının görüşünə gələcəkdir. Üslub, struktur, janr müxtəlifliyi ilə seçilən əsərlərin səhnəyə qoyulması teatrın yaradıcılıq axtarışlarını göstərir. Teatrımız repertuar zənginliyini daim diqqət mərkəzində saxlayır, klassik və çağdaş dramaturgiyamızın dəyərli nümunələrindən, dünya klassiklərinin əsərlərindən tamaşalar hazırlayır. Naxçıvan teatrının tarixinə nəzər saldıqda aydın görünür ki, dramaturgiyamızın elə görkəmli sənətkarı yoxdur ki, onların əsərləri bu səhnədə tamaşaya qoyulmasın.
Nazir bildirib ki, Naxçıvan Muxtar Respublikası Ali Məclisinin Sədri cənab Vasif Talıbov Naxçıvan teatrının inkişafına daim diqqət və hərtərəfli dövlət qayğısı göstərir.

Muxtar respublikada teatr sənətinə bağlı insanların əməyi də daim dövlətimiz tərəfindən yüksək qiymətləndirilir. Yaradıcı insanlar Azərbaycan Respublikasının və Naxçıvan Muxtar Respublikasının fəxri adlarına, orden və medallara, Prezident təqaüdü və mükafatlarına layiq görülürlər.

Üç əsrin şahidi olan Naxçıvan teatrı həmişə xalqa xidmət etmiş, mütərəqqi ideyaların daşıyıcısı və təbliğatçısı olmuşdur - deyən Natəvan Qədimova bildirib ki, milli oyanış və dirçəlişin carçısı olan Naxçıvan teatrı bundan sonra da bu sahədə öndə gedəcək, milli ruhu yaşadacaq, dövlətçiliyə xidmət edəcək əsərləri səhnəyə gətirməklə mənəvi-estetik prinsipləri əsas götürməklə, dövlət və xalq birliyinin sarsılmazlığını əks etdirən tamaşalarla insanları sevindirəcəkdir.

Nazir çıxışının sonunda bütün mədəniyyət və incəsənət işçiləri adından göstərilən böyük diqqət və qayğıya görə Naxçıvan Muxtar Respublikası Ali Məclisi Sədrinə dərin minnətdarlığını bildirib.

Sonra “Ölülər və dəlilər” tamaşası göstərilib. Azərbaycan Respublikasının Əməkdar artisti Tofiq Seyidov ədibin “Ölülər”, “Anamın kitabı”, “Dəli yığıncağı” və “Ər” pyeslərini bir mövzu üzərində birləşdirərək maraqlı tamaşa yaratmağa nail olmuşdur.

Tamaşadakı bu 4 pyesdəki obraz və personajların bir çoxu ilə rastlaşırıq. “Ölülər və dəlilər” tamaşasında Azərbaycan Respublikasının Xalq artisti Həsən Ağasoy, Azərbaycan Respublikasının Əməkdar artistləri Tofiq Seyidov, Əli Əliyev, Bəhruz Haxverdiyev, Əbülfəz İmanov və teatrın gənc yaradıcı qüvvələri də rol almışlar. Tamaşanın quruluşçu rejissorları, Azərbaycan Respublikasının Əməkdar artistləri Tofiq Seyidov, Nurbəniz Niftəliyeva, quruluşçu rəssamı, Naxçıvan Muxtar Respublikasının Əməkdar rəssamı Səyyad Bayramov, musiqi tərtibatçısı Ariz Ağayevdir.

Naxçıvan Muxtar Respublikası
Mədəniyyət Nazirliyinin Mətbuat Xidməti
29.06.2019



İyunun 28-də Naxçıvan Dövlət Filarmoniyasının Kamera Orkestrinin Kəngərli Rayon Mədəniyyət Sarayında konserti olub.

Qeyd edək ki, 2019-cu il fevralın 9-da Naxçıvan Muxtar Respublikasının yaradılmasının 95 illiyi tamam olur. Naxçıvan Muxtar Respublikası Ali Məclisinin Sədri 21 yanvar 2019-cu il tarixli Sərəncamı ilə muxtar respublikanın 95 illiyinə həsr olunmuş Tədbirlər Planını təsdiq etmişdir. Tədbirlər Planında Naxçıvan Muxtar Respublikasının 95 illiyinin geniş qeyd edilməsi üçün bir sıra tədbirlərin keçirilməsi nəzərdə tutulmuşdur. Naxçıvan Dövlət Filarmoniyasının musiqi kollektivləri də bu tədbirlərdə fəal iştirak edirlər. Kəngərli rayonunda təşkil olunan konsert də Naxçıvan Muxtar Respublikasının yaradılmasının 95 illiyinə həsr olunmuşdur. Naxçıvan Dövlət Filarmoniyasının Kamera Orkestri muxtar respublikanın tanınmış orkestrlərindən biridir. Kollektivin çıxışları musiqisevərlər tərəfindən həmişə rəğbətlə qarşılanır. Naxçıvan Dövlət Filarmoniyasının Kamera Orkestrinin repertuarında Avropa bəstəkarlarının əsərləri, klassik instrumental kamera musiqisi ilə yanaşı, Azərbaycan bəstəkarlarının musiqi əsərləri də mühüm yer tutur. Orkestrin bədii rəhbər və dirijoru Azərbaycan Respublikasının Xalq artisti Çingiz Axundovdur.

Orkestr əvvəlcə böyük bəstəkarımız Fikrət Əmirovun “1001 gecə” baletindən fraqment ifa edib.

Sonra Azərbaycan Respublikasının Əməkdar artistləri Tural Nəcəfov, Naxçıvan Muxtar Respublikasının Əməkdar artisti Elçin Nağıyev, gənc müğənnilər İlkin Abdullayev, Rahim Əsgərzadə Azərbaycan bəstəkarlarının mahnılarını ifa ediblər. Onların ifasında səslənən Asəf Zeynallının “Ölkəm” romansı, Tofiq Quliyevin “Sevgilim”, “Bakı”, Müslüm Maqomayevin “Azərbaycan” Vasif Adıgözəlovun “Sahilə gəl” və başqa mahnılar alqışlarla qarşılanıb. Konsertdə Üzeyir Hacıbəyovun “Arşın mal alan” operettasından Əsgərin mahnısı, Qara Qarayevin “İldırımlı yollarla” baletindən səslənən musiqilər də tamaşaçılarda xoş ovqat yaradıb.

Qeyd edək ki, Kamera orkestrinin ifasında Avropa bəstəkarlarının populyar melodiyaları səsləndirilib.

Konsert bütün solistlərin ifasında Rauf Hacıyevin “Azərbaycan” mahnısı ilə başa çatıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
28.06.2019



İyunun 28-də Əfqan Əsgərovun “Qız atası” tamaşası Şərur Rayon Mədəniyyət Sarayında göstərilib. Qeyd edək ki, “Qız atası” komediyası müəllifin ən yaxşı pyeslərindən olmaqla bərabər teatrlarda ən çox oynanılan tamaşalardandır.

“Qız atası” komediyasının mövzusu ailə-məişət məsələlərinə həsr olunmuşdur. Tamaşanın əsas qəhrəmanı Cavad kişinin oğlu yoxdur. Dörd qız atası olan Cavad kişi taleyindən narazıdır, tez-tez əsəbiləşir. Cavad kişinin qızlarının hərəsi bir sənət sahibidir, anaları Pəri onlarla fəxr edir. Qızlarından Laçın bağça müdiridir, ikinci qızı Rəna paraşütçüdür. Cavad kişinin kiçik qızı Məryəm isə balerina, onun sevgilisi Heydər isə rəssamdır. Rənanı həm də əmisi oğlu Nəroğlan, Əhməd adlı bir həmkəndlisi də sevir. Cavad kişi isə qızlarını işgüzar, zəhmətkeş oğlanlara vermək istəyir. Cavad kişi bunun üçün bir oyun qurur. Tamaşa da bu komik oyun üzərinə qurulmuşdur. Bununla da gəncləri sınağa çəkmək istəyir. “Qız atası” tamaşasında komik vəziyyətlərlə, gülüş doğuran dialoqlarla zəngindir.

Cavad kişi, Pəri, Heydər, Məryəm, Kərəm, Rəna, Əhməd, Nəroğlan personajlarını Azərbaycan Respublikasının Əməkdar artisti Vidadi Rəcəbli, Stella Babayeva, Rasim Qasımov, Nuray Mehdiyeva, İsmayıl Qurbanov, Sunay Ağayev, Elsevər Məmmədov təbii və canlı təqdim etməklə sağlam gülüş yarada bilirlər. Komediyanın bütün obraz və personajları gülüş doğuran vəziyyətlərlə rastlaşırlar. Tamaşanın nikbin sonluqla başa çatması xoş ovqat yaradır.

Tamaşanın quruluşçu rejissoru Yusif Əliyev, rejissoru Azərbaycan Respublikası Əməkdar artisti Vidadi Rəcəbli, musiqi tərtibatçısı Cabir Məmmədovdur.

Tamaşa maraqla qarşılanmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
28.06.2019



İyunun 28-də Kəngərli rayon mədəniyyət evləri dərnək üzvləri görkəmli yazıçı və dramaturq Süleyman Sani Axundovun “Şahsənəm və Gülpəri” adlı əsəri əsasında hazırlanmış eyniadlı tamaşanı rayon mədəniyyət sarayında nümayiş etdirib. Qeyd edək ki, bu dərnək üzvlərinin hazırladığı ilk tamaşadır. Komediyanın mərkəzində köhnəliklə yeniliyin mübarizəsi durur. Hüququnu anlamaqla yeni həyata atılmaq istəyən qadınların köhnə fikirli ərlərinə qarşı mübarizəsi komediyanın əsas mövzusudur. Köhnəliyin nümayəndələri pinəçi Qafarla (Sərdar Qurbanov) Mirzə Fərəc (Səbuhi Əsədov), yeniliyin nümayəndələri isə onların arvadları Şahsənəm (Fatma Musayeva) və Gülpəri (Ruzugül Qazıbəyova ) tamaşanın əsas personajlarıdır. Birincilər köhnə dövrün yaramaz adətlərini müdafiə edir, arvadları hüquqsuz bir kölə vəziyyətində saxlamaq istəyirlər. Lakin yeni həyat bu qadınların gözünü açır. Onlar öz insani hüquqlarını başa düşür, həm də bu hüquqların həyata keçirilməsi uğrunda mübarizə aparırlar. Komediyanın finalında yenilik qələbə çalır. Sonda bu qadınların ərləri öz səhvlərini başa düşüb arvadları ilə barışır, mədəni həyata qədəm qoyurlar.

Görkəmli yazıçı və dramaturq S.S.Axundov öz komik qəhrəmanlarının taleyini yeni planda həll etmişdir. Qafar və Mirzə Fərəc ifşa edilib səhnədən qovulmurlar. Onlara qarşı çevrilən gülüş tərbiyələndirici, islahedici xarakter daşıyır. Pyesdə insanların şüurunda əmələ gələn dəyişiklik və yeniliyin nişanələrini əks etdirmək qarşıya məqsəd kimi qoyulub. Təbii ki, bu da o dövrün komediyalarına xas olan xüsusiyyət kimi qiymətləndirilməlidir. Bu baxımdan molla Qasım da (Vəzir Qasımov) dövrün tipik surətləri kimi diqqəti cəlb edir.

Quruluşçu rejissoru Şölə Novruzbəyli olan tamaşa rayon sakinləri tərəfindən maraqla qarşılanmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
28.06.2019



İyunun 28-də Naxçıvan Muxtar Respublikası Mədəniyyət Nazirliyinin təşəbbüsü ilə keçirilən “Azərbaycan kinosu günü” layihəsi çərçivəsində Naxçıvan Dövlət Film Fondu Şahbuz rayonunun Nursu kəndində kənd ictimaiyyətinə “Ulduz” filminin nümayişini təşkil etmişdir.

Tədbirdə giriş sözü ilə çıxış edən Naxçıvan Dövlət Film Fondunun əməkdaşı Şənhəyat Səfərova qeyd etmişdir ki, rejissoru Ağarza Quliyev olan bu film 1964-cü ildə bəstəkar Süleyman Ələsgərovun eyniadlı pyesi əsasında Azərbaycanfilm kinostudiyasında ekranlaşdırılıb.

Bu filmdə əsas rolları məşhur aktyorlar - Bəşir Səfəroğlu, Lütfəli Abdullayev, Nəsibə Zeynalova, Səyavuş Aslan, Məleykə Ağazadə, Hacıbaba Bağırov və digər sənətkarlar canlandırıblar.

Kinokomediya iki sevən gəncin saf məhəbbətindən, eyni zamanda elmin həyatla əlaqəsindən, kəndin qabaqcıl ziyalılarının elmlə heç bir əlaqəsi olmayanlara, vəzifəpərəstlərə qarşı apardıqları mübarizədən danışır.

Film kənd ictimaiyyəti tərəfindən böyük maraqla qarşılanmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
28.06.2019



İyunun 27-də Naxçıvan Dövlət Uşaq Teatrında “Keçmişdən bu günə Naxçıvan yallıları” yallı müsabiqəsinin yekun konserti olub.

Konsertdən əvvəl Naxçıvan Muxtar Respublikasının Mədəniyyət naziri Natəvan Qədimova çıxış edərək bildirib ki, bu gün qədim diyarımızda xalq yaradıcılığının, folklorumuzun, milli dəyərlərimizin yaşadılmasına və gələcək nəsillərə çatdırılmasına böyük qayğı göstərilir, bu sahədə mühüm tədbirlər həyata keçirilir. Naxçıvan Muxtar Respublikası Ali Məclisinin Sədri cənab Vasif Talıbovun “Naxçıvan Muxtar Respublikasında Xalq yaradıcılığı günlərinin keçirilməsi haqqında” 2009-cu il 7 fevral tarixli Sərəncamı xalq yaradıcılığının müasir dövrümüzdə inkişafına, təbliğinə və tədqiqinə yeni üfüqlər açmışdır.

Nazir qeyd edib ki, ötən il “Yallı” (Köçəri, Tənzərə), Naxçıvanın ənənəvi qrup rəqsləri”nin UNESCO-nun Təcili Qorunma Siyahısına daxil edilməsi muxtar respublikamızda aparılan mədəniyyət siyasətinin bəhrəsi, tükənməz milli sərvətimiz olan xalq yaradıcılığının təbliği ilə bağlı tarixə yazılan mühüm uğurdur. Naxçıvan Muxtar Respublikası Ali Məclisinin Sədri cənab Vasif Talıbovun xalq yaradıcılığına diqqət və qayğısı bu uğurun əsas təminatçısıdır. Nəticədə isə milli dəyərlərimizin tərkib hissəsi olan yallılarımızın UNESCO-nun Təcili Qorunma Siyahısına daxil edilməsi kimi əhəmiyyətli tarixi uğur qazanılmışdır. UNESCO-nun həmin qərarı ilə mənfur qonşularımızın bu dəyərlərimizi öz adlarına çıxmaq cəhdlərinin qarşısı alındı. Dünya bir daha təsdiq etdi ki, yallı məhz bizim xalqımıza məxsusdur.

Vurğulanıb ki, Naxçıvan Muxtar Respublikası Ali Məclisi Sədrinin 2018-ci il 24 dekabr tarixli “Şərur yallıları haqqında” Sərəncamı da xalq yaradıcılığına böyük qayğının daha bir ifadəsidir. Sərəncama əsasən təsdiq olunmuş Tədbirlər Planında yallı ilə bağlı tədqiqatların və nota köçürülmə işinin davam etdirilməsi, onların reyestrinin aparılması və digər mühüm məsələlər öz əksini tapmışdır.

Bu gün muxtar respublikada “Şərur” Xalq Yallı Ansamblı və rayon mədəniyyət şöbələrinin nəzdində 20-dən çox yallı qrupu fəaliyyət göstərir deyən Natəvan Qədimova bildirib ki, Naxçıvan Muxtar Respublikasının Mədəniyyət Nazirliyinin təşkilatçılığı ilə keçirilən “Keçmişdən bu günə Naxçıvan yallıları” müsabiqəsinin əsas məqsədlərindən biri gənc istedadların və kollektivlərin axtarışı və onların üzə çıxarılması olmuşdur. Müsabiqədə aşkar edilmiş kollektivlərin və istedadlı ifaçıların yaradıcılıq potensialını göstərməsi üçün hər cür şərait yaradılmış və bundan sonra da yaradılacaqdır. Nazir demişdir ki, müsabiqənin keçirilməsi üçün nazirlik tərəfindən əsasnamə hazırlanaraq təsdiq edilmiş, təşkilat komitəsi və münsiflər heyəti yaradılmışdır. Müsabiqənin keçirilməsi üçün təşkil olunmuş 2 seçim turu və əsas tur artıq arxada qalmışdır. Müsabiqənin şərtlərinə əsasən yalnız həvəskarlar müsabiqədə iştirak etmişlər. Müsabiqənin gedişində qeyri-peşəkar şəkildə fəaliyyət göstərən yallı dərnəkləri, qrupları, həvəskar kollektivlər öz bacarıqlarını göstərmişlər. “Keçmişdən bu günə Naxçıvan yallıları” yallı müsabiqəsində münsiflər heyəti tərəfindən qiymətləndirmə zamanı geyim və səhnə mədəniyyəti, ifaçılıq, kollektivin hazırlığı, vaxta əməl olunması kimi meyarlar nəzərə alınmışdır.
Çıxışının sonunda nazir müsabiqənin qaliblərinə və bütün iştirakçılara yeni yaradıcılıq uğurları arzulayıb və deyib ki, inanırıq ki, müsabiqədə fərqlənən istedadları peşəkar folklor, yallı kollektivlərinin sırasında görəcəyik.

Sonra nazir Şərur rayonunun Yuxarı Aralıq Kənd Mədəniyyət Evinin “Bahar” yallı kollektivinə I, Sədərək Rayon Uşaq Musiqi Məktəbinin “Tejgar” yallı kollektivinə II, Naxçıvan Tibb Kollecinin “Birlik” yallı kollektivinə III yerin diplomlarını təqdim etmişdir. Müsabiqədə fərqlənmiş 3 kollektiv isə nazirliyin fəxri fərmanları ilə təltif edilmişlər.

Tədbirin bədii hissəsində müsabiqədə fəal iştirak etmiş yallı kollektivləri “Tirməşal”, “Köçəri”, “Üç ayaq”, “Tənzərə”, “Höynəri”, “Gopu” yallılarını ifa etmişlər.

Naxçıvan Muxtar Respublikası
Mədəniyyət Nazirliyinin Mətbuat Xidməti
27.06.2019



İyunun 27-də Naxçıvan şəhərindəki “Gənclik” Mərkəzində şəhərdəki Məmməd Məmmədov adına 1 nömrəli Uşaq Musiqi Məktəbinin kamança ixtisası üzrə müəllimi Yaqut Əliyevanın solo konserti olub.

Qeyd edək ki, bacarıqlı kamança müəllimi Yaqut Əliyevanı solo konsertində Naxçıvan Musiqi Kollecinin “Buta” muğam ansamblı müşayiət edib. Konsertə Naxçıvan Muxtar Respublikasının Əməkdar müəllimi Nərminə Qədimova konsertmeysterlik edib.

Konsertdə “Buta” muğam ansamblının müşayiəti ilə Yaqut Əliyeva bəstəkar Adil Bəbirovun “Bilirsən özün” əsərini səsləndirib.

Kamança müəlliminin ifasında Hacı Xanməmmədovun “Konsert”inin I hissəsi alqışlarla qarşılanıb.

İstedadlı kamança müəllimi Yaqut Əliyeva görkəmli bəstəkarlarımız Cahangir Cahangirovun “Durnalar” və Fikrət Əmirovun “Gecə keçdi” əsərlərini də səsləndirib.

Böyük rus bəstəkarı Mixail Qlinkanın “Ruslan və Lyudmila” operasından “Uvertura” və tanınmış italyan bəstəkarı və skripkaçısı Vittorio Montinin macar xalq rəqslərinin melodiyası əsasında bəstələdiyi məşhur “Çardaş” əsərinin kamançada ifası maraqla qarşılanıb.

Konsertdə Yaqut Əliyevanın Nurlan Nuriyevlə birgə ifa etdiyi Tahir Əkbərin “Gülüb getdi” əsəri ifa edildikdən sonra kamança müəllimi Naxçıvan Musiqi Kollecinin “Buta” muğam ansamblının ifasında Azərbaycan xalq rəqslərindən nümunələri səsləndirib.

Kamança müəlliminin solo konserti müəllim və şagirdlər tərəfindən maraqla qarşılanıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
27.06.2019



İyunun 27-də Naxçıvan Muxtar Respublikası Mədəniyyət Nazirliyinin təşkilatçılığı ilə gənclərin Şərur Rayon Tarix-Diyarşünaslıq Muzeyinə, rayondakı Yengicə Şərq hamamına və Parçı imamzadəsinə ekskursiyası təşkil olunub.

Gənclər əvvəlcə Şərur Rayon Tarix-Diyarşünaslıq Muzeyində olmuşlar. Burada onlara məlumat verilib ki, muzey 2018-ci ilin 20 dekabrından yeni binada fəaliyyət göstərir. Muzey ümummilli liderimiz Heydər Əliyevin 1980-ci ildə rayonlarda Tarix-Diyarşünaslıq muzeylərinin yaradılması haqqında imzaladığı qərara əsasən yaradılıb. Muzeyin fondunda 7 mindən artıq eksponat qorunub saxlanılır. Bu eksponatlar tarixin müxtəlif inkişaf dövrlərinə aiddir. Rayon ərazisindən tapılmış mədəniyyət nümunələri - daş süxurlar, obsidianlar, daş, tunc və misdən hazırlanmış əmək alətləri, silahlar, etnoqrafik materiallar gənclərdə tariximizə maraq oyadıb.

Sonra gənclər rayonun Yengicə kəndindəki XVIII əsrə aid Şərq hamamı ilə tanış olublar. Gənclərə məlumat verilib ki, Naxçıvan Muxtar Respublikası Ali Məclisi Sədrinin himayəsi ilə Yengicə hamamı 2007-ci ildə bərpa edilmişdir. Qeyd edilib ki, hamam uzun illər fəaliyyət göstərsə də XX əsrin 80-ci illərində fəaliyyətini dayandırmışdır.

Xanlıqlar kəndində olan gənclərə Parçı imamzadəsi haqqında geniş məlumat verilib. Qeyd edilib ki, XVII-XVIII əsrlərə aid imamzadə türk-islam mədəniyyəti nümunələri arasında özünəməxsus xüsusiyyətlərinə görə diqqəti cəlb edir.

Gənclərə abidə haqqında geniş məlumat verildikdən sonra bildirilib ki, bu tarixi abidə də Naxçıvan Muxtar Respublikası Ali Məclisi Sədrinin tapşırığı ilə 2016-cı ildə bərpa olunmuşdur.

Ekskursiya gənclərdə xoş təəssürat yaradıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
27.06.2019



İyunun 25-də Bəhruz Kəngərli Muzeyində Azərbaycan Respublikasının Əməkdar rəssamı Telman Abdinov tərəfindən muzeylərə hədiyyə edilmiş rəsm əsərlərinin təqdimat mərasimi keçirilib.

Bu münasibətlə keçirilən tədbiri açan Naxçıvan Muxtar Respublikasının Mədəniyyət naziri Natəvan Qədimova bildirib ki, bu gün qədim diyarımızda mədəniyyət və incəsənətimizin bütün sahələri kimi, təsviri incəsənətimizə də böyük diqqət və qayğı göstərilir. Muxtar respublikamızda Rəssamlar Birliyi, Bəhruz Kəngərli adına Sərgi Salonu, Naxçıvan Dövlət Rəsm Qalereyası, Bəhruz Kəngərli Muzeyi və rəssamın adını daşıyan Rəssamlar Parkı fəaliyyət göstərir, 3 uşaq incəsənət məktəbində rəsm ixtisası tədris olunur. 2012-ci ildən başlayaraq muxtar respublikamızda iki ildən bir “Naxçıvan- bəşəriyyətin beşiyi” Beynəlxalq Rəsm Festivalı keçirilir.

Nazir qeyd edib ki, muzeylərə eksponat toplanması istiqamətində keçirilən növbəti təqdimat mərasimi təsviri incəsənətimizlə bağlıdır. Tanınmış rəssamımız, Azərbaycan Respublikasının Əməkdar rəssamı Telman Abdinov müxtəlif illərdə portret janrında yaratdığı 5 rəsm əsərini muxtar respublikada fəaliyyət göstərən muzeylərə hədiyyə edir. Bunlar böyük yazıçımız Cəlil Məmmədquluzadənin, görkəmli rəssamımız Bəhruz Kəngərlinin, Xalq şairi Xəlil Rza Ulutürkün, şəhid Qabil Orucəliyevin və Azərbaycanın Milli Qəhrəmanı Səyavuş Həsənovun portretləridir. Hədiyyə olunan rəsm əsərləri üçün Telman Abdinova təşəkkür edən Natəvan Qədimova deyib ki, rəssamın rəsm əsərləri muxtar respublikamızda fəaliyyət göstərən Heydər Əliyev, Naxçıvan Dövlət Tarix Muzeyi, Hüseyn Cavidin Ev Muzeyi, Bəhruz Kəngərli, Xalça Muzeyi və başqa muzeylərdə də vardır. Rəssam öz əsərlərini müxtəlif illərdə bu muzeylərə hədiyyə etmişdir. Rəssamın hədiyyə olunan bu portretləri də muzeylərimizdə layiqli yerini tutacaqdır.

Telman Abdinov uzun illərdir ki, təsviri incəsənətimizə fədakarlıqla xidmət edən rəssamlarımızdandır. Fırça ustasının rəsm əsərlərində onun istedad və zəhmətinin vəhdətini görürük. Rəssam nə çəkirsə, nə yaradırsa, qəlbinin çağırışı ilə edir, xalqını sevərək yaradır.

Nazir rəssamın həyat və yaradıcılığı haqqında söhbət açaraq bildirib ki, Telman Abdinov 1954-cü il iyulun 1-də Şahbuz rayonunun Külüs kəndində anadan olmuşdur. Bu günlərdə rəssamın 65 illik yubileyi tamam olur. Telman Abdinov Əzim Əzimzadə adına Rəssamlıq Məktəbini bitirmişdir. 1978-ci ildən etibarən onun əsərləri müxtəlif sərgilərdə nümayiş etdirilir.

Telman Abdinovun yaradıcılığı müxtəlif mövzulu və janrlı rəsm əsərləri ilə seçilir. Rəssamın çoxşaxəli və məhsuldar yaradıcılığında portret, mənzərə, qrafika, natrümort və başqa janrlı əsərlərində rəng tonu, kompozisiya, bütövlük onun istedad və zəhmətinin rəngarəngliyini ortaya çıxarır.

Rəssamın portret janrında yaratdığı əsərlərin içərisində tanınmış dövlət başçılarına, elm xadimlərinə, məşhur şairlərə, aktyorlara, qayğısız uşaqlara rast gəlmək mümkündür. O, bütün əsərlərində tamaşaçını özünə cəlb edir, hətta onu düşündürməyə də qadir olur.

Nazir vurğulayıb ki, bu əsərlər dəyərli eksponat kimi muzeylərimizdə qorunub saxlanılacaq və nümayiş etdiriləcəkdir. Biz digər rəssamları da bu aksiyaya qoşulmağa səsləyirik. Çünki, muzeylər tariximizin və mədəniyyətimizin saxlanc yeri və gələcək nəsillərə mirasdır.

Natəvan Qədimova çıxışının sonunda bütün mədəniyyət və incəsənət sahəsində çalışan insanlar adından bu sahəyə göstərilən diqqət və qayğıya görə Naxçıvan Muxtar Respublikası Ali Məclisi Sədrinə minnətdarlığını bildirib.

Azərbaycan Respublikasının Əməkdar rəssamı Telman Abdinov tədbirdə çıxış edərək bildirib ki, Cəlil Məmmədquluzadənin portretinin onun ev muzeyində, Bəhruz Kəngərlinin portretinin onun adını daşıyan muzeydə, şəhid Qabil Orucəliyevin və Azərbaycanın Milli Qəhrəmanı Səyavuş Həsənovun portretlərinin Xatirə Muzeyində, Xəlil Rza Ulutürkün portretinin isə Ədəbiyat Muzeyində nümayiş etdirilməsi onun üçün iftixar hissi yaradacaqdır. Rəssam bundan sonra da muzeylərlə əlaqəsinin davam etdiriləcəyini bildirmişdir.

Naxçıvan Dövlət Tarix Muzeyinin direktoru, Əməkdar mədəniyyət işçisi Nizami Rəhimov, Cəlil Məmmədquluzadənin Ev Muzeyinin direktoru Aytən Ələkbərova, Bəhruz Kəngərli Muzeyinin direktoru Səbinə Əlincəli, Ədəbiyyat Muzeyinin direktoru Aləmzər İbrahimova, Xatirə Muzeyinin direktor əvəzi Leyla Məmmədova çıxışlarında rəsm əsərlərini muzeyə hədiyyə edən Azərbaycan Respublikasının Əməkdar rəssamı Telman Abdinova minnətdarlıq edərək bildiriblər ki, rəssamın bu təşəbbüsünü yüksək dəyərləndirirlər. Bu rəsm əsərlərinin muzeylərə hədiyyə edilməsi həm də rəssamlarımızı və təsviri incəsənətimizi təbliğ etmək baxımından əhəmiyyətlidir.

Tədbirin sonunda muzeyin ekspozisiyasına baxış olub.

Naxçıvan Muxtar Respublikası
Mədəniyyət Nazirliyinin Mətbuat Xidməti
25.06.2019



Naxçıvan Muxtar Respublikası Konstitusiyasının 5-ci maddəsinin II hissəsinin 22-ci bəndini rəhbər tutaraq qərara alıram:

Xüsusi istedadı olan aşağıdakı şəxslərin adları Naxçıvan Muxtar Respublikası Gənc İstedadlarının “Qızıl kitabı”na yazılsın və onlar Naxçıvan Muxtar Respublikası Ali Məclisi Sədrinin xüsusi aylıq təqaüdünə layiq görülsünlər:

Hüseynli Rafiq Anar oğlu - Naxçıvan şəhər 15 nömrəli tam orta məktəbin şagirdi, idman sahəsi üzrə

Bağırov Siyavuş Mehdi oğlu - Naxçıvan şəhər 8 nömrəli tam orta məktəbin şagirdi, təhsil sahəsi üzrə

Əliyeva Duyqu Cabir qızı - Culfa şəhər 2 nömrəli tam orta məktəbin şagirdi, incəsənət sahəsi üzrə

Vasif TALIBOV

Naxçıvan Muxtar Respublikası Ali Məclisinin Sədri

Naxçıvan şəhəri, 24 iyun 2019-cu il

“Şərq qapısı” qəzeti

25.06.2019





Naxçıvan Muxtar Respublikası
Mədəniyyət Nazirliyinin Mətbuat Xidməti
25.06.2019



Naxçıvan Muxtar Respublikası Mədəniyyət Nazirliyinin tabeliyində olan mədəniyyət müəssisələrində, mədəni-maarif ocaqlarında isti yay günlərində əhalinin istirahətinin səmərəli təşkili, asudə vaxtın mənalı keçirilməsi üçün müxtəlif tədbirlər həyata keçirilir. İyunun 23-də nazirliyin təşkilatçılığı ilə Naxçıvan şəhərindəki “Görüş yeri” kafesi qarşısında konsert təşkil edilib.

Konsertin aparıcısı bildirib ki, isti yay günlərində əhalinin istirahətinin daha səmərəli təşkili məqsədi ilə Naxçıvan Muxtar Respublikasının Mədəniyyət Nazirliyi bu gündən başlayaraq hər həftənin şənbə günləri şəhərimizin park və meydanlarında musiqi kollektivlərinin konsertlərini təşkil edir. Bu gün sizin qarşınızda Naxçıvan Dövlət Filarmoniyasının Mahnı və Rəqs Ansamblı öz rəngarəng repertuarını nümayiş etdirəcək.

Qeyd edilib ki, ansamblın bədii rəhbəri Azərbaycan Respublikasının Əməkdar artisti Zeynallabdın Babayev, baletmeyster Azərbaycan Respublikasının Əməkdar mədəniyyət işçisi Tamerlan Bağırovdur.
Naxçıvan Dövlət Filarmoniyasının Mahnı və Rəqs Ansamblı geniş konsert proqramı ilə tədbir iştirakçılarına xoş ovqat bəxş edib. Ansamblın solistləri Nərmin Hüseynova, Samiddin Vəliyev, Namiq Vəliyev, Hüseyn Qasımov, Cəfər Tağıyev, Məhərrəm Quliyev, Bəhruz Quliyev, Ruhiyyə Hüseynovanın ifalarında Azərbaycan xalq mahnıları və bəstəkarlarımızın populyar mahnıları səslənib. Konsertdə Azərbaycan bəstəkarlarından Tofiq Əhmədov, Arif Məlikov, Ələkbər Tağıyev, Polad Bülbüloğlu, Tofiq Quliyev, Faiq Sücəddinov, Hacı Xanməmmədov, Oqtay Kazımov, Emin Sabitoğlu, Qənbər Hüseynli, Ramiz Mirişli, Elza İbrahimovanın və başqalarının şən və lirik mahnıları ifa edilib. Solistlərin ifasında səslənən xalq mahnılarından “Tellərini yan dara qız”, “Ay qız sənə mailəm”, “Qara qaşın vəsməsi”, bəstəkar mahnılarından “Güldür məni”, “Qonaq gəl bizə”, “Naxçıvan”, “İlk görüşdən gəlirəm”, “Badamlı”, “Heç xəbərin yoxdur sənin”, “Naxçıvandadır”, “İlk sevgi” və başqa mahnılar alqışlarla qarşılanıb.

Rəqs kollektivinin ifa etdiyi “İnnabı”, “Naz eləmə”, “Tərəkəmə” və başqa rəqslər tamaşaçılarda xoş əhval-ruhiyyə yaradıb.

Naxçıvan Muxtar Respublikasının Əməkdar artistləri Xatirə Səfərova və Hünər Əliyevin ifalarında səslənən xalq mahnıları kollektivin repertuar zənginliyini göstərirdi.

Konsert rəqs kollektivinin ifasında yallı ilə başa çatıb.

Bu il Naxçıvan şəhərindəki “Görüş yeri” kafesi qarşısında ilk dəfə keçirilən konsert proqramı iki saatdan artıq davam edib.

Naxçıvan Muxtar Respublikası
Mədəniyyət Nazirliyinin Mətbuat Xidməti
24.06.2019



Ötən həftənin şənbə günü - iyunun 22-də Naxçıvan Dövlət Uşaq Teatrı Naxçıvan Muxtar Respublikasının Əməkdar mədəniyyət işçisi, şair-dramaturq Həsənəli Eyvazlının “Nadan Xoruz” mənzum nağıl pyesi əsasında hazırladığı tamaşanı Sədərək Rayon Mədəniyyət Sarayında uşaqlara təqdim etmişdir.

Dünya xalqlarının folklorunda olduğu kimi, Azərbaycan nağıllarında da heyvanlar aləmindən bəhs edən nağıllar çoxdur. Müəllif ədəbiyyatımızdakı ənənələri davam etdirərək. Həm də xalq yaradıcılığından faydalanaraq uşaqlar üçün bu əsəri yazmışdır.

Tamaşanın məzmunu çox sadədir. Bir sıra nağıllarımızda rast gəldiyimiz Tülkü burada da hiyləgərliyi ilə seçilir. Kələkbaz Tülkü bu dəfə Nənənin toyuq cücələrinin axırına çıxmaq üçün Xoruzla yalançı “dostluq” qurmaq istəyir. Nadan, eyni zamanda lovğa və təkəbbürlü Xoruz da buna inanır. Son anda Nənənin sadiq köpəyi Bozdar onları Tülkünün kələyindən xilas edir. Tamaşada lovğalıq, nadanlıq, kələkbazlıq, özünə arxayın olub heç kəsə inanmamaq kimi mənfi xüsusiyyətlər tənqid edilir. Heyvan dili ilə alleqorik şəkildə bu xüsusiyyətlər açılıb göstərilir.

Tamaşada Nənə surətini Naxçıvan Dövlət Universitetinin tələbəsi Mehri Nəbiyeva ifa edir. O qocalıb əldən düşmüş qarı nənə surətini balaca tamaşaçılara özünəməxsus sevgi ilə təqdim edə bilir.

Tamaşanın ən maraqlı surəti olan Tülkü surətini Heyran Abdullayeva təbii və səmimi oynayır. Balaca aktyorlardan Nurlan Qafarov (Xoruz), Həsrət Abdullayev (Bozdar), Fatimə Bələlova, Həqiqət Bağırova, Əminə Seyidova, Aynur Əsgərli, Afaq Məmmədli, Nuray Ələkbərzadə, Səkinə Məmmədovanın şən və uşaq psixologiyasına uyğun surətləri canlandırmaq həvəsi xoş təsir bağışlayır.

Tamaşanın quruluşçu rejissorları Tofiq Seyidov və Nurbəniz Niftəliyevanın uşaqlarla işləmək səyi maraqlı tamaşanın yaranmasına səbəb olmuşdur. Tamaşanın musiqi tərtibatı da xoş təsir bağışlayır. Xüsusilə görkəmli bəstəkarımız Qəmbər Hüseynlinin dünya şöhrətli “Cücələrim” mahnısının səslənməsi uşaqlarda şən əhval-ruhiyyə yaradır.

Gənc rəssam Bəhruz Quliyevin dekor işi də diqqəti cəlb edir. Kənd həyatını, kənd məişətini xatırladan mənzərələr, tamaşada uşaqlar üçün hazırlanmış paltarlar nağıl dünyası ilə vəhdətdə maraqlı görünür.

Naxçıvan Dövlət Uşaq Teatrının bu tamaşası balacaların nağıl dünyasını genişləndirmək baxımından gözəl tamaşa kimi xoş təsir bağışlayır.

Naxçıvan Muxtar Respublikası
Mədəniyyət Nazirliyinin Mətbuat Xidməti
24.06.2019



Şərur Rayon Xalq Teatrı 23 iyunda Rəşid Behbudov adına Azərbaycan Dövlət Mahnı Teatrında baş tutan lll Respublika Xalq Teatrları Festivalının final mərhələsində "Motsart və Salyeri" tamaşası ilə çıxış etmişdir.

Tamaşanın quruluşçu rejissoru Nəsimi Məmmədzadə həm də səhnə əsərinə bədii və musiqi tərtibatı verərək maraqlı tamaşa yaratmağa müvəffəq olmuşdur. Nəsimi Məmmədzadə tamaşada həm də Salyeri kimi mürəkkəb və ziddiyyətli bir obrazı canlandırmışdır. Azərbaycan Respublikasının Əməkdar artisti Neymət Sultanov isə böyük bəstəkar Motsartın hərtərəfli istedadını və qeyri-adi taleyini bacarıqla təqdim etməyi bacarmışdır.

Festivalda iştirak edən doqquz kollektiv arasında Şərur Rayon Xalq Teatrının “Motsart və Salyeri” tamaşası II yerə layiq görülmüşdür. Nəsimi Məmmədzadə “Ən yaxşı rejissor”, Neymət Sultanov isə “Ən yaxşı aktyor” nominasiyaları üzrə mükafatlandırılmışlar.

“Motsart və Salyeri” kimi psixoloji faciənin xalq teatrının səhnəsində tamaşaya qoyulması kollektivin böyük uğurudur.


Naxçıvan Muxtar Respublikası
Mədəniyyət Nazirliyinin Mətbuat Xidməti
23.06.2019



İyunun 21-də Naxçıvan şəhərində “Saat Meydanı” turistik istirahət mərkəzi istifadəyə verilmişdir.

Naxçıvan Muxtar Respublikası Ali Məclisinin Sədri Vasif Talıbov açılışı bildirən lenti kəsmişdir.

Naxçıvan Şəhər İcra Hakimiyyətinin başçısı Mirsənani Seyidov çıxış edərək demişdir ki, son illər istifadəyə verilən yeni inzibati və yaşayış binaları, xidmət sahələri, salınan park və küçələr qədim Naxçıvan şəhərinin simasını tamamilə dəyişmişdir. Əhalinin yaşayışı, məşğulluğu və istirahətinin səmərəli təşkili istiqamətində ardıcıl tədbirlər görülmüş, yeni istehsal və xidmət sahələri fəaliyyətə başlamışdır. Bu il də Naxçıvan şəhərində quruculuq işləri davam etdirilir, yeni yaşayış kompleksi və inzibati binalar, xidmət sahələri tikilir, parklar salınır, mövcud yaşayış binaları yenidən qurulur. İstifadəyə verilən "Saat Meydanı" da bu sahədə görülən işlərin davamıdır. Mirsənani Seyidov "Saat Meydanı"nın yeni iş yerlərinin açılması, sakinlərin və turistlərin rahatlığının təmin olunması ilə yanaşı, həm də Naxçıvan şəhərinin arxitektura quruluşunu zənginləşdirdiyini bildirmiş, bütün bunlara görə Naxçıvan şəhər ictimaiyyəti adından Ali Məclisin Sədrinə minnətdarlıq etmişdir.
Naxçıvan Muxtar Respublikası Ali Məclisinin Sədri Vasif Talıbov Naxçıvan şəhərində “Saat Meydanı” turistik istirahət mərkəzinin istifadəyə verilməsi münasibətilə tədbir iştirakçılarını təbrik edərək demişdir: Hər bir ölkənin həyatında turizm xüsusi yer tutur. Müasir dövrdə ölkələr turizmin inkişafında, daha çox turist cəlb etməklə ümumi inkişafın təmin olunmasında maraqlıdırlar. Naxçıvan Muxtar Respublikasında da turizmin inkişafı diqqət mərkəzindədir. Tarixi və dini turizmin, ekoturizmin, dağ turizmin, mədəni və sağlamlıq turizminin inkişafı sahəsində mühüm işlər görülmüşdür. Artıq Naxçıvan həm də turizm mərkəzinə çevrilmişdir. Bu il Londonda nəşr olunan “Wanderlust” jurnalında da Naxçıvan Muxtar Respublikası dünyanın ən yaxşı 50 turizm mərkəzlərindən biri kimi qeyd olunmuşdur.

Ali Məclisin Sədri demişdir: Bu gün muxtar respublikada turizmin bütün sahələri üzrə qonaqlar qəbul edilir. Turistlərin istirahəti səmərəli təşkil olunur, onlar yaradılan şəraitdən istifadə edərək Naxçıvan, ümumilikdə isə Azərbaycan haqqında xoş fikirlərini bildirilər. Turizmin inkişafında ən vacib məsələlərdən biri də xidmət sahəsidir. Çünki xidmət sahəsi olmadan turizmi inkişaf etdirmək mümkün deyil. Bu gün istifadəyə verilən “Saat Meydanı” da yeni xidmət sahəsi kimi turizmin inkişafına böyük dəstək olacaqdır. Həmçinin yeni fəaliyyətə başlayan turistik məkanda yüzdən artıq iş yeri açılmış, gənclər işlə təmin olunmuşlar. Bu da məşğulluğun təmin olunmasına töhfə verir.

Qeyd olunmuşdur ki, xidmət sahələrində dünyanın müxtəlif ölkələrinin mətbəxləri, eyni zamanda milli mətbəx nümunələri turistlərə və sakinlərə təqdim olunacaqdır. Müasir formada qurulan meydanda isə gənclərin asudə vaxtları səmərəli təşkil olunacaq, müxtəlif tədbirlər keçiriləcəkdir. Ona görə də kollektiv yaradılan şəraitdən səmərəli istifadə etməli, turistlərə və sakinlərə nümunəvi xidmət göstərilməlidir. Çünki xidmətin düzgün təşkili əlavə turist cəlbinə və yeni xidmət sahələrinin yaranmasına şərait yaradacaqdır.

Ali Məclisin Sədri kollektivə işlərində uğurlar arzulamış, əməyi olanlara təşəkkürünü bildirmiş və yaradılan şəraitlə tanış olmuşdur.

Bildirilmişdir ki, klassik və milli memarlıq üslubunda inşa olunmuş “Saat Meydanı” 2 mərtəbəli binadan, 21 metrlik saat qülləsindən və meydandan ibarətdir. 2 girişi olan binada 5 dükan, uşaq əyləncə bölməsi, gənclər üçün intellektual oyun zalı, otel, 4 zaldan ibarət 125 yerlik kinoteatr, 4 restoran və 2 kafe yerləşir. Burada sakinlərə və turistlərə Naxçıvan, eləcə də Türkiyə, Çin, gürcü, yapon və ingilis mətbəxlərinin nümunələri təqdim olunur. Geyim dükanlarında dünya firmalarının məhsulları alıcılara təklif edilir.

Kinoteatrda "CinemaPlus" kinoteatrlar şəbəkəsi tərəfindən ən yeni dünya və yerli filmlər nümayiş olunacaqdır. 3D texnologiyası, rəqəmsal kinoproyektorlar, müasir işıq və səs sistemləri filimləri yüksək keyfiyyətdə təqdim etməyə imkan verəcəkdir.

Baxış zamanı ümummilli lider Heydər Əliyevin həyat və fəaliyyətindən bəhs edən film nümayiş olunmuşdur.

Ali Məclisin Sədri kinoteatrda milli mentalitetimizə uyğun filimlərin nümayiş olunması, gənclərin asudə vaxtlarının səmərəli təşkili və keyfiyyətli xidmət göstərilməsi barədə tapşırıqlar vermişdir.

Oteldə 43 standart, 4 suit və 1 vip olmaqla 48 otaq vardır. Burada turistlərin rahatlığı üçün bütün lazımi şərait yaradılmışdır.

Meydanda konsert səhnəsi və fəvvarə qurulmuşdur. Saat qülləsində isə xidmət sahələri yaradılmış, kafe və mütaliə zalı istifadəyə verilmiş, kitablar qoyulmuş, "Oxunması zəruri olan kitablar"dan ibarət güşə yaradılmışdır. Bütün xidmət sahələri müasir soyutma, istilik, yanğından mühafizə və video-nəzarət sistemləri ilə təchiz olunmuş, ərazidə 100 yerlik dayanacaq yaradılmış, oturacaqlar qoyulmuş, dekorativ ağac və güllər əkilmişdir.

Naxçıvan Muxtar Respublikası
Mədəniyyət Nazirliyinin Mətbuat Xidməti
22.06.2019



İldə 70 milyon insanın oxuduğu Türkiyənin “Skylife” turizm jurnalında Naxçıvan haqqında geniş məqalə dərc edilib.

6 səhifədən ibarət olan “Mədəniyyətlər beşiyi Naxçıvan” adlı məqalənin mətni Büşnranur Kocaerə, şəkilləri isə Məsudə Bülbülə məxsusdur.

“Beş min illik şəhər mədəniyyəti olan Naxçıvan öz tarixi və təbii-turizm imkanları ilə unikal bir yerdir”,- yazan müəllif qədim şəhərin saf havasına diqqət çəkib. Məqalədə Naxçıvan şəhərinin görməli yerləri, zəngin tarixi abidələri, həmçinin müasir memarlıq nümunələrindən bəhs edilib. Hər addımda tarixin bir parçası ilə qarşılaşan müəllif şəhərdə sürətli inkişafın baş verdiyini qeyd edib, ən son texnoloji yeniliklərin istehsalatda geniş tətbiq edildiyini vurğulayıb. Naxçıvanın Nuh peyğəmbərin vətəni kimi tanındığını və Əshabi Kəhfin ziyarət və dini turizm baxımından yüksək imkanlara malik olduğunu qeyd edib.
Böyük İpək Yolunun mühüm bir hissəsi kimi xatırladılan Naxçıvanın məşhur qaymağı, müalicəvi balı və lavaşı, dərman bitkiləri, dağ pencərlərindən hazırlanan təbii yeməkləri də qonaqların diqqətindən yayınmayıb.

Məqalədə naxçıvanlıların qonaqpərvərliyindən, gənclər üçün yaradılan yüksək təhsil imkanlarından xüsusilə söhbət açılıb. Qədimliklə müasirliyin qovuşduğu Naxçıvanda Xan sarayı, Xalça muzeyi, Şərq hamamları, Came məscidi, Nuh Peyğəmbərin Məzarüstü türbəsi, Duzdağ, Möminə Xatın türbəsi və Naxçıvanqala ilə tanış olan müəlliflər oxuculara şəhərin tarixi barədə də ətraflı məlumat veriblər. Qeyd olunub ki, Naxçıvanqalada tez-tez keçirilən festivallar qədim diyara turist axınını sürətləndirib.

Müəlliflər yazıda Naxçıvanın müasir tikililərinə də diqqət çəkib, şəhərin heyrətamiz mənzərəsindən və kəndlərin inkişafından bəhs ediblər. Naxçıvanda fəaliyyət göstərən otel və digər turizm şəbəkələri barədə də məlumat verilib, Naxçıvana Asiya və Avropa ölkələrindən hansı nəqliyyat növləri və marşrutlarla gəlmək barədə turistləri məlumatlandırıblar.

Naxçıvan Muxtar Respublikası
Mədəniyyət Nazirliyinin Mətbuat Xidməti
22.06.2019



İyunun 21-də Culfa rayon mədəniyyət evləri dərnək üzvlərinin hazırladığı “O olmasın, bu olsun” tamaşası rayon mədəniyyət sarayında nümayiş etdirilib. Qeyd edək ki, bu dərnək üzvlərinin böyük bəstəkarımız Üzeyir Hacıbəyovun “Arşın mal alan” operettasından sonra hazırladığı ikinci tamaşadır.

“O olmasın, bu olsun” komediyası çox sadə süjetli, hər bir azərbaycanlının dönə-dönə baxdığı və hər dəfə baxanda gülüş doğuran nikbin və şən tamaşa kimi sevilir. Tamaşanın quruluşçu rejissoru Sahib Əliyev, tərtibatçı rəssamı Aidə İbrahimovadır.

Musiqili komediyanın baş qəhrəmanı Məşədi İbad (Sahib Əliyev) azərbaycanlı tamaşaçı üçün o qədər məşhurdur ki, onun adı gələndə hamının dodağı qaçır. Həm də bu obraz komediyanın bütün personajları ilə münasibətdədir. Onun düşüncəsi, hərəkəti, rəftarı, fikri, danışığı daim gülüş doğurur. Bu surəti Sahib Əliyev pula həris, cavan qızla evlənməyi özünə ar bilməyən bədii tip səviyyəsində təqdim etməyi bacarmışdır.­

Musiqili komediyanın başqa tipləri – Rüstəm bəy (Aqil Adilzadə), Həsənqulu bəy (Aqil Qələndərov), Qəzetçi Rza bəy (Nicat Hüseynov), Qoçu Əsgər (Elman Hacıyev), Həsən bəy (Emin Əliyev) Məşədi İbadı ifşa etsələr də, onu gülünc vəziyyətə salsalar da, əslində, özləri də gülüş hədəfidirlər.
Məşədi İbadı rüsvay edən Hambalın (Kəjdər Həsənov) halına acısaq da, gülürük. Dahiliyin sadəliyini, sadəliyin dahiliyini göstərən bu ölməz musiqili komediya dərnək üzvlərinin ifasında rəğbətlə qarşılandı. Səhnə sənətimizin incisi olan “O olmasın, bu olsun” musiqili komediyasında əsas aparıcı surətlər olan Gülnaz (Sura Məmmədli) və Sərvər də (Nazil Qulusoy) təbii və səmimi canlandırılır. Komediya müsbət surətlərin, xüsusilə Sərvərin ağıllı, zirək və cəsarətli, həm də gülməli tədbiri sayəsində Məşədi İbadın arzusuna zidd bir sonluqla bitir. Komediyadakı duetləri musiqiçilər Tahir Səmədov və Yaşar Hümbətov müşayiət etmişlər. Canlı ifa tamaşaçılar tərəfindən alqışlarla qarşılanmışdır.

Dəfələrlə səhnəyə qoyulan, kinofilmə çəkilən bu musiqili komediyanın peşəkar olmayan aktyorlar tərəfindən səhnə təcəssümü cəsarətli yaradıcılıq addımı hesab edilməlidir.

Tamaşa rayon sakinləri tərəfindən maraqla qarşılanmışdır.

“O olmasın, bu olsun” tamaşasına baxışdan sonra Naxçıvan Muxtar Respublikasının Mədəniyyət naziri Natəvan Qədimova və Culfa Rayon İcra Hakimiyyətinin başçısı Siyam Əliyev gənc teatr həvəskarları olan aktyorları təbrik etmiş, onlara yaradıcılıq uğurları arzulamışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
21.06.2019



Ordubad Rayon Tarix-Diyarşünaslıq Muzeyinə Ordubad rayonunun Nüsnüs kənd sakini Oruc Əliyev, Kotam kənd sakini Sevda Qulamova, Gənzə kənd sakini Fəlah Məmmədov, Düylün kənd sakini Tamilə Abdullayeva, Üstüpü kənd sakini Hikmət Orucov, Qoruqlar kənd sakini Sarvan Məmmədli tərəfindən qədim tariximiz və mədəniyyətimizi əks etdirən küpə, mis məişət əşyaları, daş əmək alətləri, xurcun və digər nümunələrdən ibarət 50-dən çox eksponat təqdim edilib.

Bu münasibətlə iyunun 20-də keçirilən tədbirdə çıxış edən Naxçıvan Muxtar Respublikasının Mədəniyyət naziri Natəvan Qədimova bildirib ki, muzeylər zamanın müxtəlif məqamlarını özündə yaşadan, qoruyan, saxlayan, öyrənən, nümayiş etdirən maddi-mənəvi xəzinədir. Muzey həm də tarixi keçmişə şahidlik edən, keçmişimizi və bu günümüzü gələcəyə çatdıran ən yaxşı bələdçidir. Muzeylərin əsas vəzifəsi əşyaların və eksponatların, sadəcə, qorunub öyrənilməsi deyil, həm də onu təbliğ etməkdən ibarətdir.

Muxtar respublikada muzey işinin inkişaf tarixindən danışan nazir diqqətə çatdırıb ki, XIX əsrin sonlarında böyük yazıçı və dramaturq Cəlil Məmmədquluzadə Nehrəm kənd məktəbində muzey yaratmaq təşəbbüsü ilə Xalq Məktəbləri İdarəsinə yazılı müraciət etmiş və Azərbaycanda ilk dəfə olaraq bu kənd məktəbində Naxçıvanın tarixinə dair maddi-mədəniyyət nümunələrinin toplandığı muzey yaratmışdır.

“Qədim diyarımızda muzeylərin fəaliyyətinin canlandırılması, yeni muzeylərin yaradılması sahəsində mühüm işlər görülür, bu mədəniyyət ocaqları muzeyşünaslığın yeni nailiyyətlərinə əsaslanaraq qurulur, Azərbaycan tarixinin yeni uğurlu səhifələri muzey ekspozisiyalarında əksini tapır” – deyən Natəvan Qədimova bildirib ki, Naxçıvan Muxtar Respublikası Ali Məclisi Sədrinin diqqət və qayğısı nəticəsində muxtar respublikada tarix-mədəniyyət abidələrinin qorunması, onların bərpası və konservasiyası son illər ərzində geniş vüsət almış, tariximizin və mədəniyyətimizin saxlanc yeri olan yeni-yeni muzeylər istifadəyə verilmiş, onların maddi-texniki bazası möhkəmləndirilmişdir.

Qeyd edilib ki, bu gün Naxçıvan Muxtar Respublikası Mədəniyyət Nazirliyinin tabeliyində 30 muzey və muzeytipli müəssisə fəaliyyət göstərir. Muxtar respublikanın muzeylərində xalqımızın tarixini, həyat tərzini, adət-ənənələrini özündə əks etdirən 140 mindən çox maddi-mədəniyyət nümunələri mühafizə olunaraq qorunub saxlanılır. Ötən il Naxçıvan Duz Muzeyi, Qarabağlar Türbə Kompleksi, Şərur Rayon Tarix-Diyarşünaslıq Muzeyi öz qapılarını ziyarətçilərinin üzünə açmışdır.

Nazir bildirib ki, son illər ərzində muzeyləri ziyarət edənlərin də sayı əhəmiyyətli dərəcədə artmış, buna görə muzey işçilərinin öhdəsinə daha böyük vəzifələr düşmüşdür. Naxçıvan Muxtar Respublikası Ali Məclisi Sədrinin 2014-cü il 19 dekabr tarixli “Muzeylərlə əlaqələrin daha da gücləndirilməsi haqqında” Sərəncamı isə muxtar respublikada dövlət orqanları işçilərinin muzeylərə kollektiv gedişinin təmin olunması ilə yanaşı, həm də qədim Oğuz yurdunun tarixi keçmişinin, mədəniyyətinin öyrənilməsində əhəmiyyətli rol oynayır. Naxçıvan Muxtar Respublikası Ali Məclisi Sədrinin “Naxçıvan Muxtar Respublikasının təhsil müəssisələrində elektron təhsilin təşkili ilə bağlı əlavə tədbirlər haqqında” 2014-cü il 20 iyun tarixli Sərəncamına əsasən bu gün muxtar respublikamızda olan muzeylərlə ümumtəhsil məktəbləri arasında distant dərslər təşkil olunur, həmçinin yetişməkdə olan gənc nəsil üçün açıq dərslər keçilir. Bu ilin yanvar-may ayları ərzində muzeylərdə 175 açıq və 11 distant dərs keçirilmişdir. 2019-cu ilin ilk 5 ayı ərzində muzeylərdə, ümumilikdə, tarixi və əlamətdar günlərlə bağlı 35 sərgi qurulmuş, 32 tədbir keçirilmişdir. Həmçinin muzey işçilərinin peşə biliklərinin artırılması məqsədilə 5 seminar-treninq keçirilmişdir. 2019-cu ilin ilk 5 ayı ərzində muxtar respublikanın muzeylərini 236 min 501 nəfər tamaşaçı ziyarət etmişdir ki, onlardan 64 min 989 nəfəri əcnəbi vətəndaşdır.

Diqqətə çatdırılıb ki, muxtar respublikada muzey fondlarının zənginləşdirilməsi, onların yeni eksponatlarla təmin olunması daim diqqət mərkəzində saxlanılır. Bu prosesdə muzeylərin əməkdaşları və muxtar respublika vətəndaşları yaxından iştirak edirlər. Ötən il muxtar respublika muzeylərinə 1564 ədəd yeni eksponat daxil olmuşdur. Bu ilin 5 ayı ərzində isə muzeylərə 1081 ədəd eksponat daxil olmuşdur. 2019-cu ilin may ayınadək, ümumilikdə, 7 eksponat təqdimatı keçirilmişdir ki, bu təqdimatlarda da xalqımızın tarixini özündə yaşadan maddi-mədəniyyət nümunələrini muzeylərə könüllü şəkildə təqdim edən vətəndaşlar yaxından iştirak etmişlər. Bu aksiyaya, sevindirici haldır ki, artıq yetişməkdə olan gənc nəsil – məktəblilər də qoşulmuşdur. Bu ilin yanvar ayında Şərur Rayon Tarix-Diyarşünaslıq Muzeyində və may ayında Heydər Əliyev Uşaq-Gənclər Yaradıcılıq Mərkəzində keçirilən eksponat təqdimatlarında Təhsil Nazirliyinin tabeliyində olan orta məktəblərin müəllim və şagirdlərinin də yaxından iştirakı olmuşdur.

Qeyd olunmuşdur ki, Ordubad Rayon Tarix-Diyarşünaslıq Muzeyində keçirilən növbəti tədbir də görülən işlərin ardıcıl nəticəsidir.

Natəvan Qədimova çıxışının sonunda mədəniyyətimizə, tariximizə göstərdiyi böyük diqqət və qayğıya görə Naxçıvan Muxtar Respublikasının Ali Məclisinin Sədrinə bu sahədə çalışan insanlar adından dərin minnətdarlıq edib və maddi mədəniyyət nümunələrini muzeyə təqdim etdiklərinə görə Oruc Əliyev, Sevda Qulamova, Fəlah Məmmədov, Tamilə Abdullayeva, Hikmət Orucov və Sarvan Məmmədliyə təşəkkür etmişdir.

Ordubad Rayon Tarix-Diyarşünaslıq Muzeyinin direktoru, Naxçıvan Muxtar Respublikasının Əməkdar mədəniyyət işçisi Vilayət Bağırov vətəndaşların təşəbbüsünü yüksək dəyərləndirib və bu eksponatların muzeyin zənginləşdirilməsinə xidmət etdiyini qeyd edib.

Eksponatları muzeyə təqdim edənlərdən Oruc Əliyev, Sevda Qulamova Fəlah Məmmədov çıxış edərək bildiriblər ki, bu gün muxtar respublikada maddi-mədəni irsimizin qorunub yaşadılması və gələcək nəsillərə çatdırılması sahəsində davamlı tədbirlər həyata keçirilir. Hər bir vətəndaş mədəni irsimizin qorunub yaşadılması üçün müəyyən töhfələr verməyə çalışır. Vətəndaşlar tərəfindən qədim məişət əşyalarının muzeylərə təqdim edilməsi bu mənada əhəmiyyətə malikdir. Bu eksponatları muzeylərimizə verilməsi zəngin mədəni irsimizin qorunub yaşadılmasına və gələcək nəsillərə çatdırılmasına xidmət edir. Muxtar respublikada maddi-mədəniyyət nümunələrinin toplanmasında bundan sonra da vətəndaşlarımız fəal iştirak edəcəklər.

Sonda muzeyin ekspozisiyasına baxış olub.

Naxçıvan Muxtar Respublikası
Mədəniyyət Nazirliyinin Mətbuat Xidməti
20.06.2019



İyunun 19-da “Xalq teatrlarının muxtar respublika festivalı – 2019” başa çatıb. Festivalın bağlanış günü Cəlil Məmmədquluzadə adına Naxçıvan Dövlət Musiqili Dram Teatrının səhnəsində Babək Rayon Xalq Teatrı tanınmış yazıçı və dramaturq Əfqan Əsgərovun “Qız atası” dörd pərdəli komediyası əsasında hazırlanmış tamaşanı teatrsevərlərə təqdim edib.

Tamaşadan əvvəl Naxçıvan Muxtar Respublikasının Mədəniyyət naziri Natəvan Qədimova çıxış edərək bildirib ki, Naxçıvan Muxtar Respublikası Ali Məclisi Sədrinin 2009-cu il 7 fevral tarixli “Naxçıvan Muxtar Respublikasında Xalq yaradıcılığı günlərinin keçirilməsi haqqında” Sərəncamına uyğun olaraq bir aya yaxın davam edən xalq teatrlarının növbəti muxtar respublika festivalına bu gün yekun vurulur.

O qeyd edib ki, Naxçıvan Muxtar Respublikasında peşəkar dövlət teatrları ilə yanaşı, xalq teatrlarının yaradılmasına və onların fəaliyyətinin günün tələbləri səviyyəsində qurulmasına daim ciddi diqqət yetirilir, kollektiv üzvlərinin səmərəli fəaliyyəti üçün hərtərəfli şərait yaradılır. Göstərilən yüksək diqqət və qayğının nəticəsidir ki, son illər xalq teatrlarının fəaliyyəti yeni yaradıcılıq axtarışları ilə zəngin olmuşdur. Ötən illər ərzində xalq teatrlarının səhnələşdirdikləri tamaşalar xalq teatrlarımızın səmərəli işlədiyini göstərməklə yanaşı ictimaiyyət tərəfindən maraqla qarşılanmışdır. Xalq teatrlarının fəaliyyətinə diqqət göstərilməsində məqsəd muxtar respublika sakinlərinin mədəni istirahətini təşkil etməklə yanaşı, həm də istedadlı insanların üzə çıxarılması, onların peşəkar teatra yönləndirilməsi və yeni aktyor nəslinin yetişdirilməsi olmuşdur. Həm də bir bölgədə xalq teatrının yaradılması və onun fəaliyyəti orada böyük bir mədəni hərəkatın vacibliyini şərtləndirir. Həmçinin, xalq teatrının üzvü olmuş hər bir istedadlı insan, ilk növbədə, milli mədəniyyətimizin daşıyıcısıdır.

Vurğulanıb ki, ötən illərdə olduğu kimi, bu il də “Xalq teatrlarının muxtar respublika festivalı – 2019” teatrsevərlər tərəfindən maraqla qarşılanmışdır. Təcrübə göstərir ki, xalq teatrlarının yeni tamaşalarla ictimaiyyət qarşısında çıxışları və festivallarda iştirakı kollektivlərin fəaliyyətini stimullaşdırmış, xalq teatrının hər bir üzvünün teatr sənəti sahəsindəki təcrübəsinin artması ilə nəticələnmişdir. Həmçinin, xalq teatrlarının muxtar respublikanın rayonlarına qastrol səfərlərinin təşkil olunması diyarımızda xalq teatrlarının qarşılıqlı təcrübə mübadiləsindən bəhrələnmələrinə də geniş imkanlar açmışdır. Keçirilən festival bir daha xalq teatrları kollektivlərində həvəskar aktyorların olduğunu göstərdi. Xalq teatrlarının kollektivləri gələcəkdə daha aktual, rəngarəng və maraqlı tamaşalarla çıxış edəcək, peşəkar teatr sənətimizə istedadlı sənət adamları qazandıracaqlar.

Nazir diqqətə çatdırıb ki, xalq teatrlarının muxtar respublika festivalında Naxçıvan Şəhər Xalq Teatrı, Babək Rayon Xalq Teatrı, Rza Təhmasib adına Şərur Rayon Xalq Teatrı, Kazım Ziya adına Ordubad Rayon Xalq Teatrı və Şahbuz Rayon Xalq Teatrı olmaqla, beş kollektiv iştirak etmişdir. Teatr kollektivlərinin ifasında Seyfəddin Dağlının “Adı sənin, dadı mənim”, Eynəli bəy Sultanovun “Sənəm”, Həsənəli Eyvazlının “Vəzifə hərisi”, Əbdürrəhim bəy Haqverdiyevin “Məşədi Qulam qiraət öyrənir” tamaşaları oynanılmış və bu gün - festivalın sonuncu günü Əfqan Əsgərovun “Qız atası” tamaşası teatrsevərlərə təqdim olunur.

Nazir xalq teatrlarının bütün kollektivlərini öz adından və festivalın tamaşaçıları adından uğurlu tamaşaları münasibətilə təbrik etmiş və onlara gələcəkdə repertuar zənginliyinə diqqət yetirməklə yeni gözəl tamaşalarla teatrsevərlər qarşısında uğurlu çıxışlar arzu etmişdir. Festivalda göstərilən tamaşaların muxtar respublikanın digər rayonlarında da göstərilməsi nəzərdə tutulur, - deyən nazir bildirmişdir ki, son illər xalq teatrlarında çalışanların əməyi də dövlətimiz tərəfindən yüksək qiymətləndirilməkdədir. Xalq teatrlarının aktyorları Azərbaycan Respublikasının və Naxçıvan Muxtar Respublikasının fəxri adlarına və Prezident mükafatlarına layiq görülmüşlər.

Nazir çıxışının sonunda mədəniyyətin inkişafına göstərilən yüksək diqqət və qayğıya görə Naxçıvan Muxtar Respublikası Ali Məclisi Sədrinə bütün mədəniyyət işçiləri adından minnətdarlığını bildirib, festivalda iştirak edən xalq teatrı kollektivlərinin üzvlərini təbrik edib, onlara uğurlar arzulayıb.

Tədbirdə nazir festivalda fəal iştiarak etdiklərinə görə xalq teatrlarına Mədəniyyət Nazirliyinin Fəxri fərmanlarını təqdim edib.

Sonra Əfqan Əsgərovun “Qız atası” tamaşası göstərilib. Qeyd edək ki, “Qız atası” komediyası müəllifin ən yaxşı pyeslərindən olmaqla bərabər teatrlarda ən çox oynanılan tamaşalardandır.

“Qız atası” komediyasının mövzusu ailə-məişət məsələlərinə həsr olunmuşdur. Tamaşanın əsas qəhrəmanı Cavad kişinin oğlu yoxdur. Dörd qız atası olan Cavad kişi taleyindən narazıdır, tez-tez əsəbiləşir. Cavad kişinin qızlarının hərəsi bir sənət sahibidir, anaları Pəri onlarla fəxr edir. Qızlarından Laçın bağça müdiridir, ikinci qızı Rəna paraşütçüdür. Cavad kişinin kiçik qızı Məryəm isə balerina, onun sevgilisi Heydər isə rəssamdır. Rənanı həm də əmisi oğlu Nəroğlan, Əhməd adlı bir həmkəndlisi də sevir. Cavad kişi isə qızlarını işgüzar, zəhmətkeş oğlanlara vermək istəyir. Cavad kişi bunun üçün bir oyun qurur. Tamaşa da bu komik oyun üzərinə qurulmuşdur. Bununla da gəncləri sınağa çəkmək istəyir. Tamaşada Cavad kişi, Pəri, Heydər, Məryəm, Kərəm, Rəna, Əhməd, Nəroğlan personajlarını Azərbaycan Respublikasının Əməkdar artisti Vidadi Rəcəbli, Stella Babayeva, Rasim Qasımov, Nuray Mehdiyeva, İsmayıl Qurbanov, Sunay Ağayev, Elsevər Məmmədov təbii və canlı təqdim etməklə sağlam gülüş yarada bilirlər.

Tamaşanın quruluşçu rejissoru Yusif Əliyev, rejissoru Azərbaycan Respublikası Əməkdar artisti Vidadi Rəcəbli, musiqi tərtibatçısı Cabir Məmmədovdur.

Tamaşa maraqla qarşılanmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
20.06.2019



İyunun 19-da Culfa Rayon Mədəniyyət Sarayında Naxçıvan Dövlət Filarmoniyasının Muğam studiyasının Naxçıvan Muxtar Respublikasının 95 illik yubileyinə həsr olunmuş konserti olub.

Qeyd edək ki, filarmoniyada Muğam studiyası uzun illərdir ki, fəaliyyət göstərir. Studiyanın tərkibində tanınmış xanəndələrlə yanaşı gənc muğam ifaçıları da bu sənəti yaşadır və təbliğ edirlər. Muğam studiyasına İlqar Hüseynov rəhbərlik edir. Muğam sənəti Azərbaycan xalqının bədii yaradıcılığını və musiqi mədəniyyətinin zəngin sərvəti olmaqla nadir sənət nümunəsidir. Muğam xalqımızın dünya mədəni irsinə bəxş etdiyi ən böyük xəzinədir. Muğam sənətimizdə xalqımızın təfəkkürü və düşüncə tərzi öz əksini tapır. Xalqımızın yaratdığı bu sənət nümunəsi zənginliyi, ucalığı, kamilliyi, müdrikliyi, hikməti, əbədiyaşarlığı ilə insanı düşündürür. Təsadüfi deyil ki, 2002-ci ildə UNESKO tərəfindən muğam sənəti bəşəriyyətin qeyri-maddi mədəni irsi reprezentativ siyahısına salınmışdır. Konsertdə əvvəlcə istedadlı müğənni Məhərrəm Quliyev “Şur” təsniflərini ifa etdikdən sonra Əlibaba Məmmədovun “Söylə” mahnısını səsləndirmişdir. Naxçıvan Muxtar Respublikasının Əməkdar artisti Xatirə Səfərova “Segah” təsnifllərini ifa etmişdir.

İstedadlı müğənnilər Bəhruz Quliyevin ifa etdiyi Qulu Əsgərovun “İlk eşqim” mahnısı və Nərmin Hüseynovanın səsləndirdiyi “Dilkeş” təsnifləri alqışlarla qarşılanmışdır.

Naxçıvan Muxtar Respublikasının Əməkdar artisti Zülfiqar Mahmudovun ifasında “Segah” təsnifləri də konsertə xoş əhval-ruhiyyə gətirmişdir.

Konsertdə xalq mahnıları ilə yanaşı, bəstəkar mahnıları da səslənmiş və tamaşaçılarda xoş ovqat yaratmışdır.

Naxçıvan Dövlət Filarmoniyasının Muğam studiyasının bir saatdan artıq davam edən konserti rayon sakinləri tərəfindən maraqla qarşılanıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
19.06.2019



İyunun 19-da Culfa Rayon Uşaq Musiqi Məktəbində Naxçıvan Muxtar Respublikasının Mədəniyyət Nazirliyinin təşkilatçılığı ilə “Kitabxanalar mədəni irsimizdir” adlı maarifləndirici tədbir keçirilib.

Tədbiri giriş sözü ilə Naxçıvan Muxtar Respublikası Mədəniyyət Nazirliyinin Mədəniyyət üzrə Elmi Metodiki Mərkəzinin direktoru Səyyar Məmmədov açaraq bildirib ki, tariximizi, mənəvi sərvətlərimizi qoruyub saxlayan, nəsildən-nəsilə ötürən mədəniyyət ocaqlarımızdan biri də kitabxanalarımızdır. Təhsil və mədəniyyət sisteminin ayrılmaz atributu, insanların bələdçisi olan kitabxanaların əhəmiyyətini, onun zəngin mədəni irsimizin gələcək nəsillərə çatdırmaq istiqamətindəki rolunu yüksək qiymətləndirən ulu öndər Heydər Əliyev bu sahəni daim diqqət mərkəzində saxlamış və ona xüsusi qayğı ilə yanaşmışdır. Bu diqqətin təzahürü olaraq Heydər Əliyev 27 iyul 1996-cı ildə “Azərbaycan Respublikasında kitabxana işinin vəziyyəti və onu yaxşılaşdırmaq tədbirləri haqqında” Sərəncam imzalamışdır. Ölkəmizdə 29 dekabr 1998-ci ildə “Kitabxana işi haqqında” Azərbaycan Respublikasının Qanununu qəbul etmiş, həmin qanunun tətbiqi ilə bağlı Heydər Əliyev 12 mart 2000-ci il tarixli Fərman imzalamışdır. Fərmanın ən mühüm cəhətlərindən biri budur ki, orada Azərbaycan xalqının uzun illərdən bəri yaradıb formalaşdırdığı kitabxana işi çox yüksək qiymətləndirilmişdir. “Kitabxana işi haqqında” qanunda bir sıra məsələlərlə yanaşı, kitabxanalarda iş prosesinin avtomatlaşdırılması, qiymətli nəşrlərin elektron daşıyıcılarına köçürülməsi, informasiya sisteminə qoşulması ön plana çəkilmişdir. Qəbul edilmiş qanun bu gün də ölkəmizdə kitabxana qanunvericiliyinin baza sənədi olaraq qalmaqdadır. Kitabxanalarımızın, kitabxanaçılarımızın hüquqlarının müdafiəsində, sosial problemlərinin həllində bu qanunun müddəaları müstəsna əhəmiyyət kəsb edir.

Gənc nəsildə vətənpərvərlik, torpağa bağlılıq, ləyaqət, mərhəmət, xeyirxahlıq kimi mənəvi dəyərlərin inkişafında kitab əvəzsiz xəzinədir. Naxçıvan Muxtar Respublikası Ali Məclisinin Sədri cənab Vasif Talıbovun 2017-ci il 28 avqust tarixli Sərəncamı ilə “Oxunması zəruri olan kitabların siyahısı”nın təsdiq edilməsi təkcə qədim diyarımızda deyil, ölkə ictimayyəti, tanınmış ziyalılar tərəfindən də rəğbətlə qarşılanmışdır. Siyahıda adları qeyd edilən kitablar yeniyetmə və gənclərin vətənpərvərlik tərbiyəsinə, tarixi keçmişə, milli kökə bağlılığına və siyasi dünyagörüşünün möhkəmləndirilməsinə, ailədə, ictimai mühitdə davranış qaydalarına yiyələnməsinə xidmət edir.

Tədbirdə “Kitabxanalar mədəni irsimizdir” mövzusu ilə M.S.Ordubadi adına Naxçıvan Muxtar Respublika Kitabxanasının şöbə müdiri Minayə Nəbisoy çıxış edərək muxtar respublikamızın kitabxanaları haqqında ətraflı məlumat vermişdir. Qeyd edilmişdir ki, son illər muxtar respublikamızda gedən abadlıq-quruculuq işləri bu sahəyə də təsirini göstərmiş, yeni kitabxanalar inşa olunmuş, bu mədəniyyət ocaqlarının kitab fondu zənginləşdirilmişdir.

Daha sonra tədbir iştirakçılarının sualları cavablandırılmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
19.06.2019



İyunun 18-də Şahbuz Rayon Xalq Teatrı Əbdürrəhim bəy Haqverdiyevin "Məşədi Qulam qiraət öyrənir" əsəri əsasında hazırladığı eyniadlı tamaşanı Ordubad Rayon Mədəniyyət Sarayında nümayiş etdirmişdir.

Kiçik həcmli bu pyesdə görkəmli dramaturq ötən əsrin əvvəllərindəki tacir və din adamlarının mənəvi-əxlaqi eybəcərliklərini ortaya qoymuşdur. Əslində özünü din adamı, tacir kimi qələmə verən Məşədi Qulam mənəvi cəhətdən şikəstdir. Rus qızı Nataşa ilə eşq sərgüzəşti yaşamaq adı ilə ailəsini aldadır. Məşədi Qulam qiraət öyrənmək adı ilə Nataşa ilə görüşür. Ailəsini, yaxınlarını aldadır ki, o əslində qiraət öyrənir, savadını artırır. Əslində isə öz pulunu, varını Nataşanın yolunda xərcləməyə hazırdır. Onun əxlaqi-mənəvi davranışı tamaşaçıda ikrah doğurur. Məşədi Qulam əslində ailəsini də aldatmaqla özü də pis vəziyyətdə qalır. Halbuki tamaşanın əvvəlində özünü mömin, dindar kimi göstərir. Tamaşanın finalında rüsvay olan Məşədi Qulam pis vəziyyətdə qalır. Arvadı Şahpəri onun “qiraət öyrənmək dərsini” ifşa edir. Tamaşada Şahpəri obrazı öz hüququnu bilən və bunun üçün mübarizə aparan azərbaycan qadını kimi diqqəti cəlb edir.

Bu kiçik pyesdə müəllif tacir zümrəsinin mənəvi-əxlaqi dünyasını tənqid edir. Bu zümrənin sözü ilə əməli düz gəlmir. Alıb-aldatmaq, yalan danışmaq, pula hərislik bu zümrəni aşındırmışdır. Tamaşadakı Cahangir, Mirzə Yusif, Məşədi Ramazan obrazları da o dövrün kaloritini yaratmaq baxımından maraqla qarşılanır.

Tamaşanın quruluşcu rejissoru Namiq Mehdiyev, rəssamı Səxavət Paşayev, musiqi tərtibatçısı Emin Hüseynovdur. Tamaşadakı Məşədi Qulam obrazını Elbəyi Qəhrəmanov, Şahpəri obrazını Səadət Abdinova, Cahangir obrazını Abbasəli Abbasov, Məşədi Ramazan obrazını Emin Hüseynov, Mirzə Yusif surətini Vahid Məlikov, Nataşa surətini İlahə Nəcəfova canlandırırlar. Obrazların təbii və canlı təqdimatı, səhnə əsərindəki hadisələrin və əsərin ideyasının olduğu kimi çatdırılması tamaşaçılar tərəfindən alqışlarla qarşılanıb.

Görkəmli dramaturqumuz Əbdürrəhim bəy Haqverdiyevin çox nadir hallarda səhnəyə qoyulan bu pyesinin tamaşaya qoyulması təqdirəlaiqdir. Çünki tamaşaçıların bir çoxu görkəmli dramaturqun iri həcmli pyesləri ilə tanış olsalar da, onun kiçik həcmli pyesləri ilə tanış deyillər. Bu mənada Şahbuz Rayon Xalq Teatrının hazırladığı tamaşa Ordubad rayon sakinləri tərəfindən maraqla qarşılanmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
19.06.2019



Xalq yaradıcılığı nümunələri milli-mənəvi dəyərlər sistemində xüsusi əhəmiyyət kəsb edir, gənc nəslin mənəvi tərbiyəsində mühüm rol oynayır. Bu nümunələr min illər boyu cilalana-cilalana dövrümüzə qədər gəlib çatıb. Naxçıvan Muxtar Respublikası Ali Məclisi Sədrinin “Naxçıvan Muxtar Respublikasında Xalq yaradıcılığı günlərinin keçirilməsi haqqında” 7 fevral 2009-cu il tarixli Sərəncamı muxtar respublikada belə dəyərlərin qorunmasına, təbliği və gələcək nəsillərə ötürülməsinə böyük dövlət qayğısının parlaq ifadəsidir. Sərəncama əsasən, müxtəlif tədbirlərin keçirilməsi davamlı xarakter alıb. Belə tədbirlər unudulmaqda olan folklor nümunələrimizin, milli adət-ənənələrimizin yenidən xalqımıza qaytarılmasında mühüm rol oynayır. Muxtar respublikamızın bütün bölgələrində xalq yaradıcılığının müxtəlif sahələrinə yeni həyat verilir. Xalq sənətinin və yaradıcılığının ağacişləmə, xalçaçılıq, papaqçılıq, dülgərlik, dəmirçilik, toxuculuq, zərgərlik, misgərlik sahələri ilə yanaşı, qədim rəqslərimiz, xalq oyunlarımız və mərasim tamaşalarımız yaşadılır”.

Bu fikirlər iyunun 18-də Naxçıvan Şəhər Mədəniyyət Şöbəsinin təşkilatçılığı ilə keçirilən ənənəvi “Xalq yaradıcılı günü” tədbirində səsləndirilib. Tədbirdə çıxış edən Naxçıvan Şəhər Mədəniyyyət Şöbəsinin müdiri Təranə Cəfərova və Naxçıvan Muxtar Respublikası Mədəniyyət Nazirliyi Mədəniyyət üzrə Elmi-Metodik Mərkəzin direktoru Səyyar Məmmədov vurğulayıblar ki, doğma diyarımız Naxçıvanda minilliklərboyu təşəkkül tapan adət-ənənələr, xalq yaradıcılığı örnəkləri, milli dəyərlər xalqımızın ən qiymətli sərvətidir. Naxçıvanlılar bu dəyərlərə həmişə böyük ehtiramla yanaşıb, onların qorunub-saxlanılmasını, təbliğini, gələcək nəsillərə ötürülməsini özlərinin vətəndaşlıq borcu sayıblar. Bu gün də həmin vəzifələr ehtiramla yerinə yetirilir. Qeyd edilib ki, bu sahədə görülən işlərin davamı olaraq Ali Məclis Sədrinin tapşırığına əsasən, AMEA Naxçıvan Bölməsi və Naxçıvan Muxtar Respublikası Mədəniyyət Nazirliyi yallı sənəti ilə bağlı tədqiqatlar aparıb, bu irsin YUNESKO səviyyəsində qorunması sahəsində tədbirlər həyata keçirib, “Şərur” Xalq Yallı Ansamblının fəaliyyəti və Naxçıvanda yallı sənəti ilə bağlı məlumatlar hazırlanıb aidiyyəti üzrə təqdim olunub. 2018-ci il 26 noyabr-1 dekabr tarixlərdə keçirilən YUNESKO-nun Qeyri-maddi mədəni irsin qorunması üzrə Hökumətlərarası Komitəsinin 13-cü sessiyasında qəbul edilən qərarla “Yallı (Köçəri, Tənzərə), Naxçıvanın ənənəvi qrup rəqsləri” YUNESKO-nun Təcili Qorunma Siyahısına daxil edilib. ədbirdə Naxçıvan Şəhər Mədəniyyət Şöbəsinin tabeliyində olan uşaq musiqi və incəsənət məktəblərinin müəllim və şagirdləri, eləcə də klub müəssisələrinin əməmkdaşları “Dili dili”, “Qara qaşın məsvəsi”, “Hər yetən gözələ gözəl demərəm” xalq mahnılarını “Bayatı şiraz təsnifi” və “Arazbarı” ritmik muğamlarını, “Tərəkəmə” və “Nazeləmə” rəqslərini, “Kərəm gözəlləməsi”, “Gözəlləmə”, "Qəhrəmanı" aşıq havalarını, “Cəngi”, “Azərbaycan ritmləri" kimi milli musiqi nömrələrini ifa ediblər. Kollektivlərin ifaları alqışlarla qarşılanıb.

“Xalq yaradıcılığı günü”ndə klub müəssisələrindəki toxuculuq dərnəyi üzvlərinin toxuma sənətinə aid nümunələri nümayiş olunub.

Naxçıvan Muxtar Respublikası
Mədəniyyət Nazirliyinin Mətbuat Xidməti
18.06.2019



Azərbaycanın Türkiyənin Qars şəhərindəki Baş Konsulluğunun təşkilatçılığı ilə Milli Qurtuluş Günü, Naxçıvan Muxtar Respublikasının 95-ci ildönümü, Respublika Günü və Azərbaycanın diplomatik xidmət orqanlarının 100 illik yubileyi münasibətilə Ərzurumda təntənəlim mərasim keçirilib.

Ərzurumun mərkəzində təşkil olunan mərasimdə bu şəhərin rəhbər şəxsləri, şəhərdə fəaliyyət göstərən Atatürk Universitetinin kollektivi, yerli ictimaiyyətin tanınmış simaları, ətraf vilayətlərdən gələn qonaqlar, QHT və KİV təmsilçiləri iştirak ediblər. Azərbaycanın Qarsdakı baş konsulu Nuru Quliyev Azərbaycan Xalq Cümhuriyyətinin tarixi və süqutu, diplomatik orqanlarımızın təsis edilməsi və keçdiyi yol, Naxçıvanın muxtariyyət statusunun qazanılması məsələlərindən danışıb. Ümummilli lider Heydər Əliyevin xilaskarlıq missiyasından bəhs edən natiq diqqətə çatdırıb ki, 15 iyun-Milli Qurtuluş Günü Azərbaycanın dövlətçilik tarixində yeni bir eranın başlanğıcıdır.

Açılışdan sonra “Şərur” Xalq Yallı Ansamblının möhtəşəm ifası iştirakçıların bayram ovqatın daha da yüksəldib.

Sonra iki qardaş ölkəyə həsr edilmiş rəsm sərgisinə baxış olub.

Naxçıvan Muxtar Respublikası
Mədəniyyət Nazirliyinin Mətbuat Xidməti
18.06.2019



Milli Qurtuluş günü Azərbaycanın dövlətçilik tarixində mühüm mərhələ təşkil edir. Ölkəmizin və xalqımızın bugünkü xoş və firavan həyatı Milli Qurtuluşun bəhrələridir.

İyunun 14-də Naxçıvan şəhərindəki Heydər Əliyev Sarayında Qara Qarayev adına Azərbaycan Dövlət Kamera Orkestrinin Milli Qurtuluş Gününə və ümummilli liderimiz Heydər Əliyevin ölkəmizə rəhbərliyinin 50 illiyinə həsr edilmiş konserti olmuşdur.

Naxçıvan Muxtar Respublikası Ali Məclisinin Sədri Vasif Talıbov konsertə baxmışdır.

