Naxçıvan Muxtar Respublikasının Mədəniyyət Nazirliyi tərəfindən 2019-cu ilin Novruz Bayramı günlərində milli-mənəvi dəyərlərimizin təbliği, əhalinin asudə vaxtının səmərəli təşkili məqsədilə müxtəlif tədbirlərin keçirilməsi nəzərdə tutulur.

       Martın 19-da “Naxçıvanqala” Tarix-Memarlıq Muzey Kompleksində Novruz bayramı şənlikləri çərçivəsində Nazirliyin tabeliyində fəaliyyət göstərən yaradıcı kollektivlər tərəfindən xalq yaradıcılığı və folklor nümunələri, milli musiqi və yallılar, rəngarəng konsert proqramları, teatr tamaşalarından səhnəciklər şənlik iştirakçılarına təqdim ediləcək.

       Həmçinin 20-24 mart tarixlərdə Naxçıvan Dövlət Filarmoniyasının Mahnı və Rəqs Ansamblı, Estrada Orkestri və Kamera Orkestri, Naxçıvan Musiqi Kollecinin “Gənclik” instrumental ansamblı və Naxçıvan Şəhər Mədəniyyət Şöbəsinin “Şəlalə” instrumental ansamblı hər gün saat 1100-dan 1300-dək “Naxçıvanqala” Tarix-Memarlıq Muzey Kompleksində konsert proqramı ilə çıxış edəcək.

       Bayram günlərində Nazirliyin sistemində fəaliyyət göstərən muzey və muzeytipli müəssisələr muxtar respublika əhalisinə və qonaqlara xidmət göstərəcək.

       C.Məmmədquluzadə adına Naxçıvan Dövlət Musiqili Dram Teatrı 22 mart, M.T.Sidqi adına Naxçıvan Dövlət Kukla Teatrı 20-23 mart, Naxçıvan Dövlət Uşaq Teatrı 20-25 mart tarixlərdə tamaşalar göstərəcəklər.

       19-25 mart tarixlərdə muxtar respublikanın 19 kəndində rayon mədəniyyət şöbələrinin, kənd mədəniyyət evləri və klubların, uşaq musiqi məktəblərinin kollektivləri konsert proqramları ilə çıxış edəcək.

       25 mart tarixdə Naxçıvan Dövlət Film Fondunda məktəblilər üçün film nümayişi təşkil ediləcəkdir.

       Qeyd: Həmçinin, bayram günlərində muxtar respublika ərazisində dislokasiya olunan hərbi hissə və bölmələrin əsgər və zabitləri qarşısında bayram konsertləri veriləcəkdir.

---

Bu il Novruz bayramı “Naxçıvanqala”da
qeyd olunacaq

       Yurdumuza Bahar gəlir. Bu münasibətlə xalqımızın qeyd etdiyi Novruz bayramı hər il Naxçıvanda xüsusi təntənə ilə keçirilir. Novruz bayramı bu il “Naxçıvanqala” Tarix-Memarlıq Muzey Kompleksində qeyd olunacaq.

       Bayram şənliyi martın 19-da saat 1100-da başlayacaq. Şənliklər çərçivəsində xalq yaradıcılığı və folklor nümunələrimiz, milli musiqi və yallılarımız, rəngarəng konsert proqramları, teatr tamaşalarından səhnəciklər şənlik iştirakçılarına təqdim ediləcək. Burada həmçinin milli mətbəx nümunələrimiz də bayram tədbirinin iştirakçılarına təklif ediləcək.

            Bayram konsertləri 20-24 mart tarixlərdə davan etdiriləcək.

---

MÜSABİQƏ!

      Naxçıvan Muxtar Respublikasının Mədəniyyət Nazirliyi və Naxçıvan Muxtar Respublikası Bəstəkarlar Təşkilatının birgə təşkilatçılığı ilə Naxçıvan Muxtar Respublikasının 95 illik yubileyinə həsr olunmuş “Səni tərənnüm edirəm doğma Naxçıvan” devizi altında mahnı müsabiqəsi keçiriləcəkdir. Müsabiqənin əsas məqsədi qədim diyarımız Naxçıvanı - onun təbiətini, zənginliklərini, yetirdiyi dahi şəxsiyyətləri tərənnüm edən yeni mahnıların yazılmasıdır. Müsabiqədə professional və həvəskar bəstəkarlıqla məşğul olan yaşı 18-dən yuxarı şəxslər iştirak edə bilərlər.

      Müsabiqə bir turdan ibarətdir. Müsabiqə qaliblərinin mükafatlandırılması üçün professional və həvəskar bəstəkarlar nominasiyaları olmaqla hər biri üzrə bir I yer, bir II yer və bir III yer təsis edilmişdir. Qaliblərin mükafatlandırılması üçün I yer - 1000 AZN, II yer - 500 AZN, III yer - 250 AZN mükafat fondu ayrılmışdır.

Müsabiqədə iştirak etmək istəyənlər 2019-cu il sentyabr ayının 10-dək Təşkilat Komitəsinə ərizə ilə müraciət edə bilərlər. (Telefon: 036 - 545-02-54) Musiqi əsərlərinin notu çap şəklində ərizəyə əlavə olunmalıdır. Müsabiqə zamanı bəstəkar əsərləri solist və ya xorun ifasında canlı olmaqla hər hansı orkestr, ansambl və ya konsertmeysterin müşayiəti ilə təqdim edilməlidir. Müsabiqənin 2019-cu il oktyabr ayının ikinci yarısında Naxçıvan şəhərində keçirilməsi nəzərdə tutulur.

Naxçıvan Muxtar Respublikası Mədəniyyət Nazirliyi
Naxçıvan Muxtar Respublikası Bəstəkarlar Təşkilatı