Konsertdən əvvəl Naxçıvan Muxtar Respublikasının Mədəniyyət naziri Natəvan Qədimova çıxış edərək demişdir ki, ümummilli liderimiz Heydər Əliyevin Azərbaycan xalqı və dövləti qarşısındakı xidmətləri misilsiz və əvəzsizdir. Ulu öndərin 1969-cu il iyulun 14-də ölkəmizdə birinci dəfə hakimiyyətə gəlməsi Azərbaycanın inkişaf və tərəqqi, 1993-cü il iyunun 15-də xalqın tələbi ilə ikinci dəfə siyasi hakimiyyətə qayıdışı isə Milli Qurtuluş tarixinə çevrilmişdir. 15 iyun və 14 iyul tarixləri Azəbaycan xalqının həyatında xilaskarlıq və dönüş günləridir. Qara Qarayev adına Azərbaycan Kamera Orkestrinin bugünkü konserti də əlamətdar tarixi günlərə - 15 iyun Milli Qurtuluş Gününə və ümummilli liderimiz Heydər Əliyevin ölkəmizə rəhbərliyinin 50 illiyinə həsr olunmuşdur. Natəvan Qədimova orkestrin dirijoru, Azərbaycan Respublikasının Xalq artisti Yalçın Adıgözəlova və rəhbərlik etdiyi kollektivə dəvəti qəbul edib Naxçıvana gəldiklərinə görə təşəkkürünü bildirmişdir. Sonra konsert başlamışdır.

Azərbaycan Respublikasının Xalq artisti Fidan Hacıyeva, Əməkdar artistlər Anar Şuşalı, Gülyanaq Fərzəliyeva və Tural Nəcəfov görkəmli bəstəkarlarımız Üzeyir Hacıbəyovun, Müslüm Maqomayevin, Niyazinin, Tofiq Quliyevin, eləcə də Aqşin Əlizadənin, Nazim Quliyevin, dünya bəstəkarlarından Jorj Bizenin, Ernesto de Kurtisin əsərlərini, xalq mahnılarını məharətlə ifa etmişlər. Konsert alqışlarla ­qarşılanmışdır.

Ali Məclisin Sədri konsertdən sonra orkestrin üzvləri ilə görüşmüş, onları Milli Qurtuluş Günü və uğurlu konsert münasibətilə təbrik etmişdir. Orkestrin dirijoru, Azərbaycan Respublikasının Xalq artisti Yalçın Adıgözəlov və Xalq artisti Fidan Hacıyeva Ali Məclisin Sədrinə bayram təbriklərini çatdırmış, onlara göstərilən diqqətə görə minnətdarlıq ­etmişlər.

Sonra Ali Məclisin Sədri orkestrinin üzvləri ilə xatirə şəkli çəkdirmişdir.

Naxçıvan Muxtar Respublikası
Mədəniyyət Nazirliyinin Mətbuat Xidməti
15.06.2019



Naxçıvan Muxtar Respublikasında musiqi təhsilinin inkişafı və uşaq musiqi məktəblərinin şəbəkəsinin genişləndirilməsi daim diqqət mərkəzində saxlanılır. Hazırda muxtar respublikada 26 uşaq musiqi, incəsənət və bədii sənətkarlıq məktəbi fəaliyyət göstərir. Son illər 20-dən çox musiqi, incəsənət və bədii sənətkarlıq məktəbi üçün yeni binalar tikilmiş və ya yenidən qurularaq istifadəyə verilmişdir. Uşaq və yeniyetmələrin, gənclərin formalaşmasında, onların milli-mənəvi dəyərlər ruhunda tərbiyə olunmasında uşaq musiqi məktəblərinin üzərinə mühüm vəzifələr düşür.

Bu gün muxtar respublikanın uşaq musiqi, incəsənət və bədii sənətkarlıq məktəbləri arasında müsabiqələrin keçirilməsi, konsertlərin təşkili, istedadlı şagirdlərin solo konsertlərinin ictimaiyyətə təqdim olunması artıq ənənəyə çevrilmişdir.

Musiqi, incəsənət və bədii sənətkarlıq məktəblərində diqqəti cəlb edən cəhətlərdən biri də keyfiyyət dəyişikliyidir. Son illər musiqi sahəsi üzrə yeni ixtisasların açılması bunun göstəricisidir. Şagirdlərin yüksək səviyyədə təhsil alması üçün musiqi məktəblərində lazımi şərait yaradılmışdır.

Muxtar respublikanın uşaq musiqi məktəblərində hər il dərs ilinin başa çatması ilə əlaqədar hesabat konsertləri keçirilir. Hesabat konsertləri şagirdlərin yaradıcılıq potensialını göstərməsi üçün gözəl imkanlar açır. Hesabat konsertləri həm də uşaq musiqi məktəblərində tədrisin keyfiyyətinin göstəricisi kimi əhəmiyyətlidir.
2019-cu il iyun ayının əvvəlində start verilən uşaq musiqi, incəsənət və bədii sənətkarlıq məktəblərinin hesabat konsertləri artıq başa çatmışdır. Hesabat konsertləri muxtar respublikanın bütün rayonlarında fəaliyyət göstərən musiqi, incəsənət və bədii sənətkarlıq məktəblərində keçirilmişdir.

Hesabat konsertlərində Azərbaycan xalq musiqisi ilə yanaşı, bəstəkarlarımızın əsərləri də səslənmişdir. Konsertlərdə şagirdlər tədris ili ərzində öyrəndikləri dünya musiqisindən, aşıq havaları və muğamlarımızdan da nümunələr ifa etmişlər. Müəllimlərin və valideynlərin də iştirak etdiyi hesabat konsertləri maraqla qarşılanmışdır. Konsertlərdə istedadlı şagirdlərin ifaları xüsusilə yüksək qiymətləndirilmiş və müəllimlər şagirdlərə yay tətili günlərində də musiqi ilə məşğul olmaq üçün müəyyən tövsiyə və məsləhətlərini vermişlər.

Naxçıvan Muxtar Respublikası
Mədəniyyət Nazirliyinin Mətbuat Xidməti
15.06.2019



İyunun 13-də Şahbuz Rayon Mədəniyyət Sarayında Naxçıvan Musiqi Kollecinin “Gənclik” İnstrumental Ansamblının konserti olmuşdur.

Qeyd edək ki, Naxçıvan Musiqi Kolleci ümummilli lider Heydər Əliyevin təşəbbüsü və tapşırığı ilə 1974-cü ildə yaradılmışdır. Hazırda kollecdə 10-dan çox ixtisas üzrə kadr hazırlığı aparılır. Naxçıvan Muxtar Respublikası Ali Məclisi Sədrinin Sərəncamlarına əsasən bu təhsil ocağının 30 və 40 illik yubileyləri dövlət səviyyəsində qeyd olunmuşdur. Bu illər ərzində kollecdə milli musiqi alətlərimizin və xalq mahnılarımızın yaşadılması, eləcə də klassik və müasir dünya bəstəkarlarının öyrənilməsi, gənc musiqiçi kadrlarının yetişdirilməsi sahəsində uğurlar əldə edilmişdir. Kollecdə təhsil alan tələbələrdən ibarət musiqi kollektivləri maraqlı konsert proqramları ilə müntəzəm olaraq ictimaiyyət qarşısında çıxış edirlər. “Gənclik” İnstrumental Ansamblı maraqlı konsert proqramı ilə muxtar respublikada keçirilən festival, bayram şənliklərində müntəzəm çıxış edir. Ansamblın bədii rəhbəri Sahil Qasımovdur.
Konsert proqramında ilk olaraq ansamblın ifasında şən musiqi kompozisiyaları səslənmişdir. Ansamblın gənc solistləri Samir İsmayılov, Əfsanə Babayeva, İlkin İsmayılovun ifasında görkəmli bəstəkarlarımız Emin Sabitoğlunun “Al məndən”, Oqtay Rəcəbovun “İndi günah nə səndədir nə məndə”, Nüşabə Muradovanın “Dinlə məni sevgilim”, Ramiz Mirişlinin “Naxçıvan təranələri”, “Səadət”, Firəngiz Babayevanın “Gecə yaman uzundur”, Nəriman Məmmədovun “Qəlbimdə qaldı hicran”, Ələkbər Tağıyevin “Düz bir ildir”, “Sənin gülüşün”, “Dinə bilmədim”, mahnıları və başqa bəstəkarların musiqi əsərləri səslənmişdir. Sonra solistlər yeni bəstəkar mahnılarını da ifa etmişlər. Konsert şən və lirik musiqi kompozisiyası ilə başa çatmışdır.

Bir saatdan çox davam edən konsert Şahbuz rayon sakinləri tərəfindən maraqla qarşılanmış və onlarda xoş əhval-ruhiyyə yaratmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
13.06.2019



İyunun 12-də Heydər Əliyev Muzeyi ilə muxtar respublikanın ümumtəhsil məktəbləri arasında “Qurtuluşdan başlanan yol” mövzusunda interaktiv dərs keçilib.

Dərsdə AMEA-nın müxbir üzvü, tarix üzrə elmlər doktoru, professor Fəxrəddin Səfərli tərəfindən qeyd edilib ki, Azərbaycan Respublikası müstəqilliyini 1991-ci ildə bərpa etsə də, siyasi böhran, daxili və xarici pozucu qüvvələrin dövlətin əsaslarının sarsıdılmasına yönəlmiş məqsədyönlü fəaliyyəti, ayrı-ayrı bölgələrdə separatçılıq meyillərinin baş qaldırması, ağır sosial-iqtisadi vəziyyət ölkəni real vətəndaş qarşıdurması və öz müstəqilliyini itirmək təhlükəsi ilə üz-üzə qoymuşdu. Mövcud şəraitdə Ermənistanın təcavüzü və torpaqların işğalı respublikada vəziyyəti daha da gərginləşdirmişdi. Məhz belə bir taleyüklü məqamda Azərbaycan xalqı öz gələcəyini görkəmli dövlət xadimi Heydər Əliyevə etibar edib. Xalqın təkidli tələbi ilə Bakıya qayıdan dahi şəxsiyyət Heydər Əliyev 1993-cü il iyunun 15-də Azərbaycan Ali Sovetinin Sədri, həmin il oktyabrın 3-də Azərbaycan Respublikasının Prezidenti seçilib.

Beləliklə, 15 iyun Azərbaycan tarixinə “Milli Qurtuluş Günü” kimi daxil olub. Ulu öndərin xilaskarlıq missiyası nəticəsində Azərbaycanın dövlət müstəqilliyini təhdid edən proseslərin qarşısı alınıb və əsas diqqət dövlət quruculuğu məsələlərinə yönəldilib. Ümummilli lider Azərbaycanın çoxcəhətli inkişafı, beynəlxalq münasibətlər sistemində etibarlı tərəfdaşa çevrilməsi istiqamətində məqsədyönlü siyasət həyata keçirib.

Vurğulanıb ki, Azərbaycanın dövlət müstəqilliyinin qorunması və möhkəmləndirilməsi ulu öndər Heydər Əliyevin ideyalarının başlıca qayəsini təşkil edir. Ölkəmizdə həyata keçirilən siyasi kursun mahiyyətində məhz bu amil dayanır. Heydər Əliyev siyasətini layiqincə yaşadan Azərbaycan Respublikasının Prezidenti cənab İlham Əliyevin həyata keçirdiyi çoxşaxəli siyasi kurs Azərbaycanın dövlət müstəqilliyini daha da möhkəmləndirir.

Qeyd olunub ki, Heydər Əliyev ideyalarına sədaqət nümunəsi olan Naxçıvan bu gün gələcəyə daha böyük inamla addımlayır, yeni-yeni nailiyyətlər əldə edir, ictimai həyatın bütün sahələrində yüksək tərəqqiyə nail olur. Muxtar respublikada atılan hər bir addım, qəbul edilən hər bir qərar ictimaiyyət tərəfindən mütərəqqi təşəbbüs kimi qiymətləndirilir, cəmiyyəti düşündürən hər bir məsələdə Naxçıvan təcrübəsi nümunə kimi götürülür. Ulu öndərin göstərdiyi yolla qətiyyətlə irəliləyən Naxçıvan strateji hədəfləri uğurla reallaşdırır. Bütün bunların təməlində isə milli dövlətçiliyə sıx bağlılıq, yorulmaz fəaliyyət dayanır.

İnteraktiv dərsdə muzeyin direktoru Ramil Orucəliyev ümummilli liderimiz Heydər Əliyevin ictimai-siyasi fəaliyyəti, keçdiyi şərəfli həyat yolu ilə bağlı muzeydə qorunan nadir tarixi sənədlər, elmi nəşrlər və xatirə əşyaları haqqında şagirdlərə məlumat verib.

İnteraktiv dərs muxtar respublikanın 200-dən çox təhsil müəssisəsində izlənilib.

Naxçıvan Muxtar Respublikası
Mədəniyyət Nazirliyinin Mətbuat Xidməti
13.06.2019



İyunun 9-da Azərbaycan Respublikasının Təbrizdəki Baş Konsulluğu tərəfindən Azərbaycan Xalq Cümhuriyyətinin 101 illik yubileyi, 28 May – Respublika Günü və Azərbaycan Respublikası Diplomatik xidmət orqanlarının 100 illiyi münasibətilə rəsmi qəbul təşkil edilmişdir.

Azərbaycan Respublikası və İran İslam Respublikasının Dövlət himnləri səsləndirildikdən sonra Azərbaycan Respublikasının Təbrizdəki Baş konsulu Əliyənnağı Hüseynov çıxış edərək Azərbaycan Xalq Cümhuriyyətinin yaradılması və Azərbaycan Respublikası Diplomatik xidmət orqanlarının 100 illiyi barədə ətraflı məlumat vermişdir. Baş konsul demişdir ki, cəmi 23 ay yaşamasına baxmayaraq, Azərbaycan Xalq Cümhuriyyəti tarixi bir missiyanı yerinə yetirmiş, parlamentini və hökumətini, milli ordusunu, dövlət atributlarını yaratmışdır. Bildirilmişdir ki, 1919-cu il iyulun 9-da Azərbaycan Xalq Cümhuriyyətinin Xarici İşlər Nazirliyi yaradılmış, xarici ölkələrdə diplomatik nümayəndəlikləri təsis edilmiş, Bakıda 16 xarici dövlətin, o cümlədən İranın diplomatik nümayəndəliyi fəaliyyət göstərmişdir.

Baş konsul ötən əsrin sonlarında xalqımızın ikinci dəfə müstəqillik qazandığını və bu zaman üzləşdiyi çətinlikləri diqqətə çatdırmış, ümummilli liderimiz Heydər Əliyevin rəhbərliyi ilə Naxçıvanda müstəqil dövlətçiliyimizin əsaslarının yaradıldığını qeyd etmişdir. Diqqətə çatdırılmışdır ki, dahi şəxsiyyət xalqın təkidli tələbi ilə yenidən siyasi hakimiyyətə qayıtdıqdan sonra ölkəmiz düşdüyü bəlalardan xilas olmuş, Azərbaycanın dövlət müstəqilliyi qorunub saxlanılmış və əbədi xarakter almışdır. Bu gün ölkə Prezidentinin rəhbərliyi ilə Azərbaycan sürətlə inkişaf edir.

Şərqi Azərbaycan Vilayətinin ostandarı Məhəmmədrza Pur­məhəmmədi çıxış edərək İran İslam Respublikasının Azərbaycan Respublikasının müstəqilliyini rəsmi şəkildə tanıyan ilk ölkələrdən olduğunu bildirmişdir. Ölkələrimiz arasındakı dərin dostluq əlaqələrinə toxunan ostandar ötən 6 il ərzində iki ölkənin prezidentlərinin 12 dəfə görüşdüyünü, müxtəlif səviyyələrdə 100 görüş keçirildiyini, 30-a yaxın əməkdaşlıq sənədinin imzalandığını vurğulamışdır. Məhəmmədrza Purməhəmmədi yeni əməkdaşlıq imkanlarının yaradılması vasitəsilə ikitərəfli əlaqələrin möhkəmləndirilməsinin əhəmiyyətli olduğunu diqqətə çatdırmışdır.

Çıxışlardan sonra “Əbədi ezamiyyət” sənədli filmindən hissələr və Naxçıvan Muxtar Respublikasının 95 illik yubileyi ilə bağlı videoçarx nümayiş olunmuşdur. Həmçinin cari ildə Naxçıvan Muxtar Respublikasının 95 illik yubileyinin qeyd olunduğu barədə tədbir iştirakçılarına ətraflı məlumat verilmiş, ziyafət təşkil olunmuşdur. Naxçıvan Dövlət Filarmoniyasının üzvləri konsert proqramı ilə çıxış etmiş, rəmzi yubiley tortu kəsilmişdir.

Rəsmi qəbulda Təbriz şəhrdarı İrəc Şəhinbaher, Şərqi Azərbaycan Vilayətinin mədəniyyət və islami irşad idarəsinin rəhbəri Məhəmməd Məhəmmədpur, Təbriz Universitetinin rektoru Mir Rza Məcidi, Təbriz Şəhər Şurasının üzvü və Vəliəsr Beynəlxalq Xəstəxanasının rəisi Şəhram Dəbiri Oskuyi, İran Xarici İşlər Nazirliyinin Şimal-Qərb Nümayəndəliyinin rəhbəri Əkbər İsazadə və nümayəndəliyin əməkdaşları, Türkiyə Respublikasının Təbrizdəki Baş konsulu, Təbrizdə yaşayan Azərbaycan Respublikası vətəndaşları və ictimaiyyət nümayəndələri iştirak etmişlər.

Naxçıvan Muxtar Respublikası
Mədəniyyət Nazirliyinin Mətbuat Xidməti
13.06.2019



Naxçıvan Muxtar Respublikası Ali Məclisi Sədrinin 2009-cu il 7 fevral tarixli “Naxçıvan Muxtar Respublikası Xalq yaradıcılığı günlərinin keçirilməsi haqqında” Sərəncamına uyğun olaraq 22 mayda start verilən xalq teatrlarının muxtar respublika festivalı davam edir. İyunun 12-də Rza Təhmasib adına Şərur Rayon Xalq Teatrı Eynəli bəy Sultanovun “Sənəm” adlı iki hissəli vodevili əsasında hazırladığı festivalın üçüncü tamaşasını nümayiş etdirmişdir.

Qeyd edək ki, Şərur Rayon Xalq Teatrı 1981-ci ildə yaradılmışdır. Kollektivin son illərdə hazırladığı “Yuxu”, “Dələduz”, “Müsyo Jordan və Dərviş Məstəli şah”, “Ac həriflər”, “Motsart və Salyeri”, “Ev tərbiyəsinin bir şəkli”, “Varlı qadın” və başqa tamaşalar ictimaiyyət tərəfindən maraqla qarşılanmışdır.

Eynəli bəy Sultanovun ilk qələm təcrübəsi olan “Sənəm” əsərində saf və təmiz məhəbbəti, sədaqəti hər şeydən üstün tutan azərbaycanlı qızı Sənəmin real obrazı yaradılmışdır. Müəllifin də fikrincə, pyesin məzmunu bir qədər nağılvari olsa da, real həyatdan götürülmüşdür. Tamaşada Sənəm (İlkanə Cavadova) adlı diribaş, fərasətli, bir qədər də şair təbiətli azərbaycanlı qızını görürük. Öz iradəsi ilə o, Ağa Şərif adlı gənclə xoşbəxt həyat sürməkdədir. Həsənəli bəyin (Azərbaycan Respublikasının Əməkdar artisti Neymət Sultanov) bu xoşbəxt ailənin adını ləkələmək cəhdinə qarşı Sənəm ona ibrət dərsi verir. Həsənəli bəy qadınlarda vəfa, sədaqət duyğularını qiymətləndirməyi bacarmayan, cılız hislərlə yaşayan, ömrünün müəyyən hissəsini Rusiyada və Avropada yaşamış bir şəxsdir. Həsənəli bəy həm də lovğa, yüngülbeyin bir adamdır. Sənəmin qurduğu bu “qorxulu komediya”da ona qulluqçu Pəri (Sevinc Qasımova) yaxından köməklik edir. Sənəm isə baş verən hadisələri saf-çürük etməyi bacaran, köhnə həyat tərzindən xoşu gəlməyən azərbaycanlı qızıdır. Qurduğu “qorxulu komediya”nın nə ilə başa çatacağını fikirləşir və düzgün nəticə çıxarır. Pyesdə əsas konflikt də bu iki surət arasında gedir.

Tamaşanın əsas obrazı olan Sənəm öz diribaş hərəkətləri ilə diqqəti cəlb edir. Öz hüququnu gözəl bilən Sənəm xoş ovqat yarada bilir. Tamaşanın Nisə qarı (Azərbaycan Respublikasının Əməkdar mədəniyyət işçisi Kimya Babayeva), qulluqçu Əliqulu (Məhərrəm Əbilsoy) da hadisələrdən kənarda qalmamaqla təbii və səmimi görünürlər.

Tamaşanın quruluşçu rejissoru Nəsimi Məmmədzadə, rejissoru Neymət Sultanov, rəssamı və musiqi tərtibatçısı Neymət Sultanovdur. Görkəmli bəstəkarımız Rauf Hacıyevin oynaq musiqisi komik tamaşanın məzmunu ilə uyğunluq yaradır.

Qeyd edək ki, xalq teatrlarının muxtar respublika festivalı iyunun 19-da Babək Rayon Xalq Teatrının yazıçı-dramaturq Əfqan Əsgərovun “Qız atası” pyesi əsasında hazırladığı tamaşa ilə başa çatacaqdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
13.06.2019



İyunun 12-də Naxçıvan Dövlət Filarmoniyasının Estrada Orkestrinin Babək Rayon Mədəniyyət Sarayında Naxçıvan Muxtar Respublikasının yaradılmasının 95 illik yubileyi ilə bağlı konserti olub.

Qeyd edək ki, Naxçıvan Muxtar Respublikası Ali Məclisinin Sədri 21 yanvar 2019-cu il tarixli Sərəncamı ilə Naxçıvan Muxtar Respublikasının 95 illiyinə həsr olunmuş “Tədbirlər Planı”nı təsdiq etmişdir. Naxçıvan Muxtar Respublikasının musiqi kollektivləri də muxtar respublikanın 95 illiyinə həsr olunmuş bu tədbirlərdə fəal iştirak edirlər.

Naxçıvan Muxtar Respublikası Ali Məclisi Sədrinin 2012-ci il yanvarın 10-da imzaladığı Sərəncam ilə yaradılan bu musiqi kollektivi qısa vaxtda estrada həvəskarlarının rəğbətini qazanıb. Kollektiv rəngarəng repertuarı ilə ictimaiyyət qarşısında müntəzəm çıxış etməkdədir. Orkestrin bədii rəhbəri və baş dirijoru Azərbaycan Respublikasının Əməkdar mədəniyyət işçisi Nizami Məmmədovdur. Estrada orkestri yarandığı gündən repertuar zənginliyinə xüsusi diqqət yetirir. Orkestrin repertuarında Azərbaycan bəstəkarları ilə yanaşı, Avropa və rus bəstəkarlarının musiqi əsərlərinə də geniş yer verilir. Konsertə Elvin Əliyarov dirijorluq etmişdir və proqram Azərbaycan Respublikasının Əməkdar artisti Mübariz Əsgərovun ifasında Oqtay Kazıminin “Toy olsun, bayram olsun” mahnısı ilə başlamışdır.

Daha sonra filarmoniyanın solistləri Samir İsmayılov, Ruhiyyə Hüseynova, İlkin Abdullayev, Mübariz Əsgərovunun ifasında Azərbaycan bəstəkarlarının şən və lirik mahnıları səslənmişdir.

Konsert proqramında ifa olunan Tofiq Quliyevin “Qurban olum”, “Arzular”, Oqtay Kazıminin “Yaşayır insan”, “Taleyim”, Ramiz Mirişlinin “Bir xumar baxışla”, “Səadət”, Emin Sabitoğlunun “Şirin dil”, “Sən bağışladın”, “Ötən günlərim” adlı mahnılar dinləyicilərdə xoş ovqat yaratmışdır.

Konsertdə estrada mahnıları ilə bərabər dünya musiqisinin böyük sənətkarlarının rəqs melodiyaları da səsləndirilimişdir.

Konsert İlkin Abdullayevin ifasında Tofiq Quliyevin “Zibeydə” mahnısı ilə sona çatmışdır.

Naxçıvan Dövlət Filarmoniyasının Estrada Orkestrinin bir saatdan artıq davam edən konsert proqramı rayon sakinlərinə xoş ovqat bəxş etmişdir.

Naxçıvan Muxtar Respublikası
Mədəniyyət Nazirliyinin Mətbuat Xidməti
12.06.2019



İyunun 12-də Naxçıvan Şəhər Uşaq Musiqi və İncəsənət Məktəbində məktəbin rəsm ixtisası üzrə müəllimi Gülnarə Hüseynova və şagirdlərinin rəsm işlərindən ibarət sərgi təşkil olunub.

Tədbirdə çıxış edən Naxçıvan Şəhər Uşaq Musiqi və İncəsənət Məktəbinin direktoru Elşən Xəlilov bildirib ki, hazırda məktəbdə 22 şagird rəsm ixtisası üzrə təhsil alır. Bugünkü sərgidə 80-ə qədər əl işi və rəsm nümayiş etdirilir. Belə sərgilərin keçirilməsi uşaqların estetik zövqünün formalaşmasında, onların bu sənətə istiqamətləndirilməsində əhəmiyyətli rol oynayır.

Naxçıvan Muxtar Respublikasının Mədəniyyət naziri Natəvan Qədimova tədbirdə çıxış edərək yeni sərginin açılışı münasibətilə müəllim və şagirdləri təbrik edib. Bildirilib ki, qədim diyarımızda mədəniyyət və incəsənətin bütün sahələri kimi təsviri incəsənətimizə də böyük diqqət və qayğı göstərilir. Muxtar respublikamızda Rəssamlar Birliyi, Naxçıvan Dövlət Rəsm Qalereyası, Bəhruz Kəngərli Muzeyi fəaliyyət göstərir, 3 uşaq incəsənət məktəbində rəsm ixtisası tədris olunur. 2012-ci ildən başlayaraq muxtar respublikamızda iki ildən bir “Naxçıvan - bəşəriyyətin beşiyi” beynəlxalq rəsm festivalı keçirilir. Festivalda Naxçıvan, Azərbaycan rəssamları ilə yanaşı, xarici ölkələrin fırça ustaları da işirak edirlər. Naxçıvan Muxtar Respublikası Rəssamlar Birliyinin yeni binasının istifadəyə verilməsi, Naxçıvan şəhərində Bəhruz Kəngərli Muzeyinin yaradılması, rəssamın adını daşıyan Rəssamlar Parkının istifadəyə verilməsi, onun abidəsinin ucaldılması bu sahəyə göstərilən diqqət və qayğının ifadəsidir.

Muxtar respublikamızda uşaqların, gənc rəssamların təhsili və formalaşdırılması da diqqətdə saxlanılır. Muxtar respublikanın uşaq incəsənət məktəblərində keçirilən ustad dərslər, müsabiqələr balaca rəssamlarda bu sənətə marağı daha da artırır. Naxçıvan Muxtar Respublikası Mədəniyyət Nazirliyi və Təhsil Nazirliyi tərəfindən orta ümumtəhsil məktəbləri arasında keçirilən “Naxçıvan - doğma yurdum” mövzusuna həsr olunmuş rəsm müsabiqəsi muxtar respublikanın bütün məktəblərini əhatə etmişdir. Yeni dərs ilində də bu tədbirlər davam etdiriləcəkdir.

Nazir qeyd edib ki, şagirdlərdən muxtar respublikamızın tarixinə, islam-türk memarlıq abidələrinə maraq oyatmaq onların rəsmlərində də öz əksini tapır. Mənəvi sərvətlərə, sənət əsərlərinə, təbiət gözəlliklərinə şagirdlərdə maraq və məhəbbət oyatmaq onlara həm də geniş mövzu rəngarəngliyi verir.

Bildirilib ki, milli mədəniyyətimiz və incəsənətimizlə yanaşı, uşaqları dünya mədəniyyəti və dünya xalqlarının yaratdığı bədii sənət əsərləri, təsviri incəsənət nümunələri ilə tanış etmək əsas məsələlərdəndir. Uşaqlara rəngkarlıq, qrafika və heykəltaraşlıq sənətinin janrlarını, işləmə texnikasını, alətlərdən və materiallardan necə istifadə etmək üsullarını da öyrətmək vacib məsələlərdəndir. Təsviri incəsənətin əsasını təşkil edən rəssam fikrinin və hislərinin, təsəvvürlərinin və ətraf aləmə münasibətinin obrazlı ifadəsini də şagirdlərə izah etmək vacibdir.

Nazir mədəniyyətimizə və incəsənətimizə göstərilən diqqət və qayğıya görə Naxçıvan Muxtar Respublikasının Ali Məclisi Sədrinə təbrik iştirakçıları adından minnətdarlığını bildirib.

Sonra nazir rəsm ixtisası üzrə fərqlənən şagirdlərə hədiyyələr təqdim edib.

Tədbirdə çıxış edən Moskvadakı Azərbaycan Mədəniyyət və Təhsil Mərkəzinin rəhbəri, Azərbaycan Respublikasının Əməkdar incəsənət xadimi Qorxmaz Axundov balaca fidanların rəsmlərindən zövq aldığını bildirib və qeyd edib ki, Moskvada yaşayan bir naxçıvanlı kimi hər dəfə qədim diyara gələndə böyük qürur duyuram. Naxçıvanda gedən quruculuq və abadlıq işləri məni sevindirir. Vətəndən uzaqda yaşasam da, buradakı mədəniyyət və incəsənət yenilikləri bizi daim maraqlandırır. Naxçıvanda gördüklərimi Moskvadakı dostlarımla paylaşacağam.

Naxçıvan Şəhər Uşaq Musiqi və İncəsənət Məktəbinin rəsm ixtisası üzrə müəllimi, Prezident mükafatçısı Gülnarə Hüseynova çıxış edərək sərgidə nümayiş etdirilən əl işləri haqqında məlumat verib. Bildirib ki, bu sərgidə onun əl işləri ilə bərabər şagirdlərinin də əl işlərinin nümayiş etdirilməsi bir müəllim kimi onda iftixar hissi yaradır. O, sərgi iştirakçılarına öz minnətdarlığını bildirib.

Sonra sərgiyə baxış olub. Sərgidə qədim diyarımızın tarixi abidələri, təbiəti və bu günkü həyatı, şagirdlərin nağıl dünyası ilə bağlı əl işləri tamaşaçılar tərəfindən maraqla qarşılanıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
12.06.2019



İyunun 12-də Naxçıvan “Gənclər Mərkəzi”ndə “Yaşa və öyrən” intellektual oyununun ilk turu keçirilib.

Oyun başlamazdan əvvəl Naxçıvan Muxtar Respublikası Mədəniyyət nazirliyinin aparıcı məsləhətçisi Elvin Əhmədov çıxış edərək bildirmişdir ki, ilk dəfə keçirilən “Yaşa və öyrən” intellektual oyununda rayon (şəhər) mədəniyyət şöbələrinin nəzdində fəaliyyət göstərən kitabxana, mədəniyyət evi, klub, muzey və başqa mədəniyyət müəssisələrindən komandalar iştirak edirlər.

Qeyd edilib ki, Mədəniyyət Nazirliyinin təşkilatçılığı ilə keçirilən bilik yarışının məqsədi mədəniyyət müəssisələrində çalışan gənc əməkdaşların intellektual səviyyəsinin yüksəldilməsinə köməklik göstərməkdir. Bilik yarışı Naxçıvan, Azərbaycan və dünyanın mədəniyyət, incəsənət, folklor, ədəbiyyat, tarix, coğrafiya, musiqi, teatr, kino və başqa sahələri əhatə edən suallar əsasında keçiriləcəkdir.

Bildirilib ki, oyun üç hissədən, hər bir hissə isə, öz növbəsində beş mərhələdən (mövzudan) ibarətdir. Kimin hansı sualı cavablandıracağını komandalar özləri müəyyənləşdirəcəkdir.

Qeyd edilib ki, yarışın seçim turunun I mərhələsində rayon (şəhər) mədəniyyət şöbələrinin nəzdində fəaliyyət göstərən kitabxanalar üzrə Naxçıvan şəhərindən “Nəqşi-cahan”, Şərur rayonundan “Hədəf”, “Nirvana”, Babək rayonundan “Liman”, “Nuh yurdu”, Ordubad rayonundan “Güznüt”, “Ulduz”, Culfa rayonundan “Ümid”, “Şəms”, Kəngərli rayonundan “Kəngərlilər”, Şahbuz rayonundan “Batabat” və Sədərək rayonundan “Oğuzlar” komandaları olmaqla ümumilikdə 12 komanda iştirak edəcəkdir.

Maraqlı və gərgin keçən “Yaşa və öyrən” intellektual bilik yarışının I mərhələsində “Nəqşi-cahan” və “Ümid” komandaları final mərhələsində iştirak etmək hüququ qazanıblar.

Naxçıvan Muxtar Respublikası
Mədəniyyət Nazirliyinin Mətbuat Xidməti
12.06.2019



İyunun 12-də Naxçıvan Muxtar Respublikası Mədəniyyət Nazirliyinin təşkilatçılığı ilə Naxçıvan Dövlət Xalça Muzeyində “Milli-mədəni irsimizin təbliğində muzeylərin rolu” mövzusunda muzey əməkdaşları üçün seminar-treninq keçirilib.

Nazirliyin sisteminə daxil olan muzeylərin əməkdaşlarının iştirak etdiyi tədbirin məqsəd və əhəmiyyətindən danışan nazirliyin baş məsləhətçisi Qumral Əsədova giriş sözü ilə çıxış edərək bildirib ki, muxtar respublikada müxtəlif profilli muzeylər fəaliyyət göstərir. Muzeylərə bu gün xüsusi diqqət göstərilir, onların maddi-texniki bazası gücləndirilir, əməkdaşların peşəkarlıq səviyyəsi yüksəldilir. Naxçıvan Muxtar Respublikası Ali Məclisi Sədrinin “Muzeylərlə əlaqələrin daha da gücləndirilməsi haqqında” 2014-cü il 19 dekabr tarixli Sərəncamından sonra muzeylərin ziyarətçilərinin sayında əhəmiyyətli dərəcədə artım müşahidə olunur.

Qeyd olunub ki, keçirilən seminar-treninqlərdə muzey əməkdaşları vəzifə funksiyalarını dərindən öyrənməyə səy göstərməklə yanaşı, muzey işi haqqında ətraflı məlumat əldə etmiş olurlar. Eyni zamanda, seminar-treninqlər muzey işçilərinin muxtar diyarımızın bütün bölgələrində yerləşən muzeylərlə tanış olmalarına şərait yaratmaq baxımından da əhəmiyyətlidir. Belə tədbirlərdə muzey əməkdaşlarına bu sahədə həyata keçirilən yeniliklərdən söhbət açılır, onların sualları cavablandırılır. Vurğulanıb ki, Naxçıvan Muxtar Respublikasında da muzeylərin fəaliyyətinin canlandırılması, yeni muzeylərin yaradılması sahəsində mühüm işlər görülür, bu mədəniyyət ocaqları muzeyşünaslığın yeni nailiyyətlərinə əsaslanaraq yaradılır, Azərbaycan tarixinin yeni uğurlu səhifələri muzey ekspozisiyalarında əksini tapır. Ötən il muxtar respublikanın muzeylərinə 1564 eksponat daxil olmuşdur. Muzey fondlarının zənginləşdirilməsi diqqət mərkəzində saxlanılır. Bu ilin 5 ayında muzeylərimiz 1081 yeni eksponatla zənginləşdirilmişdir.

Tədbirdə Naxçıvan Dövlət Xalça Muzeyinin elmi işçisi Xavər Məmməd “Muzeylərdə çalışan gənclərin maddi-mədəni irsimizin təbliğində rolu” mövzusunda çıxış edərək bildirmişdir ki, muzey işçiləri bu sahədə mühüm rol oynamalıdırlar. Gənc muzey işçiləri maddi-mədəni irsimizin tarixini mükəmməl bilməli, xalqımızın çoxəsrlik mədəniyyətinə bələd olmalı və təbliğat üsulunu düzgün seçməlidir. Maddi-mədəni irsimizin təbliğində gənclər sosial şəbəkələrdən də geniş istifadə etməlidirlər.

Tədbir iştirakçıları mövzu ilə bağlı müzakirə aparmış və muzeyin ekspozisiyasına da baxmışlar.

Naxçıvan Muxtar Respublikası
Mədəniyyət Nazirliyinin Mətbuat Xidməti
12.06.2019



İyunun 11-də Naxçıvan Dövlət Filarmoniyasının Xalq Çalğı Alətləri Orkestrinin Şərur Rayon Mədəniyyət Sarayında Naxçıvan Muxtar Respublikasının yaradılmasının 95 illiyinə həsr olunmuş konserti olmuşdur.

Qeyd edək ki, Naxçıvan Dövlət Filarmoniyasının Xalq Çalğı Alətləri Orkestri filarmoniya yaradılarkən onun tərkibində fəaliyyətə başlayan ilk orkestrlərdən biri olmuşdur. Kollektivin tanınmış müğənni və xanəndələrinin ifalarını musiqisevərlər həmişə rəğbətlə qarşılayırlar. Orkestrin bədii rəhbəri Azərbaycan Respublikasının Əməkdar artisti Elman Əliyevdir.

Orkestr konsertə görkəmli bəstəkarımız Tofiq Quliyevin “Qaytağı” melodiyası ilə başlayıb. Müğənnilərdən İlkin Abdullayev Asəf Zeynallının “Ölkəm” romansını, Üzeyir Hacıbəyovun “Sevgili canan” romansını, “Koroğlu” operasından Koroğlunun ariyasını ifa etdikdən sonra isdedadlı müğənni Nərmin Hüseynova Tofiq Əhmədov, Emin Sabitoğlunun “Güldür məni”, “Sən olmusan” mahnılarını səsləndirmişdir.

Naxçıvan Muxtar Respublikasının əməkdar artistləri Azər Cəfərli, Hünər Əliyev, isdedadlı müğənni Ruhiyyə Hüseynova Fikrət Əmirov, Səid Rüstəmov, Oqtay Kazimi, Hacı Xanməmmədov, Nəriman Məmmədov, Şəfiqə Axundova, Rəşid Məmmədov və başqalarının mahnılarını səsləndirmişlər.

Müğənnilərin ifasında Azərbaycanı və Naxçıvanı tərənnüm edən “Azərbaycan elləri”, “Vətənim Azərbaycan”, “Doğma Naxçıvan” mahnıları alqışlarla qarşılanmışdır.

Xalq Çalğı Alətləri Orkestrinin konsertində Azərbaycan bəstəkarlarının rəqs musiqiləri də ifa edilmişdir.

Bir saatdan artıq davam edən konsert rayon sakinlərində xoş ovqat yaratmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
11.06.2019



İyunun 10-da Babək Rayon Uşaq Musiqi Məktəbində Naxçıvan Muxtar Respublikası Mədəniyyət Nazirliyinin təşkilatçılığı ilə “Müasir gənclik və mədəniyyətimiz” devizi altında “Azərbaycan mədəniyyətinin təbliğində gənclərin rolu” mövzusunda dəyirmi masa keçirilib.

Tədbirdə giriş sözü ilə çıxış edən nazirliyin aparıcı məsləhətçisi Elvin Əhmədov bildirib ki, ölkəmizdə gənclər siyasətinin əsası ümummilli lider Heydər Əliyev tərəfindən qoyulmuşdur. Ulu öndər sağlam düşüncəli yeni nəslin yetişdirilməsini dövlət və cəmiyyətin mühüm vəzifəsi kimi daim diqqət mərkəzində saxlamış, gənclərin dövlətin və cəmiyyətin sosial-iqtisadi, ictimai-siyasi və mədəni həyatında iştirakının təmin edilməsini vacib məsələ elan etmişdir.

Qeyd edilib ki, dövlət gənclər siyasəti Naxçıvan Muxtar Respublikasında da uğurla həyata keçirilir. Naxçıvan Muxtar Respublikası Mədəniyyət Nazirliyində də gənclərlə iş sahəsində müəyyən işlər görülmüşdür. Belə ki, mədəniyyət, mədəni irs, incəsənət, təhsil, sahəsində istedadlı və yaradıcı gənclərlə əlaqəli tədbirlər, dəyirmi masalar keçirilmiş, istedadlı gənclərin aşkara çıxarılması, yaradıcılıq qabiliyyətlərinin inkişaf etdirilməsi məqsədilə baxışlar, müsabiqələr, intellektual oyunlar keçirilmiş, sərgilər yaradılmışdır.

Gənc istedadların aşkar edilməsi, onların yaradıcılıq qabiliyyətlərinin daha da inkişaf etdirilməsi, gənc nəslin xalqımızın qədim və zəngin mədəni irsindən faydalanmaqla mənəvi, bədii və estetik dünyagörüşünün formalaşdırılması, onlarda vətənpərvərlik ruhunun daha da yüksəldilməsi məqsədilə müxtəlif tədbirlər davam etdirilməkdədir. Nazirlik tərəfindən uşaq və gənclərin intellektual səviyyələrinin inkişaf etdirilməsi ilə bağlı bir sıra işlər görülür. Belə ki, muxtar respublikanın uşaq musiqi, incəsənət və bədii sənətkarlıq məktəblərində təhsil alan uşaq və gənclərin intellektual səviyyələrinin inkişaf etdirilməsi, xalqımızın musiqi mədəniyyətinin, görkəmli bəstəkarlarının həyat və yaradıcılıqlarının təbliğ edilməsi məqsədilə “Lira” musiqili-intellektual oyunu keçirilmişdir.

Vurğulanıb ki, “Müasir gənclik və mədəniyyətimiz” başlığı altında dəyirmi masalar keçirilmişdir. Burada cəmiyyətin, xüsusən də gənclərin ən aktual problemləri müzakirə edilmişdir.

Bu il ərzində muxtar respublikada yaşayan gənclərin məlumatlandırılması məqsədilə Azərbaycan mədəniyyətinin təbliği ilə bağlı maarifləndirici tədbirlər də davam etdirilmişdir.

Diqqətə çatdırılıb ki, Naxçıvan Muxtar Respublikası Mədəniyyət Nazirliyində istedadlı gənclərin məlumat bankı ənənəvi və elektron formada yaradılmışdır. Muxtar respublikada mədəniyyət və incəsənət sahəsində xüsusi istedada malik uşaq və gənclərin məlumatları toplanaraq həm qeydiyyat kitabına, həm də elektron məlumat bankına işlənilir.

Sonra mövzu ilə bağlı müzakirələr olmuşdur. Mədəniyyət müəssisələrində, muzey və kitabxanalarda çalışan gənclər mədəniyyətimizin təbliği ilə bağlı fikir və rəylərini bildirmişlər. Çıxışlarda sosial şəbəkələrdə mədəniyyətimizin təbliği, mədəniyyətimizin, incəsənətimizin təbliği üsulları və vasitələrindən geniş söhbət açılmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
11.06.2019



İyunun 10-da Məhəmməd Tağı Sidqi adına Naxçıvan Dövlət Kukla Teatrı Culfa Rayon Mədəniyyət Sarayında balaca tamaşaçılara görkəmli şair, Azərbaycan Respublikasının Əməkdar incəsənət xadimi Mirmehdi Seyidzadənin “Qızıl xoruz” pyesi əsasında hazırladıqları tamaşanı təqdim etmişdir.

Qeyd edək ki, görkəmli şair Mirmehdi Seyidzadənin uşaqlar üçün yazdığı şeirlər, mənzum nağıllar, kiçik pyeslər maraqlı əsərlərdir. Onun “Nərgiz”, “Qızıl quş”, “Billur qəsr”, “Ayaz”, “Qızıl xoruz” kimi əsərləri uşaq ədəbiyyatımızın zənginləşməsində əhəmiyyətli rol oynamışdır.

“Qızıl xoruz” tamaşası Azərbaycan xalq nağılının motivləri əsasında yazılmışdır. Məişət nağıllarından olan bu nağıl-tamaşada tamahkar padşah tənqid olunur. Tamaşada satira da güclüdür.

Nəzmlə yazılan bu tamaşada xoruzun başına gələn sərgüzəştlər oynaq və şən şəkildə səhnəyə gətirilir. Bir şahı pul tapan xoruz sevinib səs-küy salır, banlayır. Padşah əmr edir ki, xoruzun səsini kəsmək üçün pulu onun əlindən alsınlar. Kuklalarla hazırlanmış tamaşada əsas hadisələr də bundan sonra başlayır. Xoruzun səsini kəsə bilməyən padşah gülüş hədəfinə çevrilir. Bir sıra nağıllarımızda olduğu kimi burada da padşaha sözlə yanaşı, öz əməli və ağlı ilə təsir göstərmək, onu ədalətə çağırmaq əsas mövzudur. Tamaşada həm də tərbiyəvi fikir aşılanır, lovğalıq, tamahkarlıq, zorakılıq, pula hərislik tənqid edilir.

Tamaşadakı Elşən, Xoruz, Padşah, Vəzir, Fərraş, Naib, Aşbaz, Rəqqasə, Qonaq, Nənə surətlərini teatrın aktyorları Ləman Əhmədova, Süleyman Süleymanov, İlham Babayev, İbad Nəbiyev, İlqar Babayev, Arzu Səfərov, Əfqanə Ələsgərova, Vəsmə Quliyeva, Ulduz Süleymanova təbii və canlı səsləndirirlər.

Tamaşanın quruluşçu rejissoru, Naxçıvan Muxtar Respublikasının Əməkdar mədəniyyət işçisi Nadir Hüseynov, quruluşçu rəssamı Ədalət Quliyev, bəstəkarı Əli Məmmədovdur.

“Qızıl Xoruz” tamaşası balacalar tərəfindən maraqla izlənilib.

Naxçıvan Muxtar Respublikası
Mədəniyyət Nazirliyinin Mətbuat Xidməti
10.06.2019



İyunun 10-da Sədərək Rayon Mədəniyyət Sarayında Naxçıvan Musiqi Kollecinin “Buta” muğam ansamblının konserti olub.

Qeyd edək ki, Naxçıvan Muxtar Respublikası Ali Məclisi Sədrinin Sərəncamlarına əsasən Naxçıvan Musiqi Kollecinin 30 və 40 illik yubileyləri dövlət səviyyəsində qeyd olunub. Hazırda bu təhsil ocağında 10-dan çox ixtisas üzrə kadr hazırlığı aparılır.

Naxçıvan Musiqi Kolleci milli musiqi alətlərimizin və xalq mahnılarımızın yaşadılması, eləcə də klassik və müasir dünya bəstəkarlarının öyrənilməsi, gənc musiqiçi kadrların yetişdirilməsi sahəsində uğurlar əldə etmişdir. Kollec təhsil müəssisəsi kimi fəaliyyəti ilə bərabər, həm də respublika üzrə keçirilən mötəbər tədbirlərdə, el şənliklərində konsert proqramları ilə çıxış edir. 40 ildən artıq fəaliyyət göstərən kollecdə müxtəlif musiqi kollektivləri yaradılmışdır. “Buta” muğam ansamblı da bu kollektivlərdən biridir. Kollektiv gənc muğam ifaçılarından və müğənnilərdən ibarətdir. Kollektivin üzvləri maraqlı konsert proqramları ilə ictimaiyyət qarşısında çıxışlar edirlər. “Buta” muğam ansamblının Naxçıvan Dövlət Televiziyasındakı çıxışları da maraqla qarşılanır.
Konsert proqramı İlkin Abdullayevin ifasında görkəmli bəstəkarımız Ramiz Mirişlinin “Naxçıvan təranəsi” mahnısı ilə başlayıb.

“Buta” muğam ansamblının solistləri Xalid Həsənov, Kənan Cəfərov, Samir İmayılov, İlkin Abdullayev, Ağaxan Məmmədov, Əbülfəz Məmmədov, Nurlan Nuriyev, Azər Əkbərov muğam və təsniflər, xalq və bəstəkar mahnıları ifa ediblər. Ansamblın üzvlərinin ifasında səslənən Oqtay Kazımi, Rauf Hacıyev, Ramiz Mirişli, Emin Sabitoğlu, Əlibaba Məmmədov, Rauf Məmmədov və başqa bəstəkarların “Mehriban insanlar”, “Azərbaycan”, “Peşiman”, “Nə gözəldir Azərbaycan”, “Bəxtiyaram”, “Yaşa mənim xalqım”, “A dağlar qızı”, “Küləklər”, “Gülüb getdi” mahnıları və “Aman-aman ayrılıq” xalq mahnısı konsert iştirakçıları tərəfindən alqışlarla qarşılanıb.

Konsert Azər Əkbərovun ifasında Əlibaba Məmmədovun “Vətən yaxşıdır” mahnısı ilə başa çatıb.

Konsert Sədərək rayon sakinlərində xoş ovqat yaradıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
10.06.2019



İyunun 10-da “Gənclik” Mərkəzində Naxçıvan Şəhər Uşaq Musiqi və İncəsənət Məktəbinin şagirdlərinin Naxçıvan Muxtar Respublikasının 95 illiyinə həsr olunmuş hesabat konserti olub.

Qeyd edək ki, muxtar respublikamızda uşaq musiqi məktəblərinə böyük diqqət və qayğı göstərilir. Hər il muxtar respublikamızın rayon mərkəzlərində və kəndlərində uşaq musiqi məktəbləri üçün yeni binalar tikilərək istifadəyə verilir. Hazırda Naxçıvan şəhərində 6 uşaq musiqi məktəbi fəaliyyət göstərir. Son illər şəhərdəki uşaq musiqi məktəbləri üçün yeni binalar inşa olunmuş, məktəblərin maddi-texniki bazası gücləndirilmişdir. Uşaq musiqi məktəblərində hər il yeni ixtisaslar açılır. Bu uşaq musiqi məktəblərində həm də şagirdlərdən ibarət müxtəlif ansambllar, orkestrlər və başqa musiqi kollektivləri fəaliyyət göstərir. İstedadlı şagirdlərə müəllimlər tərəfindən diqqət və qayğı göstərilir.
Məktəbin hesabat konsertində Naxçıvan Şəhər Uşaq Musiqi və İncəsənət Məktəbinin Xalq Çalğı Alətləri Anamblının ifasında Elxan Rəhimovun “Abşeron fantaziyası” və Fikrət Əmirovun “Kor ərəb”in mahnısı səsləndikdən sonra şagirdlərdən Hüseyn Tağıyev tarda və fortepianoda Məleykə Vəliyeva görkəmli bəstəkarımız Vasif Adıgözəlovun “Lay-lay” melodiyasını ifa etmişlər. Məktəbin I sinif şagirdi Nağı Nağızadənin ifasında italyan bəstəkarı Cüzeppe Verdinin “Hersoqun mahnısı” alqışlarla qarşılanmışdır.

Konsertdə Azərbaycan bəstəkarlarından Üzeyir Hacıbəyov, Tofiq Quliyev, Faiq Sücəddinov və rus bəstəkarlarının əsərləri də səslənmişdir.

Şagirdlərin hesabat konsertində məktəbin I sinif şagirdi Xəzər Əliyevin ifasında “Şahnaz” muğamı, Sazçalanlar ansamblının ifasında “Kərəm gözəlləməsi”, Kamera orkestrinin ifasında tanqo rəqsi və xor musiqisi maraqla qarşılanıb.

Konsert Uşaq Musiqi və İncəsənət Məktəbinin Nağaraçalanlar ansamblının ifa etdiyi “Azərbaycan ritmləri” ilə başa çatıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
10.06.2019



Azərbaycan-ABŞ beynəlxalq arxeoloji ekspedisiyası 2008-ci ildən başlayaraq Naxçıvan Muxtar Respublikasının Şərur və Sədərək rayonları ərazisində arxeoloji tədqiqatlar aparır. Arxeoloji tədqiqatlar başlıca olaraq Oğlanqala və Qızqala yaşayış yerlərində və onun ətrafında aparılmışdır.

Ekspedisiyanın rəhbərləri Azərbaycan Milli Elmlər Akademiyasının müxbir üzvü, professor Vəli Baxşəliyev və Amerika Birləşmiş Ştatlarının Pensilvaniya Universitetinin professoru, arxeoloq Lauren Ristvetdir. Avstraliyanın Monash Universitetinin professoru Hilary Gopnik, Oksford Universitetinin doktoru Selin Nugent, Pensilvaniya Universitetinin arxeoloqu Robert Bryant və tələbəsi Jennifer Sverida, Pensilvaniya Muzeyinin bərpaçısı Tessa de Alarcon Martin, AMEA Naxçıvan Bölməsinin gənc əməkdaşları Elmar Baxşəliyev və Kamran Mehbalıyev isə ekspedisiyanın üzvləridir. Arxeoloji qazıntılara Pensilvaniya və Monash universitetlərinin 5 tələbəsi də cəlb olunmuşdur.

2008-2011-ci illərdə Oğlanqala yaşayış yerində arxeoloji qazıntılar aparılmış, yaşayış yerinin mərkəzi hissəsinin böyük bir qismi tədqiq edilmiş, Oğlanqala sitadelinin və onu əhatə edən müdafiə divarlarının planı müəyyənləşdirilmişdir. Tədqiqatlar zamanı Oğlanqala sitadelinin və onun qala divarlarının memarlıq xüsusiyyətlərinin, qonşuluqda yerləşən Urartu dövlətinin memarlığından tamamilə fərqli olduğu müəyyən olunmuşdur. Araşdırma zamanı Arpaçay vadisində Oğlanqala və Qızqala yaşayış yerlərini əhatə edən 480 hektar sahədə şəhər-dövlətin mövcud olduğu müəyyən edilmişdir. Bu şəhər-dövlət Azərbaycanın şimalında urartulara qarşı mübarizənin əsas mərkəzi olmuş və urartuların Naxçıvanı işğal etməsinə imkan verməmişdir. Urartular dəfələrlə bu əraziyə basqın etsələr də, məğlub şəkildə geri çəkilməyə məcbur olmuşlar. Müəyyən edilmişdir ki, Oğlanqala şəhər-dövləti Azərbaycanın şimal və qərb bölgələrində möhkəmlənən Etiuni konfederasiyası və skiflərlə ittifaqda olmuş və urartuları dəfələrlə məğlub etmişlər. Urartu hökmdarı I Rusanın yazılarında onların bu məğlubiyyəti etiraf edilmişdir. Beynəlxalq ekspedisiyanın əldə etdiyi nəticələr “Amerikan Arxeoloji Jurnalı”, “İranica Antica” kimi nüfuzlu və Tomson Science indeksinə daxil olan nəşrlərdə və digər beynəlxalq məcmuələrdə verilmiş, həmçinin bununla bağlı beynəlxalq konfranslarda məruzələr edilmişdir.

Arxeoloji ekspedisiya 2012-2017-ci illərdə həm kəşfiyyat xarakterli araşdırma, həm də Qızqala yaşayış yerində qazıntı aparmışdır. Qızqala yaşayış yerində aparılan araşdırmalar zamanı Naxçıvanın Orta Tunc dövrü mədəniyyəti öyrənilmiş, Naxçıvanın Şimal-Qərbi İran, Şərqi Anadolu və Cənubi Qafqazda yayılan Boyalı qablar mədəniyyətinin mərkəzi olduğu, Orta Tunc dövrünə aid ən qədim qalatipli yaşayış yerlərinin Naxçıvanda yerləşdiyi müəyyənləşdirilmişdir. Ekspedisiyanın əldə etdiyi nəticələrlə bağlı beynəlxalq konfranslarda məruzə olunmuş, beynəlxalq məcmuələrdə məqalələr nəşr edilmişdir. Bu il Qızqala yaşayış yeri haqqında Tomson Science indeksinə daxil olan “TUBA-AR” jurnalında məqalə nəşr olunacaqdır.

Mayın 18-dən etibarən Azərbaycan-ABŞ beynəlxalq arxeoloji ekspedisiyası Oğlanqala yaşayış yerində Atropatena dövrünə aid olan mədəni təbəqəni tədqiq edir. Ekspedisiya iyunun 30-dək davam edəcəkdir. Artıq ekspedisiyanın apardığı araşdırma nəticəsində Atropatena dövrünə aid ictimai binanın qalıqları ortaya çıxarılmış, Oğlanqalanın Atropatena dövlətinin əsas əyalət mərkəzlərindən biri olduğu müəyyənləşdirilmişdir. Arxeoloji araşdırmalar Atabəylər dövründə də Oğlanqalada intensiv yaşayış olduğunu təsdiq edir. Bu da bir daha sübut edir ki, Oğlanqalanın tədqiqi ölkə­mizin tarixi ilə bağlı daha mühüm nəticələr verəcəkdir.

Muxtar respublikanın tarixi ilə yanaşı, onun təbiəti də beynəlxalq ekspedisiyaların diqqət mərkəzindədir. Macarıstan Quşları Müdafiə Cəmiyyətinin üzvləri, biologiya üzrə fəlsəfə doktorları Atilla Georgi Simay və Miklos Nagi mayın 30-da muxtar respublikaya gəlmişlər. Onlar AMEA Naxçıvan Bölməsi Bioresurslar İnstitutunun əməkdaşları ilə birlikdə Naxçıvan Muxtar Respublikasının orta dağlıq zonasında quşların yerləşməsini və mövcud vəziyyətini öyrənirlər.

Hollandiya vətəndaşları Zigervan Hirvijnen və Pieter Kleivegt Rijk isə 2-7 iyun tarixlərdə Şahbuz rayonunun Kükü və Nursu kəndlərində, Batabatda, Ordubad rayonunun Nürgüt və Pəzməri kəndlərində, Culfa rayonunun Ərəfsə kəndində və Şərur rayonunun Mahmudkəndində bitki örtüyünü tədqiq ediblər. Həmçinin tədqiqatçılar Naxçıvan Muxtar Respublikası Kənd Təsərrüfatı Nazirliyinin “Toxum bankı”ndakı materiallarla tanış olublar. Toplanılan materiallar əsasında birgə məqalələr yazılacaq, elmi konfrans keçiriləcək, qonaqların məruzələri dinləniləcəkdir.

Rusiya Elmlər Akademiyasının Uzaq Şərq Bölməsinin entomoloqu, biologiya üzrə fəlsəfə doktoru M.Y.Proşalkin 10-25 iyun tarixlərdə muxtar respublikada səfərdə olacaq, yabanı arıların tozlanma prosesindəki iştirakına dair tədqiqatlar aparacaqdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
10.06.2019



İyunun 8-də Naxçıvan Muxtar Respublikasının Mədəniyyət Nazirliyinin təşkilatçılığı ilə Naxçıvan Dövlət Filarmoniyasında muxtar respublikanın uşaq musiqi, incəsənət və bədii sənətkarlıq məktəblərinin nağaraçalanlar ansamblları arasında müsabiqə keçirilmişdir.

Tədbirdə Naxçıvan Muxtar Respublikasının Mədəniyyət Nazirliyinin təhsil müəssisələri ilə iş üzrə baş məsləhətçisi Leyla Əlimərdanova çıxış edərək bildirmişdir ki, son dövrlərdə muxtar respublikamızda uşaq musiqi, incəsənət və bədii sənətkarlıq məktəblərinə göstərilən diqqət və qayğı hamımıza məlumdur.

Diqqətə çatdırılmışdır ki, belə müsabiqələrin təşkili muxtar respublikanın uşaq musiqi, incəsənət və bədii sənətkarlıq məktəblərinin ansambl və kollektivlərinin yaradıcılıq qabiliyyətlərinin zənginləşməsinə böyük tövhələr verir. Bu müsabiqələr gənc nəsildə xalqımızın qədim və zəngin mədəni irsindən faydalanmaqla mənəvi, bədii və estetik dünyagörüşünün formalaşmasına, onlarda vətənpərvərlik ruhunun daha da inkişaf etdirilməsinə xidmət edir.

Qeyd olunmuşdur ki, bu cür müsabiqələrin keçirilməsi Naxçıvan Muxtar Respublikasında mövcud olan uşaq musiqi, incəsənət və bədii sənətkarlıq məktəblərinin fəaliyyətini diqqət mərkəzində saxlamaqla yanaşı, bu sahədə səmərəliliyin daha da artırılmasına şərait yaradır.
Daha sonra müsabiqəyə start verilmişdir. Müsabiqədə muxtar respublikamızda fəaliyyət göstərən 23 uşaq musiqi, incəsənət və bədii sənətkarlıq məktəbinin nağaraçalanlar ansamblı iştirak etmişdir.

Müsabiqə başa çatdıqdan sonra ansamblların çıxışları münsiflər heyəti tərəfindən qiymətləndirilmişdir. Müsabiqədə Naxçıvan Şəhər Ərtoğrol Cavid adına Uşaq Musiqi və Bədii Sənətkarlıq Məktəbi və Naxçıvan Şəhər Uşaq Musiqi və İncəsənət Məktəbinin “Nağaraçalanlar” ansamblı I yerin, Şahbuz Rayon Uşaq Musiqi Məktəbinin “Nağaraçalanlar” ansamblı II yerin, Ordubad Şəhər Uşaq Musiqi Məktəbinin “Nağaraçalanlar” ansamblı isə III yerin qalibi olmuşdur.

Müsabiqənin sonunda fərqlənənlər Nazirliyin diplomları və fəxri fərmanları ilə təltif olunmuşdur.

Naxçıvan Muxtar Respublikası
Mədəniyyət Nazirliyinin Mətbuat Xidməti
08.06.2019



İyunun 8-də Naxçıvan Dövlət Uşaq Filarmoniyasının Xalq Çalğı Alətləri Ansamblının, vokal və rəqs qruplarının Ordubad Rayon Mədəniyyət Sarayında “Naxçıvan Muxtar Respublikasının 95 illik yubileyinə həsr olunmuş konserti olub.

Qeyd etmək lazımdır ki, 2019-cu ildə Naxçıvan Muxtar Respublikasının yaradılmasının 95 illiyi tamam olmuş və bununla əlaqədar olaraq Naxçıvan Muxtar Respublikası Ali Məclisi Sədrinin 21 yanvar 2019-cu il tarixli Sərəncamı ilə “Tədbirlər Planı” təsdiq edilmişdir. Tədbirlər Planının icrası ilə bağlı Naxçıvan Muxtar Respublikası Mədəniyyət Nazirliyinin təşkilatçılığı ilə silsilə tədbirlərin, konsertlərin keçirilməsi nəzərdə tutulmuşdur. Nəzərinizə çatdıraq ki, təşkil olunmuş bu konsert proqramı da muxtar respublikanın 95 illik yubileyinə həsr olunmuşdur.

Vurğulamaq lazımdır ki, muxtar respublikamızda uşaqların sağlam mühitdə böyümələri və təhsil almaları üçün gözəl şərait yaradılmışdır. İstedadlı uşaqların aşkara çıxarılması ilə yanaşı gənc nəslin asudə vaxtının səmərəli təşkili də bu gün diqqət mərkəzində olan sahələrdəndir.

Konsertdə ilk olaraq Xalq Çalğı Alətləri Ansamblının ifasında Üzeyir Hacıbəyovun “Mahur rəngi” səslənmişdir. Qeyd edək ki, ansamblın bədii rəhbəri Kənan Feyzullayevdir.

Filarmoniyanın solistləri İsmət Əliyev və Mətləb Şirinzadənin ifasında Ələkbər Tağıyevin “Azərbaycan oğluyam” mahnısı alqışlarla qarşılanmışdır.

Filarmoniyanın solistləri Məhəmməd Cəfərzadə, Səid Yetişməz, Barış Cavadlı, Vəli Əliyev, Ələkbər Sadiqov, İsmət Əliyevin ifasında bəstəkarlardan Bəhram Nəsibov və Rauf Məmmədovun “Qarabağ”, “Naxçıvanım” mahnıları səsləndirilmişdir. Ələkbər Sadiqov və İsmət Əliyevin ifasında “Heyratı” ritmik muğamı konsert iştirakçılarında xoş ovqat yaratmışdır.

Sonda isə Naxçıvan Dövlət Uşaq Filarmoniyasının solistləri Xəzər Əliyev və Ələkbər Sadiqovun ifasında Rauf Məmmədovun “Yaşa mənim xalqım” mahnısı alqışlarla qarşılanmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
08.06.2019



İyunun 7-də Naxçıvan Şəhər Gənclər Mərkəzində Naxçıvan Muxtar Respublikası Mədəniyyət Nazirliyinin tabeliyində olan uşaq musiqi, incəsənət və bədii sənətkarlıq məktəblərinin şagirdləri arasında “Lira” musiqili-intellektual oyununun final mərhələsi keçirilib.

Oyun başlanmazdan əvvəl Naxçıvan Muxtar Respublikası Mədəniyyət Nazirliyinin baş məsləhətçisi Leyla Əlimərdanova giriş sözü ilə çıxış edib.

Qeyd olunub ki, belə oyunların keçirilməsində məqsəd şagirdlərin biliyinin artırılmasına, onların intellektual səviyyəsinin yüksəldilməsinə, yaradıcı kollektivlərin fəaliyyətlərinin daha da inkişaf etdirilməsinə şərait yaratmaqdan ibarətdir.

Bildirilib ki, 2018-2019-cu tədris ili ərzində keçirilən “Lira” musiqili-intellektual oyunlarının nəticəsinə əsasən, qalib komandalar bugünkü final mərhələsində iştirak edəcəklər. Daha sonra bu mərhələdə iştirak hüququ qazanmış komandaların adları və oyunun şərtləri açıqlanmışdır.

Nəzərinizə çatdıraq ki, final mərhələsində iştirak etmək hüququnu Naxçıvan Şəhər 4 nömrəli Uşaq Musiqi Məktəbinin “Humayun”, S.Rəcəbov adına 3 nömrəli Uşaq Musiqi Məktəbinin “Simayi-Şəms”, Culfa Şəhər Uşaq Musiqi Məktəbinin “Buta” və Ordubad Rayon Vənənd Kənd Uşaq Musiqi Məktəbinin “Aksent” komandaları əldə edib.

Maraqlı və gərgin keçən musiqili-intellektual oyunda komandalar görkəmli Azərbaycan və dünya bəstəkarları əsərlərini dinləmə yolu ilə təyin ediblər, musiqinin ümumi-nəzəri məsələləri və görkəmli bəstəkarların həyat və yaradıcılığı ilə bağlı sualları cavablandırıblar.

Oyunun yekununa görə “Humayun” komandası I, “Simayi-Şəms” komandası II, “Buta” komandası III yeri tutmuşdur. “Aksent” komandası isə diplom ilə təltif olunmuşdur.

Naxçıvan Muxtar Respublikası
Mədəniyyət Nazirliyinin Mətbuat Xidməti
07.06.2019



İyunun 7-də Naxçıvan Dövlət Uşaq Teatrında Naxçıvan Muxtar Respublikası Mədəniyyət Nazirliyinin təşkilatçılığı ilə keçirilən “Keçmişdən bu günə Naxçıvan yallıları” adlı yallı müsabiqəsinin final turu keçirilib.

Naxçıvan Muxtar Respublikası Mədəniyyət Nazirliyinin aparıcı məsləhətçisi Elvin Əhmədov çıxış edərək qeyd edib ki, qeyri-peşəkar şəkildə fəaliyyət göstərən yallı dərnəkləri üzvlərinin, yallı qruplarının və həvəskar kollektivlərin iştirak etdiyi müsabiqənin seçim turlarına muxtar respublikanın Şərur, Babək, Ordubad, Culfa, Kəngərli, Şahbuz və Sədərək rayonlarından, eləcə də ali və orta ixtisas təhsil müəssisələrindən kollektivlər qatılmışlar. Qeyd edilib ki, final turunda iştirak etmək hüququnu Şərur rayon Yuxarı Aralıq Kənd Mədəniyyət Evinin “Bahar”, Babək rayon Kültəpə Kənd Mədəniyyət Evinin “Məhsəti”, Ordubad Rayon Mədəniyyət Sarayının “Dübəndi”, Culfa Rayon Mədəniyyət Sarayının “Haçadağ”, Kəngərli Rayon Mədəniyyət Sarayının “Sarı gəlin”, Şahbuz rayon Badamlı Kənd Mədəniyyət Evinin “Badamlı”, Sədərək Rayon Mədəniyyət Sarayının “Tejgar”, Naxçıvan Dövlət Universitetinin “Yallı və rəqs”, Naxçıvan Müəllimlər İnstitutunun “Məhəbbət” və Naxçıvan Tibb Kollecinin “Birlik” yallı kollektivləri qazanıblar.

Daha sonra Elvin Əhmədov yallı kollektivlərinə uğurlar arzulayıb və final turuna start verilib.

Yallı kollektivlərinin ifalarından sonra qiymətləndirmə aparılıb.

Qeyd edək ki, final turunda qiymətləndirmə iştirakçı kollektivlərin “geyim və səhnə mədəniyyəti”, “ifaçılıq məharəti”, “kollektiv hazırlığı” və “vaxta əməl olunması” meyarları üzrə aparılıb.

Müsabiqənin yekununda Şərur Rayon Yuxarı Aralıq Kənd Mədəniyyət Evinin “Bahar” yallı kollektivi I, Sədərək Rayon Mədəniyyət Sarayının “Tejgar” yallı kollektivi II, Naxçıvan Tibb Kollecinin “Birlik” yallı kollektivi isə III yerin qalibi olub. Qaliblərin mükafatlandırılması müsabiqə qaliblərinin yekun konsertində olacaqdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
07.06.2019



İyunun 7-də Naxçıvan Musiqi Kollecində tanınmış pianoçu, beynəlxalq müsabiqələr laureatı Teymur Şəmsiyev tələbə, şagird və müəllimlər üçün ustad dərs keçib.

Dərsi Naxçıvan Muxtar Respublikasının Mədəniyyət Nazirliyinin baş məsləhətçisi Leyla Əlimərdanova giriş sözü ilə açaraq qeyd edib ki, Teymur Əmir oğlu Şəmsiyev 1956-cı ildə Şəmkir rayonunda anadan olmuşdur. 1960-cı ildə ailəsi ilə birlikdə Bakı şəhərinə köçmüş və 1963-1974-cü illərdə Bülbül adına Orta İxtisas Musiqi məktəbində təhsil almışdır. 1975-ci ildə Üzeyir Hacıbəyov adına Azərbaycan Dövlət Konservatoriyasına qəbul olunmuş və professor Zöhrab Adıgözəlzadənin sinfində təhsil almışdır. 1980-ci ildə Konservatoriyanı fərqlənmə diplomu ilə bitirib, təyinatla Sumqayıt Musiqi Texnikumunda pedaqoji fəaliyyətə başlamışdır. 1981-ci il noyabr ayında Özbəkistanın paytaxtı Daşkənddə keçirilən pianoçuların ümumittifaq müsabiqəsində finalist olaraq diploma və texniki imkanlarına görə özəl mükafata layiq gorülmüşdür. 1983-1985-ci illərdə Konservatoriyada aspirantura təhsili almış və öz müəllimi professor Zöhrab Adıgözəlzadənin assistantı vəzifəsində çalışmışdır. 1985-ci ildə aspirantura təhsilini bitirdikdən sonra Üzeyir Hacıbəyov adına Azərbaycan Dövlət Konservatoriyasında müəllim, 1987-ci ildən isə baş müəllim vəzifəsində çalışmışdır. Təhsil aldığı illərdən bu günə qədər müxtəlif ölkələrdə - Almaniya, keçmiş Sovet İttifaqının bütün respublikalarında, eləcə də Moskva, Kiyev, Minsk, Tbilisi, Alma-Atı, Daşkənd, İran və respublikamızın bir çox şəhərlərində konsert proqramı ilə çıxış etmişdir. Xüsusilə qeyd etmək lazımdır ki, 2013-cü il iyun ayında ümummilli lider Heydər Əliyevin 90 illik yubileyi münasibətilə Naxçıvan Dövlət Universitetində keçirilən konsertdə Kamal Əhmədovun bir çox fortepiano əsərləri ilə yanaşı, fortepiano və simfonik orkestr üçün yazılmış 1-ci konsertini, müsabiqələr laureatı Ülvi Əhmədovla birlikdə ifa etmişdir. 1993-2010-cu illərdə Ankara Bilkənt Universitetinin Dövlət Konservatoriyasında fortepiano müəllimi və konsertmeyster vəzifəsində çalışmışdır. Daha sonra isə Qars Dövlət Konservatoriyasında, hal-hazırda isə Balıkesir Universitetinin Dövlət Konservatoriyasında çalışır.

Sonra tanınmış pianoçu, beynəlxalq müsabiqələr laureatı Teymur Şəmsiyev Naxçıvan Musiqi Kolleci, Naxçıvan Şəhər Uşaq Musiqi və İncəsənət Məktəbi, Naxçıvan Şəhər Ərtoğrol Cavid adına Uşaq Musiqi və Bədii Sənətkarlıq Məktəbi, Naxçıvan Şəhər Səfər Rəcəbov adına 3 nömrəli Uşaq Musiqi Məktəbi, Ordubad Şəhər Uşaq Musiqi Məktəbi və Culfa Şəhər Uşaq Musiqi Məktəbinin şagird, tələbə və müəllim kollektivlərinə ustad dərs keçib.

Maraqlı keçən ustad dərsdə tələbə, şagird və müəllimlərin sualları cavablandırılıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
07.06.2019



Xəbər verdiyimiz kimi Naxçıvan Muxtar Respublikası Ali Məclisi Sədrinin 2009-cu il 7 fevral tarixli Sərəncamına uyğun olaraq may ayının 22-dən start verilən xalq teatrlarının festivalı davam edir. İyunun 4-də xalq teatrlarının muxtar respublika festivalında Naxçıvan Şəhər Xalq Teatrı tanınmış yazıçı və dramaturq Seyfəddin Dağlının üç pərdə, beş şəkilli “Adı sənin, dadı mənim” satirik komediyası əsasında hazırlanmış tamaşanı nümayiş etdirib.

Qeyd edək ki, Naxçıvan Şəhər Xalq Teatrı 1970-ci ildə şəhərdəki 1 saylı mədəniyyət evi nəzdində fəaliyyət göstərən dram kollektivi əsasında yaradılmışdır. 1971-ci ildə kollektivə xalq teatrı statusu verilmişdir. Teatr bu illər ərzində C.Məmmədquluzadə, Ə.Haqverdiyev, C.Cabbarlı, S.S.Axundov, S.Rüstəm, B.Vahabzadə, N.Hikmət və başqalarının dramaturgiyasına müraciət etmiş, uğurlu səhnə əsərləri yaratmışdır.

Naxçıvan Şəhər Xalq Teatrının hazırladığı bu tamaşada hadisələr keçən əsrin 60-cı illərində Azərbaycan şəhərlərindən birində cərəyan edir. 77 nömrəli qəlyanaltıxanada başlanan hadisələr komik və gülüş şəklində davam etməklə o dövrün eybəcərliklərini göstərir.

Tamaşanın əvvəlindən əsas aparıcı surət olan Qəlyanalının (Akif Əsədov) çirkin əməllərinin şahidi oluruq. Müxtəlif çirkin yollarla qazandığı pulları başqasının adına sənədləşdirən Qəlyanalı və onun ətrafındakılar gülüş hədəfidirlər. Qəlyanalı bu pullarla aldığı bağı, evi, maşını və başqa əmlaklarını qohumlarının adına keçirməklə, həm də təzədən evlənmək eşqinə düşüb, təzə nigahını da təqaüdçü qohumu Həmzənin adına sənədləşdirmək istəyir. Tamaşanın finalında Qəlyanalı öz fırıldaqlarının qurbanı olur. Tamaşa Qəlyanalının ətrafında olan Yumşaqovun (Ədalət Hüseynov) bu sözləri ilə də bitir: “... Özün qurduğun tələdir, özün də düşmüsən. İndi eşələn orada özün üçün. Adı da sənin, dadı da sənin”. Tamaşa gülüş doğuran vəziyyət və dialoqlarla zəngin olması ilə maraqla qarşılanır.

“Adı sənin dadı mənim” tamaşasında Səbirə, Həmzə, Qəmzə, Quzubala, Totux və Nəzarətçi personaj tiplərini Zülfiyyə Zeynalova, Abbas İsmayılov, Nazlı Hüseynquliyeva, Sultan Səfərov, Qəmər Babayeva, Pirqulu Məmmədov təbii və canlı təqdim edirlər.

Tamaşanın quruluşçu rejissoru Akif Əsədov, rəssamı Azərbaycan Respublikasının Əməkdar artisti Bəhruz Haqverdiyev, musiqi tərtibatçısı Mirsaleh Seyidovdur.

Naxçıvanda ilk dəfə xalq teatrımızda tamaşaya qoyulan bu komediya maraqla qarşılanır.

Naxçıvan Muxtar Respublikası
Mədəniyyət Nazirliyinin Mətbuat Xidməti
04.06.2019



İyunun 4-də Naxçıvan Şəhər Gənclər Mərkəzində Naxçıvan Muxtar Respublikası Mədəniyyət Nazirliyinin tabeliyində olan uşaq musiqi, incəsənət və bədii sənətkarlıq məktəblərinin şagirdləri arasında “Lira” musiqili-intellektual oyunun IV mərhələsi keçirilib.

Oyun başlanmazdan əvvəl Naxçıvan Muxtar Respublikasının Mədəniyyət Nazirliyinin baş məsləhətçisi Leyla Əlimərdanova çıxış edərək bildirib ki, “Lira” musiqili-intellektual oyununda muxtar respublikanın uşaq musiqi incəsənət və bədii sənətkarlıq məktəblərinin hamısının iştirak etməsi nəzərdə tutulmuş və bununla bağlı qrafik tərtib edilmişdir. Qrafikə əsasən 2018-2019-cu tədris ili ərzində keçirilən oyunların nəticəsinə əsasən, qalib komandalar 2019-ci il iyun ayının 7-də keçiriləcək final mərhələsində iştirak edəcəklər.

O qeyd etmişdir ki, belə oyunların keçirilməsində məqsəd şagirdlərin biliyinin artırılmasına, onların intellektual səviyyəsinin yüksəldilməsinə şərait yaratmaqdan ibarətdir.

Daha sonra bu mərhələdə iştirak edəcək komandaların adları və oyunun şərtləri açıqlanmışdır.

Nəzərinizə çatdıraq ki, IV mərhələdə Naxçıvan Şəhər 4 nömrəli Uşaq Musiqi Məktəbinin “Humayun”, Şahbuz Rayon Uşaq Musiqi Məktəbinin “Muğam”, Babək Rayon Cəhri Kənd Uşaq Musiqi Məktəbinin “Dəsgah”, Şərur rayonunun Çərçiboğan Kənd Uşaq Musiqi Məktəbinin “Rast”, Ələkli Kənd Uşaq Musiqi Məktəbinin “Ovşarı”, Yuxarı Daşarx Kənd Uşaq Musiqi Məktəbinin “Arazbarı” komandaları iştirak etmişdir.
Maraqlı və gərgin keçən musiqili-intellektual oyunda komandalar görkəmli Azərbaycan və dünya bəstəkarlarının əsərlərini dinləmə yolu ilə təyin etmiş, musiqinin ümumi-nəzəri məsələləri və görkəmli bəstəkarların həyat və yaradıcılığı ilə bağlı sualları cavablandırmışlar.

Bu mərhələnin yekununa görə Naxçıvan Şəhər 4 nömrəli Uşaq Musiqi Məktəbinin “Humayun” komandası I, Şərur Rayon Çərçiboğan Kənd Uşaq Musiqi Məktəbinin “Rast” komandası II, Babək Rayon Cəhri Kənd Uşaq Musiqi Məktəbinin “Dəsgah” komandası isə III yerin qalibi olmuşlar. Şahbuz Rayon Uşaq Musiqi Məktəbinin “Muğam” komandası isə Diplomla mükafatlandırılmışdır.

Qeyd edək ki, “Lira” musiqili-intellektual oyunun final mərhələsi iyun ayının 7-də keçiriləcəkdir.

Naxçıvan Muxtar Respublikası
Mədəniyyət Nazirliyinin Mətbuat Xidməti
04.06.2019



“Naxçıvanqala” Tarix-Memarlıq Muzey Kompleksində IV “Göycə” festivalı keçirilib.

Festivalın açılışında tədbirin aparıcıları qeyd ediblər ki, qədim Naxçıvan zəngin mədəniyyəti, çoxəsrlik tarixi ilə yanaşı, bu torpaqda yetişən nemətləri ilə də dünyada tanınır. Naxçıvanın istər təbii duzu və mineral bulaqları, istərsə də barlı-bəhərli bağlarında yetişən növbənöv meyvələri süfrələrimizin dad-tamına, bərəkətinə çevrilib. Bütün bunlara görədir ki, hələ orta əsrlərdə səyyahlar Naxçıvanı “meyvə cənnəti” adlandırıblar. Diyarımızda hər mövsümün öz meyvəsi vardır. Bu meyvələr içərisində öz dad-tamı ilə seçilən, yalnız Naxçıvanda bitən bir meyvə də vardır ki, o da göycədir. Bu meyvənin tarixi VII əsrə gedib çıxır. Bu gün Naxçıvan şəhərində və muxtar respublikanın rayonlarında göycənin müxtəlif sortları yetişdirilir. Azərbaycan Milli Elmlər Akademiyasının Naxçıvan Bölməsinin Bioresurslar İnstitutunun elmi işçisi, aqrar elmlər doktoru Varis Quliyev çıxış edərək deyib ki, elmə Naxçıvan göycəsi sortunun xalq seleksiyası yolu ilə yaradıldığı məlumdur. Göycə sortunun adı becərildiyi ərazinin və faraş yeyildiyi məhsulun rənginə uyğun olaraq adlandırılıb. O, muxtar respublikada yazda ilk yeyilən meyvələrdən biridir. Naxçıvanın torpaq-iqlim şəraiti göycənin tez böyüməsi, inkişafı, bol və yüksəkkeyfiyyətli məhsul verməsi üçün olduqca əlverişlidir. Əsasən, Arazboyu maili düzənlik ərazilərdə Naxçıvan göycəsi sortundan ibarət bağların salınması üçün olduqca əlverişli ekoloji mühit vardır. Çoxillik göycə ağacları 10-25 il normal məhsul verir, hər bir ağacdan ildə, təqribən, 50 kiloqrama qədər məhsul toplanılır. Naxçıvan göycəsi, adətən, yazda, yayda və payızda müxtəlif calaq üsulları ilə çoxaldılır. Calaqaltı kimi çəyirdəkli meyvələrin tinglərindən istifadə edilir. Albuxara ağacına calaq yolu ilə yetişdirilən göycə meyvələri nisbətən iri və şirin, badam ağacına calaq edildikdə isə göycə ağacları uzunömürlü olur.

Varis Quliyev muxtar respublikada meyvəçiliyin inkişafına göstərdiyi diqqət və qayğıya görə festival iştirakçıları adından Naxçıvan Muxtar Respublikası Ali Məclisinin Sədrinə ­minnətdarlığını bildirib. Tədbirin bədii hissəsində Naxçıvan Dövlət Filarmoniyasının Mahnı və Rəqs Ansamblının ifasında səsləndirilən şən mahnı və rəqslər alqışlarla qarşılanıb.

Qeyd edək ki, festivala muxtar respublikanın şəhər və rayonlarından 234 fərdi təsərrüfat nümayəndəsi tərəfindən 18 tondan çox göycə gətirilmişdi. Festivalda göycədən hazırlanan mürəbbə, cem, əzmə, kompot və araqların sərgi və satışı da təşkil edilmişdi.

Festivalda ailə təsərrüfatı sahibləri ilə həmsöhbət olduq. Əvvəlcə Babək rayonu üçün ayrılmış pavilyona üz tuturuq. Rayonun Nehrəm kənd sakini Vəfadar Eyvazov bildirdi ki, artıq dördüncü ildir, bu festivala məhsul çıxarır. Keçən il yaxşı qazanc əldə etdiyi üçün bu il daha çox göycə gətirib. Festivalda 200 kiloqram göycənin artıq xeyli hissəsini sata bilib. 20 ildən çoxdur ki, göycə təsərrüfatında çalışan sahibkarın həyətində 100-dən artıq göycə ağacı vardır. Ailə təsərrüfatı sahibi gətirdiyi göycə məhsuluna marağın böyük olduğunu söylədi.

Kəngərli rayonundan festivala qatılan Çalxanqala kənd sakini Zaur Həsənov 6 ildir ki, göycə təsərrüfatı ilə məşğul olur. 100 kiloqram məhsulla burada iştirak edən təsərrüfatçı festivalın keçirilməsinin Naxçıvan göycəsinin tanıdılması baxımından mühüm əhəmiyyət kəsb etdiyini dedi. Zaur Həsənov muxtar respublikada meyvəçiliyin inkişafı üçün yaradılan hərtərəfli şəraitə görə minnətdarlıq etdi.

Culfa rayonunun Göydərə kənd sakini Əli Vəliyev festivala 200 kiloqram göycə gətirmişdi. Dedi ki, həyətinin bu məhsulunu hər il bazara da çıxarır. Həyətində 35 göycə ağacı olan 61 yaşlı ailə təsərrüfatçısı 5 ildir, göycə ağacları əkir. Müsahibim festivalın təşkilinin bu məhsulun satışına daha geniş şərait yaratdığını qeyd etdi.

Festivalda iştirak edən xarici ölkə vətəndaşlarının da bu məhsul bayramına böyük maraq göstərdiklərini müşahidə etdik. Naxçıvanda təhsil alan Nigeriya vətəndaşı Joseph Okpamen bildirdi ki, Naxçıvan mənim ikinci evim kimidir. 3 ildir, burada yaşayıram və artıq ikinci dəfədir, “Göycə” festivalına gəlirəm. Göycədən dadan Joseph onun çox dadlı olduğunu, həmçinin göycədən hazırlanan müxtəlif fiqurların maraqlı kompozisiya yaratdığını dedi.

Festivalda ailəsi ilə birlikdə iştirak edən Türkiyə vətəndaşı Sarp Aktuğ söhbət zamanı bildirdi ki, ikinci ildir, Naxçıvana gəlir. Şəhərin təmiz, insanların mehriban olduğunu deyən müsahibim festivalda iştirak etməkdən məmnunluğunu ifadə etdi: – Naxçıvan torpağının ləziz nemətlərinin bir neçəsindən dadmışıq. Onu da deyim ki, burada yetişən göycənin bambaşqa dad-tamı var. Türkiyədə “erik” adlandırdığımız bu meyvənin qurusu bir çox yeməklərin tərkibinə qatılır. Qiymətlər ürəyimcə olduğuna görə satışa çıxarılan məhsullardan kifayət qədər almışam.

Festivalda həmsöhbət olduğumuz İran vətəndaşı Süheyla Sulduzlu Naxçıvan şəhərini çox sevdiyini söylədi: – Naxçıvanda dəfələrlə olmuşam. Bu şəhərin sakinləri həm də çox qonaqpərvərdirlər. Keçən gün naxçıvanlı ailə dostumuzun evində qonaq idik. Orada həm göycədən daddım, həm də öyrəndim ki, bu gözəl şəhərdə yenidən “Göycə” festivalı keçiriləcək. Festivalda iştirak etdiyim üçün sevincliyəm. Keçən il festivaldan aldığım göycə məhsulları evdə ailəmiz tərəfindən də bəyənildi. Gördüyünüz kimi, bu məhsullardan yenə də almışam. Piştaxtalarda nümayiş etdirilən məhsullar çeşidi və xüsusi zövqlə qablaşdırılması ilə seçilir, sərfəli qiymətə təklif olunur.

Almaniya vətəndaşı Ahmed Yıldız deyir ki, bir neçə gündür, Naxçıvanda olmağımdan çox məmnunam. Buraya səfərim səhhətimlə bağlı olsa da, boş vaxtlarımdan səmərəli istifadə edir, bu gözəl məmləkətin seyrinə çıxır, onu yaxından tanımağa çalışıram. Buranın ecazkar təbiəti, gözəl, gülərüz, ən əsası isə tarixi keçmişinə dəyər verən insanları var. Hər gün şəhərinizi gəzir, çox gözəl təəssüratlarla geri qayıdıram. Naxçıvan, həqiqətən də, sirli, sehrli bir diyardır. Müasirliklə qədimliyin vəhdəti olan tarixi abidələr, muzeylər insanı valeh edir. Qonaqpərvərlik və səmimiyyətdən söz düşəndə ilk olaraq Naxçıvanı xatırlayacağam.

Çexiya vətəndaşı Peter Jan Drexcer söhbət zamanı bildirdi ki, bu, mənim Azərbaycana ilk gəlişimdir. Bakıda Naxçıvan adlı gözəl, qədim bir diyarın olduğunu eşitdim və buraya gəlməyə qərar verdim. Burada Turizm-İnformasiya Mərkəzində oldum, oranın əməkdaşlarından diyarınız haqqında məlumat aldıqdan sonra muxtar respublikanı gəzməyə başladım. Dünyanın bir çox dövlətlərini gəzmişəm, amma ən böyük, iqtisadi gücü ilə öyünən ölkələrdə belə, muzey ziyarəti üçün mütləq ödəniş etməli olursan. Amma burada muzeylərin və tarixi abidələrin girişi pulsuzdur. Bu, turistlər və yerli sakinlər üçün cəlbedicidir. Naxçıvan şəhərindəki bütün muzeyləri gəzmişəm. Sizə əminliklə deyə bilərəm ki, çox az yerdə qədimdən bu günə qalan köhnə, uçuq abidələr əvvəlki görkəminə qaytarılıb və qorunub muzeyə çevrilib. Bu, çox böyük bir dəyərdir. Burada ən çox diqqətimi çəkən isə dini tolerantlıq oldu. Yurdunuz islami dəyərlərlə zəngindir. Məscidləriniz çox gözəldir, onları da sərbəst şəkildə ziyarət etdim.

Bugünkü festival isə, bir sözlə, möhtəşəmdir. Hansı pavilyona yaxınlaşdımsa, səmimiyyət, qonaqpərvərlik gördüm. Hər bir sakin, satıcı, ya da alıcı məni bu dadlı məhsula qonaq olmağa dəvət etdi. Sirli dünyanın bu qədim diyarı haqqında nə qədər tərif desəm, azdır, çünki yaşamağa layiq bir yerdir bura.

Nisim Bünyatov deyir ki, əslən azərbaycanlıyam, amma 25 ildir, İspaniyada yaşayıram. Vətənimizin bu qədim, gözəl guşəsində bugünkü müasirlik və inkişafı görmək qürurvericidir. Təmiz, səliqə-sahmanlı küçələrdə gecələr də gündüz kimi aydınlıqdır. Sakitlik insanın ruhunu dincəldir. Səsli-küylü böyük şəhərlərdən buraya gəlib dincəlmək, mən deyərdim ki, cənnətdə olmaq kimidir. Yaşıllıqlar, gül-çiçək adamın zövqünü oxşayır. “Göycə” festivalına bir qrup turistlə birgə gəlmişik. Göycənin dadına söz ola bilməz. Bu meyvə Naxçıvan torpağının adı dillərdə gəzən brend məhsuludur. Buradan qayıdanda aparacağım sovqatlar içərisində mütləq göycə də olacaq.

Qeyd edək ki, festival bazar günü də davam edib və günün sonunda ailə təsərrüfatı sahibləri arasında “Ən yaxşı göycə” müsabiqəsinin qalibləri mükafatlandırılıb. Müsabiqənin nəticələrinə əsasən Naxçıvan şəhəri və Şərur rayonundan müvafiq olaraq İlkin Seyidov və Nazim Abbasov festivalın qalibləri olublar. Babək və Ordubad rayonlarından Vəfadar Eyvazov və Əhəd Məmmədov ikinci, Şərur və Kəngərli rayonlarından Yaqub Həsənov və Rövşən Həsənov isə üçüncü yerə layiq görülüblər. Qaliblərə diplomlar təqdim edilib.

Beləliklə, Naxçıvanın min bir təbii sərvətini, mətbəx zənginliyini və süfrə mədəniyyətini, iqtisadiyyatını sərgiləyən ənənəvi festivallardan biri də uğurla başa çatdı. “Ailə təsərrüfatları ili”ndə keçirilməsi ilə də tarixiləşən IV “Göycə” festivalında müxtəlif rayonlardan olan belə təsərrüfatlar mütəşəkkil şəkildə təmsil olunurdu. Bu isə təsərrüfat sahiblərinin sahibkarlığın inkişafına göstərilən dövlət qayğısından bəhrələnərək istehsalları ilə diyarımızın iqtisadi inkişafına xidmət etməyə çalışdıqlarını bir daha təsdiq edir.

Naxçıvan Muxtar Respublikası
Mədəniyyət Nazirliyinin Mətbuat Xidməti
04.06.2019



Naxçıvan Muxtar Respublikası Mədəniyyət Nazirliyi tərəfindən may ayında əlamətdar və tarixi günlərlə bağlı mədəni-kütləvi tədbirlər davam etdirilmiş, konsertlərin təşkili, kino və teatr tamaşalarının nümayişi diqqətdə saxlanılmışdır.

Ay ərzində Azərbaycan xalqının ümummilli lideri Heydər Əliyevin anadan olmasının 96 illiyinə həsr olunmuş konsert proqramları təşkil olunmuş, distant dərs və tədbirlər keçirilmişdir.

May ayında mədəniyyət müəssisələrində Naxçıvan Muxtar Respublikasının yaradılmasının 95 illiyi, Respublika Günü, Xalçaçı Günü, Beynəlxalq Muzeylər Günü, C.Məmmədquluzadənin 150 illiyi, Ə.Cavidin 100 illiyi, Xalq yazıçısı Hüseyn İbrahimovun 100 illiyi ilə bağlı tədbirlər keçirilmiş, sərgilər yaradılmışdır.

Bu dövrdə Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” 2019-cu il 3 aprel tarixli Sərəncamının icrası ilə bağlı işlər davam etdirilmiş, tələbələr üçün açıq və ustad dərslər keçirilmiş, onlar üçün ekskursiyalar təşkil edilmiş, mədəniyyət müəssisələrində təcrübə keçmələri üçün şərait yaradılmışdır.

May ayında milli dəyərlərimizin yaşadılması, qorunması və təbliği istiqamətində də işlər davamlı olaraq həyata keçirilmişdir. “Şərur” Xalq Yallı Ansamblı ilk dəfə olaraq Ukrayna Respublikasının paytaxtı Kiyevdə rəsmi tədbirdə çıxış etmişdir. Ötən ay “Keçmişdən bu günə Naxçıvan yallıları” adlı müsabiqənin seçim turuna start verilmişdir ki, bu turda da 19 yallı kollektivi iştirak etmişdir. Şərur yallılarının reyestrə alınması, nota köçürülməsi işləri davam etdirilmiş, Sədərək rayonunda “Yallı xalqımızın milli birlik rəmzidir” mövzusunda dəyirmi masa keçirilmişdir.

Mayın 15-də məşhur norveçli xor şefi və müəllimi Per Oddvar Hildre və Azərbaycanın incəsənət xadimlərinin bir qrupu Naxçıvanda olmuş, muxtar respublikanın xor kollektivlərinin ifalarına baxmış və ustad dərs keçmişlər. Keçirilən ustad dərsdə hamiliyə verilmiş müvafiq ixtisaslar üzrə təhsil alan tələbələr də iştirak etmişlər.

Ötən ay “Muzey günləri” çərçivəsində ekskursiyalar davam etdirilmiş, muxtar respublikanın 40-dan çox nazirlik, komitə və baş idarələrinin kollektivlərinin, eləcə də ali və orta ixtisas təhsili müəssisələrinin tələbələrinin muzeylərlə tanışlığı təmin edilmişdir.

Bu dövrdə muzeyləri 18 min 701 əcnəbi vətəndaş olmaqla, ümumilikdə 60 min 380 tamaşaçı ziyarət etmişdir. Muzey fondlarının zənginləşdirilməsində muxtar respublika sakinləri ilə bərabər, məktəblilər də fəal iştirak etmiş, muzeylərə 510 yeni eksponat daxil olmuşdur. Muzeylərdə 2 distant, 43 açıq dərs keçirilmiş, 7 tədbir olmuş və 7 sərgi yaradılmışdır.

May ayında kitabxanaların fəaliyyəti də diqqətdə saxlanılmış, mədəni-kütləvi tədbirlərin səmərəliliyinə diqqət artırılmışdır. Naxçıvan Muxtar Respublikası Ali Məclisi Sədrinin 2017-ci il 28 avqust tarixli Sərəncamı ilə təsdiq edilmiş “Oxunması zəruri olan kitabların Siyahısı”nda yer alan 31 kitabın müzakirəsi keçirilmişdir. Bu dövrdə kitabxanalara 395 adda 806 nüsxə çap məhsulu daxil olmuşdur. Kitabxanalarda yeni oxucu sayı 306, oxucu gəlişi 9 min 815, kitab verilişi 52 min 305 nüsxə olmuşdur. Həmçinin elektron kataloqa 476, şəbəkəyə isə 50 kitab işlənmişdir.

Ötən dövrdə muxtar respublikanın klub müəssisələrində də bir sıra mədəni-kütləvi tədbirlər təşkil olunmuş, Babək rayonunun Şıxmahmud kəndində “Xalq yaradıcılığı günü” keçirilmişdir.

Muxtar respublikanın rayon mərkəzlərində əhalinin asudə vaxtının səmərəli təşkili məqsədilə konsertlər davam etdirilmiş, tamaşa və filmlər nümayiş etdirilməklə, keçirilən tədbirlərin forma müxtəlifliyinə diqqət artırılmışdır. Ay ərzində rayon mədəniyyət saraylarında 7 konsert və 7 tamaşa təşkil olunmuşdur. Naxçıvan Dövlət Filarmoniyasının, Naxçıvan Dövlət Uşaq Filarmoniyasının, Naxçıvan Musiqi Kollecinin, mədəniyyət şöbələrinin musiqi kollektivləri keçirilən konsertlərdə fəal iştirak etmişlər.

Naxçıvan Dövlət Musiqili Dram Teatrı Xaqani Əliyevin “Ehsan xan Kəngərli” tamaşasının bütün rayonlarda nümayişini başa çatdırmış, C.Məmmədquluzadənin pyesləri əsasında səhnələşdirilən “Ölülər və dəlilər” tamaşasını qardaş Türkiyənin Qars şəhərində nümayiş etdirmişdir.

Bu dövrdə Naxçıvan Dövlət Kukla Teatrı “Keçinin qisası”, “Qoğalın sərgüzəşti”, “İnanmayaq tülkülərə”, Naxçıvan Dövlət Uşaq Teatrı “Bu günün çay dəsgahı” tamaşalarını muxtar respublikanın rayonlarında uşaq və məktəblilərə göstərmişlər.

May ayının 20-də start verilən xalq teatrlarının muxtar respublika festivalında Ordubad Rayon Xalq Teatrı “Vəzifə hərisi”, Şahbuz Rayon Xalq Teatrı “Məşədi Qulam qiraət öyrənir” tamaşalarını təqdim etmişlər. Naxçıvan Dövlət Film Fondu da rayon və kəndlərdə olmuş, bədii-sənədli filmlər nümayiş etdirmiş, məktəblilər üçün kinoviktorina keçirmişdir.

Ötən dövrdə muxtar respublikanın uşaq musiqi, incəsənət və bədii sənətkarlıq məktəblərində tədrisin təşkili, müxtəlif tədbirlərin keçirilməsi üçün bir sıra işlər görülmüş, müsabiqələr, sərgilər, hesabat və solo konsertləri, intellektual oyunlar təşkil olunmuşdur. Naxçıvan Musiqi Kollecinin tələbəsi Nəcəf Hacılı isə Riqa və Stokholm şəhərlərində keçirilən I Beynəlxalq incəsənət festival-müsabiqəsində iştirak edərək I yerə layiq görülmüş və tədbirin qala konsertində uğurla çıxış etmişdir.

Naxçıvan Muxtar Respublikası
Mədəniyyət Nazirliyinin Mətbuat Xidməti
03.06.2019



İyunun 3-də Naxçıvan Muxtar Respublikasının 95 illik yubileyi münasibəti ilə Naxçıvan Şəhər 4 nömrəli Uşaq Musiqi Məktəbinin Xalq Çalğı Alətləri Şöbəsinin kamança ixtisası üzrə təhsil alan şagirdlərinin Naxçıvan Dövlət Filarmoniyasında konserti olub.

Nəzərinizə çatdıraq ki, Naxçıvan Muxtar Respublikası Ali Məclisi Sədrinin 21 yanvar 2019-cu il tarixli Sərəncamı ilə Naxçıvan Muxtar Respublikasının 95 illik yubileyinə həsr olunmuş “Tədbirlər Planı” təsdiq edilmişdir. Tədbirlər Planının icrası ilə bağlı Naxçıvan Muxtar Respublikası Mədəniyyət Nazirliyinin təşkilatçılığı ilə silsilə tədbirlərin, konsertlərin keçirilməsi nəzərdə tutulmuşdur.

Konsertdə ilk olaraq Müslüm Maqomayevin “Şah İsmayıl” operasından parça səslənmişdir. Qeyd edək ki, ansamblın bədii rəhbəri Hüseyn Tağıyevdir.

Konsert proqramının davamında şagirdlər tərəfindən tanınmış Azərbaycan bəstəkarlarından V.Adıgözəlovun “Qərənfil”, Z.Bağırovun “Romans”, S.Ələsgərovun “Tarantella”, H.Xanməmmədovun “Konsert II hissə”, N.Quliyevin “Ədalətsiz kaman”, T.Quliyevin “Sən mənimsən, mən sənin”, Q.Hüseynlinin “Çahargaha bənzər”, Niyazinin “Arzu” adlı musiqi əsərləri ifa edilmişdir. Proqramda dünya bəstəkarlarından Dinikunun “Mart yallısı”, Larincenin “Tibilisi haqqında mahnı”, R.Korsakovun “Hind qonağının rəqsi”, İ.Bramsın “Macar rəqsi” musiqi əsərlərinə də yer verilmişdir.

Naxçıvan Şəhər 4 nömrəli Uşaq Musiqi Məktəbinin şagirdlərindən Xəyal Həsənovun, Ceyran Hüseynzadənin, Hakimə Bağırovanın, Ağgül Sadiqovanın, Samuray Əliyevin, Candaş Məmmədsoyun, Sinan Əliyevin ifasında səslənən musiqilər tədbir iştirakçılarında xoş ovqat yaratmışdır.

Tədbirin sonunda məktəbin “Nağaraçalanlar” ansamblının ifasında “Qarabağ kompozisiyası” əsəri dinləyicilərə təqdim edilmişdir.

Konsert proqramı tədbir iştirakçıları tərəfindən maraqla qarşılanmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
03.06.2019



İyunun 3-də Naxçıvan Muxtar Respublikası Mədəniyyət Nazirliyinin təşkilatçılığı ilə Naxçıvan şəhərindəki Gənclər Mərkəzində Naxçıvan Musiqi Kollecinin tələbələri arasında “Lira” musiqili-intellektual oyununun final mərhələsi keçirilib.

Oyun başlanmazdan əvvəl Naxçıvan Muxtar Respublikası Mədəniyyət Nazirliyinin baş məsləhətçisi Leyla Əlimərdanova çıxış edərək bildirib ki, “Lira” musiqili-intellektual oyunun təşkili ilə bağlı qrafik tərtib edilmişdir. Qrafik əsasında 2018-2019-cu tədris ili ərzində keçirilən seçim turlarında qalib gəlmiş komandalar bugün keçiriləcək final mərhələsində iştirak edəcəklər. O qeyd edib ki, belə oyunların keçirilməsində əsas məqsəd tələbələrin biliyinin artırılması və onların intellektual səviyyəsinin yüksəldilməsinə şərait yaratmaqdır.

Daha sonra final oyununda iştirak hüququ qazanmış “Simfoniya”, “Bayatı-Şiraz” və “Melodiya” komandalarının adları təqdim edilib və oyunun şərtləri açıqlanıb. Oyunun şərtlərinə görə, final mərhələsi dörd turdan ibarətdir. Birinci turda görkəmli bəstəkarların həyat və yaradıcılıq yoluna dair, ikinci turda nəzəri fənlər üzrə, üçüncü turda isə Azərbaycan xalq yaradıcılığına aid suallar təqdim olunurr. Son turda musiqi əsərlərini dinləmə yolu ilə təyin etmə formatında suallar verilir. Qiymətləndirmə 100 ballıq sistemlə aparılır, sonda ən yüksək bal toplamış komandalar arasından I, II, III yerlərin tutmuş komandalar müəyyənləşdirilir.

Maraqlı və gərgin keçən musiqili-intellektual oyunda komandalar sualları cavablandırmaqda fəallıq göstəriblər. Onlar görkəmli Azərbaycan və dünya bəstəkarları əsərlərini dinləmə yolu ilə təyin ediblər, musiqinin ümumi-nəzəri məsələləri ilə bağlı sualları cavablandırıblar.

Oyunun yekununa görə “Simfoniya” komandası I, “Melodiya” komandası II, “Bayatı-Şiraz” komandası III yeri tutmuşdur.

Naxçıvan Muxtar Respublikası
Mədəniyyət Nazirliyinin Mətbuat Xidməti
03.06.2019



1 iyun – Uşaqları Beynəlxalq Müdafiə Günü münasibətilə Naxçıvan Muxtar Respublikası Təhsil, Əmək və Əhalinin Sosial Müdafiəsi, Mədəniyyət, Səhiyyə nazirlikləri, Ailə, Qadın və Uşaq Problemləri üzrə Dövlət Komitəsinin təşkilatçılığı ilə Naxçıvan Şəhər Körpələr Evi və Ailələrə Dəstək Mərkəzində tədbir keçirilib.

Tədbirdə Naxçıvan Muxtar Respublikasının Təhsil naziri Rəhman Məmmədov, Əmək və Əhalinin Sosial Müdafiəsi naziri Nicat Babayev, Ailə, Qadın və Uşaq Problemləri üzrə Dövlət Komitəsinin sədri Ramilə Seyidova və Səhiyyə nazirinin müavini Samrat Gəncəyeva çıxış edərək uşaqları bayram münasibətilə təbrik edib, onlara cansağlığı, firavan həyat arzulayıblar. Qeyd olunub ki, muxtar respublikamızda sağlamlıq imkanları məhdud uşaqların cəmiyyətə inteqrasiyası, onların təhsilinin, reabilitasiyasının səmərəli təşkili diqqət mərkəzində saxlanılır.

Mərkəzin baş həkimi Rəsmiyyə Xasıyeva göstərilən qayğıya görə dövlətimizə minnətdarlığını bildirib. Sonra 18 nəfər sağlamlıq imkanları məhdud uşağa bayram münasibətilə hədiyyələr verilib. Tədbirin bədii hissəsində Məhəmməd Tağı Sidqi adına Naxçıvan Dövlət Kukla ­Teatrının aktyorlarının ifasında bir-birindən maraqlı tamaşalar nümayiş olunub, uşaqlar üçün bayram ab-havası yaradılıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
03.06.2019



“Naxçıvanqala” Tarix-Memarlıq Muzey Kompleksində növbəti IV “Göycə” festivalı keçirilir.

Əvvəlcə festivalın açılış mərasimi olub. Tədbirin aparıcıları qeyd edib ki, qədim Naxçıvan zəngin mədəniyyəti, çoxəsrlik tarixi ilə yanaşı, bu torpaqda yetişən nemətləri ilə də dünyada tanınır. Naxçıvanın istər təbii duzu və mineral bulaqları, istərsə də barlı-bəhərli bağlarında yetişən növbənöv meyvələri süfrələrimizin dadı-tamına, bərəkətinə çevrilib. Bütün bunlara görədir ki, hələ orta əsrlərdə səyyahlar Naxçıvanı “meyvə cənnəti” adlandırıblar. Naxçıvanda hər mövsümün öz meyvəsi vardır. Bu meyvələr içərisində öz dadı-tamı ilə seçilən, yalnız Naxçıvanda bitən bir meyvə də vardır ki, o da göycədir. Naxçıvanlı bağbanların, xalq seleksiyaçılarının əməyinin bəhrəsi olan Naxçıvan göycəsinin tarixi VII əsrə gedib çıxır. Bu gün Naxçıvan şəhərində və muxtar respublikanın rayonlarında göycənin müxtəlif növləri yetişdirilir. Aparıcılar 2016-cı ildən başlayaraq keçirilən “Göycə” festivalının əhəmiyyətindən danışaraq bildiriblər ki, Naxçıvanda yetişən göycə ilə yanaşı, ləziz dadı olan alma, armud, qoz, badam, üzüm sortları da ölkəmizdə və dünyada yaxşı tanınır. Azərbaycan Milli Elmlər Akademiyasının Naxçıvan Bölməsinin Bioresurslar İnstitutunun elmi işçisi, aqrar elmlər doktoru Varis Quliyev çıxış edərək deyib ki, elmə Naxçıvan göycəsi sortunun xalq seleksiyası yolu ilə yaradıldığı məlumdur. Göycəsi sortunun adı becərildiyi ərazinin və faraş yeyildiyi məhsulun rənginə uyğun olaraq adlandırılıb. “Göycə” sözü göyümtül-yaşıl mənasında olmaqla bərabər, “yeni”, “təzə” mənasını da ifadə edir. O muxtar respublikada yazın ilk yeyilən meyvə sortlarından biridir. Naxçıvanın torpaq-iqlim şəraiti göycənin tez böyüməsi, inkişafı, bol və yüksək keyfiyyətli məhsul verməsi üçün olduqca əlverişlidir. Əsasən Arazboyu maili düzənlik ərazilərdə Naxçıvan göycəsi sortundan ibarət bağların salınması üçün olduqca əlverişli ekoloji mühit vardır. Çoxillik göycə ağacları 10-25 il normal məhsul verir, hər bir ağacdan ildə təqribən 50 kiloqrama qədər məhsul toplanılır. Naxçıvan göycəsi, adətən yazda, yayda və payızda müxtəlif calaq üsulları ilə çoxaldılır. Calaqaltı kimi çəyirdəkli meyvələrin tinglərindən istifadə edilir. Calaqetmədə albuxara ağacından istifadə etdikdə göycə meyvələri nisbətən iri və şirin, badam ağacına calaq edildikdə isə göycə ağacları uzunömürlü olur.

Varis Quliyev muxtar respublikada meyvəçiliyin inkişafına göstərdiyi diqqət və qayğıya görə festivalın iştirakçıları adından Naxçıvan Muxtar Respublikası Ali Məclisinin Sədrinə minnətdarlıq edib.

Tədbirin bədii hissəsində Naxçıvan Dövlət Filarmoniyasının Mahnı və Rəqs Ansamblının ifasında səsləndirilən şən mahnılar və rəqslər festival iştirakçıları tərəfindən alqışlarla qarşılanıb.

Qeyd edək ki, festivala muxtar respublikanın şəhər və rayonlarından 250-dən çox ailə təsərrüfatı sahibi 18 tondan artıq göycə gətirib. Festivalda göycədən hazırlanan, mürəbbə, cem, əzmə, kompot və araqların sərgisi və satışı da təşkil olunub.

Festivalda həmsöhbət olduğumuz təsərrüfat sahiblərindən Naxçıvan şəhər Qaraxanbəyli kənd sakini Elmir Əliyev qeyd edib ki, artıq ikinci dəfədir “Göycə” festivalında iştirak edir. O bildirib ki, 3 hektara yaxın sahədə göycə yetişdirir və festivalda satış üçün 400 kiloqramdan artıq meyvə gətirib. Elmir Əliyev məhsuluna marağın böyük olduğunu da vurğulayıb.

Culfa rayonunun Göydərə kənd sakini, ailə təsərrüfatı sahibi olan Vəli Əliyev isə bizimlə söhbətində bildirib ki, uzun illərdir meyvəçiliklə məşğul olur. Amma son dörd ildə göycə yetişdirməklə də məşğul olduğunu deyən Vəli Əliyev festivala satış üçün 200 kiloqrama yaxın məhsul gətirdiyini qeyd edib.

Kəngərli rayon Çalxanqala kənd sakini Zaur Həsənov festivala satış üçün göycə ilə bərbər 20 litrə yaxın göycə arağı da gətirdiyini deyib. Həmsöhbət olduğumuz ailə təsərrüfatı sahibləri gətirdikləri göycə məhsuluna marağın böyük olduğunu bildirib, festivalın təşkilinə görə dövlətimizə minnətdarlığını ifadə ediblər.

Qeyd edək ki, festival sabah da davam edəcək və günün sonunda ailə təsərrüfatı sahibləri arasında “Ən yaxşı göycə” müsabiqəsi ilə tədbirə yekun vurulacaq.

Naxçıvan Muxtar Respublikası
Mədəniyyət Nazirliyinin Mətbuat Xidməti
03.06.2019



Mayın 31-də Naxçıvan Dövlət Filarmoniyasının Estrada Orkestrinin Naxçıvan Muxtar Respublikasının yaradılmasının 95 illik yubileyi ilə bağlı Kəngərli Rayon Mədəniyyət Sarayında konserti olub.

Konsertin aparıcısı bildirib ki, bu il Naxçıvan Muxtar Respublikasının yaradılmasının 95 illiyi tamam olur. Naxçıvan Muxtar Respublikası Ali Məclisinin Sədri 21 yanvar 2019-cu il Sərəncamı ilə “Naxçıvan Muxtar Respublikasının 95 illiyinə həsr olunmuş Tədbirlər Plan”nı təsdiq etmişdir. Muxtar respublikanın musiqi kollektivləri də bu tədbirlərdə fəal iştirak edirlər. Bu günkü konsert proqramı da bu yubileyə həsr olunmuşdur.

Vurğulanıb ki, son 20 ildən artıq dövrdə qədim diyarımızın siması dəyişmiş, şəhər, kənd və rayon mərkəzlərində irimiqyaslı tikinti-quruculuq, abadlıq və bərpa işləri həyata keçirilmiş, tarixə, mədəniyyətə, səhiyyəyə, təhsilə qayğı artmış, yeni infrastruktur obyektləri tikilmiş, muxtar respublika inkişaf və intibaha qovuşmuşdur.

Qeyd edək ki, Naxçıvan Muxtar Respublikası Ali Məclisi Sədrinin 2012-ci il yanvarın 10-da imzaladığı Sərəncam ilə yaradılan bu musiqi kollektivi qısa vaxtda estrada həvəskarlarının rəğbətini qazanıb. Kollektiv rəngarəng repertuarı ilə ictimaiyyət qarşısında müntəzəm çıxış etməkdədir. Orkestrin bədii rəhbəri və baş dirijoru Azərbaycan Respublikasının Əməkdar mədəniyyət işçisi Nizami Məmmədovdur. Estrada orkestri yarandığı gündən repertuar zənginliyinə xüsusi diqqət yetirir. Orkestrin repertuarında Azərbaycan bəstəkarları ilə yanaşı, Avropa və rus bəstəkarlarının musiqi əsərlərinə də geniş yer verilir. Konsertdə Estrada orkestrinin ifasında Emin Sabitoğlunun “Kəpənək” mahnısı səsləndirilmişdir. Sonra Estrada Orkestrinin gənc solistləri Samir İsmayılov və Ruhiyyə Hüseynova Oqtay Kazımi “Yaşayır insan”, “Taleyim”, Emin Sabitoğlu “Şirin dil”, Ramiz Mirişli “Bir xumar baxışla” və s. mahnılar ifa etmişlər. Azərbaycan Respublikasının Əməkdar artistləri Mübariz Əsgərov, Tural Nəcəfov və Naxçıvan Muxtar Respublikasının Əməkdar artisti Azər Cəfərlinin ifasında Azərbaycan bəstəkarlarının populyar estrada mahnıları səsləndirilib. Onların ifasında səslənən Oqtay Kazımi, Tofiq Quliyev, Nadir Əzimov, Polad Bülbüloğlu, Elza İbrahimova, Emin Sabitoğlunun “Toy olsun, bayram olsun”, “Qurban olum”, “Mənə dəniz verin”, “Gəl ey səhər”, “Bağçamızdan keçmisən”, “Zaman” və başqa estrada mahnıları alqışlarla qarşılanıb.

Konsertdə estrada mahnıları ilə bərabər dünya musiqisinin böyük sənətkarlarının müxtəlif musiqi janrlarında yazdığı melodiyalar da səsləndirilib. Estrada Orkestrinin bu dəfəki konserti də maraqlı repertuar zənginliyi ilə seçilirdi. Konsert Orkestrin gənc solistləri Samir İsmayılov və Ruhiyyə Hüseynovanın ifasında “Səadət” mahnısının ifası ilə başa çatıb. Konsertə Elvin Əliyarov dirijorluq etmişdir.

Naxçıvan Dövlət Filarmoniyasının Estrada Orkestrinin bir saatdan artıq davam edən konsert proqramı rayon sakinlərinə xoş ovqat bəxş edib.

Naxçıvan Muxtar Respublikası
Mədəniyyət Nazirliyinin Mətbuat Xidməti
31.05.2019



Mayın 31-də Naxçıvan Dövlət Uşaq Teatrı böyük yazıçı və dramaturqumuz Cəlil Məmmədquluzadənin “Çay dəsgahı” pyesinin motivləri əsasında hazırladığı “Bu günün çay dəsgahı” iki şəkilli alleqorik komediyasını Şahbuz Rayon Mədəniyyət Sarayında nümayiş etdirib.

Zahirən təmsilvari və əyləncəli təsir bağışlayan, ədəbiyyatımızda ilk alleqorik və mənzum dram əsəri olan bu dram əsərinin motivləri əsasında hazırlanan tamaşa bu günümüzlə əlaqələndirilib. Qeyd etmək lazımdır ki, bu əsər milli uşaq dramaturgiyamızda ilk nümunə kimi də diqqəti cəlb edə bilər. Böyük yazıçının əsərindəki əsas mövzu saxlanılsa da tamaşanın quruluşçu rejissoru Nurbəniz Niftəliyeva əsərin personajlarını həm də müasir dövrün elmi-texniki imkanları ilə uyğunlaşdırmağa çalışıb və personajların hamısına müasir adlar da verməyi unutmayıb. Əsərin süjet xətti müqəssirin tapılması üzərində qurulmuşdur. Tamaşadakı bütün dialoqlar da buna xidmət edir. Samovar (Sarvan), Padnos (Pərvanə), Truba (Totu), Çaynik (Ceka), Maşa (Məşdi), Qaşıq (Qoşqar), Stəkan (Sitarə), Nəlbəki (Nüşabə) həm də cansız əşyadan canlı personaja çevriliblər.

Əsərin yalnız bir canlı obrazının – Nökər Əlinin adı dəyişməyib.

Tamaşanın əsas mövzusu isə quruluşçu rejissor tərəfindən saxlanılıb. Rəqslərin də quruluşunu verən Nurbəniz Niftəliyeva və musiqi tərtibatçısı Mirsaleh Seyidov tamaşaya dinamiklik gətirə biliblər. Tamaşadakı rolları Uğur Nəsirli, Nurlan Qafarov, Səkinə Məmmədova, Nihad Mahmudov, Mirmehdi Seyidov, Tuncay Əşrəfov, Ülvi Bədəlov, Aysu Dünyamalıyeva, Heyran Abdullayeva maraqla təqdim etməyi bacarıblar. Balaca aktyorlar tamaşada əslində iki surət canlandırırlar.

Qeyd edək ki, “Çay dəsgahı” pyesi əsasında C.Məmmədquluzadə adına Naxçıvan Dövlət Musiqili Dram Teatrında və M.T.Sidqi adına Naxçıvan Dövlət Kukla Teatrında vaxtilə eyni adlı tamaşa hazırlanıb.

Tamaşa izləyicilər tərəfindən maraqla qarşılanıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
31.05.2019



AMEA Naxçıvan Bölməsinin Tarix, Etnoqrafiya və Arxeologiya İnstitutunun direktoru, AMEA-nın müxbir üzvü Fəxrəddin Səfərlinin “Naxçıvan şəhərinin epiqrafik abidələri” adlı monoqrafiyasının təqdimatı keçirilib.

Tədbiri bölmənin sədri, akademik İsmayıl Hacıyev açaraq Naxçıvan şəhərinin epiqrafik abidələri barədə məlumat verib. Bildirilib ki, Naxçıvan Muxtar Respublikası ərazisində xeyli sayda epiqrafik abidələr olsa da, müstəqillik illərinə qədər onlar sistemli şəkildə tədqiqata cəlb edilməyib.

Akademik bu gün tarixi-­mədəniyyət abidələri, o cümlədən memarlıq nümunələrinin dövlət qayğısı ilə əhatə olunduğunu, qorunub saxlanılması, bərpası və təbliği istiqamətində bir sıra işlərin görüldüyünü xatırladıb. O, Naxçıvan Muxtar Respublikası Ali Məclisi Sədrinin “Naxçıvan Muxtar Respublikası ərazisindəki tarix və mədəniyyət abidələrinin qorunması və pasportlaşdırılması işinin təşkili haqqında” 2005-ci il 6 dekabr tarixli Sərəncamına əsasən 2006-cı ildən etibarən regiondakı abidələrin sistemli şəkildə öyrənildiyini söyləyib.

Daha sonra institutun şöbə müdiri, tarix üzrə fəlsəfə doktoru, dosent İlhami Əliyevin “Naxçıvan şəhərinin epiqrafik abidələri kitabı haqqında bir neçə söz” mövzusunda məruzəsi dinlənilib. Bildirilib ki, əsərdə Naxçıvan şəhərində zəmanəmizədək gəlib çatan memarlıq abidələrinin üzərində qalan kitabələrlə yanaşı, vaxtilə tədqiqatçılar tərəfindən öyrənilən, lakin müəyyən səbəblərdən bu günümüzədək gəlib çatmayan bir neçə kitabə, həmçinin Yusif Küseyir oğlu, Möminə xatın türbələri, Qoşa minarəli baştağ, Naxçıvan şəhər İmamzadəsinin və Naxçıvan şəhər Came (Cəfəriyyə) məscidinin kitabələri, eləcə də Naxçıvan Dövlət Tarix Muzeyi, “Naxçıvanqala” Tarix-Memarlıq Muzey Kompleksi və Açıq Səma Altında Muzeydə nümayiş etdirilən epiqrafik abidələrlə bağlı məlumatlar yer alıb. O, kitabələrin Azərbaycan dilinə mətn tərcüməsinin və onların şəkillərinin nəşrə daxil edildiyini deyib.

Təqdimat mərasimində institutun şöbə müdirləri, tarix üzrə fəlsəfə doktorları Asəf Orucov və Toğrul Xəlilov yeni nəşrin elmi dəyərindən söz açıblar.

Sonda müəllif çıxış edərək minnətdarlığını bildirib.

Naxçıvan Muxtar Respublikası
Mədəniyyət Nazirliyinin Mətbuat Xidməti
31.05.2019



Mayın 30-da Cəlil Məmmədquluzadə adına Naxçıvan Dövlət Musiqili Dram Teatrı Naxçıvan Muxtar Respublikasının yaradılmasının 95 illiyinə həsr olunmuş Xaqani Əliyevin “Ehsan xan Kəngərli” tarixi dramı əsasında hazırladığı tamaşanı Culfa Rayon Mədəniyyət Sarayında rayon sakinlərinə təqdim etmişdir.

“Ehsan xan Kəngərli” tarixi dramı XIX əsrin əvvəllərində Naxçıvan xanlığında baş verən ictimai-siyasi hadisələri əks etdirir. Rusiya-İran müharibəsi və Naxçıvanın ruslar tərəfindən işğal olunması əsərin əsas süjet xəttini təşkil edir.

İlk dəfə Naxçıvan teatrında səhnəyə qoyulan “Ehsan xan Kəngərli” tamaşasında Naxçıvan xanlığının düşdüyü çətin vəziyyətdən çıxış yolu axtaran Ehsan xanın siyasi düşüncələri və xüsusən ermənilərin Naxçıvana yerləşdirilməsinin qarşısını almaq üçün rus diplomatı Aleksandr Sergeyeviç Qriboyedovla apardığı söhbətlər olduqca maraq doğurur. Naxçıvanın gələcək taleyi ilə bağlı Kəngərli xanları arasında yaranan fikir ayrılığı və Ehsan xanın təşəbbüsü ələ alaraq xalqın taleyini hər şeydən üstün tutması əsərdə konfliktin gərginliyini daha da artırır.

Tamaşada Ehsan xanla yanaşı, Abbasqulu ağa Bakıxanovun da bədii obrazı diqqəti cəlb edir. Bakıxanov erməni fitnələrinin qarşısını almaq üçün Ehsan xana çıxış yolu tapmaqda kömək edir.

“Ehsan xan Kəngərli” tamaşasında dövrün ictimai-siyasi hadisələri faktlarla səhnəyə gətirilir ki, bu da tamaşaçını cəlb edir.

Bu maraqlı tamaşanın elmi məsləhətçisi akademik İsmayıl Hacıyev, quruluşçu rejissoru, Azərbaycan Respublikasının Xalq artisti Kamran Quliyev, quruluşçu rəssamı, Naxçıvan Muxtar Respublikasının Əməkdar rəssamı Əbülfəz Axundov, musiqi tərtibatçısı Azərbaycan Respublikasının Əməkdar mədəniyyət işçisi İmamqulu Əhmədovdur.

Tamaşada Azərbaycan Respublikasının Xalq artistləri Rza Xudiyev (Ehsan xan), Rövşən Hüseynov (Kalbalı xan), Həsən Ağasoy (Kərim xan), Azərbaycan Respublikasının Əməkdar artistləri Bəhruz Haqverdiyev (Şıxəli bəy), Əli Əliyev (Paskeviç), Əbülfəz İmanov (Safraz Saakov), aktyorlar Zəminə Məmmədova (Çimnaz xanım), Ələsgər Quliyev (Nəzərəli xan), Səyyad Məmmədov (Qriboyedov), Zakir Fətəliyev (Məmmədrza xan), Anar Eyvazov (rus zabiti), Nazlı Hüseynquliyeva (yaşlı qadın), Mehri Nəbiyeva (Nina Çavçavadze), Cəbrayıl Nəbiyev (Zeynal Sultan), Uğur Nəsirli (Əsgər) maraqlı obraz və personajlar yaratmışlar.

Tamaşa Culfa rayon sakinləri tərəfindən maraqla qarşılanmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
30.05.2019



30 may 2019-cu il tarixdə Şahtaxtinskilər Muzeyində Behbud ağa Şahtaxtinskinin anım gününə həsr olunmuş tədbir keçirilmişdir. Tədbiri Kəngərli Rayon Mədəniyyət Şöbəsinin müdiri Məhərrəm Əliyev açaraq bildirib ki, Azərbaycanda elmin, mədəniyyətin, təhsilin, səhiyyənin, dövlət quruculuğunun və hərb sənətinin inkişafında Şahtaxtinskilərin xüsusi yeri və böyük xidmətləri vardır. Şahtaxtinskilər nəslinin ən görkəmli nümayəndələrindən biri tanınmış dövlət xadimi və diplomat, beynəlxalq Moskva və Qars müqavilələrinin bağlanmasında müstəsna xidmətlər göstərmiş Behbud ağa Şahtaxtinskidir. O, bütün həyatını Azərbaycan xalqının mənafeyinə həsr edib, milli maraqları hər şeydən uca tutub.
Şahtaxtinskilər Muzeyinin direktoru Ruzugül Qazıbəyova “Behbud ağa Şahtaxtinskinin tariximizdə misilsiz xidmətləri” mövzusunda, Z.Əliyeva adına Şahtaxtı kənd tam orta məktəbinin müəllimi Anar Qasımov “Behbud ağa Şahtaxtinskinin həyatı və şərəfli ömür yolu” mövzusunda, Şahtaxtı Kənd Kitabxana Filialının müdiri Fatma Musayeva “Behbud ağa Şahtaxtinskinin Naxçıvan tarixində atdığı mühüm addımlar” mövzusunda çıxış edərək bildiriblər ki, Behbud ağa Şahtaxtinski Azərbaycanın dövlətçilik, diplomatiya və ictimai həyatında mühüm yer tutan böyük tarixi şəxsiyyətdir. Bu gün Behbud ağa Şahtaxtinski deyərkən gözlərimiz önündə əqidəli, ziyalı və alovlu vətənpərvər dayanır. Qısa, lakin mənalı həyatını Azərbaycan naminə mübarizəyə həsr edən, bu mübarizənin ilk qaliblərindən və qurbanlarından olan Behbud ağa Şahtaxtinski üzərinə düşən tarixi missiyanı şərəflə yerinə yetirib. Onun həyatı və mübarizəsi siyasi tariximizdə vətəndaşlıq və dövlətçilik etalonudur.

Vurğulanıb ki, Behbud ağa Şahtaxtinskinin taleyüklü xidmətlərindən biri də Azərbaycanın ilk milli diplomatı kimi beynəlxalq Moskva və Qars müqavilələrində Naxçıvanın statusu ilə bağlı məsələlərin həllində yaxından iştirak etməsidir. Onun peşəkar diplomatik fəaliyyəti və siyasi mübarizəsi nəticəsində bu müqavilələrlə muxtariyyət statusu əldə edərək sərhədləri müəyyənləşdirilən Naxçıvan diyarı Azərbaycanın ayrılmaz tərkib hissəsi kimi tanınıb və təsbit edilib. Behbud ağa Şahtaxtinskinin fəaliyyətində siyasi publisistika da mühüm yer tutur. O, dövlət xadimi kimi mətbuatın rolunu düzgün qiymətləndirib, milləti oyatmaq, tarixi yaddaşı bərpa etmək üçün publisistikanın imkanlarından məharətlə yararlanıb. Mürəkkəb və çətin dövrdə yaşayıb fəaliyyət göstərən Şahtaxtinski ağır, amma şərəfli ömür yaşayıb.

Tədbirin sonunda muzeyin ekspozisiyasına baxış olub.

Naxçıvan Muxtar Respublikası
Mədəniyyət Nazirliyinin Mətbuat Xidməti
30.05.2019



Muxtar respublikamızda həyata keçirilən quruculuq tədbirləri sırasında tarixi mədəniyyət abidələrinin bərpası mühüm yer tutur. Son illərdə qədim diyarımızda onlarla tarixi-memarlıq abidələri əsaslı şəkildə bərpa edilib, onlara ikinci həyat verilərək turizm üçün cəlbediciliyi təmin olunub. Tarixi əhəmiyyəti ilə seçilən belə tikililərdən biri də Şahtaxtı hamamıdır.

Naxçıvan Muxtar Respublikası Ali Məclisi Sədrinin tapşırığına əsasən Şahtaxtı hamamında kompleks bərpa işlərinə başlanılıb.Əvvəlcə hamamın ətrafı və daxilində təmizlik işləri aparılıb, binanın içərisində torpaq işləri görülüb. Hazırda tarixi abidənin təməl hissəsinin möhkəmləndirilməsi üçün binanın daxilində və fasad hissədə beton işləri davam etdirilir, uçulan yerlərin bərpası üçün hörgü işləri aparılır, pəncərə yerləri qoyulur. Bərpa zamanı hamamın ilkin quruluşunun qorunub saxlanılmasına, işlərin milli memarlıq ənənələri əsasında aparılmasına xüsusi diqqət göstərilir.

Məlumat üçün bildirək ki, XIX əsrin yadigarı olan Şahtaxtı hamamı düzbucaqlı formada olub 210 kvadratmetrlik ərazini əhatə edir. Binanın xaricdən uzunluğu 20, eni 9 metrdir. Müxtəlif ölçülərdə 2 salon, 2 köməkçi otaq və ocaqxanadan ibarət olan kompleks iki hündür günbəzlə tamamlanır. Binanın işıqlandırılması tavanda açılmış bacalar kompleksinin köməyi ilə həyata keçirilib. Tarixi abidənin elmi şəkildə bərpası onun turizm cəlbediciliyini də artıracaqdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
30.05.2019



Naxçıvan Muxtar Respublikası Ali Məclisinin Sədri Vasif Talıbovun diqqət və qayğısı ilə Xalq artisti, görkəmli bəstəkar Tofiq Bakıxanovun "Xoş ovqatlı mahnılar" kitabı Naxçıvanda işıq üzü görüb.

Bakı şəhərində Naxçıvan Muxtar Respublikasının daimi nümayəndəliyinin rəhbəri Bəxtiyar Əsgərov nəfis şəkildə çap edilmiş kitabı bəstəkara təqdim edib. Kitab Əcəmi Nəşriyyat və Poliqrafiya Birliyi tərəfindən çap edilib.

Qeyd edək ki, görkəmli bəstəkar Xalq artisti, Prezident təqaüdçüsü, Bakı Musiqi Akademiyasının professoru, “Şöhrət” ordenli Tofiq Bakıxanov Naxçıvan Muxtar Respublikasının Əməkdar incəsənət ­xadimi adına da layiq görülüb.

Naxçıvan Muxtar Respublikası
Mədəniyyət Nazirliyinin Mətbuat Xidməti
30.05.2019



Naxçıvan Muxtar Respublikası Ali Məclisi Sədrinin 2009-cu il 7 fevral tarixli “Naxçıvan Muxtar Respublikası Xalq yaradıcılığı günlərinin keçirilməsi haqqında” Sərəncamına uyğun olaraq 22 mayda start verilən xalq teatrlarının muxtar respublika festivalı davam edir. Mayın 29-da Şahbuz Rayon Xalq Teatrı Əbdürrəhim bəy Haqverdiyevin “Məşədi Qulam qiraət öyrənir” əsəri əsasında hazırladığı eyniadlı tamaşa ilə festivalın ikinci tamaşasını nümayiş etdirmişdir.

Qeyd edək ki, Şahbuz Rayon Xalq Teatrı 2011-ci ildə Mədəniyyət Evinin dram dərnəyinin bazasında yaradılmışdır. Kollektivin hazırladığı “Ər və arvad”, “Evliykən subay”, “O olmasın, bu olsun”, “Şahsənəm və Gülpəri” və başqa tamaşalar maraqla qarşılanmışdır.

Görkəmli dramaturq özünün “Qiraət” hekayəsini “Məşədi Qulam qiraət öyrənir” adı ilə səhnələşdirmişdir. Əbdürrəhim bəy Haqverdiyevin yaradıcılığına xas olan satira və yumor bu kiçik səhnə əsərində də aydın görünür. Müəllifin tərbiyə vermək ruhu, əxlaqi məsələlərə nüfuz etmək bacarığı baxımından tamaşa maraqla qarşılanır. Sadə, sədaqətli arvadı Şahpərini aldadıb, qiraət öyrənmək adına Nataşanın yanına gedən və “müctəhid” adına yazıq arvadına hazırlatdığı plovu götürüb kef məclisinə aparan yalançı məşədinin düşdüyü vəziyyət tamaşanın əsas mövzusudur. Kiçik həcmli bu pyesdə görkəmli dramaturq ötən əsrin əvvəllərindəki tacirlərin və din adamlarının mənəvi-əxlaqi eybəcərliklərini ortaya qoymuşdur. Əslində özünü din adamı, tacir kimi qələmə verən Məşədi Qulam mənəvi cəhətdən yaramazdır. Rus qızı Nataşa ilə eşq sərgüzəşti yaşamaq adı ilə ailəsini aldadır. Məşədi Qulam qiraət öyrənmək adı ilə Nataşa ilə görüşür. Ailəsini, yaxınlarını aldadır ki, o əslində qiraət öyrənir, savadını artırır. Əslində isə öz pulunu, varını Nataşanın yolunda xərcləməyə hazırdır. Onun əxlaqi-mənəvi davranışı tamaşaçıda ikrah doğurur. Məşədi Qulam əslində ailəsini də aldatmaqla özü də pis vəziyyətdə qalır. Halbuki tamaşanın əvvəlində özünü mömin, dindar kimi göstərir. Tamaşanın finalında rüsvay olan Məşədi Qulam pis vəziyyətdə qalır. Arvadı Şahpəri və oğlu Cahangir onun “qiraət öyrənmək dərsini” ifşa edir.

Bu kiçik pyesdə müəllif tacir zümrəsinin mənəvi-əxlaqi dünyasını tənqid edir. Bu zümrənin sözü ilə əməli düz gəlmir. Alıb-aldatmaq, yalan danışmaq, pula hərislik bu zümrəni mənəvi cəhətdən cılızlaşdırmışdır. Tamaşadakı Cahangir, Mirzə Yusif, Məşədi Ramazan obrazları da o dövrün kaloritini yaratmaq baxımından maraqla qarşılanır.

Tamaşanın quruluşcu rejissoru Namiq Mehdiyev, rəssamı Səxavət Paşayev, musiqi tərtibatçısı Emin Hüseynovdur. Tamaşadakı Məşədi Qulam obrazını Elbəyi Qəhrəmanov, Şahpəri obrazını Səadət Abdinova, Cahangir obrazını Abbasəli Abbasov, Məşədi Ramazan obrazını Emin Hüseynov, Mirzə Yusif surətini Vahid Məlikov, Nataşa surətini İlahə Nəcəfova canlandırırlar. Obrazların təbii və canlı təqdimatı, səhnə əsərindəki hadisələrin və əsərin ideyasının olduğu kimi çatdırılması Şahbuz rayon tamaşaçıları tərəfindən alqışlarla qarşılanıb.

Görkəmli dramaturqumuz Əbdürrəhim bəy Haqverdiyevin çox az hallarda səhnəyə qoyulan bu pyesinin Şahbuz Rayon Mədəniyyət Sarayında tamaşaya qoyulması təqdirəlaiqdir. Çünki tamaşaçıların bir çoxu görkəmli dramaturqun iri həcmli pyesləri ilə tanış olsalar da, onun kiçik həcmli pyesləri ilə tanış deyillər. Bu mənada Şahbuz Rayon Xalq Teatrının hazırladığı tamaşa maraqla qarşılanır.

Festivalda iyunun 4-də Naxçıvan Şəhər Xalq Teatrı görkəmli satirik yazıçı Seyfəddin Dağlının “Adı sənin, dadı mənim” komediyası əsasında hazırlanmış tamaşa ilə səhnəyə çıxacaqdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
30.05.2019



Mayın 29-da Naxçıvan Şəhər Gənclər Mərkəzində Naxçıvan Muxtar Respublikasının Mədəniyyət Nazirliyinin iş planına əsasən rayon mədəniyyət şöbələrinin nəzdində fəaliyyət göstərən müəssisələrin gənc əməkdaşları arasında “Mədəni irs” intellektual oyunu keçirilib.

Oyun başlamazdan əvvəl Naxçıvan Muxtar Respublikası Mədəniyyət Nazirliyinin aparıcı məsləhətçisi Elvin Əhmədov çıxış edərək bildirib ki, nazirlik ikinci dəfədir ki, “Mədəni irs” intellektual oyununu keçirir. Oyunun keçirilməsində əsas məqsəd gənclərin mədəni irsimiz haqqında biliklərini sınamaq, asudə vaxtının səmərəli keçirilməsinə nail olmaq, onların dünyagörüşünü zənginləşdirməkdir.

Sonra aparıcı oyunda iştirak edən 9 komanda haqqında məlumat vermişdir. Bildirilmişdir ki, bu turda “Araz” (Naxçıvan Şəhər Mədəniyyət Şöbəsi), “Arpaçay” (Şərur Rayon Mədəniyyət Şöbəsi), “Nuh yurdu” (Kəngərli Rayon Mədəniyyət Şöbəsi), “Batabat” (Şahbuz Rayon Mədəniyyət Şöbəsi), “Qeyrət qalası” (Sədərək Rayon Mədəniyyət Şöbəsi), “Turan” (Babək Rayon Mədəniyyət Şöbəsi), “Dübəndi” (Ordubad Rayon Mədəniyyət Şöbəsi), “Əlincəqala” (Culfa Rayon Mədəniyyət Şöbəsi) komandaları iştirak edirlər.

Komandalara seçim turunun keçirilməsi haqqında məlumat verilərək bildirilmişdir ki, ən çox bal toplayan 4 komanda II tura (finala) vəsiqə qazanacaqdır. Birinci turda komandaların hər bir iştirakçısı üçün 5 sual səsləndiriləcəkdir. İlk 4 sual Azərbaycanın və muxtar respublikanın mədəniyyəti və incəsənəti ilə bağlı olacaqdır. Sonuncu sual Azərbaycan filmlərindən göstərilən fraqmentlərin düzgün müəyyən edilməsi ilə cavablandırılacaqdır.

İkinci turda (finalda) isə komandaların hər bir iştirakçısına 10 sual veriləcəkdir. İlk 9 sual yenə də Azərbaycanın və Naxçıvanın mədəniyyəti və incəsənəti ilə bağlı, sonuncu sual isə Azərbaycan filmlərindən fraqmentlər göstərilməklə 40 sual veriləcəkdir. Hər bir sualın düzgün cavabı 100 balla qiymətləndiriləcəkdir. I, II, III yerlərin qalibi elan olunacaq. Sonuncu komanda diplomla mükafatlandırılacaqdır.

Maraqlı və gərgin keçən “Mədəni irs” intellektual oyununda komandaların gənc iştirakçıları mədəni irsimizlə bağlı sualları cavablandırmaqla fəallıq göstəriblər.

“Əlincəqala” (Culfa Rayon Mədəniyyət Şöbəsi) I, “Turan” (Babək Rayon Mədəniyyət Şöbəsi) II, “Qeyrət qalası” (Sədərək Rayon Mədəniyyət Şöbəsi) komandaları III yeri tutublar. Qalib komandalar diplomlarla təltif olunub.

Naxçıvan Muxtar Respublikası
Mədəniyyət Nazirliyinin Mətbuat Xidməti
29.05.2019



Azərbaycanın Qarsdakı Baş Konsulluğunun təşkilatçılığı ilə Azərbaycan Xalq Cümhuriyyətinin 101-ci ildönümü münasibətilə Cəlil Məmmədquluzadə adına Naxçıvan Dövlət Musiqili Dram Teatrı Türkiyədə qastrolda olub.

Qars Qafqaz Universitetinin konsert salonunda Cəlil Məmmədquluzadənin “Ölülər”, “Anamın kitabı”, “Dəli yığıncağı” və “Ər” pyesləri əsasında səhnələşdirilən “Ölülər və dəlilər” tamaşası oynanılıb.

Əvvəlcə şəhidlərimizin əziz xatirəsi bir dəqiqəlik sükutla yad olunub.

Azərbaycanın Qarsdakı Baş konsulu Nuru Quliyev Azərbaycan Xalq Cümhuriyyətinin tarixi və süqutunun səbəblərindən, müasir dövlətimizin inkişaf istiqamətlərindən bəhs edib. Həmçinin qeyd olunub ki, Azərbaycan xalqı tarixin bütün dövrlərində dünya teatr mədəniyyətinə böyük töhfələr verib. Bu işdə Naxçıvan Dövlət Musiqili Dram Teatrının özünəməxsus yeri və rolu vardır.

Sonra Naxçıvan Dövlət Musiqil iDramTeatrının direktoru, Xalq artisti Rza Xudiyev çıxış edərək Cəlil Məmmədquluzadənin yaradıcılığı, eləcə də görkəmli ədibin yubileyinin qeyd olunması ilə bağlı görülən işlərdən danışıb. Diqqətə çatdırılıb ki, ədibin “Ölülər”, “Anamın kitabı”, “Dəli yığıncağı” müxtəlif illərdə Naxçıvan teatrında tamaşaya qoyulmuşdur. “Ər” pyesi isə akademik İsa Həbibbəyli tərəfindən 1987-ci ildə yazıçının arxivindən tapılaraq çap etdirilmişdir. Azərbaycan Respublikasının Əməkdar artisti Tofiq Seyidov Cəlil Məmmədquluzadənin “Ölülər”, “Anamın kitabı”, “Dəli yığıncağı” və “Ər” pyeslərini bir mövzu üzərində birləşdirərək tamaşanın uğurlu səhnə həllinə nail olmuşdur.

Qars vilayətinin valisi Türkər Öksüz, Türkiyə Silahlı Qüvvələrinin Qarsdakı ordu birləşməsinin komandanı, general-mayor Özgür Nuhut, Daxili İşlər Nazirliyinin Qars İdarəsinin rəisi Ümit Bitirik, Qarsdakı sərhəd qoşunları komandanı, polkovnik Osman Kılıç və digər rəsmi şəxslər, o cümlədən yerli ictimaiyyətin nümayəndələri tamaşaya maraqla baxıblar. Tamaşa alqışlarla qarşılanıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
29.05.2019



Azərbaycan Respublikasının Ukraynadakı səfirliyi tərəfindən 28 May – Respublika Günü, Naxçıvan Muxtar Respublikasının yaranmasının 95 illiyi və Azərbaycan Respublikasının diplomatik xidmət orqanlarının 100 illik yubileyi münasibətilə Kiyevdə rəsmi qəbul mərasimi keçirilib.

Mərasimdə Ukrayna Xarici İşlər Nazirliyinin nümayəndələri, bu ölkədə akkreditə olunmuş diplomatik korpusun rəhbərləri və əməkdaşları, dövlət rəsmiləri, yerli kütləvi informasiya vasitələrinin və ictimaiyyətin nümayəndələri iştirak ediblər.

Tədbirdən öncə iştirakçılar Naxçıvan Muxtar Respublikasının yaranmasının 95 illiyi ilə bağlı təşkil edilən Naxçıvan məhsullarının sərgisi ilə tanış olublar. Burada Naxçıvanda istehsal olunan məhsullar, o cümlədən Naxçıvanın brendi sayılan göycə nümayiş olunub.

Azərbaycanın Ukraynadakı səfiri Azər Xudiyev 1918-ci il 28 may tarixində müstəqilliyini elan etmiş Azərbaycan Xalq Cümhuriyyətinin tarixindən, mövcud olduğu 23 aylıq dövrdə diplomatiya sahəsində qazandığı mühüm nailiyyətlərdən danışıb. Azər Xudiyev qeyd edib ki, ümummilli lider Heydər Əliyev tərəfindən müəyyən edilən xarici siyasət kursu ölkəni beynəlxalq münasibətlər müstəvisində yeni mərhələyə çıxarıb, bir çox uğurlar əldə edilib.

Ukraynanın Xarici İşlər nazirinin müavini Vasili Bodnar bildirib ki,Azərbaycan və Ukrayna arasında diplomatik əlaqələr hələ 1918-ci ildən yaranıb. Ukrayna 1991-ci ildə müstəqilliyini bərpa edən Azərbaycanla diplomatik əlaqələri daha da inkişaf etdirib. Bu gün isə iki ölkə arasında strateji əməkdaşlıq mövcuddur.

Tədbirin sonunda “Şərur” Xalq Yallı Ansamblı rəngarəng rəqslər, qədim Şərur və Naxçıvana məxsus “Tənzərə”, “Köçəri” və başqa yallıları ifa edib.

Naxçıvan Muxtar Respublikası
Mədəniyyət Nazirliyinin Mətbuat Xidməti
29.05.2019



“28 May Respublika Günü" münasibətilə Culfa Rayon Mədəniyyət Sarayında tədbir keçirilib. Culfa Rayon İcra Hakimiyyəti Başçısının müavini Kəmalə Səfərova Azərbaycan Xalq Cümhuriyyətinin yaradılmasından və o dövrdəki siyasi vəziyyət barədə məlumat verib.

Qeyd edib ki, Şərqdə ilk demokratik dövlət quruluşunu yaradan Azərbaycan Xalq Cümhuriyyətinin baniləri istiqlaliyyətimizi elan edərək xalqımızın müstəqillik və dövlətçilik ənənələrini bütün dünyaya nümayiş etdirdi. Bildirilib ki, 23 ay yaşamasına baxmayaraq Azərbaycan Xalq Cümhuriyyəti tariximizdə mühüm rol oynadı. 1990-cı illərdə yenidən ümummilli liderimiz Heydər Əliyevin qətiyyəti ilə Naxçıvanda rəsmi olaraq qəbul edilən üçrəngli bayraq bir daha əbədi olaraq müstəqil Azərbaycanın dövlət bayrağına çevrildi.

Tədbirin bədii hissəsində Rayon Mədəniyyət Sarayının "Çeşmə" ansamblının ifasında konsert olub, xalq və bəstəkar mahnıları, rəqs və yallılar ifa edilib.

Naxçıvan Muxtar Respublikası
Mədəniyyət Nazirliyinin Mətbuat Xidməti
29.05.2019



Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin mətbuat xidmətindən NUHÇIXAN-a verilən məlumata görə, “1 iyun - Uşaqları Beynəlxalq Müdafiə Günü” münasibəti ilə Babək rayonunda tədbir keçirilib.

Babək rayon Mədəniyyət Sarayında keçirilən tədbirdə Babək Rayon İcra Hakimiyyətinin başçısı Rasim Hüseynov və Komitənin sədri Ramilə Seyidova çıxış edərək bu gün muxtar respublikada, o cümlədən Babək rayonunda uşaqların hüquq və sağlamlıqlarının qorunması, təhsili, təlim-tərbiyəsi istiqamətində görülən işləri qeyd ediblər. Bildirilib ki, xüsusi qayğıya ehtiyacı olan uşaqlara, habelə aztəminatlı, çoxuşaqlı ailələrindən olan uşaqlara dövlət qayğısının göstərilməsi də diqqət mərkəzində saxlanılıb.

Sonra 2017-2018-ci tədris ilində Babək rayonu üzrə təhsil, incəsənət, idman sahələri üzrə fərqlənən 15 uşağa fəxri fərmanlar və hədiyyələr təqdim olunub.

Tədbirin bədii hissəsində Babək rayon Mədəniyyət Sarayının, Babək Qəsəbə Uşaq Bağçasının, Babək rayon Uşaq Musiqi məktəbinin, Cəhri, Şıxmahmud, Zeynəddin, Nehrəm kənd Uşaq Musiqi məktəblərinin şagirdlərinin ifasında konsert proqramı təqdim edilib.

Naxçıvan Muxtar Respublikası
Mədəniyyət Nazirliyinin Mətbuat Xidməti
29.05.2019



Naxçıvan Musiqi Kollecinin müəllimi
Ülvi Əhmədovun sinif konserti keçirilmişdir

Mayın 27-də Naxçıvan Musiqi Kollecinin müəllimi Ülvi Əhmədovun sinif konserti keçirilmişdir. Konsertdə musiqi kollecinin fortepiano ixtisası üzrə III kurs tələbələri Nazlı Xəlilova, Nilufər Əliyeva, Şəbnəm Ağayeva, Arzu Abbasova, vokal ixtisası üzrə müəllimlər Elçin Nağıyev, İlkin Abdullayev, Gülyanaq Fərzəliyeva, tar ixtisası üzrə müəllim Orxan Cabbarov, konsertmeyster Aysel Eminlinin ifasında klassik, eyni zamanda müasir Avropa və Azərbaycan bəstəkarlarının əsərləri səslənmişdir.

Konsertin ərsəyə gəlməsində xüsusi zəhməti olan Ülvi Əhmədov konsertdə tələbələri ilə birlikdə maraqlı repertuarla çıxış etmişdir.

Konsert proqramı Naxçıvanda müasir və yüksək səviyyəli tələblərə cavab verən gənc ifaçılar nəslinin yetişdiyini bir daha göstərmişdir.

Konsert iştirakçılar tərəfindən alqışlarla qarşılanmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
27.05.2019



"28 May - Respublika Günü" münasibətilə
"N" saylı hərbi hissədə konsert proqramı keçirilib

Sədərək Rayon Mədəniyyət Şöbəsinin yaradıcı kollektivləri "28 May - Respublika Günü" münasibətilə "N" saylı hərbi hissədə konsert proqramı ilə çıxış edib.

VİDEO



Naxçıvan Muxtar Respublikası
Mədəniyyət Nazirliyinin Mətbuat Xidməti
27.05.2019



Mayın 27-də Naxçıvan Dövlət Filarmoniyasında Naxçıvan şəhər Səfər Rəcəbov adına 3 nömrəli Uşaq Musiqi Məktəbinin Naxçıvan Muxtar Respublikasının 95 illik yubileyinə həsr olunmuş konserti olub.

Konsertdə Naxçıvan şəhər Səfər Rəcəbov adına 3 nömrəli Uşaq Musiqi Məktəbinin şagirdlərinin ifasında musiqi nömrələri səsləndirilib. Şagirdlər görkəmli Azərbaycan bəstəkarlarından Q.Hüseynlinin “Ay işığında”, T.Bakıxanovun “Görüş yerimiz”, S.Ələsgərovun “Daimi hərəkət”, T.Quliyevin “Sevgi valsı”, N.Məmmədovun “Naxçıvanım” və başqa musiqi əsərlərini səsləndiriblər. Şagirdlərin ifasında xarici ölkə bəstəkarlarından K.Martinin “Viva la Vida”, S.Goplinin “İntertayment”, V.A.Mosartın “Pantamimo”, R.Lovlandın “White stone”, K.Genkinsonun “Palladio” adlı əsərləri maraqla qarşılanıb.

Konsertdə məktəbin şagirdlərindən Səma Abdullazadənin, Gülçin Seyidovanın, Gülay Cəfərovanın, Fəridə Əlizadənin, Nihad Allahverdiyevin, Güldəstə Qasımzadənin, Saleh Səfərovun, Sima Məmmədovanın və başqalarının ifaları dinləyicilərdə xoş ovqat yaradıb.

“Sazçalanlar” ansamblının ifa etdiyi “Gödək donu”, “Nağaraçalanlar” ansamblının ifa etdiyi “Popurri” və “Skripkaçalanlar” ansamblının ifasında səslənən musiqi əsərləri tədbir iştirakçıları tərəfindən alqışlarla qarşılanıb.

Konsert dinləyicilərdə xoş əhvali-ruhiyyə yaradıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
27.05.2019



Mayın 27-də Naxçıvan Dövlət Tarix Muzeyində “28 May Respublika Günü” münasibətilə tədbir keçirilmişdir.

Tədbiri giriş sözü ilə Naxçıvan Dövlət Tarix Muzeyinin direktoru, Naxçıvan Muxtar Respublikasının Əməkdar mədəniyyət işçisi Nizami Rəhimov açaraq bildirib ki, müsəlman Şərqində ilk demokratik respublika olan Azərbaycan Xalq Cümhuriyyəti ölkəmizin çoxəsrlik sosial-iqtisadi, ictimai-siyasi və mədəni inkişafının, xalqımızın milli oyanışı və dirçəlişi proseslərinin məntiqi nəticəsi kimi meydana çıxıb. Azərbaycan Xalq Cümhuriyyəti xalqımızın siyasi şüur səviyyəsinin, intellektual və mədəni potensialının, yüksək istedad və qabiliyyətinin göstəricisi idi. 1918-ci il mayın 28-də Azərbaycanın istiqlaliyyətinin elan edilməsində, Xalq Cümhuriyyətinin təşəkkül tapmasında və fəaliyyət göstərməsində Cümhuriyyətə rəhbərlik etmiş şəxslərin – Əlimərdan bəy Topçubaşovun, Məmmədəmin Rəsulzadənin, Fətəli xan Xoyskinin, Həsən bəy Ağayevin, Nəsib bəy Yusifbəylinin, Səməd bəy Mehmandarovun, Əliağa Şıxlinski və başqalarının böyük xidmətləri olub.

Naxçıvan Muxtar Respublikası Mədəniyyət Nazirliyinin mədəni irs və muzey işi üzrə baş məsləhətçisi Qumral Əsədova “Tariximizin parlaq səhifəsi - 28 May Respublika Günü”, Dövlət Bayrağı Muzeyinin direktoru Rəmzi Hüseynov “Azərbaycan Xalq Cümhuriyyətinin dövlət atributları”, Naxçıvan Dövlət Tarix Muzeyinin bələdçisi Tünzalə Dilanova “Azərbaycan Xalq Cümhuriyyəti dövründə Araz-Türk Respublikası” mövzularında çıxış etmişlər.

Çıxışlarda vurğulanmışdır ki, parlamentli respublikanın qurulması Azərbaycanın çoxəsrlik dövlətçilik tarixində yeni bir mərhələnin başlanğıcı idi. Azərbaycan Xalq Cümhuriyyəti 23 ay fəaliyyət göstərsə də, xalqımızın öz müqəddəratını təyin etməyə qadir olduğunu bütün dünyaya nümayiş etdirmişdir. Bu qısa tarixi dövr Azərbaycan xalqının dövlətçilik ənənələrinin bərpasına və milli mənlik şüurunun güclənməsinə böyük təsir göstərmişdir. Həmçinin Naxçıvan bölgəsində yaradılan Araz-Türk Respublikası, onun fəaliyyəti və erməni daşnaklarına qarşı naxçıvanlıların apardığı mübarizə haqqında məlumat verilmişdir.

Tədbirin sonunda “Azərbaycan Xalq Cümhuriyyətinin tarixindən” adlı sərgiyə baxış olub.

Naxçıvan Muxtar Respublikası
Mədəniyyət Nazirliyinin Mətbuat Xidməti
27.05.2019



Mayın 25-də Cəlil Məmmədquluzadə adına Naxçıvan Dövlət Musiqili Dram Teatrı qardaş Türkiyə Respublikasının Qars şəhərində olmuş, C.Məmmədquluzadənin pyesləri əsasında hazırlanmış “Ölülər və dəlilər” tamaşasını nümayiş etdirmişdir. Səfərin məqsədi ilə bağlı C.Məmmədquluzadə adına Naxçıvan Dövlət Musiqili Dram Teatrının direktoru Xalq artisti Rza Xudiyevlə görüşüb həmsöhbət olduq.

Xalq artisti Rza Xudiyev bildirdi ki, səfərin məqsədi Azərbaycan Diplomatiyasının 100 illiyi, Naxçıvan Muxtar Respublikasının 95 illiyi və “28 May- Respublika Günü” münasibətilə keçirilən tədbirlərdə iştirak etmək idi. Bildiyiniz kimi bu il həm də böyük Azərbaycan yazıçısı və dramaturqu Cəlil Məmmədquluzadənin 150 illiyi tamam olur. Düşündük ki, yeni hazırladığımız “Ölülər və dəlilər” tamaşasının Qars şəhərində nümayiş etdirilməsi həm də böyük yazıçının yubileyinin qeyd edilməsi baxımından maraqla qarşılanar. Ona görə də məhz bu tamaşanı seçdik. Yeni tamaşada ədibin 4 pyesindəki obraz və personajlar səhnəyə gətirilmişdir. Azərbaycan Respublikasının Əməkdar artisti Tofiq Seyidov ədibin “Ölülər”, “Anamın kitabı”, “Dəli yığıncağı” və “Ər” pyeslərini bir mövzu üzərində birləşdirərək maraqlı tamaşa yaratmağa nail olmuşdur. “Ölülər”, “Anamın kitabı”, “Dəli yığıncağı” müxtəlif illərdə teatrımızda tamaşaya qoyulmuşdur. “Ər” pyesi isə akademik İsa Həbibbəyli tərəfindən 1987-ci ildə yazıçının arxivindən tapılaraq çap etdirilmişdir.
Mayın 24-də Qars şəhərində olduq. Əvvəlcə Qars şəhərində Azərbaycan xalqının ümummilli lideri Heydər Əliyevin büstünü ziyarət etdik. Sonra Azərbaycan Respublikasının Qars şəhərindəki Baş Konsulluğunun təşkilatçılığı ilə əllərimizdə Azərbaycan və Türkiyə bayraqları ilə Qars qalasına yürüş etdik və bizə bu əzəmətli qala haqqında məlumat verildikdən sonra şəhərlə tanış olduq.

Mayın 25-də Qars Qafqaz Universiteti Əhməd Arslan Konqre və Kultur Mərkəzinin əzəmətli salonunda “Ölülər və dəlilər” tamaşası göstərildi. 2018-ci ildə istifadəyə verilən bu mərkəzin tamaşa salonu 1200 nəfər tutur. Qeyd edim ki, tamaşa salonu ağzına qədər türk teatrsevərləri ilə dolmuşdu.

Tamaşadan əvvəl Azərbaycan Respublikasının Qars şəhərindəki Baş Konsulu Nuru Quliyev çıxış edərək Azərbaycan diplomatiyasının 100 illiyi münasibəti ilə tədbir iştirakçılarını təbrik etdi. Azərbaycan Xalq Cümhuriyyəti haqqında tədbir iştirakçılarına ətraflı məlumat verildi. Baş Konsulun çıxışında Azərbaycan-türk dostluğundan geniş söhbət açıldı.

Sonra teatrın direktoru kimi mən böyük yazıçı-dramaturqumuz C.Məmmədquluzadənin həyat və yaradıcılığı, teatrımızın yeni tamaşası haqqında Qars tamaşaçılarına məlumat verdim.

C.Məmmədquluzadənin pyesləri əsasında hazırlanmış bu tamaşa türk teatrsevərləri tərəfindən böyük maraq və alqışlarla qarşılandı. Tamaşadan sonra bizimlə səmimi görüşən tədbir iştirakçıları teatrımızın yenidən Qarsda tamaşa göstərməsini arzuladıqlarını da bildirdilər.

Ertəsi gün səhər tezdən qardaş Türkiyə Respublikasından xoş təəssüratlarla ayrılaraq Naxçıvana yola düşdük.

Naxçıvan Muxtar Respublikası
Mədəniyyət Nazirliyinin Mətbuat Xidməti
27.05.2019



Çilinin geniş oxucu kütləsinə malik epicentrochile.com xəbər saytında Azərbaycan diplomatik missiyasının müvəqqəti işlər vəkili Yasin Cəfərovun Naxçıvan Muxtar Respublikasının 95 illik yubileyinə həsr olunmuş “Azərbaycanın tarixi şəhəri Naxçıvan” başlıqlı məqalə yayımlanmışdır.

Məqalədə muxtar respublika barədə geniş məlumat verilərək Naxçıvanın tarixən qədim İpək Yolu üzərində yerləşdiyi, Şərq və Qərb arasında ticarət yollarını və sivilizasiyaları birləşdirdiyi, “Şərqin qapısı” adlandırıldığı qeyd olunur. Bu il 95 illik yubileyini qeyd edən Naxçıvan Muxtar Respublikasında zəngin mədəniyyəti əks etdirən qədim tarixi abidələrin, o cümlədən əzəmətinə və bənzərliyinə görə Azərbaycanın “Maçu Piççu”su adlandırılan, Azərbaycan xalqının qəhrəmanlıq simvolu hesab edilən Əlincə qalasının, xalq inanc və toponimlərindən əlavə Qafqazın bir çox tədqiqatçılarının əsərlərində də bəhs olunan Nuh Peyğəmbərin məzarüstü türbəsinin burada yerləşdiyi bildirilir.

Azərbaycanda qadına hörmətin, onun ictimai-siyasi həyatda rolunun tarixən var olduğunu sübut edən, Azərbaycan Atabəylər dövlətinin ictimai-siyasi həyatında mühüm rol oynamış Möminə xatının şərəfinə 12-ci əsrdə ucaldılmış, YUNESKO-nun Qeyri-maddi Mədəni irs Siyahısına salınmış Möminə xatın türbəsindən bəhs edilərək ölkədə bu dəyərin tarixən qorunub saxlanıldığını və Azərbaycanın 1918-ci ildə qadınlara seçki hüququ verən dünyanın ilk dövlətləri sırasına düşməsinin heç də təsadüfi olmadığı vurğulanır. Məqalədə, həmçinin muxtar respublikanın turistik məkanlarından, o cümlədən Ağbulaq və Batabat istirahət mərkəzləri, Duzdağ Fizioterapeya Mərkəzindən bəhs olunur. 2018-ci ildə İslam Əməkdaşlıq Təşkilatı tərəfindən Naxçıvan şəhərinin İslam Mədəniyyətinin Paytaxtı elan olunduğu, həmçinin Azərbaycanın Gənclər Paytaxtı seçilməsi münasibətilə ötən il Naxçıvanda bir çox beynəlxalq və yerli tədbirlərin, festivalların keçirildiyi bildirilir. Eyni zamanda zəngin mədəni ənənələrə malik Naxçıvanın ənənəvi qrup rəqsi olan “Yallı (Köçəri, Tənzərə)”nin YUNESKO-nun Təcili Qorunma Siyahısına daxil edildiyi qeyd olunur. Müəllif Naxçıvan Muxtar Respublikasının sosial-iqtisadi inkişafı, sənaye və kənd təsərrüfatı potensialından bəhs edir, digər məhsullarla yanaşı, məşhur “Badamlı”, “Sirab” müalicəvi mineral sularının, Naxçıvan duzunun, “Naz Lifan” markalı avtomobillərin dünya bazarlarında öz layiqli yerini tutduğunu diqqətə çatdırır. Cənubi Qafqaz regionunun ən böyük Günəş Elektrik Stansiyasının Azərbaycanın Naxçıvan Muxtar Respublikasında yerləşdiyi vurğulanaraq alternativ enerji mənbələrinə malik olan muxtar respublikanın həm də elektrik enerjisi ixrac etdiyi bildirilir. Məqalədə muxtar respublikada müasir ali təhsil müəssisələrinin fəaliyyət göstərdiyi və burada xarici tələbələrin də təhsil aldığı qeyd olunur, çilili gənclərin də müxtəlif təhsil təqaüdü proqramları çərçivəsində Naxçıvanda təhsil almaq imkanlarının olduğu bildirilir. Sonda isə Azərbaycan Hökuməti tərəfindən yaradılan “ASAN viza” sistemi vasitəsilə dünyanın yüzə yaxın ölkəsinin, o cümlədən Çili vətəndaşlarının asan və rahat şəkildə Azərbaycan vizası əldə etmə imkanının olduğu vurğulanır. Xüsusilə Şərq və Qərb sivilizasiyaları ilə eyni anda tanış olmaq üçün Çili vətəndaşlarına Azərbaycanın Naxçıvan Muxtar Respublikasına səyahət etmək tövsiyə olunur.

Naxçıvan Muxtar Respublikası
Mədəniyyət Nazirliyinin Mətbuat Xidməti
27.05.2019



Mayın 25-də Naxçıvan Dövlət Uşaq Filarmoniyasının Xalq Çalğı Alətləri Ansamblının, vokal və rəqs qruplarının Şərur Rayon Mədəniyyət Sarayında konserti olub.

Konsertdən əvvəl aparıcı bildirib ki, 2019-cu ildə Naxçıvan Muxtar Respublikasının yaradılmasının 95 illiyi tamam olur. Naxçıvan Muxtar Respublikası Ali Məclisi Sədrinin 21 yanvar 2019-cu il tarixli Sərəncamı ilə “Naxçıvan Muxtar Respublikasının 95 illik yubileyinə həsr olunmuş Tədbirlər Planı” təsdiq edilmişdir. Tədbirlər Planının icrası ilə bağlı Naxçıvan Muxtar Respublikası Mədəniyyət Nazirliyinin təşkilatçılığı ilə silsilə tədbirlərin, konsertlərin keçirilməsi nəzərdə tutulmuşdur. Bugünkü konsert proqramı da muxtar respublikanın 95 illik yubileyinə həsr olunmuşdur.
İstedadlı uşaqların aşkara çıxarılması ilə yanaşı gənc nəslin asudə vaxtının səmərəli təşkili də bu gün diqqət mərkəzində olan sahələrdəndir. Bunun üçün muxtar respublikamızda bir sıra infrastruktur sahələri yaradılmış və onların istifadəsinə verilmişdir.

Qeyd edilmişdir ki, Naxçıvan Muxtar Respublikası Ali Məclisi Sədrinin 2010-cu il 19 aprel tarixli Sərəncamı ilə yaradılan Naxçıvan Dövlət Uşaq Filarmoniyası da belə mədəniyyət müəssisələrindən biridir. Filarmoniyada uşaqların yaradıcılıq potensialının inkişafı və istedadlı uşaqların bacarıq və qabiliyyətlərini göstərməsi üçün hər cür şərait yaradılmışdır. Burada uşaqlardan ibarət xalq çalğı alətləri ansamblı, kamera ansamblı, muğam və xor kollektivləri, vokal və rəqs qrupları fəaliyyət göstərir.

Vurğulanmışdır ki, bugünkü konsertdə də Naxçıvan Dövlət Uşaq Filarmoniyasının istedadları öz bacarıqlarını göstərəcək və rayon sakinlərinə xoş ovqat bəxş edəcəkdir.

Konsertdə Xalq Çalğı Alətləri Ansamblının ifasında Üzeyir Hacıbəyovun “Arazbarı” və “Mahur rəngi” səslənmişdir. Qeyd edək ki, ansamblın bədii rəhbəri Kənan Feyzullayevdir.

Filarmoniyanın solistləri Təyyar Mədədli və Mətləb Şirinzadənin ifasında Ələkbər Tağıyevin “Azərbaycan oğluyam” mahnısı alqışlarla qarşılanmışdır.

Filarmoniyanın solistləri Fuad Məmiyev, Mikayıl Nəsirov, Həsən Babazadə, Ələkbər Sadiqov, Əli Mehralıyev, Təyyar Mədədli, Vəli Əliyev, Xəzər Əliyev, Cilovxan Qurbanlı, Özər Hacıyev, Babək Səmədzadə, Ülkər Hüseynlinin ifasında bəstəkarlardan Tofiq Quliyev, Ramiz Mirişli, Cahangir Cahangirov, Bəhram Nəsibov, Rauf Məmmədovun “Neftçilər”, “Doğma diyar”, “Aylı gecə”, “Qarabağ”, “Naxçıvanım” və başqa mahnılar səslənmişdir.
Kollektivin istedadlı solistləri Özər Hacıyev, Əli Mehralıyev, Mətləb Şirinzadə, Həsən Babazadə, Ələkbər Sadiqovun ifasında “Mənsuriyyə” ritmik muğamı konsert iştirakçılarında xoş ovqat yaratmışdır.

Naxçıvan Dövlət Uşaq Filarmoniyasının rəqs qrupunun ifasında “Tərəkəmə”, “Naz eləmə” və başqa rəqsləri konsertdə rəngarənglik yaratmışdır.

Daha sonra İsmət Əliyevin ifasında “Ovşarı” ritmik muğamı səsləndirilmişdir.

Naxçıvan Dövlət Uşaq Filarmoniyasının konserti solistlərin birgə ifa etdiyi “Qarabağ şikəstəsi” ilə başa çatmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
25.05.2019



      Prezident İlham Əliyev mayın 25-də Azərbaycan Respublikasının mədəniyyət xadimlərinə fəxri adların verilməsi haqqında sərəncam imzalayıb.

NUHÇIXAN xəbər verir ki, təltif olunanlar arasında Naxçıvan Muxtar Respublikasının mədəniyyət işçiləri də var. Prezidentin sərəncamı ilə, Niftəliyeva Nurbəniz Nurəddin qızına Azərbaycan Respublikasının “Əməkdar artisti”, Əliyev Asim Yediyar oğluna isə Azərbaycan Respublikasının “Əməkdar mədəniyyət işçisi” fəxri adı verilib.



Naxçıvan Muxtar Respublikası
Mədəniyyət Nazirliyinin Mətbuat Xidməti
25.05.2019



Azərbaycan Xalq Cümhuriyyətinin yaranmasının 101-ci ildönümü və diplomatik xidmət orqanlarımızın 100 illik yubileyi münasibətilə Qars şəhərində Azərbaycan-Türkiyə qardaşlıq yürüşü keçirilib.

Azərbaycanın Qarsdakı Baş Konsulluğunun təşkilatçılığı ilə keçirilən aksiyanın iştirakçıları şəhərin mərkəzində yerləşən Heydər Əliyev Parkında olublar.

Qars vilayətinin müxtəlif yerlərində Azərbaycanın və Türkiyənin dövlət bayraqları asılıb. On metr uzunluğunda olan qoşa bayrağı başlarının üzərinə qaldıran aksiya iştirakçıları xalqlarımızın, ölkələrimizin birliyinə və qardaşlığına dair şüarlar səsləndiriblər.

Aksiyada diplomatlar, yerli ictimaiyyətin nümayəndələri, o cümlədən müəllimlər və tələbələr, QHT və KİV təmsilçiləri iştirak ediblər.

Naxçıvan Muxtar Respublikası
Mədəniyyət Nazirliyinin Mətbuat Xidməti
25.05.2019



Mayın 25-də Naxçıvan Dövlət Filarmoniyasında muxtar respublikanın uşaq musiqi, incəsənət və bədii sənətkarlıq məktəblərinin xor kollektivləri arasında Naxçıvan Muxtar Respublikasının yaradılmasının 95 illik yubileyinə həsr olunmuş müsabiqə keçirilmişdir.

Tədbirdə Naxçıvan Muxtar Respublikasının Mədəniyyət Nazirliyinin təhsil müəssisələri ilə iş üzrə baş məsləhətçisi Leyla Əlimərdanova çıxış edərək bildirmişdir ki, muxtar respublikamızda uşaq musiqi, incəsənət və bədii sənətkarlıq məktəblərinə göstərilən diqqət və qayğı hamımıza məlumdur. O, qeyd etmişdir ki, Naxçıvan Muxtar Respublikasının 95 illik yubileyi münasibəti ilə müxtəlif tədbirlər həyata keçirilir. Belə tədbirlərdən biri də bu gün təşkil olunmuş müsabiqədir.

Diqqətə çatdırılmışdır ki, belə müsabiqələrin təşkili xor kollektivlərinin yaradıcılıq qabiliyyətlərinin zənginləşməsinə böyük töhfələr verir. Bu müsabiqələr xalqımızın qədim və zəngin mədəni irsindən faydalanmaqla gənc nəsildə mənəvi, bədii və estetik dünyagörüşünün formalaşmasına, onlarda vətənpərvərlik ruhunun daha da inkişaf etdirilməsinə xidmət edir.

Qeyd olunmuşdur ki, bu cür müsabiqələrin keçirilməsi Naxçıvan Muxtar Respublikasında mövcud olan uşaq musiqi, incəsənət və bədii sənətkarlıq məktəblərinin fəaliyyətini diqqət mərkəzində saxlamaqla yanaşı, bu sahədə səmərəliliyin daha da artırılmasına şərait yaradır.
Daha sonra müsabiqəyə start verilmişdir. Müsabiqədə muxtar respublikamızda fəaliyyət göstərən 21 uşaq musiqi, incəsənət və bədii sənətkarlıq məktəbinin xor kollektivi iştirak etmişdir.

Müsabiqə başa çatdıqdan sonra xor kollektivlərinin çıxışları münsiflər heyəti tərəfindən qiymətləndirilmişdir. Müsabiqədə Naxçıvan Şəhər Uşaq Musiqi və İncəsənət Məktəbi və Ordubad Şəhər Uşaq Musiqi Məktəbi II, Naxçıvan Şəhər Səfər Rəcəbov adına 3 nömrəli Uşaq Musiqi Məktəbi, Naxçıvan Şəhər Ərtoğrol Cavid adına Uşaq Musiqi və Bədii Sənətkarlıq Məktəbi və Culfa Şəhər Uşaq Musiqi Məktəbi III yerin qalibi olmuşlar.

Müsabiqədə fərqlənən Zeynəddin Kənd Uşaq Musiqi Məktəbi və Vənənd Kənd Uşaq Musiqi Məktəbinin xor kollektivi diplomlarla, Bənəniyar Kənd Uşaq Musiqi Məktəbi, Çalxanqala Kənd Uşaq Musiqi Məktəbi və Şıxmahmud Kənd Uşaq Musiqi Məktəbinin xor kollektivi isə fəxri fərmanlarla təltif olunmuşdur.

Naxçıvan Muxtar Respublikası
Mədəniyyət Nazirliyinin Mətbuat Xidməti
25.05.2019



Ukraynanın paytaxtı Kiyev şəhərində Azərbaycan diplomatiyasının 100 illiyinə və Naxçıvan Muxtar Respublikasının 95 illik yubileyinə həsr olunmuş tədbir keçirilmişdir.


Naxçıvan Muxtar Respublikası
Mədəniyyət Nazirliyinin Mətbuat Xidməti
25.05.2019



Mayın 25-də Naxçıvan Muxtar Respublikasının Mədəniyyət Nazirliyi, Naxçıvan Muxtar Respublikasının Əmək və Əhalinin Sosial Müdafiəsi Nazirliyi və Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi “1 iyun - Uşaqları Beynəlxalq Müdafiə Günü” münasibətilə birgə tədbir təşkil etmişdir. Tədbirdə aztəminatlı, qaçqın və məcburi köçkün, hər iki valideynini itirmiş və valideyn himayəsindən məhrum olmuş, sağlamlıq imkanları məhdud uşaqlara Məhəmməd Tağı Sidqi adına Naxçıvan Dövlət Kukla Teatrında görkəmli şair, Azərbaycan Respublikasının Əməkdar incəsənət xadimi Mirmehdi Seyidzadənin “Qızıl xoruz” pyesi əsasında hazırlanmış tamaşa təqdim edilmişdir.

Diqqətinizə çatdıraq ki, görkəmli şair Mirmehdi Seyidzadənin uşaqlar üçün yazdığı şeirlər, mənzum nağıllar, kiçik pyeslər maraqlı əsərlərdir. Onun “Nərgiz”, “Qızıl quş”, “Billur qəsr”, “Ayaz”, “Qızıl xoruz” kimi əsərləri uşaq ədəbiyyatımızın zənginləşməsində əhəmiyyətli rol oynamışdır.

“Qızıl xoruz” tamaşası Azərbaycan xalq nağılının motivləri əsasında yazılmışdır. Məişət nağıllarından olan bu nağıl-tamaşada tamahkar padşah tənqid olunur. Tamaşada satira da güclüdür.

Nəzmlə yazılan bu tamaşada xoruzun başına gələn sərgüzəştlər oynaq və şən şəkildə səhnəyə gətirilir. Bir şahı pul tapan xoruz sevinib səs-küy salır, banlayır. Padşah əmr edir ki, xoruzun səsini kəsmək üçün pulu onun əlindən alsınlar. Kuklalarla hazırlanmış tamaşada əsas hadisələr də bundan sonra başlayır. Xoruzun səsini kəsə bilməyən padşah gülüş hədəfinə çevrilir. Bir sıra nağıllarımızda olduğu kimi burada da padşaha sözlə yanaşı, öz əməli və ağlı ilə təsir göstərmək, onu ədalətə çağırmaq əsas mövzudur. Tamaşada həm də tərbiyəvi fikir aşılanır, lovğalıq, tamahkarlıq, zorakılıq, pula hərislik tənqid edilir.

Tamaşadakı Elşən, Xoruz, Padşah, Vəzir, Fərraş, Naib, Aşbaz, Rəqqasə, Qonaq, Nənə surətlərini teatrın aktyorları Ləman Əhmədova, Süleyman Süleymanov, İlham Babayev, İbad Nəbiyev, İlqar Babayev, Arzu Səfərov, Əfqanə Ələsgərova, Vəsmə Quliyeva, Ulduz Süleymanova təbii və canlı səsləndirirlər.

Tamaşanın quruluşçu rejissoru, Naxçıvan Muxtar Respublikasının Əməkdar mədəniyyət işçisi Nadir Hüseynov, quruluşçu rəssamı Ədalət Quliyev, bəstəkarı Əli Məmmədovdur.

“Qızıl xoruz” tamaşası balacalar tərəfindən maraqla izlənilib.

Naxçıvan Muxtar Respublikası
Mədəniyyət Nazirliyinin Mətbuat Xidməti
25.05.2019



Mayın 24-də “1 iyun - Uşaqları Beynəlxalq Müdafiə Günü” münasibətilə Culfa Rayon İcra Hakimiyyəti, Ailə, Qadın və Uşaq Problemləri üzrə Dövlət Komitəsi və Culfa Rayon Mədəniyyət Şöbəsinin birgə təşkilatçılığı ilə Culfa Rayon Mədəniyyət Sarayında tədbir keçirilib.

Tədbirin aparıcısı bildirmişdir ki, ulu öndərimiz ölkəmizə rəhbərliyi dövründə uşaqlara xüsusi qayğı göstərmişdir. Bu qayğının nəticəsidir ki, bu gün ölkəmizdə, eləcə də muxtar respublikamızda uşaqlarla bağlı mühüm tədbirlər həyata keçirilir. Bu tədbirlər bizim - cəmiyyətimizin gələcəyi olan uşaqların hərtərəfli inkişafına yönəldilmişdir.

Elə bu diqqət və qayğının nəticəsidir ki, muxtar respublikamızda bütün uşaqların, o cümlədən valideyn himayəsindən məhrum, yaxud da sağlamlıq imkanları məhdud olan uşaqların, şəhid uşaqlarının rahat həyatı üçün hər cür şərait yaradılmışdır.

Tədbirin bədii hissəsində Culfa Rayon Mədəniyyət Şöbəsinin tabeliyində olan Culfa Şəhər Uşaq Musiqi Məktəbinin Xalq Çalğı Alətləri Ansamblı, “Skripkaçalanlar” ansamblı, “Nağaraçalanlar” ansamblı və Culfa Rayon Körpələr Evinin balaca fidanları rəngarəng musiqi nömrələri ilə çıxış etmişlər.

Tədbir uşaqlarda xoş əhval-ruhiyyə yaratmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
24.05.2019



Mayın 24-də Şərur Rayon Tarix-Diyarşünaslıq Muzeyində “Muzeylərin fondlarının zənginləşdirilməsi sahəsində görüləcək işlər və qarşıda duran vəzifələr” mövzusunda dəyirmi masa keçirilib.

Dəyirmi masanı Naxçıvan Muxtar Respublikası Mədəniyyət Nazirliyinin mədəni irs və muzey işi üzrə baş məsləhətçisi Qumral Əsədova açaraq bildirib ki, Naxçıvan Muxtar Respublikasında muzeylərin fəaliyyətinin canlandırılması, yeni muzeylərin yaradılması sahəsində mühüm işlər görülür, bu mədəniyyət ocaqları müasir tələblər səviyyəsində qurulur. Qeyd olunubdur ki, ötən əsrin 70-80-ci illərində olduğu kimi muxtariyyətimizin müstəqillik illərində də muzeylərimiz dövlət qayğısı ilə əhatə olunubdur. Son 20 il ərzində Naxçıvan Muxtar Respublikasında muzeylərin şəbəkəsi daha da genişlənmiş, onların maddi -texniki bazası möhkəmləndirilmişdir. 1995-ci ildə muxtar respublikada 13 muzey və muzeytipli müəssisə fəaliyyət göstərirdisə hazırda onların sayı 30-a çatdırılmışdır. Muzeylərin şəbəkəsi genişlənməklə bərabər onların fondlarının zənginləşdirilməsinə də qayğı ilə yanaşılmışdır. Bu sahədə Naxçıvan Muxtar Respublikası Mədəniyyət Nazirliyinin muzeylərin zənginləşdirilməsi istiqamətindəki təşəbbüsləri əhəmiyyətli rol oynamışdır. Artıq muxtar respublika sakinlərinin təqdim etdikləri muzey əhəmiyyətli əşyaların muzeylərə təqdimat mərasimlərinin keçirilməsi ənənə halını almışdır. Sevindirici haldır ki, son dövrlərdə aksiya xarakteri almış bu tədbirlərdə ümumtəhsil məktəblərinin müəllim və şagird kollektivləri də yaxından iştirak edirlər. Vurğulanıb ki, ötən il muxtar respublika muzeylərinə 1564, bu ilin ilk 4 ayı ərzində isə 571 ədəd eksponat daxil olmuşdur. 2019-cu ilin may ayınadək, ümumilikdə, 5 eksponat təqdimatı keçirilmişdir.

Dəyirmi masada müzakirə olunan məsələ ilə əlaqədar Heydər Əliyev Muzeyinin direktoru, Azərbaycan Respublikasının Əməkdar Mədəniyyət işçisi Ramil Orucəliyev, Naxçıvan Dövlət Tarix Muzeyinin direktoru Naxçıvan Muxtar Respublikasının Əməkdar mədəniyyət işçisi Nizami Rəhimov, C.Məmmədquluzadə adına Naxçıvan Muxtar Respublika Ədəbiyyat Muzeyinin direktoru Aləmzər İbrahimova, “Xan Sarayı” Dövlət-Tarix Memarlıq, Möminə Xatın və Açıq Səma Altında Muzey Kompleksinin direktoru, Azərbaycan Respublikasının Əməkdar Mədəniyyət işçisi Nəzakət Əsədova, “Naxçıvanqala” Tarix Memarlıq Muzey Kompleksinin direktoru Rəhim Rəhimov, Naxçıvan Dövlət Xalça Muzeyinin direktoru Ülviyyə Məmmədova, Cəmşid Naxçıvanskinin Ev Muzeyinin direktoru Abasət Nuriyev çıxış etmişlər. Dəyirmi masa iştirakçıları müasir şəraitdə muzeylərin zənginləşdirilməsi üçün eksponat toplanması sahəsində muzeylərin işi, bu sahədə mövcud mənbələrdən istifadənin vəziyyəti və digər məsələləri müzakirə etmişlər.

Dəyirmi masada nazirliyin sistemində fəaliyyət göstərən muzeylərin əməkdaşları da iştirak etmişdir. Sonra muzey işçilərininin sualları dəyirmi masa iştirakçıları tərəfindən cavablandırılmışdır.

Tədbirin sonunda muzeyin ekspozisiyasına baxış olmuşdur.

Naxçıvan Muxtar Respublikası
Mədəniyyət Nazirliyinin Mətbuat Xidməti
24.05.2019



ABŞ-Azərbaycan müştərək beynəlxalq arxeoloji ekspedisiyası qədim şəhər dövlətinin mərkəzi olan Oğlanqala yaşayış yerində tədqiqat işləri aparır.

400 kvadratmetr ərazidə aparılan qazıntı işlərinə may ayının 20-dən başlanılıb. Tədqiqatların əsas məqsədi isə Naxçıvanın antik dövrə aid tarixi və mədəniyyətinin öyrənilməsidir. Qeyd edək ki, Oğlanqala eramızdan əvvəl 4-cü əsrdə Azərbaycanda formalaşan Atropatena dövlətinin əsas inzibati, siyasi mərkəzlərindən biri olub. Ötən illərdə qədim yaşayış yerində aparılan tədqiqatlar zamanı Atropatena dövrü ilə bağlı müəyyən tapıntılar əldə edilsə də həmin dövrə aid yaşayış binalarının, qala divarlarının planları tamamilə aşkara çıxarılmayıb. Ancaq builki tədqiqatlar zamanı ərazidə antik dövrə aid yaşayış binalarının qalıqları, qəbir abidələri və müxtəlif formalı keramika nümunələri aşkar edilib.

ABŞ-ın Pensilvaniya Universitetinin tarixçi alimi, arxeoloq Lauren Rissvet bu yaşayış yerinin böyük sahəyə malik olduğunu və Oğlanqala mərkəz olmaqla ərazidə bir çox qala-şəhərlər yerləşdiyini bildirib. Buranın bütün Qafqaz regionunun mərkəzlərindən biri olmaqla mühüm ictimai-siyasi əhəmiyyət daşıdığını qeyd edib.

Ərazidə aparılan araşdırmalar zamanı Atropatena dövlətinə aid çoxlu dəlillər toplanıb, bu dövlətin digər dövlətlərlə və xalqlarla olan əlaqələrinə dair tapıntılar da əldə edilib. Bu qədim yaşayış məskəni Naxçıvan üçün mühüm əhəmiyyətə malikdir.

Qədim tarixə malik Oğlanqala yaşayış yerində arxeoloji tədqiqatların iyun ayının 15-nə kimi davam etdiriləcəyi gözlənilir.

Naxçıvan Muxtar Respublikası
Mədəniyyət Nazirliyinin Mətbuat Xidməti
24.05.2019



Mayın 23-də Duzdağ Fizioterapiya Mərkəzinin 40 illik yubileyinə həsr olunmuş tədbirdə Naxçıvan Dövlət Filarmoniyasının Kamera Orkestrinin konserti olub.

Qeyd etmək lazımdır ki, Naxçıvan Dövlət Filarmoniyasının Kamera Orkestri muxtar respublikamızın tanınmış orkestrlərindən biridir. Orkestrinin bədii rəhbəri və baş dirijoru Azərbaycan Respublikasının Xalq artisti Çingiz Axundovdur.

Orkestrin çıxışları musiqisevərlər tərəfindən həmişə rəğbətlə qarşılanır. Naxçıvan Dövlət Filarmoniyasının Kamera Orkestrinin repertuarı çox zəngindir. Bu repertuarlara Azərbaycan bəstəkarlarının əsərləri ilə yanaşı klassik instrumental kamera musiqisi və Avropa bəstəkarlarının əsərləri də daxildir.

Tədbirdə orkestr əvvəlcə bəstəkar Aqşin Əlizadənin “Cəngi” əsərini səsləndirib.

Daha sonra gənc müğənni İlkin Abdullayev görkəmli bəstəkar Səid Rüstəmovun “Zəfəri Baharın” mahnısını ifa edib. Azərbaycan Respublikasının Əməkdar artisti Gülyanaq Fərzəliyeva Vasif Adıgözəlovun “Naz-naz” mahnısını təqdim etdikdən sonra Naxçıvan Muxtar Respublikasının Əməkdar artisti Azər Cəfərli Rəşid Məmmədovun “Doğma Naxçıvan”, Səid Rüstəmovun “Haralısan” adlı əsərlərini səsləndirib.

Konsert proqramının davamında Kamera Orkestrinin ifa etdiyi “Görüş” filmindən “Vals”, gənc müğənni Rahim Əsgərzadənin ifasında görkəmli Azərbaycan bəstəkarı Emin Sabitoğlunun “Nə gözəldir Azərbaycan” əsərləri konsertə rəngarənglik qatıb.

Konsert bütün solistlərin ifasında Eldar Mansurovun “İlhamla sabaha” mahnısı ilə başa çatıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
24.05.2019



25 may 2019-cu il tarixdə “Şərur” Xalq Yallı Ansamblı Ukraynanın paytaxtı Kiyev şəhərində Azərbaycan Diplomatiyasının 100 illiyi, “28 may-Respublika Günü” və Naxçıvan Muxtar Respublikasının yaradılmasının 95 illik yubileyi münasibətilə keçiriləcək tədbirdə konsert proqramı ilə çıxış edərək Naxçıvan yallılarını nümayiş etdirəcək.

Naxçıvan Muxtar Respublikası
Mədəniyyət Nazirliyinin Mətbuat Xidməti
24.05.2019







Mayın 23-də M.T.Sidqi adına Naxçıvan Dövlət Kukla Teatrı Babək Rayon Mədəniyyət Sarayında uşaqlar və məktəblilər üçün “Qoğalın sərgüzəşti” tamaşasını göstərib.

Teatr yarandığı dövrdən uşaq və məktəblilərin zövqünü oxşayan tamaşalar hazırlamış, onların estetik zövqünü formalaşdırmış, mənəvi-estetik prinsipləri əsas tutmuşdur. Teatrın son illərdə hazırladığı “Niyyət açarı”, “Göyçək Fatma”, “Ələddinin sehrli çırağı”, “Sirli sözlər”, “Tovuzquşunun nəğmələri”, “Tülkülərə inanmayaq”, “Qırmızı, yaşıl, mavi”, “Qırmızı papaq” və başqa tamaşalar uşaq və məktəblilər tərəfindən maraqla qarşılanmışdır.

Məşhur rus xalq nağılı olan “Qoğalın sərgüzəşti” haqqında çoxsaylı filmlər, cizgi filmləri çəkilib, tamaşalar hazırlanmışdır. Tamaşada hadisələr lovğa və təkəbbürlü Qoğalın başına gələn sərgüzəştlər üzərində qurulmuşdur.

“Qoğalın sərgüzəşti” tamaşasında da bütün nağıl-tamaşalarda olduğu kimi xeyirin şər, yaxşılığın pislik, ədalətin haqsızlıq üzərində qələbəsi əsas ideyadır. Bundan başqa lovğalıq, özündənrazılıq kimi hisslər tənqid edilir. Nağıldan fərqli olaraq tamaşa nikbin sonluqla başa çatır. İvan Qoğalı Tülkünün kələyindən xilas edir.

Bu maraqlı tamaşada Dovşan, Tülkü, Şir, Canavar, Kirpi, İvan, Marusya, Ayı personajlarını teatrın aktyorları Əfqanə Ələsgərova, Vəsmə Quliyeva, İlqar Babayev, İlham Babayev, Süleyman Süleymanov, Ulduz Süleymanova, İbad Nəbiyev və başqaları xarakterik və təbii canlandırırlar.

Tamaşanın quruluşçu rejissoru, Naxçıvan Muxtar Respublikasının Əməkdar mədəniyyət işçisi Nadir Hüseynov, quruluşçu rəssamı Ədalət Quliyev, bəstəkarı Əli Məmmədovdur.

“Qoğalın sərgüzəşti” tamaşası uşaqlara xoş əhval-ruhiyyə bəxş edib.

Naxçıvan Muxtar Respublikası
Mədəniyyət Nazirliyinin Mətbuat Xidməti
23.05.2019



Mayın 23-də Naxçıvan Muxtar Respublikası Mədəniyyət Nazirliyinin iş planına əsasən Nazirliyin tabeliyində fəaliyyət göstərən uşaq musiqi, incəsənət və bədii sənətkarlıq məktəblərinin şagirdləri arasında Naxçıvan Muxtar Respublikasının yaradılmasının 95 illik yubileyinə həsr olunmuş “Doğma yurdum Naxçıvan” adlı rəsm müsabiqəsi keçirilmişdir.

Tədbirdə giriş sözü ilə çıxış edən Naxçıvan Muxtar Respublikası Mədəniyyət Nazirliyinin təhsil müəssisələri ilə iş üzrə baş məsləhətçisi Leyla Əlimərdanova bildirmişdir ki, Azərbaycanın ayrılmaz tərkib hissəsi olan Naxçıvan Muxtar Respublikası çox mürəkkəb tarixi inkişaf yolu keçmişdir. 5 min illik tarixə malik olan qədim diyarımız zəngin mədəniyyətə sahibdir. Naxçıvanın özünəməxsusluğunu əks etdirən əsas məqamlardan biri onun tarixi abidələrlə zəngin olmasıdır. Naxçıvan Muxtar Respublikası Azərbaycanın tərkib hissəsi kimi ölkəmizin ictimai-siyasi, iqtisadi-mədəni həyatı ilə həmahəng şəkildə özünün tarixi inkişaf yolunu uğurla davam etdirir. Bugünkü inkişaf təməli isə ulu öndər Heydər Əliyevin adı ilə sıx bağlıdır.

Bildirilib ki, hər il olduğu kimi bu ildə muxtariyyətin əldə olunması münasibəti ilə müxtəlif tədbirlər həyata keçirilir. Son dövrlərdə muxtar respublikamızda rəssamlıq sənətinə və gənc rəssamlara xüsusi diqqət və qayğı göstərilir, istedadlı uşaqların aşkara çıxarılması, onların bacarıq və qabiliyyətlərinin inkişaf etdirilməsi sahəsində işlər davam etdirilir.

Qeyd olunmuşdur ki, bu il Naxçıvan Muxtar Respublikasının yaradılmasının 95 illik yubileyi münasibəti ilə müxtəlif tədbirlər həyata keçirilir. Məhz belə tədbirlərdən biri də bu gün keçirilən “Doğma yurdum Naxçıvan” adlı rəsm müsabiqəsidir. Müsabiqənin keçirilməsində məqsəd şagirdlərin yaradıcılıq qabiliyyətlərinin daha da inkişaf etdirilməsi, gənc nəsildə mənəvi, bədii və estetik dünyagörüşünün formalaşdırılması, gənclərdə vətənpərvərlik duyğularının daha da gücləndirilməsindən ibarətdir.

Daha sonra müsabiqəyə start verilmişdir. Müsabiqədə Naxçıvan Muxtar Respublikası Mədəniyyət Nazirliyinin tabeliyində fəaliyyət göstərən uşaq musiqi, incəsənət və bədii sənətkarlıq məktəblərində rəsm ixtisası üzrə təhsil alan 21 şagird iştirak etmişdir. Müsabiqə iştirakçıları müxtəlif mövzularda rəsmlər çəkmişlər. Bu rəsm əsərlərində doğma diyarımız, gözəl Naxçıvanın qədim tarixi, zəngin mədəniyyət abidələri, füsunkar təbiəti əks etdirilmişdir.

Müsabiqə başa çatdıqdan sonra gənc rəssamların çəkdikləri rəsm əsərləri münsiflər heyəti tərəfindən qiymətləndirilmişdir. Müsabiqədə Babayeva Nisəbəyim (Şərur Şəhər Bəhruz Kəngərli adına Uşaq İncəsənət Məktəbinin IV sinif şagirdi) I, Quliyev Zəfər (Şərur Şəhər Bəhruz Kəngərli adına Uşaq İncəsənət Məktəbinin IV sinif şagirdi) və Tahirov Bayram (Naxçıvan Şəhər Uşaq Musiqi və İncəsənət Məktəbinin II sinif şagirdi) II, Bağırlı Turac, Zeynalova Gülay (Naxçıvan Şəhər Uşaq Musiqi və İncəsənət Məktəbinin IV sinif şagirdləri) və Hüseynzadə Aydan (Naxçıvan Şəhər Ərtoğrul Cavid adına Uşaq Musiqi və Bədii Sənətkarlıq Məktəbinin II sinif şagirdi) III yerin qalibi olmuşlar.

Müsabiqənin sonunda qalib olmuş şagirdlər diplomlarla, fəal iştirak edən şagirdlərdən 7 nəfəri isə fəxri fərmanla təltif olunmuşdur.

Naxçıvan Muxtar Respublikası
Mədəniyyət Nazirliyinin Mətbuat Xidməti
23.05.2019



Mayın 23-də Cəlil Məmmədquluzadə adına Naxçıvan Muxtar Respublika Ədəbiyyat Muzeyində Xalq yazıçısı Hüseyn İbrahimovun həyat və yaradıcılığına həsr olunmuş konfrans keçirilib.

Konfransı giriş sözü ilə açan Naxçıvan Muxtar Respublikasının Mədəniyyət naziri Natəvan Qədimova bildirib ki, bu il Xalq yazıçısı Hüseyn İbrahimovun anadan olmasının 100 illiyi tamam olur. Azərbaycan Respublikasının Prezidenti cənab İlham Əliyev mayın 18-də Azərbaycanın Xalq yazıçısı Hüseyn İbrahimovun 100 illik yubileyinin qeyd edilməsi barədə Sərəncam imzalayıb.

Naxçıvan Muxtar Respublikası Ali Məclisinin Sədri cənab Vasif Talıbov yazıçının 100 illik yubileyinin qeyd edilməsi ilə bağlı 13 may 2019-cu ildə Sərəncam və Sərəncamın icrası istiqamətində Tədbirlər Planı təsdiq etmişdir. Naxçıvan Muxtar Respublikasının Mədəniyyət Nazirliyi və Yazıçılar Birliyinin təşkilatçılığı ilə keçirilən konfrans da Tədbirlər Planının icrası məqsədilə keçirilir. Bu gün həm də yazıçının anadan olduğu gündür.

Qeyd edilib ki, Azərbaycan nəsrinin inkişafında və zənginləşməsində Xalq yazıçısı Hüseyn İbrahimovun özünəməxsus xidməti vardır. Əsərlərinin məzmunu, janrı və mövzu əhatəliyinə görə yazıçı geniş oxucu kütləsinin rəğbətini qazanmışdır.

Hüseyn Məmmədəli oğlu İbrahimov 23 may 1919-cu ildə qədim diyarımızın məşhur kəndlərindən biri olan, görkəmli alim və sənətkarlar yetirən Şahtaxtı kəndində anadan olmuşdur. İlk təhsilini kənd məktəbində alan Hüseyn İbrahimov, sonralar Naxçıvan şəhərindəki Pedaqoji məktəbdə oxumuş, Azərbaycan Dövlət Universitetinin (indiki BDU) jurnalistika şöbəsini bitirmişdir. Bir müddət Sədərək kəndində müəllim işləyən yazıçı uzun müddət komsomol, partiya və sovet işində - Noraşen (Şərur) rayon komsomol komitəsinin katibi, Naxçıvan MSSR Nazirlər Soveti yanında Radio Verilişləri Komitəsinin sədri, “Şərq qapısı” qəzetinin redaktoru, Azərbaycan KP Naxçıvan Vilayət Komitəsi təbliğat və təşviqat şöbəsinin müdiri, Naxçıvan MSSR Mədəniyyət naziri, Azərbaycan Yazıçılar Birliyi Naxçıvan şöbəsinin məsul katibi olmuşdur.

Hüseyn İbrahimov Naxçıvan MSSR Ali Sovetinin 3 çağırış deputatı olmuş, Naxçıvan MSSR Ali Sovetinin sədri (1963, 1967) seçilmişdir. Azərbaycan müstəqillik qazandıqdan sonra, 1999-cu ildə həm də Naxçıvan Muxtar Respublikası Ali Məclisinin deputatı olmuşdur.

Diqqətə çatdırılıb ki, yazıçı yaradıcılığa İkinci Dünya müharibəsi illərində başlamışdır. Hüseyn İbrahimov bu dövrdə yazdığı “Məzar daşında yazı”, “Senanın sevinci”, “Qorxmaz kapitan”, “Daş altındakı məktublar”, “Xəncər” və başqa hekayələrində əsasən gənclərin qəhrəmanlıq və mübarizlik ruhunda tərbiyəsi məsələlərinə toxunmuşdur.

Çoxsaylı hekayələr müəllifi olan yazıçının bu əsərləri sənət baxımından bitkin və yığcamdır, həyatın canlı bir lövhəsidir. Yazıçı “Şirin xatirə”, “Qumralın məktubları”, “Kənd həsrəti”, “Aləmzər”, “Nəcibənin ürəyi”, “Zərifənin çiçəkləri”, “Ürək”, “Baharın nəğməsi”, “Gülzar” və başqa hekayələrində yaddaqalan surətlər yaratmaq bacarığını göstərmişdir.

Yazıçı müxtəlif illərdə bir çox hekayə, povest və romanlarını nəşr etdirmişdir. O, qələmini dramaturgiya sahəsində də sınayaraq “Torpağın övladları”, “Kamalın ad günü”, “İtirilən sağlıq” kimi pyeslər yazmışdır.

Hüseyn İbrahimov eyni zamanda bədii tərcümə ilə də məşğul olmuş, bir sıra tanınmış yazıçıların hekayələrini Azərbaycan dilinə çevirmişdir.

Çoxşaxəli yaradıcılığa malik olan Hüseyn İbrahimov ədəbiyyatımızda ilk növbədə bir nasir kimi tanınmış, özünün nəsr əsərləri ilə ədəbi ictimaiyyətin, eləcə də oxucuların diqqətini cəlb etmişdir.

Yazıçının müasir və tarixi mövzuda yazdığı romanları onu görkəmli nasir kimi geniş ictimaiyyətə tanıtmışdır. Yazıçı Naxçıvan mühitindən aldığı mövzularla Azərbaycanımızı, azərbaycanlı psixologiyasını sənətkarlıqla təsvir etmişdir. Görkəmli tənqidçilər və ədəbiyyatşünaslar, yazıçının qələm dostları onun yaradıcılığı haqqında dəyərli fikirlər demiş və məqalələr yazmışlar.

Xalq yazıçısı Hüseyn İbrahimovun bədii yaradıcılığı zəngindir. Yazıçının qələmindən şeir, povest, məqalə, oçerk, kinopovest, teatr resenziyası, yol qeydləri də çıxmışdır. Sosialist Əməyi Qəhrəmanı Bahar Talıbovaya həsr etdiyi “Bahar” və digər bu kimi oçerkləri onun həm də mahir jurnalist olduğunu göstərir.

Hüseyn İbrahimovun əsərləri, rus, tacik, tatar, fransız və başqa dillərə tərcümə edilmişdir.

Yazıçı müxtəlif illərdə Finlandiya, Danimarka, İtaliya, Əlcəzair, İran, Türkiyədə olmuş, maraqlı yol qeydlərini, hekayələrini yazmış və oxuculara təqdim etmişdir.

Nazir demişdir ki, Hüseyn İbrahimovun əməyi dövlətimiz tərəfindən həmişə yüksək qiymətləndirilmişdir. Azərbaycan xalqının ümummilli lideri Heydər Əliyevin 27 iyun 1994-cü il tarixli fərmanı ilə Azərbaycan ədəbiyyatının inkişafındakı böyük xidmətlərinə görə Hüseyn İbrahimov “Şöhrət” ordeni ilə təltif edilmiş, 23 may 1998-ci il tarixli fərmanı ilə ona Xalq yazıçısı fəxri adı verilmişdir.

Yazıçı 2008-ci il 10 apreldə Naxçıvan şəhərində vəfat etmişdir.

Hüseyn İbrahimovun əsərləri bundan sonra da insanların kamilləşməsinə xidmət edəcəkdir, deyən Natəvan Qədimova vurğulayıb ki, bu əsərlərdə olan təmizliyə çağırış, insanlarda saflıq və gözəllik hisslərini aşılamaq, dövrün mühüm əxlaqi-mənəvi problemlərini qaldırmaq əsas pafos və ideyanı təşkil edir. Yazıçının yüksək amallara xidmət edən əsərləri bundan sonra da sevilə-sevilə oxunacaqdır.

Azərbaycan Respublikasının Əməkdar elm xadimi, filologiya üzrə elmlər doktoru, professor Hüseyn Həşimli “Xalq yazıçısı Hüseyn İbrahimovun yaradıcılıq yolu” mövzusunda çıxışında qeyd edib ki, onun əsərlərinin mövzu dairəsi genişdir. Yazıçı müasir dövrün aktual məsələləri ilə bərabər, həm də tarixi mövzularda əsərlər yazmışdır. Xalq yazıçısı maraqlı hekayələri, diqqəti cəlb edən povest və romanları ilə ədəbiyyatımıza sanballı əsərlər bəxş etmişdir.

Naxçıvan Muxtar Respublikası Yazıçılar Birliyinin sədri, Əməkdar mədəniyyət işçisi Asim Əliyev “Vətəndaş yazıçı” mövzusunda çıxışında bildirib ki, yazıçının bütün əsərlərində vətəndaşlıq mövqeyi, millilik və xəlqilik aydın görünür. Öz qəhrəmanlarını oxucuya sevdirmək, həyat həqiqətlərini olduğu kimi təsvir etmək onun vətəndaşlıq mövqeyinin əsas qayəsidir. Yazıçının əsərlərində mənəvi-əxlaqi problemləri ön plana çəkmək də vətəndaşlıq mövqeyindən irəli gəlirdi.

Filologiya üzrə fəlsəfə doktoru, dosent Ramiz Qasımov “Hüseyn İbrahimovun yaradıcılığında xalq və yurd məhəbbəti” mövzusunda çıxışında diqqətə çatdırıb ki, yazıçının istər kiçik əsərlərində, istərsə də irihəcmli epik əsərlərində xalq həyatının dolğun təsviri əsas yer tutur. Bu əsərlərdəki həyat lövhələrində oxucu yazıçının xalq həyatına dərindən bələd olduğunu və məhəbbətlə qələmə aldığını görür.

Tədbirin sonunda Xalq yazıçısının 100 illiyinə həsr olunmuş sərgiyə baxış olub.

Naxçıvan Muxtar Respublikası
Mədəniyyət Nazirliyinin Mətbuat Xidməti
23.05.2019



Mayın 22-də Cəlil Məmmədquluzadə adına Naxçıvan Dövlət Musiqili Dram Teatrında Naxçıvan Muxtar Respublikası Ali Məclisi Sədrinin 2009-cu il 7 fevral tarixli “Naxçıvan Muxtar Respublikasında Xalq yaradıcılığı günlərinin keçirilməsi haqqında” Sərəncamına uyğun olaraq xalq teatrlarının festivalına start verilib. Festivalın ilk günü Kazım Ziya adına Ordubad Rayon Xalq Teatrı şair-dramaturq, Naxçıvan Muxtar Respublikasının Əməkdar mədəniyyət işçisi Həsənəli Eyvazlının iki pərdəli yeddi şəkilli “Vəzifə hərisi” pyesi əsasında hazırlanmış tamaşanı göstərib.

Tamaşadan əvvəl Naxçıvan Muxtar Respublikasının Mədəniyyət naziri Natəvan Qədimova çıxış edərək 22 may-19 iyun tarixlərində Naxçıvan Muxtar Respublikası Mədəniyyət Nazirliyi tərəfindən Naxçıvan Dövlət Musiqili Dram Teatrında keçiriləcək “Xalq teatrlarının muxtar respublika festivalı – 2019”un açılışı münasibətilə teatrsevərləri təbrik etmiş, festivalda iştirak edən kollektivlərə uğurlar arzulamışdır.

Nazir bildirib ki, Naxçıvan Muxtar Respublikasında ənənəvi olaraq keçirilən festivallardan biri də məhz xalq yaradıcılığının uğurlarını özündə ehtiva edən xalq teatrlarının muxtar respublika festivalıdır. 2014-cü ildən keçirilməsinə başlanılan bu mədəniyyət tədbiri xalq teatrlarının mədəniyyətimizin beşiyi olan Naxçıvanda teatr sənətinin inkişafına və teatra həvəsi olan istedadlı insanların aşkar edilərək peşəkar səhnəyə cəlb olunmasına öz töhfəsini verəcəkdir. Dram dərnəklərinin işinin daha da səmərəli təşkili, xalq teatrlarının qüvvəsini və yaradıcılıq potensialını daha geniş tamaşaçı kütləsi qarşısında göstərmək və teatr kollektivlərini geniş ictimaiyyətə tanıtmaq baxımından da bu festivalın əhəmiyyəti böyükdür.

Qeyd edilib ki, bu gün muxtar respublikada beş xalq teatrı fəaliyyət göstərir. Dövlətimiz tərəfindən bu xalq teatrlarının fəaliyyətinə daim diqqət və qayğı göstərilir, kollektiv üzvlərinin əməyi dövlətimiz tərəfindən yüksək qiymətləndirilir. Xalq teatrları hazırladıqları müxtəlif məzmunlu tamaşalarla rayon sakinlərinin estetik zövqünün formalaşmasında, gənc nəslin milli dəyərlər ruhunda tərbiyəsində, insanların asudə vaxtlarının mənalı və səmərəli keçirilməsində əhəmiyyətli rol oynayırlar. Ötən illər ərzində xalq teatrlarının səhnələşdirdikləri “Kamança”, “Ac həriflər”, “Məhəbbət nişanəsi”, “Çimnaz xanım yuxudadır”, “Durna”, “Xəcalət”, “Şöhrət ardınca”, “Ezop”, “Ər və arvad”, “Unuda bilmirəm”, “Qəşəmin yuxusu”, “Dələduz”, “Motsart və Salyeri”, “Yalan”, “Saqqalın kəraməti”, “Tiflis səfəri”, “Şahsənəm və Gülpəri” kimi 20-dən çox tamaşa ictimaiyyət tərəfindən maraqla qarşılanmışdır.

Muxtar respublikada ilk xalq teatrı olan və 1964-cü ildə yaradılan Kazım Ziya adına Ordubad Rayon Xalq Teatrı zəngin repertuarı ilə hər zaman teatrsevərlərin rəğbətini qazanmış, muxtar diyarımızda teatr sənətinin inkişafına dəyərli töhfələr vermişdir. “Xalq teatrlarının muxtar respublika festivalı – 2019”un açılışı məhz Ordubad Rayon Xalq Teatrı ilə olacaqdır. Xalq teatrı Həsənəli Eyvazlının eyniadlı əsəri əsasında hazırlanmış “Vəzifə hərisi” ikihissəli komediyasını teatrsevərlərə təqdim edəcəkdir.

1978-ci ildən fəaliyyət göstərən Naxçıvan şəhərindəki “Gənclik” Xalq Teatrı bu illər ərzində C.Məmmədquluzadə, Ə.Haqverdiyev, C.Cabbarlı, S.S.Axundov, S.Rüstəm, B.Vahabzadə, N.Hikmət və başqalarının dramaturgiyasına müraciət etmiş, uğurlu səhnə əsərləri yaratmışdır. Naxçıvan Şəhər Xalq Teatrı iyunun 4-də Seyfəddin Dağlının “Adı sənin, dadı mənim” üçpərdəli komediyası əsasında hazırlanmış eyniadlı tamaşa ilə çıxış edəcəkdir.

Özünəməxsus yaradıcılıq ənənələri olan Rza Təhmasib adına Şərur Rayon Xalq Teatrına bu status 1981-ci ildə verilmişdir. Bu xaql teatrının Naxçıvanda teatr sənətinin inkişafında və təbliğində öz yeri vardır. Teatr bu günə qədər hazırladığı müxtəlif məzmunlu tamaşalarla böyük uğurlar qazanmış, tamaşaçı zövqünə cavab vermək üçün daim axtarışda olmuşdır. Son illər quruluş etibarilə daha mürəkkəb tamaşaların təqdimində müvəffəq olan bu xalq teatrı builki festivalda iyunun 12-də Eynəli bəy Sultanovun “Sənəm” adlı ikihissəli vodevilini təqdim edəcəkdir.

Babək və Şahbuz Rayon Xalq teatrları son illər yaranan kollektivlərdir. Müvafiq olaraq 2009 və 2011-ci illərdə yaradılan bu xalq teatrları qısa zaman ərzində görkəmli dramaturqlarımızın yaradıcılıqlarına müraciət edərək uğurlu səhnə əsərləri ərsəyə gətirmiş, həmçinin dünya ədəbiyyatı nümunələrinə aid əsərləri uğurla səhnələşdirmişlər.

Şahbuz Rayon Xalq Teatrı Əbdürrəhim bəy Haqverdiyevin “Məşədi Qulam qiraət öyrənir” ikişəkilli vodevilini mayın 29-da, Babək Rayon Xalq Teatrı isə Əfqan Əsgərovun dördpərdəli “Qız atası” komediyasını festivalın sonuncu günü - iyunun 19-da teatrsevərlərə təqdim edəcəkdir.

Nazir vurğulayıb ki, bir aya yaxın davam edəcək xalq teatrlarının festivalı istedadlı aktyorların bacarığının üzə çıxarılmasına və professional səhnəyə cəlb edilməsinə əhəmiyyətli töhfə verəcəkdir. Belə festivalların keçirilməsində məqsəd milli dəyərlərimizi yaşatmaq və təbliğ etmək, istedadlı insanları geniş ictimaiyyətə tanıtmaqdan ibarətdir.

Sonra Kazım Ziya adına Ordubad Rayon Xalq Teatrı Həsənəli Eyvazlının “Vəzifə hərisi” pyesi əsasında hazırlanmış tamaşanı təqdim etdi. “Vəzifə hərisi” tamaşasının rejissoru Naxçıvan Muxtar Respublikasının Əməkdar mədəniyyət işçisi Günəş Ağayeva, quruluşçu rejissoru Nadir Məhərrəmov, rəssamı Hikmət Əliyev, musiqi tərtibatçısı Qasım Rəsulovdur.

Tamaşada sovet dövründə idarə müdiri işləmiş Qulaməlinin (Nadir Məhərrəmov) müstəqillik illərində təsadüfən müdir təyin olunmasından bəhs edir. İdarədə hakimi-mütləq olan Qulaməli işçilərə qarşı qaba rəftarı, rüşvətxorluğu, ötən günlərin həsrətini çəkməsi, təmiz və işgüzar adamları işdən çıxarmaqla hədələməsi ilə həddini aşır. Lakin onun belə idarəetməsi çox çəkmir. Qulaməli və onun yaltaq müavini Məmiş (Nağı Əlisoy) tamaşanın sonunda işdən azad olunurlar. Tamaşada Xumar, Qasım, Elçin, Taclı, Əli müəllim, Qafar kişi, Şükür kişi, Gülüm Kərəm, Şərəbanı, katibə, qadın obraz və personajlarının ifaçıları Nəzrin İsmayılova, Sarvan Məmmədli, EminYusifli, Süqarə Mirzəli, Oruc Əliyev, Hikmət Orucov, Həsən Məmmədov, Davud Məmmədov, Günəş Ağayeva, Aysel Mustafazadə, Turanə Quliyeva, Ülviyyə Babayeva səhnədə təbii və canlı görünürlər. Mənfi tiplərin tamaşaya gülüş elementləri gətirməsi maraqla qarşılanır və yadda qalır.

Naxçıvan Muxtar Respublikası
Mədəniyyət Nazirliyinin Mətbuat Xidməti
22.05.2019



Mayın 22-də Naxçıvan Dövlət Uşaq Filarmoniyasının xalq çalğı alətləri ansamblının, vokal və rəqs qruplarının Naxçıvan Musiqi Kollecində konserti olub.

Qeyd edək ki, muxtar respublikamızda uşaqların sağlam mühitdə böyümələri və təhsil almaları üçün gözəl şərait yaradılmışdır. İstedadlı uşaqların aşkara çıxarılması ilə yanaşı gənc nəslin asudə vaxtının səmərəli təşkili də bu gün diqqət mərkəzində olan sahələrdəndir. Bunun üçün muxtar respublikamızda bir sıra infrastruktur sahələri yaradılmış və onların istifadəsinə verilmişdir. Naxçıvan Muxtar Respublikası Ali Məclisi Sədrinin 2010-cu il 19 aprel tarixli Sərəncamı ilə yaradılan Naxçıvan Dövlət Uşaq Filarmoniyası da belə mədəniyyət müəssisələrindən biridir. Filarmoniyada uşaqların yaradıcılıq potensialının inkişafı və istedadlı uşaqların bacarıq və qabiliyyətlərini göstərməsi üçün hər cür şərait yaradılmışdır. Burada uşaqlardan ibarət xalq çalğı alətləri ansamblı, kamera ansamblı, muğam və xor kollektivləri, vokal və rəqs qrupları fəaliyyət göstərir. Gənc istedadların vaxtaşırı konsertləri təşkil edilir, müxtəlif tədbirlər həyata keçirilir.

Konsertdə ilk olaraq xalq çalğı alətləri ansamblının ifasında “Mahur rəngi” səslənmişdir. Qeyd etmək lazımdır ki, ansamblın bədii rəhbəri Kənan Feyzullayevdir.

Filarmoniyanın solistləri Təyyar Mədədli və Mətləb Şirinzadənin ifasında Ələkbər Tağıyevin “Azərbaycan oğluyam” mahnısı alqışlarla qarşılanmışdır.

Filarmoniyanın solistləri Məmməd Cəfərzadə, Səid Yetişməz, Barış Cavadlı, Təyyar Mədədli, Mətləb Şirinzadə, Əli Mehralıyev, Ələkbər Sadiqov, Özər Hacıyev, Xəzər Əliyev, Musa Abdullayev, Fuad Məmiyev, Babək Səmədzadənin ifasında bəstəkarlardan Bəhram Nəsibovun “Qarabağ”, Rauf Məmmədovun “Naxçıvanım”, “Yaşa mənim xalqım”, Ramiz Mirişlinin “Doğma diyar” mahnıları və başqa musiqi əsərləri səslənmişdir.

Kollektivin istedadlı solistləri Ələkbər Sadiqov, İsmət Əliyev, Xəzər Əliyev, Əli Mehralıyev, Eltac Ayazlı, Özər Hacıyev, Mətləb Şirinzadə, Təyyar Mədədlinin ifasında təqdim olunan “Heyratı”, “Arazbarı”, “Mənsuriyyə” ritmik muğamları konsert iştirakçılarında xoş əhvali-ruhiyyə yaratmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
22.05.2019



Mayın 21-də Azərbaycan Respublikası medallarının, Naxçıvan Muxtar Respublikasının fəxri adının və Azərbaycan Respublikası Prezidentinin mükafatının təqdimat mərasimi keçirilmişdir.

Naxçıvan Muxtar Respublikası Ali Məclisinin Sədri Vasif Talıbov təltif olunanları təbrik edərək demişdir: Bu günAzərbaycanda möhkəm dövlətçilik vardır. Ümummilli liderimiz Heydər Əliyevin təməlini qoyduğu dövlətçilik ənənələri ölkə Prezidenti tərəfindən uğurla davam etdirilir. Bunun da nəticəsində ölkəmizdə sabitlik, inkişaf və tərəqqi vardır. Ölkəmizdə müxtəlif sahələrdə çalışan vətənpərvər insanlar isə öz əməkləri ilə dövlətçiliyimizin möhkəmlənməsinə töhfə verirlər.

Ali Məclisin Sədri demişdir: Dövlət və xalq qarşısında xidməti olanlar o yerdə təltif olunurlar ki, həmin ölkədə dövlətçilik ənənələri, sabitlik və inkişaf olsun. Bu gün xidmətlərində və fəaliyyətlərində fərqlənənlərin təltif olunması da ölkəmizdə dövlətçilik ənənələrinin inkişaf etdiyini göstərir. İnsan əməyinə qiymət verilərkən o daha da məhsuldar olur. Təltif olunanlar da çalışdıqları sahələrdə nümunə göstərən, öz xidmətləri ilə fərqlənən insanlardır.

“Hər kəs çalışdığı sahədə üzərinə düşən vəzifələri layiqincə yerinə yetirməli, dövlətçiliyimizin möhkəmlənməsinə töhfə verməlidir. Çünki dövlətçiliyin möhkəmlənməsi ölkənin davamlı inkişafı və sabitliyi deməkdir”, – deyən Ali Məclisin Sədri təltif olunanlara gələcək fəaliyyətlərində uğurlar arzulamışdır.

Sonra Ali Məclisin Sədri medalları, Naxçıvan Muxtar Respublikasının fəxri adını, eləcə də Azərbaycan Respublikası Prezidentinin mükafatını təqdim etmişdir.

Təltif olunanlardan Vüsal Əliyev, Füzuli Kazımov, Tahir Mirzəliyev, Rəşad Əliyev və Səbuhi Məmmədov əməklərinə verilən yüksək qiymətə görə çalışdıqları kollektivlər adından minnətdarlıq etmişlər. Qeyd olunmuşdur ki, bundan sonra da ulu öndər Heydər Əliyevin siyasi xəttinə sadiq qalacaq,səmərəli fəaliyyət göstərərək ölkəmizin inkişafına töhfə verəcəklər.

Prezident mükafatçılarından Natiq Məmmədov, Əbülfəz Məmmədov, Zülfiqar Mahmudov, Zeynalabdın Babayev, Tamerlan Bağırov, Səyyad Məmmədov və Gülnarə Hüseynova minnətdarlıq edərək demişlər ki, Naxçıvan Muxtar Respublikasında digər sahələrlə yanaşı, mədəniyyətin, incəsənətin inkişafına da xüsusi diqqət yetirilir. Milli dəyərlərimiz qorunur, muğam sənətimiz, milli musiqimiz və rəqslərimiz yaşadılır. Bu sahələrdə çalışanların təltif olunması da göstərilən diqqətin daha bir ifadəsidir.

Ali Məclisin Sədri qarşıdan dövlətçiliyimizin təməlinin qoyulduğu və elan edildiyi 28 May – Respublika Gününün gəldiyini bildirmiş, bu münasibətlə təltif olunanları və onların timsalında muxtar respublika əhalisini təbrik etmişdir.

Naxçıvan Muxtar Respublikası
Mədəniyyət Nazirliyinin Mətbuat Xidməti
22.05.2019



Azərbaycanın Qarsdakı Baş konsulluğunun təşkilatçılığı ilə Cəlil Məmmədquluzadə adına Naxçıvan Dövlət Musiqili Dram Teatrı Türkiyədə qastrolda olacaq. Qastrol Azərbaycan Xalq Cümhuriyyətinin 101-ci ildönümü münasibətilə həyata keçirilir.

Teatrın yaradıcı kollektivi mayın 25-də Qars Qafqaz Universitetinin konsert salonunda böyük yazıçı Cəlil Məmmədquluzadənin “Ölülər” pyesi əsasında səhnələşdirilən “Ölülər və dəlilər” tamaşasını təqdim edəcək. Azərbaycanın Əməkdar artisti Tofiq Seyidov və Nurbəniz Niftəliyevanın birgə quruluş verdiyi tamaşa ilk dəfədir ki, səhnəyə çıxarılır.

Naxçıvan Muxtar Respublikası
Mədəniyyət Nazirliyinin Mətbuat Xidməti
22.05.2019



İyunun 1-i və 2-də “Naxçıvanqala” Tarix-Memarlıq Muzey Kompleksində növbəti “Göycə” Festivalı keçiriləcək.

Festivalın açılışı iyun ayının 1-də saat 11:00-da olacaq.

Festivalda Naxçıvan şəhərindən, Şərur, Babək, Ordubad, Culfa və Kəngərli rayonlarından olan torpaq mülkiyyətçilərinin yetişdirdiyi müxtəlif növdə göycə məhsulları, o cümlədən hazırlanan əl işlərinin sərgi-satışı həyata keçiriləcək.

Həmçinin göycə yetişdirən fermerlər arasında “Ən yaxşı göycə” müsabiqəsi keçiriləcək, qaliblərə diplomlar və hədiyyələr təqdim olunacaq.

“Naxçıvanqala” Tarix-Memarlıq Muzey Kompleksində keçiriləcək builki “Göycə” Festivalı da özünün rəngarəngliyi və müxtəlifliyi ilə iştirakçılarda xoş ovqat yaradacaq.

Qeyd edək ki, Naxçıvanda ötən illərdə də “Göycə” Festivalı keçirilib. Müxtəlif Kütləvi İnformasiya Vasitələri və sosial şəbəkələrdə geniş şəkildə işıqlandırılan ənənəvi Festival Naxçıvana gələn turistlər tərəfindən də kifayət qədər maraqla qarşılanıb.

Festival ərzində Naxçıvan Dövlət Filarmoniyasının Mahnı və Rəqs Ansamblı, Naxçıvan Musiqi Kollecinin “Gənclik” instrumental ansamblı və Naxçıvan Şəhər Mədəniyyət Şöbəsinin “Şəlalə” instrumental ansamblı rəngarəng musiqi nömrələri ilə festival iştirakçılarına xoş ovqat bəxş edəcəkdir.

Naxçıvan Muxtar Respublikası
Mədəniyyət Nazirliyinin Mətbuat Xidməti
22.05.2019



      Mayın 21-də Naxçıvan Muxtar Respublikasının Mədəniyyət və Təhsil nazirliklərinin birgə tədbirlər planına əsasən Naxçıvan Dövlət Rəsm Qalereyasında ümumtəhsil məktəblərinin şagirdləri arasında Naxçıvan Muxtar Respublikasının yaradılmasının 95 illik yubileyinə həsr olunmuş “Qədim və müasir Naxçıvan gənc rəssamların fırçasında” adlı rəsm müsabiqəsinin yekun turu keçirilmişdir.

Nəzərinizə çatdıraq ki, Naxçıvan Dövlət Rəsm Qalereyası və təhsil şöbələri tərəfindən müsabiqənin rayon (şəhər) turları 2018-ci il oktyabr ayından başlayaraq 2019-cu il aprel tarixədək keçirilmişdir. Bu müddət ərzində muxtar respublikanın ümumtəhsil məktəbləri arasında keçirilən müsabiqədə ümumilikdə 229 şagird iştirak etmişdir. Müsabiqə iştirakçıları müxtəlif mövzularda rəsmlər çəkmişdir. May ayının 21-də keçirilən müsabiqənin yekun turunda rayon (şəhər) turlarının qalibi olan 23 şagird iştirak etmişdir.

Tədbirdə Naxçıvan Muxtar Respublikasının Mədəniyyət Nazirliyinin təhsil müəssisələri ilə iş üzrə baş məsləhətçisi Leyla Əlimərdanova və Naxçıvan Dövlət Rəsm Qalereyasının direktoru Hökümə Məmmədli çıxış etmişdir.

Çıxış edənlər qeyd etmişlər ki, Azərbaycanın ayrılmaz tərkib hissəsi olan Naxçıvan Muxtar Respublikası çox mürəkkəb tarixi inkişaf yolu keçmişdir. 5 min illik tarixə malik olan qədim diyarımız zəngin mədəniyyətə sahibdir. Naxçıvanın özünəməxsusluğunu əks etdirən əsas məqamlardan biri onun tarixi abidələrlə zəngin olmasıdır. Naxçıvan Muxtar Respublikası Azərbaycanın tərkib hissəsi kimi ölkəmizin ictimai-siyasi, iqtisadi-mədəni həyatı ilə həmahəng şəkildə özünün tarixi inkişaf yolunu uğurla davam etdirir. Bugünkü inkişaf təməli isə ulu öndər Heydər Əliyevin adı ilə sıx bağlıdır.

Bildirilib ki, hər il olduğu kimi bu ildə muxtariyyətin əldə olunması münasibəti ilə müxtəlif tədbirlər həyata keçirilir. Məhz belə tədbirlər sırasında Mədəniyyət və Təhsil nazirliklərinin birgə təsdiq etdiyi 2018-2019-cu tədris ili üçün tədbirlər planına əsasən keçirilən “Qədim və müasir Naxçıvan gənc rəssamların fırçasında” adlı rəsm müsabiqəsinin özünəməxsus yeri vardır.

Müsabiqə keçirildikdən sonra gənc rəssamların çəkdikləri rəsm əsərləri münsiflər heyəti tərəfindən qiymətləndirilib. Müsabiqənin bu mərhələsində Babək rayon Sirab kənd tam orta məktəbinin IX sinif şagirdi Bağırlı Turac Çərkəz qızı – I yerin, Naxçıvan şəhər 8 №li tam orta məktəbinin VI sinif şagirdi Əliyev Cabbar İlqar oğlu və Şərur rayon Çomaxtur kənd tam orta məktəbinin XI sinif şagirdi Quliyev Zəfər Anar oğlu – II yerin, Şərur rayon Muğancıq-Mehrab kənd tam orta məktəbinin X sinif şagirdi Babayeva Nisəbəyim Ələsgər qızı və Naxçıvan şəhər 12 №li tam orta məktəbinin VI sinif şagirdi Zamanlı Şənay Toğrul qızı – III yeri tutmuşdur. Müsabiqənin sonunda qalib olmuş şagirdlər diplom və hədiyyələrlə, fəal iştirak edən şagirdlər fəxri fərmanla təltif olunmuşdur.

Naxçıvan Muxtar Respublikası
Mədəniyyət Nazirliyinin Mətbuat Xidməti
21.05.2019



      Mayın 21-də Ordubad Rayon Mədəniyyət Sarayında Naxçıvan Musiqi Kollecinin “Buta” muğam ansamblının konserti olub.

Qeyd edək ki, hazırda Naxçıvan Musiqi Kollecində 10-dan çox ixtisas üzrə kadr hazırlığı aparılır. Naxçıvan Muxtar Respublikası Ali Məclisi Sədrinin sərəncamlarına əsasən bu təhsil ocağının 30 və 40 illik yubileyləri dövlət səviyyəsində qeyd olunub.

Naxçıvan Musiqi Kolleci milli musiqi alətlərimizin və xalq mahnılarımızın yaşadılması, eləcə də klassik və müasir dünya bəstəkarlarının öyrənilməsi, gənc musiqiçi kadrların yetişdirilməsi sahəsində uğurlar əldə etmişdir. Kollec təhsil müəssisəsi kimi fəaliyyəti ilə bərabər, həm də respublika üzrə keçirilən mötəbər tədbirlərdə, el şənliklərində konsert proqramları ilə çıxış edir. 40 ildən artıq fəaliyyət göstərən kollecdə müxtəlif musiqi kollektivləri də yaradılmışdır. “Buta” muğam ansamblı da bu kollektivlərdən biridir. Kollektiv gənc muğam ifaçılarından və müğənnilərdən ibarətdir. Kollektivin üzvləri maraqlı konsert proqramları ilə ictimaiyyət qarşısında çıxış edirlər. “Buta” muğam ansamblının Naxçıvan Dövlət Televiziyasındakı çıxışları da maraqla qarşılanır.

Konsert İlkin Abdullayevin ifasında görkəmli bəstəkarımız Ramiz Mirişlinin “Naxçıvan təranəsi” ilə başlayıb.

“Buta” muğam ansamblının solistləri Azər Əkbərov, Xalid Həsənov, Nurlan Nuriyev, Kənan Cəfərov, Ağaxan Məmmədov, Əbülfəz Məmmədov muğam və təsniflər, xalq və bəstəkar mahnıları ifa ediblər. Ansamblın üzvlərinin ifasında səslənən Oqtay Kazımi, Rauf Hacıyev, Ramiz Mirişli, Emin Sabitoğlu, Əlibaba Məmmədov, Rauf Məmmədov “Mehriban insanlar”, “Azərbaycan”, “Peşiman”, “Nə gözəldir Azərbaycan”, “Bəxtiyaram”, “Yaşa mənim xalqım” bəstəkar mahnıları, “Aman-aman ayrılıq” xalq mahnısı, təsnif və muğamlar konsert iştirakçılarında xoş ovqat yaradıb.

Konsert Azər Əkbərovun ifasında “Vətən yaxşıdır” mahnısı ilə başa çatıb.

Konsert Ordubad rayon sakinlərində xoş ovqat yaradıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
21.05.2019



      Mayın 21-də Naxçıvan Muxtar Respublikası Mədəniyyət Nazirliyinin iş planına əsasən Babək Rayon Mədəniyyət Sarayında “Azərbaycan kinosunda vətənpərvərlik” mövzusunda maarifləndirici tədbir keçirilib.

Tədbirdə Naxçıvan Muxtar Respublikası Mədəniyyət Nazirliyinin əməkdaşı Elvin Əhmədov çıxış edərək bildirmişdir ki, “Müstəqil Azərbaycanın gələcəyi gənclərdir” deyən ümummilli lider Heydər Əliyev daima gənclərə qayğı göstərmiş, onların bir fərd kimi yetişməsinə xüsusi önəm vermişdir. Ulu öndər respublika rəhbərliyinə gəldiyi ilk dövrlərdən gənclərin himayədarı kimi çıxış edərək sağlam düşüncəli yeni nəslin yetişdirilməsi sahəsində misilsiz işlər görmüşdür. Hakimiyyətə gəldiyi ilk günlərdən başlayaraq gənclər siyasəti ilə bağlı bir çox fərman və sərəncamlar imzalayan ulu öndər gənclərin milli və vətənpərvər ruhda tərbiyəsinə həmişə önəm vermişdir.

Qeyd olunmuşdur ki, ölkəmizdə məqsədyönlü şəkildə həyata keçirilən işlərin nəticəsi olaraq bu gün müasir Azərbaycan gəncliyi yeni inkişaf mərhələsinə qədəm qoyub. Ölkə rəhbəri tərəfindən uğurla davam etdirilən dövlət gənclər siyasətinin düzgünlüyünü bu sahədə qazanılmış uğurlu nəticələr də təsdiqləyir. Bütün bunlar deməyə əsas verir ki, ölkəmizdə uğurla həyata keçirilən dövlət gənclər siyasəti gələcək nəslin intellektual səviyyəsinin artmasına da olduqca müsbət təsir göstərir. Ölkəmizdə gənc nəslin problemlərinin həlli, onların cəmiyyət həyatında layiqli iştirakının təmin olunması, milli-mənəvi dəyərlərə bağlılığının möhkəmləndirilməsi üçün də dövlət səviyyəsində bütün zəruri tədbirlər həyata keçirilir.

Vurğulanmışdır ki, Naxçıvan Muxtar Respublikasında gənclər hərtərəfli dövlət qayğısı ilə əhatə olunub. Gənclərin təhsil, idman və digər sahələrdə inkişafı, xüsusi istedada malik gənclərin üzə çıxarılması, onların yaradıcılıq potensialının inkişafı, gənclərin asudə vaxtlarının səmərəli təşkili üçün dövlətimiz tərəfindən hər cür şərait yaradılmışdır. Naxçıvan Muxtar Respublikasının Mədəniyyət Nazirliyi də bu sahədə öz fəaliyyətini günün tələbləri səviyyəsində qurmaq üçün müxtəlif tədbirlər həyata keçirir. Mədəniyyət, incəsənət, təhsil sahəsində istedadlı və yaradıcı gənclərlə müxtəlif səpgili tədbirlər, dəyirmi masalar keçirilir, onların aşkara çıxarılması, yaradıcılıq qabiliyyətlərinin inkişaf etdirilməsi məqsədilə baxışlar, müsabiqələr, intellektual oyunlar, sərgilər təşkil olunur.

Tədbirin davamında “Azərbaycan kinosunda vətənpərvərlik” mövzusu ilə Naxçıvan Dövlət Film Fondunun direktoru Mirakif Seyidov çıxış edib. O, qeyd edib ki, tədbirin məqsədi gənclərin xalqımızın qədim və zəngin mədəni irsindən faydalanmağını təmin etməklə onların mənəvi, bədii və estetik dünyagörüşünün formalaşdırılması, onlarda vətənpərvərlik ruhunun gücləndirilməsidir.

Daha sonra “Dolu” filmi nümayiş etdirilib. Tədbir iştirakçılar tərəfindən maraqla qarşılanıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
21.05.2019



May ayının 20-də Babək rayon Şıxmahmud kəndində “Xalq yaradıcılığı günü” keçirilmişdir.

Tədbirdə Babək Rayon Mədəniyyət Şöbəsinin müdiri Ceyhun Fərəcov və Mədəniyyət üzrə Elmi-Metodik Mərkəzin şöbə müdiri Nizami Əzizəliyev çıxış etmişlər. Çıxış edənlər bildirib ki, muxtar respublikamızda xalq yaradıcılığı günlərinin keçirilməsi ənənəvi hal alımışdır. Bu günlərin keçirilməsinin əhəmiyyətindən bəhs olunaraq qeyd olunmuşdur ki, son illər Naxçıvan Muxtar Respublikasında milli dəyərlərin, xalq yaradıcılığının qorunması və təbliği sahəsində böyük işlər görülüb. Naxçıvan Muxtar Respublikası Ali Məclisi Sədrinin “Naxçıvan Muxtar Respublikasında Xalq yaradıcılığı günlərinin keçirilməsi haqqında” 7 fevral 2009-cu il tarixli Sərəncamı muxtar respublikada belə dəyərlərin qorunmasına, təbliği və gələcək nəsillərə ötürülməsinə böyük dövlət qayğısının parlaq ifadəsidir.

Bildirilib ki, xalq yaradıcılığı nümunələri milli-mənəvi dəyərlər sistemində xüsusi əhəmiyyət kəsb edir, milli-mədəni irsin qorunması, tarixi abidələrimizin bərpası və qorunması, qədim adət-ənənələrimizin dirçəldilməsi və yaşadılması, xalq yaradıcılığına diqqət və qayğı bu günümüzün reallığına çevrilib. Xalqımızın min illər boyu yaratdığı bu milli-mənəvi dəyərləri yaşatmaq, təbliğ etmək, öyrənmək və bu dəyərləri gənc nəslə aşılamaq milli kimliyimizin ifadəsi baxımından olduqca əhəmiyyətlidir.

Tədbirin bədii hissəsində Babək Rayon Mədəniyyət Sarayının yallı qrupu “Tənzərə”, “Tello” yallısını, Kültəpə Kənd Mədəniyyət Evinin rəqs qrupu “Köçəri” yallısını ifa etmişlər. Tədbirin davamında Rəfi Məmmədov “Tellərini yan dara qız”, Mais Əliyev “Yaz gülüşündə” xalq mahnılarını səsləndirmiş, Nəsimi Təhməzov şur təsnifini ifa etmişdir. Sazda Zülfüqar Babayev “Baş sarıtel” və Babək Rayon Uşaq Musiqi Məktəbinin müəllimi Sevda Babayeva aşıq havası, Şıxmahmud Kənd Uşaq Musiqi Məktəbinin “Nağaraçalanlar” ansamblı “Azərbaycan ritmləri”, Vayxır Kənd Mədəniyyət Evinin Balaban dərnəyinin üzvü Raul Əlizadə balabanda “Nəlbəki” rəqsini ifa etmişlər. Qaraqala Kənd Mədəniyyət Klubunun müdiri pəhləvan Vətən Kərimovun çıxışı maraqla qarşılanmışdır.

İfaların maraqla qarşılandığı tədbirdə xalqımızın qədim adət-ənənələri canlandırılmış gənc nəslə aşılanmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
21.05.2019



      Düz 3 dəqiqə 50 saniyə… Baltik dənizi susdu. Riqadan Stokholma yolçu olan gəminin 7 min nəfərlik heyəti susdu. Gəminin konsert zalında 300-dən artıq iştirakçı, tamaşaçı susdu. Bu sükuta səbəb Nəcəf Hacılı idi. Naxçıvanımızın yetirməsi, ürəyi ilə həmahəng döyünən ritmlərlə bütün diqqətləri özünə yönəldən, təxəyyülündən süzülüb gələnləri də ona ayrılan vaxta sığdırmaqla ətrafa susub qulaq asmağı təlqin edən Nəcəf Hacılı. Burada – dənizin ortasındaca “Rapsodio Del Baltico” I Beynəlxalq incəsənət festival-­müsabiqənin Qala konsertində Azərbaycan, onun ardınca da “Nəqşicahan sədası” ritmlərinı bir əli ritmdə, bir əli nağaranın iplərini boşaldıb-bərkitməklə özünəməxsus şəkildə bəmdən zilə qaldırmaqla gözəl bir performans göstərdi Nəcəf. 19 yaşlı bu oğlanın ritmləri bir andaca susmuş dənizi də, onu dinləyənləri də lərzəyə gətirdi.

Musiqinin dili, milliyyəti yoxdur, deyiblər. Dünyanın onlarla ölkəsindən festival-müsabiqəyə qatılan müxtəlif dillərdə danışan insanlar Nəcəfin ifasını eyni duyumla qarşılayıb, sürəklə alqışladılar. Və bu alqışlar bir qədər sonra – münsiflər heyətinin qərarı açıqlananda aparıcının böyük coşqulu çağırışından sonra Nəcəf Hacılı Azərbaycan bayrağı ilə səhnəyə gəlib birinci yerin diplom və kubokunu alarkən də eynilə təkrarlandı.

Nəcəfin festival-müsabiqədəki ifasını seyr edərkən bir naxçıvanlı kimi qürur duymaqla yanaşı, həm də bu gəncin müsabiqədə özünü çox sərbəst şəkildə aparması diqqətimdən yayınmadı. Elə görüşümüz zamanı ona ünvanladığım ilk sual da bununla bağlı oldu. Nəcəf: – Mən bu ilin mart ayının 19-da Bakı şəhərində Rəşid Behbudov adına Dövlət Mahnı Teatrında “Testene Art Baku” III Beynəlxalq incəsənət festival-müsabiqədə 17-19 yaşlı gənclər arasında Qran-Pri mükafatına ən yüksək balla layiq görüldüm və Latviyanın paytaxtı Riqa şəhərində keçirilən beynəlxalq festival­-müsabiqədə iştirak etmək üçün vəsiqə qazandım. Bu müsabiqədə ifam zamanı çox həyəcan keçirmişdim. Mükafatlandırma zamanı isə daha da həyəcanlanmışdım. Çünki yerlər bir-bir sadalanır, iştirakçılar diplomlarını alır, mənim adımsa çıxmırdı. Öz-özümə düşünürdüm ki, mən yəni heç bir yer tutmadım? Tam ümidsiz şəkildə mərasimi seyr edərkən birdən birinci yerin qalibi olaraq adımı eşidəndə sevincim də bu həyəcana qarışdı. Həmin gün özümə söz verdim ki, bir də bu qədər həyəcan keçirməyəcəyəm, hisslərimə hakim olmağa çalışacağam. Riqadakı festival-müsabiqədə belə də etdim, ifamı çox sərbəst şəkildə başa çatdırdım. Çünki burada çaldığım ritmlərə yeniliklər də əlavə etmişdim. Sərbəstliyim, özümü itirməməyim mənə verilən vaxtda istedadımı tamamilə nümayiş etdirə bilməyimlə nəticələndi.

2019-cu il həyatına uğurlu, yaddan çıxmayan il kimi həkk olunan Nəcəf Bakıda və Riqada keçirilən müsabiqələrdə qazandığı birinciliklərə öz yaşı çərçivəsində uzun bir yol keçərək nail olub. 11 yaşından nağaraya olan marağını əvvəlcə qələmlərlə masa üzərində, sonra vedrələri evə düzüb onların arxasında özünəməxsus ritmləri səsləndirməklə büruzə verib. Naxçıvan tanınmış musiqiçilərin də yetişdiyi bir diyardır. Burada ta qədimdən məşhur yallılarımızı, bir də ki el şənliklərində dağlara-daşlara səs salan zurnanı davulun, nağaranın müşayiət etməsi bu yerin insanlarını ritm üzərində kökləyib. Ailəsinin musiqi duyumlu olması, onu dəstəkləməsi isə Nəcəfin bu istedadının üzə çıxmasına təkan olub. Naxçıvan Musiqi Kollecinin son sinfini bitirməkdə olan Nəcəf ilk musiqi təhsilini Ordubad Rayon Uşaq Musiqi Məktəbində alıb. Burada Naxçıvan Muxtar Respublikasının Əməkdar artisti Mustafa Məmmədovdan, kollecdə isə müəllimi Mahir Rüstəmovdan ritmlərin incəliklərini öyrənməklə, müxtəlif ritm qruplarının, orkestrlərin tərkibində dövlət tədbirlərində, el şənliklərində iştirak etməklə bugünkü böyük uğurunun təməlini qoyub. 2017-ci ildə solo konserti təşkil olunan bu gənc bir neçə dəfə Bakı şəhərində konsert proqramları ilə çıxış edib, dəfələrlə Naxçıvan Dövlət Televiziyası tərəfindən verilişlərə dəvət alıb. Bir sözlə, Nəcəf də muxtar respublikamızda qayğı ilə əhatə olunan istedadlı gənclərimizdən biri kimi daim diqqətdə saxlanılıb.

Nağara xalqımızın qədim musiqi alətidir. Həm lirik, həm də ritmik musiqilərin özünə­məxsus ritmə malik olmasını nəzərə alsaq, nağara həm də digər musiqi alətlərini tamamlayan bir çalğı alətidir. Xalq çalğı alətlərindən ibarət ansamblın, orkestrin səsləndirdiyi musiqiləri, xanəndələrin, yallı­larımızın müşayiətini, eləcə də toy məclislərimizi nağarasız, ritmsiz təsəvvür etmək mümkün deyil. Nağaranın tək ifası isə ritmlərin harmoniyasıdır. Elə ritmləri həyatının bir parçasına çevirən Nəcəflə söhbətim zamanı onda bu sənətlə bağlı bir qeyri-adilik duydum. O, nağarada, sadəcə, hər kəsin bildiyi ritmləri ifa etməklə kifayətlənmək fikrində deyil. Bu gəncdə bir kreativlik – ritmlərdən yeni bir harmoniya yaratmaq əzmi var. Gənc ifaçı həmin harmoniyadan başlanğıc kimi beynəl­xalq festival-müsabiqədəki ifasına da qatıb və bu, ilk olaraq maraqla qarşılanıb, ona uğur gətirib.

Riqa-Stokholmdan xoş təəssüratlarla qayıdan Nəcəf günlərdir, birinci yerin qalibi olmasını digər bir sevinclə paralel yaşayır. O deyir: – Müsabiqədə nankor qonşumuzun da nümayəndəsi iştirak edirdi. Onun gözü qarşısında mənim qalib olmağım və Azərbaycan bayrağı ilə səhnəyə çıxmağım sevincimi birə-beş artırdı. Sanki ətrafımdakı dəniz bayrağımın üç rəngini əks etdirirdi həzin ləpələrində. Səhnədə mükafatlandırılarkən gözlərim önündə bu üç rəng – mavi, qırmızı, yaşıl sürətlə bir-birini əvəz edirdi…

Xoş, gözəl sözləri Nəcəfdən dinlədikcə bir ay sonra əsgəri xidmətə yollanacaq bu gəncin vətənpərvərlik hissi ilə çırpınan ürəyinin döyüntülərini də dinləyirdim sanki. Layiqli gənclik, istedad, vətənpərvərlik, həqiqətən də, gözəl gələcəyin müjdəçisidir. Söz yox ki əsgəri xidmətdən sonra bu sahədə təhsilini davam etdirmək arzularıyla yaşayan Nəcəf doğma Naxçıvanımızın sədalarını öz ritmləri ilə hələ neçə-neçə ­dənizlərdən-dənizlərə, ölkələrdən-ölkələrə yayacaqdır…

Mətanət MƏMMƏDOVA
“Şərq qapısı” qəzeti
21.05.2019



      Mayın 20-də Yaponiyanın “Himalaya” radiosunda Azərbaycan Xalq Cümhuriyyətinin 101-ci və Naxçıvan Muxtar Respublikasının 95-ci ildönümünə həsr edilən xüsusi veriliş yayımlanıb. Verilişdə aparıcı Kazuyasu İşida, Azərbaycan- Yaponiya Dostluq Mərkəzinin sədri, Dünya Azərbaycanlılarını Əlaqələndirmə Şurasının üzvü Xəlil Kələntər və AZƏRTAC-ın Yaponiyadakı xüsusi müxbiri Vüqar Ağayev Azərbaycanın dövlətçilik tarixi, müstəqilliyin bərpasından sonra qazanılan uğurlar, ölkəmizin ayrılmaz tərkib hissəsi olan Naxçıvan Muxtar Respublikası haqqında dinləyicilərə hərtərəfli məlumat veriblər. Qeyd olunub ki, cəmi 23 ay mövcud olmuş Azərbaycan Xalq Cümhuriyyəti bu qısa dövr ərzində dövlətçilik ənənələrinin bərpası, demokratik idarəetmənin formalaşması istiqamətində mühüm uğurlara imza atıb.

Verilişdə müstəqilliyin bərpasından sonra Azərbaycanın üzləşdiyi çətinliklərdən, o cümlədən Ermənistanın ölkəmizə qarşı apardığı işğalçılıq siyasətindən bəhs olunub. Qeyd edilib ki, Azərbaycan xalqının ümummilli lideri Heydər Əliyevin hakimiyyətə qayıdışından sonra ölkəmiz inkişaf mərhələsinə qədəm qoyub. Bu gün Prezident cənab İlham Əliyevin ardıcıl və düşünülmüş siyasəti nəticəsində Azərbaycan böyük uğurlara imza atır.

Verilişdə, həmçinin Azərbaycanın müasir turizm potensialına malik olduğu, burada mövcud olan tarixi abidələr, təbii müalicə ocaqları barədə də yapon dinləyicilərə ətraflı məlumat verilib.

Verilişdə Azərbaycanın ayrılmaz tərkib hissəsi olan və cari ildə yaradılmasının 95-ci ili qeyd edilən Naxçıvan Muxtar Respublikası barədə də ətraflı danışılıb. Qeyd edilib ki, Azərbaycanın ən qədim ərazilərindən olan, “Şərqin qapısı” adlandırılan Naxçıvan dünya ­sivilizasiyalarının mərkəzlərindəndir. Azərbaycan xalqı bu diyarda tarixi çox qədimlərə gedib çıxan zəngin mədəniyyət yaradıb.

Məhz bəşər övladının ilk mədəni nümunələrinin qorunduğu və Nuhun gəmisinin lövbər saldığı Gəmiqaya abidəsi, yaşı min ilə yaxın olan Möminə xatın türbəsi, 14 il Əmir Teymurun qoşunları ilə mübarizədə təslim olmamış Əlincəqala Naxçıvanda yerləşir. Müqəddəs “Qurani-Kərim”in “Əl-Kəhf” surəsində bəhs edilən Əshabi-Kəhf ziyarətgahı da məhz Naxçıvandadır.

Bildirilib ki, Naxçıvanın muxtariyyəti dövlətçilik ənənələrinin davamı olaraq meydana gəlib. Verilişdə Naxçıvanın turizm imkanları, müalicəvi iqlimi, dərman bitkilərinin bolluğu, şəfalı mineral suları ilə fərqləndiyi də yapon tamaşaçıların diqqətinə çatdırılıb.

Qeyd edilib ki, Ermənistan tərəfindən blokadaya alınmasına baxmayaraq, Naxçıvanın inkişafı gündən-günə daha da sürətlənir.

Naxçıvan Muxtar Respublikası
Mədəniyyət Nazirliyinin Mətbuat Xidməti
20.05.2019



      Naxçıvan Muxtar Respublikası Ali Məclisinin Sədri Vasif Talıbov mayın 20-də Yaradıcılıq ittifaqları və birliklərinin fəaliyyəti ilə bağlı əlavə tədbirlər haqqında Sərəncam imzalayıb.

NUHÇIXAN-ın məlumatına görə, Sərəncamda deyilir:

"Naxçıvan Muxtar Respublikasının mədəni həyatında və ədəbi-ictimai fikrin formalaşmasında, mədəniyyətin və incəsənətin təbliğində və memarlığın inkişafında mühüm əhəmiyyət kəsb edən yaradıcılıq ittifaqları və birliklərinin fəaliyyətinə dövlət qayğısının daha da artırılması məqsədi ilə Naxçıvan Muxtar Respublikası Konstitusiyasının 5-ci maddəsinin II hissəsinin 22-ci bəndini rəhbər tutaraq qərara alıram:

1. Naxçıvan Muxtar Respublikasının 2019-cu il dövlət büdcəsində nəzərdə tutulmuş Ehtiyat Fondundan Yazıçılar Birliyinə 25 (iyirmi beş) min manat, Bəstəkarlar Təşkilatına 20 (iyirmi) min manat, Dövlət Film Fonduna 15 (on beş) min manat, Aşıqlar Birliyinə 15 (on beş) min manat və Memarlar Birliyinə 12 (on iki) min manat ayrılsın.

2. Naxçıvan Muxtar Respublikasının Maliyyə Nazirliyi bu Sərəncamın 1-ci hissəsində göstərilən məbləğdə maliyyələşməni təmin etsin.

3. Naxçıvan Muxtar Respublikasının Nazirlər Kabineti bu Sərəncamdan irəli gələn məsələləri həll etsin".

Naxçıvan Muxtar Respublikası
Mədəniyyət Nazirliyinin Mətbuat Xidməti
20.05.2019



      Mayın 20-də Naxçıvan Dövlət Uşaq Teatrı Naxçıvan Muxtar Respublikasının Əməkdar mədəniyyət işçisi, şair-dramaturq Həsənəli Eyvazlının “Nadan Xoruz” mənzum nağıl pyesi əsasında hazırladığı tamaşanı Kəngərli Rayon Mədəniyyət Sarayında uşaqlara təqdim etmişdir.

Dünya xalqlarının folklorunda olduğu kimi, Azərbaycan nağıllarında da heyvanlar aləmindən bəhs edən nağıllar çoxdur. Müəllif ədəbiyyatımızdakı ənənələri davam etdirərək. Həm də xalq yaradıcılığından faydalanaraq uşaqlar üçün bu əsəri yazmışdır.

Tamaşanın məzmunu çox sadədir. Bir sıra nağıllarımızda rast gəldiyimiz Tülkü burada da hiyləgərliyi ilə seçilir. Kələkbaz Tülkü bu dəfə Nənənin toyuq cücələrinin axırına çıxmaq üçün Xoruzla yalançı “dostluq” qurmaq istəyir. Nadan, eyni zamanda lovğa və təkəbbürlü Xoruz da buna inanır. Son anda Nənənin sadiq köpəyi Bozdar onları Tülkünün kələyindən xilas edir. Tamaşada lovğalıq, nadanlıq, kələkbazlıq, özünə arxayın olub heç kəsə inanmamaq kimi mənfi xüsusiyyətlər tənqid edilir. Heyvan dili ilə alleqorik şəkildə bu xüsusiyyətlər açılıb göstərilir.

Tamaşada Nənə surətini Naxçıvan Dövlət Universitetinin tələbəsi Mehri Nəbiyeva ifa edir. O qocalıb əldən düşmüş qarı nənə surətini balaca tamaşaçılara özünəməxsus sevgi ilə təqdim edə bilir.

Tamaşanın ən maraqlı surəti olan Tülkü surətini Heyran Abdullayeva təbii və səmimi oynayır.

Balaca aktyorlardan Nurlan Qafarov (Xoruz), Həsrət Abdullayev (Bozdar), Fatimə Bələlova, Həqiqət Bağırova, Əminə Seyidova, Aynur Əsgərli, Afaq Məmmədli, Nuray Ələkbərzadə, Səkinə Məmmədovanın şən və uşaq psixologiyasına uyğun surətləri canlandırmaq həvəsi xoş təsir bağışlayır.

Tamaşanın quruluşçu rejissorları Tofiq Seyidov və Nurbəniz Niftəliyevanın uşaqlarla işləmək səyi maraqlı tamaşanın yaranmasına səbəb olmuşdur. Tamaşanın musiqi tərtibatı da xoş təsir bağışlayır. Xüsusilə görkəmli bəstəkarımız Qəmbər Hüseynlinin dünya şöhrətli “Cücələrim” mahnısının səslənməsi uşaqlarda şən əhval-ruhiyyə yaradır.

Gənc rəssam Bəhruz Quliyevin dekor işi də diqqəti cəlb edir. Kənd həyatını, kənd məişətini xatırladan mənzərələr, tamaşada uşaqlar üçün hazırlanmış paltarlar nağıl dünyası ilə vəhdətdə maraqlı görünür.

Naxçıvan Dövlət Uşaq Teatrının bu tamaşası balacaların nağıl dünyasını genişləndirmək baxımından gözəl tamaşa kimi xoş təsir bağışlayır.

Naxçıvan Muxtar Respublikası
Mədəniyyət Nazirliyinin Mətbuat Xidməti
20.05.2019



      Mayın 20-də Şahbuz Rayon Xalq Teatrı Əbdürrəhim bəy Haqverdiyevin "Məşədi Qulam qiraət öyrənir" əsəri əsasında hazırladığı eyniadlı tamaşanı Şahbuz Rayon Mədəniyyət Sarayında nümayiş etdirmişdir.

Kiçik həcmli bu pyesdə görkəmli dramaturq ötən əsrin əvvəllərindəki tacir və din adamlarının mənəvi-əxlaqi eybəcərliklərini ortaya qoymuşdur. Əslində özünü din adamı, tacir kimi qələmə verən Məşədi Qulam mənəvi cəhətdən şikəstdir. Rus qızı Nataşa ilə eşq sərgüzəşti yaşamaq adı ilə ailəsini aldadır. Məşədi Qulam qiraət öyrənmək adı ilə Nataşa ilə görüşür. Ailəsini, yaxınlarını aldadır ki, o əslində qiraət öyrənir, savadını artırır. Əslində isə öz pulunu, varını Nataşanın yolunda xərcləməyə hazırdır. Onun əxlaqi-mənəvi davranışı tamaşaçıda ikrah doğurur. Məşədi Qulam əslində ailəsini də aldatmaqla özü də pis vəziyyətdə qalır. Halbuki tamaşanın əvvəlində özünü mömin, dindar kimi göstərir. Tamaşanın finalında rüsvay olan Məşədi Qulam pis vəziyyətdə qalır. Arvadı Şahpəri onun “qiraət öyrənmək dərsini” ifşa edir. Tamaşada Şahpəri obrazı öz hüququnu bilən və bunun üçün mübarizə aparan azərbaycan qadını kimi diqqəti cəlb edir.

Bu kiçik pyesdə müəllif tacir zümrəsinin mənəvi-əxlaqi dünyasını tənqid edir. Bu zümrənin sözü ilə əməli düz gəlmir. Alıb-aldatmaq, yalan danışmaq, pula hərislik bu zümrəni aşındırmışdır. Tamaşadakı Cahangir, Mirzə Yusif, Məşədi Ramazan obrazları da o dövrün kaloritini yaratmaq baxımından maraqla qarşılanır.

Tamaşanın quruluşcu rejissoru Namiq Mehdiyev, rəssamı Səxavət Paşayev, musiqi tərtibatçısı Emin Hüseynovdur. Tamaşadakı Məşədi Qulam obrazını Elbəyi Qəhrəmanov, Şahpəri obrazını Səadət Abdinova, Cahangir obrazını Abbasəli Abbasov, Məşədi Ramazan obrazını Emin Hüseynov, Mirzə Yusif surətini Vahid Məlikov, Nataşa surətini İlahə Nəcəfova canlandırırlar. Obrazların təbii və canlı təqdimatı, səhnə əsərindəki hadisələrin və əsərin ideyasının olduğu kimi çatdırılması Şahbuz rayon tamaşaçıları tərəfindən alqışlarla qarşılanıb.

Görkəmli dramaturqumuz Əbdürrəhim bəy Haqverdiyevin çox nadir hallarda səhnəyə qoyulan bu pyesinin Şahbuz Rayon Mədəniyyət Sarayında tamaşaya qoyulması təqdirəlayiqdir. Çünki tamaşaçıların bir çoxu görkəmli dramaturqun iri həcmli pyesləri ilə tanış olsalar da, onun kiçik həcmli pyesləri ilə tanış deyillər. Bu mənada Şahbuz Rayon Xalq Teatrının hazırladığı tamaşa maraqla qarşılanır.

Naxçıvan Muxtar Respublikası
Mədəniyyət Nazirliyinin Mətbuat Xidməti
20.05.2019



      Mayın 20-də Naxçıvan Dövlət Filarmoniyasının Kamera Orkestrinin Culfa Rayon Mədəniyyət Sarayında Naxçıvan Muxtar Respublikasının yaradılmasının 95 illiyinə həsr olunmuş konsert proqramı təşkil edilmişdir.

Qeyd edək ki, 2019-cu il fevralın 9-da Naxçıvan Muxtar Respublikasının yaradılmasının 95 illiyi tamam olmuşdur. Naxçıvan Muxtar Respublikası Ali Məclisinin Sədri 21 yanvar 2019-cu il tarixli Sərəncamı ilə muxtar respublikanın 95 illiyinə həsr olunmuş Tədbirlər Planını təsdiq etmişdir. Tədbirlər Planında Naxçıvan Muxtar Respublikasının 95 illiyinin geniş qeyd edilməsi üçün il ərzində bir sıra tədbirlərin keçirilməsi nəzərdə tutulmuşdur. Naxçıvan Dövlət Filarmoniyasının musiqi kollektivləri də bu tədbirlərdə fəal iştirak edirlər. Təşkil olunan konsert proqramı da bu yubileyə həsr olunmuşdur.

Naxçıvan Dövlət Filarmoniyasının Kamera Orkestri muxtar respublikanın tanınmış kollektivlərindən biridir. Kollektivin çıxışları musiqisevərlər tərəfindən həmişə rəğbətlə qarşılanır. Naxçıvan Dövlət Filarmoniyasının Kamera Orkestrinin repertuarında Avropa bəstəkarlarının əsərləri, klassik kamera musiqisi ilə yanaşı, Azərbaycan bəstəkarlarının musiqi əsərləri də mühüm yer tutur. Orkestrin bədii rəhbər və dirijoru Azərbaycan Respublikasının Xalq artisti Çingiz Axundovdur.

Konsert proqramında orkestr əvvəlcə böyük bəstəkarımız Fikrət Əmirovun “Min bir gecə gecə” baletindən “Final”ı ifa edib.

Sonra Naxçıvan Muxtar Respublikasının Əməkdar artisti Elçin Nağıyev və müğənnilər İlkin Abdullayev, Ruhiyyə Hüseynova, Rahim Əsgərzadə Azərbaycan bəstəkarlarının mahnılarını ifa ediblər. Onların ifasında Asəf Zeynallının “Ölkəm”, Tofiq Quliyevin “Neftçi mahnısı”, Bəhram Nəsibovun “Qal sənə qurban”, Səid Rüstəmovun “Getmə” adlı musiqi əsərləri səsləndirilib. Konsertdə Azərbaycan bəstəkarlarından başqa dünya bəstəkarlarından Volfanq Amadey Motsartın “Serenada”, Pyotr Çaykovskinin “Vals”, Ernesto Kurtisin “Sorrentoya qayıt” adlı əsərləri də ifa edilib. Proqramda səsləndirilən musiqi nömrələri alqışlarla qarşılanıb. Konsertdə Üzeyir Hacıbəyovun “Koroğlu” operası, Müslüm Maqomayevin “Aslan Şahın” ariyası, Niyazinin “Ləzginka” adlı əsəri və digər səslənən musiqilər də dinləyicilərdə xoş ovqat yaradıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
20.05.2019



      Mayın 18-də Cəlil Məmmədquluzadə adına Naxçıvan Dövlət Musiqili Dram Teatrı Xaqani Əliyevin “Ehsan xan Kəngərli” tarixi dramı əsasında hazırladığı tamaşanı Şərur Rayon Mədəniyyət Sarayında rayon sakinlərinə göstərmişdir.

“Ehsan xan Kəngərli” tarixi dramı XIX əsrin əvvəllərində Naxçıvan xanlığında baş verən ictimai-siyasi hadisələri əks etdirir. Rusiya-İran müharibəsi və Naxçıvanın ruslar tərəfindən işğal olunması əsərin əsas süjet xəttini təşkil edir.

İlk dəfə Naxçıvan teatrında səhnəyə qoyulan “Ehsan xan Kəngərli” tamaşasında Naxçıvan xanlığının düşdüyü çətin vəziyyətdən çıxış yolu axtaran Ehsan xanın siyasi düşüncələri və xüsusən ermənilərin Naxçıvana yerləşdirilməsinin qarşısını almaq üçün rus diplomatı Aleksandr Sergeyeviç Qriboyedovla apardığı söhbətlər olduqca maraq doğurur. Naxçıvanın gələcək taleyi ilə bağlı Kəngərli xanları arasında yaranan fikir ayrılığı və Ehsan xanın təşəbbüsü ələ alaraq xalqın taleyini hər şeydən üstün tutması əsərdə konfliktin gərginliyini daha da artırır.

Tamaşada Ehsan xanla yanaşı, Abbasqulu ağa Bakıxanovun da bədii obrazı diqqəti cəlb edir. Bakıxanov erməni fitnələrinin qarşısını almaq üçün Ehsan xana çıxış yolu tapmaqda kömək edir.

“Ehsan xan Kəngərli” tamaşasında dövrün ictimai-siyasi hadisələri faktlarla səhnəyə gətirilir ki, bu da tamaşaçını cəlb edir.

Bu maraqlı tamaşanın elmi məsləhətçisi akademik İsmayıl Hacıyev, quruluşçu rejissoru, xalq artisti Kamran Quliyev, quruluşçu rəssamı, Naxçıvan Muxtar Respublikasının Əməkdar rəssamı Əbülfəz Axundov, musiqi tərtibatçısı Azərbaycan Respublikasının Əməkdar mədəniyyət işçisi İmamqulu Əhmədovdur.

Tamaşada Azərbaycan Respublikasının Xalq artistləri Rza Xudiyev (Ehsan xan), Rövşən Hüseynov (Kalbalı xan), Həsən Ağasoy (Kərim xan), Azərbaycan Respublikasının Əməkdar artistləri Bəhruz Haqverdiyev (Şıxəli bəy), Əli Əliyev (Paskeviç), Əbülfəz İmanov (Safraz Saakov), aktyorlar Zəminə Məmmədova (Çimnaz xanım), Ələsgər Quliyev (Nəzərəli xan), Səyyad Məmmədov (Qriboyedov), Zakir Fətəliyev (Məmmədrza xan), Anar Eyvazov (rus zabiti), Nazlı Hüseynquliyeva (yaşlı qadın), Mehri Nəbiyeva (Nina Çavçavadze), Cəbrayıl Nəbiyev (Zeynal Sultan), Uğur Nəsirli (Əsgər) maraqlı obraz və personajlar yaratmışlar.

Tamaşa Şərur rayon sakinləri tərəfindən maraqla qarşılanmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
18.05.2019



      4-7 may tarixlərdə Amerika Birləşmiş Ştatlarının vətəndaşları Lillie Echevarria və Kazi Vaqar Ahmed Naxçıvan Muxtar Respublikasında səfərdə olublar. Onlar internet saytlarında və sosial şəbəkələrdə Naxçıvan səfərlərindən yazıblar. Möminə xatın türbəsi və Əshabi-Kəhf haqqında fikirlərini paylaşan Lillie Echevarria qeyd edib ki: “Möminə xatın türbəsi Atabəylər dövlətinin banisi Şəmsəddin Eldəniz tərəfindən həyat yoldaşı Möminə xatının məzarı üstündə ucaldılıb. Abidənin üzərində “Biz gedirik, ancaq qalır ruzigar, biz ölürük, əsər qalır yadigar” sözləri yazılıb. Əshabi-Kəhf ziyarətgahı isə Naxçıvan şəhərinin şərq hissəsində yerləşən təbii mağaradır. Qədim dövrlərdən bəri Əshabi-Kəhf müqəddəs ziyarətgah kimi qəbul edilib. Bu yer təkcə Naxçıvan Muxtar Respublikasında deyil, Azərbaycanın digər rayonları və Yaxın Şərqdə də müqəddəs yer hesab olunur. Hər il on minlərlə insan bu ziyarətgaha səfər edir”. Kazi Vaqar Ahmed isə Naxçıvan barədə daha geniş bəhs edir: “Naxçıvan Azərbaycanın ən mühüm tarixi ərazilərindəndir. Buranı mütləq görməlisiniz. Muxtar respublika İran, Türkiyə və Ermənistanla sərhəddir. Qədim abidələri, zirvələri qarla örtülü dağları, bütün İslam və xristian dünyası üçün mühüm əhəmiyyətli dini əraziləri ilə məşhurdur. Bakıdan Naxçıvana Azərbaycan Hava Yollarının təyyarələri ilə gündəlik 4 uçuş həyata keçirilir. Uçuşların müddəti 1 saatdır. Naxçıvan şəhərində gözəl “Təbriz” oteli fəaliyyət göstərir. Bu otel turistlərə bütün imkanları olan təmiz otaqlar, sürətli internet və səhər yeməyi təklif edir”.

Daha sonra o yazır: “Möminə xatın türbəsi XII əsrdə inşa edilib. Dünyada üzərində “Yasin” surəsi yazılmış yeganə tarixi abidədir. Nuh Peyğəmbərin türbəsi də Naxçıvandadır. Yerli tədqiqatçılar araşdırmalar aparmışlar. Nəticədə, dəniz balıqlarının fosilləri, dəniz ilbiz qabığı, həmçinin Nuh Peyğəmbərin dövründə dəniz səviyyəsindən 3700 metr yüksəklikdə insan yaşayış məskənləri tapmışlar. Türbə sadə bir quruluşa malikdir. Eksponatlar nümayiş etdirilən otaq və məzarın ehtimal olunduğu yeraltı hissədən ibarətdir. Digər görməli yer isə “İncil” kitabında da adıçəkilən mağara sakinləri ilə əlaqəsi olan Əshabi-Kəhfdir. Bu, elə bir yerdir ki, ziyarətgahı şəkil və video ilə təsvir etmək çətindir, insanın özünün görməsi lazımdır. Bərpa olunmuş pilləkənlərlə qalxaraq dağın içərisindəki mağaraya çatmaq olur. Müqəddəs “Qurani-Kərim”də bəhs olunan hadisəni Əshabi-Kəhf mağa­rasının içərisinə girdikdən sonra hiss etmək olur. Mağaranın girişində bulaq var. Ziyarətgahın aşağı hissəsində hədiyyə mağazası və çay içmək üçün xüsusi yerlər vardır”. ABŞ vətəndaşının son qeydləri Duzdağ Fizioterapiya Mərkəzi barədədir: “Naxçıvanda astma və tənəffüs yolları xəstəliklərinin duz şaxtasında müalicə edildiyinin şahidi oldum. Şaxtanın içərisində xəstəxana var və insanlar orada müalicə olunur. Xəstələr şaxtada 12 gün yatır. Müalicə olunduqdan sonra onlar özlərini çox yaxşı hiss edirlər. Pakistanın “Xevra” adlanan böyük duz şaxtası var. Nə üçün biz eyni müalicə mərkəzini orada yaratmırıq? Məsləhət görərdim ki, tədqiqatlar aparılsın, Xevra şaxtaları da Naxçıvandakı kimi müalicə və turizm məqsədilə istifadə edilsin”.

Naxçıvan Muxtar Respublikası
Mədəniyyət Nazirliyinin Mətbuat Xidməti
18.05.2019



      Beynəlxalq Muzeylər Şurasının təşəbbüsü ilə 1977-ci ildən başlayaraq dünya ölkələri mayın 18-ni Beynəlxalq Muzeylər Günü kimi qeyd edir.

Ölkəmizdə muzey işinin təşkili ümummilli liderimiz Heydər Əliyevin adı ilə bağlıdır. Ulu öndər həmişə muzeylərə böyük önəm verib, bu sahəyə diqqət və qayğı ilə yanaşıb. Xalqımızın böyük oğlu Azərbaycana rəhbərliyinin birinci dövründə respublikamızdakı mövcud muzeylərin maddi-texniki bazasının möhkəmləndirilməsi, bölgələrdə tarix-diyarşünaslıq muzeylərinin təşkili üçün mühüm tədbirlər həyata keçirib.

Bu tədbirlərin davamı kimi, 1980-ci ildə yaradılan Şərur Rayon Tarix-Diyarşünaslıq Muzeyi də Şərurun ictimai-siyasi, mədəni həyatının, eyni zamanda tarixi keçmişinin əks etdirilib, təbliğ olunmasında mühüm rol oynayır. Bu mədəniyyət ocağı təkcə bir elin, bir obanın, bir xalqın deyil, ümumilikdə ölkəmizin tarixi yaddaşının bir hissəsidir.

2018-ci il dekabr ayının 20-dən yeni binada fəaliyyətə başlayan muzeyin açılış mərasimində Naxçıvan Muxtar Respublikası Ali Məclisinin Sədri cənab Vasif Talıbov deyib: “Şərur Rayon Tarix-Diyarşünaslıq Muzeyi ümummilli liderimiz Heydər Əliyevin 1980-ci ildə rayonlarda Tarix-Diyarşünaslıq muzeylərinin yaradılması haqqında imzaladığı qərara əsasən yaradılıb. Ötən dövrdə muzeyin fondu eksponatlarla zənginləşdirilib. Muzeyin fondunda 7 mindən artıq eksponatın olması Şərur rayonunun qədim tarixə və mədəniyyətə malik olmasının göstəricisidir. Şərur rayonu ilk insan yaşayış məskənlərindəndir. Rayonda Qazma mağarası, Oğlanqala, Qız qalası, Maxta Kültəpəsi və digər tarixi yerlər bu ərazilərin ilk insan yaşayış məskəni olduğunu sübut edir. Bunun nəticəsidir ki, Şərur Rayon Tarix-Diyarşünaslıq Muzeyində bütün tarixi inkişaf dövrlərinə aid eksponatlar mövcuddur”.

3 mərtəbədən, 2 ekspozisiya zalından ibarət olan muzeyin birinci zalının ilk guşəsində Azərbaycan xalqının ümummilli lideri Heydər Əliyevin ölkəyə rəhbərliyi dövründə Şərur rayonuna səfərləri zamanı çəkilmiş foto-şəkillər nümayiş olunur.

Ekspozisiyada nümayiş olunan qədim maddi-mədəniyyət nümunələri, əmək alətləri, məişətdə işlədilən avadanlıqlar Şərurun tarixinin qədimliyini əks etdirir. Ovçular təpəsi yaşayış yerindən aşkar edilən e.ə. V minilliyə aid saxsı qablar burada məskunlaşmış insanların həmin dövrdəki əsas məşğuliyyətlərindən soraq verir. Bu qədim yaşayış yerindən götürülən saxsı küpə, IV-III minilliklərə aid daş bütlər maraqlı eksponatlardandır. Daş əmək alətləri, daş dəstəklər də bu torpaqda məskunlaşmanın qədimliyini əks etdirir. Daş həvəngdəstə onu göstərir ki, qədim insanlar əkinçiliklə erkən dövrlərdən məşğul olub. Kiçik həcmli daş büt, keramika nümunələri də guşənin diqqətçəkən eksponatlarındandır.

Şərur ərazisində mövcud olan arxeoloji abidələr sırasında Oğlanqala abidəsi öz möhtəşəmliyinə və əzəmətinə görə daha çox maraqlıdır. Eramızdan əvvəl II-I minilliyə aid olan Oğlanqala qədim şəhər-dövlətin paytaxtı olub. Guşədə həmin abidənin və abidədən aşkar edilmiş qədim maddi-mədəniyyət nümunələrinin foto-şəkilləri nümayiş olunur.

Rayonumuzun ərazisindəki arxeoloji abidələr sırasında Tənənəm kəndindəki Qazma mağarası xüsusi maraq çəkir. Bu mağara ən qədim insan məskənlərindən biri kimi orta Daş dövrünə, yəni 80-100 min il əvvələ aiddir.

Dizə kəndi ərazisindəki e.ə. V-III minilliklərə aid Ovçular təpəsi də ən qədim insan məskənlərindəndir. Qız qalası, Qarasu qalası və Maxta yaşayış yerlərində aparılan arxeoloji qazıntılar zamanı əldə edilən maddi-mədəniyyət nümunələri, mis kasalar, mis badya, mis lüləyin, saxsı qapaqlı nehrə, küpə, saxsı ləyən, qədim xalçaçılıq nümunələri də muzeyin ekspozisiyasında sərgilənir.

Məlum olduğu kimi, Naxçıvan xalçaçılıq məktəbi Azərbaycan xalçaçılığına mühüm töhfələr verib, əsrlər boyu burada rəngarəng xovlu və xovsuz xalça nümunələri evləri bəzəyib. Toxuculuq nümunələri içərisində XIX əsrdə Günnüt kəndində toxunmuş məfrəş gözəlliyi ilə seçilir. Ekspozisiyada nümayiş olunan kiçik daşıma vasitələri - heybə və xurcun, taxta cəhrə, yun daraqları, hana və digər toxuculuq alətləri də ta qədimdən Şərurda bu sənətin geniş yayılmasından xəbər verir.

Muzeydə “Şərur” Xalq Yallı Ansamblının qazandığı mükafatlar, rayonumuza aid kitablar və qəzetlər də ziyarətçilərə təqdim edilir. Ekspozisiyanın kənd təsərrüfatı bölməsində isə əkinçilikdə və maldarlıqda istifadə edilən əmək alətləri, dəmir kotan, taxta vəl, taxta car-car, oraqlar nümayiş olunur.

II ekspozisiya zalında Şərur rayonunun tarixindən, etnoqrafiyasından və qədimliyindən bəhs edən kitablar, jurnallar, qəzet materialları nümayiş olunur. Muzeyin əməkdaşları rayonumuzun tanınmış əmək adamları, Milli qəhrəmanlar, şəhidlər barədə də eksponatlar əsasında ziyarətçilərə ətraflı məlumat verirlər.

Muzeyin ekspozisiyası daim zənginləşir. Buna misal olaraq muzeyə ötən il rayonun məktəbliləri tərəfindən qədim tariximizi və mədəniyyətimizi əks etdirən küpə, mis məişət əşyaları, daş əmək alətləri, xurcun, saxsı çıraq və digər nümunələrdən ibarət 75 yeni eksponat təqdim edilib.

Muzeyimiz həmişə qonaqlı-qaralıdır. Təkcə rayonumuzdan deyil, müxtəlif vaxtlarda respublikamızın digər yerlərindən, həmçinin MDB məkanından, Türkiyə, İran, Amerika, İngiltərə, Fransa, Şimali və Cənubi Koreya ölkələrindən gələn qonaqlar da muzeyimizdə xalqımızın tarixi keçmişi ilə yaxından tanış olur, xoş təəssüratlarla ayrılırlar.

Məlum olduğu kimi, muxtar respublika Ali Məclisinin Sədri muzeylərin zənginləşdirilməsi, tamaşaçıların bura cəlb olunmasına diqqətin artırılması məqsədi ilə 19 dekabr 2014-cü il tarixdə “Muzeylərlə əlaqələrin daha da gücləndirilməsi haqqında” Sərəncam imzalayıb. Bu məqsədlə 2015-ci ilin yanvar ayından başlayan “Muzey günləri” davam edir. Muxtar respublika rəhbərinin diqqət və qayğısı sayəsində muzey işinin daha da canlandırılması üçün həyata keçirilən müxtəlif tədbirlər nəticəsində son vaxtlar muzeyə ekskursiya edənlərin sayı daha da artıb.

Tərtib olunmuş qrafiklə rayonun idarə, müəssisə və təşkilatlarının kollektivləri hər ayın axırıncı şənbə günü muzeyə gəlirlər. Əməkdaşlar ekskursiya edənlərə muzey eksponatlarının tarixi haqqında ətraflı və dolğun məlumat verirlər. Təkcə bu ilin ötən 4 ayı ərzində muzeyin əməkdaşları 2 minə yaxın ziyarətçiyə bələdçilik ediblər. Bu müddət ərzində rayon ərazisindən yeni eksponatlar da əldə edilib muzeyə təhvil verilib.

Naxçıvan Muxtar Respublikası
Mədəniyyət Nazirliyinin Mətbuat Xidməti
18.05.2019



      NUHÇIXAN Naxçıvan Muxtar Respublikası Dövlət Nəqliyyat Xidmətinin mətbuat xidmətinə istinadən xəbər verir ki, marşrut üzrə iş günləri (I-V günlər) 2 reys , şənbə və bazar günləri 4 reys həyata keçirilir.

Marşrut (I-V günlər) saat 08:30 və 14:00 da Naxçıvan avtovağzalından yola düşür. 12:00 və 17:00-da isə Əshabi-Kəhfdən geri qayıdır.

Şənbə və bazar günləri isə müvafiq olaraq, Naxçıvandan saat 08:30, 09:00, 14:00, 14:15-də yola düşür və 12:00, 12:30,16:30, 17:00-da Əshabi-Kəhf ziyarətgahından geri qayıdır.

Qədim inanc yeri olan, möcüzəvi sirləri, əfsanələri özündə yaşadan “Əshabi-Kəhf Ziyarətgahı” Dini Mədəni Abidə Kompleksinin muxtar respublika sakinləri ilə birlikdə turistlərin, zəvvarların, qonaqların da həmişə ziyarət yeri olduğunu nəzərə alaraq “Təbriz” hotel, “Grand” hotel və “Cahan” Ticarət Mərkəzi yolüstü dayanacaqlar kimi müəyyənləşdirilib.

Sərnişinlərin rahatlığı üçün marşrutda müasir avtobuslar hərəkət edəcək. Hər bir sərnişin üçün birtərəfli gediş haqqı 1 (bir) manatdır.

Naxçıvan Muxtar Respublikası Ali Məclisi Sədrinin tapşırığı ilə açılan bu marşrut xəttinin “Duzdağ” Fizioterapiya Mərkəzinə qədər uzadılması nəzərdə tutulur.

Naxçıvan Muxtar Respublikası
Mədəniyyət Nazirliyinin Mətbuat Xidməti
18.05.2019



      Hər il mayın 18-i dünya ölkələrində Beynəlxalq Muzeylər Günü kimi geniş qeyd edilir.

NUHÇIXAN xəbər verir ki, bu il Beynəlxalq Muzeylər Günü “Muzeylər mədəniyyət mərkəzləri kimi: ənənələrin gələcəyi” mövzusuna həsr olunub. Belə ki, ənənəvi mədəniyyət mərkəzləri olmaqla yanaşı muzeylər, həmçinin öz kolleksiyalarının qorunması və interpretasiyasının yeni yollarını axtarırlar. Onlar həm gələcək nəsillər, həm də müasir auditoriya üçün əhəmiyyətli olacaq yeni muzey ənənələri yaradırlar. Artıq bu gün muzeylər ziyarətçilərin innovativ proqramların iştirakçısı ola biləcəyi interaktiv mərkəzlərə çevrilirlər.

Beynəlxalq Muzeylər Günü ICOM-un təşəbbüsü ilə 1977-ci ildə təsis edilib. Bu günün məqsədi muzeylərin cəmiyyətin həyatında nə dərəcədə mühüm rol oynadığını göstərməkdir.

Bu bayram qədim tarixə və zəngin mədəniyyətə malik Azərbaycanda da geniş miqyasda qeyd edilir.

Eramızdan əvvəl XVI əsrdə Krit, XIII-XII əsrlərdə Çin, III əsrdə Qədim Roma və Yunanıstanda estetik dəyərə malik əşyaların, əsərlərin, sənədlərin saxlandığı məkanların müasir muzeylərin sələfləri hesab olunduğunu nəzərə alaraq, ölkəmiz ərazisində qurulmuş Atropatena və Albaniya dövlətləri hökmdarlarının saraylarını da belə yerlər kimi qeyd etmək yerinə düşər. Erkən və orta əsrlərdə isə Azərbaycanda hakim sülalələr tərəfindən kolleksiyaçılıq ənənələrinə maraq güclənib, qiymətli əşyalar xəzinələrdə, saray kitabxanalarında mühafizə edilib.

Azərbaycanın ictimai-siyasi, mədəni həyatında XIX əsrin ikinci yarısından etibarən sürətlə cərəyan edən proseslər muzey işinin təşkilinə təkan verib. İlk belə muzeylərdən biri görkəmli ədib Cəlil Məmmədquluzadənin təşəbbüsü və yaxından iştirakı ilə XIX əsrin sonlarında Naxçıvanın Nehrəm kənd məktəbində təşkil olunub.

Ötən əsrin əvvəllərində isə Bakıda, xalq məktəbləri müdiriyyəti nəzdində Pedaqoji, həmçinin Ümumrusiya Texniki Cəmiyyətinin Bakı şöbəsi nəzdində qapalı muzeylər yaradılıb. Lakin Nehrəm kəndindəki muzey istisna olmaqla, adları qeyd edilən məkanlar çarizmin mənafeyinə uyğun fəaliyyət göstərib. Təsadüfi deyil ki, Azərbaycanda aşkar edilən qiymətli arxeoloji əşyalar Tiflis, Moskva, Peterburq muzeylərinə göndərilib. Azərbaycanda dövlət səviyyəsində 1919-cu ildə - Xalq Cümhuriyyətinin dövründə təməli qoyulmuş ilk milli muzey 1920-ci ildən Azərbaycan Dövlət Muzeyi kimi fəaliyyət göstərib.

Sovet hakimiyyətinin ilk illərində Hacı Zeynalabdin Tağıyev, Murtuza Muxtarov, Musa Nağıyev kimi Bakı milyonçularından müsadirə edilmiş qiymətli sənət əsərləri bu muzeyin eksponatları olub. H.Z.Tağıyevin mülkündə yerləşən Milli Azərbaycan Tarix Muzeyinin binasının özü də tariximizdən xəbər verən daş abidə kimi qiymətlidir. Ona görə də bu yerə bəzən “Muzey içində muzey” də deyirlər.

Ötən əsrin 30-cu illərindən etibarən bir-birinin ardınca mahiyyətinə görə müxtəlif təmayüllü – dövlət, memorial, səyyar, ədəbiyyat, incəsənət, tarix, musiqi, qoruq, teatr muzeyləri yaradılıb. Sonrakı illərdə Azərbaycanda yeni muzeylər fəaliyyətə başlayıb.

Təəssüf ki, neçə-neçə tarixi abidə və muzeylərimiz ötən əsrin 90-cı illərində erməni işğalçıları tərəfindən qarət olunub və dağıdılıb. İşğal olunmuş torpaqlarımızda 762 mədəniyyət abidəsi və 1431 mədəniyyət müəssisəsi qalıb. Erməni faşistləri 22 muzeyi, 4 rəsm qalereyasını tamamilə məhv ediblər.

Canlı muzey olan və bu gün düşmən tapdağı altında qalan Şuşada 8 muzey fəaliyyət göstərib. Dövlət Qarabağ Tarixi Muzeyi, dahi bəstəkar Üzeyir Hacıbəylinin ev, vokal sənətimizin banisi Bülbülün memorial, görkəmli musiqiçi və rəssam Mir Möhsün Nəvvabın xatirə muzeyləri, Azərbaycan Xalça Muzeyinin Şuşa filialı, görkəmli musiqiçi Qurban Pirimovun Ağdam rayonundakı xatirə, Qubadlı, Zəngilan, Cəbrayıl, Ağdam, Füzuli, Xocalı rayonlarının tarix-diyarşünaslıq muzeyləri tamamilə qarət edilib. Keçmiş SSRİ-də yeganə olan Ağdam Çörək Muzeyi ermənilər tərəfindən tamamilə yerlə-yeksan olunub.

Azərbaycanda milli-mənəvi dəyərlərimizə, o cümlədən muzey işinə daim dövlət qayğısı olub. Ölkəmizdə muzey işinin inkişafı ümummilli lider Heydər Əliyevin adı ilə bağlıdır. Xalqımızın milli tarixi və mədəni irsinin qorunmasında muzeylərin dəyərini dərindən və həssaslıqla duyan Ulu Öndər respublikada müvafiq şəbəkənin genişləndirilməsini, onun maddi-texniki bazasının gücləndirilməsini daim diqqətdə saxlayıb. Azərbaycan mədəniyyətinin Üzeyir Hacıbəyli, Hüseyn Cavid, Cəlil Məmmədquluzadə, Məmməd Səid Ordubadi, Cəfər Cabbarlı, Bülbül, Səməd Vurğun, Niyazi və digər nəhəng simalarının memorial-xatirə, mənzil, bölgələrdə tarix-diyarşünaslıq muzeyləri məhz ulu öndər Heydər Əliyevin şəxsi təşəbbüsü sayəsində yaradılıb.

Dahi rəhbərimizin xalqın təkidli tələbi ilə hakimiyyətə qayıdışından sonra digər sahələrlə yanaşı, muzey işi də öz inkişafının yeni mərhələsinə qədəm qoyub. Ulu Öndərin təşəbbüsü ilə 1993-cü ildə Nazirlər Kabinetində muzey işçilərinin respublika müşavirəsi keçirilib, 1994-cü ildə isə bu müşavirənin materialları əsasında “Respublikada muzey işinin vəziyyəti və onun yaxşılaşdırılması haqqında” qərar qəbul edilib. 2000-ci il martın 24-də qüvvəyə minmiş “Muzeylər haqqında” Azərbaycan Respublikasının Qanunu ölkəmizdə muzeylərin fəaliyyətinin təşkilati-hüquqi əsaslarını və müvafiq münasibətləri tənzimləyir. Bu sənədə əsasən muzey - maddi mədəniyyət abidələrinin komplektləşdirilməsi, mühafizəsi, öyrənilməsi, kütləvi nümayişinin və təbliğinin həyata keçirildiyi mədəniyyət, elmi-tədqiqat müəssisəsidir.

Ümummilli Lider tərəfindən muzey işinin inkişafı üzrə müəyyən edilmiş prioritetlər bu gün Azərbaycan Prezidenti İlham Əliyevin və ölkəmizin birinci xanımı, UNESCO-nun və ISESCO-nun xoşməramlı səfiri Mehriban Əliyevanın rəhbərliyi altında fəaliyyət göstərən Heydər Əliyev Fondu tərəfindən uğurla davam etdirilir.

“Azərbaycan 2020: gələcəyə baxış” İnkişaf Konsepsiyasını həyata keçirmək məqsədilə Prezident İlham Əliyevin 2013-cü il 27 dekabr tarixli Sərəncamı ilə təsdiq olunan “Daşınmaz tarix və mədəniyyət abidələrinin bərpası, qorunması, tarix və mədəniyyət qoruqlarının fəaliyyətinin təkmilləşdirilməsi və inkişafına dair 2014-2020-ci illər üzrə Dövlət Proqramı”na uyğun olaraq milli mədəni irsimizin qorunması dövlət əhəmiyyətli prioritet məqsəd kimi qarşıya qoyulub.

Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyevanın böyük zəhməti sayəsində “Şirvanşahlar Sarayı Kompleksi”, Qız qalası və Qobustan Milli Tarix-Bədii Qoruğu UNESCO-nun Dünya İrsi Siyahısına daxil edilib. Fondun həyata keçirdiyi müxtəlif layihələr çərçivəsində Qarabağ muzeyləri haqqında məlumatlar mötəbər beynəlxalq təşkilatlara çatdırılır.

Azərbaycan dövlətinin uğurlu mədəniyyət siyasəti nəticəsində son illər muzeylərimizin dünyanın nüfuzlu muzeyləri ilə əlaqələri genişlənib, bu sahədə beynəlxalq əməkdaşlıq sahəsində yeni nailiyyətlər əldə edilib.

Ümummilli Liderimizin siyasi irsinin öyrənilməsi, azərbaycançılıq məfkurəsinin formalaşdırılaraq inkişaf etdirilməsi məqsədilə yaradılan Heydər Əliyev muzeyləri isə respublikada muzey şəbəkəsinin genişləndirilməsi sahəsində mühüm hadisə kimi qiymətləndirilməlidir.

Hazırda ölkəmizdə 200-dən çox muzey fəaliyyət göstərir və onların ekspozisiyaları azərbaycançılıq məfkurəsini uğurla təbliğ edirlər.

Naxçıvan Muxtar Respublikası
Mədəniyyət Nazirliyinin Mətbuat Xidməti
18.05.2019



      Mayın 17-də Naxçıvan Muxtar Respublikası Mədəniyyət Nazirliyinin iş planına əsasən Ordubad Rayon Tarix-Diyarşünaslıq Muzeyində “Beynəlxalq Muzeylər Günü” ilə bağlı tədbir keçirilib.

Tədbirdə giriş sözü ilə çıxış edən Naxçıvan Muxtar Respublikasının Mədəniyyət naziri Natəvan Qədimova bildirib ki, muzeylər milli özünəməxsusluğu nümayiş etdirən, milli-mənəvi dəyərləri toplayan, keçmişlə bağlı həqiqətləri təcəssüm etdirən, qoruyan və təbliğ edən mədəniyyət ocaqlarıdır.

Muxtar respublikamızda muzey işinin özünəməxsus inkişaf tarixi vardır. XIX əsrin sonlarında böyük yazıçı və dramaturqumuz Cəlil Məmmədquluzadə Nehrəm kənd məktəbində muzey yaratmaq təşəbbüsü ilə Xalq Məktəbləri İdarəsinə yazılı müraciət etmiş və Azərbaycanda ilk dəfə olaraq bu kənd məktəbində Naxçıvanın tarixinə dair maddi-mədəniyyət nümunələrinin toplandığı muzey yaratmışdır. Naxçıvanda ilk Tarix-Etnoqrafiya Muzeyi isə 1924-cü il 30 oktyabrda təşkil edilmişdir.

Ölkəmizdə muzey işinin, muzeyşünaslığın inkişafı ümummilli liderimiz Heydər Əliyevin adı ilə bağlıdır. Ulu öndər ötən əsrin 70-80-ci illərində Azərbaycanda yeni muzeylərin yaradılması, onların bazasının möhkəmləndirilməsi, muzey fondlarının zənginləşdirilməsi və ekspozisiyaların müasir şəkildə qurulması üçün mühüm tədbirlər həyata keçirmişdir. Həmin dövrdə Azərbaycanın 60-dək rayonunda tarix-diyarşünaslıq muzeyləri yaradılmışdır. Məhz bu dövrdə Şərur, Babək, Ordubad, Culfa və Şahbuz rayonlarında tarix-diyarşünaslıq muzeyləri yaradılmışdır. Halbuki 1969-cu ilədək Azərbaycanda cəmi 29 muzey fəaliyyət göstərmişdir ki, bunlardan da yalnız biri xatirə muzeyi kimi nəzərdə tutulmuşdur. Ümummilli liderimizin hakimiyyəti illərində ölkəmizdə 111 müxtəlif profilli muzey yaradılmışdır.

Qeyd olunmuşdur ki, müstəqillik illərində də ulu öndərin rəhbərliyi ilə muzey işi öz inkişafının yeni mərhələsinə qədəm qoymuşdur. 2000-ci ildə qəbul edilən “Muzeylər haqqında” Azərbaycan Respublikasının Qanunu ölkəmizdə muzeylərin fəaliyyətinin təşkilati-hüquqi əsaslarını müəyyən edir və bunlarla bağlı münasibətləri tənzimləyir.

Ümummilli liderimiz muzey işinə önəm verərək deyirdi: “Milli ənənələrimizin nə qədər dəyərli olduğunu dünyaya gələn yeni nəsillərə çatdırmaq və onları bu ənənələr əsasında tərbiyə etmək üçün muzeylər lazımdır”.

Bu gün Azərbaycan Respublikasının Prezidenti cənab İlham Əliyev tərəfindən də bu sahədə uğurlu addımlar atılır, mühüm işlər həyata keçirilir. Dövlət başçısının bu istiqamətdə imzaladığı bir sıra sərəncam və fərmanlar muzey işinin hüquqi bazasının formalaşmasına və dünyanın nüfuzlu muzeyləri ilə əlaqələrin genişlənməsinə imkan yaratmışdır.

Vurğulanmışdır ki, Naxçıvan Muxtar Respublikasında da muzeylərin fəaliyyətinin canlandırılması, yeni muzeylərin yaradılması sahəsində mühüm işlər görülür, bu mədəniyyət ocaqları muzeyşünaslığın yeni nailiyyətlərinə əsaslanaraq yaradılır, Azərbaycan tarixinin yeni uğurlu səhifələri muzey ekspozisiyalarında əksini tapır. 1997-ci ilədək Naxçıvan Muxtar Respublikasında 13 muzey fəaliyyət göstərirdisə, hazırda muxtar respublikada 1 rəsm qalereyası və 29 müxtəlif profilli muzey fəaliyyət göstərir. Bu mədəniyyət ocaqlarında xalqımızın tarixini, həyat tərzini, adət-ənənələrini özündə əks etdirən 140 mindən çox eksponat toplanmışdır. Muzey fondlarının zənginləşdirilməsi daim diqqət mərkəzində saxlanılır, ötən il ərzində muxtar respublikanın muzeylərinə 1564 yeni eksponat daxil olmuşdur. Bu ilin 4 ayında isə muzeylərimiz 571 yeni eksponatla zənginləşdirilmişdir. 2012-ci ildə Bəhruz Kəngərli Muzeyi əsaslı şəkildə yenidən qurulmuş, 2013-cü ildə “Gəmiqaya” Tarix-Bədii Qoruğu və muzey üçün bina istifadəyə verilmişdir. Naxçıvan Muxtar Respublikası Ali Məclisi Sədrinin “Naxçıvanqala” Tarix-Memarlıq Muzey Kompleksinin yaradılması haqqında 2013-cü il 5 iyun tarixli Sərəncamına əsasən Naxçıvan şəhərində daha bir muzey yaradılmışdır. 2014-cü ildə Şahbuz rayonundakı Nursu kəndində Xalq şairi Məmməd Arazın ev-muzeyi, Naxçıvan şəhərində Dövlət Bayrağı Meydanı və Muzeyi istifadəyə verilmişdir. 2015-ci ildə Naxçıvan şəhərində Xatirə Muzeyinin, Şərur rayonundakı Cəlilkənddə Cəlil Məmmədquluzadənin Xatirə Muzeyinin yeni binaları, həmçinin Ordubad şəhərində Məhəmməd Tağı Sidqinin ev-muzeyi fəaliyyətə başlamışdır. Naxçıvan Muxtar Respublikası Ali Məclisi Sədrinin “Culfa rayonunda “Əlincəqala” tarixi abidəsinin bərpa edilməsi haqqında” 2014-cü il 11 fevral tarixli Sərəncamına əsasən qalada bərpa işləri başa çatdırılmış və burada muzey yaradılmışdır. 2018-ci ildə isə Naxçıvan Duz Muzeyi yaradılmış və Şərur Rayon Tarix-Diyarşünaslıq Muzeyinin yeni binası istifadəyə verilmiş, Qarabağlar Türbə Kompleksi bərpadan sonra öz qapılarını ziyarətçilərin üzünə açmışdır.

Naxçıvan Muxtar Respublikası Ali Məclisinin Sədri cənab Vasif Talıbov demişdir: “Muzeylər Azərbaycan xalqının tarixini, böyük şəxsiyyətlərimizin həyatlarını, yaradıcılığını, fəaliyyətlərini özündə əks etdirir. Xalqın tarixi həm kitablarda yazılmaqla, həm də muzeylərdə qorunmaqla gələcək nəsillərə çatdırılır. Muzeylər bizim keçmişimizi özündə yaşadan, gələcəyə daşıyan yerlərdir”.

Qeyd olunub ki, gənc nəslin muzeylərimizdə olması onların qədim və zəngin tariximiz və bu günümüz haqqında dərin biliklərə, geniş dünyagörüşünə malik olmasına, milli dəyərlərə, milli­mədəni və tarixi irsimizə məhəbbət ruhunda formalaşmasına xidmət edir. Bunun üçün muxtar respublikanın təhsil müəssisələrinin muzeylərlə əlaqələrinə xüsusi diqqət ayrılır. Naxçıvan Muxtar Respublikası Ali Məclisi Sədrinin “Naxçıvan Muxtar Respublikasının təhsil müəssisələrində elektron təhsilin təşkili ilə bağlı əlavə tədbirlər haqqında” 2014-cü il 20 iyun tarixli Sərəncamına əsasən, muxtar respublikada məktəb-muzey şəbəkəsi yaradılmış, Azərbaycanın tarixi və mədəniyyəti, görkəmli şəxsiyyətlərimizlə bağlı distant dərslər keçilmişdir. Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” 2015-ci il 27 iyul və “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər haqqında və innovasiyalaın dəstəklənməsi haqqında” 2019-cu il 3 aprel tarixli Sərəncamlarına əsasən muxtar respublikanın ali təhsil müəssisələrində muzeyşünaslıq, arxiv işi və abidələrin qorunması, tarix ixtisasları üzrə təhsil alan tələbələr üçün nəzərdə tutulmuş tədbirlər davam etdirilir.

Naxçıvan Muxtar Respublikası Ali Məclisi Sədrinin “Muzeylərlə əlaqələrin gücləndirilməsi haqqında” 2014-cü il 19 dekabr tarixli Sərəncamına uyğun olaraq, mərkəzi və yerli icra hakimiyyəti orqanları kollektivlərinin muzeylərə gedişi maddi-mənəvi sərvətlər xəzinəsi olan muzeylərə marağın artmasına, tariximizin, mədəni irsimizin və dövlətçilik ənənələrimizin hərtərəfli öyrənilməsinə imkanlar açmışdır. Bu ilin 4 ayında muzeylərimizdə 175 mindən artıq tamaşaçı olmuşdur ki, onların da 46 mindən çoxu xarici ölkə vətəndaşıdır. Naxçıvanda bir sıra muzeylərin internet saytı istifadəyə verilmiş, saytda muzey ekspozisiyalarını internet üzərindən virtual olaraq birbaşa izləmək imkanı yaradılmışdır.

Bu gün muxtar respublikanın muzeylərində 300-dək əməkdaş çalışır. Son illər muzey işçilərinin Azərbaycan Respublikasının və Naxçıvan Muxtar Respublikasının fəxri adlarına layiq görülməsi, medallarla təltif edilməsi onların əməyinə verilən yüksək qiymətin ifadəsidir.

Nazir çıxışının sonunda muzeylərimizdə çalışan bütün muzey işçilərini peşə bayramları münasibətilə təbrik edərək, onlara işlərində uğurlar arzulamış, muzeylərimizə göstərilən böyük diqqət və qayğıya görə Naxçıvan Muxtar Respublikası Ali Məclisi Sədrinə dərin minnətdarlığını bildirmişdir.

Sonra Naxçıvan Dövlət Tarix Muzeyinin direktoru, Naxçıvan Muxtar Respublikasının Əməkdar mədəniyyət işçisi Nizami Rəhimov “Tariximizin saxlanc yeri - muzeylər”, Ordubad Rayon Tarix-Diyarşünaslıq Muzeyinin direktoru, Naxçıvan Muxtar Respublikasının Əməkdar mədəniyyət işçisi Vilayət Bağırov “Muzeylərin gənc nəslin təlim-tərbiyəsində rolu”, M.T.Sidqinin Ev Muzeyinin direktoru Şəbnəm Rüstəmli “Naxçıvan muzeylər diyarıdır” mövzularındakı çıxışlarında muzey işinin tarixindən, bu mədəniyyət ocaqlarının tariximizin yaşadılmasındakı rolundan, muxtar respublikamızda muzey işinin inkişafından, gənclərin muzeylərlə əlaqələrinin qurulmasından söhbət açıblar.

Daha sonra tədbirin bədii hissəsi başlamışdır. Konsert proqramında Naxçıvan Dövlət Filarmoniyasının Mahnı və Rəqs Ansamblının qızlardan ibarət rəqs qrupu “İncəlik” xalq rəqsini, Ordubad Rayon Mədəniyyət Sarayının “Dübəndi” yallı kollektivi “Köçəri” yallısını ifa etmişlər. İsrafil Qibləliyev Aygün Səmədzadənin “Azərbaycan”, Əsmər Hüseynova Ramiz Mirişlinin “Bu torpağın, bu diyarın” mahnılarını, Fatimə Kazımova isə “Sarı gəlin” rəqsini ifa etmişlər. Ordubad Rayon Mədəniyyət Sarayının “Dübəndi” instrumental ansamblının “Bayatı-Şiraz” muğamı üzərində kompozisiyaları təqdim edilmişdir.

Təşkil olunmuş tədbir iştirakçılar tərəfindən alqışlarla qarşılanmış, onlarda xoş ovqat yaratmışdır. Sonda muzeyin ekspoziyasına baxış olmuşdur.

Naxçıvan Muxtar Respublikası
Mədəniyyət Nazirliyinin Mətbuat Xidməti
17.05.2019



      Mayın 17-də Sədərək Rayon Uşaq Musiqi Məktəbində tar, fortepiano, kamança, qarmon ixtisasları üzrə təhsil alan şagirdlər və müəllim üçün ustad dərslər keçirilib.

Dərslər başlanmazdan əvvəl Naxçıvan Muxtar Respublikası Mədəniyyət Nazirliyinin əməkdaşı Leyla Əlimərdanova çıxış edərək bildirib ki, bu dərslərin keçirilməsində əsas məqsəd tədrisin keyfiyyətinin yüksəldilməsinə, şagirdlərin bacarıq və qabiliyyətlərinin inkişaf etdirilməsinə nail olmaqdır.

Sonra muxtar respublikanın təcrübəli müəllimlərindən tar ixtisası üzrə Naxçıvan Musiqi Kollecinin müəllimi Atabəy Qurbanov, fortepiano ixtisası üzrə Naxçıvan Şəhər Ə.Cavid adına Uşaq Musiqi və Bədii Sənətkarlıq Məktəbinin müəllimi Aynurə Rəcəbova, kamança ixtisası üzrə Naxçıvan Musiqi Kollecinin müəllimi Məmməd Xəlilov, qarmon ixtisası üzrə Naxçıvan Musiqi Kollecinin müəllimi Elşən İsmayılov müəllim və şagirdlərə ustad dərsi keçiblər.

Fortepiano ixtisası üzrə ustad dərsi aparan Aynurə Rəcəbova bildirib ki, pianoçular ifa etdikləri janrlara, üslublara bələd olmalıdırlar. Tədris prosesində əsərlərin ifası zamanı intonasiya, fikir, obraz, dramaturgiya və başqa bədii ifadə vasitələrini düzgün yerinə yetirmək lazımdır.

Atabəy Qurbanov ustad dərsdə bildirib ki, qədim musiqi alətlərimizdən biri də tardır. Müəllim tar tədrisinin metodikasını dərindən bilməlidir. Tədris prosesində müəllim tar musiqi alətində çalmağı öyrədərkən şagirdə təcrübələrini də aşılamalı, fərdi xüsusiyyətlərini nəzərə alaraq onlara yaradıcı mövqedən yanaşmalıdır.

Kamança ixtisası üzrə ustad dərsində Məmməd Xəlilov bu qədim musiqi alətimiz haqqında geniş məlumat verərək onun yaradıcılıq imkanlarını izah etdikdən sonra kamançada ifa olunan əsərlər haqqında şagirdləri məlumatlandırıb. Qeyd edilib ki, bir sıra milli musiqi alətləri kimi kamançada da şagirdə təcrübə vərdişləri aşılamaq və onlara fərdi mövqedən yanaşmaq lazımdır.

Qarmon ixtisası üzrə ustad dərsi keçən Elşən İsmayılov qarmon alətində ifa olunan milli musiqi janrlarının xüsusiyyətləri haqqında ətraflı şəkildə məlumat vermişdir.

Ustad dərsləri başa çatdıqdan sonra müəllim və şagirdləri maraqlandıran suallar cavablandırılmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
17.05.2019



      Xəbər verdiyimiz kimi, norveçli məşhur xor şefi və müəllimi Per Oddvar Hildre və Azərbaycanın incəsənət xadimlərindən ibarət nümayəndə heyəti Naxçıvan Muxtar Respublikasına səfərə gəliblər. Nümayəndə heyəti Naxçıvan şəhərindəki təhsil və mədəniyyət müəssisələri ilə tanış olub, norveçli dirijor xor kollektivləri üçün ustad dərsi keçib. “Şərq qapısı” qəzeti üçün qonaqların təəssüratlarını öyrəndik.

Per Oddvar Hildre – norveçli musiqiçi, əfsanəvi “Skruk” xorunun dirijoru: – Bir çox illər əvvəl, 1997-ci ildə ilk dəfə ölkənizin paytaxtı Bakıda olarkən İlqar Muradov və Siyavuş Kərimi mənə Naxçıvana hökmən getməyi tövsiyyə etdilər. Onlar mənə bu torpağın Azərbaycanın ən gözəl guşələrindən biri olduğunu və təmiz hava, təmiz su, ən əsası ­təmizürəkli insanları görmək üçün Naxçıvana səfər etməyi məsləhət bildilər. Mən belə bir imkanı yalnız bu il tapa bildim. Naxçıvana dəvət edildim və gördüyünüz kimi, artıq burdayam.

İlk olaraq havanın gözəl olması mənə çox xoş təsir bağışlayır. Hava limanından enərkən gördüyümüz uca dağlar, yaşıllıq və təmiz şəhər mənə çox gözəl təəssürat bağışladı. Sonra biz konservatoriyaya getdik və burada gözəl mahnı oxuyan gəncləri görmək ürəyimcə oldu.

Bilirəm ki, Azərbaycan yüksək musiqi mədəniyyətinə malikdir. Məsələn, Norveçdə Daş dövründə nəhəng daş baltalar olduğu zamanda Azərbaycanda dahi şairlər və musiqiçilər olub. Mənim üçün böyük şərəfdir ki, bu mədəniyyətlə tanış olum. Bilirəm ki, böyük siyasətçi Heydər Əliyev Azərbaycanda mədəniyyətin inkişafına xüsusi diqqət göstərib. O, musiqi, teatr, rəsm və rəqs sənətinin böyük hamisi olub, özü də bu sənət növləri ilə ­maraqlanıb.

Düşünürəm ki, dünyanın digər yerlərində yaşayanlar Azərbaycan mədəniyyətini öyrənməlidirlər. Bu, çox vacibdir. Naxçıvanda bizə göstərilən qonaqpərvərliyə görə bir daha minnətdaram. Burada özümü çox xoşbəxt və rahat hiss edirəm. Bir norveçli turist üçün bu, çox böyük hisslərdir.

Siyavuş Kərimi – Azərbaycan Milli Konservatoriyasının rektoru, Xalq artisti: – Naxçıvanda yüksək səviyyəli beynəlxalq tədbirlərin keçirilməsi üçün hərtərəfli şərait var. Mən çox sevinirəm ki, bu gün Azərbaycanın incəsənət xadimləri ilə birlikdə Naxçıvandayam.

Naxçıvana gəlişimizin məqsədi bu qədim diyarın gözəlliyini, onun mədəniyyətinin inkişafını, yüksəlişini yaxından görmək, gələcəkdə muxtar respublikada hər hansı bir beynəlxalq layihənin ərsəyə gəlməsini müzakirə etmək, qarşılıqlı əlaqələri inkişafına nail olmaqdır. Naxçıvan musiqi sahəsində də gözəl sənətkarlar yetişdirən bir diyardır. Bu gün bir çox naxçıvanlı sənətkar Azərbaycan mədəniyyətinin inkişafına öz töhfələrini verir. Biz bir azərbaycanlı kimi bundan böyük qürur duyuruq.

Səfər çərçivəsində biz Naxçıvan Dövlət Universitetinin Konservatoriyasında olduq. Bir musiqiçi kimi oradakı xor kollektivinin ifası mənə çox gözəl təsir bağışladı. Həqiqətən də, Naxçıvanda uşaqların musiqi təhsili olduqca ürəkaçandır, mən o zəhmətkeş müəllimləri ürəkdən alqışlayıram ki, belə istedadlı uşaqları yetişdirib səhnəyə çıxarıblar.

Nazim Kazımov – Azərbaycan Milli Konservatoriyasının nəzdində fəaliyyət göstərən Musiqi Kollecinin direktoru, Əməkdar incəsənət xadimi, professor: – Mən Naxçıvanda dünyaya göz açıb bu torpağın havası, suyu, çörəyi ilə böyümüşəm. İlk musiqi təhsilimi də məhz qədim diyarda fəaliyyət göstərən 1 nömrəli musiqi məktəbində almışam. Müəllimlərim Sahib və Vahid Axundovlardan musiqinin ilkin sirlərini öyrənmişəm. O zamanlar Naxçıvanda ali musiqi təhsili almaq üçün şərait olmadığından Asəf Zeynallı adına Azərbaycan Dövlət Musiqi Texnikumuna üz tutdum və təhsilimi orada davam etdirdim. İşimlə əlaqədar Bakıda yaşasam da, ürəyim daim Naxçıvanla döyünüb.

Ötən ilin yaz aylarında qədim diyara ekskursiya edən zaman buranın inanılmaz dərəcədə gözəlləşdiyini, müasir şəraitə malik olduğunu gördüm. Bu il də musiqiçi həmkarlarımla birlikdə Naxçıvana gəlməyi qərara aldıq. Dostumuz, 22 ildir, Azərbaycana gəlib-gedən, bizimlə əlaqəli çalışan norveçli məşhur xor şefi və müəllimi Per Oddvar Hildre eşidəndə ki, Naxçıvana gələcəyik, bizimlə bərabər o da oğuz yurduna səfər etmək istədiyini, təbiətini, tarixi məkanlarını yaxından görmək arzusunda olduğunu bildirdi. Və beləcə, biz Naxçıvana üz tutduq, məqsədimiz isə buranın musiqisi, mədəniyyəti ilə yaxından tanış olmaq, görməli yerlərinə səyahət etmək idi.

Səfər zamanı Naxçıvanda musiqi mədəniyyətinin, təhsilin necə böyük sürətlə inkişaf etdiyinin şahidi olduq. Musiqi sahəsinə dərindən bələd olan biri kimi deməliyəm ki, burada 27 musiqi məktəbinin, musiqi kollecinin və konservatoriyanın, filarmoniyaların, ansamblların fəaliyyət göstərməsi, hər il yüzlərlə tələbənin musiqi təhsilini başa vuraraq musiqiçi kadr kimi yetişməsi böyük bir zəhmətin nəticəsidir. Rəhbəri olduğum kollecdə də çalışan naxçıvanlılar var. Mən hər zaman onlarda incəsənətə, musiqiyə olan marağı, bu sahələr üzrə qeyri-adi istedadı gördükcə ürəyim dağa dönür.

Bu yurdun övladı kimi bütün bu gözəlliklər məni inanılmaz dərəcədə sevindirir. Səfər müddətində Naxçıvanın gəzməli yerlərini, tarixi abidələrini də doyunca gəzib, norveçli dostumuza da gözəl, xoş anlar bəxş etmək niyyətindəyik. İnanıram ki, gələcəkdə bu diyara tez-tez üz tutacağıq.

Rauf Babayev – “Qaya” ansamblının üzvü: – Naxçıvan mənə çox doğma və əzizdir. Mənim anam burada dünyaya göz açıb, nənəm burada yaşayıb, uşaqlıq çağlarım Naxçıvanda keçib. Həqiqətən də, doğru deyirlər ki, uşaqlıq illərində yaşananlar hər zaman insanın yaddaşında qalır, o illərdə olanları unutmaq olmur. Yaxşı yadımdadır, həmin illərdə nənəm bizə təndir çörəyindən pendir dürməyi tutar, dadlı pomidorla yeyərdik. Nənəmgil Bakıya gələn zaman mənə mütləq həmin təndir çörəklərindən, tamlı Naxçıvan pendirindən gətirərdilər, indi burada olarkən həmin nostalji duyğuları yenidən yaşadım.

Onu da deyim ki, ötən əsrin 70-80-ci illərində bir dəfə “Qaya” ansamblının üzvü kimi Naxçıvanda olmuşam. Sonralar mən 9 uşaqdan ibarət “Bəri bax” ansamblını yaratdım, müstəqillik illərində həmin kollektivlə dünyanın bir sıra ölkələrində konsertlər verdik. Həmin kollektivin repertuarına görkəmli bəstəkar Məmməd Məmmədovun bəstələdiyi Naxçıvanla bağlı gözəl bir mahnı da daxil etmişdik. Səhv etmirəmsə, 2000-ci ilin əvvəllərində qədim diyara üz tutan zaman da həmin ansambl o mahnını ifa etmişdi.

Onu da xüsusilə qeyd edim ki, budəfəki gəlişimdə diqqətimi çəkən ən mühüm cəhətlərdən biri də ayrı-ayrı təşkilatlarla yanaşı, insanların da təmizliyə, səliqə-sahmana xüsusi fikir vermələri oldu. Bildiyimiz ki, yaradıcı insanlar, sənətə bağlı olanlar üçün sakit yerdə öz düşüncələrinlə baş-başa qalmaq ən gözəl duyğudur. Həzin küləyin təsiri ilə yarpaqların asta templə əsməsi, quşların cəh-cəh səsləri, suyun şırıltısı insana sanki vücudunu titrədən lirik bir musiqi təsiri bağışlayır. Sevinirəm ki, mən Naxçıvanda o lirikliyi, rahatlığı, ruhumun dincəldiyini hiss edə bildim. Səfər çərçivəsində Naxçıvanın gəzməli yerlərində də olacağıq, inanıram ki, bundan sonra tez-tez bu diyara gələ biləcəyəm.

Naxçıvan Muxtar Respublikası
Mədəniyyət Nazirliyinin Mətbuat Xidməti
17.05.2019



      Mayın 17-də Naxçıvan Şəhər Mədəniyyət Şöbəsinin “Şəlalə” instrumental ansamblının Şahbuz Rayon Mədəniyyət Sarayında konsert proqramı olmuşdur.

Nəzərinizə çatdıraq ki, Naxçıvan Şəhər Mədəniyyət Şöbəsinin “Şəlalə” instrumental ansamblı 15 ildən çoxdur ki, fəaliyyət göstərir. Ansambl repertuar zənginliyinə diqqət yetirməklə ictimaiyyət qarşısında müxtəlif tarixi və əlamətdar günlərlə bağlı keçirilən tədbirlərdə konsert proqramları ilə çıxış edir. Kollektivin üzvlərindən bir neçə nəfər son illərdə fəxri adlara layiq görülmüşdür. Ansamblın bədii rəhbəri Əli Məmmədovdur.

Konsert proqramı ansamblın ifasında görkəmli bəstəkarımız Tofiq Quliyevin “İncilər” melodiyası ilə başlamışdır. Ədalət Hüseynovun ifa etdiyi Ramiz Mirişlinin “Bir xumar baxışla”, İbrahim Topçubaşovun “Ah nə şadam mən”, Emin Sabitoğlunun “Kəpənək”, Oqtay Rəcəbovun “Daha nə istəyirsən”, Müslüm Maqomayevin “Azərbaycan” mahnıları konsert iştirakçılarında xoş ovqat yaratmışdır.

Konsertin davamında ansamblın solistləri Səyavuş Nəcəfov, Qəmər Babayeva, Bəhruz Quliyev görkəmli bəstəkarlarımızdan Tofiq Quliyev Ələkbər Tağıyev, Hacı Xanməmmədov, Emin Sabitoğlu, Vasif Adıgözəlov, Oqtay Kazımi, Tofiq Əhmədov, Telman Hacıyev, Lalə İbrahimova və başqalarının populyar mahnılarını ifa etmişlər. Solistlərin ifa etdiyi “Süzdü keçdi”, “Getmə amandı”, “Səni gördüm”, “Badamlı”, “Olmaz-olmaz”, “Naxçıvan”, “Güldür məni”, “Axtararsınız”, “Gözləməsin neyləsin”, “Sənin gülüşlərin”, “Söylə”, “Qonşu olmaq istəmirəm səninlə” “Bulaq üstə gəzən gözəl” və başqa mahnılar alqışlarla qarşılanmışdır. Konsertdə ansamblın ifasında instrumental musiqilər, təsnif və kino filmlərdən mahnılar da səsləndirilmişdir.

Bir saatdan artıq davam edən konsert Şahbuz rayon sakinləri tərəfindən maraqla qarşılanmış və onlarda xoş əhvali-ruhiyyə yaratmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
17.05.2019



      Mayın 16-da Sədərək Rayon Tarix-Diyarşünaslıq Muzeyində “Muzeylərdə mədəni-kütləvi təbirlərin təşkili və sərgilərin qurulması” mövzusunda muzey əməkdaşları üçün seminar-treninq keçirilmişdir.

Nazirliyin sisteminə daxil olan muzeylərin əməkdaşlarının iştirak etdiyi tədbirin məqsəd və əhəmiyyətindən danışan nazirliyin baş məsləhətçisi Qumral Əsədova giriş sözü ilə çıxış edərək bildirmişdir ki, muxtar respublikada müxtəlif profilli muzeylər fəaliyyət göstərir. Muzeylərə bu gün xüsusi diqqət göstərilir, onların maddi-texniki bazası gücləndirilir, əməkdaşların peşəkarlıq səviyyəsi yüksəldilir. Naxçıvan Muxtar Respublikası Ali Məclisi Sədrinin “Muzeylərlə əlaqələrin daha da gücləndirilməsi haqqında” 2014-cü il 19 dekabr tarixli Sərəncamından sonra muzeylərin ziyarətçilərinin sayında əhəmiyyətli dərəcədə artım müşahidə olunur.

Qeyd olunmuşdur ki, bu gün keçirilən seminar-treninq il ərzində təşkil olunmuş beşinci seminar-treninqdir. Keçirilən seminar-treninqlərdə muzey əməkdaşları vəzifə funksiyalarını dərindən öyrənməyə səy göstərməklə yanaşı, muzey işi haqqında ətraflı məlumat əldə etmiş olurlar. Eyni zamanda, seminar-treninqlər muzey işçilərinin muxtar diyarımızın bütün bölgələrində yerləşən muzeylərlə tanış olmalarına şərait yaratmaq baxımından da əhəmiyyətlidir. Belə tədbirlərdə muzey əməkdaşlarına bu sahədə həyata keçirilən yeniliklərdən söhbət açılır, onların sualları cavablandırılır.

Vurğulanmışdır ki, cari ilin ilk dörd ayı ərzində muxtar respublikanın muzeylərinə 571 ədəd yeni eksponat daxil olmuşdur. Bu müddətdə muzeylərimizi 175 min 810 nəfər tamaşaçı ziyarət etmişdir ki, onlardan 46 min 205 nəfəri xarici ölkə vətəndaşı olmuşdur.

Tədbirdə Naxçıvan Dövlət Xalça Muzeyinin direktoru Ülviyyə Məmmədova “Muzeylərdə mədəni-kütləvi təbirlərin təşkili və sərgilərin qurulması” mövzusunda çıxış edərək bildirmişdir ki, muzeylərdə əlamətdar və tarixi günlərlə bağlı keçirilən tədbirlərdə gənclər və tələbələrin iştirakı təmin edilməlidir. Mədəni-kütləvi tədbirlərin keçirilməsində tədbir iştirakçılarının marağına diqqət yetirmək də vacib məsələlərdəndir. Bu tədbirlərin əsas məqsədi maarifçilik və məlumatlandırmaq istiqamətində olmalıdır. Muzeylərin mədəni-kütləvi tədbirləri öz profillərinə uyğun olaraq təşkil etməsi isə əsas şərtlərdən biridir.

Tədbirin davamında muzeyin ekspozisiyasına baxış keçirilmişdir. Seminar-treninqdə mövzu ilə bağlı muzey əməkdaşlarının sualları cavablandırılmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
17.05.2019



      18 May “Beynəlxalq Muzeylər Günü” münasibətilə Naxçıvan Dövlət Tarix Muzeyində tədbir keçirilib.

Muzeyin direktoru Nizami Rəhimov muzeylərin tarixi-mədəni əhəmiyyətinə toxunaraq mədəni irsi qorunmasında, tədqiq və təbliğində tutduğu yerdən danışıb.

Muxtar respublikada muzeylərin fəaliyyətinin canlandırılması və yeni muzeylərin yaradılması sahəsində mühüm işlər görülür. Bu mədəniyyət ocaqları muzeyşünaslığın yeni nailiyyətlərinə əsaslanaraq qurulur, tarixin yeni uğurlu səhifələri muzey ekspozisiyalarında əksini tapır.

Heydər Əliyev muzeyinin direktoru Ramil Orucəliyev, Naxçıvan Muxtar Respublikası Ədəbiyyat muzeyinin direktoru Aləmzər İbrahimova, Naxçıvan Dövlət Universitetinin kafedra müdiri Məmməd Əliyev, Bəhruz Kəngərli muzeyinin direktoru Səbinə Əlincəli və Naxçıvan Dövlət Universitetinin Muzeyşünaslıq, arxiv işi və abidələrin qorunması ixtisasının tələbəsi Ziynət Məmmədova 18 May “Beynəlxalq Muzeylər Günü” ilə bağlı öz fikirlərini bildiriblər.

Tədbir ulu öndər Heydər Əliyevə həsr olunan şeirlərin bədii qiraəti və maraqlı kompozisiya ilə başa çatıb.

Sonda tədbir iştirakçıları muzeyin ekspozisiyasında nümayiş etdirilən “Naxçıvan muzeyləri muxtariyyət dövründə” adlı guşə ilə tanış olublar.

Naxçıvan Muxtar Respublikası
Mədəniyyət Nazirliyinin Mətbuat Xidməti
17.05.2019



      Mayın 16-da Naxçıvan Şəhər Uşaq Musiqi və İncəsənət Məktəbinin fortepiano ixtisası üzrə V sinif şagirdlərinə Ərtoğrol Cavidin yaradıcılıq irsinə həsr olunmuş açıq dərs keçirilmişdir.

Açıq dərsdə məktəbin direktoru Elşən Xəlilov, məktəbin nəzəri fənlər şöbəsinin müdiri Nəcibə Qafarova, nəzəri fənlər şöbəsinin müəllimi Təranə Axundova, musiqi ədəbiyyatı müəllimi Zülfiyyə Əliyeva çıxış etmişdir.

Çıxış edənlər Ərtoğrol Cavidin həyat və yaradıcılığı haqqında uşaqlara geniş məlumat verərək bildirmişlər ki, Naxçıvan Muxtar Respublikası Ali Məclisi Sədrinin 2019-cu il 18 aprel tarixli Sərəncamı ilə Azərbaycan mədəniyyətinin dəyərli simalarından biri kimi unudulmaz bəstəkar, böyük dramaturq, gözəl şair, istedadlı rəssam, folklorçu və musiqi tədqiqatçısı Cavidin 100 illik yubileyi qeyd edilir.

Qeyd olunmuşdur ki, Ərtoğrol Cavid 24 illik ömrünə böyük bir dünya sığdırmışdır. Yaşadığı dövr ərzində 200-dən çox el havasını nota köçürmüş, aşıqlarımızın ifasında söylənən dastan və nağılların mətnlərini yazıya almış, öz yaradıcılığında onlardan ilham alaraq, gözəl əsərlər yaratmışdır. Onun ilk böyük əsəri fortepiano üçün yazılmış “Doqquz variasiya”dır. Skripka ilə fortepiano üçün “Poema” , Nizaminin “Sevgili yar gəlmiş idi” qəzəlinə, N.Rəfibəylinin “Eşq olsun”, türkmən şairi Kəminənin “Leylanın vəsfi”, T.Rasizadənin “Səninlə olaydım” və s. şeirlərinə romans və mahnılar bəstələmişdir. Böyük Vətən müharibəsi başlanarkən “Cəbhədən məktub” simfonik balladasını və marşlar yazmışdır, “Şeyx Sənan”, “Məhsəti” operaları, bir sıra kamera və instrumental əsərləri yarımçıq qalmışdır. Ərtoğrol Cavid qələmini dramaturgiya və poeziya sahəsində də sınamış və uğurlu əsərlər yaratmışdır.

Açıq dərsin davamında Ərtoğrol Cavidin bir neçə əsəri slayd vasitəsilə şagirdlərə dinlədilmişdir. Şagirdlərdən Gültən Novruzova Ərtoğrol Cavidin yazdığı şeirlərdən bədii qiraət etmişdir.

Açıq dərsdə şagirdləri maraqlandıran suallar cavablandırılıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
17.05.2019



      Naxçıvan Muxtar Respublikası Nazirlər Kabinetinin 2019-cu il 8 may tarixli Qərarına əsasən “Naxçıvan Muxtar Respublikasında müəllimlərin dövlət musiqi təhsili müəssisələrinə işə qəbulu, bilik və bacarıqlarının qiymətləndirilməsinin aparılması Qaydaları” təsdiq edilib.

Qərara görə müəllimlərin işə qəbulu müsabiqəsində orta ixtisas musiqi təhsili müəssisəsi üçün ali, uşaq musiqi, incəsənət və bədii sənətkarlıq məktəbləri üçün ali və ya orta ixtisas təhsili müəssisəsini bitirmiş və dövlət nümunəli təhsil sənədi (diplom), yaxud ali və ya orta ixtisas təhsili müəssisəsini bitirmə haqqında sənəd (arayış) almış, xarici ölkədə aldığı təhsil sənədi qanunvericiliklə müəyyən edilmiş qaydada tanınmış Naxçıvan Muxtar Respublikasında yaşayan Azərbaycan Respublikasının vətəndaşları iştirak edə bilərlər.

Naxçıvan Muxtar Respublikası
Mədəniyyət Nazirliyinin Mətbuat Xidməti
17.05.2019



      Mayın 15-də norveçli məşhur xor şefi və müəllimi Per Oddvar Hildre və Azərbaycanın incəsənət xadimlərindən ibarət nümayəndə heyəti Naxçıvan Muxtar Respublikasına səfər ediblər.

Qonaqlar əvvəlcə Azərbaycan xalqının ümummilli lideri Heydər Əliyevin Naxçıvan şəhərində ucalan abidəsini ziyarət edib, Heydər Əliyev Muzeyindəki eksponatlarla tanış olublar.

Sonra qonaqlar Naxçıvan Dövlət Universitetinin Konservatoriya binasında universitetin İncəsənət fakültəsinin xor kollektivinin ifasında musiqi nömrələrini dinləyiblər. Azərbaycan Milli Konservatoriyasının rektoru, Xalq artisti Siyavuş Kərimi Naxçıvana səfərə gələn nümayəndə heyətinin üzvlərini tələbələrə təqdim edib. Bildirib ki, nümayəndə heyətində Azərbaycanın Xalq artisti, əfsanəvi “Qaya” ansamblının üzvü Rauf Babayev, Azərbaycanın Əməkdar artisti İlqar Muradov, yazıçı-publisist Əlibala Məhərrəmzadə, Azərbaycan Milli Konservatoriyasının nəzdində fəaliyyət göstərən Musiqi Kollecinin direktoru, Əməkdar incəsənət xadimi, professor Nazim Kazımov və dünyada tanınmış norveçli musiqiçi, əfsanəvi “Skruk” xorunun dirijoru Per Oddvar Hildre vardır. Qeyd edilib ki, səfərin məqsədi Naxçıvandakı xor kollektivlərinin fəaliyyəti ilə yaxından tanış olmaqdır.

Daha sonra qonaqlar Naxçıvan şəhərindəki Heydər Əliyev Sarayında Naxçıvan Muxtar Respublikası Mədəniyyət Nazirliyinin xor kollektivlərinin ifasında musiqi nömrələrini dinləyib, öz fikirlərini, tövsiyə və məsləhətlərini veriblər.

Per Oddvar Hildre bildirib ki, kollektiv musiqi nömrələrini peşəkarlıqla ifa etdilər. O vurğulayıb ki, kollektivin üzvləri çox həvəsli və bacarıqlıdırlar. Onlar səhnədə tamaşaçılara fərqli üslubda, yeni bir ifa tərzində geniş repertuar təqdim etmək imkanlarına malikdirlər.

Sonra norveçli dirijor xor kollektivləri üçün ustad dərsi keçib.

Qeyd edək ki, həmin gün Naxçıvan Dövlət Universiteti ilə Azərbaycan Milli Konservatoriyası arasında əməkdaşlıq müqaviləsi də imzalanıb.

Nümayəndə heyətinin Naxçıvan Muxtar Respublikasına səfəri davam edir.

Naxçıvan Muxtar Respublikası
Mədəniyyət Nazirliyinin Mətbuat Xidməti
16.05.2019



      Hüseyn Cavidin ev-muzeyində Ərtoğrol Cavidin anadan olmasının 100 illik yubileyinə həsr olunan “Hüseyn Cavidin natamam əsəri – Ərtoğrol” adlı tədbiri Hüseyn Cavidin ev-muzeyi və xatirə kompleksinin direktoru, Naxçıvan Muxtar Respublikasının Əməkdar mədəniyyət işçisi Bəhruz Axundov açıb.

Bildirilib ki, Naxçıvan Muxtar Respublikası Ali Məclisi Sədrinin 2019-cu il 18 aprel tarixli Sərəncamı ilə Azərbaycan mədəniyyətinin dəyərli simalarından biri kimi zəngin irs yaradan, musiqişünas, rəssam və tədqiqatçı Ərtoğrol Cavidin 100 illik yubileyi qeyd olunur.

Diqqətə çatdırılıb ki, böyük ədib Hüseyn Cavidin nakam oğlu Bakıda doğulub, Naxçıvanda dünyasını dəyişmiş bəstəkar Ərtoğrol Cavid Azərbaycan Pedaqoji İnstitutundan məzun olduqdan sonra musiqi təhsilini Azərbaycan Dövlət Konservatoriyasında Üzeyir Hacıbəyovun sinfində davam etdirib, eyni zamanda konservatoriyanın nəzdindəki musiqi məktəbində dərs deyib, gənc tədqiqatçı kimi musiqi folkloru nümunələrinin toplanması və tədqiqində iştirak edib.

Filologiya üzrə elmlər doktoru, professor, Azərbaycan Respublikasının Əməkdar elm xadimi Hüseyn Həşimli “Ərtoğrol Cavidin bədii yaradıcılığı” mövzusundakı çıxışında bildirib ki, o, qısa ömür sürsə də, çoxşaxəli və zəngin fəaliyyəti ilə tanınıb. İstedadlı gəncin yaradıcılığının bir qolu da bədii ədəbiyyatla əlaqədardır. Ərtoğrol Cavidin bəlli olan ilk qələm təcrübəsi 1927-ci ildə səkkiz yaşında ikən yazdığı “Bizim bağ” adlı mənzum parçadır. Əsərdən-əsərə püxtələşən Ərtoğrol Cavidin müxtəlif vaxtlarda qələmə aldığı “Bahar”, “Borjom”, “Göyərçinin naləsi”, “Sönük həyat”, “Dalğa”, “Ay”, “Qalibiyyət nəğməsi”, “İspan qadının dilindən layla”, “Sənsən”, “Layla” və digər şeirləri onun poeziyaya marağının təsadüfi olmadığını göstərir. Bu şeir­lərdəki orijinal duyum və deyim tərzi diqqəti çəkir.

Qeyd olunub ki, Ərtoğrol Cavidin bir sıra nəsr əsərləri də vardır. Bunlardan “Sükutun harmoniyası”, “Uğursuz gecə”, “Məktub”, “Oxu, bülbülüm, oxu”, “Sənsən, sən”, “Vərəmli bir qız”, “Gənc qadının ilk çocuğu ölürkən” kimi əsərləri dərin lirik ovqatına, hiss-həyəcanın qabarıq bədii təcəssümünə görə mənsur şeir də sayıla bilər. “Uğursuz gecə” əsərində Ərtoğrol atası Hüseyn Cavidin həbsə alındığı 1937-ci ilin 3 iyun gecəsini təsirli bir şəkildə nəzərə çatdırıb. Onun “Vərəmli bir qız”, “Gənc qadının ilk çocuğu ölürkən” adlı nəsr əsərlərində isə nakam ölüm, həyatdan vaxtsız və nisgillə köçmək mövzusu aparıcıdır. İrihəcmli nəsr əsəri kimi düşündüyü, lakin tamamlaya bilmədiyi “Ciman” adlı əsərdə gənc müəllif insanın həyatının mənasının xalqa xidmətdə olduğunu təsdiqləyirdi.

Vurğulanıb ki, Ərtoğrol Cavid dramaturgiya sahəsində də uğurlu yaradıcılıq axtarışları aparıb. Onun arxivində bəzi dramatik əsərlərinin eskizləri və parçaları vardır. 1939-cu ildə yazdığı “Eqoistin taleyi” pyesi isə ümumən, bitkin sayıla bilər. Bu əsərdə yalnız özünü düşünənlərlə Vətən, xalq üçün çalışanlar qarşılaşdırılır.

Ərtoğrol Cavid Pedaqoji İnstitutda (indiki ADPU-da) tələbə ikən bir sıra dünya klassiklərinin yaradıcılığı barədə maraqlı referatlar hazırlayıb ki, bunlar onun geniş mütaliəsindən və dərin elmi-ədəbi təfəkküründən soraq verir. O, Musiqi Elmi-Tədqiqat Kabinetində çalışdığı vaxtlarda Azərbaycanın ayrı-ayrı regionlarından toplanmış müxtəlif janrlı folklor nümunələri, eləcə də şifahi xalq ədəbiyyatına dair bəzi tədqiqat əsərləri barədə dəyərli elmi rəylər də yazıb.

Tədbirdə Naxçıvan Muxtar Respublikası Rəssamlar Birliyinin sədri, Azərbaycan Respublikasının Əməkdar rəssamı Ülviyyə Həmzəyevanın, Naxçıvan Muxtar Respublikası Mədəniyyət Nazirliyinin aparıcı məsləhətçisi Leyla Əlimərdanovanın, Hüseyn Cavidin ev-muzeyi və xatirə kompleksinin baş fond mühafizi-elmi işçisi Naibə Mirzəyevanın çıxışları dinlənilib.

Sonda muzey ekspozisiyasına baxış olub.

Naxçıvan Muxtar Respublikası
Mədəniyyət Nazirliyinin Mətbuat Xidməti
16.05.2019



      Ukrayna Respublikasının mega-polis.in.ua saytında Naxçıvanla bağlı “Naxçıvan Azərbaycanın Avropanı xatırladan şəhəridir” başlıqlı geniş məqalə yerləşdirilib.

Müəllifi Azərbaycan Jurnalistlər və Yazıçılar Birliyinin üzvü, “Regionda Media və Cəmiyyət” MMC-nin sədri, diaspor.info saytının təsisçisi və baş redaktoru, MDB ölkələri arasında diaspor təşkilatlarının fəaliyyətinin monitorinqini aparan jurnalist Əlmaniz Ələkbərli olan yazı muxtar respublikanın bugünkü inkişafı, tərəqqisi və sosial həyatından bəhs edir. Müəllif yazısında Naxçıvanı Azərbaycanda Avropa şəhərlərini xatırladan bir məkan kimi ukraynalı oxuculara təqdim edir. O vurğulayır ki, Naxçıvanda olan təmizlik və səliqə-sahman Avropanın İsveçrə, Avstriya, Almaniya kimi ölkələrinin şəhərləri ilə müqayisə edilir. Xidmət infrastrukturu, turizm obyektləri, insanlara, xüsusilə əcnəbi qonaqlara göstərilən diqqət müasir Naxçıvanda həyatın ayrılmaz bir hissəsidir.

Ukrayna dilində geniş oxucu kütləsinə çatdırılan yazıda bütün bunların muxtar respublika rəhbərinin qayğısı və diqqəti ilə ərsəyə gəldiyi bildirilir. Məqalədə Naxçıvanın müasir görüntüləri və yenidən bərpa edilən qədim abidələrinin fotoları da verilib.

Naxçıvan Muxtar Respublikası
Mədəniyyət Nazirliyinin Mətbuat Xidməti
16.05.2019



      Mayın 15-də “Milli filmlərimiz” adlı kinoviktorinanın final mərhələsi keçirilib. Ötən ilin oktyabr ayından başlanan və aprel ayında başa çatan kinoviktarinanın seçim turlarına əsasən, 8 komanda yarımfinala vəsiqə qazanıb. Naxçıvan şəhər 15, Şərur şəhər 2, Şahbuz şəhər 1, Culfa rayon Yaycı kənd 1, Sədərək rayon Sədərək kənd 2 nömrəli, eləcə də Babək rayon Kərimbəyli, Ordubad rayon Nüsnüs, Kəngərli rayon Böyükdüz kənd tam orta məktəblərinin komandaları kinoviktorinanın yarımfinal mərhələsində milli kinomuzla bağlı biliklərini sınayıblar.

Beləliklə, yarımfinal mərhələsində ən yüksən bal toplayan 4 komanda - Naxçıvan şəhər 15, Şərur şəhər 2, Sədərək rayonu Sədərək kənd 2 və Culfa rayonu, Yaycı kənd 1 nömrəli tam orta məktəbin komandaları finalda yarışmaq hüququ qazanıblar.

Final mərhələsinin nəticələrinə əsasən, Sədərək rayonu Sədərək kənd 2 nömrəli tam orta məktəbin komandası 3-cü, Culfa rayonu Yaycı kənd 1 nömrəli tam orta məktəbin komandası 2-ci, nəhayət, Şərur rayonu Şərur şəhər 2 nömrəli tam orta məktəbin komandası 1-ci yerlərə sahib çıxıblar. Naxçıvan şəhər 15 nömrəli tam orta məktəbin komandası isə Fəxri fərmanla təltif olunub. Sonda qaliblərə təşkilatçı müəssisələrin kubok, diplom və hədiyyələri təqdim edilib.

Qeyd edək ki, “Milli kinomuz” adlı kinoviktorina Naxçıvan Muxtar Respublikası Gənclər Fondunun, Naxçıvan Dövlət Film Fondunun və Naxçıvan Muxtar Respublika rayon və şəhər təhsil şöbələrinin birgə təşkilatçılığı ilə keçirilib. 5-9-cu sinif şagirdlərindən ibarət komandaların iştirak etdiyi kinoviktorinada komanda üzvlərinə 5 mövzu üzrə suallar ünvanlanıb. Ən çox bal toplayan komandalar yarımfinal və final mərhələlərinə vəsiqə qazanıblar. Kinoviktorinanın keçirilməsində əsas məqsəd milli kinomuzun təbliği, məktəblilərin kinofilmlərə olan marağının artırılması və onların kino biliklərinin yoxlanmasından ibarətdir.

Naxçıvan Muxtar Respublikası
Mədəniyyət Nazirliyinin Mətbuat Xidməti
15.05.2019



      Heydər Əliyev Uşaq-Gənclər Yaradıcılıq Mərkəzində ümumtəhsil müəssisələrində “Tariximizi qoruyaq və yaşadaq” devizi altında keçirilmiş aksiyada toplanan eksponatların Mədəniyyət Nazirliyinə təqdimetmə mərasimi olub. Tədbiri Naxçıvan Muxtar Respublikasının Təhsil naziri Rəhman Məmmədov giriş sözü ilə açaraq təhsilə göstərilən diqqət və qayğıdan danışıb. Təhsil naziri vurğulayıb ki, şagirdlərin vətənpərvərlik ruhunda tərbiyə edilməsi, tariximizin öyrənilməsi ilə bağlı müxtəlif səpkili tədbirlər həyata keçirilir. Bu tədbirlərin davamı olaraq ümumtəhsil məktəblərində “Tariximizi qoruyaq və yaşadaq” devizi altında aksiya keçirilib.

Qeyd olunub ki, aksiya təhsil ictimaiyyəti tərəfindən böyük rəğbətlə qarşılanıb, qədim maddi mədəniyyət nümunələri, o cümlədən şəxsi kolleksiyalarda toplanmış tarixi və bədii əhəmiyyət daşıyan 400-dən artıq eksponat müəllim və şagirdlərimiz tərəfindən toplanaraq bir araya gətirilib. Bunlara toxuculuq məmulatları, məişət əşyaları, təsərrüfat və daş əmək alətləri, pul nümunələri və digər məmulatlar aiddir. Təhsil naziri bu ənənənin gələcəkdə də davam etdiriləcəyini bildirib.

Naxçıvan Muxtar Respublikasının Mədəniyyət naziri Natəvan Qədimova çıxışında qeyd edib ki, muxtar respublikada muzey fondlarının zən­ginləşdirilməsi, onların yeni eksponatlarla təmin olunması daim diqqət mərkəzində saxlanılır. Bu prosesdə təkcə muzeylərin əməkdaşları deyil, muxtar respublika vətəndaşları da yaxından iştirak edirlər. Sevindirici haldır ki, son dövrlərdə aksiya xarakteri almış bu tədbirlərdə ümumtəhsil məktəblərinin müəllim və şagird kollektivləri də fəallıq göstərirlər. Diqqətə çatdırılıb ki, ötən il muxtar respublika muzeylərinə 1564, bu ilin ilk 4 ayı ərzində isə 571 eksponat daxil olub. 2019-cu ilin may ayınadək, ümumilikdə, 5 eksponat təqdimatı keçirilib. Vurğulanıb ki, qısa müddətdə 400-dən artıq eksponatın toplanması, bundan başqa, yanvar ayında Muğanlı kənd tam orta məktəbinin müəllim və şagirdləri tərəfindən Şərur Rayon Tarix-Diyarşünaslıq Muzeyinə 75 eksponatın təqdim olunması, ümumtəhsil məktəblərində zəngin mədəni irsimizin yaşadılması və gələcək nəsillərə çatdırılması ilə bağlı aparılan maarifləndirici tədbirlərin nəticəsidir.

Kəngərli rayon Qarabağlar kənd 1 nömrəli tam orta məktəbin direktoru Dilguşə Qurbanova, Naxçıvan Qızlar Liseyinin IX sinif şagirdi Nərmin Abbasova aksiyanın böyük maraq doğurduğunu və eksponatların toplanmasının mədəni irsimizin qorunması baxımından əhəmiyyətli olduğunu bildiriblər. Tədbirdə “Tariximizi qoruyaq və yaşadaq” devizi altında keçirilmiş aksiyada fəal iştirak edənlər “Ən fəal təhsil şöbəsi”, “Ən fəal məktəb”, “Ən fəal müəllim” və “Ən fəal şagird” nominasiyaları üzrə diplom və hədiyyə ilə mükafatlandırılıblar. Cəlil Məmmədquluzadənin 150 illik yubileyi münasibətilə Texniki Yaradıcılıq Mərkəzinin dərnək rəhbəri Natiq Yusifovun ağac üzərində oyma-yanma üsulu ilə hazırladığı portret Cəlil Məmmədquluzadənin ev-muzeyinə hədiyyə edilib. Sonda toplanmış eksponatlardan ibarət sərgiyə baxış olub.

Naxçıvan Muxtar Respublikası
Mədəniyyət Nazirliyinin Mətbuat Xidməti
15.05.2019



      Almaniyalı naşir Holger Kretzschmar muxtar respublikada səfərdə olub. Səfər zamanı naşir bir sıra tarixi abidələri, muzeyləri, səhiyyə müəssisələrini ziyarət edib.

Qeyd edək ki, almaniyalı naşirin muxtar respublikaya səfərində məqsəd çap edəcəyi kitablarda Azərbaycana, xüsusi ilə Naxçıvan Muxtar Respublikasına geniş yer vermək, Avropanın bir çox ölkələrində tanıtmaq və təbliğ etməkdən ibarətdir. Naşir səfəri çərçivəsində Duzdağ Fizioterapiya Mərkəzində, Azərbaycanın incisi adlandırılan Ordubadda, Əshabi-Kəhf Dini-Mədəni Abidə Kompleksində və digər gəzməli-görməli yerlərdə olub, muxtar respublikanın qədim tarixi, mədəniyyəti, adət-ənənələri haqqında məlumatlar əldə edib, fotoşəkillər çəkib.

Holger Kretzschmar təəssüratlarını bölüşərək Naxçıvana gəlməyindən məmnunluğunu, bu yerlərin təbiətindən, zəngin mədəni irsindən, tarixi abidələrindən təəsirləndiyini və heyran qaldığını bildirib. O, Naxçıvanla bağlı çap edilməsi planlaşdırılan kitabların sentyabr, oktyabr və noyabr ayları ərzində hazırlanaraq mağazalara təqdim olunacağını xəbər verib.

Naxçıvan Muxtar Respublikası
Mədəniyyət Nazirliyinin Mətbuat Xidməti
15.05.2019



      Mayın 14-də M.T.Sidqi adına Naxçıvan Dövlət Kukla Teatrı sənətşünaslıq üzrə fəlsəfə doktoru Ələkbər Qasımovun görkəmli uşaq yazıçısı Abdulla Şaiqin “Tülkü həccə gedir” əsərinin motivləri əsasında yazdığı “İnanmayaq tülkülərə” tamaşasını Ordubad Rayon Mədəniyyət Sarayında uşaq və məktəblilərə göstərmişdir.

Tamaşanın nümayişindən əvvəl M.T.Sidqi adına Naxçıvan Dövlət Kukla Teatrının bədii rəhbər-direktoru, Azərbaycan Respublikasının Xalq artisti Şirzad Abutalıbov çıxış edərək uşaq və məktəblilərin sevimli teatrı haqqında onlara qısa məlumat verib. Bildirilib ki, teatr yarandığı dövrdən uşaq və məktəblilərin zövqünü oxşayan tamaşalar hazırlamış, onların estetik zövqünü formalaşdırmış, mənəvi-etik prinsipləri əsas tutmuşdur. Teatrın son illərdə hazırladığı “Göyçək Fatma”, “Qırmızı papaq”, “Qoğalın sərgüzəşti”, “Qırmızı, yaşıl, mavi” və başqa tamaşalar balaca tamaşaçılar tərəfindən maraqla qarşılanıb.

Qeyd edilib ki, teatr bu ilin payızında yaradılmasının 30 illiyini qeyd edəcəkdir.

Sonra “İnanmayaq tülkülərə” tamaşası nümayiş etdirilib. Bir çox nağıl-pyeslərin əsas surəti tülkü burada da hiyləgərliyi, xudpəsəndlik və riyakarlığı ilə seçilir. Tamaşanın dili sadə, maraqlı və cəlbedicidir. Tamaşada alleqoriyadan istifadə edilərək hadisələr uşaqların anlayacağı dildə göstərilir. Uşaq tamaşalarının hamısında olduğu kimi, burada əsas əxlaqi-tərbiyəvi məsələlər ön plana çəkilmişdir. Tamaşada ilıq yumor və təbii gülüş olduğu üçün Abdulla Şaiqin bu əsəri həmişə diqqəti cəlb edib. Tülkünün maraqlı sərgüzəşti, əxlaqi nəticə uşaqlara asanlıqla çatdırılır.

Tamaşa kuklalarla hazırlandığı üçün xüsusilə azyaşlı uşaqlar tərəfindən maraqla baxılır. Tülkü surətləri, Mərcan Xoruz, Məstan Xoruz, Ağ toyuq, Cil toyuq, Cücələr və başqa alleqorik personajlar uşaqlar tərəfindən maraqla qarşılanır. Folklorumuzun zənginliyini, müdrikliyini göstərmək baxımından tamaşa maraq doğurur.

Qeyd edək ki, teatrın aktyorları İlqar Babayev, Ləman Əhmədova, Əfqanə Ələsgərova, Süleyman Süleymanov, İlham Babayev Ulduz Süleymanova, Vəsmə Quliyeva, İbad Nəbiyev, Arzu Səfərov nağıl qəhrəmanlarını təbii və səmimi səsləndiriblər.

Tamaşanın quruluşçu rejissoru Naxçıvan Muxtar Respublikasının Əməkdar mədəniyyət işçisi Nadir Hüseynov, rəssamı Ədalət Quliyev, musiqi tərtibatçısı Əli Məmmədovdur.

Tamaşa uşaqlar tərəfindən maraqla qarşılanıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
14.05.2019



      Mayın 14-də Naxçıvan Muxtar Respublikası Mədəniyyət Nazirliyinin Tədbirlər Planına əsasən Naxçıvan Muxtar Respublikası Mədəniyyət Nazirliyinin hamiliyinə verilmiş ixtisaslarda təhsil alan tələbələr üçün “Əlincəqala” Tarix-Mədəniyyət Muzeyi və Qazançı körpüsünə ekskursiyalar təşkil edilmişdir.

Ekskursiyada Naxçıvan Dövlət Universitetinin, Naxçıvan Müəllimlər İnstitutunun və Naxçıvan Musiqi Kollecinin tələbələri iştirak etmişdir.

Ekskursiya iştirakçıları ilk olaraq “Əlincəqala” Tarix-Mədəniyyət Muzeyinə baxış keçirmişdir. Gənclərə muzey haqqında ətraflı məlumat verilərək qeyd edilmişdir ki, “Əlincəqala” Tarix-Mədəniyyət Muzeyi Naxçıvan Muxtar Respublikası Ali Məclisi Sədrinin “Culfa rayonundakı “Əlincəqala” tarixi abidəsinin bərpa edilməsi haqqında” 2014-cü il 11 fevral tarixli Sərəncamı ilə yaradılmışdır. Muzey ekspozisiya zalından və iki iş otağından ibarətdir. Muzey fondunda ümumilikdə 250-dən artıq eksponat vardır ki, bunlardan 167-si muzeyin ekspozisiya zalında sərgilənir.

Bildirilmişdir ki, Əlincəqala muxtar respublika ərazisində qeydiyyata alınmış dünya əhəmiyyətli daşınmaz tarix və mədəniyyət abidələri sırasındadır. Bu qala orta əsrlərdə Azərbaycanda fəaliyyət göstərmiş dövlətlərin tarixində əvəz olunmaz rol oynamışdır.

Sonra gənclər ekspozisiya zalında “Əlincəqala” tarixi abidəsinin bərpadan əvvəl, bərpa zamanı və bərpadan sonrakı fotoşəkilləri, vitrinlərdəki “Naxçıvan tarixi” çoxcildliyi, “Naxçıvan Abidələri Ensiklopediyası”, “Naxçıvan tarixi atlası” kitabları, həmçinin Əlincəqalanın tarixi ilə bağlı yazılmış kitab, məqalə və qəzet materialları ilə tanış olmuşlar.

Gənclər muzeyi gəzdikdən sonra “Əlincəqala” tarixi abidəsi ilə də tanış olmuş və qalanın zirvəsinə qalxaraq möhtəşəm təbiət mənzərəsini izləmişlər.

Həmin günün davamında ekskursiya iştirakçıları Qazançı körpüsüylə tanışlıq üçün yola düşmüşlər.

Ekskursiya iştirakçılarına Qazançı körpüsünün tarixi haqqında geniş məlumat verilmişdir. Qeyd olunmuşdur ki, Qazançı körpüsü Qazançı kəndindən şimalda Əlincəçay üzərində inşa edilmiş tarix-memarlıq abidəsidir. Körpü XVI-XVII əsrlərdə Şərq memarlıq üslubunda tikilmişdir. Xalqa arasında bu körpü “Qozbel körpü” adı ilə tanınır.

Nəzərə çatdırılmışdır ki, körpü zaman keçdikcə təbii qüvvələrin təsirindən, baxımsızlıqdan aşınmalara məruz qalmış, bəzi yerləri uçub dağılmışdı. Naxçıvan Muxtar Respublikası Ali Məclisinin Sədri cənab Vasif Talıbovun tarix və mədəniyyətimizə göstərdiyi yüksək qayğı nəticəsində 2018-ci ilin iyul ayından Qazançı körpüsündə bərpa işlərinə başlanılmış, 2018-ci il noyabrın 30-da körpü istifadəyə verilmişdir.

Ekskursiya zamanı gəncləri maraqlandıran suallar ətraflı şəkildə cavablandırılmış və ekskursiya başa çatmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
14.05.2019



      Mayın 14-də Sədərək Rayon Mədəniyyət Sarayında Naxçıvan Musiqi Kollecinin “Gənclik” İnstrumental Ansamblının konserti olmuşdur.

Konsertdən əvvəl aparıcı qeyd etmişdir ki, Naxçıvan Musiqi Kolleci ümummilli lider Heydər Əliyevin təşəbbüsü və tapşırığı ilə 1974-cü ildə yaradılmışdır. Hazırda kollecdə 10-dan çox ixtisas üzrə kadr hazırlığı aparılır. Naxçıvan Muxtar Respublikası Ali Məclisi Sədrinin Sərəncamlarına əsasən bu təhsil ocağının 30 və 40 illik yubileyləri dövlət səviyyəsində qeyd olunmuşdur. Bu illər ərzində kollecdə milli musiqi alətlərimizin və xalq mahnılarımızın yaşadılması, eləcə də klassik və müasir dünya bəstəkarlarının öyrənilməsi, gənc musiqiçi kadrlarının yetişdirilməsi sahəsində uğurlar əldə edilmişdir. Bildirilmişdir ki, kollecdə təhsil alan tələbələrdən ibarət musiqi kollektivləri maraqlı konsert proqramları ilə müntəzəm olaraq ictimaiyyət qarşısında çıxış edirlər. Bu gün sizin görüşünüzə “Gənclik” İnstrumental Ansamblı maraqlı konsert proqramı ilə gəlimişdir. Ansamblın bədii rəhbəri Sahil Qasımovdur.

Sonra konsert proqramı başlamışdır və ilk olaraq ansamblın ifasında şən musiqi kompozisiyaları səslənmişdir. Ansamblın gənc solistləri Samir İsmayılov, Əfsanə Babayeva, İlkin İsmayılovun ifasında görkəmli bəstəkarlarımız Emin Sabitoğlunun “Al məndən”, Oqtay Rəcəbovun “İndi günah nə səndədir nə məndə”, Nüşabə Muradovanın “Dinlə məni sevgilim”, Ramiz Mirişlinin “Naxçıvan təranələri”, "Səadət", Firəngiz Babayevanın “Gecə yaman uzundur”, Nəriman Məmmədovun “Qəlbimdə qaldı hicran”, Ələkbər Tağıyevin “Düz bir ildir”, “Sənin gülüşün”, “Dinə bilmədim”, mahnıları və başqa bəstəkarların musiqi əsərləri səslənmişdir. Sonra solistlər yeni bəstəkar mahnılarını da ifa etmişlər. Konsert şən və lirik musiqi kompozisiyası ilə başa çatmışdır.

Bir saatdan çox davam edən konsert Sədərək rayon sakinləri tərəfindən maraqla qarşılanmış və onlarda xoş əhval-ruhiyyə yaratmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
14.05.2019



      Mayın 14-də M.S.Ordubadi adına Naxçıvan Muxtar Respublika Kitabxanasında “Naxçıvan Muxtar Respublikasının xüsusi mühafizə olunan təbiət əraziləri” adlı kitabın müzakirəsi keçirilmişdir.

Kitabxananın direktoru Tamella Əsgərova tədbiri giriş sözü ilə açaraq qeyd etmişdir ki, ölkəmizdə ötən əsrin 70-ci illərindən başlayaraq ulu öndər Heydər Əliyevin rəhbərliyi illərində ekoloji məsələlərə diqqət artırılmış, bu sahədə qanunvericilik bazası formalaşdırılmış, ekoloji fəaliyyətin istiqamətləri müəyyənləşdirilmişdir. Bildirilmişdir ki, dahi şəxsiyyətin müəyyənləşdirdiyi ekoloji strategiya Naxçıvan Muxtar Respublikasında uğurla davam etdirilir. Naxçıvan Muxtar Respublikası Ali Məclisi Sədrinin həyata keçirdiyi uğurlu siyasət, sosial-iqtisadi inkişaf, ekoloji strategiya xüsusi mühafizə olunan təbiət ərazilərinin daha da inkişaf edəcəyinə və təkmilləşəcəyinə əsas verir. Aparılan tədbirlər nəticəsində ekoloji mühit yaxşılaşdırılmış, biomüxtəlifliyin qorunması üçün ətraf mühitdə olan neqativ təsirlər minimuma endirilmiş, iqtisadi inkişafda müasir texnologiyalar tətbiq edilmiş,alternativ enerji mənbələrindən istifadəyə üstünlük verilmişdir ki, bu da xüsusi mühafizə olunan təbiət ərazilərində nəsli kəsilməkdə olan flora və fauna növlərinin qorunmasına və gələcək nəsillərə çatdırılmasına imkan yaratmışdır.

Naxçıvan Muxtar Respublikası Ekologiya və Təbii Sərvətlər Nazirliyinin baş məsləhətçisi Əmrullah Quliyev Naxçıvan Muxtar Respublikasında mövcud olan xüsusi mühafizə olunan təbiət əraziləri haqqında ümumi məlumat verərək, onların əhəmiyyətindən və inkişafından danışmışdır.

M.S.Ordubadi adına Naxçıvan Muxtar Respublika Kitabxanasının elmi işlər üzrə direktor müavini Yeganə Rüstəmova kitabda adı çəkilən xüsusi mühafizə ounan təbiət ərazilərindən “Ordubad Milli Parkı” və “Ordubad Dövlət Təbiət Yasaqlığı” haqqında məlumat vermişdir. Qeyd olunmuşdur ki, Akademik Həsən Əliyev adına Ordubad Milli Parkının yaradılmasında məqsəd ətraf mühitin mühafizəsi, ondan səmərəli istifadə edilməsi, nadir və nəsli kəsilməkdə olan bitki və heyvan növlərinin qorunub saxlanılması, ekoturizmin inkişaf etdirilməsi və əhalinin ekoloji cəhətdən maarifləndirilməsinin təmin edilməsidir. Parkda 217 növ və yarımnöv quşlara, 32 növ məməli heyvana, yırtıcılardan canavar, çaqqal, adi tülkü, zolaqlı kaftar, daşlıq dələsi, meşə pişiyinə rast gəlinir. Muxtar Respublikada bitən 110 növ bitkidən 77 növü parkın ərazisində mövcuddur. Milli parkın tutduğu ərazi ekoturizmin, kənd turizminin inkişafı üçün də çox əlverişlidir. “Ordubad Dövlət Təbiət Yasaqlığı”nın ərazisində bitki aləminin zənginliyi, çoxsaylı heyvanların yaşamasına imkan yaratmışdır. Yasaqlıq Naxçıvan Muxtar Respublika ərazisində yaradılan ilk xüsusi mühafizə olunan ərazidir.

M.S.Ordubadi adına Naxçıvan Muxtar Respublika Kitabxanasının komplektləşdirmə şöbəsinin müdiri Rahilə Məmmədova çıxışında qeyd etmişdir ki, “Şahbuz Dövlət Təbiət Qoruğu”nun yaradılmasında əsas məqsəd bu region üçün səciyyəvi olan nadir təbiət komplekslərini, fauna və floranı təbii vəziyyətdə qoruyub saxlamaq, təbiət proseslərinin və hadisələrinin gedişini öyrənmək, təbiəti mühafizə və elmi tədqiqat işlərinin aparılmasından ibarətdir. Həmçinin qeyd etmişdir ki, qoruğun ərazisində 65 növ boyaq bitkisi, 111 növ nadir və məhvolma təhlükəsi altında olan bitkilər, 150 növdən artıq dərman bitkisi mühafizə olunur.

Akademik Həsən Əliyev adına “Zəngəzur Milli Parkı”nın yaradılmasında əsas məqsəd isə ərazi üçün xarakterik olan fauna və flora növlərinin qorunması, artırılması və zənginləşdirilməsi, yüksək dağlıq ərazilərdə yerləşən otlaqlar ekosisteminin bərpası, elmi-tədqiqat işlərinin aparılması, ətraf mühitin monitorinqi, əhalinin ekoloji cəhətdən maarifləndirilməsi və turizm potensialı olan ərazidə ekoturizmin inkişafının təmin edilməsidir.

M.S.Ordubadi adına Naxçıvan Muxtar Respublika Kitabxanasının kütləvi iş şöbəsinin müdiri Nərmin Allahverdiyeva “Arazboyu Dövlət Təbiət Yasaqlığı” və “Arpaçay Dövlət Təbiət Yasaqlığı” haqqında məlumat vermişdir. Qeyd etmişdir ki, Naxçıvan Muxtar Respublikası Ali Məclisi Sədrinın 2005-ci il 23 sentyabr taixli Sərəncamı ilə yaradılan “Arazboyu Dövlət Təbiət Yasaqlığı”nın yaradılmasında əsas məqsəd Naxçıvan Muxtar Respublikasının Arazboyu ərazisində təbiət komplekslərinin və ya onların komponentlərinin qorunması, bərpası, ekoloji tarazlığın saxlanılması,ətraf mühitin mühafizəsi,ondan səmərəli istifadə edilməsi, nadir və nəsli kəsilməkdə olan flora və fauna növlərinin, tarixi-mədəniyyət, arxeoloji və memarlıq abidələrinin qorunub saxlanılmasından ibarətdir. Muxtar respublika ərazisində mövcud olan 241 növ və yarımnöv quşların 85-faizindən çoxu məhz, bu ərazılərdə məskunlaşmışdır. Yasaqlıq ərazisində meşə ehtiyatlarının artması, mühafizə tədbirlərinin gücləndirilməsi, burada fauna ehtiyatlarının, xüsusilə quşların sayının və növ tərkibinin artmasına da şərait yaratmışdır. Son 13 ildə yasaqlıq ərazisində 10 yeni quş növü aşkar edilmişdir.

“Arpaçay Dövlət Təbiət Yasaqlığı” Naxçıvan Muxtar Respublikası Ali Məclisi Sədrinin 2009-cu il 22 iyun tarixli Fərmanı ilə Naxçıvan Muxtar Respublikasının Şərur, Kəngərli, Babək, Şahbuz rayonlarının inzibati ərazilərində yaradılmışdır. Bu ərazi ətraf mühitin mühafizəsi və ondan səmərəli istifadə edilməsi, nadir endemik və nəsli kəsilmək təhlükəsi altında olan flora və fauna növlərinin, tarixi mədəniyyət, arxeoloji və memarlıq abidələrinin qorunub saxlanılması məqsədi ilə yaradılmışdır.

Tədbirin sonunda tədbir iştirakçıları kitab haqqında öz fikirlərini bildirmişlər.

Naxçıvan Muxtar Respublikası
Mədəniyyət Nazirliyinin Mətbuat Xidməti
14.05.2019



      Mayın 13-də Babək Rayon Mədəniyyət Sarayında Naxçıvan Dövlət Filarmoniyasının Muğam studiyası tərəfindən Naxçıvan Muxtar Respublikasının yaradılmasının 95 illiyinə həsr olunmuş muğam konserti keçirilmişdir.

Konsertin aparıcısı qeyd etmişdir ki, Naxçıvan Muxtar Respublikası Ali Məclisi Sədrinin 21 yanvar 2019-cu il tarixli Sərəncamına əsasən “Naxçıvan Muxtar Respublikasının 95 illik yubileyinə həsr olunmuş Tədbirlər Planı” təsdiq edilmiş, Tədbirlər Planında muxtar respublikanın 95 illik yubileyinin geniş qeyd edilməsi ilə bağlı müxtəlif silsilə tədbirlərin keçirilməsi nəzərdə tutulmuşdur.

Azərbaycan xalqının ümummilli lideri Heydər Əliyevin Azərbaycana rəhbərlik etdiyi dövrdə Naxçıvanla bağlı verdiyi sərəncamlar, bu diyara tarixi səfərləri, ərazi bütövlüyü və təhlükəsizliyi üçün həyata keçirdiyi tədbirlər muxtariyyət statusunun hüquqi cəhətdən möhkəmləndirilməsi və taleyüklü digər məsələlərin yerinə yetirilməsi Naxçıvanın hərtərəfli inkişafını təmin etməklə onu çiçəklənən, günü-gündən müasirləşən bir diyara çevirmişdir.

Muğam sənəti Azərbaycan xalqının bədii yaradıcılığının və musiqi mədəniyyətinin zəngin sərvəti olmaqla nadir sənət nümunəsidir. Muğam xalqımızın dünya mədəni irsinə bəxş etdiyi ən böyük xəzinədir. Muğam sənətimizdə xalqımızın təfəkkürü və düşüncə tərzi öz əksini tapır. 2002-ci ildə UNESKO tərəfindən muğam sənəti “Bəşəriyyətin qeyri-maddi mədəni irsi reprezentativ siyahısı”na daxil edilmişdir.

Qeyd edək ki, maraqlı konsert proqramı ilə ictimaiyyət qarışında çıxış edən Naxçıvan Dövlət Filarmoniyasının Muğam studiyasının bədii rəhbəri İlqar Hüseynovdur. 2016-cı ilin sentyabrından fəaliyyətə başlayan “Muğam” studiyasının konsertləri ictimaiyyət tərəfindən maraqla qarşılanır. Studiyanın əsas məqsədlərindən biri də gənc muğam ifaçılarını aşkara çıxarmaq və onları tanıtmaqdır.

Kollektivin gənc muğam ifaçıları çalışır ki, bu qüdrətli musiqini yüksək səviyyədə muğam həvəskarlarına çatdırsınlar. Muğam konsertində ilk olaraq Məhərrəm Quliyev “Şur” təsnifi və musiqisi Əlibaba Məmmədova məxsus olan “Söylə” əsərini səsləndirmişdir. Sonra ansamblın üzvlərindən Habil Qasımov tərəfindən “Rast” və “Şur” təsnifləri, Nərmin Hüseynova tərəfindən “Dilkeş” təsnifi, Bəhruz Quliyev tərəfindən Qulu Əsgərovun “İlk eşqim” əsərləri ifa edilmişdir. Onların ifasında səslənən muğam və təsniflərimiz alqışlarla qarşılanmışdır.

Konsertin davamında Naxçıvan Muxtar Respublikasının Əməkdar artisti Xatirə Səfərovanın ifasında “Dilkeş” təsnifi, Naxçıvan Muxtar Respublikasının Əməkdar artisti Hünər Əliyevin ifasında “Zabul” təsnifi və xalq mahnıları səsləndirilmişdir. Tədbirdə ifa edilən muğam əsərləri poeziyamızın və muğamımızın vəhdətini, söz-sənət xəzinəmizin zənginliyini bir daha əks etdirmişdir.

“Muğam” studiyasının bir saatdan artıq davam edən konserti Babək rayon sakinlərində xoş ovqat yaratmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
13.05.2019



      Mayın 13-də “Milli filmlərimiz” adlı kinoviktorinanın yarımfinal mərhələsi keçirilib. Ötən ilin oktyabr ayından başlanan və aprel ayında başa çatan kinoviktorinanın seçim turlarına əsasən, 8 komanda yarımfinala vəsiqə qazanıb. Naxçıvan şəhər 15, Şərur şəhər 2, Şahbuz şəhər 1, Culfa rayon Yaycı kənd 1, Sədərək rayon Sədərək kənd 2 nömrəli, eləcə də Babək rayon Kərimbəyli, Ordubad rayon Nüsnüs, Kəngərli rayon Böyükdüz kənd tam orta məktəblərinin komandaları kinoviktorinanın yarımfinal mərhələsində milli kinomuzla bağlı biliklərini sınayıblar.

Beləliklə, yarımfinal mərhələsində ən yüksən bal toplayan 4 komanda - Naxçıvan şəhər 15, Şərur şəhər 2, Sədərək rayonu Sədərək kənd 2 və Culfa rayonu, Yaycı kənd 1 nömrəli tam orta məktəblərin komandaları finalda yarışmaq hüququ qazanıblar.

Qeyd edək ki, “Milli kinomuz” adlı kinoviktorina Naxçıvan Muxtar Respublikası Gənclər Fondunun, Naxçıvan Dövlət Film Fondunun və Naxçıvan Muxtar Respublika rayon və şəhər təhsil şöbələrinin birgə təşkilatçılığı ilə keçirilib. 5-9 sinif şagirdlərindən ibarət komandaların iştirak etdiyi kinoviktorinada komanda üzvlərinə 5 mövzu üzrə suallar ünvanlanıb. Ən çox bal toplayan komandalar yarımfinal və final mərhələlərinə vəziqə qazanıblar. Kinoviktorinanın keçirilməsində əsas məqsəd milli kinomuzun təbliği, məktəblilərin kinofilmlərə olan marağının artırılması və onların kino biliklərinin yoxlanmasından ibarətdir.

Naxçıvan Muxtar Respublikası
Mədəniyyət Nazirliyinin Mətbuat Xidməti
13.05.2019



      Azərbaycan milli teatr tarixinə parlaq və şərəfli səhifələr yazmış Naxçıvan teatrının yaradılmasından 136-cı ildönümü tamam olur. Mayın 11-də bu münasibətlə C.Məmmədquluzadə adına Naxçıvan Dövlət Musiqili Dram Teatrında tədbir keçirilib.

Tədbiri Naxçıvan Muxtar Respublikası Mədəniyyət Nazirliyinin teatrın inkişafı və dövlət əhəmiyyətli tədbirlərin təşkili üzrə baş məsləhtçisi Xalq artisti Kamran Quliyev açaraq bu sənət ocağının keçdiyi inkişaf yolundan danışıb. Bildirilib ki, ölkəmizdə gedən teatr hərəkatının həmişə önündə gedən Naxçıvan teatrı zamanın ağır sınaqlarından çıxaraq xalqımızın mənəvi təkamülündə, estetik şüurunun formalaşmasında, milli şüurun oyanışında, çətin və mürəkkəb dövlətçilik yolunda, dünya mədəniyyəti nümunələrinin mənimsənilməsində, zaman və şəxsiyyət problemlərinin müxtəlif istiqamətlərdə açıqlanmasında əhəmiyyətli rol oynamışdır.

Naxçıvan teatrı həmişə insanlarımızı işıqlı amallar uğrunda səfərbər edə bilmiş, milli dirçəliş və oyanışın carçısına çevrilmişdir. Teatrımız heç zaman məhdud sənət çərçivəsində qalmamış, böyük bəşəri və milli məsələləri paralel olaraq səhnəyə gətirməklə tamaşaçı sevgisi qazanmışdır. Naxçıvan teatrının inkişafına fədakarlıqla xidmət etmiş sənətkarlar bu gün də xatırlanır, onların mənəvi irsi öyrənilir.

Qeyd olunmuşdur ki, Azərbaycan teatrının, o cümlədən Naxçıvan teatrının əsaslı inkişafı, teatrlarımızın yaradıcılıq axtarışlarının genişləndirilməsi ümummilli lider Heydər Əliyevin adı ilə bağlıdır. Ümummilli lider Heydər Əliyev Naxçıvan teatrına yüksək qiymət verərək deyirdi: “Mən həmişə Naxçıvan teatrı ilə, onun repertuarı ilə, rejissor və aktyorların vəziyyəti ilə maraqlanmışam. Naxçıvan teatrı köklü, əsaslı bir teatrdır. Yaxın Şərqin ən qocaman sənət ocaqlarından biri olan Naxçıvan teatrı böyük yaradıcılıq yolu keçmişdir. Teatr bu ənənəni bu gün də qoruyub saxlayır”.

Vurğulanmışdır ki, müasir dövrümüzdə Naxçıvan Muxtar Respublikasında teatrların fəaliyyətinə hərtərəfli qayğı göstərilir. Son illər muxtar respublikada teatrların maddi-texniki bazasının möhkəmləndirilməsi istiqamətində ardıcıl tədbirlər həyata keçirilmiş, teatr binalarının hamısı yenidən qurulmuş və ya əsaslı təmir olunaraq istifadəyə verilmişdir. Naxçıvan Muxtar Respublikası Ali Məclisinin Sədri Vasif Talıbov qədim diyarımızda teatr ənənələrinin inkişafından danışarkən demişdir: “Naxçıvan teatrı fəaliyyət göstərdiyi bütün dövrlərdə mütərəqqi ideyaları dəstəkləmiş, günün aktual məsələlərinə nüfuz etmiş, xalqın milli oyanışına çalışmışdır”.

Müstəqillik illərində Naxçıvan Dövlət Musiqili Dram Teatrının yaradıcılıq axtarışları, qastrol səfərləri genişlənmiş, kollektiv milli dəyərlərimizin daşıyıcısına çevrilmişdir. Teatrımızın müstəqillik illərində hazırladığı “Nadir şah”, “Atabəylər”, “Topal Teymur”, “Pompeyin Qafqaza yürüşü”, “Məhsəti”, “Qönçəbəyimin nəğməsi”, “Mirzə Cəlil taleyi”, “Əlincə qalası”, “Ağa Məhəmməd şah Qacar”, “Koroğlunun Çənlibelə qayıdışı”, “Qurtuluş dastanı”, “Araz sahilində doğan günəş”, “Qılınc və qələm”, “Əli və Nino”, “Xəyyam”, “Ehsan xan Kəngərli” və başqa tamaşalar teatrımızın yaradıcılıq axtarışlarının nəticəsi və tarixi mövzulara marağının göstəricisidir.

Qeyd olunmuşdur ki, muxtar respublikada teatr sənətinə bağlı insanların əməyi də dövlətimiz tərəfindən yüksək qiymətləndirilir. Yaradıcı insanlar Azərbaycan Respublikasının və Naxçıvan Muxtar Respublikasının fəxri adlarına, orden və medallara, Prezident təqaüdü və mükafatlarına layiq görülmüşdür.

Naxçıvan teatrı həmişə xalqa xidmət etmiş, mütərəqqi ideyaların daşıyıcısı və təbliğatçısı olmuşdur. Milli oyanış və dirçəlişin carçısı olan Naxçıvan teatrı bundan sonra da bu sahədə öndə gedəcək, milli ruhu yaşadacaq, dövlətçiliyə xidmət edəcək əsərləri səhnəyə gətirməklə mənəvi-estetik prinsipləri əsas götürməklə, dövlət və xalq birliyinin sarsılmazlığını nümayiş etdirən tamaşalarla insanları sevindirəcəkdir.

Kamran Quliyev çıxışının sonunda Naxçıvan teatrının yaradılmasının 136-cı ildönümü münasibətilə bütün teatrsevərləri və teatr xadimlərini təbrik etmiş, teatrın inkişafına və sənət adamlarına göstərilən diqqət və qayğıya görə Naxçıvan Muxtar Respublikası Ali Məclisi Sədrinə minnətdarlığını bildirmişdir.

Tədbirin sonunda Xaqani Əliyevin “Ehsan xan Kəngərli” tarixi dramı göstərilmişdir. “Ehsan xan Kəngərli” tarixi dramı XIX əsrin əvvəllərində Naxçıvan xanlığında baş verən ictimai-siyasi hadisələri əks etdirir. Rusiya-İran müharibəsi və Naxçıvanın ruslar tərəfindən işğal olunması əsərin əsas süjet xəttini təşkil edir.

“Ehsan xan Kəngərli” tamaşasında Naxçıvan xanlığının düşdüyü çətin vəziyyətdən çıxış yolu axtaran Ehsan xanın siyasi düşüncələri və xüsusən ermənilərin Naxçıvana yerləşdirilməsinin qarşısını almaq üçün rus diplomatı Aleksandr Sergeyeviç Qriboyedovla apardığı söhbətlər olduqca maraq doğurur. Naxçıvanın gələcək taleyi ilə bağlı Kəngərli xanları arasında yaranan fikir ayrılığı və Ehsan xanın təşəbbüsü ələ alaraq xalqın taleyini hər şeydən üstün tutması əsərdə konfliktin gərginliyini daha da artırır.

Tamaşada Ehsan xanla yanaşı, Abbasqulu ağa Bakıxanovun da bədii obrazı diqqəti cəlb edir. Bakıxanov erməni fitnələrinin qarşısını almaq üçün Ehsan xana çıxış yolu tapmaqda kömək edir.

“Ehsan xan Kəngərli” tamaşasında dövrün ictimai-siyasi hadisələri faktlarla səhnəyə gətirilir ki, bu da tamaşaçını cəlb edir.

Bu maraqlı tamaşanın elmi məsləhətçisi akademik İsmayıl Hacıyev, quruluşçu rejissoru, Xalq artisti Kamran Quliyev, quruluşçu rəssamı, Naxçıvan Muxtar Respublikasının Əməkdar rəssamı Əbülfəz Axundov, musiqi tərtibatçısı Azərbaycan Respublikasının Əməkdar mədəniyyət işçisi İmamqulu Əhmədovdur.

Tamaşada Azərbaycan Respublikasının Xalq artistləri Rza Xudiyev (Ehsan xan), Rövşən Hüseynov (Kalbalı xan), Həsən Ağasoy (Kərim xan), Azərbaycan Respublikasının Əməkdar artistləri Bəhruz Haqverdiyev (Şıxəli bəy), Əli Əliyev (Paskeviç), Əbülfəz İmanov (Safraz Saakov), aktyorlar Zəminə Məmmədova (Çimnaz xanım), Ələsgər Quliyev (Nəzərəli xan), Səyyad Məmmədov (Qriboyedov), Zakir Fətəliyev (Məmmədrza xan), Anar Eyvazov (rus zabiti), Nazlı Hüseynquliyeva (yaşlı qadın), Mehri Nəbiyeva (Nina Çavçavadze) maraqlı obraz və personajlar yaratmışlar.

Tamaşa teatrsevərlər tərəfindən maraqla qarşılanmışdır.

Naxçıvan Muxtar Respublikası
Mədəniyyət Nazirliyinin Mətbuat Xidməti
13.05.2019



      Azərbaycan Respublikasının Prezidenti İlham Əliyevin 2019-cu il 10 may tarixli Sərəncamı ilə səhnə fəaliyyəti ilə bağlı aparıcı incəsənət xadimlərinə Azərbaycan Respublikası Prezidentinin mükafatları verilmişdir. Təltif olunanlar arasında Naxçıvan Muxtar Respublikasının incəsənət xadimləri də vardır.

Babayev Zeynalabdin Abdulla oğlu
Babayeva Stella Rza qızı
Bağırov Tamerlan Kamal oğlu
Hüseynova Gülnarə Hüseyn qızı
Mahmudov Zülfüqar Xudaverdi oğlu
Məmmədov Əbülfəz Səid oğlu
Məmmədov Natiq Hidayət oğlu
Məmmədov Səyyad Çapay oğlu
Nuriyev Nurlan Nurməmməd oğlu
Süleymanova Ulduz İbrahim qızı


Naxçıvan Muxtar Respublikası
Mədəniyyət Nazirliyinin Mətbuat Xidməti
11.05.2019



      Naxçıvan şəhərindəki Heydər Əliyev Muzeyi ilə muxtar respublikanın ümumtəhsil məktəbləri arasında “Heydər Əliyev və müstəqil Azərbaycan” mövzusunda interaktiv dərs keçilib.

Dərsdə muzeyin direktoru, Əməkdar mədəniyyət işçisi Ramil Orucəliyev bildirib ki, dahi şəxsiyyətin Azərbaycan naminə fəaliyyətinin 1990-cı ildən sonrakı mərhələsi şərəfli xilaskarlıq və quruculuq missiyası ilə zəngindir. Bu missiyanın öz başlanğıcını götürdüyü yer isə Azərbaycanın Naxçıvan Muxtar Respublikasıdır. Xalqımızın böyük oğlunun 1990-cı il iyul ayının 22-də Naxçıvana qayıdışı Azərbaycanın qurtuluş tarixinin parlaq səhifəsidir. Bu böyük şəxsiyyətin Azərbaycan və Naxçıvan parlamentlərinin deputatı, sonralar isə Naxçıvan Muxtar Respublikasının rəhbəri kimi fəaliyyət göstərməsi Naxçıvandan başlanan müstəqillik yolunun bütün Azərbaycan siyasi mühitində aparıcı qüvvəyə çevrilməsi və milli dövlətçiliyin bərpası istiqamətində qəti addımların atılması ilə nəticələnmişdir.

Bildirilib ki, 1993-cü ildə xalqın təkidli tələbi ilə yenidən hakimiyyətə qayıdan ulu öndər Heydər Əliyev Azərbaycanı dağılmaq və məhv olmaq təhlükəsindən qurtarıb, onun itirilməkdə olan müstəqilliyini qoruyub saxlayıb.

Bu gün ölkəmizin və muxtar respublikamızın sosial-iqtisadi, elmi və mədəni həyatında gedən proseslərin kökündə fəal yaradıcı gücə malik olan Heydər Əliyev milli dövlətçilik konsepsiyası, inkişafın Heydər Əliyev modeli dayanır. Fədakar əməyi ilə müstəqil Azərbaycan dövlətini yaradan, Azərbaycanı öz həyatının mənası bilən ulu öndərimizin xalqımız qarşısında xidmətləri unudulmazdır.

Dünya dövlətləri sırasında layiqli yerini tutan Azərbaycanın ulu öndərimiz tərəfindən müəyyənləşdirilən inkişaf xəttini hazırda ölkə başçısı cənab İlham Əliyev uğurla davam etdirir. Bu siyasi ideologiyaya sədaqətin nəticəsidir ki, Azərbaycanın hər bir bölgəsi inkişaf edir, quruculuq obyektlərinin sayı günbəgün artır, əhalinin yaşayış səviyyəsi yüksəlir. Muxtar respublikamız da bu gün özünün sürətli inkişaf dövrünü yaşayır.

Dərsi izləyənlər Heydər Əliyev Muzeyindəki eksponatlarla virtual şəkildə tanış olublar. Muzey haqqında şagirdlərə ətraflı məlumat verilib.

Qeyd edək ki, mayın 10-da bütün təhsil müəssisələrində bir dərs saatı da ümummilli lider Heydər Əliyevə həsr olunub.

Naxçıvan Muxtar Respublikası
Mədəniyyət Nazirliyinin Mətbuat Xidməti
11.05.2019



      Naxçıvan Muxtar Respublikası Rəssamlar Birliyinin Bəhruz Kəngərli adına Sərgi Salonunda ulu öndər Heydər Əliyevin 96-cı ildönümü ilə əlaqədar Naxçıvan Muxtar Respublikasının Əməkdar rəssamı Səyyad Bayramovun fərdi yaradıcılıq sərgisi keçirilib.

Naxçıvan Muxtar Respublikası Rəssamlar Birliyinin təşkilatçılığı ilə keçirilən tədbirdə birliyin sədri, Azərbaycan Respublikasının Əməkdar rəssamı Ülviyyə Həmzəyeva çıxış edərək bildirib ki, ümummilli lider Heydər Əliyev Azərbaycan incəsənətinin, bütövlükdə, mədəniyyətimizin rifahı naminə səmərəli işlər həyata keçirib. İncəsənət bugünkü inkişafında ulu öndərin çox dəyərli ideyalarından bəhrələnib.

Naxçıvan Muxtar Respublikasının Mədəniyyət naziri Natəvan Qədimova çıxış edərək Səyyad Bayramovun Naxçıvan teatrında, muxtar respublikada rəsm sənətinin inkişafında göstərdiyi xidmətlərindən danışıb.

Diqqətə çatdırılıb ki, 40-a yaxın tamaşaya tərtibat verən, rəssamlıq sənətinin digər janrlarında da uğurlu nümunələr yaradan, gənc rəssam kadrların yetişməsində yaxından iştirak edən Səyyad Bayramovun yaradıcı­lığı və əməyi dövlətimiz tərəfindən yüksək qiymətləndirilib.

Türkiyə Respublikasının Naxçıvandakı Baş konsulu Mehmet Emin Kiraz, Cəlil Məmmədquluzadə adına Naxçıvan Dövlət Musiqili Dram Teatrının direktoru, Xalq artisti Rza Xudiyev, Naxçıvan Muxtar Respublikası Yazıçılar Birliyinin sədri Asim Yadigar və başqaları əlamətdar gün münasibətilə sərgisi keçirilən rəssamı təbrik ediblər.

Rəssam Səyyad Bayramov çıxış edərək sərginin təşkil olunmasında göstərilən diqqətə görə minnətdarlığını bildirib.

Tədbirin sonunda sərgiyə baxış olub. Emosional üslub tərzinə, yüksək peşəkarlığa, zəngin, kontrastlı kolorit həllinə malik 50 rəsm əsəri maraqla qarşılanıb.

Qeyd edək ki, sərgi mayın 15-dək davam edəcək.

Naxçıvan Muxtar Respublikası
Mədəniyyət Nazirliyinin Mətbuat Xidməti
11.05.2019



      Xəbər verdiyimiz kimi, Naxçıvan şəhərindəki Heydər Əliyev Muzeyinin qarşısında Azərbaycan xalqının ümummilli lideri Heydər Əliyevin anadan olmasının 96-cı ildönümü və Heydər Əliyev Fondunun yaradılmasının 15 illiyi münasibətilə konsert proqramı təşkil edilmişdi. Konsertdə ölkə­mizin tanınmış incəsənət ustalarının ifa etdikləri xalq, bəstəkar və estrada mahnıları muxtar respublika sakinləri tərəfindən alqışlarla qarşılanmışdı. Tanınmış müğənnilərimizlə görüşüb, onların təəssüratlarını öyrəndik. Belə möhtəşəm bir tədbirdə iştirak etməyin ona və bütün həmkarlarına böyük şərəf verdiyini bildirən Əməkdar artist İlqar Muradov dedi:– Bir naxçıvanlı kimi doğulub boya-başa çatdığım torpaqda olmaqdan çox məmnunam. Xüsusən də Azərbaycan xalqının ümummilli lideri Heydər Əliyevin anadan olmasının 96-cı ildönümü və Heydər Əliyev Fondunun yaranmasının 15 illiyi münasibətilə keçirilən tədbirdə iştirak etmək mənim üçün qürurvericidir. Əməkdar artist vurğuladı ki, havanın yağıntılı olmasına baxmayaraq, konsert çox möhtəşəm keçdi. Buraya hər gəlişimdə, hər dəfə belə möhtəşəm konsertlərdə iştirak edəndə mədəniyyət və incəsənətin inkişafına necə həssaslıqla yanaşıldığının, sənətə və sənətkara necə yüksək qiymət verildiyinin şahidi oluram. Yüksək bədii zövqə malik, milli musiqimizin vurğunu olan tamaşaçı kütləsi qarşısında çıxış etmək qürurvericidir.

Azərbaycan Respublikasının Əməkdar artisti Lalə Məmmədova ilə də söhbət etmək imkanımız oldu. Əməkdar artist qeyd etdi ki, bu, Naxçıvana dördüncü səfəridir. Bu torpağı insana sevdirən naxçıvanlıların istiqanlılığı, səmimiliyidir. Mən həmişə qeyd etmişəm ki, Naxçıvanın insanları səmimi, qonaqpərvər, dostcanlıdırlar. Qədim tarixinin, milli-mədəniyyətimizin, adət-ənənələrimizin qorunub yaşadılması buranı mənə sevdirən əsas səbəbdir. Buna görə də artıq 10 ilə yaxındır ki, repertuarımda “Araz üstü şəhərim” mahnısı xüsusi yer alır və bu mahnını bütün konsertlərimdə sevə-sevə ifa edirəm. Əməkdar artist onu da qeyd etdi ki, Naxçıvanda təşkil olunan konsert proqramına dəvət aldıqda çox sevindim. Çünki ulu öndərin doğulduğu diyarda olmaq, eyni zamanda anadan olmasının ildönümü ilə bağlı təşkil olunan möhtəşəm bir konsert proqramında iştirak etmək mənim üçün bir şərəfdir. Onu da deyim ki, konsert mənə çox ali duyğular yaşatdı. Bilirsiniz, Naxçıvan tamaşaçısı səmimi və tələbkardır. Mən də öz ifam zamanı bu tələbkarlığı bir daha hiss etdim və şükürlər olsun ki, bu günə qədər tamaşaçılardan sevgi görmüşəm. Arzu edirəm ki, bu tədbirlər davamlı olsun, biz də doğma Naxçıvan torpağında öz tamaşaçılarımız ilə tez-tez görüşək. Təşkil edilən konsertin xalqımızın ulu öndərə sevgi və ehtiramının ifadəsi olduğunu bildirən Xalq artisti Samir Cəfərov vurğulayıb ki, dahi şəxsiyyətin yorulmaz fəaliyyəti nəticəsində Azərbaycanımızda bütün sahələr kimi, mədəniyyət sahəsində də böyük nailiyyətlər əldə edilib. Bütün bunlara görə biz görkəmli dövlət xadiminə borcluyuq.

“Ulu öndərin təşəbbüsü ilə mən həm Bakıda, həm də Moskvada təhsil almışam”, – deyən Samir Cəfərov söyləyib ki, dahi şəxsiyyətin ona göstərdiyi etimadı daim doğrultmağa çalışır. “Mən Naxçıvan Muxtar Respublikası Ali Məclisinin Sədrinə minnətdarlıq etmək istəyirəm. Çünki məni ümummilli liderə məhz o təqdim edib, bundan sonra isə həyatım 180 dərəcə dəyişib”, – deyən Samir Cəfərov bir naxçıvanlı kimi öz doğma torpağında belə bir əlamətdar tədbirdə iştirak etməyindən qürur hissi keçirdiyini söyləyib. Konsert proqramında çıxış edən digər müsahibimiz Azərbaycan Respublikasının Əməkdar artisti Abbas Bağırov öz təəssüratlarını bizimlə bölüşərək dedi:– Belə bir əlamətdar gündə konsert proqramında çıxış etmək üçün Naxçıvandayıq. Göründüyü kimi, konsert möhtəşəmdir və tamaşaçı marağı çox böyükdür. Havanın yağışlı olmasına baxmayaraq, Naxçıvan sakinlərinin bu konsertdə izdiham yaratması ümummilli ­liderimiz Heydər Əliyevə olan böyük ehtiram və hörmətin ifadəsidir.

Abbas Bağırov qeyd etdi ki, Naxçıvan mənim ən çox sevdiyim diyardır. Buralı olmasam da, Naxçıvanı öz doğulduğum yer qədər sevirəm. Muxtar respublikanın gündən-günə gözəlləşən görkəmi vardır. Bunu hər gəlişimdə hiss edirəm. Hər səfərimdə buradakı təmizlik məni heyran edir. Bu torpağın qonaqpərvər, istiqanlı insanları, gözəl təbiəti və ən çox xoşladığım zəngin mətbəxi vardır. Mən bu diyara hər gəlişimdə buranın mətbəxindən dadmasam, qətiyyən olmaz. Çünki bu torpaqda yetişən məhsulların dadı, ləzzəti bambaşqadır. Əməkdar artist son olaraq qeyd etdi ki, bu il Naxçıvanda solo konsert keçirməyi planlaşdırır.

“Qaytağı” instrumental ansamblının bədii rəhbəri, Xalq artisti Ənvər Sadıqov söhbətə qoşularaq qeyd etdi ki, uzun fasilədən sonra ilk dəfədir, Naxçıvana gəlirəm. Muxtar respublikada 10 ildən artıq bir müddətdə olmadığımı nəzərə alsaq, Naxçıvanın gözəlləşən görkəminə necə valeh olduğumu təsəvvür edə bilmərsiniz. Burada çox xoş qarşılandıq. Düzdür, hava şəraitinə görə əvvəlcə düşünürdük ki, maraq az ola bilər. Ancaq deyim ki, əsl tamaşaçı izdihamı yaşadıq. Xüsusi vurğulamaq istərdim ki, konsertdə ifa olunan Şərur yallıları bu torpağın qədim və tükənməz mədəni irsinin göstəricisi idi. Xalq artisti söylədi ki, konsert proqramı çox möhtəşəm və uğurla keçirildi. Arzum budur ki, həmişə belə mötəbər tədbirlərdə və gözəl günlərdə görüşək. Bütün Azərbaycan xalqının ən böyük arzusu odur ki, torpaqlarımız işğaldan azad olunsun və belə tədbirləri Şuşada, Laçında, Xankəndidə – bütün Qarabağda qeyd edək.

Naxçıvan Muxtar Respublikası
Mədəniyyət Nazirliyinin Mətbuat Xidməti
10.05.2019



      Azərbaycanın ümummilli lideri Heydər Əliyevin anadan olmasının 96-cı ildönümü və Heydər Əliyev Fondunun yaranmasının 15 illiyi münasibətilə İtaliyanın “L’Opinione” qəzetində italyan jurnalist-tədqiqatçı Domeniko Letizianın geniş məqaləsi dərc olunub.

NUHÇIXAN xəbər verir ki, məqalədə ölkəmizdə bu iki önəmli tarixin qeyd edildiyi, Azərbaycanın müasir tarixinin ulu öndər Heydər Əliyevlə ayrılmaz şəkildə bağlı olduğu, Ümummilli Liderin dəyərlərinin Azərbaycan xalqı tərəfindən yaşadıldığı bildirilir.

Yazıda Ulu Öndərin sovetlər dönəmində respublikaya rəhbərlik etdiyi dövrün yenilənmə, dinamik inkişaf və mədəni intibah dövrü kimi yadda qaldığı, 1982-cı ildən Heydər Əliyevin SSRİ Baş nazirinin müavini kimi Sovetlər Birliyinin əsas liderlərindən biri olaraq səhiyyə, elm, yüngül və ağır sənaye, nəqliyyat, kommunikasiya, mədəniyyət və təhsil kimi sahələrə rəhbərlik etdiyi bildirilir. SSRİ-nin süqutu və müstəqilliyin bərpasından sonra Azərbaycanın böyük çətinliklərlə üzləşdiyi, 1993-cü ilin may-iyun ayları arasında vətəndaş müharibəsi və yenicə əldə olunmuş müstəqilliyi itirmək təhlükəsi ilə qarşılaşdığı məqamda xalq tərəfindən Heydər Əliyevin ölkəni bu çətin vəziyyətdən çıxara biləcək yeganə şəxs kimi seçildiyi vurğulanır. 1993-2003-cü illər prezidentliyi dövründə Heydər Əliyevin Azərbaycanı dərin problemlərdən xilas edərək ölkənin geosiyasi və beynəlxalq mövqeyini gücləndirdiyi, sabitlik və iqtisadi yüksəlişə doğru apardığı bildirilir.

Məqalədə qeyd olunur ki, Heydər Əliyev Azərbaycan üçün dünyəvilik, azadlıq və müstəqillik ideyalarını təcəssüm etdirir. O, çağdaş və modern dövlət institutlarının, vətəndaş cəmiyyətinin və iqtisadiyyatın inkişafını dəstəkləyən qurumların yaradılmasını təmin edib, ölkənin Şərq və Qərb arasında strateji yerləşməsi və malik olduğu zəngin təbii ehtiyatlarından bəhrələnərək Azərbaycanın modernləşməsinə zəmin yaradıb, bir milyon qaçqın və məcburi köçkün kimi ağır humanitar nəticələrə səbəb olmuş Dağlıq Qarabağ münaqişəsinin beynəlxalq hüquq çərçivəsində həllinə istiqamətlənmiş siyasət həyata keçirib.

Müəllif bildirir ki, Heydər Əliyev Azərbaycanın 1997-ci ildə İtaliyaya səfər etmiş ilk Prezidenti olub. Səfər vaxtı Ulu Öndərin İtaliyanın siyasi rəhbərliyi və önəmli iqtisadi strukturlarının başçıları ilə keçirdiyi görüşlərin iki ölkə arasında növbəti mərhələdə əlaqələrin inkişafına təkan verdiyi və hazırda Azərbaycan ilə İtaliya arasında əlaqələrdə davamlı siyasi, iqtisadi və mədəni mübadilələrin müşahidə olunduğu, 2020-ci ildə tikintisi başa çatacaq Trans-Adriatik Qaz Boru Kəməri kimi Avropa üçün strateji əhəmiyyət daşıyan layihənin reallaşmasının əlaqələrin daha da güclənməsinə gətirib çıxaracağı bildirilir.

Məqalədə qeyd olunur ki, ulu öndər Heydər Əliyevin zəngin mənəvi irsini yaşatmaq, ölkəmiz üçün azərbaycançılıq fəlsəfəsinin vacibliyini vurğulamaq və yeni nəsillərdə milli dövlətçilik ideyasını aşılamaq üçün təsis edilən və fəaliyyətinin 15-ci ildonümünü qeyd edən Heydər Əliyev Fondu təhsil, səhiyyə, mədəniyyət, idman, texnologiya, ətraf mühit, ictimai və bir çox başqa sahələrdə müxtəlif layihələr həyata keçirməklə yeni cəmiyyətin qurulması, ölkənin sosial və iqtisadi inkişafı prosesində fəal iştirak edir. Müəllif Heydər Əliyev Fondunun mədəniyyət, incəsənət dünyasında, eləcə də dinlərarası dialoq və multikulturalizmlə bağlı ideyaların yayılması baxımından əhəmiyyətindən danışaraq, İtaliya və Müqəddəs Taxt-Tacda İslam və Katolik mədəniyyətləri arasında əməkdaşlıq üçün çox işlər gördüyünü yazır. Fond tərəfindən Vatikan Apostol Kitabxanasında, Müqəddəs Marçellino və Pyetro və Müqəddəs Sebastian katakombalarında aparılmış bərpa işlərindən danışan müəllif bu işlərə Azərbaycan Respublikasının Birinci vitse-prezidenti və Heydər Əliyev Fondunun prezidenti xanım Mehriban Əliyevanın göstərdiyi diqqəti xüsusi qeyd edir.

Yazıda Heydər Əliyev Fondunun İtaliyada önəmli tədbirlər, çoxsaylı sərgi və konsertlər təşkil edərək, o cümlədən bu il də Venesiya Biennalesində milli pavilyon ilə iştirak edərək Azərbaycan mədəniyyətinin, adət-ənənələrinin tanınmasını təbliğ etdiyi, Romanın Villa Borghese parkında Nizami Gəncəvinin heykəlinin ucaldılması, Romanın Kapitolini muzeyinin Folosoflar zalının bərpası kimi önəmli layihələr həyata keçirdiyi, habelə Fondun İtaliyanın universitetləri və akademik mühitini Azərbaycanla birləşdirən tarix və arxeologiya sahəsində görülən önəmli işlərin təşəbbüskarı olduğu bildirilir. İtaliya Prezidenti Sercio Mattarellanın 2018-ci ildə Azərbaycana səfəri zamanı açılışı edilmiş, Florensiyanın Galleria Degli Uffizi muzeyindən gətirilmiş əsərlərdən ibarət, Şah İsmayıl Xətaiyə həsr olunmuş sərginin də məhz Fond tərəfindən təşkil edildiyi diqqətə çatdırılır.

Naxçıvan Muxtar Respublikası
Mədəniyyət Nazirliyinin Mətbuat Xidməti
10.05.2019



      kraynanın “Versii” saytında soydaşımız, hüquq elmləri doktoru, Milli Aviasiya Universitetinin beynəlxalq hüquq kafedrasının professoru, Ukraynanın Əməkdar təhsil işçisi Arif Quliyevin ümummilli lider Heydər Əliyevə həsr olunmuş məqaləsi verilib.

NUHÇIXAN xəbər verir ki, məqalədə Azərbaycan xalqının həyatında bir çox əlamətdar hadisələrin Heydər Əliyevin adı ilə bağlı olduğu qeyd edilir. Bildirilir ki, bu dahi, müdrik və qətiyyətli insanın liderliyi hesabına bu gün Azərbaycan böyük inkişaf yolunu keçib.

Diqqətə çatdırılır ki, ümummilli lider Heydər Əliyevin azərbaycançılıq milli ideologiyası ən böyük dəyərdir. Heydər Əliyevin müstəqil və sabit dövlət qurmaq üçün atdığı addımlar nəticəsində Azərbaycanın təhlükəsizliyini qoruya bilən ordu yaradılıb, 1995-ci ildə Azərbaycan Respublikasının yeni Konstitusiyası qəbul edilib. Heydər Əliyev tərəfindən yaradılan yeni Konstitusiya Azərbaycanın gələcək illərdə sabit inkişafını təmin edən əsas qanuna çevrilib.

Müəllif qeyd edir ki, 1993-cü ildə Heydər Əliyevin hakimiyyətə qayıtması ilə Azərbaycanda həyatın bütün sahələrində kəskin donuş baş verdi. Respublikada ictimai-siyasi sabitlik bərqərar oldu, parçalanma və dövlət çevrilişi təhlükəsi aradan qalxdı və hər şeydən vacibi, Heydər Əliyev milli həmrəyliyə nail olmaqla öz doğma xalqını vahid ideologiya ətrafında birləşdirə, ona sabahkı günə inam hissi aşılaya bildi.

Məqalədə Ulu Öndərin fəaliyyəti barədə geniş məlumat verilib, müasir Azərbaycanın memarı olan Heydər Əliyevin praqmatik siyasətinin bu gün də Prezident İlham Əliyev tərəfindən uğurla davam etdirildiyi vurğulanıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
10.05.2019



      Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” 3 aprel 2019-cu il tarixli Sərəncamının icrası ilə bağlı mayın 8-də Naxçıvan Müəllimlər İnstitutunda təhsil alan tələbələr üçün “Oxunması zəruri olan kitablar”ın siyahısına daxil edilmiş “Pedaqoji fikir tarixindən” adlı kitabın müzakirəsi keçirilib.

Tədbiri giriş sözü ilə Naxçıvan Muxtar Respublikası Mədəniyyət Nazirliyinin İncəsənət və təhsil müəssisələri ilə iş şöbəsinin müdiri İman Alırzayev açaraq bildirib ki, “Oxunması zəruri olan kitabların siyahısı”nın təsdiq edilməsi təkcə muxtar respublikamızın deyil, ölkəmizin tanınmış ziyalıları tərəfindən də müsbət addım kimi dəyərləndirilmişdir. Çünki bu kitablar gənc nəsildə vətənpərvərliyin, tarixə, milli köklərə bağlılığın formalaşdırılmasına əsaslı təsir göstərəcək ideoloji mənbə rolunu oynayır, onların kənar təsirlərdən qorunması üçün dünyagörüşünü zənginləşdirir, gənclərə dövlətə, dövlətçiliyə, Vətənə, xalqa bağlılıq hissləri aşılayır.

Sonra Məmməd Səid Ordubadi adına Naxçıvan Muxtar Respublika Kitabxanasının direktoru Tamella Əsgərova çıxış edərək bildirib ki, Naxçıvan Muxtar Respublikası Ali Məclisinn Sədri yanında Bilik fondunun 2019-cu il üzrə “Tədbirlər Planı”na əsasən nəşr olunmuş “Pedaqoji fikir tarixindən” kitabı muxtar respublikanın bütün kitabxanalarına hədiyyə edilmişdir.

Vurğulanıb ki, Azərbaycan pedaqoji fikri zəngin və çoxşaxəli inkişaf yolu keçmişdir. Tarixin müxtəlif dövrlərində yaşayıb fəaliyyət göstərmiş böyük mütəfəkkirlər, maarifçilər, müəllimlər, şair və yazıçılar pedaqoji fikir tariximizi öz dəyərli əsərləri ilə daha da zənginləşdirmişlər. Onların əsərləri, təlim-tərbiyə və təhsillə bağlı fikirləri bu gün də aktuallığını qoruyub saxlayır, tədrisin təşkilində əsas istiqamət kimi götürülür. “Pedaqoji fikir tarixindən” kitabında da Azərbaycan və dünya pedaqoji fikrinin ən zəruri və dəyərli nümunələri seçilərək toplu halında oxuculara çatdırılmışdır.

Diqqətə çatdırılıb ki, maarifpərvər ziyalıların nəsihətlərini pedaqoji təfəkkür süzgəcindən keçirib müasir gəncliyin tərbiyəsində istifadə etmək və məktəb təcrübəsinə gətirmək, müəllimləri istiqamətləndirmək təhsil müəssisələrinin qarşısında duran vacib məsələlərdəndir. Çünki keçmişin mütərəqqi irsini sintez etmədən yeni pedaqoji düşüncə formalaşdırmaq mümkün deyil. Elə buna görə də “Pedaqoji fikir tarixindən” kitabı müəllimlərimizə təlim və tərbiyənin təşkilində dünya və Azərbaycan pedaqoji irsindəki qabaqcıl ideya və təcrübələrdən bəhrələnmək imkanı yaradacaqdır.

Müzakirədə “Pedaqogikada misli görünməmiş təcrübə” mövzusunda M.S.Ordubadi adına Naxçıvan Muxtar Respublika Kitabxanasının Kitabxana-biblioqrafiya proseslərinin avtomatlaşdırılması şöbəsinin müdiri Heyran Ələsgərova, “Tanınmış simaların əsərlərindən seçmələr” mövzusunda M.S.Ordubadi adına Naxçıvan Muxtar Respublika Kitabxanasının elmi katibi Günay Kəngərli, “Pedoqoji irsin öyrənilməsində “Pedoqoji fikir tarixindən” kitabı əsas mənbə kimi” mövzusunda Naxçıvan Müəllimlər İnstitutunun Kabinə müdiri Ruhəngiz Əliyeva çıxışlar ediblər.

Çıxışlarda təlim və tərbiyənin cəmiyyətin gələcəyə doğru inamla addımlamasındakı əvəzsiz rolundan, ölkəmizdə, həmçinin muxtar respublikamızda vətənə, millətə gərəkli insanlığın yetişməsi üçün görülən mühüm işlərdən bəhs olunub, kitabın muxtar respublikanın təhsil ictimaiyyəti üçün dəyərli nəşrlərdən biri olduğu vurğulanıb. Qeyd edilib ki, “Pedaqoji fikir tarixindən” adlı əsər cəmiyyətimizin mütaliəyə, təhsil və tərbiyəyə istiqamətləndirilməsi, müəllim nüfuzunun yüksəldilməsi, yüksək insani keyfiyyətlərə malik insanların yetişməsi, milli təhsil islahatlarına mühüm yanaşma baxımından əvəzsiz mənbə rolunu oynayacaq. Bununla yanaşı, “Pedaqoji fikir tarixindən” kitabı müəllimlərimizə təlim və tərbiyənin təşkilində dünya və Azərbaycan pedaqoji irsindəki qabaqcıl ideya və təcrübələrdən bəhrələnmək imkanı yaradacaqdır.

Tədbirin sonunda “Oxunması zəruri olan kitablar siyahısı”na daxil olan kitablardan ibarət sərgiyə baxış olub.

Naxçıvan Muxtar Respublikası
Mədəniyyət Nazirliyinin Mətbuat Xidməti
08.05.2019



      Mayın 8-də Kəngərli Rayon Şahtaxtı Kənd Mədəniyyət Evində Naxçıvan Muxtar Respublikasının yaradılmasının 95 illiyinə həsr olunmuş tədbir keçirilib.

Tədbiri Kəngərli Rayon Mədəniyyət Şöbəsinin müdiri Məhərrəm Əliyev giriş sözü ilə açaraq qeyd edib ki, Azərbaycan dövlətçiliyi tarixində mühüm yer tutan Naxçıvan Muxtar Respublikasının yaradılmasının 95-ci ildönümü tamam olur. Bununla əlaqədar Naxçıvan Muxtar Respublikası Ali Məclisinin Sədri cənab Vasif Talıbovun 2019-cu il 21 yanvar tarixli Sərəncamı ilə “Naxçıvan Muxtar Respublikasının 95 illik yubileyinə həsr olunmuş Tədbirlər Planı” təsdiq edilmişdir. Bugünkü tədbir Kəngərli Rayon Mədəniyyət Şöbəsinin və Mədəniyyət üzrə Elmi-Metodik Mərkəzin 2019-cu il üçün tədbirlər planına əsasən keçirilir. 1921-ci ildə Azərbaycanın tərkibində muxtariyyət statusu qazanan Naxçıvan diyarında 1924-cü il fevralın 9-da Naxçıvan Muxtar Respublikası yaradılmışdır. Naxçıvan Muxtar Respublikasının yaradılması Azərbaycanın siyasi tarixinin mühüm, əhəmiyyətli hadisəsidir. Bununla, Naxçıvan Azərbaycanın əzəli və əbədi tərkib hissəsi kimi qorunub saxlanılmış və şərəfli inkişaf yolu keçmişdir. Xalqımızın ümummilli lideri Heydər Əliyevin “Əgər Zəngəzur mahalının Ermənistana verilməsi olmasaydı, bəlkə də, Naxçıvanın muxtariyyəti də lazım deyildi və Azərbaycan vahid əraziyə malik olan bir ölkə idi” fikrini xatırladan şöbə müdiri bildirib ki, Zəngəzurun Ermənistana verilməsi ilə Naxçıvan Azərbaycandan ayrı düşmüş, onunla heç bir sərhəd xətti olmamışdır. Belə olan halda Naxçıvan Azərbaycanın tərkibində muxtariyyət uğrunda mübarizəyə başlamışdır.

Sonra "Muxtariyyətin inkişaf dövrü" mövzusunda Şahtaxtı kənd kitabxana filialının müdiri Fatma Musayevanın, "Naxçıvan Muxtar Respublikasının yaradılmasının siyasi əhəmiyyəti" mövzusunda Şahtaxtinskilər Muzeyinin direktoru Ruzugül Qazıbəyovanın və "Naxçıvan Azərbaycanın indiki və qədim mədəniyyət beşiyidir" mövzusunda Şahtaxtı kənd kitabxana filialının əməkdaşı Səriyyə Əlizadənin çıxışları olub. Çıxışlarda Naxçıvan muxtar Respublikasının muxtariyyət qazandığı tarixi dövrdən və muxtariyyət illərində əldə edilən nailiyyətlərdən bəhs edilib. Diqqətə çatdırılıb ki, XX əsrin 20-ci illəri, xüsusilə 1918-1920-ci illər Naxçıvan diyarı üçün çətin inkişaf dövrü olmuşdu. Çarizm devrildikdən sonra imperiyanın əksər əyalətlərində olduğu kimi, Naxçıvan diyarında da ikihakimiyyətlilik yaranmış, bir sıra kapitalist dövlətləri mürəkkəb vəziyyətdən istifadə edərək Azərbaycanın ayrılmaz tərkib hissəsi olan bu diyara yiyələnmək üçün cəhdlər etmişlər. Azərbaycan Xalq Cümhuriyyətinin Azərbaycanı müstəqil dövlət elan etməsi Naxçıvan diyarı əhalisində müəyyən ümidlər yaratmışdı. Naxçıvan diyarının qarşılaşdığı problemləri həll etmək və çətinlikləri aradan qaldırmaq üçün istər yerli əhali və onun başçıları, istərsə də Azərbaycan Xalq Cümhuriyyətinin hökuməti tərəfindən müəyyən işlər görülmüş, erməni daşnaklarının torpaq iddialarının və etnik təmizləmə siyasətinin reallaşdırılması istiqamətində cəhdləri dəf olunmuşdur.

Qeyd olunub ki, Naxçıvan əhalisinin qətiyyətli mövqeyi və mübarizəsi ermənilərin Naxçıvanla bağlı planlarını pozdu. Bu işdə böyük dövlətlər də onlara kömək göstərə bilmədilər. Məkrli niyyətlərini pərdələyən ermənilər və Ermənistan İnqilab Komitəsi 1920-ci il dekabrın 28-də Naxçıvanı müstəqil sovet respublikası kimi tanımış və bu diyar ilə əlaqədar iddialarından imtina etmişdilər.

Vurğulanıb ki, ötən əsrin 80-ci illərinin axırlarında Azərbaycanın Dağlıq Qarabağ və Naxçıvan ərazilərinə erməni iddiaları baş qaldırmış, mərkəzin ikiüzlü siyasəti bu hadisələri qızışdırmışdı. Lakin 1990-cı ilin iyul ayında görkəmli dövlət xadimi Heydər Əliyevin Naxçıvana gəlməsi, burada siyasi fəaliyyət göstərməsi muxtar respublika ərazisini erməni işğalından və muxtariyyət statusunu ləğv olunmaq təhlükəsindən xilas etdi. 1993-cü ildə ulu öndər Heydər Əliyevin siyasi hakimiyyətə qayıdışı ilə xalqın və müstəqil dövlətçiliyin xilası və möhkəmləndirilməsinə başlandı. Naxçıvan Muxtar Respublikasının sosial-iqtisadi inkişafına və muxtariyyətin qorunmasına diqqət artırıldı. 1995-ci il noyabrın 12-də ümumxalq səsverməsi ilə qəbul edilmiş Azərbaycan Respublikasının Konstitusiyası ilə Naxçıvan Muxtar Respublikasına Azərbaycanın tərkibində muxtar dövlət statusu verildi.

Çıxışlarda diqqətə çatdırılıb ki, Naxçıvan Muxtar Respublikası 95 illik tarixi inkişaf yolunun ən dinamik və dayanıqlı inkişaf dövrünü yaşayır. Naxçıvan Muxtar Respublikası Ali Məclisinin Sədri cənab Vasif Talıbovun rəhbərliyi ilə muxtar respublika 20 ildən artıq bir dövrdə hərtərəfli inkişafa nail olmuşdur. Həyatın bütün sahələrində əsaslı dəyişikliklər baş vermişdir. Bu işlər bu gün də sürətlə və ardıcıl olaraq davam etdirilir. Naxçıvan Muxtar Respublikası 95 illik tarixi inkişaf dövründə heç vaxt indiki qədər inkişafa, uğurlara, nailiyyətlərə imza atmamışdır. Naxçıvan Muxtar Respublikası Azərbaycan Respublikasının tərkibində ölkəmizin daha böyük inkişafına doğru inamla və qətiyyətlə irəliləyir, çiçəklənən bir diyara çevrilir.

Mədənniyyət üzrə Elmi-Metodik mərkəzin direktoru Səyyar Məmmədov çıxış edərək mədəniyyət evləri və klublarda bu cür mədəni-kütləvi tədbirlərin keçirilməsi əhəmiyyətindən bəhs etmiş, belə tədbirlərdə yaşayış məntəqəsi sakinlərinin iştirakının dah vacib olduğunu vurğulamışdır.

Tədbirin bədii hissəsində Şahtaxtı Kənd Mədəniyyət Evinin Bədii qiraət dərnəyinin üzvləri Naxçıvanı tərənnüm edən şeir nümunələrini bədii qiraət ediblər.

Naxçıvan Muxtar Respublikası
Mədəniyyət Nazirliyinin Mətbuat Xidməti
08.05.2019



      Mayın 7-də Naxçıvan Muxtar Respublikası Mədəniyyət Nazirliyinin tabeliyindəki uşaq musiqi, incəsənət və bədii sənətkarlıq məktəbləri şagirdlərinin Naxçıvan şəhərindəki “Gənclik” Mərkəzində rəsm sərgisi və hesabat konserti keçirilib.

Əvvəlcə “Gənclik” Mərkəzinin foyesindəki rəsm sərgisinə baxış olub. Sərgidə uşaq musiqi, incəsənət və bədii sənətkarlıq məktəblərində rəssamlıq ixtisası üzrə təhsil alan şagirdlərin 48 rəsm əsəri nümayiş olunurdu. Sonra Azərbaycan və dünya bəstəkarlarının əsərlərindən, həmçinin xalq mahnı, yallı və muğamlarından nümunələrin ifa edildiyi konsert proqramı olub. Konsertdə Nehrəm Kənd Uşaq Musiqi Məktəbinin Xalq çalğı alətləri ansamblı “Cahargah rəngi”, Ələkli Kənd Uşaq Musiqi Məktəbinin “Sazçalanlar” ansamblı “Xan gözəlləməsi”, Sədərək Rayon Uşaq Musiqi Məktəbinin “Kamançaçalanlar” ansamblı “Şüstər rəngi” musiqi nömrələrini, Naxçıvan Dövlət Uşaq Filarmoniyasının rəqs qrupu isə “Qarabağ yallısı”nı musiqisevərlərə təqdim ediblər.

Konsertin davamında M.Məmmədov adına 1 nömrəli Uşaq Musiqi Məktəbinin vokal qrupu görkəmli Azərbaycan bəstəkarlarından T.Quliyevin “Kəndimiz”, Ərtoğrol Cavid adına Uşaq Musiqi və Bədii Sənətkarlıq Məktəbinin xor kollektivi konsertmeystr Nərminə Qədimovanın müşayiəti ilə M.Maqomayevin “Odlar yurdu”əsərlərini ifa ediblər.

Dünya bəstəkarlarından M.Blanerin “Katyuşa” əsəri Ərtoğrol Cavid adına Uşaq Musiqi və Bədii Sənətkarlıq Məktəbinin “Qanunçalanlar” ansamblının, Y.Vesnyakın “Karlson” əsəri Culfa Şəhər Uşaq Musiqi Məktəbinin fortepiano ixtisası üzrə ikinci sinif şagirdləri Aysel Muradlı və Səma Elyazlının, A.Vivaldinın “Ştorm” əsəri Ordubad Şəhər Uşaq Musiqi Məktəbinin “Skripkaçalanlar”ansamblının ifalarında alqışlarla qarşılanıb.

Hesabat konsertinin sonunda Naxçıvan Muxtar Respublikasının Mədəniyyət naziri Natəvan Qədimova çıxış edərək uğurlu hesabat konsertlərinə görə muxtar respublikanın uşaq musiqi, incəsənət və bədii sənərkarlıq məktəblərinin müəllim-şagird kollektivini təbrik edib. Bildirilib ki, bir neçə gündür davam edən muxtar respublikanın uşaq musiqi, incəsənət və bədii sənərkarlıq məktəblərinin uğurlu hesabat konsertləri bir daha göstərdi ki, muxtar respublikada yeniyetmə və gənclərin musiqi təhsilinə böyük dövlət qayğısı göstərilir. Məhz bu dövlət qayğısının nəticəsidir ki, musiqi təhsili almış yeniyetmə və gənclər təkcə muxtar respublika deyil, ölkə və dünya miqyaslı müsabiqələrin qalibi adını qazanaraq çəkilən zəhmətin bəhrəsiz qalmadığını nümayiş etdirirlər.

Bütün bu uğurlara və muxtar respublikada musiqi təhsilinin inkişafına göstərilən böyük dövlət qayğısına görə Naxçıvan Muxtar Respublikası Ali Məclisinin Sədrinə mədəniyyət işçiləri adından minnətdarlığını bildirən nazir əlavə edib ki, göstərilən etimadı doğrultmaq üçün qarşıdakı illərdə daha böyük nailiyyətlər əldə edilməsinə çalışacağıq.

Naxçıvan Muxtar Respublikası
Mədəniyyət Nazirliyinin Mətbuat Xidməti
07.05.2019



      Ukraynanın “Kanal-5” televiziyası Azərbaycanla bağlı hazırladığı verilişin çəkilişlərinin bir hissəsini Naxçıvan Muxtar Respublikasında aparıb.

Artıq “Kanal-5” televiziyası Naxçıvanla bağlı çəkilmiş verilişi efirdə yayımlayıb. Ukrayna dilində yayımlanan verilişdə Naxçıvan şəhərinin tarixi, onun Nuh Peyğəmbərin vətəni olması haqqında ukraynalı tamaşaçılara maraqlı məlumatlar verilir. Naxçıvan şəhərinin təmizliyinə və səliqəsinə heyran olan aparıcı taksi xidmətlərinin yüksək səviyyədə olduğunu və qonaqpərvərliyi xüsusi qeyd edir. Verilişin aparıcısı Nadya Baziv Naxçıvanın ümummilli lider Heydər Əliyevin doğulduğu şəhər olduğunu vurğulayır, 1990- 1993-cü illərdə ulu öndərin burada siyasi fəaliyyəti ilə bağlı məqamlara da toxunur. Heydər Əliyev Muzeyində saxlanılan ümummilli liderimizə məxsus əşyalar və digər eksponatlar haqqında məlumat verilib. Görkəmli oftalmoloq, akademik Zərifə Əliyevanın adını daşıyan Şahtaxtı kənd tam orta məktəbi ilə Ukraynanın İrpen şəhərinin məktəbi arasında dostluq əlaqələri, akademikin bu kənddə doğulduğu tamaşaçıların diqqətinə çatdırılır. Aparıcı verilişdə ukraynalı xanımlara Naxçıvan kətəsinin necə hazırlanmasını da təqdim etməyi unutmayıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
07.05.2019



      Azərbaycanın İstanbuldakı Baş konsulluğunun təşəbbüsü və Azərbaycan Respublikası Dövlət Neft Şirkətinin (SOCAR) Türkiyədəki nümayəndəliyinin dəstəyi ilə tanınmış azərbaycanlı rəssam İbrahim Səfiyə həsr olunmuş “İbrahim Səfi - Rəsmlər, məktublar, sənədlər" adlı kitab dərc olunub.

NUHÇIXAN xəbər verir ki, kitabın “Ön söz”ünü Azərbaycanın İstanbuldakı baş konsulu Məsim Hacıyev yazıb.

Nəşr barədə məlumat verən M.Hacıyev kitabın iki qardaş ölkə arasında mədəni əlaqələrin inkişaf etməsi baxımından vacibliyini vurğulayıb. Baş konsul türk əsgərlərin köməyi ilə 1918-ci ildə İstanbula gələn və sənətə olan bağlılığı ilə bu sahənin qabaqcıl şəxsiyyətlərindən olan azərbaycanlı rəssamın mədəni biliklərimizin əsas simvollarından biri olduğunu qeyd edib.

"Kırmızı Kedi" nəşriyyatında dərc olunan kitabda İbrahim Səfiyə aid rəsm əsərləri, məktublar və sənədlər yer alıb.

İbrahim Səfi 1898-ci ildə Azərbaycanın Naxçıvan Muxtar Respublikasının indiki Şərur rayonunda anadan olub. Birinci Dünya müharibəsindən sonra Türkiyəyə gələn İbrahim Səfi 1923-cü ildə İstanbul Gözəl Sənətlər Akademiyasında təhsil alıb. Mənzərə, natürmort və portret üslubunda rəsmlərini ərsəyə gətirən İbrahim Səfi 1920-ci ildə Türkiyədə keçirilən Avropa rəssamları müsabiqəsinin mükafatına layiq görülüb. İbrahim Səfinin rəsm əsərlərindən ibarət fərdi sərgiləri Türkiyə ilə yanaşı, ABŞ, Fransa, İsveçrə və Avstriyada da təşkil olunub. Məşhur rəssam 1983-cü il mayın 5-də açılan 100-cü sərgisindən bir neçə gün sonra İstanbulda dünyasını dəyişib. Bu gün də Türkiyədə ehtiramla xatırlanan İbrahim Səfi, xüsusilə incəsənət xadimləri tərəfindən rəğbət və hörmətlə anılır.

İstanbulun Bəyoğlu ərazisində yerləşən məşhur və turistlərin daha çox ziyarət etdiyi “İstiqlal prospekti”nin görkəmli hissəsindəki binanın üzərinə tanınmış azərbaycanlı rəssam İbrahim Səfinin xatirə lövhəsi vurulub.

Naxçıvan Muxtar Respublikası
Mədəniyyət Nazirliyinin Mətbuat Xidməti
07.05.2019



      “Naxçıvan-2019” Beynəlxalq Şahmat Festivalının iştirakçıları muxtar respublikanının tarixi abidələri, mədəniyyət müəssisələrini gəzirlər.

Növbəti ekskursiyada şahmatçılar Naxçıvan Dövlət Xalça Muzeyində olub, qonaqlara muzey haqqında məlumat verilib.

Həmin gün qonaqlar Naxçıvan şəhərində yerləşən hədiyyələr mağazasında da olublar. Naxçıvanlı sənətkarların əl işlərinin satıldığı mağazadan müxtəlif əl işləri alıblar. Sonra isə qonaqlar “Cahan” ticarət mərkəzindən alış-veriş ediblər.

Zəka sahiblərinin “Əlincəqala” Tarix Mədəniyyət Muzeyinə səfərləri daha çox yadda qalan olub. Naxçıvanın qədimliyini özündə əks etdirən maddi-mədəniyyət nümunələri, Naxçıvan ərazisində yaşayan qədim insanların istifadə etdikləri məişət əşyaları qonaqların diqqətini çəkib. Şahmatçılar qalanın zirvəsində fotoşəkillər çəkərək sosial şəbəkələrdə öz dostları ilə paylaşıblar.

Naxçıvan Muxtar Respublikası
Mədəniyyət Nazirliyinin Mətbuat Xidməti
07.05.2019



      “Azər-İlmə” Xalçaçılıq Mərkəzinin və Azərbaycan Milli Elmlər Akademiyasının Rəyasət Heyətinin birgə təsisçiliyi ilə nəşr olunan “Azərbaycan xalçaları” elmi-publisistik jurnalının yeni nömrəsi işıq üzü görüb.

NUHÇIXAN xəbər verir ki, sənətşünaslıq və tarix ixtisasları üzrə Azərbaycan Respublikası Prezidenti yanında Ali Attestasiya Komissiyasının elmi nəşrləri sırasında olan jurnalda rəsmi xronika, sənətşünaslıq, tarixşünaslıq, ayrı-ayrı xalq tətbiqi sahələrini əhatə edən müəllif yazıları, reportajlar, elmi məqalələr yer alıb.

Jurnalın bu nömrəsində tarix elmləri doktoru Camal Mustafayevin “XIX-XX əsrin əvvəllərində Quba bölgəsində xalça məmulatı istehsalı” (AMEA A.A.Bakıxanov adına Tarix İnstitutu), tarix elmləri doktoru, professor Vidadi Muradovun “Nabur və naburlular” (AMEA-nın Arxeologiya və Etnoqrafiya İnstitutu), akademik İsmayıl Hacıyevin “Naxçıvanın ilkin şəhər mədəniyyəti və Duzdağ” (AMEA Naxçıvan Bölməsi), AMEA-nın müxbir üzvü Fəxrəddin Səfərlinin “Naxçıvanda xalçaçılıq: tarix və müasirlik” (AMEA Naxçıvan Bölməsinin Tarix, Arxeologiya və Etnoqrafiya İnstitutu), sənətşünaslıq doktoru, professor Telman İbrahimovun “Qarabağın “Qasımuşağı” xalçası” (Azərbaycan Dövlət Rəssamlıq Akademiyası), filologiya üzrə fəlsəfə doktoru İbrahim Quliyevin “Səfəvilər dövründə dini-fəlsəfi mədəniyyətin inkişaf tarixində Azərbaycan alimlərinin rolu” (AMEA M.Füzuli adına Əlyazmalar İnstitutu), Aygün Quliyevanın “Maştağada keçəçilik sənətinə dair” (AMEA Milli Azərbaycan Tarixi Muzeyi), tarix üzrə fəlsəfə doktoru, dosent Bilal Dədəyevin “Təbrizdən Osmanlı dövlətinə sürgün edilən azərbaycanlı nəqqaşlar” (Bakı Mühəndislik Universiteti), filologiya üzrə fəlsəfə doktoru Almara Nəbiyevanın “Milli gəlinlik libası” (Bakı Dövlət Universiteti), sənətşünaslıq üzrə fəlsəfə doktoru Ələkbər Qasımovun “Naxçıvanın şəhərsalma ənənələri”, filologiya üzrə fəlsəfə doktoru Elxan Məmmədovun “Uşaq folklorunda oyunların tədqiqi və təbliğinə yeni baxış” (AMEA Naxçıvan Bölməsinin İncəsənət, Dil və Ədəbiyyat İnstitutu), tarix üzrə fəlsəfə doktorları Şamil Nəcəfov, Anar Ağalarzadə, Vaqif Əsədov və Fərhad Fərmanovun “Azərbaycan ərazisindən tapılmış yeni abidələr və maddi-mədəniyyət nümunələri” (AMEA Arxeologiya və Etnoqrafiya İnstitutu), fəlsəfə doktoru Xanna Rudıkın “Kiyevin Xanenko muzeyinin kolleksiyasında Azərbaycan xalçaları” (Ukrayna) və s. kimi məqalələr yer alıb.

Jurnalın baş redaktoru Əməkdar incəsənət xadimi, tarix elmləri doktoru, professor Vidadi Muradovdur.

Oxucular jurnalın elektron variantı ilə azerilme.az/Azerbaycan-xalcalari ünvanında tanış ola bilərlər.

Naxçıvan Muxtar Respublikası
Mədəniyyət Nazirliyinin Mətbuat Xidməti
07.05.2019



      Şahbuz Rayon Mədəniyyət Şöbəsinin təşkilatçılığı ilə Şahbuz şəhərində “Xalq yaradıcılığı günü” adlı tədbir keçirilib. Əvvəlcə Şahbuz Rayon Mədəniyyət Şöbəsinin müdiri Mübariz Əliyev, Şahbuz Rayon İcra Hakimiyyətinin əməkdaşı Cəlal Paşayev və Mədəniyyət üzrə Elmi-Metodik Mərkəzin direktoru Səyyar Məmmədov çıxış edərək artıq 10 ildir muxar respublikada ənənəvi şəkildə keçirilən “Xalq yaradıcılığı günü” tədbirinin əhəmiyyətindən əhs ediblər. Bildirilib ki, Azərbaycan xalqının uzun əsrlər boyu yaratdığı mənəvi sərvətlər xəzinəsində ən möhtəşəm və şərəfli yerlərdən birini elə xalqımızın keşməkeşli tarixi boyunca formalaşan və bir nəslin digər nəslə əmanəti kimi çatdırılan xalqın yaratdıqları, xalq yaradıcılığı tutur. Xalqımız tarix boyu zəngin xalq yaradıcılığını, milli dəyərlərini, adət-ənənələrini qoruyub saxlayıb. Azərbaycanın hər yerində olduğu kimi, muxtar respublikanın bölgələrində də xalq yaradıcılığının müxtəlif sahələrinə yeni həyat verilir.

Qeyd edilib ki, Naxçıvan Muxtar Respublikası Ali Məclisi Sədrinin “Naxçıvan Muxtar Respublikasında Xalq yaradıcılığı günlərinin keçirilməsi haqqında” 7 fevral 2009-cu il və “Şərur yallıları haqqında” 24 dekabr 2018-ci il tarixli sərəncamlarına əsasən, qədim diyarımızda milli-mənəvi dəyərlərimizin qorunması, təbliği və gələcək nəsillərə ötürülməsi istiqamətində həyata keçirilən tədbirlər unudulmaqda olan milli dəyərlərin yaşadılmasına xidmət edir. Ali Məclis Sədrinin sərəncamından sonra muxtar respublikamızın bütün bölgələrində xalq yaradıcılığının müxtəlif sahələrinə yeni həyat verilir. Xalq sənətinin və yaradıcılığının ağacişləmə, xalçaçılıq, papaqçılıq, dülgərlik, dəmirçilik, toxuculuq, zərgərlik, misgərlik sahələri ilə yanaşı, qədim rəqslərimiz, xalq oyunlarımız və mərasim tamaşalarımız yaşadılır. Xalqımızın yaratdığı yaradıcılıq nümunələri geniş və əlvandır. Təbii ki, bu sahədə görülən işlər də geniş və əhatəli olmalıdır. Bu zənginliyi və əlvanlığı qorumaq, gələcək nəsillərə çatdırmaq hər birimizin vətəndaşlıq borcudur.

Vurğulanıb ki, bu sahədə ziyalılarımızın, alimlərimizin, xalq yaradıcılığı ilə məşğul olan insanların üzərinə mühüm vəzifələr düşür. Xalqımızın böyük oğlu, ümummilli liderimiz Heydər Əliyevin dediyi kimi: “Biz öz milli dəyərlərimizlə fəxr etməliyik. Bizim milli dəyərlərimiz əsrlər boyu xalqımızın həyatında, yaşayışında formalaşıbdır. Milli dəyərləri olmayan millət həqiqi millət, həqiqi xalq ola bilməz. Biz heç vaxt öz milli dəyərlərimizi unutmamalıyıq. Onu yaşatmaq, ondan bəhrələnmək, ruhlanmaq həyatımızın əsas istiqaməti, gələcək işlərimizin zəmanətidir”.

Diqqətə çatdırılıb ki, son illər Naxçıvanda milli dəyərlərin, xalq yaradıcılığının qorunması və təbliği sahəsində böyük işlər görülüb. Milli-mədəni irsin qorunması, dinimizə münasibət, inanc yerlərinə münasibət, tarixi abidələrimizin bərpası və qorunması, görkəmli şəxsiyyətlərimizin xatirəsinin əbədiləşdirilməsi, yubileylərinin qeyd edilməsi, qədim adət-ənənələrimizin dirçəldilməsi və yaşadılması, xalq yaradıcılığına diqqət və qayğı bu günümüzün reallığına çevrilib. Xalqımızın min illər boyu yaratdığı bu milli-mənəvi dəyərləri yaşatmaq, təbliğ etmək, öyrənmək və bu dəyərləri gənc nəslə aşılamaq mühüm əhəmiyyətə malikdir. Xalqımızın min illər boyu yaratdığı zəngin mədəniyyətinin və tarixinin ən gözəl inciləri YUNESKO tərəfindən bəşəriyyətin qeyri-maddi mədəni irs siyahısına daxil edilmişdir. Ötən il YUNESKO-nun Təcili Qorunma Siyahısına salınmış “Tənzərə” və “Köçəri” yallıları bu qədim və nadir sənətin də xalqımıza məxsusluğunun bir daha dünya ictimaiyyətinə çatdırılması baxımından böyük nailiyyətdir.

Sonra Şahbuz Rayon Mədəniyyət Şöbəsinin tabeliyindəki Şahbuz Rayon Mədəniyyət Sarayının, Şahbuz Şəhər, Yuxarı Qışlaq, Aşağı Qışlaq, Ayrınc, Güney Qışlaq, Kükü, Kiçikoba, Külüs kənd, həmçinin Badamlı qəsəbə mədəniyyət evi və klublarının folklor kollektivlərinin, yallı qruplarının və dərnək üzvlərinin qədim rəqslər, yallılar, el deyimləri, bayatılar, şənlik-toy havaları, xalq oyun və tamaşalarından ibarət ifaları olub. İfalar tədbir iştirakçıları tərəfindən maraqla qarşılanıb.

Məlumat üçün qeyd edək ki, belə tədbirlərin muxtar respublikanın digər rayonlarında da keçirilməsi nəzərdə tutulub.

Naxçıvan Muxtar Respublikası
Mədəniyyət Nazirliyinin Mətbuat Xidməti
06.05.2019



      Məhəmməd Tağı Sidqi adına Naxçıvan Dövlət Kukla Teatrında görkəmli şair, Azərbaycan Respublikasının Əməkdar incəsənət xadimi Mirmehdi Seyidzadənin “Qızıl xoruz” pyesi əsasında hazırlanmış tamaşaya ictimai baxış olub.

Qeyd edək ki, görkəmli şairin uşaqlar üçün yazdığı şeirlər, mənzum nağılllar, kiçik pyeslər maraqlı əsərlərdir. Onun “Nərgiz”, “Qızıl quş”, “Billur qəsr”, “Ayaz”, “Qızıl xoruz” kimi əsərləri uşaq ədəbiyyatımızın zənginləşməsində əhəmiyyətli rol oynamışdır.

Məhəmməd Tağı Sidqi adına Naxçıvan Dövlət Kukla Teatrı ilk dəfədir ki, Mirmehdi Seyidzadənin yaradıcılığına müraciət edir. Yeni tamaşa Azərbaycan xalq nağılının motivləri əsasında yazılmışdır. Məişət nağıllarından olan bu nağıl-tamaşada tamahkar padşah tənqid olunur. Tamaşada satira da güclüdür.

Nəzmlə yazılan bu tamaşada xoruzun başına gələn sərgüzəştlər oynaq və şən şəkildə səhnəyə gətirilir. Bir şahı pul tapan xoruz sevinib səs-küy salır, banlayır. Padşah əmr edir ki, xoruzun səsini kəsmək üçün pulu onun əlindən alsınlar. Kuklalarla hazırlanmış tamaşada əsas hadisələr də bundan sonra başlayır. Xoruzun səsini kəsə bilməyən padşah gülüş hədəfinə çevrilir. Bir sıra nağıllarımızda olduğu kimi burada da padşaha sözlə yanaşı, öz əməli və ağlı ilə təsir göstərmək, onu ədalətə çağırmaq əsas mövzudur. Tamaşada həm də tərbiyəvi fikir aşılanır, lovğalıq, tamahkarlıq, zorakılıq, pula hərislik tənqid edilir.

“Qızıl xoruz” tamaşası məktəbəqədər və kiçik yaşlı məktəbli uşaqlar üçün nəzərdə tutulmuşdur. Tamaşadakı Elşən, Xoruz, Padşah, Vəzir, Fərraş, Naib, Aşbaz, Rəqqasə, Qonaq, Nənə surətlərini teatrın aktyorları Ləman Əhmədova, Süleyman Süleymanov, İlham Babayev, Mibad Nəbiyev, İlqar Babayev, Arzu Süleymanov, Əfqanə Ələsgərova, Vəsmə Quliyeva, Ulduz Süleymanova təbii və canlı səsləndirirlər.

Tamaşanın quruluşçu rejissoru, Naxçıvan Muxtar Respublikasının Əməkdar mədəniyyət işçisi Nadir Hüseynov, quruluşçu rəssamı Rəfael Qədimov, bəstəkarı Əli Məmmədovdur.

Sonra Xalq artisti Kamran Quliyev, teatrın baş rəssamı Rəfael Qədimov, teatrın ədəbi hissə müdiri Durna Təhməzova , bədii quruluş hissə müdiri Çimnaz Gözəlova və başqaları çıxış edərək tamaşa haqqında fikir və rəylərini bildiriblər.

Yaxın günlərdə tamaşanın balacalara göstərilməsi nəzərdə tutulub.

Naxçıvan Muxtar Respublikası
Mədəniyyət Nazirliyinin Mətbuat Xidməti
06.05.2019



      Əbrəqunus kəndində Culfa Rayon Mədəniyyət Şöbəsinin təşkilatçılığı ilə “Mirzə Cəlil” adlı tədbir keçirilib.

Tədbirdə Cəlil Məmmədquluzadənin Azərbaycan xalqının maariflənməsi sahəsində gördüyü işlərdən söhbət açılıb, onun ədəbiyyatımızda xüsusi yer tutan ölümsüz əsərləri barədə məlumat verilib. Daha sonra “Cəlil Məmmədquluzadənin həyatı və yaradıcılığı”, “Cəlil Məmmədquluzadənin publisistikası” mövzusunda çıxışlar dinlənilib. Tədbirin bədii hissəsində ədibin “Kamança” əsəri nümayiş etdirilib.



Naxçıvan Muxtar Respublikası
Mədəniyyət Nazirliyinin Mətbuat Xidməti
06.05.2019



      Mayın 7-də saat 19:00-da Naxçıvan şəhərinin baş meydanında - Heydər Əliyev Muzeyinin qarşısında Azərbaycan xalqının ümummili lideri Heydər Əliyevin anadan olmasının 96-cı ildönümü və Heydər Əliyev Fondunun yaranmasının 15 illiyi münasibətilə konsert olacaqdır.

Konsertdə ölkəmizin tanınmış incəsənət nümayəndələri - Xalq artistləri Aygün Kazımova, Zülfiyyə Xanbabayeva, Brilliant Dadaşova, Samir Cəfərov, Azər Zeynalov, əməkdar artist İlqar Muradov, Abbas Bağırov, müğənnilərdən Lalə Məmmədova, Günay İbrahimli, Elnur Məmmədov və Sərxan Bünyadzadə iştirak edəcəklər.


Naxçıvan Muxtar Respublikası
Mədəniyyət Nazirliyinin Mətbuat Xidməti
04.05.2019



      Bu il Azərbaycanın dahi şairi İmadəddin Nəsiminin anadan olmasının 650 illiyi təkcə ölkəmizdə deyil, dünyada geniş tədbirlərlə qeyd olunur.

Böyük Azərbaycan şairi və mütəfəkkiri İmadəddin Nəsimi klassik Azərbaycan poeziyasında öz yaradıcılıq yolu ilə seçilən, anadilli poeziyamızın inkişafında müstəsna xidmətləri olan söz ustadıdır. Nəsimi yaradıcılığında insanın əzəməti, şəxsiyyətin azadlığı və məhəbbət ideyası mühüm yer tutur. Onun müxtəlif ideyalarla zəngin bədii irsi özündən sonra Azərbaycan və digər xalqların bədii-ictimai fikrinin inkişafına güclü təsir göstərib.

Azərbaycan xalqının ümummilli lideri Heydər Əliyevin ölkəmizə birinci rəhbərliyi dövründə böyük ədibin irsinə yüksək qiymət verib. 1973-cü ildə YUNESKO-nun qərarı ilə Nəsiminin anadan olmasının 600 illiyi beynəlxalq miqyasda qeyd olunub, Azərbaycanda və Moskvada keçirilən yubiley tədbirlərində dünyanın bir çox ölkəsindən gəlmiş nümayəndələr iştirak ediblər. Bu dövrdə Nəsiminin xatirəsinin əbədiləşdirilməsi istiqamətində silsilə tədbirlər həyata keçirilmiş, onun ədəbiyyatda, incəsənətdə parlaq obrazı yaradılmış, eləcə də 1979-cu ildə ölkəmizin paytaxtında heykəli ucaldılmış, "Nəsimi" filmi çəkilmiş, adına məktəb, küçə, gəmi verilmiş, haqqında elmi tədqiqat əsərləri yazılmış, əsərləri çap edilmişdir. Bu gün AMEA-nın Dilçilik İnstitutu və Bakı şəhərinin rayonlarından biri Nəsiminin adını daşıyır.

Qüdrətli şairin yaradıcılığı Azərbaycan dili və ədəbiyyatı tarixinin tədqiqində yeni mərhələ açmışdır. Şairin əsərləri Azərbaycan Respublikası Prezidentinin “Azərbaycan dilində latın qrafikası ilə kütləvi nəşrlərin həyata keçirilməsi haqqında" 12 yanvar 2004-cü il tarixli Sərəncamına əsasən kütləvi tirajla nəşr olunaraq ölkə, o cümlədən muxtar respublika kitabxanalarına hədiyyə edilmişdir. 2017-ci ilin may ayında Parisdə YUNESKO-nun baş qərargahında Nəsiminin vəfatının 600 illiyi qeyd edilmiş, 2018-ci ilin sentyabr ayında ölkəmizdə ilk dəfə Nəsimi şeir, incəsənət və mənəviyyat festivalı keçirilmişdir.

Azərbaycan Respublikasının Prezidenti cənab İlham Əliyev 2018-ci il noyabrın 15-də “Böyük Azərbaycan şairi İmadəddin Nəsiminin 650 illik yubileyinin qeyd edilməsi haqqında” Sərəncam imzalayıb. Sərəncamda deyilir:

“İmadəddin Nəsimi Azərbaycan xalqının ümumbəşər mədəniyyətinə bəxş etdiyi qüdrətli söz ustalarındandır. O, Şərqin zəngin mədəni-mənəvi sərvətləri üzərində ucalmış və bədii söz sənətinin son dərəcə qiymətli incilərini meydana gətirmişdir. Mütəfəkkir şairin dərin poetik fikirlərlə fəlsəfi görüşlərin vəhdətində olub, dövrün elmi-fəlsəfi düşüncəsinin aydın ifadəçisinə çevrilmiş müstəsna əhəmiyyətli ədəbi irsi qədim köklərə və çoxəsrlik ənənələrə malik Azərbaycan ədəbiyyatı tarixində xüsusi mərhələ təşkil edir... Anadilli şeirin humanist ideyalarla, yeni məzmun, deyim tərzi və bədii lövhələrlə daha da zənginləşməsində unudulmaz şairin misilsiz xidmətləri vardır. Nəsiminin mənbəyini xalq ruhundan almış parlaq üslubu orta əsrlər Azərbaycan dilinin məna imkanlarını bütün dolğunluğu və rəngarəngliyi ilə əks etdirir”.

Nəsimi irsinin milli mədəni-mənəvi dəyərlərin təbliği baxımından xüsusi əhəmiyyətini nəzərə alan ölkə Prezidentinin 11 yanvar 2019-cu il tarixli Sərəncamı ilə 2019-cu il Azərbaycan Respublikasında “Nəsimi ili” elan edilmişdir. Bununla əlaqədar olaraq Naxçıvan Muxtar Respublikasında da Nəsiminin 650 illik yubileyi ilə bağlı müxtəlif tədbirlər keçirilir, görkəmli şairin zəngin bədii irsi öyrənilir, tədqiq və təbliğ olunur. M. S. Ordubadi adına Naxçıvan Muxtar Respublika Kitabxanasında fevral ayından başlayaraq böyük şairlə bağlı tədbirlərə start verilib, sərgi yaradılıb, şairin əsərlərinin və onun haqqında yazılmış elmi əsərlərin biblioqrafik icmalı hazırlanıb. Mart ayında böyük şairin yubileyi ilə bağlı Şərur rayonunda tədbir keçirilib. Muxtar respublikanın rayonlarındakı kitabxanalarda da Nəsimi ilə bağlı tədbirlərin keçirilməsi nəzərdə tutulur. Bundan başqa ədəbiyyat profilli muzeylərdə də böyük şairin yubileyi ilə bağlı tədbirlər hazırlanıb keçirilməsi planlaşdırılır.

Böyük Azərbaycan şairi və mütəfəkkiri Nəsiminin ədəbiyyat və ədəbi dil tariximizdə yüksək yeri vardır. Nəsimi ədəbiyyat tariximizdə fəlsəfi qəzəlin ilk kamil nümunəsini yaratmış ustad şairidir. Əruz vəzninin formalaşmasında misilsiz xidmətlər göstərən filosof şairin əsərləri Yaxın və Orta Şərq xalqları ədəbiyyatına, İslam Şərqinin bir sıra şairlərinin yaradıcılığına təsir göstərmiş, yeni ədəbi məktəb yaratmışdır.

Altı yüz ildən çoxdur ki, böyük şairimiz – böyük bir coğrafi məkanda mərdlik, fədakarlıq və iradə rəmzi kimi özünə abidə ucaltmışdır. Öz ideyaları uğrunda mübarizə aparan, hətta son nəfəsində də öz ideyasından dönməyən bu böyük tarixi şəxsiyyətin yaradıcılığı haqsızlığa, ehkamçılığa, nadanlığa, zülmə, ədalətsizliyə qarşı orta əsr dünyasında parlayan bir günəşdir. Dərin dini-fəlsəfi biliyə malik sənətkar ana dilimizlə yanaşı ərəb və fars dilində də ölməz əsərlər yaratmışdır. Onun qəzəllərində, rübailərində hürufiliyin müddəaları, şairin fəlsəfi görüşləri, həyat, dünya və kainat haqqında düşüncələri sənətkarlıqla ifadə edilmişdir.

Nəsimi poeziyasında mübarizə ruhu qüdrətlə tərənnüm etdirilir. Mübarizə ruhu bu poeziyanın əsas cövhəridir. Şairin fikrincə, ilahi varlıq səviyyəsinə yüksələn insan kamil olduğu zaman dünyanın sirlərinə vaqif olacaq, ədalətli cəmiyyət yaranacaqdır. Nəsimi şeirlərində ilhamla vəsf olunan kamil insan obrazı əzəmət və əyilməzlik simvoludur. Bu baxımdan “Məndə sığar iki cahan, mən bu cahana sığmazam” misrası ilə başlayan qəzəl Nəsimi yaradıcılığının kamil nümunəsidir.

Heç şübhəsiz ki, şair mürəkkəb və zəngin bir yaradıcılıq yolu keçmişdir. Yaradıcılığa aşiqanə lirik şeirlərlə başlayan gənc Nəsimi sonralar dövrün siyasi, ictimai, əxlaqi mövzularında əsərlər yazmışdır. Bu şeirlərdə, xüsusilə gənclik illərində yazdığı şeirlərdə insana məhəbbət, insan gözəlliyinin tərənnümü aparıcı mövzudur. Nəsiminin didaktik-tərbiyəvi mövzulu şeirlərində acgözlük, paxıllıq, xudpəsəndlik, riyakarlıq, xəyanət kimi yaramaz sifətlər qətiyyətlə pislənir.

Nəsimi poeziyası üsyankarlığı ilə seçilir. Şair qaranlıq bir mühitdə insanları və xalqları dostluğa, gözəlliyə, hünərli olmağa, buxovlardan azad olmağa səsləyir. Nəsimi həyat və etiqad qarşısında insanın vəzifələrini doğru başa düşmək üçün ayıq və cəsarətli olmağı tələb edir. Böyük şair feodal dünyasının ağır, amansız həyatından, hökmdarların zülm və özbaşınalığından şikayətlənir. O, zəmanəsindən narazı olmasına baxmayaraq ümidsizliyə qapılmır, ömrü bəxtiyar keçirməyə çağırır. Şair xalqları bir-birinə yaxınlaşdıran, mehriban edən bir amala doğru gedir ki, bununla da bizim müasirimizə çevrilir. Böyük sənətkar dini ixtilafları pisləyir, məzhəb ayrılığına qarşı çıxır. İnsanı bir-birinə düşmən edən mənasız məzhəb ayrılıqları Nəsimi yaradıcılığında qətiyyətlə rədd edilir. Şairin insanpərvərliyinə qida verən məfkurə onun bütün yaradıcılığında özünü göstərməkdədir.

Nəsimi yaradıcılığında hürufiliyin qüvvətli təsiri danılmazdır. Lakin Nəsimi yaradıcılığının yalnız hürufi ideyalarının təbliğindən ibarət olduğunu demək doğru olmazdı. Şair olaraq o, həmişə həyatı duymuş, insana böyük qiymət vermiş, gözəlliyi, azadlığı tərənnüm etmişdir.

İmadəddin Nəsimi öz əbədiyaşar yaradıcılığı ilə Azərbaycan ədəbiyyatına qiymətli yeniliklər gətirmiş, poeziyamızın inkişafına təkan vermişdir. O, Azərbaycan ədəbiyyatına humanist, üsyankar bir şair kimi əbədi daxil olmuş, şeirimizi mövzu, fikir və forma baxımından zənginləşdirmişdir. Nəsimi dilinin leksikası dilimizin altı yüz il bundan əvvəlki zənginliyini bu günümüzə daşımaqdadır. Şair folklorumuzun əlvanlığını da dilimizə qataraq möhtəşəm bir sənət dünyası yaratmışdır.
Natəvan Qədimova
Naxçıvan Muxtar Respublikasının Mədəniyyət naziri
“Nuhçıxan” İnformasiya Agentliyi
29.04.2019



      Mayın 3-də Naxçıvan şəhərindəki "Gənclik" Mərkəzində Naxçıvan Musiqi Kollecinin Xalq Çalğı Alətləri Orkestrinin hesabat konserti olub.

Orkestr üzvlərinin ifasında tanınmış bəstəkarlar Ü.Hacıbəylinin, S.Ələsgərovun, Q.Qarayevin, Niyazinin, R.Əfəndiyevin, X.Cəfərovun, Q.Hüseynlinin, H.Xanməmmədovun və Dinikunun yaradıcılığından süita və mahnılar müsiqisevərlərə təqdim edilib. Orkestrin müşayiəti ilə kamançada Ülviyyə Babazadənin, Ruhiyyə Babazadənin, Fəzail Paşayevin, tarda Əfsun Məmmədovun, Məmməd Məmmədlinin, Murad Behbudovun, qanunda İnci Bağırlının, balaban ifaçısı Sərxan Əliyevin və Naxçıvan Musiqi Kollecinin xor kollektivinin ifaları tamaşaçılar tərəfindən alqışlarla qarşılanıb.

Naxçıvan Muxtar Respublikası
Mədəniyyət Nazirliyinin Mətbuat Xidməti
04.05.2019



      Naxçıvan Musiqi Kollecinin tələbəsi, nağara ifaçısı Nəcəf Hacılı aprelin 2-dən 5-dək Latviyanın paytaxtı Riqa və İsveçin paytaxtı Stokholmda keçirilən 1-ci Beynəlxalq İncəsənət festival-müsabiqəsində iştirak edib və festival-müsabiqəsində 1-ci yerə layiq görülüb. Həmyerlimiz festivalın Stokholmda keçirilən möhtəşəm Qala konsertində də uğurla çıxış edib.

Qeyd edək ki , nağara ifaçısı Nəcəf Hacılı (17-19 yaş qrupu) 2019-cu ilin mart ayında Bakı şəhərində Rəşid Behbudov adına Dövlət Mahnı Teatrında keçirilən “Testene Art Baku” III Beynəlxalq İncəsənət festival- müsabiqəsinin “Qran Pri” mükafatçısı olub və “Testene Art” Beynəlxalq Mədəniyyət Assosiasiyasının dəvəti ilə 1-ci Beynəlxalq İncəsənət festival müsabiqəsində iştirak edib.

Naxçıvan Muxtar Respublikası
Mədəniyyət Nazirliyinin Mətbuat Xidməti
04.05.2019



      “Naxçıvan” Universitetinin əməkdaşları Zülfüqar Zülfüqarov və İqtisad üzrə fəlsəfə doktoru Əli Cabbarovun ABŞ-da nəşr edilən beynəlxalq “SciTech Central” elmi-araşdırmalar jurnalında məqalələri dərc edilib.

İngilis dilində yayımlanan “Thecastle of Alinja: Machu Picchu of Azerbaijan. Rooftourismin Nakhchivan” (Azərbaycanın Maçu-Piççusu Əlincəqala. Naxçıvanda zirvə turizmi) məqaləsində müəlliflər qədim Əlincəqala haqqında amerikalı oxuculara geniş məlumat veriblər. Əmir Teymura qarşı 14 il müqavimət göstərən qalanın Azərbaycan tarixində yeri, coğrafi mövqeyi, ərazisi, 2016-cı ildə yenidən bərpa edilməsi və bu gün dağ turizmində tutduğu xüsusi mövqe yazıda yer alıb. “Görənlər bu qalanı Perudakı Maçu-Piççu ilə müqayisə edirlər. Amma o da faktdır ki, Maçu-Piççu 16-cı əsrdə inşa edilib. Əlincəqalanın tarixi isə Perudakı bu qaladan min il öncəyə gedib çıxır”- deyə məqalədə məlumat verilir. Yazıda həmçinin ekstremal dağ turizmi həvəskarlarının Əlincəqalada unudulmaz anlar yaşayacağı diqqətə çatdırılır və zirvə turizminin əhəmiyyəti vurğulanır.

Qeyd edək ki, ABŞ-ın beynəlxalq “SciTech Central” elmi-araşdırmalar jurnalı turizm və hotel biznesi istiqmətində yazılar dərc edilən nüfuzlu dərgidir.

Naxçıvan Muxtar Respublikası
Mədəniyyət Nazirliyinin Mətbuat Xidməti
04.05.2019



      Mayın 3-də M.T.Sidqi adına Naxçıvan Dövlət Kukla Teatrı tanınmış yazıçı Əyyub Abbasovun “Keçinin qisası” tamaşasını Sədərək Rayon Mədəniyyət Sarayında uşaq və məktəblilərə göstərmişdir.

Tamaşadan əvvəl teatrın bədii rəhbər – direktoru, Xalq artisti Şirzad Abutalıbov çıxış edərək balaca tamaşaçılara Naxçıvan Dövlət Kukla Teatrının keçdiyi yaradıcılıq yolu haqqında qısa məlumat verib. Qeyd edilib ki, teatr uşaq və yeniyetmələrin milli-mənəvi dəyərlər ruhunda tərbiyəsində, estetik zövqünün formalaşmasında mühüm rol oynamışdır. 1989-cu ildə yaradılan teatr xarici ölkələrdə də qastrol səfərlərində olmuş və teatr fevtivallarında iştirak edərək tamaşaçı sevgisi qazanıb. Bildirilib ki, teatrın “Niyyət açarı”, “Sirli sözlər”, “Göyçək Fatma”, “Qoğalın sərgüzəşti”, “Qırmızı papaq” və başqa tamaşaları uşaqlar tərəfindən maraqla qarşılanıb.

Azərbaycan xalq nağılının motivləri əsasında hazırlanmış “Keçinin qisası” tamaşasında cərəyan edən hadisələr alleqorik şəkildə canlandırılır. Keçi xeyirxahlığın, mərhəmətin rəmzidir. Tamaşadakı Qurd surəti isə mənfi qüvvələri, ədalətsizliyi təmsil edir. “Keçinin qisası” tamaşasında teatrın tanınmış aktyorları rol almışlar. Aktrisa Vəsmə Quliyeva, aktrisa Ulduz Süleymanova, aktrisa Əfqanə Ələsgərova, aktyor Arzu Səfərov, aktyor İlham Babayev, aktyor Süleyman Süleymanov, aktyor İlqar Babayev ifalarında məşhur xalq nağılının qəhrəmanları uşaqlar və məktəblilər tərəfindən maraqla qarşılanmışdır. Xüsusilə Keçinin öz balalarını xilas etməsi üçün Qurdla döyüşə getmə səhnəsi balacalar tərəfindən alqışlarla qarşılanıb. Keçinin Qurda qalib gəlməsi və tamaşanın nikbin sonluqla bitməsi xeyrin şər qüvvələr üzərində qələbəsi kimi səslənir.

“Keçinin qisası” tamaşasının quruluşçu rejissoru Naxçıvan Muxtar Respublikasının Əməkdar mədəniyyət işçisi Nadir Hüseynov, rəssamı Rəfael Qədimov, bəstəkarı Əli Məmmədovdur. Tamaşada səslənən şən mahnılar hadisələrin gedişi ilə uyğunluq təşkil edir. Tamaşada rollarını canlandıran aktyorlar olduqca təbii təsir bağışlayır.

Tamaşa uşaq və məktəblilərə xoş əhval-ruhiyyə bəxş edib.

Naxçıvan Muxtar Respublikası Mədəniyyət Nazirliyinin Mətbuat Xidməti
03.05.2019



      1-3 may tarixlərində Naxçıvan Muxtar Respublikası Mədəniyyət Nazirliyinin təşkil etdiyi “Keçmişdən bu günə Naxçıvan yallıları” adlı yallı müsabiqəsinin Şərur Rayon Mədəniyyət Sarayında və Naxçıvan Dövlət Uşaq Teatrında seçim turları keçirilib.

Müsabiqənin əsasnaməsinə əsasən, qeyri-peşəkar şəkildə fəaliyyət göstərən yallı dərnəkləri üzvlərinin, yallı qruplarının və həvəskar kollektivlərin iştirak etdiyi seçim turlarına muxtar respublikanın Şərur, Babək, Ordubad, Culfa, Kəngərli, Şahbuz və Sədərək rayonlarından, eləcə də ali və orta ixtisas təhsil müəssisələrindən kollektivlər qatılmışlar. Münsiflər heyəti tərəfindən on ballıq sistemlə qiymətləndirmə aparılan seçim turlarında Şərur rayon Yuxarı Aralıq Kənd Mədəniyyət Evinin “Bahar”, Kəngərli Rayon Mədəniyyət Sarayının “Sarı gəlin”, Şahtaxtı Kənd Mədəniyyət Evinin “Sevinc”, Sədərək Rayon Mədəniyyət Sarayının “Tejgar”, Culfa Rayon Mədəniyyət Sarayının “Haçadağ”, Babək rayon Kültəpə Kənd Mədəniyyət Evinin “Məhsəti”, Ordubad Rayon Mədəniyyət Sarayının “Dübəndi”, Naxçıvan Dövlət Universitetinin “Yallı və rəqs”, Naxçıvan Tibb Kollecinin “Birlik” və Naxçıvan Müəllimlər İnistitutunun “Məhəbbət” yallı kollektivləri müsabiqənin əsas turunda iştirak hüququ qazanıblar.

Məlumat üçün qeyd edək ki, iyun ayının birinci ongünlüyündə müsabiqənin əsas turu keçiriləcək. Əsas turda qiymətləndirmə iştirakçı kollektivlərin ifaları “geyim və səhnə mədəniyyəti”, “ifaçılıq məharəti”, “kollektiv hazırlığı” və “vaxta əməl olunması” meyarları üzrə aparılacaq. Bir I, bir II və bir III yerlərin müəyyənləşdirildiyi müsabiqədə qaliblər Naxçıvan Muxtar Respublikası Mədəniyyət Nazirliyinin diplomları ilə təltif olunacaqlar. Qaliblərin mükafatlandırılması müsabiqənin yekun konsertində olacaq.

Naxçıvan Muxtar Respublikası Mədəniyyət Nazirliyinin Mətbuat Xidməti
03.05.2019



      Naxçıvan Dövlət Tarix Muzeyinə Babək rayonunun Nehrəm kənd sakini, Azərbaycan Respublikasının Əməkdar mədəniyyət işçisi Akif Hacıyev, Aşağı Buzqov kənd sakini Elman Bayramov, Naxçıvan şəhər sakinləri Hüseyn Kazımov və Rəcəb Rəcəbov tərəfindən qədim tariximizə, zəngin mədəniyyətimizə aid saxsı və mis məişət əşyaları, toxuculuq və əkinçiliklə bağlı alətlər və İkinci Dünya müharibəsi iştirakçılarına aid şəxsi əşyalardan ibarət 241 ədəd yeni eksponat təqdim edilib.

Bu münasibətlə mayın 2-də Naxçıvan Dövlət Tarix Muzeyində keçirilən tədbirdə çıxış edən Naxçıvan Muxtar Respublikasının mədəniyyət naziri Natəvan Qədimova bildirib ki, muzeylər zamanın müxtəlif məqamlarını özündə yaşadan, ötən əsrlərin müxtəlif tarixi hadisələrindən xəbər verən eksponatları komplektləşdirən, qoruyan, saxlayan, öyrənən, nümayiş etdirən maddi-mənəvi xəzinədir. Muzey həm də tarixi keçmişə şahidlik edən, keçmişimizi və bu günümüzü gələcəyə çatdıran ən yaxşı bələdçidir. Muzeylərin əsas vəzifəsi əşyaların və eksponatların, sadəcə, qorunub öyrənilməsi deyil, həm də onu təbliğ etməkdən ibarətdir.

Muxtar respublikada muzey işinin inkişaf tarixindən danışan nazir diqqətə çatdırıb ki, XIX əsrin sonlarında böyük yazıçı və dramaturq Cəlil Məmmədquluzadə Nehrəm kənd məktəbində muzey yaratmaq təşəbbüsü ilə Xalq Məktəbləri İdarəsinə yazılı müraciət etmiş və Azərbaycanda ilk dəfə olaraq bu kənd məktəbində Naxçıvanın tarixinə dair maddi-mədəniyyət nümunələrinin toplandığı muzey yaradıb.

"Qədim diyarımızda da muzeylərin fəaliyyətinin canlandırılması, yeni muzeylərin yaradılması sahəsində mühüm işlər görülür, bu mədəniyyət ocaqları muzeyşünaslığın yeni nailiyyətlərinə əsaslanaraq qurulur, Azərbaycan tarixinin yeni uğurlu səhifələri muzey ekspozisiyalarında əksini tapır", - deyən Natəvan Qədimova bildirib ki, Naxçıvan Muxtar Respublikası Ali Məclisi Sədrinin diqqət və qayğısı nəticəsində muxtar respublikada tarix-mədəniyyət abidələrinin qorunması, onların bərpası və konservasiyası son illər ərzində geniş vüsət alıb, tariximizin və mədəniyyətimizin saxlanc yeri olan yeni-yeni muzeylər istifadəyə verilib, onların maddi-texniki bazası möhkəmləndirilib.

Qeyd edilib ki, bu gün Naxçıvan Muxtar Respublikası Mədəniyyət Nazirliyinin tabeliyində 30 muzey və muzeytipli müəssisə fəaliyyət göstərir. Muxtar respublikanın muzeylərində xalqımızın tarixini, həyat tərzini, adət-ənənələrini özündə əks etdirən 140 mindən çox maddi-mədəniyyət nümunələri mühafizə olunaraq qorunub saxlanılır. Ötən il Naxçıvan Duz Muzeyi, Qarabağlar Türbə Kompleksi, Şərur Rayon Tarix-Diyarşünaslıq Muzeyi öz qapılarını ziyarətçilərinin üzünə açmışdır.

Diqqətə çatdırılıb ki, muxtar respublikada muzey fondlarının zənginləşdirilməsi, onların yeni eksponatlarla təmin olunması daim diqqət mərkəzində saxlanılır. Bu prosesdə muzeylərin əməkdaşları və muxtar respublika vətəndaşları yaxından iştirak edirlər. Ötən il muxtar respublika muzeylərinə 1564 ədəd, bu ilin ilk 4 ayı ərzində isə 571 ədəd eksponat daxil olub.

Bildirilib ki, bu günədək muxtar respublikada fəaliyyət göstərən müxtəlif profilli muzeylərdə bir sıra təqdimat mərasimləri keçirilmişdir. Bunlar arasında maddi-mədəniyyət nümunələrinin, qədim əlyazma və kitabların, rəsm əsərlərinin təqdimat mərasimlərini xüsusilə qeyd etmək olar. Bu gün keçirilən təqdimat mərasimi öz spesifikasına görə fərqlənir. Böyük Vətən Müharibəsinin 74 illiyi ərəfəsində vətənini qorumaq uğrunda bu müharibəyə qoşulmuş həmvətənlərimizin ailələri tərəfindən onlara məxsus şəxsi əşyaların muzeyə hədiyyə edilməsi bu sahədə görülən işlərə böyük töhfədir. Bu həm də muzeylərimizə olan etimaddan irəli gəlir. Böyük Vətən Müharibəsi veteranları Kazım Kazımovun və Qadir Rəcəbovun övladları Hüseyn Kazımov və Rəcəb Rəcəbov tərəfindən muzeyə təqdim olunan yeni eksponatlar muzeyimizin fondunun və ekspozisiyasının daha da zənginləşməsinə imkan verəcəkdir

"Tariximizi, keçmişimizi və mədəniyyətimizi qorumaq hər birimizin vətəndaşlıq borcudur", - deyən nazir mədəniyyətimizin və tariximizin təbliğinə göstərdiyi böyük diqqət və qayğıya görə Naxçıvan Muxtar Respublikasının Ali Məclisinin Sədrinə mədəniyyət işçiləri adından minnətdarlıq edib.

Tədbirdə Naxçıvan Dövlət Tarix Muzeyinin direktoru, Naxçıvan Muxtar Respublikasının Əməkdar Mədəniyyət işçisi Nizami Rəhimov, eksponat tədqim edənlərdən Hüzeyn Kazımov və Rəcəb Rəcəbov çıxış edərək muxtar respublikadakı muzey ekspozisiyalarının zənginləşməsində bu cür təqdimatların keçirilməsinin əhəmiyyətindən danışmış, muxtar diyarımızda muzey fəaliyyətinin yüksək səviyyədə təşkilinə görə minnətdarlıq etmişlər.

Naxçıvan Muxtar Respublikası Mədəniyyət Nazirliyinin Mətbuat Xidməti
02.05.2019



      Aprelin 29-da Naxçıvan Şəhər Ərtoğrol Cavid adına Uşaq Musiqi və Bədii Sənətkarlıq Məktəbinin qanun ixtisası üzrə müəllimi Sevinc Babayevanın və onun şagirdlərinin “Gənclik” Mərkəzində Naxçıvan Muxtar Respublikasının 95 illiyinə həsr olunmuş konserti olmuşdur.

Tədbirin aparıcısı bildirmişdir ki, son 20 ildən artıq dövrdə qədim diyarımızın siması dəyişmiş, şəhər, kənd və rayon mərkəzlərində irimiqyaslı tikinti-quruculuq, abadlıq və bərpa işləri həyata keçirilmiş, tarixə, mədəniyyətə, səhiyyəyə, təhsilə qayğı artmış, yeni infrastruktur obyektləri tikilmiş, muxtar respublika inkişaf və intibaha qovuşmuşdur.

İstedadlı qanun ifaçısı Sevinc Babayevanın ifa etdiyi Adil Gərayın “Baxça-Kürd”, Zakir Bağırovun “Rapsodiya”, Dadaş Dadaşovun “Skerso”, Səid Rüstəmovun “Qaytağı”, Azər Rzayevin “Cahargah rapsodiyası” musiqi əsərləri alqışlarla qarşılanmışdır.

Konsertdə istedadlı müəllimin şagirdlərindən Fidan Şirəliyeva, Nuray Tağılı, Nilgün Məmmədli, Xalidə Əsgərova, Ləman Kəngərli, Sona Hüseynovanın ifasında Azərbaycan bəstəkarlarından Ü.Hacıbəyov, S.Ələsgərov, S.Rüstəmov, A.Gərayın, rus bəstəkarlarından P.Çaykovski, L.Dimitresku, M.Blanterin, gürcü bəstəkarı R.Laqidze və başqalarının musiqiləri də səslənmişdir.

Konsertə Naxçıvan Muxtar Respublikasının Əməkdar müəllimi Nərminə Qədimova konsertmeysterlik etmişdir. Qanun ifaçılarını zərb alətlərində Naxçıvan Musiqi Kollecinin tələbələri, Qran-Pri mükafatçısı Nəcəf Hacılı və Mahir Rüstəmov müşayiət etmişlər.

Bir saatdan artıq davam edən qanun musiqi konserti tamaşaçılarda xoş ovqat yaratmışdır.

Konsertdən sonra Naxçıvan Muxtar Respublikasının Mədəniyyət naziri Natəvan Qədimova çıxış edərək muxtar respublikamızda mədəniyyət və incəsənətin bütün sahələrinə, o cümlədən musiqiyə böyük diqqət və qayğının göstərildiyini qeyd edib, konsert iştirakçıları adından Naxçıvan Muxtar Respublikası Ali Məclisi Sədrinə minnətdarlığını bildirib.

Nazir məktəbin rəhbərliyini, istedadlı müəllim Sevinc Babayevanı və şagirdləri maraqlı konsert münasibətilə təbrik etmiş, onlara təhsildə uğurlar arzulamışdır. Konsertin bütün təşkilatçılarına təşəkkür edib.

Qeyd edilib ki, Naxçıvan Şəhər Uşaq Musiqi və Bədii Sənətkarlıq Məktəbi 2002-ci ildən görkəmli musiqişünas və rəssam, tədqiqatçı Ərtoğrol Cavidin adını daşıyır. Bu musiqi məktəbi muxtar respublikanın seçilən musiqi məktəblərindəndir.

Bildirilib ki, Sevinc Babayeva Naxçıvan Musiqi Kollecini bitirdikdən sonra Naxçıvan Dövlət Universitetinə incəsənət fakültəsinin qanun ixtisasına daxil olmuş və buranı bitirmişdir. O, I Respublika müsabiqəsinin Qran-Pri mükafatına layiq görülmüşdür. Sevinc Babayeva Azərbaycanda və muxtar respublikamızda keçirilən bir sıra müsabiqələrdə uğurla iştirak etmiş və diplomlara layiq görülmüşdür. Bu il Sevinc Babayeva daha bir uğuru ilə musiqisevərləri sevindirmişdir. İstedadlı qanun ifaçısı bu ilin martında Bakı şəhərində keçirilən “Testene ART Baku” III Beynəlxalq İncəsənət festival-müsabiqəsində iştirak etmiş və I dərəcəli diplomla təltif edilmişdir.

Nazir gənc musiqiçi kadrların hazırlanmasında məktəb kollektivinə yeni uğurlar arzulamışdır.

Naxçıvan Muxtar Respublikası Mədəniyyət Nazirliyinin Mətbuat Xidməti
29.04.2019



      Bu il 10 illik yubileyini qeyd edən Babək Rayon Xalq Teatrı indiyə kimi bir çox tamaşaları uğurla səhnələşdirib. Əfqan Əsgərovun “Qız atası” komediyası ilə yenidən tamaşaçıların görüşünə gəlməyə hazırlaşan teatrın kollektivi artıq məşqlərə başlayıb.

Qeyd edək ki, tamaşanın quruluşçu rejissoru Yusif Əliyevdir. Bu yeni tamaşada Azərbaycan Respublikasının Əməkdar artisti Vidadi Rəcəbli Cavad kişi,Stella Babayeva Pəri xanım, İsmayıl Qurbanov Kərəm baba, Nuray Mehdiyeva Rəna, Rasim Qasımov Heydər, Elsevər Məmmədov Nəroğlan, Sunay Ağayev isəƏhməd obrazını canlandıracaqlar.

Tamaşa may ayının sonlarında ictimaiyyətə təqdim olunacaq.

Naxçıvan Muxtar Respublikası Mədəniyyət Nazirliyinin Mətbuat Xidməti
27.04.2019



      Aprelin 27-də Naxçıvan Dövlət Uşaq Teatrı böyük yazıçı və dramaturqumuz Cəlil Məmmədquluzadənin “Çay dəsgahı” pyesinin motivləri əsasında hazırladığı “Bu günün çay dəsgahı” iki şəkilli alleqorik komediyasını Ordubad Rayon Mədəniyyət Sarayında rayonun uşaq və məktəbliləri üçün nümayiş etdirib.

Zahirən təmsilvari və əyləncəli təsir bağışlayan, ədəbiyyatımızda ilk alleqorik və mənzum dram əsəri olan bu dram əsərinin motivləri əsasında hazırlanan tamaşa bu günümüzlə əlaqələndirilib. Qeyd etmək lazımdır ki, bu əsər milli uşaq dramaturgiyamızda ilk nümunə kimi də diqqəti cəlb edə bilər. Böyük yazıçının əsərindəki əsas mövzu saxlanılsa da tamaşanın quruluşçu rejissoru Nurbəniz Niftəliyeva əsərin personajlarını həm də müasir dövrün elmi-texniki imkanları ilə uyğunlaşdırmağa çalışıb və personajların hamısına müasir adlar da verməyi unutmayıb. Əsərin süjet xətti müqəssirin tapılması üzərində qurulmuşdur. Tamaşadakı bütün dialoqlar da buna xidmət edir. Somavar (Sarvan), Padnos (Pərvanə), Truba (Totu), Çaynik (Ceka), Maşa (Məşdi), Qaşıq (Qoşqar), Stəkan (Sitarə), Nəlbəki (Nüşabə) həm də cansız əşyadan canlı personaja çevriliblər.

Əsərin yalnız bir canlı obrazının – Nökər Əlinin adı dəyişməyib.

Tamaşanın əsas mövzusu isə quruluşçu rejissor tərəfindən saxlanılıb. Rəqslərin də quruluşunu verən Nurbəniz Niftəliyeva və musiqi tərtibatçısı Mirsaleh Seyidov tamaşaya dinamiklik gətirə biliblər. Tamaşadakı rolları isə Uğur Nəsirli, Nurlan Qafarov, Səkinə Məmmədova, Nihad Mahmudov, Mirmehdi Seyidov, Tuncay Əşrəfov, Ülvi Bədəlov, Aysu Dünyamalıyeva, Heyran Abdullayeva maraqla təqdim etməyi bacarıblar. Balaca aktyorlar tamaşada əslində iki surət canlandırırlar.

Qeyd edək ki, “Çay dəsgahı” pyesi əsasında C.Məmmədquluzadə adına Naxçıvan Dövlət Musiqili Dram Teatrında və M.T.Sidqi adına Naxçıvan Dövlət Kukla Teatrında vaxtilə eyni adlı tamaşa hazırlanıb.

Tamaşa maraqla qarşılanıb.

Naxçıvan Muxtar Respublikası Mədəniyyət Nazirliyinin Mətbuat Xidməti
27.04.2019



      Azərbaycan mədəniyyəti və elm tarixinin inkişaf prosesi haqqında tam təsəvvür yaradılmasında qədim əlyazma və kitabların mühüm rolu vardır. Bu kitab və əlyazmalar bir tərəfdən qədim kitab mədəniyyətimizin keçdiyi yola nəzər salmağa imkan verirsə, digər tərəfdən alimlərimizə yeni mənbələrin tədqiqata cəlb olunmasına şərait yaradır. Bu kitabların toplanması həm də kitab mədəniyyəti tariximizin fondunun zənginləşdirilməsi deməkdir.

Aprelin 26-da bununla bağlı Naxçıvan Muxtar Respublikası Mədəniyyət Nazirliyi tərəfindən qədim tarixə malik 22 əlyazma və kitab AMEA Naxçıvan Bölməsinin Əlyazmalar Fonduna hədiyyə olunub. Qeyd edək ki, qədim əlyazma və kitablar Nehrəm kənd sakini, Azərbaycan Respublikasının Əməkdar mədəniyyət işçisi Akif Hacıyev tərəfindən təqdim edilib.

Bu münasibətlə keçirilən tədbiri giriş sözü ilə AMEA Naxçıvan Bölməsinin sədri, akademik İsmayıl Hacıyev açaraq deyib ki, Mədəniyyət Nazirliyi tərəfindən qədim əlyazma və kitabların Əlyazmalar Fonduna hədiyyə edilməsi ənənəyə çevrilmişdir. Bu dördüncü təqdimatdır. 2005-ci ildə yaradılan Əlyazmalar Fondunda bu gün 400-dən çox qədim əlyazma və kitab toplanıb. Bu əlyazma və kitablar ədəbiyyat, tarix, coğrafiya, astronomiya, riyaziyyat, hüquq, əxlaq və digər sahələrə aiddir. Bu əlyazma və kitablar Azərbaycan, türk, ərəb, fars və başqa dillərdədir.

Akademik bildirib ki, əlyazma və kitablar əsrlər boyu İslam coğrafiyasının müxtəlif ölkələrinə yayılmış və əldən-ələ keçmişdir. Bu gün təqdim olunan kitablar arasında dərslik, tanınmış insanların həyatı ilə bağlı kitablar, şairlərin əsərləri vardır. Bunlardan 2-si əlyazma, 20-si isə çap kitablarıdır. Təqdim olunan kitablar Əlyazmalar Fondunda tədqiq və bərpa ediləcəkdir. İsmayıl Hacıyev qədim əlyazma və kitabları toplayıb Əlyazmalar Fonduna təqdim edənlərə minnətdarlığını bildirib.

Tədbirdə Naxçıvan Muxtar Respublikasının Mədəniyyət naziri Natəvan Qədimova çıxış edərək bildirib ki, bu gün nazirliyin tabeliyində 30 muzey və muzeytipli müəssisə fəaliyyət göstərir. Son illər ərzində muzeyləri ziyarət edənlərin sayı əhəmiyyətli dərəcədə artmış və muzey işçilərinin öhdəsinə daha böyük vəzifələr qoyulmuşdur. Eyni zamanda muzey fondlarının zənginləşdirilməsi, onların yeni eksponatlarla təmin olunması da daim diqqət mərkəzində saxlanılır. Bu işdə muzey əməkdaşları və muxtar respublika vətəndaşları yaxından iştirak edirlər. Ötən il muxtar respublika muzeylərinə 1564, bu ilin üç ayında isə 410 eksponat daxil olub. Toplanan eksponatların aksiyasında vətəndaşlar və məktəblilər yaxından iştirak ediblər. Sevindirici haldır ki, bu aksiyaya artıq yetişməkdə olan gənc nəsil – məktəblilər də qoşulub. Bu ilin yanvar ayında Şərur Rayon Tarix-Diyarşünaslıq Muzeyində eksponat təqdimatında Muğanlı kənd tam orta məktəbinin müəllim və şagirdlərinin iştirakı da bunu göstərir.

Nazir qeyd edib ki, bu kitab və əlyazmalar içərisində İslam mədəniyyəti və elmi ilə bağlı olan mənbələr alimlərimiz üçün maraq doğuran mənbələrdir. Keçmişin zəngin irsinin öyrənilməsi və toplanması həm də ilk növbədə Azərbaycan xalqının ictimai-siyasi tarixinin tədqiqi, mənəvi mədəniyyət və ayrı-ayrı coğrafiyaların mədəniyyətlərinin qarşılıqlı əlaqəsinin araşdırılması, bədii-estetik, fəlsəfə təfəkkür tarixinin yeni mənbələrinin aşkara çıxarılması baxımından dəyərlidir. Əlyazma kitabları insan zəkasının inciləridir, onların səsi əsrlərin dərinliklərindən gəlir. Hər bir əlyazma kitabı onu oxuyan alim və tədqiqatçının diqqətini cəlb edir. Natəvan Qədimova Naxçıvan Muxtar Respublikası Mədəniyyət Nazirliyi adından kitabları təqdim edən Azərbaycan Respublikasının Əməkdar mədəniyyət işçisi Akif Hacıyevə təşəkkürünü bildirib.

Nazir çıxışının sonunda mədəniyyətimizə, tariximizə göstərdiyi böyük diqqət və qayğıya görə Naxçıvan Muxtar Respublikası Ali Məclisinin Sədrinə bu sahədə çalışan əməkdaşlar adından dərin minnətdarlığını bildirib.

AMEA Naxçıvan Bölməsinin Əlyazmalar Fondunun direktoru, filologiya üzrə elmlər doktoru Fərman Xəlilov təqdim olunan kitablar haqqında ətraflı məlumat verərək deyib ki, Əlyazmalar Fondunda ən qədim kitablar orta əsrlər dövrünə aiddir. Təqdim olunan kitablar arasında Fərhad Ağazadənin “Ədəbiyyat məcmuəsi”, M.Ə.Sabirin “Hophopnamə”si, Əbu Nəsr Fərahinin “Nisabüs-sibyan” kitabları, “İran şahlarının tarixi”, “Astronomiya və coğrafiya məlumatları” xüsusilə maraq doğurur. Alim hədiyyə olunan kitablara görə minnətdarlıq edərək deyib ki, tarixi kitablar xalqın milli sərvətidir. Onları qoruyub gələcək nəsillərə çatdırmaq, tədqiq etmək hər birimizin vətəndaşlıq borcudur.

Sonda AMEA Naxçıvan Bölməsinə hədiyyə edilən kitablara baxış olub.

Naxçıvan Muxtar Respublikası Mədəniyyət Nazirliyinin Mətbuat Xidməti
26.04.2019



      Aprelin 26-da Babək Rayon Cəhri Kənd Uşaq Musiqi Məktəbinin xanəndəlik ixtisası üzrə müəllim və şagirdlərinin Babək Rayon Mədəniyyət Sarayında “Ritmik muğam kompozisiyası” adlı konsert proqramı olub.

Muğam sənəti Azərbaycan xalqının bədii yaradıcılığının və musiqi mədəniyyətinin zəngin sərvəti olmaqla nadir sənət nümunəsidir. Muğam xalqımızın dünya mədəni irsinə bəxş etdiyi ən böyük xəzinədir. Muğam sənətimizdə xalqımızın təfəkkürü və düşüncə tərzi öz əksini tapır. 2002-ci ildə UNESKO tərəfindən muğam sənəti “Bəşəriyyətin qeyri-maddi mədəni irsi reprezentativ siyahısı”na daxil edilmişdir.

“Ritmik muğam kompozisiyası”nda Cəhri Kənd Uşaq Musiqi Məktəbinin müəllimi Hünər Əliyev, şagirdləri Əli Mehralıyev, Həsən Babazadə, Ələkbər Sadiqovun ifasında muğamlarımız maraqla qarşılandı.

Qeyd edək ki, şifahi-professional Azərbaycan musiqisinin geniş yayılmış janrlarından olan ritmik muğamlar da başqa muğam dəsgahları kimi vokal instrumental hissələrinin müstəqilliyinə əsaslanan muğamlardır. Lakin ritmik muğamlar özünəməxsus səciyyəvi cəhətləri ilə seçilir. Ritmik muğamların da öz müstəqil adları vardır. Bu muğamlar fəal-emosional müqəddimə ilə başlayır və bütün bunlar sanki əsas melodiyada şərh edilir. Muğam dəsgahında olduğu kimi ritmik muğamlarda da sözün, qəzəlin seçiminə xüsusi diqqət yetirilir.

Muxtar respublikanın Əməkdar artisti Hünər Əliyev və onun şagirdlərinin ifasında “Ritmik muğam kompozisiyası” uğurlu alındı. Bir-birini əvəz edən “Heyratı”, “Arazbarı”, “Səmayi-şəms”, “Ovşarı”, “Qarabağ şikəstəsi” kimi ritmik muğamlar tamaşaçıda xoş ovqat yaratdı. “Heyratı”, “Qarabağ şikəstəsi” və başqa mərdlik, qəhrəmanlıq əhval-ruhiyyəsi aşılayan muğamlar alqışlarla qarşılandı.

Hünər Əliyev və onun istedadlı şagirdlərini musiqi məktəbinin Xalq Çalğı Alətləri Ansamblı müşayiət edirdi. Bədii rəhbəri Hünər Əliyev və konsertmeysteri Taleh Əliyev olan ansamblın üzvləri Taleh Əliyev (tar), Günel Babayeva (kamança), Nurlan Nuriyev (kamança), Cabir Vəliyev (ud), Sahil Qasımov (qarmon), Mahir Rüstəmov və Ramal Cəfərov (zərb alətləri) və başqalarının əməyi ilə hazırlanan “Ritmik muğam kompozisiyası” xoş təsir yaratdı. Uşaq musiqi məktəblərində muğamla bağlı bu qəbildən olan konsertlərin hazırlanması şagirdlərdə qədim və zəngin milli dəyərlərimizə sevgi və marağın artmasında da mühüm rol oynayır. Son illərdə uşaq və gənclərdə muğam sənətinə marağın artması da bunun göstəricisidir.

Babək rayon Cəhri kənd Uşaq Musiqi Məktəbinin konserti tamaşaçılarda xoş ovqat yaradıb.

Naxçıvan Muxtar Respublikası Mədəniyyət Nazirliyinin Mətbuat Xidməti
26.04.2019



      Aprelin 26-da Cəlil Məmmədquluzadə adına Naxçıvan Dövlət Musiqili Dram Teatrı Xaqani Əliyevin “Ehsan xan Kəngərli” tarixi dramı əsasında hazırladığı tamaşanı Sədərək Rayon Mədəniyyət Sarayında rayon sakinlərinə göstərmişdir.

“Ehsan xan Kəngərli” tarixi dramı XIX əsrin əvvəllərində Naxçıvan xanlığında baş verən ictimai-siyasi hadisələri əks etdirir. Rusiya-İran müharibəsi və Naxçıvanın ruslar tərəfindən işğal olunması əsərin əsas süjet xəttini təşkil edir.

İlk dəfə Naxçıvan teatrında səhnəyə qoyulan “Ehsan xan Kəngərli” tamaşasında Naxçıvan xanlığının düşdüyü çətin vəziyyətdən çıxış yolu axtaran Ehsan xanın siyasi düşüncələri və xüsusən ermənilərin Naxçıvana yerləşdirilməsinin qarşısını almaq üçün rus diplomatı Aleksandr Sergeyeviç Qriboyedovla apardığı söhbətlər olduqca maraq doğurur. Naxçıvanın gələcək taleyi ilə bağlı Kəngərli xanları arasında yaranan fikir ayrılığı və Ehsan xanın təşəbbüsü ələ alaraq xalqın taleyini hər şeydən üstün tutması əsərdə konfliktin gərginliyini daha da artırır.

Tamaşada Ehsan xanla yanaşı, Abbasqulu ağa Bakıxanovun da bədii obrazı diqqəti cəlb edir. Bakıxanov erməni fitnələrinin qarşısını almaq üçün Ehsan xana çıxış yolu tapmaqda kömək edir.

“Ehsan xan Kəngərli” tamaşasında dövrün ictimai-siyasi hadisələri faktlarla səhnəyə gətirilir ki, bu da tamaşaçını cəlb edir.

Bu maraqlı tamaşanın elmi məsləhətçisi akademik İsmayıl Hacıyev, quruluşçu rejissoru, xalq artisti Kamran Quliyev, quruluşçu rəssamı, Naxçıvan Muxtar Respublikasının Əməkdar rəssamı Əbülfəz Axundov, musiqi tərtibatçısı Azərbaycan Respublikasının Əməkdar mədəniyyət işçisi İmamqulu Əhmədovdur.

Tamaşada Azərbaycan Respublikasının Xalq artistləri Rza Xudiyev (Ehsan xan), Rövşən Hüseynov (Kalbalı xan), Həsən Ağasoy (Kərim xan), Azərbaycan Respublikasının Əməkdar artistləri Bəhruz Haqverdiyev (Şıxəli bəy), Əli Əliyev (Paskeviç), Əbülfəz İmanov (Safraz Saakov), aktyorlar Zəminə Məmmədova (Çimnaz xanım), Ələsgər Quliyev (Nəzərəli xan), Səyyad Məmmədov (Qriboyedov), Zakir Fətəliyev (Məmmədrza xan), Anar Eyvazov (rus zabiti), Nazlı Hüseynquliyeva (yaşlı qadın), Mehri Nəbiyeva (Nina Çavçavadze), Cəbrayıl Nəbiyev (Zeynal Sultan), Uğur Nəsirli (Əsgər) maraqlı obraz və personajlar yaratmışlar.

Tamaşa Sədərək rayon sakinləri tərəfindən maraqla qarşılanmışdır.

Naxçıvan Muxtar Respublikası Mədəniyyət Nazirliyinin Mətbuat Xidməti
26.04.2019



      Aprelin 26-da Naxçıvan şəhərindəki Gənclər Mərkəzində Naxçıvan Muxtar Respublikası Mədəniyyət Nazirliyinin təşkilatçılığı ilə Naxçıvan Musiqi Kollecinin tələbələri arasında “Lira” musiqili-intellektual oyunu keçirilib.

Oyun başlanmazdan əvvəl Naxçıvan Muxtar Respublikası Mədəniyyət Nazirliyinin baş məsləhətçisi Leyla Əlimərdanova çıxış edərək bildirib ki, bu gün “Lira” musiqili-intellektual oyununun IV mərhələsi keçirilir. Fərqlənən komandalar may ayında keçiriləcək final oyununda iştirak edəcəklər. Bu oyunların keçirilməsində məqsəd tələbələrin biliyinin artırılmasına, onların intellektual səviyyəsinin yüksəldilməsinə kömək göstərməkdir.

Qeyd edilib ki, bugünkü mərhələdə kollecin 3 komandası iştirak edir. Sonra oyunda yarışacaq “Simayi-Şəms”, “Köçəri” və “Bayatı-Şiraz” komandaları iştirakçılara təqdim edilib.

Oyunun şərtlərinə görə, ilk olaraq komandalar arasında seçim mərhələsinin keçirilməsi haqqında məlumat verilib. I və III turda görkəmli bəstəkarların həyat və yaradıcılığı, ümumi musiqi dünyagörüşünə dair suallar, II turda isə tələbələrə musiqi əsərlərini dinləmə yolu ilə təyin etmə formatında suallar veriləcək. Hər sualın düzgün cavabı 100 balla qiymətləndiriləcək. Sonda ən yüksək bal toplamış komanda finala vəsiqə qazanacaqdır.

Maraqlı və gərgin keçən musiqili-intellektual oyunda kollecin tələbələrinin şagirdləri bəstəkarlarla bağlı sualları cavablandırmaqda fəallıq göstəriblər. Onlar görkəmli Azərbaycan və dünya bəstəkarları əsərlərini dinləmə yolu ilə təyin ediblər, musiqinin ümumi-nəzəri məsələləri ilə bağlı sualları cavablandırıblar.

Bütün suallar cavablandırıldıqdan sonra ən yüksək bal toplamış komanda “Bayatı-Şiraz” komandası finalda iştirak etmək hüququ qazanmışdır. mükafatlandırılıblar.

Qeyd edək ki, Naxçıvan Musiqi Kolleci üzrə keçirilən “Lira” musiqili-intellektual oyununda birinci yerlərin qalibləri may ayında final mərhələsində qarşılaşacaqlar.

Naxçıvan Muxtar Respublikası Mədəniyyət Nazirliyinin Mətbuat Xidməti
26.04.2019



      Aprelin 25-də C.Məmmədquluzadə adına Naxçıvan Muxtar Respublika Ədəbiyyat Muzeyində Naxçıvan Muxtar Respublikası Mədəniyyət Nazirliyinin təşkilatçılığı ilə böyük Azərbaycan şairi İmadəddin Nəsiminin 650 illik yubileyi münasibətilə tədbir keçirilib.

Tədbirdə Naxçıvan Muxtar Respublikasının Mədəniyyət naziri Natəvan Qədimova giriş sözü ilə çıxış edərək bildirib ki, bu il Azərbaycanın dahi şairi İmadəddin Nəsiminin anadan olmasının 650 illiyi təkcə ölkəmizdə deyil, dünyada rəngarəng tədbirlərlə qeyd olunmaqdadır.

Böyük Azərbaycan şairi və mütəfəkkiri İmadəddin Nəsimi klassik Azərbaycan poeziyasında öz yaradıcılıq yolu ilə seçilən, ana dilli poeziyamızın inkişafında müstəsna xidmətləri olan söz ustadıdır. Nəsimi yaradıcılığında insanın əzəməti, şəxsiyyətin azadlığı və məhəbbət ideyası mühüm yer tutur. Onun müxtəlif ideyalarla zəngin bədii irsi özündən sonra gələn Azərbaycan şairlərinin yaradıcılığına və bir sıra xalqların bədii-ictimai fikrinin inkişafına güclü təsir göstərib.

Qeyd olunub ki, Azərbaycan xalqının ümummilli lideri Heydər Əliyevin birinci hakimiyyəti illərində, yəni 1973-cü ildə UNESKO-nun qərarı ilə Nəsiminin anadan olmasının 600 illiyi beynəlxalq miqyasda qeyd olunmuş, Azərbaycanda və Moskvada keçirilən yubiley təntənələrində dünyanın bir çox ölkəsindən gəlmiş nümayəndələr iştirak etmişlər. Bu dövrdə Azərbaycan ədəbiyyatı və incəsənətində Nəsimiyə bir sıra bədii əsərlər, rəsm əsərləri, musiqilər həsr olunmuş, bədii film çəkilmiş, Bakıda heykəli qoyulmuş, adına məktəb, küçə, gəmi verilmiş, haqqında elmi tədqiqat əsərləri yazılmış, əsərləri dönə-dönə çap edilmişdir. Bu gün AMEA-nın Dilçilik İnstitutu böyük şairin adını daşıyır. Paytaxtımızın bir rayonu Nəsiminin adına verilmişdir.

2017-ci ildə Fransanın paytaxtı Parisdə yerləşən UNESKO-nun baş qərargahında böyük Azərbaycan şairi Nəsiminin vəfatının 600 illiyininin qeyd olunması ölkə Prezidenti cənab İlham Əliyevin ədəbiyyatımıza verdiyi böyük önəmin bariz nümunəsidir. 2018-ci il noyabr ayının 15-də isə ölkə Prezidenti “Böyük Azərbaycan şairi İmadəddin Nəsiminin 650 illik yubileyinin qeyd edilməsi haqqında” Sərəncam imzalamışdır. Nəsiminin 650 illik yubileyi ilə bağlı tədbirlər sırasında Azərbaycan Respublikasının Prezidenti İlham Əliyevin 11 yanvar 2019-cu il tarixli Sərəncamı ilə 2019-cu ilin Azərbaycanda “Nəsimi ili” elan olunması xüsusilə böyük əhəmiyyət daşıyır və ölkəmizin hər yerində Nəsiminin bədii irsi ilə bağlı rəngarəng tədbirlərin keçirilməsinə stimul vermişdir. Muxtar respublikamızda da Nəsimi ilə bağlı müxtəlif tədbirlər keçirilməkdədir.

Vurğulanıb ki, altı yüz ildən çoxdur ki, dahi şairimiz böyük bir coğrafi məkanda mərdlik, fədakarlıq və iradə rəmzi kimi özünə abidə ucaltmışdır. Altı əsrdir öz idealları uğrunda mübarizə aparan, hətta son nəfəsində də öz ideyasından dönməyən bu böyük tarixi şəxsiyyətin irsi öyrənilir.

Nəsimi poeziyasında mübarizə ruhu qüdrətlə tərənnüm etdirilir. Mübarizə ruhu bu poeziyanın əsas cövhəridir. Şairin fikrincə, ilahi varlıq səviyyəsinə yüksələn insan kamil olduğu zaman dünyanın sirlərinə vaqif olacaq, real ədalətli cəmiyyət yaranacaqdır. Nəsimi şeirlərində ilhamla vəsf olunan kamil insan obrazı əzəmət və əyilməzlik simvoludur. Bu baxımdan “Məndə sığar iki cahan, mən bu cahana sığmazam” misrası ilə başlayan qəzəl Nəsimi yaradıcılığının kamil nümunəsidir.

Natəvan Qədimova deyib ki, Nəsimi şeirlərində dərin kədər, istilaçıların zülmünə və azğınlıqlarına etiraz motivləri də vardır. Bu kədər isə bəzən onun həyəcanlarının ifadəsi kimi özünü göstərir. Şair qaranlıq bir mühitdə insanları və xalqları dostluğa, gözəlliyə, hünərli olmağa, buxovlardan azad olmağa səsləyir. Böyük şair feodal dünyasının ağır, amansız həyatından, hökmdarların zülm və özbaşınalığından şikayətlənir, xalqa zülm edənləri həqiqi insan hesab etmir. Nəsimi zəmanəsindən narazı olmasına baxmayaraq ümidsizliyə qapılmır, ömrü bəxtiyar keçirməyə çağırır. Şair xalqları bir-birinə yaxınlaşdıran, mehriban edən bir amala doğru gedir ki, bununla da bizim müasirimizə çevrilir.

İmadəddin Nəsiminin ölməz irsi Azərbaycan xalqının milli-mənəvi dəyərlərinin və böyük arzularının, ideyalarının, duyğu və düşüncələrinin zəngin tükənməz xəzinəsidir. Ölkə Prezidentinin Sərəncamı ilə “Nəsimi ili” elan edilməsi böyük şair və mütəfəkkirə dövlət səviyyəsində verilən dəyərin və ehtiramın ifadəsidir. Eyni zamanda Sərəncam Azərbaycan mədəniyyətinin, zəngin tarixi-mədəni irsin təbliğinə də çox böyük töhfədir.

Tədbirdə Naxçıvan Muxtar Respublikası Yazıçılar Birliyinin sədri, Naxçıvan Muxtar Respublikasının Əməkdar mədəniyyət işçisi Asim Əliyev “Ana dilli şeirimizin böyük ustadı”, Əməkdar elm xadimi, professor Hüseyn Həşimli “İmadəddin Nəsimi yaradıcılığının ideya-bədii xüsusiyyətləri” mövzularında çıxış ediblər. Çıxışlarda qeyd edilib ki, Nəsimi Azərbaycan ədəbi dilinin inkişafına çox əhəmiyyətli təsir göstərmiş, onu leksika, bədii ifadə vasitələri ilə zənginləşdirmişdir. Nəsimi poeziyasının ideya-bədii xüsusiyyətləri onun davamçısı olan şairlərin yaradıcılığında aydın duyulmaqdadır.

Tədbirin bədii hissəsində Xalq artisti Həsən Ağasoy, aktyorlar Zakir Fətəliyev, Nurbəniz Niftəliyeva dahi şairin qəzəllərini bədii qiraət etmişlər. Sonra muzeyin ekspozisiyasına baxış olmuşdur.

Naxçıvan Muxtar Respublikası Mədəniyyət Nazirliyinin Mətbuat Xidməti
25.04.2019



      Aprelin 25-də Kəngərli Rayon Mədəniyyət Sarayında Naxçıvan Musiqi Kollecinin “Buta” muğam ansamblının Azərbaycan xalqının ümummilli lideri Heydər Əliyevin anadan olmasının 96 illiyinə həsr olunmuş konserti olub.

Qeyd edək ki, hazırda Naxçıvan Musiqi Kollecində 10-dan çox ixtisas üzrə kadr hazırlığı aparılır. Naxçıvan Muxtar Respublikası Ali Məclisi Sədrinin Sərəncamlarına əsasən bu təhsil ocağının 30 və 40 illik yubileyləri dövlət səviyyəsində qeyd olunub.

Naxçıvan Musiqi Kolleci milli musiqi alətlərimizin və xalq mahnılarımızın yaşadılması, eləcə də klassik və müasir dünya bəstəkarlarının öyrənilməsi, gənc musiqiçi kadrların yetişdirilməsi sahəsində uğurlar əldə etmişdir. Kollec təhsil müəssisəsi kimi fəaliyyəti ilə bərabər, həm də respublika üzrə keçirilən mötəbər tədbirlərdə, el şənliklərində konsert proqramları ilə çıxış edir. 40 ildən artıq fəaliyyət göstərən kollecdə müxtəlif musiqi kollektivləri də yaradılmışdır. “Buta” muğam ansamblı da bu kollektivlərdən biridir. Kollektiv gənc muğam ifaçılarından və müğənnilərdən ibarətdir. Kollektivin üzvləri maraqlı konsert proqramları ilə ictimaiyyət qarşısında çıxış edirlər. “Buta” muğam ansamblının Naxçıvan Dövlət Televiziyasındakı çıxışları da maraqla qarşılanır.

Konsert Samir İsmayılovun ifasında görkəmli bəstəkarımız Ramiz Mirişlinin “Naxçıvan təranəsi” ilə başlayıb.

“Buta” muğam ansamblının solistləri Azər Əkbərov, İlkin Abdullayev, Nurlan Nuriyev, Xalid Həsənov, Kənan Cəfərov, Ağaxan Məmmədov, Əbülfəz Məmmədov muğam və təsniflər, xalq və bəstəkar mahnıları ifa ediblər. Ansamblın üzvlərinin ifasında səslənən Ramiz Mirişli, Əlibaba Məmmədov, Rauf Hacıyev, Emin Sabitoğlu, Oqtay Kazıminin “Peşiman”, “Azərbaycan”, “Nə gözəldir Azərbaycan”, “Mehriban insanlar” bəstəkar mahnıları, “Aman-aman ayrılıq”, “Gülüb getdi” xalq mahnıları, təsnif və muğamlar konsert iştirakçılarında xoş ovqat yaradıb.

Konsert Ağaxan Məmmədovun ifasında Rauf Məmmədovun “Yaşa mənim xalqım” mahnısı ilə başa çatıb.

Konsert rayon sakinlərində xoş ovqat yaradıb.

Naxçıvan Muxtar Respublikası Mədəniyyət Nazirliyinin Mətbuat Xidməti
25.04.2019



      Aprelin 24-də Naxçıvan Dövlət Universitetində Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” 3 aprel 2019-cu il tarixli Sərəncamının və 15 aprel 2019-cu il tarixdə keçirilən müşavirədə verilmiş tapşırıqların icrası ilə bağlı Naxçıvan Muxtar Respublikası Mədəniyyət Nazirliyi Aparatının işçiləri, nazirliyin tabeliyində olan müəssisə və təşkilatların rəhbərləri, yaradılmış ekspert qrupu, Naxçıvan Dövlət Universitetinin, Naxçıvan Müəllimlər İnstitutunun və Naxçıvan Musiqi Kollecinin müəllim və tələbələri ilə görüş olmuşdur.

Tədbirdə Naxçıvan Dövlət Universitetinin rektoru, AMEA-nın müxbir üzvü Saleh Məhərrəmov giriş sözü ilə çıxış edərək bildirmişdir ki, Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” 3 aprel 2019-cu il tarixli Sərəncamı müasir dövrdə kadr hazırlığına yeni yanaşmanı təmin etmək məqsədi ilə mühüm əhəmiyyətə malikdir. Naxçıvan Muxtar Respublikası Mədəniyyət Nazirliyi ilə əlaqələrin intensiv qurulması bu sahədə yeni imkanlar açacaqdır. Sərəncamla bağlı keçirilən görüş də bu məqsədə xidmət edir.

Naxçıvan Muxtar Respublikasının Mədəniyyət naziri Natəvan Qədimova “Ali və orta ixtisas təhsili müəssisələrində ixtisaslarin müvafiq təşkilatlara hamiliyə verilməsi haqqında” Naxçıvan Muxtar Respublikası Ali Məclisi Sədrinin 2015-ci il 27 iyul tarixli Sərəncamının icrası ilə bağlı görülmüş işlər və innovasiyaların tətbiqi sahəsində qarşıda duran vəzifələr” mövzusunda çıxış edərək demişdir ki, Naxçıvan Muxtar Respublikasında uğurla həyata keçirilən təhsil siyasəti, bu sahədə görülən işlər və tədbirlər muxtar respublikada geniş vüsət alaraq fəaliyyət göstərən ali və orta ixtisas təhsili müəssisələrini də əhatə edir. Çağdaş informasiya mühitinin yaradılması, gənclərin informasiya cəmiyyətinə hazırlanmasını təmin etmək üçün hər gün informasiya və kommunikasiya texnologiyalarının ən son nailiyyətləri təhsil müəssisələrində tətbiq edilir.

Naxçıvan Muxtar Respublikası Ali Məclisi Sədrinin “Naxçıvan Muxtar Respublikasının təhsil müəssisələrində elektron təhsilin təşkili ilə bağlı əlavə tədbirlər haqqında” 2014-cü il 20 iyun tarixli, “Oxunması zəruri olan kitabların Siyahısının təsdiq edilməsi haqqında” 2017-ci il 28 avqust tarixli, “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” 2015-ci il 27 iyul tarixli Sərəncamları, təsdiq edilmiş dövlət proqramları qədim diyarımızda təhsil sahəsinə diqqət və qayğının davamlı olduğunu göstərməklə yüksək bilikli gəncliyin, bacarıqlı kadrların hazırlanmasına hesablanmışdır.

“Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” Sərəncamın icrası ilə bağlı görülən işlərdən danışan nazir qeyd etmişdir ki, həmin Sərəncama əsasən 23 ixtisas Nazirliyin hamiliyinə verilmişdir. Sərəncamın icrası ilə bağlı 2015-ci ildən başlayaraq nazirliyimiz tərəfindən hər tədris ili tədbirlər planı təsdiq edilmiş, Nazirliyin təşkilatçılığı ilə muxtar respublikada fəaliyyət göstərən ali və orta ixtisas təhsili müəssisələrinin rəhbərləri arasında görüşlər keçirilmiş, həmçinin tərtib edilmiş tədbirlər planına uyğun olaraq Naxçıvan Dövlət Universitetinin “Muzeyşünaslıq, arxiv işi və tarixi aidələrin qorunması” ixtisası, “Kitabxanaçılıq və informasiya”, Naxçıvan Musiqi Kollecinin “Kitabxana-informasiya” “Naxçıvan” Universitetinin və Naxçıvan Müəllimlər İnstitutunun tələbələri üçün kollektiv görüşlər, açıq dərslər, dəyirmi masalar, kitab müzakirələri, mühazirələr, ustad dərslər, konfranslar, tarixi abidələrə ekskursiyalar, təcrübələr təşkil olunmuş, filmlər nümayiş etdirilmişdir. Bu müddətdə tələbələrlə sıx görüşlər davam etdirilmiş, onların muxtar respublikanın tanınmış ziyalıları, aktyorları, sənət adamları ilə görüşləri keçirilmişdir.

Naxçıvan Muxtar Respublikası Ali Məclisinin Sədri cənab Vasif Talıbovun “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” 2019-cu il 3 aprel tarixli Sərəncamı bu sahədə qarşıya yeni vəzifələr qoymaqla həm də görüləcək işlərin davamlı xarakter aldığını göstərir.

Bildirilmişdir ki, yeni Sərəncam qədim diyarımızda çağdaş təfəkkürlü, peşəkar hazırlığa mütəxəssis, innovativ və yaradıcı düşüncəyə malik gəncliyin hazırlanmasına hesablanmışdır. Yaradıcı, təşəbbüskar, potensial imkanlarını reallaşdırmaq istəyən gənclər üçün bu Sərəncam qarşıda böyük üfüqlər açır. Sərəncamın icrası bilikli, təcrübəli, müasir informasiya texnologiyalarından baş çıxaran, müasir dövrün informasiya resurslarından faydalanan gəncliyin yetişdirilməsinə xidmət edir. Sərəncam həm də gənclərin dövrümüzlə səsləşən yeni biliklərini, innovasiyalarını və startaplarını öz ölkəsinin inkişafına yönəltmək baxımından olduqca əhəmiyyətlidir. Bu həm də gənclərin yeni ideya, layihə, təşəbbüslər baxımından birləşməsində aparıcı rol oynaya bilər.

Vurğulanmışdır ki, aprelin 15-də “Naxçıvan Muxtar Respublikasında ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinin vəziyyəti və innovasiyaların dəstəklənməsi barədə” müşavirə keçirilmiş, Naxçıvan Muxtar Respublikası Ali Məclisinin Sədri Vasif Talıbov geniş çıxış etmişdir.

Müşavirədə Ali Məclis Sədrinin çıxışında Naxçıvan Muxtar Respublikası Mədəniyyət Nazirliyi qarşısında da konkret vəzifələr qoyulmuşdur. Ali Məclis Sədri bildirmişdir ki, Naxçıvan Muxtar Respublikasının Mədəniyyət Nazirliyi açıq dərslərin, ustad dərslərinin, dəyirmi masa və müzakirələrin keçirilməsini diqqətdə saxlamalı, tələbələrin mütaliəsinin, tarix və mədəniyyətimizə dair biliklərinin zənginləşməsi üçün müvafiq ixtisasların buklet, kitab və broşurlarla təmin olunmasına köməklik göstərməlidir.

Qeyd edilmişdir ki, Naxçıvan Muxtar Respublikası Mədəniyyət Nazirliyində Sərəncamla və müşavirədə verilmiş tapşırıqlarla bağlı artıq müəyyən işlərin görülməsinə başlanılmışdır. Nazirlik tərəfindən ekspert qrupu formalaşdırılmış və müxtəlif fənlər üzrə mütəxəssislər dəvət edilmişdir. Yeni sərəncama əsasən Mədəniyyət Nazirliyi 21 ixtisasa hamilik edəcəkdir.

Aprelin 19-da Sərəncamın və keçirilən müşavirədə verilmiş tapşırıqların icrası ilə bağlı görüş-müzakirə keçirilmiş, görüşdə Naxçıvan Muxtar Respublikası Mədəniyyət Nazirliyi Aparatının işçiləri, nazirliyin tabeliyində olan müəssisə və təşkilatların rəhbərləri iştirak etmiş və bugünkü görüşə dair mədəniyyət müəssisə və təşkilatların rəhbərləri ixtisasların müvafiq təşkilatlara hamiliyə verilməsinin vəziyyəti və innovasiyaların dəstəklənməsi ilə bağlı ilk təkliflərini və fikirlərini bildirmişlər.

Nazir bildirmişdir ki, bugünkü görüşün məqsədi də nazirlik tərəfindən verilən tapşırıqların icrasını təmin etmək, tələbələrlə davamlı olaraq görüşlər keçirərək, mədəniyyət, incəsənət, musiqi sahəsində innovativ düşüncəni, yeniliyi, yeni düşüncə tərzini dəstəkləyəcəyimizi sizə çatdırmaqdır. Tələbələrin istedadlarının istiqamətləndirilməsi məsələsi, gələcəkdə lazımlı kadr kimi yetişdirilməsi bizi düşündürür. Nazirliyin hazırladığı tədbirlər planı, layihələr, ideyalar ali və orta ixtisas təhsili müəssisələri ilə razılaşdırılacaq, yaradıcı gənclərlə işlər davam etdiriləcəkdir. İş prosesi yeni layihələrin, startapların yaranmasına imkan və şərait yaradacaqdır. Həmçinin, bu prosesdə tələbələrin də aktivliyi və ideyaları vacibdir.

Nazir hamiliyə verilən ixtisaslarla bağlı nazirliyin hazırladığı təkliflərdən geniş söhbət açmış və yaradılmış ekspert qrupu haqqında geniş məlumat verərək bidirmişdir ki,bəşəriyyət tarixində innovasiyalar həmişə olub. Tarixin müxtəlif mərhələlərində innovasiyalar cəmiyyətin inkişafına təkan verib, bəşəriyyəti irəli aparıb. Son 25 ildə sürətli texnoloji inkişaf dünyada innovasiyaların geniş yayılması ilə müşayiət olunur. Həyatın bütün sahələrində olduğu kimi təhsildə də bunu görmək olar. Müasir dövrümüzdə internetin yaranması, informasiya texnologiyalarının inkişafı bütün bunları sürətləndirib. Başqa sözlə, qloballaşma dövründə təhsildə məzmun, proqram, tədris proqramı dəyişir. Texnologiyalar təhsildə sürətlə yeniliklər yaratmaqdadır. Buna misal olaraq elektron təhsili, distant təhsili göstərmək olar.

Natəvan Qədimova qeyd etmişdir ki, Naxçıvan Muxtar Respublikası Ali Məclisi Sədrinin verdiyi Sərəncam uzaqgörən kadr siyasətinin nəticəsidir və Sərəncamın icrası ilə bağlı bütün bunları həyata keçirmək üçün lazım olan vasitələr muxtar respublikanın orta ixtisas və ali məktəblərində vardır: 1. Maddi-texniki baza 2. Peşəkar kadrlar 3. İnformasiya resursları.

Naxçıvan Muxtar Respublikasının Mədəniyyət Nazirliyi və hamiliyə verilmiş ixtisaslar üzrə tabe təşkilatlar bu sahədə fəal olmalı, öz bilik və bacarıqlarından istifadə etməli, təkliflərini bildirməlidirlər. Yeni innovasiyaları dəstəkləmək isə hamımızın vəzifəsidir. Zaman dəyişir, bunu bizdən gələcək tələb edir.

Qeyd edək ki, nazirliyin struktruna daxil olan müəssisələr haqqında slayd nümayiş etdirilmişdir.

Naxçıvan Müəllimlər İnstitutunun rektoru, tarix üzrə fəlsəfə doktoru, dosent Elbrus İsayev çıxışında hamiliklə bağlı görülən işlərdən danışaraq qeyd etmişdir ki, Naxçıvan Müəllimlər İnstitutunun bir ixtisası mədəniyyət nazirliyinə hamiliyə verilmişdir. Kitabxanaçılıq və informasiya fəaliyyəti ixtisası da müasir dövrdə yeni innovasiyalarla özünü göstərməlidir. Rektor muxtar respublikamızda elektron kitabxana sisteminin yaradılması və yeni internet saytlarının istifadəyə verilməsi kitabxana işinin də müasir tələblər səviyyəsində qurulmasını tələb edir. İnstitutda innovasiya laboratoriyasının yaradılması bu sahədə işimizin düzgün qurulmasına kömək edəcəkdir.

Tədbirin sonunda Sərəncamın icrası ilə bağlı təkliflər müzakirə edilmişdir. Müzakirələrdə mədəniyyət və incəsənət işçiləri, ali və orta ixtisas məktəblərinin müəllimləri, müəssisə rəhbərləri çıxış etmişlər.

Naxçıvan Muxtar Respublikası Mədəniyyət Nazirliyinin Mətbuat Xidməti
24.04.2019



      Aprelin 24-də Naxçıvan Muxtar Respublikası Mədəniyyət Nazirliyinin təşkilatçılığı ilə Şərur Rayon Ələkli Kənd Uşaq Musiqi Məktəbində Şərur Rayon Mədəniyyət Şöbəsinin tabeliyində olan uşaq musiqi məktəblərinin müəllim və şagirdləri üçün ustad dərslər keçirilib.

Dərslər başlanmazdan əvvəl Naxçıvan Muxtar Respublikası Mədəniyyət Nazirliyinin əməkdaşı Leyla Əlimərdanova çıxış edərək bildirib ki, bu dərslərin keçirilməsində əsas məqsəd tədrisin keyfiyyətinin yüksəldilməsinə, şagirdlərin bacarıq və qabiliyyətlərinin inkişaf etdirilməsinə nail olmaqdır.

Sonra muxtar respublikanın təcrübəli müəllimlərindən tar ixtisası üzrə Naxçıvan Musiqi Kollecinin müəllimi Atabəy Qurbanov, fortepiano ixtisası üzrə Naxçıvan Şəhər Ə.Cavid adına Uşaq Musiqi və Bədii Sənətkarlıq Məktəbinin müəllimi Aynurə Rəcəbova, kamança ixtisası üzrə Naxçıvan Musiqi Kollecinin müəllimi Məmməd Xəlilov, qarmon ixtisası üzrə Naxçıvan Musiqi Kollecinin müəllimi Sahil Qasımov müəllim və şagirdlərə ustad dərsi keçiblər.

Atabəy Qurbanov ustad dərsdə bildirib ki, tar Azərbaycan xalqının qədim musiqi alətidir. Müəllim tədris prosesində tar musiqi alətində çalmağı öyrədərkən şagirdə təcrübə vərdişlərini də aşılamalı, fərdi xüsusiyyətlərini nəzərə alaraq onlara yaradıcı mövqedən yanaşmalıdır. Müəllim tar tədrisinin metodikasını dərindən bilməlidir.

Fortepiano ixtisası üzrə ustad dərsi aparan Aynurə Rəcəbova bildirib ki, tədris prosesində əsərlərin ifası zamanı intonasiya, fikir, obraz, dramaturgiya və başqa bədii ifadə vasitələrini düzgün yerinə yetirmək lazımdır. Pianoçular həm də ifa etdikləri janrlara, üslublara bələd olmalıdırlar.

Kamança ixtisası üzrə ustad dərsində Məmməd Xəlilov bu qədim musiqi alətimiz haqqında geniş məlumat verərək onun yaradıcılıq imkanlarını izah etdikdən sonra kamançada ifa olunan əsərlər haqqında şagirdləri məlumatlandırıb. Qeyd edilib ki, bir sıra milli musiqi alətləri kimi kamançada da şagirdə təcrübə vərdişləri aşılamaq və onlara fərdi mövqedən yanaşmaq lazımdır.

Qarmon ixtisası üzrə ustad dərsi keçən Sahil Qasımov bildirmişdir ki, bu dərslərin tədrisi zamanı şagirdlərin kollektiv və ya fərdi ifaya üstünlük vermələri də nəzərə alınmalıdır. Dərsdə bu musiqi alətində ifa olunan milli musiqi janrlarının xüsusiyyətləri də geniş izah edilmişdir.

Ustad dərsləri başa çatdıqdan sonra müəllim və şagirdləri maraqlandıran suallar cavablandırılıb.

Naxçıvan Muxtar Respublikası Mədəniyyət Nazirliyinin Mətbuat Xidməti
24.04.2019



      Aprelin 23-də M.S.Ordubadi adına Naxçıvan Muxtar Respublika Kitabxanasında Mədəniyyət Nazirliyinin təşkilatçılığı ilə “Ümumdünya Kitab və Müəllif Hüquqları Günü”nə həsr olunmuş tədbir keçirilib.

Tədbirdə Naxçıvan Muxtar Respublikası Mədəniyyət Nazirliyi Aparatının rəhbəri Gülbuta Babayeva giriş sözü ilə çıxış edərək bildirib ki, kitab bəşər mədəniyyətinin inkişafında mühüm rol oynayan ən böyük kəşflərdən biridir. Buna görə də UNESKO bəşəriyyətin ictimai və mədəni inkişafında kitab rolunu nəzərə alaraq 1995-ci ildə 23 apreli “Ümumdünya Kitab və Müəllif Hüquqları Günü” elan etmişdir.

Çıxışda qeyd olunub ki, Azərbaycan xalqının ümummilli lideri Heydər Əliyev xalqımızın kitab mədəniyyətinə, nəşriyyat işinə, kitabxanalara, bu sahənin inkişafına həmişə xüsusi diqqət və qayğı göstərmişdir. Ümummilli liderimiz respublikaya rəhbərlik etdiyi bütün dövrlərdə Azərbaycanda mətbəə və nəşriyyatlar yenidən qurulmuş və müasir avadanlıqlarla təchiz olunmuş, yeni kitabxanalar yaradılmışdır.

Bildirilib ki, bu gün ölkə Prezidenti tərəfindən bu sahədə uğurlu addımlar atılır, böyük layihələr həyata keçirilir.

Naxçıvan Muxtar Respublikası Yazıçılar Birliyinin sədri, Naxçıvan Muxtar Respublikasının Əməkdar mədəniyyət işçisi Asim Əliyev “Kitab xalqın mədəniyyətinin mənəvi daşıyıcısıdır”, M.S.Ordubadi adına Naxçıvan Muxtar Respublika Kitabxanasının direktoru Tamella Əsgərova “Bəşəriyyətin ən dəyərli kəşfi kitablardır” mövzularında çıxışlar ediblər. Bildirilib ki, kitab insanların yaradıcı təfəkkürünün məhsulu kimi hamının, xüsusilə uşaqların və gənclərin formalaşmasında əvəzsiz xəzinədir. Kitablar gənc nəsildə elmi və mədəni inkişafa, təbiətə maraq yaratmaqla bərabər, həm də yüksək əxlaqi keyfiyyətlər, milli-mənəvi zənginlik, vətənpərvərlik, torpağa bağlılıq, mərhəmət duyğuları aşılayır. Naxçıvan Muxtar Respublikasında da kitabxanalara, kitab nəşrinə, yaradıcı insanlara diqqət və qayğı göstərilir. Eyni zamanda muxtar respublikada müasir nəşriyyat və mətbəələrin fəaliyyət göstərməsi bu sahənin inkişafında mühüm rol oynayır.

Vurğulanıb ki, gənc nəsildə vətənpərvərlik, torpağa məhəbbət, mərhəmət, xeyirxahlıq kimi mənəvi dəyərlərin inkişafında kitab əvəzsiz xəzinədir. Bu mənada Naxçıvan Muxtar Respublkası Ali Məclisi Sədrinin 2017-ci il 28 avqust tarixli Sərəncamı ilə təsdiq edilmiş “Oxunması zəruri olan kitabların siyahısı” geniş ictimaiyyət tərəfindən rəğbətlə qarşılanmışdır.

Tədbirin sonunda kitab sərgisinə baxış olub.

“Ümumdünya Kitab və Müəllif Hüquqları Günü” muxtar respublikanın rayon kitabxanalarında da qeyd edilib.

Naxçıvan Muxtar Respublikası Mədəniyyət Nazirliyinin Mətbuat Xidməti
23.04.2019



      Aprelin 23-də Naxçıvan Muxtar Respublikası Mədəniyyət Nazirliyinin təşkilatçılığı ilə Naxçıvan Duz Muzeyində “Bələdçilərin nitq mədəniyyəti və etik davranış qaydaları” mövzusunda muzey əməkdaşları üçün seminar-treninq keçirilib.

Nazirliyin sisteminə daxil olan muzeylərin əməkdaşlarının iştirak etdiyi tədbirin məqsəd və əhəmiyyətindən danışan nazirliyin baş məsləhətçisi Qumral Əsədova giriş sözü ilə çıxış edərək bildirib ki, muxtar respublikada müxtəlif profilli muzeylər fəaliyyət göstərir. Muzeylərə bu gün xüsusi diqqət göstərilir, onların maddi-texniki bazası gücləndirilir, əməkdaşların peşəkarlıq səviyyəsi yüksəldilir. Naxçıvan Muxtar Respublikası Ali Məclisi Sədrinin “Muzeylərlə əlaqələrin daha da gücləndirilməsi haqqında” 2014-cü il 19 dekabr tarixli Sərəncamından sonra muzeylərin ziyarətçilərinin sayında əhəmiyyətli dərəcədə artım müşahidə olunur.

Qeyd olunub ki, keçirilən seminar-treninqlərdə muzey əməkdaşları vəzifə funksiyalarını dərindən öyrənməyə səy göstərməklə yanaşı, muzey işi haqqında ətraflı məlumat əldə etmiş olurlar. Eyni zamanda, seminar-treninqlər muzey işçilərinin muxtar diyarımızın bütün bölgələrində yerləşən muzeylərlə tanış olmalarına şərait yaratmaq baxımından da əhəmiyyətlidir. Belə tədbirlərdə muzey əməkdaşlarına bu sahədə həyata keçirilən yeniliklərdən söhbət açılır, onların sualları cavablandırılır.

Vurğulanıb ki, 2018-ci ildə muxtar respublikanın muzeylərinə 1564 eksponat daxil olmuşdur. Bu müddətdə muzeylərimizi 592 min 683 nəfər tamaşaçı ziyarət etmişdir ki, onlardan da 178 mindən çoxu xarici ölkə vətəndaşı olmuşdur. Ötən il muzeylərimizdə 19 seminar-treninq keçirilmiş, muzey işi ilə bağlı 4 dəyirmi masa təşkil edilmişdir.

Tədbirdə Bəhruz Kəngərli Muzeyinin direktoru Səbinə Əlincəli “Bələdçilərin nitq mədəniyyəti və etik davranış qaydaları” mövzusunda çıxış edərək bildirmişdir ki, muzey bələdçiləri qarşısında duran əsas məsələlərdən biri də nitq mədəniyyəti və orfoepiya qanunlarına dərindən bələd olmasıdır. Bələdçi həm də etik davranış qaydalarına ciddi əməl etməli, muzeyə gələnlərdə xoş təəssürat yaratmalıdır.

Tədbir iştirakçıları muzeyin ekspozisiyasına da baxmışlar. Seminar-treninqdə mövzu ilə bağlı muzey əməkdaşlarının sualları cavablandırılmışdır. Tədbirdə iştirak edən Naxçıvan Müəllimlər İnstitutunun tələbələri, muzey direktorları və işçiləri muzeydə muxtar respublikanın tarixi abidələrinin əks olunduğu rəsmlərdən ibarət sərgiyə baxıblar.

Naxçıvan Muxtar Respublikası Mədəniyyət Nazirliyinin Mətbuat Xidməti
23.04.2019



      Aprelin 19-da Şərur şəhər “Bahar” kinoteatrnda Naxçıvan Dövlət Filarmoniyasının “Muğam Studiyası”nın Naxçıvan Muxtar Respublikasının yaradılmasının 95 illiyinə həsr olunmuş konserti olub.

Konsertin aparıcısı qeyd edib ki, Naxçıvan Muxtar Respublikası Ali Məclisi Sədrinin 21 yanvar 2019-cu il tarixli Sərəncamına əsasən “Naxçıvan Muxtar Respublikasının 95 illik yubileyinə həsr olunmuş Tədbirlər Planı” təsdiq edilmiş, Tədbirlər Planında muxtar respublikanın 95 illik yubileyinin geniş qeyd edilməsi ilə bağlı müxtəlif silsilə tədbirlərin keçirilməsi nəzərdə tutulmuşdur.

Azərbaycan xalqının ümummilli lideri Heydər Əliyevin Azərbaycana rəhbərlik etdiyi dövrdə Naxçıvanla bağlı verdiyi sərəncamlar, bu diyara tarixi səfərləri, ərazi bütövlüyü və təhlükəsizliyi üçün həyata keçirdiyi tədbirlər muxtariyyət statusunun hüquqi cəhətdən möhkəmləndirilməsi və taleyüklü digər məsələlərin yerinə yetirilməsi Naxçıvanın hərtərəfli inkişafını təmin etməklə onu çiçəklənən, günü-gündən müasirləşən bir diyara çevirmişdir.

Muğam sənəti Azərbaycan xalqının bədii yaradıcılığının və musiqi mədəniyyətinin zəngin sərvəti olmaqla nadir sənət nümunəsidir. Muğam xalqımızın dünya mədəni irsinə bəxş etdiyi ən böyük xəzinədir. Muğam sənətimizdə xalqımızın təfəkkürü və düşüncə tərzi öz əksini tapır. 2002-ci ildə UNESKO tərəfindən muğam sənəti “Bəşəriyyətin qeyri-maddi mədəni irsi reprezentativ siyahısı”na daxil edilmişdir.

Qeyd edək ki, maraqlı konsert proqramı ilə ictimaiyyət qarışında çıxış edən Naxçıvan Dövlət Filarmoniyasının “Muğam studiyası”nın bədii rəhbəri İlqar Hüseynovdur. 2016-cı ilin sentyabrından fəaliyyətə başlayan “Muğam studiyası”nın konsertləri ictimaiyyət tərəfindən maraqla qarşılanır. Studiyanın əsas məqsədlərindən biri də gənc muğam ifaçılarını aşkara çıxarmaq və onları tanıtmaqdır.

Kollektivin gənc muğam ifaçıları çalışır ki, bu qüdrətli musiqini yüksək səviyyədə muğam həvəskarlarına çatdırsınlar. Muğam konsertində ilk olaraq gənc xanəndələr Məhərrəm Quliyev və Habil Qasımovun ifasında “Şur”, “Rast” təsnifləri səslənmişdir. Sonra ansamblın üzvlərindən Bəhruz Quliyev, Nərmin Hüseynova “Dilkeş” təsnifini ifa edib. Onların ifasında səslənən muğam və təsniflərimiz alqışlarla qarşılanıb.

Azərbaycan Respublikasının Əməkdar artisti Qurban Qasımovun ifasında “Dilkeş” təsnifi, Naxçıvan Muxtar Respublikasının Əməkdar artisti Zülfiqar Mahmudovun ifasında “Bayatı qacar” təsnifi və xalq mahnıları ifa edilib. Poeziyamızın və muğamımızın vəhdəti söz-sənət xəzinəmizin zənginliyini göstərib. Konsertdə Nəsimi, Füzuli, Əliağa Vahid və başqa şairlərimizin qəzəllərindən muğam və təsniflər səslənib.

Maraqla qarşılanan konsertdə xalq mahnıları və rənglər də səslənib.

“Muğam” studiyasının bir saatdan artıq davam edən konserti Şərur sakinlərində xoş ovqat yaradıb.

Naxçıvan Muxtar Respublikası Mədəniyyət Nazirliyinin Mətbuat Xidməti
19.04.2019


      Aprelin 19-da Cəlil Məmmədquluzadənin Naxçıvan şəhərindəki Ev Muzeyində “Molla Nəsrəddin” jurnalının nəşrə başlamasının 113 illiyi ilə bağlı tədbir keçirilib.

Tədbirdə giriş sözü ilə çıxış edən muzeyin direktoru Aytən Ələkbərova bildirib ki, mütərəqqi ideyaların carçısı olan “Molla Nəsrəddin” jurnalının Azərbaycan mətbuatı tarixində şərəfli yeri vardır. Jurnalın “Molla Nəsrəddin” adı ilə fəaliyyətə başlaması naşirin və əməkdaşların zəngin xalq ədəbiyyatımıza bağlılığından irəli gəlirdi. Böyük yazıçımız C.Məmmədquluzadə haqlı olaraq yazırdı ki, “Molla Nəsrəddin”i təbiət özü yaratdı, zəmanə özü yaratdı. Qeyd edilmişdir ki, Azərbaycan Respublikası Prezidenti İlham Əliyev 2019-cu il 17 yanvar tarixdə “Cəlil Məmmədquluzadənin 150 ilik yubileyinin qeyd edilməsi haqqında” Sərəncam imzalamışdır. Naxçıvan Muxtar Respublikası Ali Məclisinin Sədri 21 yanvar 2019-cu il tarixli Sərəncamı ilə “Cəlil Məmmədquluzadənin 150 ilik yubileyinə həsr olunmuş Tədbirlər Planı”nı təsdiq etmişdir. Tədbirlər Planında böyük yazıçıya həsr olunmuş elmi konfransın keçirilməsi, təhsil və mədəniyyət mütəxəssislərinin kitabxanalarında sərgilərin təşkil olunması və oxucu konfranslarının keçirilməsi, böyük ədibin əsərlərindən ibarət tamaşanın hazırlanması, ədəbiyyat profilli muzeylərdə interaktiv dərslərin təşkil olunması, kütləvi informasiya vasitələrində materialların, verilişlərin hazırlanması nəzərdə tutulmuşdur.

Tədbirdə AMEA Naxçıvan Bölməsi İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Quliyev “Molla Nəsrəddin” jurnalında dil məsələsi”, həmin institutun şöbə müdiri, filologiya üzrə fəlsəfə doktoru, dosent Ramiz Qasımov “Milli mətbuatımızın sərkərdəsi - “Molla Nəsrəddin”, həmin institutun böyük elmi işçisi, filologiya üzrə fəlsəfə doktoru Aygün Orucova “Molla Nəsrəddin” jurnalında çap edilmiş məşhur bir satiranın müəllifi barədə, həmin institutun elmi işçisi, filologiya üzrə fəlsəfə doktoru Aytən Cəfərova “Molla Nəsrəddin jurnalı və folklor” mövzularında çıxış etmişlər.

Çıxışlarda vurğulanıb ki, 113 il bundan əvvəl böyük yazıçının redaktorluğu ilə nəşrə başlayan “Molla Nəsrəddin” jurnalı Azərbaycan mətbuat tarixinin ən parlaq səhifələrindən biridir. Jurnalın ana dilimizin saflığı uğrunda mübarizəsi dövrün bütün mətbuat dünyası üçün nümunə göstərilə bilər. Jurnalın nəşrə başlaması təkcə Azərbaycanda deyil, Yaxın və Orta Şərqdə, bütün İslam aləmində də mühüm hadisə idi. Nəşr olunan hər yeni nömrə, o zaman bütün Şərq dünyasında ictimai dairələrdə böyük maraqla qarşılanırdı. Bütövlükdə Cəlil Məmmədquluzadə yaradıcılığı və “Molla Nəsrəddin” jurnalı xalqı təhsilə, elm və tərəqqiyə çağıran ideyaların carçısı kimi mütərəqqi insanlar tərəfindən rəğbətlə qarşılanırdı.

Bildirilib ki, bu gün böyük yazıçının ölməz əsərləri ədəbiyyatımızın qızıl fonduna daxil olmuşdur. Yeni gələn nəsillər onu təzədən kəşf edir, onu müasirləri kimi tanıyırlar. Cəlil Məmmədquluzadə şəxsiyyətinin və irsinin böyüklüyü də bundadır. “Molla Nəsrəddin” jurnalı isə Azərbaycan ədəbiyyatının inkişafında haqlı olaraq dönüş nöqtəsi adlandırılır. Bu jurnal həm də mətbuat və ədəbiyyat tariximizdə yeni bir məktəb yaratmışdır.

Tədbirin sonunda isə tədbir iştirakçıları sərgi ilə tanış olublar.


Naxçıvan Muxtar Respublikası Mədəniyyət Nazirliyinin Mətbuat Xidməti
19.04.2019


      Aprelin 19-da Sədərək Rayon Uşaq Musiqi Məktəbində müəllimlər üçün solfecio, musiqi ədəbiyyatı və xor fənləri üzrə metodiki kurs keçirilmişdir.

Kursu giriş sözü ilə açan Naxçıvan Muxtar Respublikası Mədəniyyət Nazirliyi Aparatının baş məsləhətçisi Leyla Əlimərdanova bildirmişdir ki, uşaq musiqi məktəblərində tədris olunan musiqi ədəbiyyatı fənninin tədrisində əsas məqsəd şagirdlərin dünyagörüşünü zənginləşdirməkdir. Şagirdlərin ümumi musiqi ədəbiyyatı ilə yanaşı, Azərbaycan musiqi ədəbiyyatı ilə tanışlığı onların musiqi tərbiyəsinin formalaşmasında və hərtərəfli inkişafında əhəmiyyətli rol oynayır. Metodiki kursların keçirilməsində əsas məqsəd müəllimlərin bilik səviyyəsinin yüksəldilməsi və bu fənni tədris edənlərə müəyyən istiqamət göstərməkdir. Müəllimlərə solfecio fənni haqqında da ətraflı məlumat verilmişdir.

Sonra Naxçıvan şəhər Ə.Cavid adına Uşaq Musiqi və Bədii Sənətkarlıq Məktəbinin müəllimi Ülviyyə Sadıqlı “Beş və yeddi illik təhsil sistemi üzrə solfecio və musiqi əədəbiyyatı fənnlərinin tədrisi” üzrə metodiki dərs keçmişdir. Bildirmişdir ki, musiqi məktəblərində solfecio fənninin tədrisi zamanı şagirdlərə Azərbaycan ladları səs sıralarını qurmaq, major-minor sistemi ilə yanaşı Azərbaycan ladlarını eşitmə qabiliyyətini formalaşdırmaq, ladlar üzərində müxtəlif intonasiya məqsədləri, eləcə də solfecio oxuma və imla yazmaq zamanı xalq musiqi nümunələrinə istinad edilməlidir.

Bildirmişdir ki, musiqi məktəblərində şagirdlərə ümumi musiqi ədəbiyyatı ilə yanaşı, Azərbaycan musiqi ədəbiyyatı da tədris olunur. Tədris zamanı şagirdlər musiqi ədəbiyyatının geniş sahəsilə tanış olur, müxtəlif janr və xüsusiyyətləri, xalq və professional musiqi formaları, musiqi ifadə vasitələri, musiqi alətləri, simfonik orkestr, ansambl quruluşları haqqında biliklər əldə edirlər.

Naxçıvan Musiqi Kollecinin müəllimi, Naxçıvan Muxtar Respublikasının Əməkdar müəllimi Mahirə Əsgərova “Beş və yeddi illik təhsil sistemi üzrə xor fənninin tədrisi” mövzusunda dərsdə bildirib ki, xor sənəti qədim tarixə malikdir. O hissləri, xəyalları, oxuyan insanların iradələrini birləşdirir, onların zövqlərini və qəlblərini tərbiyələndirir. Qeyd edilib ki, Azərbaycan bəstəkarları da uşaqlar üçün xor yazılmış əsərlərdə vətənə məhəbbət, vətənpərvərlik hisslərinə xüsusi diqqət yetirməlidirlər.

Metodik dərslərin sonunda mövzular müzakirə edilmiş və suallar cavablandırılmışdır.

Naxçıvan Muxtar Respublikası Mədəniyyət Nazirliyinin Mətbuat Xidməti
19.04.2019


      Görkəmli mütəfəkkir-şair Hüseyn Cavidin ailəsində anadan olan, Azərbaycan mədəniyyətinin dəyərli simalarından biri kimi zəngin irs yaradan, musiqişünas, rəssam və tədqiqatçı Ərtoğrol Cavidin (Ərtoğrol Cavid oğlu Rasizadə) 2019-cu il oktyabrın 22-də anadan olmasının 100 illiyi tamam olur.

Ali təhsilini Azərbaycan Pedaqoji İnstitutunda alan Ərtoğrol Cavid daha sonra musiqi təhsilini Azərbaycan Dövlət Konservatoriyasında Üzeyir Hacıbəyovun sinfində almış, eyni zamanda Konservatoriya nəzdindəki musiqi məktəbində dərs demiş, gənc tədqiqatçı kimi musiqi folkloru nümunələrinin toplanması və tədqiqində iştirak etmişdir.

Ərtoğrol Cavid milli musiqi mədəniyyətimizin yeni yaradıcılıq nümunələri ilə zənginləşdirilməsində böyük rol oynamışdır. O, “9 Variasiya”, skripka ilə fortepiano üçün “Poema”, “Leylanın vəsfi” kimi romanslar, müharibə mövzusunda simfonik ballada və marşlar yaratmışdır.

Çoxcəhətli yaradıcılıq yolu keçən Ərtoğrol Cavid, eyni zamanda rəssamlığın müxtəlif janrlarına da müraciət edərək özündən sonra yaddaqalan sənət nümunələri qoyub getmişdir. Ərtoğrol Cavid bədii yaradıcılıqla da məşğul olmuş, pyes və şeirləri dövrümüzədək gəlib çatmışdır. Yaradıcılığı “Azərbaycan qeyri-maddi mədəniyyət abidələri və Ərtoğrol Cavid” adlı 13 cildlik külliyyatda toplanmışdır.

Yaşadığı qısa müddətdə onun ədəbi-bədii, musiqi və ­boyakarlıq sənətinin inkişafındakı rolunu, Azərbaycan xalq mahnıları və folklorunun toplanması və tədqiqi sahəsindəki əvəzsiz xidmətlərini nəzərə alıb Naxçıvan Muxtar Respublikası Konstitusiyasının 5-ci maddəsinin II hissəsinin 22-ci bəndini rəhbər tutaraq qərara alıram:

1. Ərtoğrol Cavidin 100 illik yubileyi Naxçıvan Muxtar Respublikasında geniş qeyd edilsin.

2. “Ərtoğrol Cavidin 100 illik yubileyinin keçirilməsi ilə əlaqədar Tədbirlər Planı” təsdiq edilsin.

Vasif TALIBOV
Naxçıvan Muxtar Respublikası Ali Məclisinin Sədri


Naxçıvan şəhəri, 18 aprel 2019-cu il


      Aprelin 18-də Cəlil Məmmədquluzadə adına Naxçıvan Dövlət Musiqili Dram Teatrı Xaqani Əliyevin “Ehsan xan Kəngərli” tarixi dramı əsasında hazırladığı tamaşanı Kəngərli Rayon Mədəniyyət Sarayında rayon sakinlərinə göstərmişdir.

“Ehsan xan Kəngərli” tarixi dramı XIX əsrin əvvəllərində Naxçıvan xanlığında baş verən ictimai-siyasi hadisələri əks etdirir. Rusiya-İran müharibəsi və Naxçıvanın ruslar tərəfindən işğal olunması əsərin əsas süjet xəttini təşkil edir.

İlk dəfə Naxçıvan teatrında səhnəyə qoyulan “Ehsan xan Kəngərli” tamaşasında Naxçıvan xanlığının düşdüyü çətin vəziyyətdən çıxış yolu axtaran Ehsan xanın siyasi düşüncələri və xüsusən ermənilərin Naxçıvana yerləşdirilməsinin qarşısını almaq üçün rus diplomatı Aleksandr Sergeyeviç Qriboyedovla apardığı söhbətlər olduqca maraq doğurur. Naxçıvanın gələcək taleyi ilə bağlı Kəngərli xanları arasında yaranan fikir ayrılığı və Ehsan xanın təşəbbüsü ələ alaraq xalqın taleyini hər şeydən üstün tutması əsərdə konfliktin gərginliyini daha da artırır.

Tamaşada Ehsan xanla yanaşı, Abbasqulu ağa Bakıxanovun da bədii obrazı diqqəti cəlb edir. Bakıxanov erməni fitnələrinin qarşısını almaq üçün Ehsan xana çıxış yolu tapmaqda kömək edir.

“Ehsan xan Kəngərli” tamaşasında dövrün ictimai-siyasi hadisələri faktlarla səhnəyə gətirilir ki, bu da tamaşaçını cəlb edir.

Bu maraqlı tamaşanın elmi məsləhətçisi akademik İsmayıl Hacıyev, quruluşçu rejissoru, xalq artisti Kamran Quliyev, quruluşçu rəssamı, Naxçıvan Muxtar Respublikasının Əməkdar rəssamı Əbülfəz Axundov, musiqi tərtibatçısı Azərbaycan Respublikasının Əməkdar mədəniyyət işçisi İmamqulu Əhmədovdur.

Tamaşada Azərbaycan Respublikasının Xalq artistləri Rza Xudiyev (Ehsan xan), Rövşən Hüseynov (Kalbalı xan), Həsən Ağasoy (Kərim xan), Azərbaycan Respublikasının Əməkdar artistləri Bəhruz Haqverdiyev (Şıxəli bəy), Əli Əliyev (Paskeviç), Əbülfəz İmanov (Safraz Saakov), aktyorlar Zəminə Məmmədova (Çimnaz xanım), Ələsgər Quliyev (Nəzərəli xan), Səyyad Məmmədov (Qriboyedov), Zakir Fətəliyev (Məmmədrza xan), Anar Eyvazov (rus zabiti), Nazlı Hüseynquliyeva (yaşlı qadın), Mehri Nəbiyeva (Nina Çavçavadze), Cəbrayıl Nəbiyev (Zeynal Sultan), Uğur Nəsirli (Əsgər) maraqlı obraz və personajlar yaratmışlar.

Tamaşa Kəngərli rayon sakinləri tərəfindən maraqla qarşılanmışdır.

Qeyd edək ki, C.Məmmədquluzadə adına Naxçıvan Dövlət Musiqili Dram Teatrı “Ehsan xan Kəngərli” tamaşasını muxtar respublikanın bütün rayonlarında göstərməyi nəzərdə tutmuşdur.

  
Naxçıvan Muxtar Respublikası Mədəniyyət Nazirliyinin Mətbuat Xidməti
18.04.2019


      Aprelin 18-də Qarabağlar Türbə Kompleksində Naxçıvan Muxtar Respublikası Mədəniyyət Nazirliyinin təşkilatçılığı ilə “Beynəlxalq Abidələr və Tarixi Yerlər Günü” qeyd edilib.

Tədbiri giriş sözü ilə Naxçıvan Muxtar Respublikasının Mədəniyyət naziri Natəvan Qədimova açaraq bildirib ki, 1982-ci ildən etibarən UNESKO-nun Abidələrin Mühafizəsi Məsələləri üzrə Beynəlxalq Şurasının qərarı ilə hər il aprelin 18-i dünyada “Beynəlxalq Abidələr və Tarixi Yerlər Günü” kimi qeyd olunur.

Azərbaycan müstəqillik əldə etdikdən sonra isə bu tarixi günə xüsusi önəm verilir. Bu günün qeyd olunmasında məqsəd insanların diqqətini abidə və tarixi yerlərin qorunmasına yönəltməkdir. Tarixi abidələr keçmişdən gələcəyə körpü rolunu oynayır. Ulu babalarımızın bizə yadigar qoyduğu hər bir abidə Azərbaycan xalqının qədim mədəniyyətinin göstəricisidir. Tarixi abidələrin mühafizəsi həm də maddi və mənəvi irsimizin qorunub gələcək nəsillərə çatdırılması rolunu oynayır. Tarix və mədəniyyət abidələrimiz xalqımızın minilliklər boyu bu torpaqlarda yaşadığını sübut edən daşlaşmış yadigarlardır.

Nazir Azərbaycan xalqının ümummilli lideri Heydər Əliyevin Naxçıvan tarixinin və qədim abidələrin öyrənilməsi sahəsində həyata keçirdiyi tədbirlərdən və qəbul etdiyi qərarlardan danışıb.

Qeyd olunub ki, dünyanın ən qədim insan məskənlərindən biri olan Naxçıvan Muxtar Respublikasında tarix və mədəniyyət abidələrinin qorunması və bərpası istiqamətində ardıcıl tədbirlər görülür. Həyata keçirilən davamlı tədbirlər öz bəhrəsini verməkdədir. Nazir bildirib ki, Naxçıvan Muxtar Respublikasında son 23 ildə 70-dən artıq tarix və mədəniyyət abidəsi əsaslı təmir və bərpa olunmuşdur. Naxçıvan Muxtar Respublikası Ali Məclisi Sədrinin imzaladığı onlarla Sərəncamlardan sonra tarix-mədəniyət abidələri elmi əsaslarla öyrənilmiş, tariximizin və mədəni irsimizin öyrənilməsi, təbliği baxımından mühüm əhəmiyyətə malik olan onlarla elmi məqalə və kitablar yazılmışdır. Həmçinin, Naxçıvan Muxtar Respublikası Ali Məclisi Sədrinin “Naxçıvan Muxtar Respublikası ərazisindəki tarix və mədəniyyət abidələrinin qorunması və pasportlaşdırılması işinin təşkili haqqında” 6 dekabr 2005-ci il tarixli Sərəncamı ilə muxtar respublika ərazisində olan 1200-dən çox abidə qeydə alınaraq pasportlaşdırılmışdır.

Muxtar respublikada abidələrimizin tədqiq olması və mədəniyyətimizin beynəlxalq miqyasda təbliği istiqamətində də ardıcıl tədbirlər həyata keçirilir. Muxtar respublikada xarici ölkələrin aparıcı elmi müəssisə və mütəxəssislərinin iştirakı ilə Naxçıvan tarixinə, arxeologiyasına, etnoqrafiyasına və folkloruna dair tədqiqatların, ekspedisiyaların aparılması, beynəlxalq simpoziumların və konfransların keçirilməsi, kitab, monoqrafiya, dərslik və elmi məqalələrin nəşr edilməsi bu mənada mühüm əhəmiyyət daşıyır.

Nazir çıxışının sonunda qədim diyarımızda mədəniyyətə və incəsənətə göstərilən böyük dövlət qayğısına görə Naxçıvan Muxtar Respublikası Ali Məclisinin Sədrinə tədbir iştirakçıları adından dərin minnətdarlığını bildirib.

Tədbirdə AMEA Naxçıvan Bölməsinin Tarix, Etnoqrafiya və Arxeologiya İnstitutunun direktoru, AMEA-nın müxbir üzvü, Azərbaycan Respublikasının Əməkdar elm xadimi Fəxrəddin Səfərli “Azərbaycan memarlığının möhtəşəm nümunəsi Qarabağlar Türbə Kompleksi” mövzusunda çıxış edərək bildirib ki, XII-XIV əsrlərə aid Qarabağlar Türbə Kompleksi Naxçıvan ərazisində yaradılan türk-islam mədəniyyətinin möhtəşəm nümunələrindən və Şərq memarlığının incilərindən biridir.

Kəngərli rayonunun Qarabağlar kəndində yerləşən kompleks bir türbə və qoşa minarəli baştağdan ibarətdir. Qoşa minarəli baştağın üzərindəki kitabədən aydın olmuşdur ki, abidənin tikilməsini Cahan Quti xatın əmr etmişdir. Hülakülər (Elxanilər) dövlətinin banisi Hülakü xanın həyat yoldaşı olan Quti xatın ağlı və bacarığı sayəsində dövlətin idarə olunmasında iştirak etmişdir.

Qeyd edilib ki, Naxçıvan Muxtar Respublikası Ali Məclisi Sədrinin 4 iyul 2016-cı il tarixli Sərəncamına əsasən Qarabağlar Türbə Kompleksi bərpa edilərək möhtəşəm abidəyə ikinci həyat verilib.

Alim eyni zamanda muxtar respublikada aparılan arxeoloji ekspedisiyalar və yeni tapıntılar haqqında fikirlərini də tədbir iştirakçıları ilə bölüşüb. Qeyd edilib ki, Ali Məclis Sədrinin diqqət və qayğısı ilə arxeoloji ekspedisiyaların fəaliyyəti və abidələrin bərpası yüksək səviyyədə həyata keçirilir.

Tədbirdə uşaq incəsənət və bədii sənətkarlıq məktəblərinin rəsm ixtisası üzrə şagirdəri arasında etüd-dərs keçirilib və fərqlənənlərə Naxçıvan Muxtar Respublikası Mədəniyyət Nazirliyinin fəxri fərmanları təqdim olunub.

Tədbir iştirakçıları burada təşkil olunmuş Naxçıvan Muxtar Respublikası ərazisində olan abidələrlə bağlı nəşr olunmuş kitablardan, çap məhsullarından, rəsm əsərlərindən ibarət sərgiyə maraqla baxmışlar.

Sonra Naxçıvan Dövlət Filarmoniyasının “Muğam Studiyası”nın və “Şərur” Xalq Yallı Ansamblının konserti olmuşdur.

Muğam üçlüyünün ifasında “Şur”, “Dilkeş” təsnifləri, “Naxçıvandır” mahnısı səslənib. Naxçıvan Muxtar Respublikasının Əməkdar artisti Zülfiqar Mahmudov, müğənnilər Məhərrəm Quliyev, Nərmin Hüseynovanın ifaları alqışlarla qarşılanıb. Naxçıvan Dövlət Filarmoniyasının Mahnı və Rəqs Ansamblının rəqs qrupu “Koroğlu” operasından “Cəngi”nin sədaları altında rəqs etməklə konsertə rəngarənglik gətirib. Rəqs qrupunun ifa etdiyi yallı maraqla qarşılanıb. “Şərur” Xalq Yallı Ansamblı “Göyçəməni” yallısını ifa edib. Tədbir ansamblın ifasında “Köçəri” yallısı ilə başa çatıb.

Naxçıvan Muxtar Respublikası Mədəniyyət Nazirliyinin Mətbuat Xidməti
18.04.2019



      Aprelin 18-də Şahbuz Rayon Mədəniyyət Sarayında M.T.Sidqi adına Naxçıvan Dövlət Kukla Teatrı rayonun uşaq və məktəbliləri üçün yazıçı Bayram İsgəndərlinin “Cırtdanın yeni sərgüzəşti” tamaşasını göstərib.

Tamaşanın nümayişindən əvvəl M.T.Sidqi adına Naxçıvan Dövlət Kukla Teatrının bədii rəhbər-direktoru, Azərbaycan Respublikasının Xalq artisti Şirzad Abutalıbov çıxış edərək uşaqların və məktəblilərin sevimli teatrı haqqında onlara qısa məlumat verib. Bildirilib ki, teatr yarandığı dövrdən uşaq və məktəblilərin zövqünü oxşayan tamaşalar hazırlamış, onların estetik zövqünü formalaşdırmış, mənəvi-estetik prinsipləri əsas tutmuşdur. Teatrın son illərdə hazırladığı “Niyyət açarı”, “Göyçək Fatma”, “Ələddinin sehrli çırağı”, “Sirli sözlər”, “Tovuz quşunun nəğmələri”, “Tülkülərə inanmayaq”, “Qırmızı, yaşıl, mavi”, “Qırmızı papaq” və başqa tamaşalar uşaq və məktəblilər tərəfindən maraqla qarşılanmışdır.

Yazıçı-dramaturq Bayram İsgəndərlinin Azərbaycan xalq nağılı əsasında yazdığı “Cırtdanın yeni sərgüzəştləri” tamaşasının əsas qəhrəmanı yenə də uşaqların sevdiyi Cırtdandır. Cırtdan balaca olsa da öz ağlı və hazırcavablığı ilə Divə qalib gələrək öz dostlarını xilas edir. Tamaşada hadisələr Cırtdanın və onun dostlarının başına gələn sərgüzəştlər üzərində qurulmuşdur.

“Cırtdanın yeni sərgüzəşti” tamaşasında da uşaqlar üçün yazılmış bütün nağıl-tamaşalarda olduğu kimi xeyrin şər, yaxşılığın pislik, ədalətin haqsızlıq üzərində qələbəsi əsas ideyadır. Divin lovğalığı, özündənrazılığı onun Cırtdana məğlub olması ilə bitir. Nağıl tamaşa nikbin sonluqla başa çatır. Tamaşadakı şən musiqi və mahnı isə uşaqlarda xoş ovqat yaradır.

Bu maraqlı tamaşada Murad, Gürşad, Gürhan, Bərşad, Cırtdan, Div, Canavar personajlarını teatrın aktyorları Ləman Əhmədova, Əfqanə Ələsgərova, Ulduz Süleymanova, Süleyman Süleymanov, Vəsmə Quliyeva, Arzu Səfərov, İlqar Babayev və başqaları xarakterik və təbii canlandırırlar.

Tamaşanın quruluşçu rejissoru Naxçıvan Muxtar Respublikasının Əməkdar mədəniyyət işçisi Nadir Hüseynov, quruluşçu rəssamı Ədalət Quliyev, bəstəkarı Əli Məmmədovdur.

“Cırtdanın yeni sərgüzəşti” tamaşası uşaqlara xoş əhval-ruhiyyə bəxş edib.

Naxçıvan Muxtar Respublikası Mədəniyyət Nazirliyinin Mətbuat Xidməti
18.04.2019



      Qədim Nuh yurdunda xalqımıza məxsus milli və mənəvi dəyərlərin, folklorumuzun, adət-ənənələrimizin, o cümlədən milli mətbəx nümunələrimizin qorunub saxlanılmasına, onun təbliğ edilməsinə, yaşadılmasına böyük diqqət göstərilir. Artıq ənənə halını alan milli mətbəx günlərinin keçirilməsi, xalqımıza məxsus mətbəx nümunələrinin tanıdılması onların gələcək nəsillərə çatdırılması baxımındam mühüm əhəmiyyət daşıyır. Belə festivallardan biri də aprelin 16-17-də “Naxçıvanqala” Tarix-Memarlıq Muzey Kompleksində keçirildi.

“Kətə” festivalına həm yerli sakinlər, həm də qonaqlar böyük maraq göstəriblər. “Ailə təsərrüfatları ili”nə təsadüf edən, hər il olduğu kimi, bu il də hamının səbirsizliklə gözlədiyi növbəti “Kətə” festivalının ikinci günü də rəngarəng olub. Festivalın sonuncu günü “Ən dadlı kətə” nominasiyası üzrə müsabiqənin nəticələri elan edilib. Nümayiş olunan məhsullar görünüşünə, çeşid müxtəlifliyi və dadına görə münsiflər tərəfindən seçilərək festivalın qalibi, ikinci və üçüncü yerlərin sahibləri müəyyənləşdirilib. Şahbuz rayon Aşağı Qışlaq kənd sakini Südabə Məhərrəmova, Culfa rayon Kırna kənd sakini Çiçək Bayramova, Babək rayon Babək qəsəbə sakini Güllü Əsgərova, Naxçıvan şəhər sakini Nümunə Məmişova müsabiqənin qalibləri elan olunublar. Şərur rayon Ələkli kənd sakini Sevda Kazımova, Sədərək rayon Sədərək kənd sakini Mehbarə Hüseynova, Kəngərli rayon Böyükdüz kəndindən Nəsibə Rzayeva ikinci, Ordubad rayon Yuxarı Əndəmic kəndindən Azadə Mirzəli isə üçüncü yerə layiq görülüblər. Qaliblərə və festivalda fərqlənən “Azad” şirniyyat müəssisəsindən Azad Quliyevə diplomlar təqdim olunub.

Müsabiqənin qaliblərindən Şahbuz rayon Aşağı Qışlaq kənd sakini, ailə təsərrüfatı başçısı Südabə Məhərrəmovanın dedikləri:

– Bir neçə ildir ki, ailə təsərrüfatı yaratmışıq. Təsərrüfatımızda süd və kənd təsərrüfatı məhsulları istehsal edirik. Bu festivalların təşkili məhsullarımızı nümayiş etdirməyə, onlara alıcı tapmağa da şərait yaradır. Buraya gələn qonaqlar isə kətələrin hazırlanmasını və süfrəyə təqdim olunmasını canlı olaraq izləmək, təndirdə bişmiş kətə çeşidlərinin dadına baxmaq imkanı əldə edirlər. Bu cür tədbirlərin davamlı keçirilməsi xalqımıza məxsus mətbəx nümunələrini yaşatmaqda böyük rol oynayır. Göstərilən dövlət qayğısına, yaradılan şəraitə görə minnətdarlıq edirəm.

Digər müsahiblərim, ikinci yerə layiq görülən qadınlar da bu kimi tədbirlərin milli mətbəx nümunələrimizdən olan kətənin tanıdılmasında böyük rolu olduğunu qeyd edirlər. Bildirirlər ki, Naxçıvan mətbəxi öz bənzərsizliyi ilə seçilir. Özünəməxsus dad-tamı ilə qədimdən bəri mətbəximizdə yaşadılan kətə çeşidlərinin də tanıdılması üçün bu festivalların keçirilməsi çox böyük əhəmiyyət kəsb edir. Muxtar respublikanın şəhər və rayonlarına xas müxtəlif çeşiddə kətələrin hazır­lanması qaydalarının nümayiş olunduğu festivala şəhər sakinlərinin, qonaqların, xüsusilə gənclərin marağı böyükdür. Onların içərisində xarici ölkələrdən gəlib burada təhsil alan tələbələr də az deyil. Eləsi var ki, kətənin dadına ilk dəfə baxır və çox dadlı olduğunu deyib bunun necə hazırlanması ilə maraqlanır. Bu da başqa millətlərdən olan insanların kətənin xalqımızın mətbəx nümunəsi olduğunu öyrənmələrinə səbəb olur.

Festivalda həmsöhbət olduğumuz Naxçıvan Dövlət Universitetində təhsil alan türk tələbə Özləm Nefis dedi ki, 4 ildir, Naxçıvanda yaşayıram. Bura təmiz, gözəl bir şəhərdir, insanları qonaqpərvərdir. İlk dəfədir, “Kətə” festivalında iştirak edirəm. Buna baxmayaraq, kətənin dadına bir neçə dəfə baxmışam. Təndirdə bişirilən kətəni isə ilk dəfə idi dadırdım. Çox dadlı və ləzzətlidir. Artıq necə bişirildiyini də öyrənmişəm.

İran İslam Respublikasının Urmiya şəhərindən gəlmiş Araz Əlizadə isə qeyd etdi ki, Naxçıvan mətbəxini hədsiz bəyənirəm. Naxçıvanda keçirilən “Plov”, “Göycə”, “Ailə təsərrüfatı məhsulları” festivallarının da iştirakçısı olmuşam. Belə festivallar insanları bir araya toplayır, adət-ənənələrin unudulmadığını göstərir, həmçinin milli və mənəvi dəyərlərin təbliğində mühüm rol oynayır.

Sədərək rayonundan gələn ailə təsərrüfatı sahibi Mehbarə xanım hazırladıqları kətə ilə bərabər, festivala Sədərəyin məşhur çörəyi olan dəstana da gətirmişdi. Onun dediyinə görə, bu gün bir saat ərzində 25-dən çox dəstana satıb. O vurğuladı ki, bişirdikləri 16 növ kətəyə də maraq çox olub.

Naxçıvanda keçirilən üçüncü “Kətə” festivalına yerli əhalinin və xarici qonaqların böyük maraq göstərmələri bunu bir daha sübut etdi ki, müxtəlif növ yeməkləri ilə yanaşı, Naxçıvan mətbəxinin ləziz dadı olan kətə hər zaman sevilə-sevilə hazırlanır və yeyilir.

Ötən iki gün ərzində buradakı qələbəlik zəngin xalq yaradıcılığımızın, milli dəyərlərimizin, bənzərsiz mətbəximizin təbliği baxımından belə festivalların təşkilinin əhəmiyyətinin çox böyük olduğunu bir daha nümayiş etdirdi.

Naxçıvan Muxtar Respublikası Mədəniyyət Nazirliyinin Mətbuat Xidməti
18.04.2019



      Gözəlliklər məskəni, oğuz yurdu Naxçıvan ötən hər gün daha böyük uğura imza ataraq xoşbəxt gələcəyə doğru inamlı addımlarla irəliləyir. Açılan sabah, doğan Günəş özü ilə bu qədim diyara sevinc, bərəkət, bolluq gətirir, firavan yaşayış naminə çalışan insanların arzuları, xəyalları gerçəyə çevrilir. Ötən illərdən daha sayalı, düşərli gələn 2019-cu il də ömrümüzə, günümüzə xoş anlar bəxş edir. Cari ilin “Ailə təsərrüfatları ili” elan olunduğunu nəzərə alsaq, bu sahədə bir-birini əvəzləyən əlamətdar hadisələrin, tədbirlərin keçiriləcəyi gözləniləndir və bütün bunların hər birimizin yaddaşında unudulmaz, dərin izlər buraxacağı şübhəsizdir. Artıq ötən gün bu istiqamətdə növbəti tədbirə start verildi...

Aprel ayının 16-da şəhərimizdə əsl bayram ab-havası hökm sürürdü. Hər qarışında böyük bir tarix gizlənən Naxçıvanqala ikigünlük “Kətə” festivalının keçirilməsi münasibətilə yenə zəhmətkeş insanların yaratdığı bənzərsiz gözəlliklərlə bəzənmişdi. Onu da qeyd edək ki, Naxçıvan təbiəti min bir sərvəti, şəfalı və faydalı bitkiləri ilə burada hər fəslə, hər mövsümə uyğun zəngin mətbəx mədəniyyətinin əsasını qoymuşdur. Bu gün həmin məhsulların təbliğinə xidmət edən mövsümi festivalların keçirilməsi ənənəsinin formalaşdırılması isə əsl yurdsevərlik nümunəsidir. “Kətə”, “Göycə”, “Arıçılıq məhsulları – bal”, “Plov” kimi festivallar bunun bariz sübutudur.

Festivalda muxtar respublikanın şəhər və rayonlarına xas müxtəlif çeşiddə kətələrin hazırlanması qaydaları nümayiş olunur. Həmişə olduğu kimi, bu dəfə də muzey kompleksinin ərazisində muxtar respublikamızın rayonlarından gəlmiş festival iştirakçıları onlar üçün ayrılmış bölmələrdə öz yerlərini tutmuşdular. Eyni zamanda ictimai iaşə xidmətlərinin təşkili də yüksək səviyyədə idi.

Tədbirin aparıcıları iştirakçıları salamladıqdan sonra bildiriblər ki, Naxçıvan Muxtar Respublikası Ali Məclisi Sədrinin “Naxçıvan Muxtar Respublikasında Xalq yaradıcılığı günlərinin keçirilməsi haqqında” 2009-cu il 7 fevral tarixli, “Şərur yallıları haqqında” 2018-ci il 24 dekabr tarixli sərəncamları muxtar respublikamızda milli və mənəvi dəyərlərimizin, adət-ənənələrimizin qorunub saxlanılmasına və təbliğinə hərtərəfli şərait yaradıb. Aparıcılar naxçıvanlıların daha çox yaz mövsümündə hazırladıqları kətə növləri haqqında da məlumat veriblər. Qeyd olunub ki, xalqımızın qədim kulinariya mədəniyyətində mühüm yer tutan xəmir yeməkləri içərisində kətə məxsusi dadı ilə seçilir. Keçmiş dövrlərdən bu günə qədər Naxçıvanda bişirilən qarışıq göyərti, şomu, çiriş, gicitkən, mərəçüyüd, balqabaq, mərcimək, cəviz kətələri, halvalı kətə, şirin kətə, döymə kətə çox məşhur olub. Yazın ilk aylarında yeyilə bilən yabanı bitkilərdən hazırlanan kətə çeşidləri Naxçıvan mətbəxində xüsusi yerə malikdir. Muxtar respublikanın iqlim şəraiti burada müxtəlif minerallar və vitaminlərlə zəngin olan və yeyilə bilən yabanı bitkilərin yayılmasına imkan verir. Belə bitkilərdən hazırlanan kətə də insan orqanizmi üçün xeyli faydalıdır.

Tədbirdə AMEA Naxçıvan Bölməsinin Bioresurslar İnstitutunun əməkdaşı, biologiya üzrə fəlsəfə doktoru, dosent Ramiz Ələkbərov çıxış edərək bu barədə ətraflı məlumat verib.

Festivala gələnlər müxtəlif çeşiddə kətələrin hazırlanması və süfrəyə təqdim olunmasını canlı olaraq izləmək, təndirdə bişmiş kətə çeşidlərinin dadına baxmaq imkanı əldə ediblər.

Bölgələrə aid stendlərdə gətirilən məhsulların satışı təşkil olunub. Kətə hazırlamaq üçün lazımi mətbəx ləvazimatları gətirilib, ərazidə təndir qurulub.

Mütəşəkkilliyi, rəngarəngliyi ilə seçilən festivalda, əsasən, qadın təsərrüfat sahiblərinin fəallığı, çoxluğu nəzərə çarpırdı. Onlardan Ordubad rayonunun Vənənd kəndindən gəlmiş ailə təsərrüfatçısı Yaqut Babayeva deyir ki, festivala rayon ərazisindən yığılmış müxtəlif çeşiddə pencərlər, 5 kiloqram qovurma, 40 litr dovğa, 20 litr ayran çıxarıb. Onun sözlərinə görə, festivala gələnlərin mətbəximizin ləziz yemək növlərindən sayılan kətəyə marağı böyükdür. Qadın sahibkar yaradılan şəraitə və belə bir tədbirin təşkilinə görə zəhməti olan hər kəsə minnətdarlığını bildirdi.

Tədbirdə həmsöhbət olduğumuz Naxçıvan şəhər sakini Ramiz Əliyev belə mədəni tədbirlərin onlarda xoş ovqat yaratdığını deyir: Bu tədbirlərin keçirilməsi milli mətbəx nümunələrimizin tanıdılması, yaşadılması baxımından faydalıdır. Yazda Naxçıvanda ən çox bişirilən yeməklərdən biri də müxtəlif göyərti növlərindən hazırlanmış yeməklərdir. Naxçıvan təbiətinin bizə verdiyi çeşidli nemətlər süfrələrimizin bəzəyidir. Kimisi bu pencərləri qovurmaqla, kimisi kətə hazırlamaqla ondan istifadə edir. Festivalda satılan kətələrin dadı həm də ondadır ki, bu kətələr təndirdə odunla bişirilir. Digər tərəfdən, artıq bu gün şəhər sakinləri də muxtar respublikamızda yaz dövründə bitən hər hansı pencəri buradan tapa bilərlər. Qiymətləri də münasibdir. Mən də ailəmlə birlikdə festivalın təşkilatçılarına minnətdarlığımı bildirirəm.

Naxçıvan Muxtar Respublikasında Avropa İttifaqının maliyyə dəstəyi ilə “Qadınların Dayanıqlı İnkişaf üçün Səlahiyyətləndirilməsi” adlı yeni layihənin icrası üçün Naxçıvana gələn qonaqlar da həm milli mətbəximizlə, həm də muxtar respublikamızdakı qadın ailə təsərrüfatlarının fəaliyyətləri ilə tanış olmaq üçün festivalda iştirak edirdilər. Avropa İttifaqının Azərbaycandakı nümayəndəliyinin rəhbəri Kestutis Yankauskas təəssüratlarını bizimlə bölüşərək dedi: – Dördüncü dəfədir ki, Naxçıvana səfər edirəm. Bizi burada həmişə qonaqpərvərlik və sevinclə qarşılayırlar. Naxçıvana səfərimizin məqsədi Azərbaycan Mikromaliyyə Assosiasiyasının icra etdiyi yeni layihə ilə əlaqədardır. Layihə qadın sahibkarlara kömək məqsədi daşıyır. Bu, onların öz kiçik bizneslərini inkişaf etdirmələrinə səbəb olacaq, burada mövcud olan ənənəvi sənətkarlığın təbliğinə şərait yaradacaqdır.

İlk dəfədir ki, iştirak etdiyim “Kətə” festivalında da muxtar respublikanın müxtəlif rayonlarından və fərqli yaş qruplarından olan qadın ailə təsərrüfatçıları da diyarınızda qadınların sahibkarlığın inkişafında əhəmiyyətli rol oynadıqlarını bir daha təsdiq edirlər. Həyatımda ilk dəfədir ki, kətə yeyirəm, çox gözəl, özünəməxsus dadı var. “Kətə” festivalında tələbələrin təqdim etdiyi rəqs nümunələri də bizim çox xoşuma gəldi.

BMTİP-in Azərbaycandakı rezident nümayəndəsinin vəzifəsini icra edən Alessandro Frakassetti bildirdi ki, bu, mənim Naxçıvana ilk gəlişimdir. Şəhəriniz çox gözəl və təmizdir, insanlarınız isə qonaqpərvər. Burada keçirilən festival da çox möhtəşəmdir. Muxtar respublika gənclərinin də gülərüzlülüyü, yüksək əhval-ruhiyyəsi diqqətimi çəkdi. Keçirilən fləşmobda gənclərin fəal iştirakı və milli musiqinin təbliğ olunması da təqdirəlayiq haldır. Burada kətənin necə bişirildiyinin şahidi oldum. Kətəni ilk dəfə yedim və çox xoşuma gəldi. Elə düşünürəm ki, dünyanın hansı ölkəsindən bura gəlib bu yeməkləri dadan olsa, mütləq bundan ləzzət alacaq. Mən burada olarkən şahidi oldum ki, kətənin bir çox növü var. Bu ləzzətli təamlardan sevə-sevə dadacağam.

Avropa İttifaqının Azərbaycandakı nümayəndəliyinin əməkdaşlıq bölməsinin rəhbəri Simona Gatti deyib ki, mən də ilk dəfədir ki, Naxçıvanda oluram. Çox şadam ki, bu səfər “Kətə” festivalı ilə üst-üstə düşübdür. Festival yüksək səviyyədə təşkil edilib. Mən də Azərbaycan xalqının qədim kulinariya mədəniyyətində mühüm yer tutan xəmir yeməklərindən biri olan kətənin hazırlanması və süfrəyə təqdim edilməsini gördüm, təndirdə bişmiş kətə çeşidlərinin dadına baxdım. İlk dəfə idi ki, kətə dadırdım. Onu deyim ki, çox ləzzətlidir, dadından doymaq olmur. Stendlərin birinə yaxınlaşıb soruşdum ki, bu kətəni belə ləzzətli edən nədir? Öyrəndim ki, onun içərisində minerallar və vitaminlərlə zəngin, insan orqanizmi üçün çox faydalı, Naxçıvanın gözəl təbiətinin bəhrəsi olan bitkilər – siz buna pencər deyirsiniz, – vardır.

Simona Gatti onu da qeyd edib ki, Naxçıvanda zəngin mətbəx ənənələri həssaslıqla qorunub yaşadılır. Bu həm də yüksək mədəniyyətin göstəricisidir. Digər tərəfdən, öyrəndik ki, bu il Naxçıvanda “Ailə təsərrüfatları ili”dir. Bu festivalda qadın sahibkarların üstünlük təşkil etməsi onu göstərir ki, muxtar respublikada nəinki kişi, həmçinin qadınlar üçün də əlverişli şərait yaradılıb. Onlar öz məhsullarını istehsal edib sata bilirlər. Bu həm də Naxçıvanın kənd yerlərində ailə əməyinə verilən dəyərin göstəricisidir. Əminliklə deyə bilərəm ki, qızımla birgə Naxçıvan səfərimiz çox yaddaqalan olacaq.

Festivala gələnlər arasında digər əcnəbi qonaqlar da az deyildi. Nigeriya vətəndaşı Emmanuel Olumuyiva festivalla bağlı təəssüratlarını bizimlə bölüşdü: – Naxçıvan mətbəxi çox zəngindir. Kətə haqqında onu deyə bilərəm ki, bu, çox dadlı bir yemək növüdür. Məlumatım var ki, bu kətələr Naxçıvanın dağlarında bitən təbii otlardan hazırlanır. Həmçinin kətə ilə birlikdə təqdim edilən dovğa bu əsrarəngiz ləzzəti tamamlayır. Bu festival Azərbaycan xalqının zəngin mədəniyyətə malik olduğunu göstərir.

Festivalda iştirak edən İran İslam Respublikasının vətəndaşı Gülçin Caviddostdan festivalla bağlı təəssüratlarını soruşduqda o bunları dedi: – Naxçıvana ilk səfərim deyil. Rəssam olduğum üçün bir neçə dəfə Naxçıvanda keçirilən festivallara dəvət almışam. Bu şəhərə hər səfərimdə onun daha da gözəlləşdiyinin şahidi oluram. Sanki bu şəhərə hər yeni gün rəssamın fırçasından yeni rənglər, gözəlliklər əlavə edilir. İştirak etdiyim “Kətə” festivalında ləziz təamların bişirilməsi qaydası ilə tanış oldum. Kətə haqqında onu deyə bilərəm ki, bu, çox dadlı bir yemək növüdür. İranda da belə ayaqüstü yemək növləri var. Ancaq kətədə xüsusi bir dad var. Digər tərəfdən, sizin mətbəx mədəniyyətiniz, süfrə təcrübəniz imkan verir ki, dadlı olanı daha ləzzətli şəkildə süfrəyə təqdim edəsiniz. Məlumat aldım ki, belə festivallar Naxçıvanda artıq ənənə halını alıb. Mən də çalışacağam ki, burada keçirilən festivallarda daha çox iştirak edim. Xatırladaq ki, tədbirdə Naxçıvan Dövlət Filarmoniyasının Estrada Orkestrinin, Mahnı və Rəqs Ansamblının bir-birindən maraqlı çıxışları iştirakçılara xoş ovqat bəxş edib. Həmçinin festival üçün ilk sayılan, Naxçıvan Musiqi Kolleci tələbələrinin ifasında göstərilən “Yazın ritmi” adlı fləşmob həm yerli sakinlər, həm də xarici qonaqlar tərəfindən alqışlarla qarşılanıb. Bu fləşmob gözlənilməz Azərbaycan milli rəqsi ilə başlayıb. Fləşmobda nağarada ifa olunan Azərbaycan ritmləri tələbələrin rəqsi ilə ahəngdarlıq təşkil edirdi. Sonra tələbələr yallı gediblər. Festivalda, həmçinin ağac üzərində oyma, xalçaçılıq, dulusçuluq, papaqçılıq nümunələri, duzdan, müxtəlif pencər növlərindən hazırlanan əl işləri göstərilib.

Qeyd edək ki, 17 ictimai iaşə obyektinin və 183 fiziki şəxsin iştirak etdiyi festival bu gün başa çatacaq. Muxtar respublikanın Antiinhisar və İstehlak Bazarına Nəzarət Dövlət Agentliyi, İqtisadiyyat, Kənd Təsərrüfatı, Mədəniyyət, Ekologiya və Təbii Sərvətlər nazirlikləri, AMEA Naxçıvan Bölməsi, şəhər və rayon İcra hakimiyyətlərinin birgə təşkilatçılığı ilə keçirilən festivalın sonunda “Ən dadlı kətə” nominasiyası üzrə müsabiqənin qalibləri elan ediləcək. Nümayiş olunan məhsullar görünüşünə, çeşid müxtəlifliyi və dadına görə münsiflər tərəfindən seçiləcək, festivalın qalibi, ikinci və üçüncü yerlərin sahibləri müəyyənləşəcək, onlara diplomlar təqdim olunacaq.

Naxçıvan Muxtar Respublikası Mədəniyyət Nazirliyinin Mətbuat Xidməti
17.04.2019



      Aprelin 15-də Naxçıvan Dövlət Uşaq Teatrında “Beynəlxalq Mədəniyyət Günü”nə həsr olunmuş tədbir keçirilib.

Tədbiri açan Naxçıvan Muxtar Respublikası Mədəniyyət Nazirliyinin aparıcı məsləhətçisi Elvin Əhmədov bildirib ki, 1935-ci il aprelin 15-də Vaşinqtonda “Bədii, elmi müəssisə və tarixi abidələrin mühafizəsi və qorunması haqqında” imzalanmış müqavilə ilə əlaqədar bu əlamətdar gün təsis olunub. 1998-ci ildə “Mədəniyyətin Müdafiəsi Beynəlxalq Liqası” adlı ictimai təşkilat bu tarixin Beynəlxalq Mədəniyyət Günü kimi qeyd olunması təşəbüsü ilə çıxış etmiş və həmin vaxtdan dünyanın bir çox ölkələrində Beynəlxalq Mədəniyyət Günü kimi qeyd olunmaqdadır. Azərbaycan UNESKO ilə mədəniyyət sahəsində sıx əməkdaşlıq edir.

Qeyd edilib ki, ümummilli lider Heydər Əliyev tərəfindən müəyyənləşdirilən mədəniyyət siyasəti bu gün ölkəmizdə, o cümlədən Naxçıvan Muxtar Respublikasında uğurla həyata keçirilir. Naxçıvan Muxtar Respublikası Ali Məclisi Sədrinin mədəniyyət və incəsənət sahələrinə qayğısı bunun bariz ifadəsidir. Qədim diyarımızda yeni mədəniyyət müəssisələri, muzeylər, kitabxanalar, uşaq musiqi, incəsənət və bədii sənətkarlıq məktəbləri, teatrlar üçün yeni binalar inşa olunmuş və ya əsaslı təmir edilərək istifadəyə verimişdir. Mədəniyyət müəssisələrinin maddi-texniki bazalarının möhkəmləndirilməsi sahəsində görülən işlər bu gün uğurla davam etdirilir.

Bu gün qədim diyarımızda tarixi-mədəni irsin qorunub saxlanması sahəsində görülən işlər öz bəhrəsini vermişdir. Ötən il Naxçıvanda “Naxçıvan İslam Mədəniyyətinin Paytaxtı” tədbirlərinin uğurla keçirilməsi, “Yallı” (Köçəri, Tənzərə), Naxçıvanın ənənəvi qrup rəqslərini UNESCO-nun Təcili Qorunma Siyahısına daxil edilməsi hamımızda iftixar hissi doğurur.

Tədbirin bədii hissəsində Şərur Rayon Mədəniyyət Sarayının “Şərur qönçələri” uşaq yallı ansamblı “Tirməşal”, “Xələfi” yallılarını, Babək Rayon Nehrəm Kənd Mədəniyyət Evinin nağara dərnəyi “Azərbaycan ritmləri”, Babək Rayon Mədəniyyət Sarayının rəqs dərnəyi “Azərbaycan maralı” rəqsini, Babək Rayon Vayxır Kənd Mədəniyyət Evinin balaban dərnəyi “Nəlbəki rəqsi”ni, Culfa Şəhər Klubunun dram dərnəyi “Kitablar tozlanmasın” pantomim tamaşasını göstərmişlər.

Naxçıvan Muxtar Respublikası Mədəniyyət Nazirliyinin Mətbuat Xidməti
15.04.2019



      Rayon Mədəniyyət Sarayında Xalq teatrının üzvləri Əbdürrəhim bəy Haqverdiyevin “Məşədi Qulam qiraət edir” pyesi əsasında eyniadlı tamaşanı yaxın günlərdə teatrsevərlərə təqdim edəcəklər. Hazırda tamaşanın səhnələşdirilməsi üçün məşqlər davam edir.

Rayon Mədəniyyət şöbəsinin müdiri Mübariz Əliyev bildirir ki, bu il rayon Mədəniyyət Sarayının istifadəyə verilməsi mədəniyyət işçilərinin böyük sevincinə səbəb oldu. Çünki kollektivimiz tamaşalar hazırlamaqda, tədbirlər keçirməkdə çətinliklər çəkirdi. Müasir arxitektura üslubunda tikilərək istifadəmizə verilən Mədəniyyət Sarayı sayəsində biz artıq mədəni-kütləvi tədbirlərin keçirilməsində heç bir problemləüzləşmirik. Göstərilən diqqət və qayğıdan istifadə edən Xalq teatrının üzvləri də bu qayğıya əməli işi ilə cavab verməyə çalışırlar. Bunun üçün tez-tez mədəni-kütləvi tədbirlər təşkil edir, rayon sakinlərinin asudə vaxtlarının səmərəli keçirilməsinə çalışırlar. Elə “Məşədi Qulam qiraət edir” pyesi əsasında eyniadlı tamaşanın səhnələşdirilməsi də bu məqsədə xidmət edir.

Tamaşanın quruluşçu rejissoru Namiq Mehdiyev tamaşaçılara yaxşı bir əsər təqdim etmək üçün mütəmadi məşqlərin getdiyini vurğuladı. Bildirdi ki, teatrın musiqi tərtibatçısı Emin Hüseynovun, quruluşçu rəssam Səxavət Paşayevin və baş rolların ifaçılarının səyi ilə tamaşanı çox yüksək səviyyədə teatrsevərlərə təqdim etmək arzusundayıq. Ona görə də çox ciddi şəkildə qarşıya qoyulan məqsədə çatmağa çalışırıq.

Səhnə dekorasiyalarının maraqlı tərtibatı, musiqilərin tamaşanın ümumi ahənginə uyğunlaşdırılması, rolların daxili aləmini açan geyimlərin hazırlanması və başqa bir çox cəhətlərə də ciddi diqqət yetirilir. Bütün bunlar isə tamaşanın uğur qazanacağına təminat yaradan əsas səbəbdir.

Kollektiv komediyanın məşqlərinə yanvar ayının əvvəllərindən başlayıb. Komediya birpərdəlidir. Əsərin hazırlanmasında, ərsəyə gəlməsində Xalq teatrının üzvləri Elbəyi Qəhrəmanov, Emin Hüseynov, Vahid Məlikov, Səadət Abdinova, Abbasəli Abbasov və İlahə Nəcəfova əsərin məzmununun tam, dolğun açılması üçün bütün imkanlarından istifadə etməyə çalışırlar. Hər kəs də öz işini böyük ürəklə, məharət və bacarıqla yerinə yetirir. Müntəzəm olaraq keçirilən məşqlər davam etdirilir. Əminik ki, ötən illərdə Xalq teatrında səhnə həyatı verilən digər tamaşalar kimi, bu tamaşa da teatrsevərlərin rəğbətini qazanacaq.

Naxçıvan Muxtar Respublikası Mədəniyyət Nazirliyinin Mətbuat Xidməti
14.04.2019



      Aprelin 13-də Naxçıvan Dövlət Uşaq Teatrı böyük yazıçı və dramaturqumuz Cəlil Məmmədquluzadənin “Çay dəsgahı” pyesinin motivləri əsasında hazırladığı “Bu günün çay dəsgahı” iki şəkilli alleqorik komediyasını Culfa Rayon Mədəniyyət Sarayında rayonun uşaq və məktəbliləri üçün nümayiş etdirib.

Zahirən təmsilvari və əyləncəli təsir bağışlayan, ədəbiyyatımızda ilk alleqorik və mənzum dram əsəri olan bu dram əsərinin motivləri əsasında hazırlanan tamaşa bu günümüzlə əlaqələndirilib. Qeyd etmək lazımdır ki, bu əsər milli uşaq dramaturgiyamızda ilk nümunə kimi də diqqəti cəlb edə bilər. Böyük yazıçının əsərindəki əsas mövzu saxlanılsa da tamaşanın quruluşçu rejissoru Nurbəniz Niftəliyeva əsərin personajlarını həm də müasir dövrün elmi-texniki imkanları ilə uyğunlaşdırmağa çalışıb və personajların hamısına müasir adlar da verməyi unutmayıb. Əsərin süjet xətti müqəssirin tapılması üzərində qurulmuşdur. Tamaşadakı bütün dialoqlar da buna xidmət edir. Somavar (Sarvan), Padnos (Pərvanə), Truba (Totu), Çaynik (Ceka), Maşa (Məşdi), Qaşıq (Qoşqar), Stəkan (Sitarə), Nəlbəki (Nüşabə) həm də cansız əşyadan canlı personaja çevriliblər.

Əsərin yalnız bir canlı obrazının – Nökər Əlinin adı dəyişməyib.

Tamaşanın əsas mövzusu isə quruluşçu rejissor tərəfindən saxlanılıb. Rəqslərin də quruluşunu verən Nurbəniz Niftəliyeva və musiqi tərtibatçısı Mirsaleh Seyidov tamaşaya dinamiklik gətirə biliblər. Tamaşadakı rolları isə Uğur Nəsirli, Nurlan Qafarov, Səkinə Məmmədova, Nihad Mahmudov, Mirmehdi Seyidov, Tuncay Əşrəfov, Ülvi Bədəlov, Aysu Dünyamalıyeva, Heyran Abdullayeva maraqla təqdim etməyi bacarıblar. Balaca aktyorlar tamaşada əslində iki surət canlandırırlar.

Qeyd edək ki, “Çay dəsgahı” pyesi əsasında C.Məmmədquluzadə adına Naxçıvan Dövlət Musiqili Dram Teatrında və M.T.Sidqi adına Naxçıvan Dövlət Kukla Teatrında vaxtilə eyni adlı tamaşa hazırlanıb.

Tamaşa maraqla qarşılanıb.

Naxçıvan Muxtar Respublikası Mədəniyyət Nazirliyinin Mətbuat Xidməti
13.04.2019



      “Beynəlxalq Abidələr və Tarixi Yerlər Günü” münasibətilə tədbir olub. Xan Sarayı Dövlət Tarix-Memarlıq, Möminə Xatın və Açıq Səma Altında Muzey Kompleksinin direktoru Nəzakət Əsədova qeyd edib ki, aprelin 18-i dünyada “Beynəlxalq Abidələr və Tarixi Yerlər Günü” kimi qeyd olunur. Bu əlamətdar gün Tarixi Yerlər və Abidələrin Mühafizəsi Şurasının təklifi üzrə UNESCO tərəfindən 1983-cü ildə təsis olunub. Məqsəd insanların diqqətini abidələrin və tarixi yerlərin qorunmasına yönəltməkdir.

Sonra AMEA Naxçıvan Bölməsinin Tarix, Etnoqrafiya və Arxeologiya İnstitutunun şöbə müdiri Toğrul Xəlilov bildirib ki, dünya sivilizasiyasına dəyərli töhfələr verən Naxçıvan qədim, orta əsrlər və yeni dövr tariximizin izlərini özündə əks etdirən nadir maddi mədəniyyət və bədii memarlıq abidələri ilə zəngindir. Möminə Xatın, Əlincəqala, Gülüstan türbəsi, Qarabağlar Türbə kompleksi, Əshabi-Kəhf, Xan Sarayı və digər bir-birindən gözəl, təkrarsız memarlıq nümunələri və arxeoloji abidələri bu diyarın tarixin səhifələrinə vurduğu özünütəsdiq möhürü və daş pasportudur.

Digər çıxış edənlər muxtar respublikada bu gün tarixi abidələrin əsaslı təmir və bərpa olunması, ziyarətgahlara, məscidlərə, hamamlara, türbə komplekslərinə ikinci həyat verilməsindən danışıblar.

Tədbirdə iştirak edən Naxçıvan Müəllimlər İnstitutunun tələbələri, muzey direktorları və işçiləri muzeydə muxtar respublikanın tarixi abidələrinin əks olunduğu rəsmlərdən ibarət sərgiyə baxıblar.

Naxçıvan Muxtar Respublikası Mədəniyyət Nazirliyinin Mətbuat Xidməti
13.04.2019



      Cəlil Məmmədquluzadə adına Naxçıvan Muxtar Respublika Ədəbiyyat Muzeyində “Molla Nəsrəddin” jurnalının nəşrə başlamasının 113-cü illiyinə həsr olunmuş “Molla Nəsrəddin” ədəbi məktəb yaratmış ilk mətbu orqandır” mövzusunda tədbir keçirilib.

Tədbiri giriş sözü ilə Cəlil Məmmədquluzadə adına Naxçıvan Muxtar Respublika Ədəbiyyat Muzeyinin direktoru Aləmzər İbrahimova açaraq qeyd edib ki, Azərbaycan mətbuatı tarixində əvəzsiz rol oynamış, XX əsr ictimai fikir və ədəbiyyat tariximizdə yeni dövr açmış, klassik irsimizin dəyərli abidələrindən biri, təkcə Azərbaycanda deyil, bütün Yaxın və Orta Şərq ölkələrində siyasi satiranın ilk qaranquşu “Molla Nəsrəddin” jurnalı və onun nəşri tarixini öyrənməyin böyük əhəmiyyəti vardır.

Sonra Azərbaycan Respublikasının Əməkdar müəllimi, dosent Kamal Camalovun və Naxçıvan Muxtar Respublikasının Əməkdar müəllimi, dosent Nəzakət İsmayılovanın çıxışları dinlənilib.

Tədbirin bədii hissəsində muzey əməkdaşları “Molla Nəsrəddin” jurnalında çap olunmuş felyetonları bədii qiraət ediblər.

Sonda tədbir iştirakçıları Cəlil Məmmədquluzadə və “Molla Nəsrəddin” jurnalına həsr olunmuş guşəyə baxıblar.

Naxçıvan Muxtar Respublikası Mədəniyyət Nazirliyinin Mətbuat Xidməti
13.04.2019



      Aprelin 12-də Şahbuz Rayon Mədəniyyət Sarayında istedadlı müğənni Vəli Səfərovun Naxçıvan Muxtar Respublikasının 95 illiyinə həsr olunmuş “Şahbuzum” adlı solo konserti olub. Konsert Naxçıvan Muxtar Respublikası Mədəniyyət Nazirliyi və Şahbuz Rayon İcra Hakimiyyəti tərəfindən təşkil olunmuşdur. Müğənnini Naxçıvan Dövlət Filarmoniyasının Mahnı və Rəqs Ansamblı müşaiyət edib. Ansamblın bədii rəhbəri Azərbaycan Respublikasının Əməkdar artisti Zeynallabdin Babayevdir.

Konsertin aparıcısı bildirib ki, bu gün qədim tariximizin, milli dəyərlərimizin və mədəni irsimizin qorunub yaşadıldığı səfalı rayonlardan olan Şahbuzda sizinlə görüşmək bizim üçün xoşdur. Özünəməxsus adət-ənənələri, folklor nümunələri, musiqi mədəniyyəti və aşıq sənəti ilə seçilən Şahbuz rayonunda aparılan quruculuq işləri mədəniyyət müəssisələrini də əhatə etmişdir. Bu gözəl Mədəniyyət Sarayı da bu ilin töhfələrindəndir.

Qeyd edilib ki, bu il muxtar respublikamız üçün əlamətdar ildir. Naxçıvan Muxtar Respublikası Ali Məclisi Sədrinin 21 yanvar 2019-cu il tarixli Sərəncamına əsasən “Naxçıvan Muxtar Respublikasının 95 illik yubileyinə həsr olunmuş Tədbirlər Planı” təsdiq edilmiş, Tədbirlər Planında muxtar respublikanın 95 illik yubileyinin geniş qeyd edilməsi ilə bağlı müxtəlif silsilə tədbirlərin keçirilməsi nəzərdə tutulmuşdur.

Azərbaycan xalqının ümummilli lideri Heydər Əliyevin Azərbaycana rəhbərlik etdiyi dövrdə Naxçıvanla bağlı verdiyi sərəncamlar, bu diyara tarixi səfərləri, ərazi bütövlüyü və təhlükəsizliyi üçün həyata keçirdiyi tədbirlər muxtariyyət statusunun hüquqi cəhətdən möhkəmləndirilməsi və taleyüklü digər məsələlərin yerinə yetirilməsi Naxçıvanın hərtərəfli inkişafını təmin etməklə onu çiçəklənən, günü-gündən müasirləşən bir diyara çevirmişdir.

Vurğulanıb ki, Naxçıvan Muxtar Respublikası Ali Məclisinin Sədri cənab Vasif Talıbovun rəhbərliyi ilə 20 ildən artıq dövrdə qədim diyarımızın siması dəyişmiş, şəhər, kənd və rayon mərkəzlərində irimiqyaslı tikinti-quruculuq, abadlıq və bərpa işləri həyata keçirilmiş, tarixə, mədəniyyətə, səhiyyəyə, təhsilə qayğı artmış, yeni infrastruktur obyektləri tikilmiş, muxtar respublika inkişaf və intibaha qovuşmuşdur.

Bildirilib ki, Vəli Səfərov Naxçıvan Dövlət Universitetində təhsil almışdır. Müğənni indiyədək Azərbaycanda keçirilən bir çox müsabiqələrdə iştirak etmişdir. Müğənninin konsert və televiziyalardakı çıxışları rəğbətlə qarşılanır.

Konsert Vəli Səfərovun ifasında “Şahbuzumun” mahnısı ilə başlayıb.

Müğənninin bir-birinin ardınca ifa etdiyi Tofiq Əhmədovun “Güldür məni”, Ələkbər Tağıyevin “Eşqimi sönməyə qoymaram”, “Tək sən səslə məni” Oqtay Kazıminin “Üzü dönsün bu dünyadan”, Zeynab Xanlarovanın “Unuda bilmirəm”, Bəhram Mansurovun “Ötən gənclik”, Razim Paşayevin “Peşmanı kim olacaq”, Elçin Cəlilovun “Yaşayıram el üçün” mahnıları alqışlarla qarşılanıb.

Konsertdə Vəli Səfərovun ifasında Azərbaycanı və Naxçvanı tərənnüm edən “Azərbaycanım”, “Naxçıvanım”, “İl nə gözəldir” və başqa mahnılar da səslənib. Konsert rayon sakinlərində xoş ovqat yaradıb.

Naxçıvan Muxtar Respublikası Mədəniyyət Nazirliyinin Mətbuat Xidməti
12.04.2019



      Aprelin 12-də Culfa Rayon Qazançı Kənd Mədəniyyət Evində Naxçıvan Dövlət Film Fondu kənd ictimaiyyətinə Azərbaycan kinosu günü çərçivəsində “Yol əhvalatı” filmini göstərmişdir.

Filmin nümayişindən əvvəl Naxçıvan Dövlət Film Fondunun əməkdaşı Şənhəyat Səfərova çıxış edərək bildirib ki, xalqımızın ümummilli lideri Heydər Əliyev milli kinomuzun inkişafına həmişə böyük diqqət və qayğı göstərmişdir. Kinomuzda baş verən inkişaf və yeniləşmə, tərəqqi, keyfiyyət dəyişiklikləri məhz bu dahi şəxsiyyətin müstəsna xidmətləri sayəsində mümkün olmuşdur.

Azərbaycan kinosu tarixin sınaqlarından həmişə şərəflə çıxmışdır. Kino tariximizdə çətin illər də olmuş, lakin buna baxmayaraq kinomuz mədəni hadisələr yaşamış, həmişə xalqımızın tarixini, milli adət-ənənələrini, milli dəyərlərini yaşatmış, həyatımızın bütün sahələrinə nüfuz edərək sevilən bir sənətə çevrilmişdir.

Qeyd edilib ki, Azərbaycan kino tarixinin əsl inkişaf dövrü sayılan 1970-1980-ci illərdə kino salnaməmizin unudulmaz səhifələrini təşkil edən, mədəniyyətimizin qızıl fonduna daxil olan tarixi filmlər yaradılmış, digər görkəmli əsərlər ekranlaşdırılmış, müasir mövzulu və sənətkarlıq baxımından diqqətəlayiq filmlər çəkilmişdir. Azərbaycan kinosunun bir sıra filmləri bu illərdə yüksək dövlət mükafatlarına layiq görülmüş, beynəlxalq kino festivallarında və müsabiqələrində mükafatlar almışdır.

Bu gün ümummilli liderimizin kinonun inkişafı üçün gördüyü işlər ölkə Prezidenti cənab İlham Əliyev tərəfindən uğurla davam etdirilir. Ölkə başçısı 2008-ci il 4 avqust tarixli Sərəncamla “Azərbaycan kinosunun 2008-2018-ci illər üçün inkişafına dair Dövlət Proqramı”nı təsdiq etmişdir.

Sonra 1980-ci ildə lentə alınan “Yol əhvalatı” filmi nümayiş etdirilmişdir. Quruluşçu rejissoru Teymur Bəkirzadə olan “Yol əhvalatı” filmində şən və xeyirxah sürücü, gənc Mustafa gözəl Zümrüdlə evlənmək arzusundadır. Ancaq oğlan qızın atasının, daha doğrusu, “işbaz”, alverçi Qurbanın heç ürəyincə deyil. Bu uğursuz nişanlının öz sevgilisinə qovuşması üçün çalışması onu çətin vəziyyətlərə salır, amma o, inadından dönmür, nəhayət qalib çıxır. Zümrüd məhz ona ərə gedir.

Film iki sevən gəncin məhəbbəti fonunda əli əyrilərin ifşası ilə sona yetir.

Filmin quruluşçu operatoru Şərif Şərifov, Ələsgər Ələkbərov, bəstəkarı Polad Bülbüloğludur. Rolları Səyavuş Aslan, Həmidə Ömərova, Yaşar Nuri, Hacı İsmayılov, Zərnigar Ağakişiyeva, Eldəniz Zeynalov və digərləri canlandırırlar.

“Yol əhvalatı” filmi tamaşaçılar tərəfindən maraqla qarşılanıb.

Naxçıvan Muxtar Respublikası Mədəniyyət Nazirliyinin Mətbuat Xidməti
12.04.2019



      Naxçıvan Muxtar Respublikası Bəstəkarlar Təşkilatının üzvləri və Naxçıvan Musiqi Kollecinin müəllim və tələbələri ilə Xalq artisti, “Şöhrət” ordenli, professor Tofiq Bakıxanovun görüşü və ustad dərsi keçirilib.

Naxçıvan Musiqi Kollecində keçirilən tədbiri giriş sözü ilə açan kollecin direktoru, Naxçıvan Muxtar Respublikasının Əməkdar mədəniyyət işçisi Günay Əliyeva deyib ki, görkəmli bəstəkarımız Tofiq Bakıxanov dəfələrlə qədim diyarımızda olmuşdur. Görkəmli bəstəkar bir sıra fəxri adları ilə bərabər Naxçıvan Muxtar Respublikasının Əməkdar incəsənət xadimi adını şərəflə daşıyır. Müxtəlif janrlarda əsərlər yazan Tofiq Bakıxanovun əsas yaradıcılıq meyarı istedad və bacarıq, zəhmət və iradə, yorulmaq bilmədən çalşmaqdır.

Naxçıvan Muxtar Respublikası Bəstəkarlar Təşkilatının sədri, Naxçıvan Muxtar Respublikasının Əməkdar incəsənət xadimi Yaşar Xəlilov çıxış edərək bildirib ki, Tofiq Bakıxanovun yaradıcılığı musiqi mədəniyyətimizin sevilən sənət nümunələridir. Onun musiqili komediyaları, “Xəzər balladası”, “Şərq poeması, Xeyir və Şər” baletləri, çoxsaylı simfonik əsərləri, simfonik muğamları, mahnıları, violonçel, tar, fortepiano üçün bəstələdiyi konsertlər, mahnı və romansları, kamera-instrumental əsərləri, kamera-vokal əsərləri, kino musiqisi zəhmət və istedadın vəhdətindən yaranmışdır. O, 1958-ci ildən Azərbaycan Bəstəkarlar İttifaqının İdarə Heyətinin üzvüdür. Musiqi sahəsindəki əməyinə görə Tofiq Bakıxanov dövlətimizin yüksək mükafatlarına layiq görülüb. Bu gün isə Naxçıvanla sıx yaradıcılıq əlaqələri saxlayan bəstəkara Naxçıvan Muxtar Respublikası Bəstəkarlar Təşkilatının fəxri üzvüdür.

Tədbirdə Tofiq Bakıxanov Naxçıvanda musiqi mədəniyyətinə göstərilən böyük qayğıdan danışıb. Qeyd edib ki, o yaradıcılığının bir hissəsini qədim Naxçıvana həsr edib. Hər dəfə Naxçıvana gələndə yeniliklərlə rastlaşır ki, bu da onun yeni əsərlərin yaranmasına sövq edir.

Kollecdə keçirilən ustad dərsdə bəstəkar bildirib ki, musiqiçi olmaq istəyən hər bir insan təcrübə vərdişlərini inkişaf etdirməli, fərdi xüsusiyyətlərdən yaradıcılıqla istifadə etməlidir. Bəstəkar müəllim və tələbələrin suallarını cavablandırıb.

Tədbirin bədii hissəsində Naxçıvan Musiqi Kollecinin tələbələrinin konserti olub. Konsertdə muğamlarımızla yanaşı, dünya bəstəkarlarının əsərləri səslənib. Əvvəlcə kollecin “Buta” muğam ansamblının kompozisiya ifa olunub. Sonra xarici ölkə bəstəkarlarının skripka, fortepiano, qanun üçün yazdığı musiqilər səslənib. Konsert Qran-pri mükafatçısı, kollecin tələbəsi Nəcəf Hacılının nağarada ifa etdiyi kompozisiya ilə başa çatıb.

Həmin gün bəstəkar Tofiq Bakıxanov Naxçıvan Şəhər Uşaq Musiqi və İncəsənət Məktəbində Naxçıvan şəhərində fəaliyyət göstərən uşaq musiqi incəsənət və bədii sənətkarlıq məktəblərinin müəllimləri ilə də görüşüb və ustad dərs keçib.

Tədbirdə çıxış edən Naxçıvan Muxtar Respublikası Mədəniyyət Nazirliyinin baş məsləhətçisi Leyla Əlimərdanova Tofiq Bakıxanovun həyat və yaradıcılığına nəzər salıb, onun Azərbaycan bəstəkarlıq məktəbində böyük xidmətləri olduğunu qeyd edib. Bildirilib ki, 1930-cu ildə Xalq artisti Əhməd Bakıxanovun ailəsində dünyaya göz açmış Tofiq Bakıxanov mükəmməl musiqi təhsili alıb, Azərbaycan və dünya klassik musiqi ənənələrini mənimsəyib. Hələ gənclik illərində skripka ifaçısı kimi də tanınan görkəmli sənətkar bir çox səhnə əsərlərinə musiqi yazıb, baletlər, simfonik əsərlər, simfonik muğamlar, çoxlu sayda kamera-instrumental və kamera-vokal əsərləri, mahnılar, romanslar bəstələyib.

Tədbirdə çıxış edən Tofiq Bakıxanov əvvəlcə Naxçıvanda musiqinin inkişafına göstərilən böyük qayğıdan danışıb, Azərbaycan musiqisinin qədim və zəngin ənənələrindən söhbət açıb. Naxçıvan torpağının yetirmələri olan bəstəkarlar Ərtoğrol Cavid, Məmməd Nəsirbəyov, Nəriman Məmmədov, Rəşid Məmmədov haqqında xatirələrini bölüşüb.

Ustad dərsdə isə bəstəkar ifaçılıq texnikasından, üslub və forma yeniliklərindən danışıb. Bildirib ki, peşəkar musiqiçi olmaq istəyən şagirdlər uşaq musiqi məktəblərində bu sənətə dərindən yiyələnməlidir. Muxtar respublikanın məktəblərində musiqi təhsili üçün hər cür imkan və şərait yaradılmışdır.

Naxçıvan şəhər uşaq musiqi incəsənət və bədii sənətkarlıq məktəblərinin müəllim və tələbələrinin ifasında Üzeyir Hacıbəyovun “Koroğlu” operasından “Rəqs”, Ərtoğrol Cavidin “Ay nəğməsi”, “Sonatina”, “Melodiya”, “Batabat yaylaqları”, “Noktürn”, Vasif Adıgözəlovun “Qərənfil”, Faiq Sücəddinovun “Vətən balladası”, “Gül açdı” xalq mahnısı və başqa musiqi əsərləri ifa olunub.

Sonda Tofiq Bakıxanov gənc musiqiçilərə yaradıcılıq tövsiyələri verib, onların suallarını cavablandırıb.

Naxçıvan Muxtar Respublikası Mədəniyyət Nazirliyinin Mətbuat Xidməti
11.04.2019



      Aprelin 10-da Naxçıvan Şəhər Uşaq Musiqi və İncəsənət Məktəbində “Müasir gənclik və mədəniyyətimiz” devizi ilə “Adət-ənənələrimizin simvolikası – yallı” mövzusunda dəyirmi masa keçirilib.

Naxçıvan Muxtar Respublikası Mədəniyyət Nazirliyinin təşkilatçılığı ilə keçirilən dəyirmi masada Mədəniyyət üzrə Elmi-Metodik Mərkəzin direktoru Səyyar Məmmədov çıxış edərək bugünkü tədbirin əhəmiyyətindən danışıb. Bildirilib ki, yallılar əsrlərin süzgəcindən keçərək xalqımıza m